رواية روز الأحمد الحلقة التاسعة 9 بقلم مريم

 رواية روز الأحمد الحلقة التاسعة 9 بقلم مريم 

رواية روز الأحمد الحلقة التاسعة 9 بقلم مريم

رواية روز الأحمد الحلقة التاسعة 9 بقلم مريم 

_ يوه بقى شكلنا مش هنخلص من الاسطوانة دي 

فقالت بجدية : لأ هنخلص منها انهارده ، ومش هقول حاضر وطيب ونعم على اي حاجة زي ما حضرتك انسان انا انسانة انت ليك حرية انا كمان ليا حرية، في حاجة اسمها انت قُلت اللي انت عايزة انا من حقي اني اتفق او اعترض عليه لاني ليا شخصيتي المستقلة انا مش تابع ليك علشان اوافقك على كل حاجة، في حاجة اسمها نتناقش بس طبعا حضرتك بتقول ما بحبش حد يناقشني وانا موافقة ومش هناقشك لاني هقولك على اللي انا عايزه اعمله واللي انت لازم توافق عليه ومش هقبل منك اي مناقشة، انا مش هسمحلك توصلني تاني لاني مش متقبلة الفكرة دي ومش مريحاني، انت بقى فعلا يهمك موضوع اني ما اروحش في وقت متأخر فالموضوع في ايديك انك تخليني اروح بدري عن كده لأن كل اللي هنا بيجيوا 9 وبيرحوا 6 الا انت وانت + اني عرفت كمان انك في الاغلب بتروح 6 ونادرا لما بتروح 9 يعني انت اخترعت موضوع الساعة 9 ده علشان تزعجني وتضايقني انا وابقى محتاجة انك توصلني ويبقى ليك جمايل عليا وتتحكم فيا زي ما انت عايز بس لأ يا احمد بيه انا محدش يتحكم فيا

ومرواح تاني معاك مش هيحصل حتى لو فضلت مصمم على موضوع الساعة 9 انا معنديش مشكلة وهروح لوحدي بس فكرة توصيلك ليا مش هتتكرر تاني، بعد اذنك يا احمد بيه.. اخذت روز حاسوبها وخرجت من مكتبه متجهه نحو مكتبها لتجمع باقي اغراضها وسط نظرات احمد المصدومة من ردة فعلها عليه ثم خرج من مكتبه و جذبها من ذراعها بغضب قائلا : انت فاكرة نفسك مين علشان تتكلمي معايا كده 

فقالت روز بنبرة ألم وهي تحاول افلات يدها من يده : لو سمحت سيب ايدي 

فقال متجاهلا كلامها : انا عايز افهم مين اداكي الحق انك تتكلمي عن نيتي هو سيادتك كنتي بتشوفي الطالع ولا بتقرأي الافكار علشان تقولي اني تعمدت اخليكي ل 9 علشان تبقي محتجالي اني اوصلك مين قالك اصلا ان ده اسلوبي بأي حق تحطي افتراضات وتصدقيها من غير ما تسأليني حتى. اختتم جملته بتركه لـ يدها بعنف ثم تابع : لو الهانم لسه فاكرة الكلام اللي قالته من دقايق هتعرف اني بالفعل في ايام بفضل فيها لحد 9 لانها بتبقى ايام فيها ضغط شغل وعلى حظك الاسود إن اليومين دول انا كنت مضغوط جدا في الشغل واظن انهارده انت كنتي متنيلة قاعدة معايا في المكتب طول اليوم وشايفاني عامل ازاي ما كنتش بلعب يعني كان زيي زيك قاعد بشتغل و كنت هنا من 8 الصبح كمان ويادوب خلصت 9 زيك بالظبط يعني انا مش عامل كده انتقاما من سيادتك او علشان تحتاجيلي ولو كنتي صبرتي دقيقة قبل ما تطولي لسانك كنت هقولك ان من اول بكرة تقدري تروحي 6 زي باقي زمايلك وانا ممكن دلوقتي بالعند فيكي اقولك اني رجعت في كلامي ومش هخليكي تروحي قبل 9 حتى لو هضطر اقعد معاكي لحد ما تخلصي بس انا مش هعمل كده واصلا الغلط كان غلطي انا اني كنت مش حابب فكرة انك تروحي متأخر لوحدك بس الظاهر ده خلاكي تفتكري انك مهمه اوي  للدرجة اللي تخليني عايزك تبقي محتجالي واتحكم فيكي زي ما بتقولي فحقك عليا اني اديتك مجال تفكري بالطريقة دي ، عايزه تروحي لوحدك اتفضلي امشي كل واحد ادرى بمصلحته انا مش هخاف عليكي يعني اكتر من نفسك يالا امشي. قال نبرته الأخيرة بصوت مرتفع فانتفضت روز ثم اخذت تلملم ما تبقى من اغراضها وخرجت بخطوات سريعة كغزال استطاع الهرب من بين براثن الأسد.. ولم تلبث دقائق حتى كان أحمد في سيارته والغضب ينهش عقله والخوف يتلاعب بقلبه فهو يرى انه كان يتوجب عليه أن يجبرها على الذهاب معه بأي شكل من الأشكال بدلا من أن يسمح لها بتنفيذ ما برأسها ولكنه حاول تجاهل كل ذلك واستعد للذهاب إلى المنزل وبعدما وصل اخرج هاتفه متصلا بـ ياسين.. 

_ ايه يا ابو حميد اخبارك ايه

_ تمام يا ياسين بص انا عايز منك خدمة

_ اكيد طبعا قول 

_ انا هبعتلك رقم روز عاوزك تتصل بيها تطمن إذا كانت وصلت بيتها ولا لسه 

_ ايه ده انا مش فاهم مش المفروض انك كنت هتوصلها 

_ الهانم رفضت وقعدت تقول كلام اهبل زيها.. ثم اخبره احمد بما حدث 

فقال ياسين : بص من غير زعل.. قاطعه احمد قائلا : عارف انها معاها حق في انها ترفض اني اوصلها ولعلمك موقفها خلاني احترمها اكتر بس انا اللي عصبني انها ظنت فيا ظن وحش ده غير اني ما كنتش هأذيها يعني بالعكس انا ما كنتش حابب انها تروح لوحدها علشان محدش يتعرضلها

_ انا فاهمك يا ابو حميد  على العموم ما تزعلش نفسك انا هتصل بيها، بس صحيح انت مش عايز تتصل انت ليه؟ 

_ لأ طبعا مستحيل اتصل بيها عايزها تفتكرني قلقان عليا وتعيش الدور بقى! انت كلمها و فهمها انك كنت بتسألني عنها و انا حكيتلك اللي حصل فانت حبيت تطمن عليها ما تجبش سيرتي خالص يا ياسين انت فاهم!

_ فاهم فاهم انا هقفل معاك وهتصل بيها وابقى اكلمك اطمنك يالا باي . ارسل احمد رقم روز إلى ياسين فاتصل بها..

_ الو ازيك يا روز انا ياسين 

_ اها اهلا يا ياسين خير في حاجة ولا ايه 

_ لا ابدا انا بس عرفت من احمد انك روحتي لوحدك انهارده فحبيت اطمن انك وصلتي 

_ اه انا لسه داخله البيت من شوية بسيطة شكرا ليك والله على سؤالك 

_ على ايه بس انت اختي الصغيرة ، يالا انا مش هطول عليكي اكيد محتاجة ترتاحي شوية مع السلامه

_ باي  انهت معه المكالمة لتقول : والله فيك الخير يا ياسين البيه ما هانش عليه يتصل هو يتطمن عليا فالح بس يقعد يقول ما ينفعش تروحي لوحدك لكن يتصل يعرف انا روحت ولا لأ ماينفعش طبعا بس يالا مش فارقة معايا اصلا يتصل ولا لأ.. 

و عند احمد .. كان يجلس على اعصابه منتظرا مكالمة ياسين وعندما تصاعد رنين هاتفه معلنا عن تلقي مكالمة منه اجاب على الاتصال بعصبية : ايه يا بيه لسه فاكر تتصل بيا ! كل ده رغي انا قولتلك اتصل اعرف هي روحت ولا مش تقعد ترغي معاها 

_ اشق هدومي منك .. يا ابني والله ما قعدتش ارغي ولا حاجة

_ انا اتصلت بيك اكتر من مره وكنت مشغول

_ يا حبيبي انا قفلت معاها بسرعة والله وبعدين جاتلي مكالمة تليفون علشان كده كان بيديك مشغول واول ما خلصت كلمتك اهو وبعدين هي الحمدلله بخير ووصلت فاهدى بقى وبلاش قلق

_ اي اهدى دي؟ انت فاكرني قلقان عليها!! 

_ لا طبعا وده اسمه كلام يا راجل 

_ انا بتكلم جد انا لا خايف عليها ولا هي فارقه معايا من اصله الموضوع انساني بس مش اكتر لكن انا ماكنتش خايف عليها  

_ خلاص يا سيدي انت ما كنتش خايف ولا قلقان مبسوط كده؟ المهم دلوقتي قولي مراتي عاملة ايه

_ مراتك مين! 

_ يا نهار زهايمر!  اختك يا عم انت 

_ ما تحترم نفسك يالا 

_ هو ايه اللي احترم نفسي هو انا شتمتها 

_ لا يا حبيبي بس لما تبقى مراتك رسمي ابقى قول اللي تقوله وبعدين مش جايز ترفضك

_ لأ بقولكم ايه ده انا اروح فيكم في داهية ده انا حاجزها من اول ما اتولدت ده انا اللي مختارلها اسمها عشان يبقى مناسب لأسمي وتقولي جايز ترفضك ده انتوا تبقوا بتستهبلوا ده انا اخطفك واطلبها فدية  

فقال احمد ضاحكا : طب وانا مالي يا لمبي 

_ معرفش بقى هو كده 

_ طب اهدى بس انا كنت بهزر 

تنهد ياسين ثم قال : انا عارف انك بتهزر بس انا فعلا خايف يا احمد ، خايف تكون ما بتحبنيش زي ما بحبها ، اوقات بندم اني لحد دلوقتي ما صارحتهاش  واني مش معرفها اني بحبها بس انا وانت كنا متفقين على كده علشان ما نعطلهاش عن دراستها ومستقبلها واكيد اللي عملناه ده الصح بس برضو اوقات بحس ان المفروض كنت اقولها قبل ما حد تاني يسبقني

_ ايه بس اللي بتقوله ده يا ياسين ما كلنا عارفين انك اقرب حد ليها بعديا 

_ ما هو انا بقى خايف تكون بتعتبرني اخ ليها مش اكتر 

_ ما اظنش صدقني دي اختي وانا عارفها كويس هي كمان بتحبك بس هي مش عارفة ده حتى، بس اكيد هتعرف في الوقت المناسب علشان كده اهدى وما تقدرش البلاء قبل وقوعه 

_ ان شاء الله كل خير المهم دلوقتي انا هسيبك ترتاح شوية وابقى سلملي على خالتي وعلى ياسمينتي 

_ يوصل بإذن الله، تصبح على خير..

_____ 

وعند روز كانت تتحدث مع صديقتها مي ودار بينهم الحوار التالي.. 

_ يعني كده دي كل المحاضرات اللي فاتتني 

_ اه يا حبيبتي كده دول كلهم انا قُلت بدل ما تضيعي وقتك في انك تسمعي الريكوردات و تنقلي محتوى المحاضرة قُلت اكتبهم انا وابعتهملك علشان تعرفي تذاكري منهم، اسمعي الريكورد بقى علشان تفهمي الاول بعدين ذاكري الورق ولو حاجة وقفت معاكي كلميني و اه صحيح انا عارفة انك بترجعي متأخر ممكن تبقي تسيبيلي نسخة من مفتاح شقتك اروح اعملك الاكل بحيث ترجعي تلاقيه جاهز ولو مش حابه ده انا ممكن اعملك  الاكل من عندي في البيت و اسيبهولك عند جارتك لما ترجعي تاخديه من عندها 

_ يا حبيبتي والله انا مش عارفة اشكرك ازاي على وقفتك جنبي دايما حقيقي اي كلمة هقولها هتبقى قليلة جدا عليكي 

_ يا بنتي ما تقوليش حاجة انت عارفة غلاوتك عندي انا ربنا ما رزقنيش ب اخوات بنات وانت اختي يا رورو 

_ والله نفس الشئ بالنسبالي انت عارفة انا مليش حد غيرك بعد ربنا 

_ طب بلاش رغي بقى وقوليلي هتسيبيلي المفتاح ولا 

_ لأ طبعا يا مي انت يا حبيبتي عندك مذاكرتك ما تعطليش نفسك 

_ انت هبله يا بت هو ايه اللي ما اعطلش نفسي انا يادوب بذاكر الكلمتين ولو في حاجه هعملها في البيت بعملها وباقي الوقت بكون فاضية .. ثم تابعت بمرح : ولا انت خايفة اخد المفتاح واسرقلك الشقة ؟

ضحكت روز وقالت : لأ وهي تتسرق فعلا من كتر المجوهرات اللي منطوره في كل حته فيها 

_ طب ده كفاية ان انت فيها انت اجمل جوهرة صدقيني  

_ لأ بقولك اي كده انا هتغر 

_ ياستي اتغري براحتك من حق الجميل يتدلع، بصي انا رغيت كتير اوي وانت جايه تعبانة وعاوزه ترتاحي روحي نامي دلوقتي واصحي قبل ميعاد شغلك بشوية ذاكري وبعدين اتوكلي على الله روحي شغلك 

_ تمام يا حبيبتي تسلميلي يارب تصبحي على خير..

_____

أما على النقيض نرى ياسمين تتحدث مع صديقتها منال..

_ بقولك يا منال عايزاكي تبعتيلي محاضرة انهارده اللي اخدتوها 

_ يابنتي كبري دماغك محاضرة ايه اللي عاوزاها الدكتور قعد يرغي في كلام ملهوش لازمه انا حتى اتخنقت و خرجت من نص المحاضرة  مقدرتش اكمل 

_ بس كده ما ينفعش يا منال احنا قصرنا اوي الفترة اللي فاتت ولازم نشد حيلنا 

_ يا حبيبتي التقدير والكلام التافه ده ما بيأكلش عيش صدقيني وملوش لازمة اصلا انت شايفه التعليم متقدم اوي يعني يا ستي طنشي 

_ ما هو مش معنى ان التعليم بايظ يبقى  نبوظ  احنا كمان، احنا لازم نعمل اللي علينا ونعلم نفسنا بنفسنا ما دام مفيش تعليم مش نرمي كل حاجه ورا ضهرنا ونرمي كسلنا وعدم مذاكرتنا على شماعة ان البلد ما فيهاش تعليم اصلا 

تأففت منال وقالت : بقولك ايه يا ياسمين انت شكلك قعدتي مع اخوكي فملا دماغك بالكلام اللي ملهوش لازمه ده ، انا عاوزاكي تتأكدي ان اخوكي عايزك نسخه منه مش اكتر وفاكر ان كده يبقى بيربيكي صح، بيحبك وبيخاف عليكي اه محدش يقدر يقول حاجة ، بس هو عمره ما هيفهم ان انت لازم تكوني شخصيتك المستقلة عنه  هو مش عايزك تبقي نسخه من حد غيره هو عايزك تسمعي كلامه وتنفذيه من سكات ويلغي شخصيتك تماما فحاولي ما تسمعيش كل كلمة يقولهالك كده عمياني من غير تفكير، انا بحبك وخايفة عليكي وانت عارفة كده كويس 

فقالت ياسمين بلهجة انزعاج : منال انت كلامك بايخ اوي انهارده انا غلطانه اني كلمتك سلام.. انهت معها المكالمة لتبتسم منال بسخرية وتقول : استني عليا بس والله ما حد هيوقعك غيري يا ياسمين هانم  ..

________

في فجر اليوم التالي استيقظت روز وأدت صلاتها و شرعت في المذاكرة وعندما اقترب موعد العمل استعدت للذهاب وقالت وهي تضع شيئا ما في حقيبة يدها : اما وريتك يا احمد ما ابقاش انا روز علشان تبقى تزعقلي تاني .. 

وفي منزل أحمد هتف قائلا قبل ان يخرج : ماما عاوزه حاجه قبل ما امشي 

_ عاوزه سلامتك يا حبيبي ، ايه يا احمد اللي في ايدك ده

نظر أحمد إلى يده قائلا بابتسامة : ايه يا ماما اكيد مش هحط عصير في الترمس 

فقالت ليلى بجدية : ما انا عارفه انه اكيد مش عصير وان اكيد دي قهوة والأكيد برضو انك ناسي انها ممنوعه عنك

تنهد ثم قال : يا حبيبتي مره من نفسي مش هيحصل حاجه 

_ ماشي مره من نفسك يبقى فنجان صغير تخلي حد يعملهولك في الشركة مش تشرب كل ده يا ابني 

_ اطمني انا مش ماليه على الاخر يعني غير كده محدش بيعرف يعمل القهوة حلو زيي فخلاص بقى اطمني مش هيحصلي حاجة يعني وبلاش قلق الامهات ده يالا سلام يا حبيبتي 

_ سلام يا احمد ربنا يهديك ويسترها عليك يا ابني…

________

وصل أحمد إلى مقر الشركة ثم وصلت روز ودلفت إلى مكتبه ليملي عليها ما ستفعله اليوم 

_ صباح الخير يا احمد بيه 

قال بجدية وهو ينظر في الأوراق التي أمامه : صباح النور يا روز بصي في شوية ملفات مهمه جدا انا سايبهملك على المكتب عاوز الملفات دي تخلص منك على بكرة ضروري 

_ تمام يا احمد بيه. ثم تابعت متسائلة  : صحيح انا واخده بالي ان حضرتك مشغول تحب اخليهم يعملولك فنجان قهوة

فنظر إليها قائلا : لأ شكرا انا معايا القهوة بتاعتي روحي انت شوفي شغلك

_ تمام بعد اذن حضرتك.. ثم خرجت روز من المكتب و لم تغلق الباب خلفها جيدا حتى تتمكن من رؤية أحمد عندما ينهض تاركا مكتبه وقالت بين نفسها : كده احسن  برضو انه جايب القهوة في الترمس بتاعه علشان ما يشوفش هو بيشرب ايه يارب بس يقوم بسرعة قبل ما يخلص قهوته .. اخذت روز تعمل وبين كل لحظة والأخرى تنظر إليه لترى هل نهض ام لا وبعد ساعتين من الانتظار نهض أحمد متوجها  إلى  المرحاض الملحق بالمكتب فنهضت روز مسرعة و اخرجت من حقيبتها برطمان شطة! ثم دلفت إلى المكتب و فتحت الترمس و سكبت البرطمان بداخله ثم اغلقت الترمس كما كان وخرجت من المكتب بسرعة واغلقت الباب خلفها بهدوء وقالت بتحدي : علشان تحرم بعد كده تيجي عليا وتزعقلي يا احمد بيه.. 

خرج احمد من المرحاض وجلس امام مكتبه مكملا عمله ثم امسك بالقهوة وارتشف منها وفجأة انتابه السعال .. وبالخارج دلف ياسين إلى مكتب روز قائلا : صباح الخير يا روز 

_ صباح النور يا ياسين

_ قوليلي احمد عنده حد 

_ لا معندوش حد 

_ تماما انا هدخله 

دلف ياسين إلى مكتب احمد ليجده يسعل بشده ويشرب ماء بشراهه  فقال ياسين بقلق : مالك يا احمد في ايه 

فقال بغضب عارم : الزفت القهوة كان فيها شطة يا ياسين 

_ قهوة ايه اللي فيها شطة ازاي ده وبعدين انت ازاي بتشرب قهوة هي مش ممنوعة عنك علشان الضغط! 

فقال بانفعال : ضغط ايه دلوقتي وزفت ايه انا بقولك القهوة كان فيها شطة وبتقولي ضغط! 

_ ما انا مش فاهم يا احمد ايه اللي جاب الشطة في القهوة

فقال بغضب : مفيش غيرها هي اللي تعمل العمله السودا دي بس وحياة امي ما هعديهالها 

_ طب اهدى بس ارجوك 

_ اهدى ايه يا ياسين انا واحد بيشرب بعشم و مش مدي خوانه فجأة لاقيت نار داخله زوري وطالعه من نافوخي انا حرفيا مش طايق زوري من الالم 

_ وعلشان كده بقولك اهدى ارجوك علشان ما تتعبش اكتر انت وشك احمر زي الدم وبعدين مين دي اللي عملت كده

_ هيكون مين غير روز هانم

_ يا احمد ما تظلمهاش وهي هتعمل كده ليه

فقال احمد وهو يسعل : ماشي انا هثبتلك ان هي اللي ورا ده ، المكتب فيه كاميرات مراقبة انا هوريك عرض الكاميرات حالا.. وبالفعل احضر عرض الكاميرات وظهرت روز وهي تضع له برطمان الشطة في القهوة فقال بانفعال وهو يدير اللاب بعنف تجاه ياسين : شايف اللي بتدافع عنها شايفها بعينيك وهي بتحطلي برطمان شطة كامل في القهوة!! 

_ لا حول ولا قوة الا بالله طب علشان خاطري انا اهدى وبلاش انفعال علشان ضغطك ما يعلاش كفاية القهوة اللي شربتها 

فقال بغضب وهو يضغط على رأسه بقوة : انا مش طايق دماغي حاسس انها هتنفجر من الصداع مش قادر اتحمل الألم اللي في راسي 

_ طبعا ده اقل واجب يا بيه الانفعال اللي انفعلته ده يعمل اكتر من كده لو كنت عديت الموضوع واخدته بهدوء ما كانش جرا حاجة

_ انت عايز تعصبني اكتر! موضوع ايه اللي اخده بهدوء هي اللي هببته ده يعدي كده بالساهل 

_ انا بقولك تهدى علشان نفسك مش علشان حد تاني يا احمد ، على العموم انا هتصل بالدكتور بتاعك دلوقتي هخليه يجي اهدى انت بس.. وبعد فترة ليست بطويلة وصل الطبيب وطلب من روز ان يدخل إلى احمد فقالت روز متعجبة : حضرتك عاوز تقابله ليه فخرج ياسين هنا وقال لروز بنبرة عتاب : احمد تعبان يا روز علشان كده اتصلتله بالدكتور، اتفضل معايا يا دكتور فدلف معه الطبيب وقام بفحص ضغط دم احمد فهتف قائلا : ايه ده يا احمد ليه كده صعب اوي 170على 109  كتير اوي عليك يا احمد 

فقال ياسين بانفعال : عاجبك اللي انت مهببه في نفسك ده حلوه العصبية مش كده؟ 

فقال احمد بهدوء وهو يضغط على رأسه بقوة : ياسين هتلاقي دوا الضغط في الدرج هاتهولي 

زفر ياسين بانزعاج ثم اعطى احمد الدواء

 فقال ياسين : طب يا دكتور هنعمل ايه في الصداع ده 

_ ما هو الصداع ده بسبب الضغط يا ياسين اول ما الضغط يتظبط الصداع هيروح ان شاء الله لكن انا مش هقدر اديله اي مسكنات دلوقتي لأنها هترفع معاه الضغط اكتر انا بس عايز افهم ايه اللي وصله للمرحلة دي 

_ البيه شرب قهوة بالشطة واتعصب عصبية ترفع ضغط الجمل 

فقال الطبيب بعتاب : قهوة يا احمد! احنا مش قولنا قهوة لأ 

فقال احمد متعجبا : هو كل اللي فارق معاكم اني شربت قهوة كلمة شطة دي بتعدي عليكم عادي كأن الطبيعي ان الواحد يشرب قهوة بالشطة مش بالسكر

 _ اه صح قهوة بالشطة ازاي

فقال ياسين : لأ ده موضوع يطول شرحه يا دكتور 

فنهض الطبيب قائلا : خلاص المهم بس تهدي نفسك يا احمد وما تنفعلش ارجوك و بلاش قهوة غير كل فين وفين وانتظم على ادويتك .

فقال ياسين وهو يوصله خارج المكتب : شكرا ليك يا دكتور معلش تعبناك معانا . وهنا وقفت روز مسرعة قائلة بقلق : هو ماله يا دكتور  

فقال ياسين بجدية : انا هقولك يا روز اتفضل انت يا دكتور.. 

روز : ياسين انت قلقتني

_ مفيش حاجة تقلق انا هدخل بس اطمن عليه وهجيلك.. كادت ان تتحدث ولكن سبقها ياسين ودلف إلى احمد فقالت بقلق : يارب يكون بخير يارب 

وبالداخل كاد ياسين ان يتحدث ولكن هتف احمد قائلا : ياسين من غير كلام قولها تاخد الملفات اللي قولتلها عليها وتكمل شغلها من البيت انهارده لأني قسما بالله لو شوفت وشها انهارده هكسر المكتب حته حته على دماغها و هبيِّتها  الليلة في المستشفى فخليها زي الشاطرة كده تمشي دلوقتي 

_ حاضر يا احمد همشيها المهم بس خليك هادي وما تنفعلش وحياتي عندك وانا هوصي عم سعيد يعملك حاجة دافيه تشربها علشان زورك.. 

خرج ياسين من المكتب ليقول احمد وهو يمسك برأسه : ماشي ياروز والله ل اوريكي  علشان تحرمي تلعبي معايا.. 

وبالخارج..

_ ليه عملتي كده يا روز

فقالت بتوتر : عملت ايه 

_ روز انا شوفت في عرض الكاميرات وانت بتحطي الشطة لأحمد في القهوة

وضعت روز يدها على فمها بصدمة وقالت : يالهوي يعني احمد كمان شافني وانا….

_ شافك واتعصب وانفعل انت ما سمعتيهوش! 

فقالت بخجل : انا جالي تليفون فخرجت ارد ماسمعتش اللي حصل

_ ده كان على اخره وضغطه ارتفع لانه اصلا مريض ضغط والانفعال من اللي انت عملتيه مع القهوة رفع ضغطه اكتر 

فقالت بندم : انا اسفة والله ما كنتش اعرف انه تعبان انا كنت عاوزه اعمل فيه مقلب علشان اردله اللي بيعمله فيا ما خطرليش ان ده يحصل انا هدخل اعتذرله

_ أوعي تدخليله انا جايلك علشان اقولك تروحي احمد بيقولك الشغل اللي المفروض تخلصيه خلصيه من بيتك لانه لو شافك انهارده هتباتي في المستشفى.. ده كلامه بالحرف وانا ك ياسين بقولك انه فعلا لو شافك هيعمل منك بطاطس محمره فروحي احسن قبل ما يخرج من المكتب ويلاقي 

فقالت روز وهي تنهض وتلملم اغراضها : لأ خلاص انا هروح بس قولي ابقى اعتذرله ازاي اكلمه في التليفون ولا

_ سيبيه لما يهدى وبلاش تكلميه انهارده علشان ما يتعفرتش عليكي 

_ خلاص حاضر هعمل كده 

نهض ياسين قائلا : تمام يا روز وما تكرريهاش تاني بقى علشانك وعلشانه لان احمد وقت غضبه ما بيشوفش قدامه 

_ لأ توبه مش هعمل حاجه تاني انا هروح دلوقتي مع السلامة …

عادت روز إلى منزلها واخذت تؤنب نفسها على فعلتها وقاطع حديثها مع نفسها رنين هاتفها معلنا عن مكالمة من مي 

_ الو الحقيني يا مي

_ ايه هببتي ايه 

اخبرتها روز بما فعلته فقالت مي : يا نهارك ملهوش ملامح انت كده خلاص راحت عليكي 

_ انت بتخوفيني ليه دلوقتي بدل ما تطمنيني

_ طب خلاص اهدي وما تخافيش ان شاء الله خير وحاولي بكره تتأسفيله بطريقة شيك كده والموضوع هيعدي ان شاء الله

_ يارب يا مي .. ايه ده لحظه انا معايا ويتينج هكلمك بعدين

انهت المكالمه مع مي واجابت على الاتصال ليأتيها صوته المستفز قائلا : وحشتنا يا جميل هتفضل تقلان علينا لأمتى

عرفت روز انه المتحدث منذ ان سمعت صوته فقالت متجاهله انها تعرفه : مين حضرتك

_ انت ليه مصممه ما تحفظيش صوتي جايز علشان كل مره بكلمك من رقم شكل فبتنسي بقى

_ حضرتك عايز مين بالظبط

_ عايزك انت يا روز ومش عايز غيرك

_ حضرتك النمرة غلط

_ انت هتصيعي عليا يا روز ، لو انت بتنسي صوتي انا مستحيل انسى صوتك

_ والله حضرتك شكلك كده مجنون بعد اذنك ثم انهت المكالمة وحظرت جهة الاتصال وقالت وقد انهمرت دموعها : يارب ارحمني بقى ..

اما ادهم فقال : ماشي يا انا يا انت..

وفي اليوم التالي..

ذهبت روز إلى المكتب وقد اتخذت قرارها في ان تستجمع شجاعتها وتعتذر له عما فعلته ولكنها بمجرد ان دلفت إلى مكتبها وجدته يخرج من مكتبه قائلا بغضب : كويس ان الهانم شرفت 

فقالت بقلق : خير يا احمد بيه حصل ايه 

فقال بنفس النبرة الغاضبة : تقدري تقوليلي الشيك بتاع شركة مادونا ايچي راح فين 

_ انهي شيك ده؟

_ الشيك اللي كان في اول ملف استلمتيه امبارح 

_ ايوه افتكرته انا راجعت الشيك ده وسيبته في المكتب 

_ الشيك مش موجود في المكتب انا دورت عليه يعني مش كفاية اللي هببتيه امبارح معايا و ما لحقتش حتى افكر اّدبك عليه ازاي الاقيكي عامله بلوه تانية 

_ طب اهدى بس انا مش فاهمه حاجة

_ الشيك اتسرق يا هانم شيك ب 10 مليون اتسرق…

يتبع..

لقراءة الحلقة العاشرة : اضغط هنا

لقراءة باقي حلقات الرواية : اضغط هنا

نرشح لك أيضاً رواية موعد مع الوحوش للكاتبة مروة شطا.