رواية قربان الجن الفصل الرابع 4 بقلم هنا عادل

قامت من سريرها وهى مستغربة ازاى هى نايمة وفى اوضتها وعلى سريرها برغم انها خرجت للمدافن وراحت للبحر وقابلت الماردة والجنية 

فتحت الباب اللى لقيت نفسها قافلاه على نفسها بالمفتاح وشافت قدامها مامتها

الام..ايه يانغم قافلة على نفسك ليه 

نغم..مش عارفة ياماما انا مش فاكرة انى قفلت على نفسي اصلا

الام..يعنى ايه الباب اتقفل لواحده 

نغم افتكرت ان مينفعش تحكى لحد حاجة ..مش عارفة ياماما بقى يمكن انا خوفت انام والباب مفتوح قفلته ونسيت 

الام..انتى شكلك كنتى عايزة تهربي من الصحيان للمدرسة 

انا لما لقيت النور بتاع اوضتك لسه والع فكرتك لسه صاحية جيت ادخل ابص عليكي علشان الوقت اتأخر لقيت الباب مقفول قلقت 

نغم..لا يا ماما متخافيش انا هكمل نومى اصلا والمدرسة وحشتنى كمان عايزة اروح 

الام..طيب ياحبيبتى تصبحى على خير ادخلى سريرك بقى وانا هطفى النور واقفلك الباب 

سمعت نغم كلام مامتها ودماغها فيها مليون سؤال وكلهم اكبر بكتير من سنها وبرغم التفكير والاسئلة الكتير اللى في بالها الا انها راحت فى النوم بسرعة 

وجتلها فى الحلم واحدة من الجنيات اللى كانت ملامحها كلها مختفية الا شفايفها وكانت بتتكلم مع نغم وبتمليها اسم اول واحدة هتروح وتقولها غرضك انقضى 

وكان عنوان الست دى قريب اوى من عنوان بيت نغم 

ومع اسم الست اللى كان ام راغب عرفت ان دى تبقى مرات عمها 

بس ايه الغرض اللى هينقضى لمرات عمها وازاى نغم هتروح تقولها كده ما هى مرات عمها اكيد هتروح تحكى لأم نغم انها راحت قالتلها كده 

الجنية ..الناس اللى تعرفك وهتروحى تقوليلهم مش هيشوفوكى بشكلك اللى عارفينك بيه 

نغم..ازاى انتم هتغيرولى شكلى ؟؟ هبقى شكلى مخيف زيكم؟؟

الجنية ..مالكيش دعوة انتى ليكي تنفذى اللى يطلب منك وخلاص 

وبصوت مخيف ..فاااااهمة ولا لاء

نغم..حاضر..حاضر فاهمة ..هو انا هفضل كده لحد امتى ؟؟

الجنية ..كفاية اسئلة …انتى لسه قدامك كتير اوووووى 

نغم ..طيب 

كل ده بيحصل فى حلم نغم لكن هى كانت عايشاه ك واقع مش حلم التفاصيل والوضح وربط كل الاحداث ببعضها كان مش مجرد حلم 

نغم كانت عايشة حياة تانية فى احلامها غير اللى هى عايشاها مع اهلها

طلع النهار وصحيت لمدرستها وخرجت مع اخواتها زى كل يوم وهى بتفكر من وقت مافتحت عنيها لحد ما خرجت من باب بيتها مع اخواتها هى ازاى هتقدر تروح لمرات عمها وياترى ايه هى الحاجة اللى مرات عمها كانت عاملالها عمل ولا حتى حد عاملها هى عمل 

وصلت نغم مدرستها وفى طابور الصباح وفى وسط المدرسة وكل الطلبة 

جت لنغم حالة غريبة من التشنجات كانت اول مرة تحصلها 

واثناء ما كانت بتتمرمغ فى ارض المدرسة وسط المدرسين والطلبة كانت مش شايفة غير الجن ال7 اللى بقوا محاوطينها اشكالهم المخيفة خليت تشنجاتها زادت ومش حاسة بوجود حد حواليها غيرهم كانت بتصرخ مستنية حد ينقذها منهم لكن لاحياة لمن تنادى 

وفجأة سكت صوت نغم وعنيها قفلت ده اللى زمايلها واخواتها ومدرسينها شايفينه ان نغم اغم عليها 

لكن نغم كانت فى عالم تانى 

كانت حاسة انها طايرة مع مارد شكله مخيف لكن كان قوى طاير بيها قرب السما علشان تلاقى نفسها فجأة واقعة جوة بيت مرات عمها اللى كانت قاعدة على كنبة قديمة وعمالة تكلم نفسها ..يعنى خلاص كده متقفلة فى وشى من كل ناحية حتى الشيوخ مش عارفين يخلونى اسيب البيت الفقر ده اللى مش جايلى من وراه غير الهم والفقر والدين 

امتى بقى البيت ده يتباع واقدر اعزل بعيد عن وش الفقر مرات اخو المرحوم نار بتاكل فيا كل م اشوفها مع جوزها وعيالها متهنية بيهم وانا حتى جوزى لما مات مات وساب عليه ديون اد الدنيا واخوه كفاية عليه مراته وعياله يتهنوا ويعيشوا وانا فى الفقر والدين ده طول عمرى انا وابنى 

كانت نغم سامعه كل حرف مرات عمها بتقوله وشايفاها بمنتهى الوضوح لكن الغريب بالنسبالها ازاى مرات عمها مش شايفاها

قامت نغم وقفت على رجليها وبكل جدية وثقة 

يا ام راغب حاجتك انقضيت

يا ام راغب حاجتك انقضت 

يا ام راغب حاجتك انقضت 

ومع تالت مرة اتقالت الجملة 

نطت ام راغب من على الكنبة وهى طايرة من الفرحة مدد ياشيخنا مدد 

ياجلاب الهنا والسعادة مدد وعدت ووفيت يا شيخ الفرح والخير 

كانت ام راغب سامعه الصوت لكن مكانتش شايفة نغم اللى فتحت عنيها وهى فى مدرستها وعلى التختة بتاعتها وسط زمايلها وكأن مفيش دقيقة فاتتها من بداية الطابور لحد اللحظة اللى فتحت عنيها فيها كانت نغم ابتديت تعيش مع احلام اليقظة زى ما بتعيش مع الاحلام فى نومها 

طفلة اتحكم عليها بسبب امها وابوها انها تتحاوط بالجن والمردة

وتتنقل من مكان لمكان وهى موجودة فى نفس مكانها وكأن روحها بتخرج من جسمها وبتطوف فى الدنيا وبتعد ما بتخلص رحلتها بترجع تانى للجسم اللى بقى كأنه مجرد غلاف بيحمى الروح اللى الجن بيقولوا انها بقيت ملكهم 

خلص اليوم وكانت نغم مش مركزة 

خرجت واتجمعت مع اخواتها وماشيين للبيت سوا 

نغم..هو فيه حاجة حصلت النهاردة وانا فى الطابور 

جاسم..حاجة ايه ؟؟ محصلش حاجة 

باسم..بتسألى ليه هو فى حاجة احنا مخدناش بالنا منها 

نغم..انا اتهيألى انى كنت تعبانة وكل المدرسين وانتم وكل اللى فى المدرسة ملمومين حواليا 

جاسم بضحك..انتى عايزة تمثلي انك عيانة علشان تاخدى اجازة تانى يا سوسة

نغم..امثل ايه بس انا بقولك اتهيألى عادى يعنى 

وف لحظة واقل من اللحظة اتكلم باسم موجه كلامه لنغم..هو مش احنا قولنالك متحكيش لحد حاجة وفجاءة باسم بيصرخ ودم كتير نازل من راسه 

بقيت نغم واقفة مذهولة وجاسم بيصرخ انت ايه اللى حصلك ايه الدم ده اتعورت ازاى 

والناس اتلمت عليهم وحاولوا يساعدوا باسم اللى جابت بن من بيتها علشان تكتم الدم واللى جاب قطن حطه مكان الدم واخدوه الناس ومعاه نغم وجاسم لأقرب صيدلية علشان تبقى صدمة لكل اللى واقفين ان الدم اللى نازل ده مفيش جرح ولا مكان واضح لنزوله 

الناس اللى واقفة خافت من باسم اللى عمال يعيط وجاسم اللى خايف على اخوه ولسه نغم على نفس وضعها لكن حاسة بالذنب من ناحية اخوها علشان هى اتكلمت معاهم وسألتهم على حاجة كان المفروض انها متتكلمش فيها مع حد 

الدم فضل مستمر والناس ابتديت تبعد عن باسم واخواته وحتى الصيدلى قالهم مش هقدر اعملكم حاجة لأنى مش لاقى مكان جرح من الاساس 

وقفت نغم قدام باسم وقالت.. انا اسفة مش هعمل كده تانى ..اسفة مش هتكلم تانى فى اى حاجة 

وفجأة وقف الدم اللى كان مالى وش باسم ومش بس كده كل اثاره اختفيت 

وفات الموقف عليهم كأنه محصلش من الاساس

نغم بقيت بتتعامل مع نفسها على انها مجنونة او ان اللى بيحصل حواليها ده مش حقيقي 

وصلوا البيت وكان باسم وجاسم بيهزروا ويضحكوا عادى وكأن الموقف اللى لم الناس عليهم محصلش اصلا ومحدش شافه غير نغم 

دخلوا سلموا على امهم زى كل يوم ونغم كمان سلمت على امها بهدوء وقبل ماتدخل اوضتها باب البيت خبط راحت نغم تفتح لقيت مرات عمها واقفه على الباب وعنيها الفرحة بتنط منها 

ام راغب..بت يانغم عاملة ايه ؟

فين امك وابوكى ؟

نغم..انا كويسة يامرات عمى 

امى جوة اهى فى المطبخ 

وبابا لسه مرجعش من الشغل 

ام نغم..يا اهلا يا اهلا يا ام راغب اتفضلي ادخلى ياختى بيتك ومطرحك زارنا النبى 

ام راغب..يزيد فضلك يا غالية دايما عامر بحسك وحس عيالك وجوزك

باركيلى بقى العقدة اتحلت على ايد الشيخ اللى دلتينى عليه 

اخيرا ياختى جه مشترى للبيت ومستعجل على الشرا 

همشى من المنطقة والبيت اللى مشوفتش فيه غير الهم ده 

ام نغم..مش قولتلك ده راجل مبروك وسره باتع 

ام راغب ..اه ياختى عندك حق بس هو كمان خد مني شئ وشوايات ده قسم وسطى فى الفلوس 

بس يلا مش مهم المهم انها جت بفايدة 

انا كنت قاعدة عمالة اندب على بختى فجأة سمعت صوت فى ودني بيقولى حاجتك انقضيت ومفيش ربع ساعة لقيتلك السمسار جايبلى مشتري فى ايده وعايز يخلص دلوقتى قبل كمان شواية 

اخيرا هعزل بقى 

ام نغم..الف بركة يا حبيبتى ..ان شاء الله تكون عتبة الخير والرزق كله 

كانت نغم واقفة ولأول مرة من ساعة اللى بقى يحصلها تحس انها عملت حاجة كويسة بالعكس دى فرحانة اوى بنفسها برغم انها لما سمعت كلام مرات عمها عرفت انها بتحقد على ظروفهم وعيشتهم مع بعض 

لكن حسيت بالغرور انها قدرت تساعدها فى فك العمل اللى كان معمول على عتبة باب بيتها بوقف الحال والرصد

نغم فى سرها بتكلم جنيتها 

طيب مين اللى عملهولها وايه الفايدة فى ان البيت ميتباعش ويترصد 

الجنية ..انتى بتسألى فى حاجات اكبر من سنك يانغم 

نغم دخلت اوضتها من غير ما تتكلم 

وقفلت على نفسها الباب 

وابتديت تتكلم بصوت مسموع

بسأل اسئلة اكبر من سني

وهو اللى بشوفه واللى بيحصل معاية ده مش اكبر من سني 

انى اشوف الحاجات اللى تخوف واطير وادخل بيوت الناس من غير مايشوفونى واسمع كلامهم دى مش حاجات اكبر من سني 

انا ماليش دعوة بقى كل حد هروح اقوله اللى انتم طلبتوه لازم اعرف ايه حكايته والا ماليش دعوة مش رايحة فى حتة 

صرخت الجنية فى ودن نغم صرخة هزيتها من جواها 

انتى مش من حقك تقولى ايه اللى هتعمليه وايه اللى لاء

انتى ملكنا احنا بس اللى نتحكم فى كل حركاتك وكل كلامك 

امك وابوكى قدموكى لمهران وهو قدمك قربان لينا يعنى رغبتك دى احنا اللى نحددها ونتحكم فيها 

واللى هنقرر نعرفهولك هو بس اللى هتعرفيه 

وبلاش تخلينا نعيد الكلام ده كل شواية علشان لو اتعاد تانى هتعيشي وتشوفى حاجات هتتمني لو تموتى قبل ما تعيشيها او تشوفيها 

نغم ب استسلام..انا اسفة .. انا اسفة ..انا بس فرحت انى عرفت اساعدها وكنت عايزة اعرف ليه بيتها كان معمول عليه العمل ومين اللى عمله 

الجنية ..لو مسموح انك تعرفى هتعرفي ولو مش مسموحلك يبقى انسى السؤال ده 

نغم..طيب وهعرف منين هو مسموح ليا ولا لاء

الجنية ..بليل وقت نومك وفى حلمك لو مسموحلك تعرفى هتعرفى السبب قبل ما تسمعى الاسم الجديد 

لو مش مسموح ليكى تعرفي السبب يبقى هتعرفى الاسم اللى هتروحيله بكرة من غير ما تعرضي اى سؤال 

نغم..حاضر..خلاص مش هسأل فى حاجة تانى بس ممكن محدش من اخواتى يجراله حاجة ولو انا غلطت فى اي حاجة حاسبونى انا بلاش حد من اخواتى ولا ماما وبابا 

الجنية ..اسمعى الكلام ومحدش منهم هيتأذى .

نغم..حاضر.

نغم بقيت اوضتها متحاوطة بالجن والمردة وابتدوا يوصلوا عقلها للتفكير فى حاجات اكبر بكتير من تفكير طفلة .

وكانت نغم مستنية الليل ييجى علشان تعرف هى مسموح لها ايه ومش مسموح لها ايه .