رواية قربان الجن الفصل الأول 1 بقلم هنا عادل

نغم بنت زهورية وهعرفكم يعنى ايه زهورية علشان تفهموا ايه سبب اللى هيحصل معاها

الزهوريين ..هما اشخاص الكوكب الطالع لهم هو كوكب الزهرة وده كان سبب انهم يبقى اسمهم زهوريين سواء بنت او ولد

بيتميزوا بشوية خصائص ومنهم مش كلهم 

عنيهم الاتنين او واحدة منهم بيكون لها لمعان وبريق مميز عن الطبيعى 

دايما بيتعرضوا للمخاطر والمشاكل من اول مابيتولدوا وبشكل مستمر لأسباب خفيه مالهاش تفسير

عندهم قدرة على انهم يشوفوا حاجات غريبة ممكن منصدقهاش زى الاطياف مثلا

وبيقدروا يسمعوا اصوات ويحسوا بتحركات مالهاش وجود مادى وملموس

وفيه تجارب اتعملت ونتيجتها اثبتت أن فيه اشخاص من الزوهريين مُستهدفين من الجن وده بسبب أن الشخص الزُهري حلقة وصل بين الجن والإنس، وده بيكون دافع لنوع من الجن على انه يستهدف الشخص الزهورى بالضرر و خاصة إذا كان ضعيف من الناحية الدينية. 

دايما الزهوريين محاطين بالمخاطر والمشاكل وب الاخص فى سن الطفولة وبالذات البلاد اللى بتكون منتشرة فيها طقوس السحر والشعوذة واللجوء للجن (مش هقول اسم بلاد) بتكون الاطفال الزهورية معرضين اكتر للخطف وده بيحصل علشان بيقدموهم المشعوذين والسحرة كقربان للجن لتلبية طلباتهم وده لأن الزهوريين بيقدروا يتعاملوا مع الجن ويتواصلوا معاهم ويتكلموا مع بعض  وكمان بيقدروا يشوفوهم 

.

ابتديت نغم كلامها كنوع من انواع الفضفضة لحياة فيها كتير ظواهر وحاجات محدش غيرها عاشها او اقتنع بوجودها غيرها هى بس 

كانت بتحكى وهى مش مستنية ان كلامها ممكن يكون قصة الناس تقراها ومنهم اللى ممكن يصدق ومنهم اللى هيقول خرافات 

نغم.. هنا حكايتى اللى هحكيهالك دى حصلت وانا كنت طفلة لما كان عمرى 10 سنين وانا بنت واحدة وعندى اخين اولاد 

كان بتحصل في بيتنا سرقات مفاجئة وغريبة لأن بيتنا محدش غريب بيدخله كل الناس اللى بتزورنا في بينا وبينهم ثقة متناهية 

وبرغم ان كل سرقة كنا بنبلغ البوليس لكن محدش كان بيوصل لأى نتيجة 

وهكذا على فترات متقاربة يعنى مش كل سنة مثلا لاء ده كتير كان بيحصل 

لحد ما زارتنا فى يوم قريبة لينا اسمها ام عزام 

ام عزام ..ايه يا ام نغم وصلتوا لحاجة فى الحرامى اللى بيدخل بيتكم 

ام نغم..لا والله يا ام عزام ولا اي حاجة كل مرة ييجي البوليس يعاين ويرفع البصمات وياخد بصماتنا كلنا ومش بنوصل ل اي نتيجة الواحد تعب والله من كتر القلق وبنرجع نحمد ربنا انها بتخلص على سرقة لحاجات تتعوض المهم انه محدش بيأذى حد مننا ولا يدخل الحرامى يعمل حاجة فى العيال 

ام عزام..الحمد لله ياختى على كل حال لكن برضه لازم تعرفى مين لأن مش كل مرة هتسلم الجرة وبعدين افرضى فى مرة دخل الحرامى ولقى حد بالصدفة منكم فى البيت بعد الشر يعنى يضرب عيل من العيال بسكينة ولا يعمل حاجة متنفعش تتعوض ساعتها 

ام نغم..طيب وهنعرف ازاى ماهو بقولك البوليس نفسه احتار معانا من كتر البلاغات والتحقيق كمان مع الناس اللى بتدخل بيتنا لما الناس بقيت بتخاف تخبط على باب بيتنا 

.

ام عزام ..اه طبعا ماهو لما الناس تلاقى كل يوم والتانى بيتحقق معاهم فى حادثة سرقة مالهمش دعوة بيهم لازم هيريحوا دماغهم ويبعدوا عنكم 

بس سيبك انتى بقى انا عندى الحل لكل ده 

ام نغم..الحقيني بيه ربنا يساعدك يارب 

ام عزام..الشيخ مهران 

ام نغم ..مين ياختى ده الشيخ مهران 

ام عزام..ده راجل مبروك يطلعلك الحرامى لو تحت سابع ارض ومش بس كده يثبتلك قدام عنيكى ويسمعك بودانك اعترافه كمان 

ام نغم..يامصيبتى يا ام عزام انتى عايزانا ندخل دجال فى بيتنا 

لا ياشيخة مستحيل 

ده ابو نغم ميوافقش ابدا 

احنا ناقصين كمان نلجأ للدجالين والسحرة 

ام عزام..هتخسري ايه يا ستى بس اهو جربي وبعدين مش دجال بقولك ده مبروك راجل واصل ومكشوف عنه الحجاب 

قولى انتى بس ل ابو نغم ولو وافق اجيبهولكم لحد عندكم هنا 

ام نغم..انا عارفة ياختى رأى ابو نغم مالهوش هو فى الكلام ده بيستحرم 

ام عزام..جربى بس قوليله مش هتخسري حاجة 

ام نغم وافقت على كلامها وقالت هتقول لجوزها لو وافق اهو يبقى عرفوا مين الحرامى هما مش عايزين يأذو حد ولا بيعملوا عمل ولا بيسحروا لحد فى اللى هيتعمل ده مش حرام بالعكس ده حلال لأنهم هيكشفوا مين الحرامى اللى استحل شقاهم وفلوسهم وفلوس ولادهم

قالت ام نغم لجوزها كلام ام عزام

ابو نغم..لا دى اتجننت عايزانى انا ادخل فى بيتى سحار لا طبعا معملش كده انا ولا اقبل ان الناس دى تدخل بيتى دول بدل ما بيحلوا المصيبة بيجيبوا مصايب يزودوها على حياتنا 

انسى الموضوع ده ومتفتحيهوش معايه مرة تانية 

ام نغم كانت بتحاول تناقشه من وجهة نظرها برغم اقتناعها ب ان كلامه صح مش غلط لكن جوزها قفل الكلام ورفض الموضوع رفض تام 

سكتت ام نغم وعادى الدنيا فى البيت ماشية طبيعيه ولا حد بيزورهم ولا هما بيزوروا حد وفى يوم صحوا من نومهم لقوا كل اجهزة فى البيت تقريبا مش موجودة التلاجة والتليفزيون وكمان الغسالة 

وكان فيه شوية فلوس دول كمان اختفوا 

ودى كانت اكبر سرقة حصلت في بيتهم هما اتعودوا تتسرق منهم حاجات خفيفة ومش بمبالغ كبيرة لكن المرة دى كانت الخسارة بالنسبالهم كبيرة 

وكعادة كل مرة البوليس موصلش للسارق 

وجربت تانى ام نغم تحاول مع جوزها ب اكتر من طريقة للاقناع انه يوافق على الشيخ مهران 

وكان لسه رافض لكن هى الحت كتير جدا واقنعته بكل الطرق على ان الخساير دى كلها اسهل من ان ممكن فى مرة تصادف ونخسر عيل فى العيال لو الحرامى دخل وحس انه اتعرف ساعتها مش عارفين ممكن يتصرف ازاى وبعدين ده حرامي يعنى كده كده واخد على الحرام والجريمة متستبعدش يقتل ولا يدلق على وش حد مننا مياه نار ولا حاجة

وبرغم ان ابو نغم مش مقتنع بس حس انه مضطر يوافق فعلا وخاصة لما اقنعته ان ده مفيش فيه اذية لحد 

وافق وهو مضطر وعلشان ام نغم كانت قلقانة انه يغير رأيه مقبلتش انها تستنى لتانى يوم علشان تكلم ام عزام فى نفس اللحظة اللي جوزها وافق فيها وتبلغها انهم فى انتظار الشيخ مهران فى اقرب وقت ممكن ولو ينفع بكرة او حتى النهاردة هما موجودين وفى الانتظار 

ام عزام..طيب يا ام نغم اقفلى التليفون دلوقتى وانا هشوف الشيخ مهران يناسبه امتى واكلمك تانى 

فعلا خرجت ام عزام لبيت الشيخ مهران وحكيتله كل اللى بيحصل وبلغته انهم محتاجينه يساعدهم فى معرفة الحرامى ولو مستعد فى اللحظة دى يقوم يروح معاها يبقى ياريت 

رفض الشيخ مهران وبلغها انه ممكن يروح معاها تانى يوم الصبح هيكون مناسب اكتر بالنسباله 

وفعلا بلغت ام عزام ام نغم اللى فى لحظة بلغت جوزها ان الميعاد هيكون تانى يوم وبالنهار علشان يعمل حسابه ان خلاص مش هينفع يرجع فى كلامه 

فات الليل وتانى يوم الصبح خرجت نغم واخواتها للمدرسة زى كل يوم 

وفطرت ام نغم مع جوزها وروقت بيتها وكانوا فى انتظار الشيخ اللى وصل مع ام عزام ورحب بيه ابو نغم اللي حكاله كل حاجة بتحصل في البيت 

سمعه الشيخ وبعد ماخلص ابتدا يجهز حاجات على ترابيزة محطوطة قدامه 

نار وقلم احمر وقلم اسود ومياه 

وخرج نوع زيت كانت له ريحة مش حلوة 

وابتدا يحط الزيت فى المياه ويقربهم للنار ويقرا كلام مش مفهوم بالنسبة لكل الموجودين ولون المياه اتغير للأسود وبالنسبة للى قاعدين متخيلين ان ده تفاعل المياه مع الزيت مع النار 

الشيخ مهران وقف الكلام اللى كان بيقراه وكلمهم..رافضين يحضروا محتاج طفل علشان اقدر افتح بيه الطريق علشان يوصلوا 

ابو نغم ..يعنى ايه محتاج طفل ياشيخ مش فاهم 

طفل يعمل ايه يعنى 

الشيخ ..طفل يكون حلقة الوصل بينا وبينهم بيتك هنا فيه نوع من انواع التحصين علشان كده مش عارفين يوصلوا بسهولة 

ابو نغم..هما مين دول اللى يوصلوا وازاى طفل هيكون حلقة وصل بينا وبينهم

الشيخ..اللى هيحضروا الجن اللى هيعرفوك مين اللى بيسرقك 

والطفل بيكون اكتر شفافيه مني ومنك ومن اي شخص كبير فى السن بسبب رائتهم ونقاوة روحهم وطهارتها 

ولما كان ابو نغم بيقول للشيخ انه مفيش اطفال موجودة ينفع تعمل اللى الشيخ بيطلبه ده 

دخل اولاده الاتنين و معاهم بنته نغم من المدرسة وبعد ما رموا السلام على اللى قاعدين 

الشيخ قاله..انا عايز البنت دى هى المقصودة ..هى اللى هتبين مين وهتكشف مين اللى بيسرقكم 

ام نغم..بنت مين ..بنتى لاء ياشيخ مينفعش 

ام عزام..هو هيعملها ايه يعنى يا ام نغم ده هيقرا عليها شواية قرأن وهى هتشوف اللى الشيخ مش عارف يشوفه وبعد مانعرف مين الحرامى بنتك ولا هتحس باللى حصل ولا حتى هتفتكره

ابو نغم..دى طفلة ياشيخ مكملتش 11 سنة مقدرش اعرضها لحاجة زى دى 

الشيخ..هى مش هتتعرض لحاجة ده مجرد طقس هى مش هتحس بيه انا هقدر اتحكم فى وعيها متقلقش 

ودى كانت بداية التغيير اللى حصل في حياة نغم 

جت نغم قعدت جنب الشيخ اللى ابتدا يكتب على وشها وايديها طلاسم وتعاويذ مش مفهومة وفتح كف ايديها وحط فيه المياه اللى كان واخد منها حاططها على الزيت والنار

لكن لما حطها فى ايد نغم كانت مياه وبس ولا فيها زيت ولا جت جنب النار 

لكن الغريب ان برغم الكتابة اللى فى ايد نغم كانت باللون الاحمر الا ان المياه اتحول لونها للأسود والكتابه اللى فى ايديها لسه ظاهرة بمنتهى الوضوح حتى بعد تغيير لون المياه 

وابتدا الشيخ يقرا الكلام اللى اتكتب على وش وايد نغم 

وكان كله كلام مش مفهوم 

كان بيتكلم ابو نغم مع امها بيقولها ..هو بيقولها ايه انا مش سامعه ذكر اسم الله فى ولا جملة قالها ؟؟

وقبل ماكانت ترد ام نغم على جوزها 

سمعوا صوت صرخة من نغم سكتتهم من القلق والخوف عليهم

وهى بتقول ..اصوات ..اصوات كتير فى ودنى كتير اوى ااااااااااااااااااااه