Uncategorized

رواية العشق لا يعرف وطن الفصل الخامس 5 بقلم أية إنسان

 رواية العشق لا يعرف وطن الفصل الخامس 5 بقلم أية إنسان
رواية العشق لا يعرف وطن الفصل الخامس 5 بقلم أية إنسان

رواية العشق لا يعرف وطن الفصل الخامس 5 بقلم أية إنسان

_ اسر : مش خايف تموت وانت بتنم كده .
_ مش معقول انت مصري .
_ ايوه عندك مشكلة .
_ مشكلة اي أخيرا الواحد لقي حد من بلده مش مصدق .
_ حمدلله على السلامه .
_ الله يسلمك متشكر على انقاذك حياتي حقيقي ابن بلد يعني .
_ الشكر لله لسه ليك عمر على الدنيا ثم مش علشان ابن بلد ولا حاجة دة واجبي مش اكتر .
_ مالك كده يا صاحبي شايل هم الدنيا ليه احكيلي وانا هسمعك .
_ نعم .
_ مالك قافش ليه كده اعتبرني صاحبك واحكيلي يمكن ترتاح .
_ كنت بحسبك مهندس محدش قالي انك دكتور نفسي .
_ الحكايه مش محتاجه دكتور علشان يشوف حزنك محتاجه إنسان بيحس .
_ طيب يا عم الحسيس الف سلامه عليك سلام .
_ هشوفك تاني .
_ لا .
_ ابو تقل دم امك يا اخي .
_ سمعتك يا محترم ونظرا لان مفيش حته فيك سليمه مش هكلمك ومن غير سلام .
☆ ————— بقلم الكاتبة/ آية إنسان ————– ☆
 في الطيارة عند هاجر ووعد :
_وعد :  كان نفسي نقضي اسبوع كمان في باريس يا هاجر متعرفيش انا بحب البلد دي قد اي .
_هاجر  : معلش مره تانيه انتي عارفه عندي شغل مهم ولازم اسلمه بكره .
_ ماشي يا عم ربنا يسهلك .
_ عدي الوقت بسرعه في الطياره ووصلوا المطار  وهاجر قالت : بقولك اي يا وعد هاتي الشنط معلش عقبال ما ارد على الفون احسن مكالمه شغل هستناكي بره علشان مش سامعه حاجه هنا ، وخرجت هاجر تجري علشان تلحق ترد واول لما خرجت الشارع خبطت في بنت وقعت كل اللي معاها في الأرض .
_ هاجر : انا اسفه جدا مشوفتكيش .
_انتي عملتي اي .
_ انا مكنتش اقصد صدقيني انا اسفه .
_ اسفة اي وزفت اي على دماغك كده شغلي كده اعاااااا .
_ ما تحترمي نفسك يا استاذه قولتلك اسفه ومرتين كمان .
_ غلطانه وبتقاوحي كمان طب اعمل اي أنا دلوقتي التقارير الصور الشغل منك لله يا شيخة .
_ مها صاحبه البنت : اسماء يا اسماء انتي قاعده في الأرض ليه خلصي هاتي الشغل علشان ألحق رئيس التحرير .
_اسماء :  مها بصي انا هفهمك اصل يعني .
_ اصل اي لا اوعي تقولي أن الورق اللي مرمي دة والصور دي هي اللي هتتقدم في جريده بكره .
_ للاسف صح بس مش انا هي اللي ….
_ هي اي وزفت اي يا اسماء احنا لو التقرير مكانتش عند رئيس التحرير على بالليل احنا كده اترفدنا .
_ لا مها بصي انا هلاقي حل ماشي وهكلمك .
_ انتي لازم تتصرفي والا والله هحملك انتي كل المسؤوليه انا بقولك اهو سلام .
_ عجبك كده اعمل اي أنا دلوقتي منك لله .
_هاجر :  ما خلاص يا بت بقى الله تعالي معايا البيت وخدي الصور اللي انتي عايزاها .
_ لا يا شيخه انتي مجنونه انتي عارفه أنا عاوزه صور اي لتكوني فاكره أن عاوزه صور لحضرتك ولا حاجه .
_ لا يا خفيفه انا اصلا مصوره يعنى هتلاقي عندي اللي انتي عايزاه اخلصي بقى هتيجي معايا ولا اي .
_ طلعت وعد وقالت : اي دة مين دي يا هاجر .
_ هاجر : دي قدر مهو كده الواحد لما يكون مستعجل الدنيا تعطله اكتر اهو معرفتش ارد على المكالمه بسببها .
_ اسماء : بسببي انا يا مفتريه .
_ ردت ميرا : يا رب نخلص النهارده .
_ طب يلا يا هاجر .
_ شدت هاجر وعد وقالت : لازم البنت دي تيجي معانا .
_ ردت ميرا : تيجي فين معلش هو اي حد نقابله نخده معانا على بيتنا .
_ وعد : هاجر ميرا معاها حق مش معقول كده .
_ معلش يا وعد انا هتسبب في رفدها لو مجتش معايا وانا اللي غلطانه .
_ انا مش فاهمه حاجه .
_ هحكيلك علي الطريق يلا بينا دلوقتي يلا يا … هو انتي اسمك اي .
_ انا اسمي اسماء البكري .
_ طب يلا يا اسماء وركبوا العربيه واتحركوا علي 
الفيلا .
☆ ————— بقلم الكاتبة/ آية إنسان ————– ☆
في فيلا الصاوى :- 
_ طلع عمرو  على الفيلا وقال بلهفه:  خير يا عم حسين في اي بابا ماله.
_ مش عارف يا ابني انا دخلت ليه القهوه على  مكتبه لقيته واقع على الأرض طلبت ليه الدكتور وهو فوق عنده .
_ طلع عمرو عن والده وقال : خير يا دكتور طمني.
_ السكر عنده ارتفع شويه يا ريت ميتعرضش للضغط أو المجهود الكبير بعد اذنك .
_ وقف عمرو يتأمل والده فهو آخر ما تبقي لديه فى هذا الكون ولن يتحمل خسارته أيضاً .
☆ ————— بقلم الكاتبة/ آية إنسان ————– ☆
في فيلا العامرى : 
_وعد :  دادة ندي يا داده .
_ اهلا اهلا حمدلله بالسلامه يا وعد .
_ الله يسلمك يا داده هو محدش هنا ولا اي .
_ لا رانيا هانم في النادي وعاصم بيه في الشركه اطلعي ارتاحي عقبال ما احضر الغدا .
_ ماشي يا داده .
_ اميرة : ندي يا ندي .
_ نعم يا اميره .
_ يا ربي على الغباء كام مره اقول متقوليش زفت اي مبتفهميش .
_ ردت بحزن :  انا اسفه يا بنتي الاسم التاني تقيل عليا معلش .
_ ميرا ميرا يا ندي لو قولتي اميره تاني اعتبري نفسك مرفوده ماشي .
_ امرك يا بنتي .
_ بنتك اي وقرف اي اقولك غوري من وشي .
_ حاضر .
_اسماء :  اي دة اي دة العز دة  كله مهو علشان كده ماشين تدوسوا علي خلق الله ولا هممكم .
_هاجر :  مالك يا اسماء متجربي تسمي كده انتي جايه تحسدينا ولا اي .
_ اصل الدنيا دي حظوظ ناس تعيش في الجنه دي وناس تتفحت في الشارع .
_ اتنهدت هاجر وقالت :  المظاهر خداعه متتغريش فيها اوي كده ورا كل بيت من البيوت دي في حكايه محدش يعرفها غير صحابها .
_ ايوه ايوه متخافيش مش هحسدك يا حجه .
_ هههههه .
_ بتضحكي على اي .
_ مش مهم يلا نطلع فوق .
_ دادة يا دادة .
_ نعم يا ست هاجر .
_ الله الله الله اي ست هاجر دي ودة من أمتي يا دادة .
_ العين متعلاش على الحاجب يا ست هاجر .
_ اه هي مفيش غيرها اميره عملتلك اي قوليلي .
_ لا ابدا معملتش حاجه .
_ اومال شكلك معيط ليه يا ابيض يا عرسي انت اجميل .
_ ابتسم ندي علي مشاكسه هاجر .
_ ايوه كده اضحكي محدش واخد منها حاجه متزعليش منها دي بت خيبه سيبك منها ركزي معايا انا هاا .
_ هههههه عامله الاكل اللي بتحبيه متقلقيش .
_ انا قولت انا مليش في البيت دة غير داده ندي دائما فهماني حلاوتك يا ندي .
_ والله يا بنتي انتي مهونه عليا كتير .
_ متجيبي بوسه يا ندي .
_ انا قولت كتر السفر هيخليكي تنحرفي سلام .
_ راحه فين دادة دادة …..للاسف مشيت .
_ هههههههه .
_ بتضحكي على اي يا اسماء .
_ لا ابدا مش مهم يلا نشوف الصور .
_ دخلت هاجر واسماء الاوضه بتاعه هاجر وكانت كلها صور بس صور لاطفال مع اهلها كلها ولكنها صور جميله اوي .
_ بصي يا اسماء الصندوق دة فيه كل الصور اللي ممكن تحتاجيها موضه سياحه اثار طبخ العاب كل حاجه اختاري منهم اللي يناسبك عقبال ما اغير واجي .
_ خرجت هاجر وفضلت اسماء مبهورة من الصور وجمالها واضح انها كلها صور محترفه فضلت تدور ولكن كلهم احلي من بعض فضلت ساعه تتفرج ومش عارفه تختار اي .
_ هاااا اخترتي اي يا اسماء .
_ بصراحه يا هاجر انا مش عارفه ولو عرفت التقارير هتتغير ولو اتغيرت انا في حاجات مش عرفاها وقعدت على الكرسي وقالت :  انا اكيد اترفدت انا عارفه .
_ نعم يختي انا سيباكي ساعه علشان تقولي كده لا انا مليش فيه خلصي عندي شغل يا حجه مش فاضيه للكلام دة انا .
_ قامت أسماء متعصبه وقالت : هو أنا بشحت منك ولا اي خلاص مش عاوزه من وشك حاجه وخرجت من الاوضه وخبطت في رانيا كانت هتوقعها .
_ رانيا : انتي غبيه ولا مبتشوفيش مش تفتحي .
_ اتكلمي بأسلوب كويس اي غبيه ومش بشوف دي .
_ لا وكمان قليلة الأدب ثم لحظه واحده انتي مين وبتعملي في بيتي اي انتي اكيد حراميه انا هطلب ليكي البوليس .
_ حراميه مين يا وليه انتي .
_ نزلت هاجر ووعد وميرا علي الصوت .
_ قالت وعد : في اي يا ماما بتزعقي ليه .
_ في أن البنت دي حراميه دخلت بيتي ازاي .
_ اتكلمت هاجر وقالت : لا مش حراميه دي واحده صاحبتي كانت جايه تاخد حاجه مني وماشيه .
_ طبعا كان لازم اعرف من الاول أن الاشكال دي مش هتكون هنا غير بسببك .
_ ردت اسماء : وليه الغلط دة هتتبسطي لما انزل اجيبك من شعرك دلوقتي يا ست انتي .
_ سمعتي صحابك يا محترمه .
_ هاجر : معلش يا مرات عمي سوء تفاهم مش اكتر .
_ اسمعي يا بت انتي انا مستحمله قرفك وقعادك هنا لكن دة بيتي انا ومش مضطرة استحمل صحابك ولا زفت عاوزه تقابليهم يبقى بره بيتي الناس تقول عليا اي وهما شايفين ناس زي الخدامين زيكم داخلين خارجين لتكوني فاكره أنه بيت ابوكي هو .
_ جاء صوت عاصم من وراهم : رانيااااا .
_ انت بتزعق ليه تعالي شوف بنت اخوك فاتحه البيت لوكانده للناس الغريبه .
_ احترمي نفسك وسنك وبطلي شغل النفخه الكدابه بتاعتك دي شويه روحي اتشطري على الهانم بنتك وهي كل يوم والتاني عازمه صحابها هنا وقالبه البيت كباريه وانتي يا هانم كل يوم عازمه صحابك أي يعني لما هي جابت صاحبتها .
_ عاصم انت بتقارن صحابنا بصحابها انت مش شايف شكلهم عامل ازاي .
_ انتي معاكي حق مينفعش المقارنه بينهم لانه دول ( وشاور علي هاجر واسماء ) انضف بكتير من كل اللي تعرفيهم .
_ يووووو دي بقت حاجه تقرف يا اخي وسابتهم وطلعت اوضتها .
_ اتنهد عاصم وقال : مش عارف دي المره الكام اللي هقولك فيها اسف يا هاجر بس دة نصيب ومحدش بيهرب من نصيبه يا بنتي بس اسمعي كلامي دة بيتك وتعزمي اي حد وفي اي وقت يا حبيبتي ماشي وانتي كمان يا بنتي ووجه كلامه ل اسماء وقال :  متزعليش حقك عليا .
_اسماء :  لا ابدا يا عمو انا اللي اسفه علي اللي حصل .
_هاجر:  عمي انا خارجه انا واسماء .
_ لا خليكوا هنا يا هاجر .
_ معلش كده كده احنا كنا خارجين سلام .
_ خرجت هاجر واسماء وقالوا الاتنين في نفس واحد :  انا اسفه ،  اتنهدت هاجر وقالت : يا رب تكون الجنه دي عجبتك .
_ لا يما صحيح المظاهر خداعه الواحد كان فاكر ان دي جنه ولكن طلعت جهنم من الهكسوس اللي جوه دول مش فيهم إلا  عمو الحلوه دة بس انما الوليه دي لو أطولها .
_ اسماااء .
_ يختي اتنيلي دي لسه ماسحه بكرامتك الأرض جوه .
_ اتعصبت هاجر وقالت : يووووه هو في اي انتي جايه علشان شغلك ولا جايه تزيدي وجعي انتي كمان وكأن كل وجع الدنيا مش مكفيني علشان تكملي انتي عليا انا زهقت .
_ احم انا انا اسفه ومشيت اسماء ولكن بعد دقيقتين لقت هاجر بتمسك ايديها وبتقول بنهجان :  خلاص متزعليش مكنتش اقصد ازعلك سوري .
_ لا ابدا عادي مفيش مشكله انا هامشي .
_ خلاص بقى قلبك ابيض تعالي اعزمك علي حاجه واساعدك في اللي انا بوظته .
_ إذا كان كده ماشي .
☆ ————— بقلم الكاتبة/ آية إنسان ————– ☆
في المستشفي في ألمانيا :
_ دخل أسر يطمن على ليل ولكن ملقاش حد في الاوضه  فقال : اي دة راح فين دة كمان ازابيل ازابيل .
_ امرك ايها الطبيب .
_ اين هو المريض ليل .
_ لا اعلم اين ذهب كان هنا منذ عشره دقائق .
_ كيف له أن يخرج وهو لم يتعافي بعد ويجب أن يخضع للعلاج الطبيعي اذهبي وابحثي عنه .
_ امرك ايها الطبيب .
_ راح فين المجنون دة كمان هخرج اشوفه في الجنينه بره وبالفعل خرج وكان قاعد في الجنينه لوحده .
_ انت مجنون يا ليل .
_ ليه يا دكتور بتقول كده .
_ انت خرجت ازاي من الاوضه.
_ سلامه النظر مش شايف أنه انا قاعد علي كرسي متحرك ولا اي .
_ ليل انت لازم ترتاح انت واقع عليك مبني انت فاهم يعني اي واقع عليك مبني .
_ تفتكر يا دكتور …. هو انت اسمك اي .
_ أسر .
_ تفتكر ليه يا أسر انا مموتش وارتحت من الدنيا دي .
_ ليه عاوز تموت لسه ليك عمر في الدنيا .
_ مش عارف بس يمكن علشان هى وحشتني لا لا لا علشان هي رفضتني هههههه .
_ هي مين ليل انت شارب حاجه .
_ شارب كاس المر عليه شويه عذاب وتكمله الكوكتيل هي القرف وكأن الواحد جاي الدنيا دي بس علشان يتعذب مش اكتر .
_ اه واضح انك سكران يا ليل وانا هعرف مين اللي ساعدك علشان تعمل في نفسك كده يلا ندخل يا ليل .
_ لا مش هدخل هرجع لنفس الاوضه بنفس الحيطان بنفس الأفكار انا لو فضلت كده هموت يا أسر .
_ في الوقت دة شد أسر ليل لحضنه وكأنه اخوه الصغير مش عارف هل لانه صعب عليه ولا علشان أسر ذات نفسه عاوز الحضن دة .
☆ ————— بقلم الكاتبة/ آية إنسان ————– ☆
في كافيه علي النيل :
_اسماء :  اه  يانا يما خلاص بقالنا ٧ ساعات شغالين مش قادره هيغمى عليا خلاص .
_ هاجر : ههههه معلش يا اسماء احسن ما تترفدي .
_ مهو كله منك .
_ بذمتك الصور اللي كانت معاكي دي صور انتي المفروض تشكريني.
_ يختي اتنيلي بلاش غرور جتك قرف .
_ تصدقي انا غلطانه اني سيبت شغلي وفضلت قاعده معاكي هنا اساعدك بس معلش .
_ خلاص خلاص يا حجه متبقيش افوشه كده قوليلي بقى بتشتغلي اي .
_ يا بنتي هو أنا اعرفك علشان احكيلك حاجه عني .
_ انتي فاقده الذاكره ولا اي يا بنتي مش اتقابلنا قبل ١٠ ساعات واتهزقنا سوي وكلنا وشربنا سوي عاوزه اي تاني .
_ تصدقي اقنعتيني .
_ قولي بقى .
_ انا يا ستي خريجه سياحه وفنادق و  صور المجلات والجرائد تبع جريده الجمهوريه انا اللي بصورها بحكم اني بسافر علي طول .
_ مش معقول انا هتنقل جريده الجمهوريه بكره معني كده اننا هنشتغل مع بعض انا فرحانه .
_ لاااا  انتي تاني  لااا .
_ اخرسي انتي تطولي يا بت دة انا اسماء البكري .
_ يا شيخه اتنيلي علي عينك محسساني  انك حاجه كبيرة اتوكسي  .
_ تصدقي انك مش متربيه يا هاجر طبعا اكيد الست الوالده مكنتش فاضيه .
_ ابتسمت هاجر بوجع وقالت: اول مره تقولي حاجه صح من اول ما شوفتك .
_ اي دة هو صح انتي مش متربيه ولا ان الوالده مكنتش فاضيه .
_ لا الوالده الله يرحمها مكنتش فاضيه ربنا رحمها من التربيه خالص .
_ احم انا اسفه مكنتش اعرف صدقيني يا ستي الوالد الخير والبركه اكيد هو هيربي .
_ هههههههه لا اصل الوالد كمان الله يرحمه يا اسماء .
_ يادي النيله عليا النهارده بصي انا هسكت علشان عماله اعك الدنيا بس بالله عليكي ما تزعلي انا مقصدش .
_ لا عادي يا اسماء يلا بينا علشان تروحي الساعه بقت ١٠ بالليل .
_ طب وانتي هتروحي يا هاجر .
_ والله ما عارفه اديني ماشيه بس على فين الله اعلم .
_ هاتي رقمك علشان اكلمك اطمن عليكي .
_ انتي هتصحبيني يا بت ولا اي .
_ شوف هتعك تاني ازاي يا بت هجيبك من شعرك قدامي .
_ طب بس يا بابا .
_ و قعدوا  الاتنين بيضحكوا مع بعض .
_ يا تري حكايتك اي يا هاجر عندي احساس اننا هنكون صحاب وهتحكيلي كل حاجه هاتي الرقم بقى هوصي عليكي في الجريده متقلقيش .
_ انتي اللي هتوصي عليا يا اسماء .
_ اومااال .
_ طب يختي اكتبي عندك  …..
_ اشوفك قريب سلام .
_ سلام .
☆ ————— بقلم الكاتبة/ آية إنسان ————– ☆
_ رجع عمرو المستشفى وطلع مكتبه وقبل ما يدخل وقفه السكرتير ونادى عليه : 
_ عمرو بيه يا عمرو بيه .
_ خير عاوز اي يا جمال من الصبح بتزن بتزن ثم انت مروحتش ليه الساعه ١٠ 
_  بس يا فندم اسمعني .
_ يوووو اطلع بره ولو وقفتني تاني اعتبر نفسك مرفود اي القرف دة .
_ طلع عمرو خد ورق من مكتبه ونزل شاف جمال واقف جنب ست بتعيط وكان لسه هيمشي بس سمع صوت الست وهي بتقول  منك لله يا عمرو يا صاوي منك لله اهو ابني مات بسببك إن شاء الله هيترد ليك في حد عزيز عليك وهيتحرق قلبك زي ما قلبي محروق على ابني منك لله .
_ عمرو فضل واقف مكانه مستغرب هي الست دي مين وليه بتقوله كده هو ماله ولكن فاق علي رنه موبايله وركب عربيته ومشي .
يتبع ……
لقراءة الفصل السادس : اضغط هنا
لقراءة باقى فصول الرواية : اضغط هنا

اترك رد