Uncategorized
رواية طفولتى المشتتة الفصل التاسع والأربعون 49 كامل
رواية طفولتى المشتتة الفصل التاسع والأربعون 49 كامل
 |
| رواية طفولتى المشتتة الفصل التاسع والأربعون 49 كامل |
رواية طفولتى المشتتة الفصل التاسع والأربعون 49 كامل
اليوم التحليل
جهزت نفسها وهي ما تدري مين للي خطبها
ام بدر عصبت منها لانها وافقت
وما رضيت تقول لها من للي خطبها
وحست بالحرج تسأل مين للس خطبها
طلعت من الغرفه ونزلت بهدوء وهي حاسه
انها تسرعت
ناظرها نايف بهدوء : يالله يا ريم
طلعت معه وبعدها حرك السياره متوجه
للمستشفى
طول الوقت ما تكلم ولا هي تكلمت
ولما وصلوا المستشفى
نايف بحزم : حطي الشيله على وجهك
غطت ريم وجهها بالشيله بدون اعتراض
وبعدها نزلوا
اخذوا منها العينه وبعدها رجعها نايف على
السياره وطلب منها تنتظر بالسياره
دخل للمستشفى واتصل بالمعرس يسأله عن مكانه
جلست ريم تهز رجلها بملل
مر ثلث ساعه وابوها ما رجع حست بالضجر تكره الانتظار
ناظرت بوابه المستشفى وتذكرت اخر موقف
قبلها بالليل حضرت فلم رعب يخطف البنات
ويقطعهم كان مرعب بشكل كبير
ولما كانت سرحانه وحط صقر يده على كتفها
انهبلت والفلم يتصور بين عيونها
ورؤوس البنات المخطوفات مقطع ومشوهات
صرخت وقتها بدون وعي
كان بينها وبين الجنون شي بسيط
حست انه الفلم حقيقه وجاء دورها يخطفوها
ويقطعون راسها
نفضت راسها من التفكير بالفلم
تنفست بارتياح لما شافت ابوها طالع من باب المستشفى
دخل السياره بهدوء وقبل ما يحرك : اليوم بعد المغرب ملكتك
ناظرته تنتظر يقول اسم الشخص بس ما ذكره
وبعدها حرك
كانت تناظر للامام وتفكر بحياتها الجديده
وصلوا البيت نزلت بهدوء ودخلت البيت
وبسرعة توجهت لغرفتها
وكالعاده القت اغراضها على الارض بإهمال
وعقلها يحوس مين للي خطبها
سامر والا نواف
مو قادره تحدد مو عارفه تسأل مين وام بدر
حلفت يمين ما تقول لها
صارت تروح يمين ويسار وهي تفكر كيف تعرف
مين هو
وبالاخير بيأس القت نفسها على السرير بعشوائيه
وغمضت عيونها ونامت من كثر التفكير
سلطان بهدوء : يبه انت ما قلت لريم مين للي خطبها ؟؟؟
الجد بتفكير : امممم لا تدري نسيت اقول لها اي واحد
الله يصلحها وافقت بدون ما تسمعني
سلطان هز راسه باسف : للحين ما تدري على مين ملكتها
وين رح تكون الملكه هنا والا ببيت نايف ؟؟؟
الجد بهدوء : لا في بيت نايف وما في داعي للنسوان
الشيخ يملك وخلصنا
سلطان : على خير ان شاء الله
دخل صقر وسلم عليهم
الجد: وينك اتصل فيك تعطيني مشغول
صقر زفر بضيق : كنت هنا قريب مع راكان
الجد باستفسار : ومعاه خبر عن الخطبه ؟؟؟
هز صقر راسه : والظاهر انه زعلان يقول على حساب
ودها تكمل دراستها !!
سلطان : وش قلت له ؟؟؟
صقر بهدوء : قلت له البنت لما خطبتها كانت رافضة
الزواج نهائيا
وللحين بس عناد بأم العريس وافقت
الجد رفع حاجب باستنكار : ضروري تكشف صفحاتنا
للجيران
صقر بابتسامة : يبه راكان صديقي وبعدين حبيت اطيب
خاطره لما شفته متضايق وافهمه انها ما رفضته ريم لشخصه بس لانها رافضة فكره الزواج
وما وافقت الحين الا عناد بأم خالد
وخبرته انه بعده عقلها طفولي ومن هذا الكلام
الجد : وش قال ؟؟
صقر بابتسامة : ضحك من قلبه على تصرفها
وبعدين قال الله يوفقها
سلطان : الله يجيب للي فيه خير ……
دخل غرفتها هو وصقر
انار الغرفه وكتم غيضه نايف لما شاف غرفتها
ناظر السرير وكانت نايمه بوسط السرير
ناظر صقر بمعنى عاجبك
ضحك صقر وتقدم منها وهزها عالخفيف : ريم ريم
فتحت عيونها بشويش ورجعت سكرتهم
صقر ويهزها من كتفها : ريم ريم قومي بسرعة
فتحت عيونها وجلست وهي تثاوب : وش فيه ؟؟
صقر بابتسامة : نسيتي اليوم ملكتك !!!
ناظرته وبعدها مو مصحصحه
تقدم نايف من السرير ومسكها
من يدها وسحبها معه وتوجه للحمام
غسل وجهها شهقت ريم من المويه
وبعدها صحصحت
نايف : واخيرا صحيتي تعالي انزلي تأخرنا على الجماعه علشان الشيخ يسمع موافقتك
طلعت معه وجلست على السرير ومد لها العبايه
لبست العبايه وحطت الشيله
صقر بابتسامة : يالله خالد ينتظر على نار
ريم وهي عاقده حواجبها : مين خالد ؟؟؟
صقر : وش فيك يا ريم خالد ابن عمك فيصل !!
ريم عقدت حواجبها : وش علاقته بالموضوع ؟؟؟
صقر فجر القنبله : خالد هو للي خطبك
ريم باندهاش :بس خالد متزوج وعنده اولاد !!!
نايف وببرود : غبيه حد يوافق على الزواج بدون ما يعرف
اسم العريس !!!
ريم بدهشه : طيب وزوجته ؟؟
نايف وهو يكتم غيضه ناظر صقر : ادفنها والا تدفنها
انت ؟؟؟
ابتسم صقر : هدي بالك شوي وناظر ريم
ريم خالد زوجته ماتت بعد ما سافرت بكم يوم
فتحت ريم عيونها بصدمه وحزنت : ماتت طيب ليه
ما احد خبرني ؟؟؟ وكيف ماتت ؟؟
نايف وهو يشد على اسنانه : صار معاهم حادث
خلصيني انزلي فتحتي تحقيق
وقفت ريم بعناد : بس انا ما ودي اتزوج خالد
نايف بعصبية : لا والله يعني لما جاء الملاك والمعازيم
ودك تفشلينا انزلي بسرعة بلا كلام فاضي
ريم بعناد اكبر : ما رح انزل ودك تزوجني لواحد عنده
عيال مستحيل وتكتفت
نايف وهو يتكلم من بين اسنانه : ريم وقسم بالله
ادفنك هنا انزلي اقول لك تأخرنا على الجماعه
حركت ريم حواجبها بالرفض
نايف بصراخ : ريم وقسم بالله ادفنك هنا اقول لك انزلي
صقر ناظر نايف : خلاص انت روح وانا الحقك وهي معي
نايف بعصبية : والله ما انزل الا وهي قدامي ويالله انزلي
علشان الشيخ يسمع موافقتك يالله
ريم بقهر وعناد : خالد مستحيل اخذه لو تقطعوني
تقدم منها نايف وضربها كف على وجهها : اقول قدامي
صقر انقهر من نايف وناظر ريم : خلاص ريم هذا اختيارك وانت وافقتي بدون ما تسمعين مواصفات العريس
يالله اختصري وانزلي وان شاء الله ما تندمي
ومسك يدها برجى : لا تفشلينا حنا ما نلعب
هذا اختيارك
هزت راسها بالموافقة وناظرت نايف : انا اسفه
ومشت باتجاه الباب
هز راسه نايف باستغراب من تقلب حالها
ناظر صقر وبعدها طلعوا خلفها
وقفت خلف الباب بهدوء
وسألها الشيخ اذا تقبل الزواج بخالد …..
ناظرت نايف بخبث ورفعت حاجب :
نايف فتح عيونه بصدمه ما توقع تصل فيها
الحقاره تفشلهم قدام المعازيم
علشان كذا اعتذرت الحقيره
علشان تنفذ مخططها وترفض براحتها
كيف رح يكون موقفه قدام اخوه وابوه
بزر ما قدر يربيها
شد على قبضه يده بس ارتخت
لما سمع صوتها الطفولي : موافقه يا شيخ
تنفس براحه لما سمع ردها كان وده يمسكها
ويخنقها على حركتها البايخه
اعطاها صقر الدفتر وقعت وابتسمت بهدوء
وبعدها طلعت بدون كلام
دخلت غرفتها وقفلت الباب بالمفتاح
وهي محتاره هل تسرعت والا لا
رمت نفسها باهمال على السرير وغطت
بالنوم وهي تفكر ……
ام خالد بقهر : صدقني البنت ما تناسبك
خالد ببرود : يمه خلاص انا ملكت وكل شي انتهى
وبعدين انا حطيت البنت براسي من بعد اسلام كاترين
بس ما ردني عنها الا انها مخطوبه لزياد
هزت ام خالد راسها : صدقني انك فاهم الموضوع غلط البنت مو مثل انت متصورها
فيصل وقف : صدقني تسرعت يا خالد انا كنت ودي اخطبها لنواف او سامر
اما انت ما تناسبك ابدا
انت يناسبك بنت كبيره عاقله تراعي عيالك
قاطعه خالد : خلاص للي صار وانا مقتنع بقراري
رجاء ما حد يعارض ……..
ام خالد بقهر : صدقني البنت ما تناسبك
خالد ببرود : يمه خلاص انا ملكت وكل شي انتهى
وبعدين انا حطيت البنت براسي من بعد اسلام كاترين
بس ما ردني عنها الا انها مخطوبه لزياد
هزت ام خالد راسها : صدقني انك فاهم الموضوع غلط البنت مو مثل انت متصورها
فيصل وقف : صدقني تسرعت يا خالد انا كنت ودي اخطبها لنواف او سامر
اما انت ما تناسبك ابدا
انت يناسبك بنت كبيره عاقله تراعي عيالك
قاطعه خالد : خلاص للي صار وانا مقتنع بقراري
رجاء ما حد يعارض
هاذي البنت بدون ما اعرفها دخلت مخي
وانا ابغاها ملتزمه مثل ريم يكفي انها
لما شافت كاترين ما ضيعت الفرصه وحاولت تقنعها
مو مثل بناتك نفروها من الدين
ام خالد هزت راسها بأسف : تراك غلطان انت ما تعرف
البنت وحكمت عليها انها ملاك من موقف واحد
خالد مسك يد امه : يمه الله يسعدك يرضيك
اليوم ملكتي واكون منكد خلاص للي صار صار
فكي هالكشره علشاني وارضي عني
ابتسمت ام خالد بدون نفس : الله يوفقك ويرضى عنك دنيا واخره
ابتسم خالد بفرحه : الله يخليك لنا يا احلى ام بالدنيا
ام خالد وهي تحاول تتقبل الموضوع : ليه ما شفتها ؟؟
ابتسم خالد : عمي نايف رفض هو وصقر وحلفوا يمين ما اشوفها
مع انه جدي زعل عليهم بس انا قلت ما في داعي اشوفها
والعرس بعد اسبوع
ام خالد بفجعه : اسبوع ليه مستعجل ؟؟؟
خالد بهدوء : دراسه وكملت وقدمت اوراقي هنا
خلاص رح استقر واجلس عندك قرفت السفر والغربه
ليه التأخير ؟؟؟
ام خالد عفست ملامحها : بس ما يمدينا اسبوع !!
فيصل بهدوء : انتم الحريم ما ادري كيف تفكرون معكم اسبوع يكفي وزياده
والقاعه ابوي تكفل بكل شي يكون جاهز
ورح يسكن بالطابق الثاني الجناح جاهز من زمان
بس يغير اثاثه وكل شي تمام
خالد : من باكر ابدأ اجهز بالجناح
ام خالد بدون نفس : وعيالك وين رح يسكنون ؟؟
خالد بهدوء : معي بالجناح لا تنسين الجناح الغربي
كبير ووسيع
ام خالد رفعت حاجب بنغزه : وريم رح توافق ؟؟؟
خالد بدون اهتمام : عمرها ما وافقت عيالي عندي
ومستحيل اتخلى عنهم
وبعدين ريم احسها عاقله وما رح تعترض
كشت عليه ام خالد : خليك على عماك
وبنفسها بسخريه قال عاقله والعلم عند الله لو
ياخذوها على مستشفى المجانين غير يدخلوها
فيصل بشبح ابتسامه : الله يوفقك
وبعدها وقف: يالله يا ام خالد
وقفت ام خالد وطلعت مع فيصل
ناظرهم خالد باستغراب وحس انهم يخبون
عنه شي يخص ريم
&&&&&&&&&&&&&&&&&&&&&&&&
ريم
رميت نفسي على السرير مو عارفه انام
بعد ما قال لي ابوي الزواج بعد اسبوع
ليه مستعجلين كذا ؟؟؟
غمضت عيوني وانا استرجع الاحداث احس
نفسي تسرعت اني وافقت
كنت معاند ما انزل اوقع بس فكرت فيها
هذي نتاايج قرراتي المتسرعه ليه احمل الناس
خطأي وبنفس الوقت تذكرت كلام جدتي
زاد قهري وقررت اقهرهم واملك بغض النظر عن
الشخص اهم شي اقهرهم
نهضت نفسي وجمعت شعري وابعدته عن رقبتي
احسه خنقني زياده
زفرت بضيق ووقفت بضجر وتوجهت للتسريحه
جمعت شعري مره ثانيه ولفيته بعنف وثبته بالكماشه
تأففت متضايقه وقرفانه نفسي مو عارفه السبب
نزلت خصله من غرتي على جبهتي نرفزتني
صرخت وكأنها تفهم علي : وبعدين ؟؟؟
مسكتها بقسوه ورجعتها للخلف
ما رفعت يدي الا رجعت استقرت على جبهتي
وكأنها تعاندني مسكتها بغل : وقسم بالله انهيك
من الدنيا
رجعتها للخلف بطريقه عنيفه المتني
غمضت عيوني من الالم وبقهر : عجبك يا زفته وجعتيني
مسكت الطوق ولبسته وناظرت نفسي بالمرايه
ونظري محدد على الخصله
لعبت بحواجبي وارتحت اني قهرتها
هههههه اعرف اني انهبلت بس وش اعمل عقلي
مشوش مو مرتاح
ضربت على راسي بعنف غبيه غبيه متسرعه
للي قاهرني ما اعرف شي عن العريس المجهول
مين أسأل وعضيت على شفتي بقهر
وفجأة لمعت براسي الفكره مثل كونان لما يكتشف
القاتل
ما في غيرها طلعت من الغرفه بسرعة وانا شبه
اركض نزلت على الدرج بهدوء لما شفتها جالسه
بالصاله لوحدها
ارتحت انها لوحدها نزلت بهدوء وانا ابتسم بوجهها
جلست جنبها بعد ما رديت السلام
ناظرتها بتردد : امممممم ممكن سؤال ؟؟
ساميا بهدوء : تفضلي
سألتها : امممم بالنسبة لخالد ما اعرف عنه شي
قاطعتني : لا تهتمي انا اقول لك السيره الذاتيه له
وابتسمت لي
هزيت راسي بالموافقه
ساميا بتفكير : اممممم هو اكبر حفيد عمره تقريبا 26سنه
ناظرتها باستغراب : صغير ؟؟ كيف عنده عيال كبار !!! ردت علي بهدوء : انتي بتعرفي عمك فيصل امضى حياته بالخارج
ولما وصل خالد عمره 18 قرر يزوجه اجنبيه خاف عليه
ينحرف بس زوجته حملت وخلفت توأم طيف ومصعب
كمل دراسه هناك طب وتخرج قبل فتره
سألتها : طيب زوجته ما صار لها فتره متوفيه صار وده يتزوج ؟؟؟؟
هزت كتوفها : للي اعرفه من زمان انه ناوي يطلقها من زمان متفق معها
لما يكمل دراسه يطلقها ويرجع هنا لانها رافضة تعيش
هنا وهو اصلا رافض فكره زوجه اجنبيه وده يتزوج من بلاده بس فيصل اصر عليه يتزوجها
هزيت راسي
ساميا : تدرين يا ريم مو تدخل بحياتك بس المفروض
بما انك وافقتي على الزواج الحين لو اخذتي راكان
افضل لك على الاقل تبعدين عن المشاكل
وتبدين حياه جديده
هزيت راسي كلامها مزبوط بس اذا فات الفوت ما ينفع الصوت : كل شي نصيب يا خالتي
هزت راسها : صادقه كل شي نصيب الله يوفقك
ويكتب لك الخير
وقفت وبصوت هامس : امين
ساميا بتردد : اذا ودك تروحين السوق انا جاهزه
ناظرتها بهدوء : مشكوره خالتي ام بدر رح تطلع معي
ما ودي اغلبك
هزت ساميا راسها : براحتك
توجهت للدرج وانا افكر واحس بالندم لو وافقت
على راكان افضل لي كان بعدت عنهم وارتحت
من المشاكل
بس لما اذكر ام خالد وجدتي انبسط اني قهرتهم
دخلت غرفتي وزفرت براحه : الحمد لله صغير شوي
مو شايب
رن جوالي توجهت للسرير وشفت
الجوال كانت ام بدر رديت عليها بهدوء
طلبت مني علشان اروح السوق معها تعذرت
منها انها ساميا ودها تاخذني
ما اعترضت وطلبت منها تحجزي لي بالصالون وفستان الزواج على ذوقها
قفلت منها وانا مو ناوي اروح عالسوق
وش ذنبها ام بدر تترك بناتها علشان تروح معي عالسوق
ما ودي اغلب حد معي وما رح اجهز والمهر رح اخبيه
للمستقبل يمكن احتاجه
شغلت التي في وانا عقلي سارح وافكر بالمستقبل
&&&&&&&&&&&&&&&&&&&&&&
الجده قفلت من الكوافيره وزفرت بضيق : اففففف قهرتني وهي تتعذر قال مشغوله
ام خالد بقهر : انا مو عارفه وش هذا الزواج للي بإسبوع ؟؟؟
ام سليمان بنغزه : خلاص استسلمتي لبنت ساره ؟؟؟ ام خالد بغبن : مثل ما سكتي قبلي انا سكتت
بالله وش يطلع بيدي يعني لما خبرنا خالد كان متفق
مع عمي على كل شي وحنا اخر من يعلم
لو عرفت من البدايه قبل ما يخبر عمي كان تحلم
بنت ساره تاخذه
بس مليت من المشاكل طول الفتره وفيصل ما يكلمني زعلان
وخالد حرق قلبي وانا منكده عليه
الجده باستسلام : خلاص للي صار صار والله ما
احب اشوف خالد متنكد وضايق خلقه
والسبب حنا
خلاص دامه اختارها الله يوفقه
ام سليمان : وش عرفه فيها ؟؟؟
ام خالد بدون نفس : ما يعرفها بس سمع عنها من كاترين
من كثر ما مدحتها ويقول حتى لما سافروا واخذها
على مكتب الدعوه حتى تتعلم عن الاسلام اكثر
يقول طول الطريق وهي تمدح فيها
حتى دخلت هالبنت عقله
ام سليمان بدون نفس : الله يوفقه
ام خالد والجده باستسلام : امين
»»«»«»»««««««««««««»»»»«««««««««««««««
خلال الاسبوع ارتحت شوي وقضيت وقتي باللعب مع
البزران ما اقدر اقاوم اللعب معهم
احس اني انسى العالم وكل همومه معاهم
احس نفسي مثل الفراشه اطير من مكان لمكان
بعيد عن الاحزان
يكفي انه الحزن ما يعرف بابي لما العب معهم
بالرغم من نظرات نايف لي بانتقاد بس
ما يهمني اهم شي وناستي وبس
هاذي حياتي وانا حره فيها
كانت تتصل في ام خالد على الجوال بس اعطيتها
طاف وما رديت عليها
جهزت اغراضي كلها بالحقائب وما اشتريت ولا
شي من السوق ولا طلعت من باب البيت
كنت انتظر نايف يسألني عن التجهيزات
بس خاب ظني طول الاسبوع ما عبرني
بس كان يرمقني بنظرات انتقاد
الكوافيرة : ارفع راسك فوق شوي
رفعت راسي بهدوء خلاص مو ضروري تعرفون وش صار خلال الاسبوع
المهم اني الحين بالصالون وبعد ساعات نتوجه
للقاعه
بعد ما طق كبدي وانا مثل الصنم ما اتحرك
واخيرا انتهيت وقفت اناظر نفسي بالمرايه
عفست ملامحي : كعب الصندل صغير ودي اطول من كذا
جدتي وهي ترمقني بنظرات اعجاب : لا كذا مناسب طولك
ام خالد لوت بوزها : يا حسره على ابني ما لقى غير قزم يتزوج
ناظرتها بغرور : القزم الف واحد يتمناها
ام بدر قبل ما يشتد الوضع : سلطان يسأل متى تجهزون ؟؟؟
الجده : لما نكمل نتصل عليهم
############
ناظرت ريم نفسها بالمرايه : واشرطه الاغاني جاهزه ؟؟
ام خالد بمجاكره : ما في اغاني يا حلوه
لفت ريم بعصبية : ليه ان شاء الله ؟؟؟
ام خالد : خالد قال ممنوع تتشغل الاغاني واستغلت
ام خالد الفرصه وضربت على خالد بدون ما ريم
تنتبه
ريم وهي تناظر جدتها : يا رب فرحة العمر كيف
ما في اغاني ؟؟؟
انا ودي ارقص ما اعرف ارقص على الاسلامي
الجده وهي تصغر عيونها : ما تعرفين ترقصين على الاسلامي
ورقصك الخالع بخطبه سليمان !!!
اصلا ممنوع تنزلين ترقصين ناقصنا تفشلينا
قدام المعازيم
ريم : الله يسامحك يا جده هذا هز عالخفيف
والحين ما لي دخل ابغى اغاني والا والله ما اروح لا
عالقاعه ولا على الزفه
وكتفت يدينها
ام بدر : ريم خلاص زوجك ما يبغى اغاني احتصري
ولا تنسين انه حرام
ريم بقهر : كلها كم ساعه بس !!
اذا هو ما يبغى اغاني انا ابغى
ام خالد بخبث : اسمعتها بإذنك
شهقت ريم وحطت يدها على فمها من الصدمه
ام خالد بانتصار : خذي وده يكلمك
ناظرت ريم ام خالد بقهر واشرت بحواجبها بالرفض
ام خالد بابتسامة : مو راضية تكلمك ……….
رجعت ام خالد ناظرت ريم: يقول لك بس دقيقة وده يكلمك
الجده بنهر : يا قليله الحيا ردي عليه
عفست ملامحي واقتربت من ام خالد وسحبت الجوال
حطيته على اذني وبهدوء : الو
خالد ببرود : كيفك يا ريم ؟؟؟
ريم بتوتر : الحمد لله بخير
خالد ببرود : وش قصه الاغاني ؟؟؟
ابتسمت ريم بغباء : ها لا هاذي جدتي الله يسامحها مصممه الا تحط اغاني ودها ترقص و…
قاطعتها الجده بعصبية : ريم يالكذوب
ضحكت ريم على شكل جدتها
وبعدها تذكرت انه خالدةعلى الخط سكتت باحراج
خالد بهدوء : اممم عموما الاشرطه الاسلاميه
جاهزه
وانا اعتمد عليك لا تخلين حد يشغل اغاني اتفقنا
ريم عفست ملامحها : اتفقنا
خالد : يالله ما اطول عليك مع السلامه
ريم : الله يسلمك
رمت الجوال على الكنبه بقهر
ام خالد وهي مبسوطة : تستاهلين اشوف القط بلع
لسانك ليه ما اعترضتي ؟؟
الجده مسكت ريم من اذنها : يا ملسونه انا طلبت
الاغاني
ريم بقهر ودموعها على وشك النزول : ما لي دخل
ام سليمان : كل هذا علشان اغاني
ام بدر مسكت يدها : ريم كبري عقلك وش تبغين بالاغاني ؟؟
هذا اول يوم لك بحياتك الجديده تبدين فيه بمعصيه
ربنا ؟؟
ريم بطفوله : كلها ساعه !!
ام بدر بحنان : اذا تضمنين عمرك بهاذي الساعه
انا مستعده اتصل بسلطان يخليه يقنع خالد
بس جاوبيني تضمني انك ما تموتين بهاذي الساعه ؟؟
ريم : ما اضمن
ام بدر : لا تنسين اذا حطيتي اغاني كل الحريم
للي رح يحضرون اثمهم برقبتك انتي
تقدرين تتحملين كل هذا الاثم ؟؟؟
ريم شبه اقتنعت : خلاص ما ابغى اغاني
باستها ام بدر على جبينها : الله يطول بعمرك يالغاليه ابتسمت ريم بمحبه لام بدر
الجده : مو وقت افلامك الحين لا يخترب المكياج
وانتي يا ام خالد اتصلي شوفي البنات كملوا
ام خالد بضجر : اخخخخ منهم رفضوا يحجزون هنا
معنا وبعدها اتصلت عليهم
&&&&&&&&&&&&&&&&&&&&&&&&&&&
عند الرجال كان خالد واقف يسلم على المعازيم
ومبسوط عالاخير
وخاصة لما شاف الفرحه بعيون ابوه وجده واعمامه
اما اولاد عمه يحسهم مو ذاك الزود معه
وكأنه ماكل حلالهم
ناظر صديق الطفوله راكان حسه متضايق
مو مثل العاده بس ما يدري وش السبب
هز كتافه وهو ناوي بعد العرس يشوف علامه متضايق
تذكر ريم وابتسم يا حليلها مطيعة وما عاندت
وابتسم زياده لما تذكر موقف امه اتصلت فيه
تسمعه كلام ريم بدون ما تنتبه
هز راسه وهو يردد بنفسه ان كيدكن عظيم
نغزه صقر بكتفه : الله يعوض تضحك مع نفسك
رفع خالد حواجبه : محتررررررر
كش عليه صقر : مالت عليك
عند الحريم
بعد ما انزفت ريم ورفض خالد يدخل عند الحريم
كانت جالسه على الكوشه
ودها تنزل ترقص بس محاصره ام بدر واقفه عندها
ما خلتها تقوم
ريم وهي تشوف البنات يرقصون انقهرت
وخاصه سديم تحسها تجاكر فيها
وهي ترقص
ناظرت ام بدر وشوي وتبكي : بس شوي يا خالتي
بس شوي
ام بدر بحزم : لا يعني لا
ريم من القهر صارت دموعها تنزل لما شافتها ام بدر
وقفت قدامها تحاول ما حد يشوفها : خلاص اخليك
تنزلين بس لا تبكين ويخترب المكياج
مسحت لها ام بدر الدموع بشويش
وبقهر يالله انزلي انا بحياتي ما شفت عروس
خفيفه مثلك اثقلي يا ريم
ريم بدون مبالاه : هاذي فرحه العمر
هزت ام بدر راسها مو عاجبها حركة ريم
نزلت ريم ترقص مع ام بدر وهزت هز وام بدر
أتأشر لها بحواحبها علشان ترجع
وهي مبسوطه وترقص ومعطيه طاف لام بدر
مو مصدقه نفسها انها لابسه فستان الزفاف قدام الناس
شعورها الحين تحسه شعور اجمل عن لباسها للفستان المره الاولى
يمكن الحين لانه الناس شافوها وحست فعلا انها
عروس
الجده متفشله تقربت منها ومسكت يدها : يالله
يا ريم المعازيم ودهم يباركون لك وبعدها تطلعين لانه خالد ينتظر
ريم بطفوله : بس شوي
وبطلوع الروح حتى قدروا يرجعونها مكانها
سلموا الحريم عليها وباركوا لها واغلبهم يصلون على النبي من جمالها
سلمت عليها ام زياد وبناتها وفرحوا لها
اما ام راكان سلمت عليها بقهر وبعدها طلعت
بنات عمها ولا وحده سلمت عليها وما باركوا لها
كانوا واقفين قريب منها بس ريم طنشتهم
وما اهتمت لامرهم
اما اخواتها سلموا عليها بهدوء وباركوا لها
ركبت السياره وانتظرت تسمع ابوها يوصي عليها
بس وين اصلا ما شافته ولا بارك لها
وين امها الحين عنها كل الامهات ينتظرون لحظه
يزفون بنتهم
بس وين امها عنها ؟؟؟!!!
لا ام ولا اب !!!
تحس نفسك وحيد على الرغم من كثر الموجودين
الا تحس فيه نقص
نفضت راسها بالرفض خلاص انا قررت ما افكر
بناس مو سائله عني
رح اعيش حياتي وانبسط واليوم بالذات لازم ما انكد على نفسي
وقفت السياره عند بيت الجد لانه خالد رفض يروح عالفندق
ما كانت ريم تدري مين حولها ومين معها بالسياره
كانت سرحانه بعقلها بعالم أخر
ايقضتها من السرحان يد ام خالد : يالله يا ريم انزلي
ساعدتها ام خالد على النزول
نزلت ومسك يدها عمها فيصل : يالله يا ريم
مشت ريم مع عمها فيصل وخالد جنبها
حست الطريق طويييييل للجناح
دخلو الجناح
اقتربت ام خالد ورفعت الطرحه عن ريم وساعدتها
وخلعت العبايه
وجلستها جنب خالد
بعد ما بارك لها خالد
كان خالد يناظرها ويصلي على النبي بنفسه مو مثل ما قالوا
انها صغيره بس جميله حيييل
الجد بتوصيه : ريم انتبهي على زوجك واسمعي كلامه
ولسانك الطويل قصريه فاهمه
فتحت عيونها على وسعهم من كلام جدها
ضحك خالد على تعابير وجهها
فيصل بابتسامة : لا تناظري كذا
مثل ما سمعتي لسانك الطويل قصريه واسمعي كلام زوجك فاهمه
ناظرته بقهر كان ودها ترد وتبرد حرتها بعمها وجدها
بس بلعت لسانها قدام زوجها وسكتت وهي
تقول بغيض : ان شاء الله عمي
خالد بضحكه : طيب المفروض توصوني عليها !!
الجد : ما يحتاج عارفينك اما بعض ناس تحتاج
مجلدات بالتوصيه
ناظرت ريم جدها بتوعد
ولوت بوزها زعلانه
بعدها استأذنوا وطلعوا بعد ما وصاهم خالد على عياله ……………..
ثاني يوم بعد العصر كانت جالسه مع الحريم
وهي لابسه فستان ازرق غامق لنصف الساق
بأكمام طويله ومخصر وفيه حركات بسيطه
وشعرها مفتوح بدون حركات مو مثل العاده
سديم بنغزه : اول مره اشوف عروس بدون ميك آب
ريم انقهرت لما تذكرت وهي تحط مكياج اعترض
خالد وقال لها ممنوع تحط شي على وجهها
لانها ما تغطي وجهها
وحتى الفستان ممنوع يكون بدون اكمام طويله ولازم يكون طويل
اضطرت تسمع كلامه لانها عندها كلام الزوج
لازم ينسمع وما تقول له لا
ابتسمت بوجه سديم : خالد ما رضي احط يقول
جمال رباني مو بحاجه للمكياج وحركت حواجبها
انقهرت سديم ولوت بوزها
وقعدوا يسولفون وكان الجوز الثلاثي مع ريم عادي
مثل اول يتكلمون ويضحكون
لحد ما دخلت هيفاء ورافعه خشومها مترين
سلمت على الموجودين وعلى ريم برؤوس اصابعها
طنشت ريم وجلست مكانها
هيفاء بنغزه : بالله هذا شكل عروس والله انك يا ام
خالد تفشلين بالبدايه اول ما دخلت ظنيتها
صديقه طيف ونوف بالمدرسه
حتى الناس يتكلمون يقولون ما لقت لابنها الا هاذي
القزم
ام خالد ما ردت لانها عارفه انها هيفاء كلامها مو صحيح
خاصه البارحه بالعرس كان طول ريم عادي مع الكعب مو واضح قصرها
دخلت ام بدر على كلام هيفاء وبابتسامه : ليه تقولين
كذا والله البارحه اغلب الحريم يقولون نايف وين
مخبي هالغزال
وغمزت ريم
ابتسمت ريم على كلام ام بدر
الجده بحسن نيه : حتى ام راكان زعلانه كثير
تقول على حساب ما ودكم تزوجونها
والله اني انحرجت منها
ساميا : كل شي نصيب بالدنيا
هيفاء احتقن وجهها من القهر
بعدها دخلوا بناتها وسلموا على ريم عادي مو
مثل امهم
وجلسوا مع البنات
دخلت طيف ونوف وهم يركضون ومسكوا يد
ريم تعالي بسرعة احمد ينادي عليك
ام بدر اشرت لها لا تقوم بعيونها
اضطرت ريم ما تقوم وعقلها عند احمد معقول
اشترى شريط اللعبه الجديد
صارت تهز رجلها بحماس طفولي
رجعت طيف واقتربت من اذن ريم وهمست فيها
ريم بحماس بدون وعي : احلفي
ناظروها الحريم والبنات باستغراب
طنشتهم ووقفت متحمسه عالاخير
الجده : وين يا ريم ؟؟
ريم لبست عبايتها بإهمال والشيله على راسها
وبدون اهتمام للجده : الحين ارجع
وبسرعة طلعت من مجلس الحريم
وبحماس : وينه احمد يا طيف ؟؟
طيف مسكت يدها : بسرعه بالصاله فوق
طلعت ركض مع نوف وطيف وتوجهت للطابق
الثاني
احمد بحماس : جبته جبته الشريط
ريم بحماس : يالله شغله بسرعة بسرعة
شغلوا الشريط وجلست على الارض تلعب بحماس
وهي واحمد
والبزران يشجعونهم
ونسيت الجلسه تحت ونسيت انها عروس ولازم
تتواجد تحت
هاذي ريم عند الالعاب تنسى كل شي حولها
وعقلها ينحصر بالالعاب مثل البزران
بعد مرور ساعتين ما رجعت ريم
ام خالد باستغراب : وين ريم ما رجعت ؟؟؟
الجده : يمكن خالد ناداها
رن جوال ام خالد ردت بفرح : هلا وغلا بالمعرس……………ليه ريم مو عندك قبل ساعتين طلعت وبعدها
ما رجعت …………….خلاص رد لي خبر وينها وخلها
تنزل الحريم يسألون عنها ……….ان شاء الله مع السلامة
الجده باستغراب : مو عنده ؟؟
ام خالد وهي متأكدة من مكانها : لا يا خالتي يقول ما شافها واقتربت من الجده وهمست بإذنها
الجده فتحت عيونها وبهمس : بتعملها هالريم
الحين تاركه الجمعه علشان الزفت متى تعقل هاذي البنت متى ؟؟؟!!
ام خالد : انداري
—————