رواية رجل في مهمة مستحيلة الفصل الثالث 3 بقلم عادل عبدالله

رواية رجل في مهمة مستحيلة الفصل الثالث 3 بقلم عادل عبدالله

رواية رجل في مهمة مستحيلة البارت الثالث

رواية رجل في مهمة مستحيلة الجزء الثالث

رواية رجل في مهمة مستحيلة الحلقة الثالثة

واللي بيدير الشركة اختك راندا .
: راندا هي اللي بتدير الشركة ؟ !!!!!! ازاي دي لسه صغيرة ومعندهاش خبرة .
:ماهو علشان كده سمعت ان الشركة مديونة وقربت تفلس.
: ومراتي واولادي فين ؟
: اخبار مراتك واولادك معرفش عنهم حاجة .
” في الوقت ده اصبحت في مهمة مستحيلة !! ”
: طيب يا ممدوح يا اخويا عاوز اوصل لامي .عارف مكانها ولا هي كمان متعرفش عنها حاجة .
ممدوح ضاحكا : لا …بالنسبة لمكان والدتك انا عارف رقم تليفون والدتك علشان كان مع امي الله يرحمها قبل ما تتوفي وهي كانت دايما بتكلمها بعد ما باعوا الفيلا .
: طيب انت عارف ماما وراندا عايشين فين ؟
: اللي اعرفه انهم سافروا اسكندرية ونقلوا مقر الشركة هناك .
: طيب هات يا ممدوح رقم تليفون ماما علشان اكلمها .
اخدت رقم تليفون ماما من ممدوح واتصلت بيها .
الساعة كانت قربت من العاشرة مساء …اتصلت اكتر من مرة لحد ما. ماما ردت عليا .
محدش يتخيل ابدا السعادة اللي حسيتها لما سمعت صوت امي .
: ازيك يا امي وحشتيني اوي اوي .
: طاهر حبيبي .طاهر ابني .حبيبي .حمد لله علي سلامتك يا ضنايا . انت فوقت من الغيبوبة امتي ؟
: الله يسلمك يا امي .وحشتيني اوي .انتي فين ؟
: انت اللي فين ياحبيبي ؟ انت في المستشفي ولا خرجت ؟
: انا خرجت ودلوقتي عند ممدوح جارنا .
: طب تعالي دلوقتي عاوزه اشوفك واخدك في حضني .( وتبكي من الفرح ) وحشتني اوي يا حبيبي .
: حاضر يا امي انا هركب اي حاجه دلوقتي واجيلك .
وهنا يتدخل ممدوح : خليك للصبح النهار له عينين ..السفر بالليل وحش والمسافة طويلة .
: خلاص يا امي اول ما يطلع النهار هجيلك علطول .
: طمنيني عليكي وعلي اخواتي ونجلا مراتي والعيال عاملين ايه .
: الحمد لله .لما تيجي يا حبيبي ونقعد مع بعض مش هسيبك .هنفضل نتكلم لغاية ما تزهق مني .
: انا عمري ما ازهق منك يا امي .نامي دلوقتي واول ما هتصحي الصبح هتلاقيني قدامك .
قفلت التليفون مع امي والدموع بقيت تنزل من عنيا من غير ما احس من اشتياقي لها .
ممدوح قالي : تحب تتعشي ايه ؟
: يا عم انا مش عاوز اكل دلوقتي .انا كل تفكيري اقابل اهلي .
يضحك ممدوح : هتقابلهم ان شاء الله .المهم تاكل ايه ؟
: اي حاجة .
: ايه رايك نضرب كريب ؟
: وهنجيب الكريب منين دلوقتي ؟
: بسيطة انا اعرف دليفري كتير يجيبولنا الاكل هنا .
: كتير !!!! هو في حد هنا بيعمل كريب ؟
: قول هو في حد مبيعملش كريب .ده بين كل محل كريب والتاني محل كريب .
: بتتكلم جد !!!!!!
: اه والله .ده بقيت الاكلة الشعبية رقم واحد دلوقتي .
: انت اكيد بتهزر .دي اكله فرنسي محدش كان يعرفها هنا الا ناس قليلة جداا .
: المهم ابعت اجيب ولا رايك ايه ؟
: ماشي .
ممدوح اتصل علشان يجيبلنا العشا .واثناء واحنا قاعدين نتكلم وهو بيغير قنوات التليفزيون لقيت شباب غريب بيغني اغاني غريبة اوي .
سألت ممدوح : مين دول اللي بيغنوا ؟
: دول اوكا واورتيجا ؟
: مين دول ؟ مصريين يعني ؟
: ايوه يا عم مصريين . دول بقه اللي دخلوا اغاني الراب لمصر .
: اغاني راب !! بس دي مش راب .وحتي لو راب فين الاغاني بتاعتنا !! مش هقولك عبد الحليم وام كلثوم .عمرو دياب وهاني شاكر واصالة ..
: دول الجداد بقه .
: و في حد بيسمعهم ؟
: ايوه طبعا كتير ..ايه هما مش عاجبينك؟
: لا مش عاجبني .
: اومال لو سمعت حمو بيكا وحسن شاكوش هتقول ايه ؟ ويضحك .
: دول مين كمان ؟
: بيغنوا .
( في ذهول ): انا حاسس اني بحلم او اني كنت في غيبوبة ٥٠٠ سنة
: معلش .واحده واحده هتتعود .
شوية شوفت مسلسل و فيه مجموعة بلطجية بيضربوا بعض .قولت لممدوح : ده ايه المسلسل ده اللي كله بلطجية ومفيهوش ابطال ؟
: مفيهوش ابطال ازاي . ده بطولة النمبر ون .
: مين ده ؟
: هو ده اللي بيتخن صوته ده وواخد دور بلطجي .
: وهو ده بيتخن صوته ليه ؟
: علشان يبان انه بلطجي في المسلسل .
وقعدنا نتفرج علي المسلسل ونتكلم ونحكي لحد قبل الفجر بساعة .
وبعدين ممدوح قالي : يلا الحق نام كام ساعة قبل ما تسافر .
:لا مش هنام هستني لما اروح اصلي الفجر وبعدين اسافر .
: طيب صلي هنا بقه علشان الجوامع مقفولة .
: الجوامع مقفولة !! ليه ؟
: يا عم علشان الكورونا . ومش الجوامع بس .ده المطاعم والفنادق والمسارح والسينمات والكافيهات والقهاوي .
: يا ستار يا رب ربنا يسترها ده وباء جامد اوي بقه .
: اه وخلي بالك بقه علشان السلام بالايد والاحضان خلاص ممنوعة .
: وايه االي اتغير كمان في الدنيا يا ممدوح ؟ انا حاسس ان انا بحلم !!!

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية رجل في مهمة مستحيلة)