رواية انتقام مجنون الفصل العاشر 10 بقلم عادل عبدالله

رواية انتقام مجنون الفصل العاشر 10 بقلم عادل عبدالله

رواية انتقام مجنون البارت العاشر

رواية انتقام مجنون الجزء العاشر

رواية انتقام مجنون الحلقة العاشرة

قفل معاه وكان قاعد في منتهي الثقة والثبات وانا مرعوبة وسألته : معتز اللي كان بيكلمك ؟
: ايوه .
: وقالك اي ؟
: متشغليش بالك كل حاجة هتمشي زي ما انا خطتلها بالظبط .
: بتقول ايه ؟
: قصدي كل حاجة هتمشي زي ما انتي عايزة بالظبط .
بدأت اشعر بالقلق من اسامة لأول مرة في اليوم ده ، كلامه وتصرفاته وضحكته كلها مش طبيعية !!ولذلك بدأت اتعامل معاه بحذر شوية .
فجأة تليفوني رن وكان ماما اللي بتتصل .
: انتي فين يا فاجرة ؟
: ايه ده يا ماما ؟ ايه اللي بتقوليه ده !!
: انا لسه قولت حاجة ولا عملت حاجة !! ده انا لما اشوفك هقطع رقبتك ، وخالك حالف انه يدبحك .
: فيه ايه بس يا ماما ؟! انا مش فاهمة حاجة !!
: فيه فضيحة وعار ليكي ولنا وللعيلة كلها ، حطيتي راسنا في الطين .
” انا فهمت انها عرفت بفيديوهات معتز ، واستغربت اوي انها عرفت منين !! ”
: يا ماما وانا مالي ؟! انا ذنبي ايه ؟! ما هو السبب !! وعموما انا هطلق منه .
: هتطلقي بعد ما فضحتينا وجيبتلنا العار !!
: يا ماما انتي مكبرة الموضوع اوي كده ليه ؟ الفضيحة له هو مش احنا !!
: نهارك اسود يا بت !! يعني كمان مش مكسوفة من اللي عملتيه !! ده انتي حلال فيكي الدبح فعلا .
: وانا هنكسف من ايه ؟ انا معملتش حاجة غلط !!
: كل ده ومعملتيش حاجة غلط ؟! اومال اللي عملتيه اسمه ايه يا فاجرة ؟
: ايوه يا ماما ، انا معملتش حاجة غلط ، اللي غلط هو البيه جوزي .
: ليه يا فاجرة ؟ هو جوزك اللي كان بيتصور في الفيديو ؟!
: ايوه يا ماما ، جوزي اللي كان في الفيديو .
: لا يا روح امك انتي اللي كنتي في الفيديو .
” كلمتها صدمتي وكنت مش قادرة افكر او اتكلم ”
: انا ازاي يا ماما ؟؟؟
: ايوه جوزك الصبح بعت لخالك فيديو ومعاكي راجل في وضع زبالة زيك وقاله شوف فضيحة بنت اختك !!
: انتي بتقولي ايه يا ماما ؟!!
: اعملي بقي مش عارفة !! يعني انتي مش عارفة باللي عملتيه ؟! دا انا شوفتك بعينيا يا فاجرة .
اعصابي سابت والموبايل وقع مني علي الارض و انا مش فاهمة حاجة لكن احساسي ان كلامها مظبوط .
بدأت اربط كلام اسامة ببعضه مع كلام امي لحد ما استنتجت المصيبة اللي حصلت ، لكن كنت لازم اتأكد الاول .
اسامة سألني : فيه ايه يا قلبي ؟
: لا ابدا دي ماما زعلانة مني علشان فاكرة اني سيبت البيت لمعتز ومشيت .
: طيب ابقي حاولي تفهميها حقيقته علشان تعرف انها فاهماه غلط وتفهم انها جوزتك لانسان حقير .
: طيب هات موبايلك اخد منه فيديوهاته علشان ابقي اخليها تشوف بعينيها وتقتنع بكلامي .
وفعلا اخدت منه الموبايل وبعت لنفسي كل الفيديوهات اللي موجودة عليه لتليفوني .
ولما دخل الليل اسامة قالي : انا لازم امشي و اروح البيت علشان مراتي مش تحس بحاجة .
: انت مش هتعرفها لما نتجوز ؟
: اقولها او لا ، تعرف او متعرفش ، عادي مش يهمني الا اننا نكون مع بعض .
: اومال خايف ليه انها تحس و تعرف ؟
: مش خوف يا قلبي ، لكن كل حاجة ولها وقتها .
: ماشي يا حبيبي ، بس بكره الصبح لازم تكلمني .
: اكيد يا حبيبتي .
نزل اسامة وبمجرد ما قفل الباب فتحت تليفوني اشوف الفيديوهات .
بدأت افتح كل فيديو لمدة ثواني لأني كنت شاكة في حاجة .
وبعد ما شوفت كام فيديو أتأكدت من الشك اللي في دماغي !!!
الشقة اللي كان اسامة بيصور فيها معتز علشان يمسكها ذلة عليه هي نفسها الشقة اللي اجرها ليا وقعدنا فيها ٣ ايام !!!!!
معقول دي صدفة ؟ ولا اسامة كان مرتب مع السمسار ؟!!
ده اسامة كان معايا واحنا بنعدي علي السماسرة واحد واحد وبندور علي شقة !!! معقول كل ده كان بيمثل عليا !!!!!
دي مصيبة سودا !! ده معني كده ان اللي انا استنتجته من كلام ماما ممكن يكون حقيقي !! دي تبقي كارثة !!!
بدأت افتح كل الفيديوهات اللي نقلتها من تليفونه لحد ما لقيت فيديو بفتحه شوفت نفسي معاه !!!!!
الكلب كان بيصورني معاه !!!
انا مش قادرة اصدق مع الحب اللي حبه ليا ده كله معقول يعمل كده !!!
معقول كان بيمثل الحب عليا ؟ لأ مش ممكن ، انا عارفة اسامة كويس ده انا عرفته سنين قبل الجواز .
اسامة بيحبني فعلا ، طيب ليه يعمل كده ؟! معقول كرهني بسبب اللي عملته فيه زمان ؟؟ انا مش قادرة افهم هو عمل كده ليه ؟
معقول يجتمع الحب والكره في قلب انسان واحد بالشكل ده ؟!!!
المهم دلوقتي انا هعمل ايه في الكارثة دي وهواجه امي واهلي وكل الناس ازاي بعد الفضيحة دي ؟
كنت خايفة من الفيديو اللي صوره جوزي دلوقتي بقي فيه فيديو تاني مع راجل غريب !!
يعني خرجت من مشكلة لها حل لمشكلة اكبر ملهاش حل ابدا .
وبعد وقت من التفكير التليفون رن ، كان اسامة اللي بيتصل بيا !!
مش عارفة ارد اقوله ايه ؟ ارد واشتمه ولا اسكت واعمل أني لسه مش عارفة حاجة ؟؟
ولو شتمته هيفيد بايه ؟ ده زي ما بعت الفيديو لجوزي ممكن يبعته لكل الناس والفضيحة تكبر اكتر واكتر .
انا احسن حاجة مش ارد عليه خالص .
اسامة رن عليا كتير وانا مش برد عليه ابدا .
بعت لي رسالة ” انتي فين يا قلبي ؟ طمنيني عليكي ، انا بدأت اقلق عليكي اوي ، ارجوكي يا حبيبتي ردي عليا ”
الكلام ده كلام واحد بيحب وقلقان علي حبيبته !! اومال ليه اسامة عمل كده ؟؟؟
وفضلت في حيرة وبفكر وقت طويل وفجأة لقيت اسامة داخل من الباب !!
: ايه ده ؟ انت رجعت بدري كده ليه ؟
اسامة ” بقلق وارتباك ملحوظ ” : انتي كنتي فين يا حبيبتي ؟ انا قلقت عليكي اوي وسيبت الشغل ورجعت اطمن عليكي ؟
: كنت نايمة .
” مازال اسامة في قمة التوتر والعرق يملأ وجهه ” : انا خوفت تكوني ضيعتي مني تاني ، انا مش هسمح لحد ياخدك مني تاني .
اسامة كانت بيتكلم وايده بترتعش !!! لدرجة اني خوفت اوي .
: مالك يا اسامة ؟ فيه ايه ؟
: انا جايب معايا احلي خبر هتسمعيه في حياتك ، خلاص جوزك طلقك .
: انت بتتكلم بجد ، مين اللي قالك ؟
: انا كلمته وهو قالي انه بعت الفيديو لأهلك ورمي عليكي يمين الطلاق خلاص .
عملت نفسي مش فاهمة : فيديو ايه اللي هو بعته لأهلي ؟
اسامة ومازالت يده ترتعش ووجهه يمتلئ عرق : الفيديو بتاعي انا وانتي يا قلبي ، انتي نسيتي ولا ايه ؟
: انا مش فاهمة انت بتتكلم عن ايه ؟؟
: خلاص مش مهم ، المهم دلوقتي تعالي يلا .
ومسكني من دراعي بقوة اوي وقالي : يلا يا حبيبتي علشان نتجوز .
: دلوقتي ؟ طيب استني لما اخد ورقة الطلاق منه والعدة تخلص .
اسامة ضحك بصوت عالي اوي يخوف : انتي عايزة تهربي وتبعدي عني تاني ؟؟ انا مش هسمحلك ابدا انك تبعدي عني !! انتي متعرفيش انا حصلي ايه لما بعدتي عني اول مرة !! مش هتبعدي عني ، فاهمة ؟؟؟
اتأكدت ان اسامة مش في حالة طبيعية ابدا وبدأت احاول اجاريه في الكلام : لا يا حبيبي مش هبعد عنك طبعا ، انا معاك اهو وهفضل معاك علطول .
اسامة بدأت عينيه تتغير ويتكلم بعصبية : ايوه مش هتبعدي عني ابدا وهنتجوز ، فاهمة ؟؟ هنتجوز دلوقتي ، يلا تعالي .
واخدني من ايدي وانا ميتة من الخوف ودخلنا اوضة النوم وفتح الدولاب طلع بيبي دول وقالي : خدي يا حبيبتي البسي فستان الفرح .
اول ما قال كده اترعبت وفهمت ان اسامة مريض !!! ايوه اسامة مريض نفسي بسببي انا !!!
حبه ليا وبعدي عنه هو اللي وصله للجنان !!!
انفجرت من العياط علي اللي انا عملته فيه !!!
طبطبت عليه وانا وشي غرقان دموع وبقوله : حاضر يا حبيبي ، هلبس فستان الفرح حالا ، بس لازم نتصل بالمأذون الاول علشان نكتب الكتاب .
اسامة : صح لازم نكتب الكتاب الاول .
: طيب استني انا هتصل بالمأذون وهييجي علطول نكتب الكتاب ونتجوز .
: انتي معاكي رقم المأذون ؟
: ايوه يا قلبي هتصل به حالا .
طلعت الموبايل وانا وشي غرقان دموع وقلبي بيتقطع واتصلت بالنجدة وقولتلهم بصوت واطي الحقوني انا معايا مجنون في الشقة !!
وبعد دقايق كانت النجدة وصلت ومعاها سيارة من مستشفي الامراض العقلية !!
اخدوا اسامة ومشيوا واخدوا قلبي معاه !!!!! بقلمي عادل عبد الله
مش قادرة اصدق !! انا اللي وصلت أسامة لكده !!! انا مش قادرة اسامح نفسي علي اللي عملته فيه !! هعيش ازاي بذنبه بقية عمري كله ؟؟ هيفضل ضميري يأنبني طول حياتي .
بقلمي / عادل عبد الله
لكن انا هعمل ايه دلوقتي في حياتي ؟
هواجه كل اللي حواليا ازاي واولهم أمي ؟ ولا هعيش لوحدي ؟ انا مش عارفة اعمل ايه ؟
وبعد تفكير طويل لقيت الحل ، اتصلت بأمي وقولتلها : ماما انا عايزة ارجعلك بس خايفة .
: اوعي ترجعي يا فاجرة ، البيت ده طاهر مش للزبالة زيك ، لو رجعتي خالك هيقتلك ولو مش هو عمل كده انا هموتك بأيديا .
: يا ماما طيب افهمي الاول وبعدين اعملي اللي تعمليه .
: من غير ما افهم ، انا فهمت كل حاجة خلاص ، فهمت اني معرفتش اربيكي .
: انا كنت مخطوفة .
: بتقولي ايه ؟؟؟
: بقولك انا كنت مخطوفة يا ماما .
: يا مصيبتي !!!!
: ازاي يا بت قوليلي ايه اللي حصل ؟
: واحد مجنون هو اللي خطفني وكل اللي شوفتيه ده كان تحت التهديد .
: وانتي دلوقتي كويسة يا بت ؟؟ انتي فين ؟؟
: انا مش كويسة يا ماما انا عايزة ارجعلك .
: تعالي يا قلب امك .
و رجعت البيت بعد ما اقنعتها اني كنت مخطوفة واللي خاطفني مجنون واتقبض عليه ودخل مستشفي الامراض العقلية .
علشان تتأكد هي وخالي روحنا قسم الشرطة وشافوا المحضر بنفسهم .
معتز بعد ما طلقني رسمي ، ولما عرف تمثلية اني كنت مخطوفة كان عايز نرجع لبعض تاني لكن انا كنت خلاص قررت أني مش هرجع للذل والقهر اللي شوفته علي ايديه تاني . وريت امي الفيديو اللي كان معتز صوره ليا معاه وعرفتهم انه كان عايز يستخدمه علشان يكمل ذل واهانة ليا طول عمري !!!
وبالفعل اهلي كمان رفضوا اني ارجعله وقررت اني اعيش مع امي وابدأ حياتي من جديد .

لقراءة باقي حلقات الرواية اضغط على : (رواية انتقام مجنون)