رواية عائلة بالإكراه الفصل الخامس والعشرون 25 بقلم سلمى بسيوني

رواية عائلة بالإكراه الفصل الخامس والعشرون 25 بقلم سلمى بسيوني

رواية عائلة بالإكراه البارت الخامس والعشرون

رواية عائلة بالإكراه الجزء الخامس والعشرون

رواية عائلة بالإكراه الحلقة الخامسة والعشرون

حنان ويوسف لسه قاعدين سوا بيتكلموا جت عليهم ممرضه بتجري : اسلام فاق يا يوسف بيه ..اسلام فاق ونقلوه اوضه تانيه
ظهرت على ملامحهم الفرحه ويوسف قرب من حنان وباس راسها وحضنها بفرحه : قلتلك كل حاجه هتعدي طول ما احنا سوا
_______________________
اسلام في اوضته والكل حواليه بيتكلموا في وقت واحد في مشهد فوضوي وصوتهم عالي
عبير للممرضه وهي بترجعلها صنيه الاكل : بلاش اكل العيانين دا وانا هعمل لأبني اكل يرم عضمه
منيره في التليفون : يا نور يا حبيبتي دي ٣ مره اوصلفلك …تالت ضلفه في دلابه ناحيه اليمين ..هتلاقي بجامه كحلي هاتيها اسلام بيحبها
زينب في التليفون : يا اسراء ..اسلام فاق بقاله ربع ساعه اهو ..يلا متتأخريش
حازم مع علي على التليفون : يعني انت روحت …طب كويس ان ورديتك مخلصتش ..اسلام فاق اهو يلا مستنينك
ساره جنب اسلام عماله تلعب في خدوده : حمدالله على سلامتك يا اوس اوستي
اسلام مره واحد زعق : بسسس ….ايييه !!!!!
كل دا !!! ما تهدوا
كلهم هديوا مره واحده وساره لسه بتلعب في خدوده
فزعق فيها : بتهببي اي انتي كمان … ارحموني !! (هدي شويه )وبعدين ترمي عضم مين يا ماما حبيبتي انا اطرافي كلها مكسوره ..وبعدين انا راجع من غيبوبه مش من حرب ٧٣ ..وانتي يا مُنمُن ..اي !!!! بجامه كحليه اي بس ..هو اطرافي دي هيدخل فيها بجامه اصلا ..
يا جدعان انا كنت في العالم الاخر عايش اهدى من كدا … اهدوا يا جماعه مش للدرجادي

عبير عنيها دمعت وقربت وحطت اديها على خده : لا للدرجادي واكتر يا حبيبي ..انا كنت بموت وانت تحت الاجهزه يا اسلام
اسلام رفع ايديها بصعوبه جدا بسبب الجبس وباسها بحنيه : انا كويس يا حبيبه قلبي ..انا كويس وهبقى كويس اكتر كمان ..( بصلهم كلهم ) ممكن تتطمنوا يا جماعه
منيره قربت عليه : حمدالله على سلامتك يا حبيبي
اسلام بضحك : والنبي انتي قمر انتي والبجامه الكحلي
كلهم ضحكوا فبص لأمه : اهدي يا حبيبتي انا زي الفل قدامك اهو
حازم قرب منه : حمدالله على سلامتك يا جامد
اسلام : الله يسلمك يا باشا ..فين يوسف وحنان واسراء ونور ..الناس فين
عبيبر : حنان ويوسف سوا ..اسراء روحت تاخد شاور وتغير وجايه ونور كذلك
دخول علي قاطع كلامهم : اي يا بطل اتأخرت علينا ليه كدا (بص لساره بطرف عينه ) دا حتى لا العاشق مرتاح ولا الخالي مرتاح
اسلام بإستغراب : انت بتقول اي ..
علي ابتسم : لأ ولا حاجه
ساره اتكسفت جداا وعرفت انه كان موجوده ساعتها : طب يا جماعه …انا …ن ..نازله اجيب قهوه ..اجيب لحد معايا
كلهم رفضوا فنزلت هي ومجرد ما خرجت من الاوضه اخدت نفس عميق وكأن وجود علي مانعها تتنفس ..مالك يا ساره ..اي العبط اللي بيحصل دا ..وليه قلبك بيدق بالسرعه دي
تجاهلت تفكيرها ونزلت جابت قهوه وشربتها عسى تهدي ثوره قلبها دي
علي كشف على اسلام وقاله انه هيفك الجبس في خلال اسبوع وقلت الحركه اثناء الغيبوبه ساعدت شويه في شفاء الكسور
حازم طلع يعمل تليفون
شويه ويوسف وحنان دخلوا وهم ماسكين ايد بعض وكانت عبير بتشرب اسلام شوربه ولما شافهم كدا شِرق وفضل يكح وقال وسط شرقته : سيب ايديها يا عم وبطل بقا
يوسف قرب منه بضحك : احب افكرك ان انا جوزها بس احسن تنسى ولا حاجه
اسلام : صح ..انت صح ..
كانت جنبه ممرضه بتظبطله المحلول فغمز ليوسف : لا بس المستشفى عاليه اوي
يوسف ضربه في دماغه : اتلم يالا ..اتلم .. حتى وانت تعبان
نور وصلت واول ما شافت شكلهم وهم بيهزروا سوا وقفت تتفرج عليهم وهي مبتسمه ..واللي جذب انتباهها اوي عبير وهي بتأكل اسلام وكل شويه تبوسه وتحضنه .. جه حازم من وراها ..ومن غير ما يتكلم حست بوجوده ..ريحته الجميله، وصوت نفسه
قرب منها شويه وابتسم : اي ..عجباكي اللوحه صح ..
نور بإبتسامه : اوي ..عجباني جدا ..تعرف يا حازم .. انا اول مره اعيش جو اسري فعلا ..عمري ما حسيت بالدفا غير وسط الناس دي ..مُنمن وبيبو وحبهم لبعض وطيبه قلبهم دي ..ساره وروحها الخفيفه الجميله ..وحنان العاشقه ..اسراء اللي صبرت وقامت على رجليها تاني اسلام ورخامته طنط زينب وحنيتها ويوسف وعشقه لحنان اللي يخليه يعمل اي حاجه عشان يفرحها ويسعدها وبس ..رغم كل المشاكل وكميه الهموم والضغط دا كله ساندين بعض ..حبهم لعيالهم ..بيبو وحبها لأسلام ..كان بيخليني اسأل نفسي ..امي لو كانت عايشه كانت هتحبني كدا
..بس ارجع اقول دا القدر ..وربنا كتبلي اني اعيش وسط ناس فعلا شايفنني منهم ..
حازم بص في عنيها وسرح فيهم : انتي روحك جميله اوي يا نور ..
فاق لنفسه وللي قاله لما لاحظ توترها ودخل الاوضه بسرعه يسلم على يوسف وهي لسه تحت مفعول سحر كلماته دخلت وراهم الاوضه وسلمت على اسلام وفضلوا يتكلموا وشويه وساره انضمت ليهم وحمدت ربنا ان علي مش موجود ..بس في نفس الوقت وحشها ..مكانتش فاهم كم التناقض والعبط اللي هي حاسه بيه دا
__________________________

يمنى سهرانه ورديتها لسه مخلصتش وقاعده بتنام على نفسها وتغفل وتفوق : يا أخي دي محصلتش معايا وانا بذاكر ..فووقي يا يمنى فووقي ..لسه معاد الدوا بتاع كينج كونج اللي جوا دا كمان ربع ساعه فوقي يخربيتك ..هتطردي يا بت فووقااي
معاد الدواء جه وقامت وهي بتحارب النوم دخلت جوا كان صاحي اديتله دواه وكاس مياه بدل اللي كسره الصبح ومقالتش كلمه ولا هو اتكلم
وبهدوء سحبت تليفونه من على الكومودينو وهي خارجه فوقفها : انتي بتعملي اي؟!! ..بتسرقيني ..رجعي التليفون مكانه
يمنى ببرود : ارجعه ليه يعني ؟!!
يونس جز على اسنانه : انتي متخلفه ولا اي ..سيبي التليفون مكانه
يمنى ببرود : بس دا حقي
يونس : حقك من انهي اتجاه
يمنى : اصل بقالي كتير بشوف علان عنه على الفيس وبصراحه امكانيته جميله اوي وشاشته تحفه
يونس : ودا يديكي الحق انك تسرقيه
يمنى قربت وحطت التليفون مكانه وقربت وهمست في ودنه : ودا يديك الحق تحاول تعتدي على حنان
بعدت شويه وشافت عيونه اللي احمرت من أثر الغضب : بحبها
يمنى حطت ايديها على التليفون : وانا حبيت التليفون اوي
يونس بغضب : اطلعي برا
يمنى : طالعه ..متتنحش
مكانتش فاهمه بتعمل كدا ليه ..ولا فاهمه مهتمه بيه ليه اصلا
___________________
اسراء اخدت شاور وطالعه بتكلم حسام في التليفون
اسراء وهي بتقفل الباب وسانده التليفون على ودنها بكتفها : بص المزرعه هتبعت الماشروم والبطاتس بكرا الصبح ..ف بالله عليك كفايه روح الغيبوبه اللي فيك دي واصحى بدري عشان تستلم الطلبيه
حسام بيقفل المطعم : غيبوبه اخص على الاخوات ..انا بقفل اهو ومروح وهتشوفي بقى الغيبوبه اللي بتتريقي عليه دا هيعمل ايه بكرا
اسراء بتتلفت وركبت الاسانسير : طب بما انك هتبهرني زي كل يوم وكدا كدا انت مش نازل الصيدليه بكرا ف خد بقا عندك عمال هناك ومساعدين في المطبخ تمام شحنه البطاتس تتقشر كلها وتتكيس وتتخزن وبالله عليك تشرف على العمال عشان ميعكوش الدنيا ..وصلت يا عم الجامد
حسام : وصلت يختي ..انا مروح لمراتي حبيبه قلبي بدل البهدله دي ..بنت خاله اونطه والله
اسراء خارجه من الاسانسير : طب اصبر عليا بس اما اقول لخالتي ..
طلعت وقفلت الاسانسير بتلف لقت سليم في وشها قلبها دق بسرعه جنونيه بس حاولت تهديه
وقالت بثبات : طيب يا حسام ..انا هقفل ..ابقى سلم على خالتي

قفلت معاه وتجاهلت سليم تماما رغم الصراع اللي جواها ..نزلت السلم وهو لسه وراها بينده اسمها بنفس طريقته زمان
اسراء في نفسها : بلاش يا سليم ..متندهليش ..مش عايزه احنلك لأ
طلعت من البرج كله وهتركب عربيتها لقيته وقف قدام الباب وبصلها : هو انا مش قلتلك قبل كدا حسام دا متتكلميش معاه
اسراء لقت نفسها بتضحك بسخريه : بجد ..(كملت ضحك وهو لسه باصصلها بجمود ) مش قادره لأ ..مبقولك ايه ..ما تبطل شغل العيال الصغيره دا ..عارف يا سليم ..انت عامل زي الطفل اللي هرب من امه في حديقه الحيوان ..وامه فضلت دور عليه وتعبت وعيطت وطلع عنيها طول اليوم لغايه ما قررت ترتاح شويه ولما روحت البيت كانت معاها المصاصه بتاعته، المفاجأه بقا انها دخلت لقيته في الشقه والولد بكل بجاحه بصلها وقالها مامي انا مش عايز المصاصه دي ..تفتكر ردها عليه هيبقى اي
سليم رفع كتافه بتلقائيه : هتديه بالجزمه
اسراء : جميل اوى ..اديك فهمت .. اتحرك بقا من قدام العربيه احسنلك .. وبالنسبه لكميه دعاوي الطلاق اللي رفعتها اخوك كان دايما يلاقي مخرج ويجيب محامين ويلعب بالبيضه والحجر ونجح ..اصله بجح ..شكلها وراثه في العيله ..المهم بما انك هنا ف استنى محضر المحكمه يجيلك بإبلاغ القضيه ..
زقيته من قدام الباب وركبت العربيه وفي ثانيه اتحركت من قدامه وعي بتحاول تاخد انفاسها
وهو واقف قرب عليه فيرديان خط ايده على كتفه : شكلك عره اوي يا صديقي
سليم بزهق: يا اخي اتهبب بقى انت كمان
راح ناحيه عربيته وركبها وراح على ڤيله ابوه اللي بقاله سنين معتبهاش
رن الجرس كتير ففتحت واحده : انت مين يا بيه
سليم : شكلك باشتغلي هنا ..عرفي حسن بيه ان انا هنا ..قوليله سليم القاضي برا

الست قربت عليه : اصل يا بيه استاذ حسن كان برا من يومين ومن ساعه ما رجع وهو عمال يكسر في كل حاجه في الڤيلا بقاله يومين عمال يكسر في كل حاجه حواليه
سليم دخل ووراه فيرديان خبط على المكتب عند ابوه ودخل كان مديله ظهره
اول ما سمع صوت الباب زعق : قلتلك يا عليه محدش يدخل عليا
سليم بصوت هادي : بس دي مش عليه ..دا انا يا بابا
حسن سمع صوت ابنه قام من على الكرسي وهو باصصله مش مصدق ان ابنه رجع جري عليه وحضنه وهو بيعيط : ابني …سليم ..انت كويس يا حبيبي …سليم كنت فين ..٨ سنين يابني كتير والله …كتير عليا
بعد عن حضنه وشاور على فيرديان : مين الولا دا
سليم : لا دا لقيط متشغلش بالك بيه
فيرديان : عيبا على الصداقه يا بني
_______________________
ثائر رجع بالليل بيفتح الشقه متوقع امنيه نامت بس امنيه مش موجوده !!!
مش لاقيها ..معقوله ..زهقت وسابته ومشيت
نزل تحت عند والدته يشكيلها حاله وعارف انه غلطان بس محتاج اللي يوجهه ..دخل لقى امنيه معاها !!!
_ امنيه انتي بتعملي اي هنا مكنتش لاقيكي فوق
ردت امه بضيق
_ امنيه هتفضل هنا لغايه ما تعرف غلطك وتقدر قيمتها ..
ثائر بهدوء
_ لحظه ..انتي غضبانه مني عند امي
ردت امه
_ايوا ..انا امها زي مانا امك ..اطلع نام وبطل غلبه
_طب يلا يا امنيه اطلعي معايا
_لأ يا ثائر ..انا هقعد عند ماما شويه لغايه ما اعصابي تهدى
امه بضيق
_ حتى بنت الاصول بترد عليك ..عارف واحده تانيه .. كانت ما بصت في وشك دا .. اطلع يلا يا ثائر
حسام دخل قاطع كلامهم : ست الحبايب
باس ايديها وراسها وبص لثائر : انت واقف كدا ليه
_ لا يا حسام اخوك مش هيفضل واقف .. هيطلع ينام حالا
حسام رد على امه

_ منطق بردوا ..طب اي ..امنيه انتي مش طالعه
_امنيه جايه تغضب عند ماما يا حسام
حسام مات ضحك وبعد كدا هدي : اسف يا جماعه
_ قوم يبني اطلع نام شكلك عامله كارثه
_كارثه ؟!!!
_ما لما تجتمع الحمى مع مرات ابنها في واحد من اغرب المواقف على الكوكب يبقى في كارثه
انا طالع انا .. تصبحي على خير يا امي ..يلا يا ثائر انت كمان
ثائر طلع شقته ينام وحسام راح شقته عند مراته
__________________
الصبح طلع على الكل في امان قعدوا كلهم سوا يفطروا وشويه وعصام الليثي اتصل بنور وكلم اسلام يطمن عليه
يوسف كان برا ولما سمع صوته افتكر صوت الراجل اللي كان خاطفه في شرم الشيخ دخل عليهم كانوا بيتكلموا كلهم معاه فيديو كول واول ما الكاميرا جت على يوسف بص لعصام بصه مش الكل لاحظها وسلم عليه بحذر
وهو رد عليه بود مصطنع
______________________
يمنى دخلت ليونس الصبح تديله الدواء
_ صباح الخير
_ صباح الزفت اطلعي برا
_حتى الدواء متمرش فيك ..خد ( اديتله الدواء في ايده ) عالله يتمر
_ هو انتي متتعبيش من كتر الاهانه
يمنى وطت وشها في الارض
_ لا تعبت الحقيقه ..وحاولت الموت كتير ..وكله بسبب بني ادم قذر زيك ولغايه حالا مش عارفه ليه بتكلم معاك اصلا ..
طلعت برا ورزعت الباب ورها وهي مش طايقه يونس ولا طايقه نفسها
_____________________

ثائر نزل الصبح لمراته واصر انه يتكلم معها
_ انا اسف
امنيه بإستهزاء : ثائر هو انت كسرت كبايه
ثائر بندم : عارف والله اني غلطان وضيعت سنين عمرنا في اغلاط ..مكنتش اعرف …ولا كنت بحس بدا ..ولا عمرك حسستني غير امبارح ..هعوضك يا امنيه ..اديني فرصه واحده
امنيه ودموعها على خدها : بتحبها يا ثائر
ثائر بصدمه : ايه ؟!!!
امنيه كررت : بتحبها ..صح ..ماما وقعت بلسانها قبل كدا من غير ما تاخد بالها وقالتلي انك اتقدمت لأسراء قبل جوازنا بسنه …بس محصلش نصيب ..لسه بتحبها يا ثائر ؟!!!
________________
يوسف واقف في البلكونه لسه تحت تأثير الصدمه ومش مصدق ان البهدله دي كلها تطلع من ابو نور
طلع تليفونه وكلم حازم : ايوا يا جوو انت فين
_انا في المستشفى لسه ..بقولك ايه ..طالب منك طلب
_ قول يا صحبي
_محتاج تقرير مفصل عن عصام الليثي
_ عصام الليثي ابو نور ؟!!!!!
_ ايوا هو
_ انت شاكك في حاجه ولا اي ؟؟
_لما هشوفك هقولك جهزهولي بس من فضلك
_عنيا يا صحبي
قفل معاه وكانت حنان رايحاله دخلتله البلكونه
حنان بإبتسامه : بتعمل ايه هنا لوحدك
يوسف مسح على شعره : دماغي هتطق من مكانها
حنان بقلق: يوسف مالك
يوسف قرر يحكيلها : فاكره اديل ولنجوي

حنان : ايوا مالهم
يوسف : دول كانوا شركه وهميه ..مبعوتين عشان يمضونا على ورق تنازل عن الشركه وكل حاجه
حنان بتربط الاحداث : كنت حاسه فعلا ان في حاجه من ناحيتهم
يوسف : اللي بعتهم هو نفسه اللي خطفني يوم اللي عمله يوسف ..في شرم ..وهو اللي ساعد يونس ..دي كلها حكايه متدبره
حنان : يوسف لحظه ..مين خطفك انت بتقول اي
يوسف : بقول ان الراجل دا خطفني عشان معرفش اتصرف ..وساعد يونس ومده بالرجاله ..عشان يساعدوه بس اللي حصل كان عكس توقعاته ..اسراء لحقتك و اسلام فاق وكله كويس
نور بتقرب عليهم واحده واحده
حنان : ومين الراجل دا ؟!!
يوسف حط كفه على وشه : عصام الليثي
حنان : نعم !!!!

يتبع ….

• لقراءة الفصل التالي: اضغط هنا
• لقراءة باقي حلقات الرواية اضغط على (عائلة بالإكراه)