رواية خطايا الماضي الفصل الحادي عشر 11 بقلم اية عامر

عزيز: أنا جوزها.. 

ريم: هو انا مش فاكره حاجة لي!! انا.. 

الدكتور: اهدي ي مدام اهدي.. حضرتك حصل معاكي فقدان في الذاكرة.. 

ريم: انا عايزة أمشي من هنا.. 

الدكتور: هتخرجي بس بكره الصبح..بالنسبه للذاكرة ف مع الوقت هتفتكري كل حاجة متقلقيش.. 

الدكتور خرج وسابهم وعزيز باصص لها وعنده احساس بالذنب لأنه كذب عليها… 

حاولت ريم تتعدل ف بصتله بتعب… 

ريم: ممكن تساعدني.. 

عزيز قرب منها وهي مسكت في ايده.. افتكر لما ضربته بالقلم لأنه لمسها ومنع دمعه منه انها تنزل وغمض عنيه بحزن وحاوطها بإيديه ورفعها عشان تتعدل… 

عزيز: كده كويس! 

ريم: ايوا كويس.. متقلقش عليا انا كويسه.. دايخه حاجة بسيطه بس عشان اتخبط.. 

عزيز: الحمد لله انها عدت علي خير.. 

ريم بحزن : هو انا اسمي اي! 

عزيز: ريم.. اسمك ريم.. وانا عزيز.. 

ريم: احنا متجوزين من امتي! 

عزيز: من قريب.. كذا شهر.. 

ريم: هو مفيش حد من اهلي جه! 

عزيز: انتي يتيمه.. وانت بردو.. 

ريم: يعني ملناش الا بعض! 

عزيز: ايوا.. ملناش الا بعض.. 

ريم: هو احنا متجوزين عن حب!! 

عزيز: كفاية كده انتي محتاجة راحه.. انا مقدر انك عايزة تعرفي كل حاجة عن نفسك بس مع الوقت هحكيلك.. ارتاحي وحاولي انك تنامي يكون افضل… 

ريم: حاضر… 

….. 

في الصباح.. عزيز منامش طول الليل.. احساس كبير بالذنب انه كدب عليها وشعوره ب أنه شخص أناني لعملته دي… 

ريم فتحت عنيها ببطئ وبصت حواليها لقته بيبصلها وعنية مدمعه… 

ريم: صباح الخير.. 

عزيز: صباح النور.. حاسة ب اي دلوقتي.. 

ريم: احسن بكتير.. 

عزيز: انتي عندك شرخ في رجلك ومش هتقدري تمشي ف جهزتلك كرسي متحرك عشان تتحركي براحتك.. 

ريم: ماشي.. 

عزيز: هبعتلك الممرضة عشان تساعدك تغير هدوم المستشفي دي تمام.. 

ريم: تمام.. هو احنا بيتنا بعيد عن هنا! 

عزيز: لا.. قريب.. 

عزيز خرج ونده للمرضة تدخلها وبعد شوية كانت جاهزة وعلي كرسيها.. 

عزيز وصل بيها لحد العربية وشالها عشان يحطها في العربية… 

ريم: هو الشرخ ده بيقعد قد اي عشان اقدر امشي!! 

عزيز: اسبوع راحه كده ي ريم وهتبقي كويسة.. 

ريم: طيب.. هو احنا عايشين لوحدنا! 

عزيز: لا.. اختي عايشة معانا وكمان الخدم.. 

ريم: خدم!! 

عزيز: ايوا.. انا عايش في قصر.. 

ريم بصدمه: قصر!!! 

عزيز: ايوا قصر.. 

اتحرك عزيز بالعربية وهو ندمان علي الكذبة اللي جابت معاها مية كذبة غيرهم واللي مش قادر يتراجع عنها… 

وصلت ريم للقصر وهي بتبصله ب إنبهااار كبير اوي.. 

عزيز شالها حطها علي الكرسي ودخل بيها… نزلت تسنيم وبصتلهم ب إستغراب.. 

تسنيم: ريم!! انتي اي اللي حصل معاكي.. 

عزيز بصلها ب تبريقه انها متتكلمش وزق كرسي ريم لحد السلم.. شالها و طلع بيها علي اوضته! 

بعد شوية نزل تاني ل تسنيم وشدها في اوضه الضيوف وقفل الباب.. 

عزيز: هفهمك كل حاجة.. بس عشان خاطري متقفيش ضدي لاني مش حمل عتاب ابدا!! 

تسنيم: في اي ي عزيز! 

عزيز: الحقيقه انا بحب ريم من اول م شوفتها.. وحاولت اخليها تحبني بس هي مكانتش بتطيقني حتي..وعرفت منك انها اتقري فتحتها.. روحتلها لأخر مرة اتكلم معاها. بس في عربية خبطتها ولما روحت المستشفي قالولي فقدت الذاكرة.. معرفش اي اللي حصلي لما قولتلها اني.. جوزها.. انا مفكرتش في اي حاجة غير انها فرصة اهي وتكون ليا.. 

تسنيم: مش هعاتبك ولا اقولك حاجة.. بس فكرت في رد فعلها لما تعرف انك كدبت!! 

عزيز: قولتلك اني مفكرتش في اي حاجة خالص!! انا قولتلها انها يتيمه.. ومقولتلهاش حاجة ع الكلية ومش هقول عشان محدش يقدر يوصلها من عيلتها… 

تسنيم: ي عزيز اللي انت بتعمله ده غلط.. 

عزيز: عارف بس انا مش هسيبها.. انا هخليها تحبني وبكده هي كمان مش هتسيبني.. 

عزيز خرج من الأوضة وسابها وطلع ل ريم.. اللي فضلت تتجول في الاوضة وهي علي الكرسي… 

عزيز دخل الوضه لقاها شالت حجابها وبتسرح شعرها بعيد عن جرحها.. 

بص بعيد عنها واتكلم.. 

عزيز: انا عايز أقولك حاجة.. 

ريم: اتفضل!! 

عزيز: احنا متجوزين عرفي مش رسمي! 

ريم: عرفي!!! 

عزيز: ايوا.. لان انا مكنتش عايز اي حد من اعمامي يعرف اني اتجوزت.. وانتي كنتي قاعدة في شقه تانيه.. بس خلاص مش هسيبك تبعدي تاني.. وهنبدأ حياة جديدة هنا وهنتجوز رسمي… 

ريم: وانت ليه مش عاوز اعمامك يعرفوا!! 

عزيز: كده ي ريم مشاكل متخصكيش.. اجهزي عشان المأذون هيجي بليل! 

ريم: اجهز ازااي انا مش لاقية ليا اي لبس هنا ولا ليا اي حاجة.. 

عزيز: هجيبلك كل اللي تحتاجية.. 

ريم حاولت تقف من علي الكرسي وفتحت غرفة الدريسينج وانبهرت بيها… 

ريم: معقول كل ده ومليش اي حاجة هنا!! 

عزيز واقف وراها وبصلها بغضب… 

عزيز: الدكتور قال متقفيش علي رجلك.. 

ريم: انا زهقت من القاعدة.. 

عزيز دخل الاوضة وجابلها تيشرت وبنطلون من عنده.. 

عزيز: البسي دول.. 

اخدتهم وهو قفل الباب  وغيرت وخرجت.. 

ريم: واسعين اوي! 

عزيز: معلشي علي م اجيبلك بكرا… 

ريم: طب ممكن تشوفلي حاجة من عند اختك احسن! 

عزيز بضيق: طيب.. 

في اللحظه دي تسنيم خبطت الباب.. 

تسنيم: الحمد لله علي سلامتك ي ريم.. 

ريم: الله يسلمك.. 

تسنيم بهدوء: انا هجيبلك حاجة من عندي.. 

ريم: تبقي خدمتيني والله.. 

تسنيم بتوتر: طب م تيجي تباتي معايا النهاردة.. عشان.. عشان اخد بالي منك.. 

ريم: متقلقيش عليا انا كويسة والله.. 

تسنيم بضيق: طيب هجيبلك الهدوم.. 

ريم: شكرا.. 

خرجت تسنيم من الاوضة وهي بتبص لعزيز بغضب.. اتضايق منها وخرج وراها.. 

عزيز بضيق: هو انا مش قولتلك مش عايز عتاب!! 

تسنيم: هو انا عاتبتك ولا فتحت بوقي اصلا! 

عزيز: ونظراتك وكلامك.. 

تسنيم: عزيز انا سمعتك وانت بتقولها انك هتتجوزها.. 

عزيز: ايوا هتجوزها.. 

تسنيم: يبقي تفضل معايا هنا في الاوضة لحد م يتكتب كتابكوا.. 

عزيز: كده كده المأذون هيجي بليل خلاص.. 

تسنيم: يبقي تفضل معايا لبليل.. 

عزيز: هو انتي مش واثقة فيا!! 

تسنيم سكتت وبصت بعيد عنه…عزيز بصلها بغضب واخد الهدوم وسابها ومشي ورجع ل ريم تاني… 

عزيز: اتفضلي الهدوم اهي.. انا خارج ومش هتأخر.. 

ريم: رايح فين!! 

عزيز: رايح شغلي.. 

ريم: يعني في واحد هيتجوز بليل يروح الشغل الصبح! هو انت بتشتغل اي صحيح! 

عزيز: انا كان عندي شوية شغل متأخر ي ريم وضروري اخلصهم النهاردة.. مش هتأخر عليكي.. 

ريم: طيب… 

خرج عزيز وسابها في الأوضة وهي بدأت تتجول فيها وتكتشفهاااا… 

بعد عدة ساعات.. رجع عزيز  وهو معاه شنط كتير ودخل لقا ريم نايمة… بس صحيت علي صوته.. 

عزيز: ريم! 

ريم: صباح الخير.. 

عزيز بإبتسامه: قصدك مساء الخير.. قومي عشان المأذون علي وصول..لازم تدهني المرهم ده علي رجلك.. 

اتعدلت وهي بتلم شعرها ب أستيك في ايديها.. كانت لابسة بلوزة بنص كم.. 

عزيز بغضب: هي دي البلوزة اللي انا اديتهالك! 

ريم : اه والله هي!! 

عزيز جاب كيس العلاج بتاعها وخرج المرهم.. فتحه وحطه علي رجليها.. واتردد شوية.. 

عزيز: ادهنيه انتي علي م اقوم اغير هدومي.. 

ريم: طيب.. 

أخدته ريم ودهنته علي رجليها وسحبت الكرسي المتحرك وقعدت عليه.. 

عزيز خرج وهو لابس بدلة أنيقه وخلته اخر شياكة.. 

عزيز: اي رأيك! 

ريم بصتله وهي مصدومه وابتسامه غبية علي وشها.. 

ريم: اي الشياكة دي! 

عزيز بإبتسامه: عريس بقي.. 

ريم: طب والعروسة بقي هتلبس اي! 

عزيز قرب وادالها اكياس كتير في هدوم كتير ليها… اغلبها ادناءات واسعه ودريسات وخمارت زي م هي بتلبس.. 

ريم: اااي كل ده!! 

عزيز: يلا ادخلي البسي.. انت أكيد مأكلتيش طول النهار ف هروح اشوفلك حاجة تاكليها.. 

ريم: تمام.. 

قعدت ريم مع نفسها واحساس جواها ان في شئ غلط.. بس حطت كل احساسها ده انها مش فاكره اي حاجة… 

بالنسية ليها دلوقتي عزيز هو كل اللي ليها في الدنيا لأنها متعرفش غيره… 

لبست ادناء بلون اللافندر وخمار لونه أبيض ونزلت وهي ساندة علي السلم.. 

عزيز: هو انا مش قايل الدكتور قال متمشيش علي رجلك!!!! 

ريم: م انا زهقت من القاعدة فوق ف وقلت انزل.. اي رأيك في لبسي كده! 

عزيز: جميل اوي.. 

ريم: هو انا علطول بلبس كدا! 

عزيز: ايوا.. 

ريم: طب هو انا معنديش تليفون!! 

عزيز: لا تليفونك باظ في الحادثة هجيبلك غيره.. امسكي دي بطاقتك.. 

لحسن حظ عزيز ان شنطة ريم كان فيها بطاقتها القديمه وخبا معاه بطاقتها الجديدة ومعاه كل حاجه تخص كليتها.. 

سكتت شوية وعزيز نده علي الخدامه بعصبيه.. 

عزيز: هدي… فين الاكل بتاع ريم.. 

هدي بخوف: جهز خلاص ي عزيز باشا.. 

ريم بضيق: عزيز انت بتزعقلها كده لي!! 

عزيز: انا كده زعقت!! 

ريم: والله اومال اي ده!! 

عزيز: انا طريقتي كده..

ريم: انت مبتتعاملش معايا كده! 

عزيز: نعم ي اختي.. انتي مراتي وهي بتشتغل عندي! 

ريم: بس ده مش معناه انها مش بنت زيها زي وبتضايق لو حد زعقلها..

عزيز: طيب ي ريم حاضر.. هطبطب علي الخدم عشان ترتاحي.. ممكن تاكلي بقي… 

هدي حطت الأكل قدام ريم وعزيز قعد قصادها… 

ريم بإبتسامه: شكرا ي هدي.. 

هدي: العفو ي ست هانم.. 

ريم: اسمي ريم وناديلي ب أسمي..وهاتيلي عصير اذا سمحتي.. 

هدي ب إبتسامه: حاضر.. 

هدي سابتهم وعزيز بص ل ريم وهي بتاكل وبعدين بصتله بإستغراب.. 

ريم: اي! 

عزيز: مفيش.. 

ريم: طب انت كلت! 

عزيز: لا مش جعان.. 

ريم مدت ايدها ليه تأكله.. 

ريم: متأكد.. 

عزيز ابتسم واكل من ايديها.. 

عزيز بإبتسامه: لو هتأكليني ف انا جعان جدا جدا يعني.. 

ريم بضحك: بقي كده.. 

عزيز: ايوا.. 

بعد شوية وصل المأذون ومعاه اتنين من اصحاب عزيز البعاد جدا عن شغله وميعرفوش اي حاجه عنه… 

قعدت تسنيم جمب ريم اللي كانت مكسوفه وبتفرك في ايديها… 

تسنيم: مبروك ي ريم.. 

ريم:……. 

تسنيم: ريم.. انتي هنا.. 

ريم: ها.. 

تسنيم: بقولك مبروك.. 

ريم: اه.. الله يبارك فيكي.. 

تسنيم: مالك! 

ريم: مش عارفه عندي شعور كده ان في حاجة غلط… 

تسنيم: حاجه اي!! 

ريم: يعني احنا ليه متجوزناش رسمي علطول وخبينا.. ولي اصلا عزيز خبا.. وانا معرفش حد خالص… 

تسنيم بتوتر: اكيد تعرفي بس انتي ممكن تكوني محكايش لعزيز كل حاجه عنك.. وانا مش عارفة عزيز عايز يخبي ليه بس اكيد ليه اسبابه… المهم ان انتوا بتحبوا بعض وهتبقوا سوا.. 

ريم: بس انا مش حاسة اني بحبه..انا عايزة الغي كل حاجه لحد م افتكر… 

تسنيم: هتعرفي تقولي كده لعزيز.. انتي مش عارفة هو بيحبك قد اي ي ريم ومستعد يعمل عشانك اي حاجه.. مع الوقت هتفتكري بس تكوني علي ذمته افضل.. 

ريم بشرود: يمكن.. وبعدين هقعد هنا بصفتي اي بردو… معاكي حق… 

وقعت ريم علي عقد جوازها وعزيز بيبصلها ب ابتسامه.. ابتسمت بتردد وبعدين اتم المأذون جوازهم… 

……………….. 

وقفت منار في بيتها وهي خايفه من اخر مكامله جاتلهااا… مش عايزة تكرر اللي عملته في رحمه مرات بدر في اي بنت تااانيه… بس حياتها متهددة ولازم تنفذ.. 

منار بخوف: اعمل اي دلوقتي.. اروح لمين ولا اعمل اااي.. بدر.. اكلمه.. 

مسكت تليفونها وايديها بتترعش وهي بتحاول تتصل بيه… 

اول مره مردش ولكنها رنت عليه مره تانيه لحد م رد عليها بعصبية… 

بدر بغضب: ااي عايزة اااي مني!! 

منار: عايزاك تسااعدني..مفيش غيرك هيساعدني.. 

بدر: انا اساعدك انتي..بعد اللي عملتيه في مراتي جاية ببجاحه تقوليلي اساعدك!!! 

منار: اللي اتعمل في مراتك هيتعمل في بنت تانية.. ولنفس السبب.. اللي اسمه مهاب ده شر الدنيا كلها فيه.. 

بدر: هي مين دي!!! 

منار: بنت اسمها تسنيم.. رفضته زي م مراتك عملت وكلمني اني اعمل فيها زي م عملت لمراتك ولو رفضت قصادها حياتي او حياة اخواتي.. وهو بيستغلني اني ضعيفه.. الحق البنت دي ي بدر باشا وبلاش تحصل مراتك… 

بدر بغضب: يعني انا اعمل لها اااي!! 

منار: ابعدها عن مهاب..وابعدها عني بحيث اقدر اقوله اني مش عارفه اوصلها… 

بدر: يعني اعمل ااي.. اخطفها.. 

منار: لو حكمت.. احسن م حياتها تنتهي وبردو يبقي بسببي وبسبب اللي اسمه مهاااب.. 

بدر: انا هبلغ البوليس.. 

منار بخوف: لا ي باشا الله يخليك.. بوليس اي ده هو اصلا ظابط.. لو انت بلغت انا هروح في داهيه واخواتي هيتشردوا… 

بدر بضيق: وان حميتها مهو هينقل علي غيرها… 

منار: طيب ي باشا احمي بس تسنيم دي منه وفي نفس الوقت هفكر في حاجة نقدر نفضحه بيها… 

قالي اديها اول جرعه بكره بعد كليتها.. قبل م تدخل الكلية تبعد البنت عن طريقي… 

بدر: كلية اي.. وشكلها عامل ازاااي… 

منار: كلية العلاج الطبيعي وهبعتلك صورتها.. 

بدر: العلاج الطبيعي.. مهاب ده يعرف بنات تانيه في الكلية دي.. بنت اسمها ريم تعرفي حاجه عنها… 

منار: ريم.. لا مسمعتش او قالي حاجة عن بنت ب اسم ده.. مين البنت دي.. 

بدر: دي اخت صاحبي.. وكمان خطيبتي بس مختفية من امبارح ف فكرت ان ممكن مهاب بينتقم مني عشان ضربته من اسبوع كان بيضايق بنت قدام كليتها… لحظه كده.. ابعتي صورة البنت.. 

منار بعتت صورة تسنيم لبدر اللي عرفها علطول… 

بدر: دي نفس البنت اللي كان بيضايقها.. 

منار: خلينا نحميها ي باشا ونرمي اللي اسمه مهاب ده في السجن.. 

بدر: تمام.. انا هتصرف… 

………………. 

صعدت ريم لغرفة عزيز و بدأت في توضيب ثيابها في غرفه الدريسينج… 

دلف عزيز للغرفه ونظر لها بغضب.. 

عزيز بغضب: بردو واقفه… 

ريم: انا مش ضاغطه علي رجلي خالص علفكره.. 

عزيز: طب اقعدي وانا هنده لهدي تظبطلك هدومك.. 

ريم: طيب.. 

 ريم بمرح: علفكرة بقي انت كروتني في الجوازة دي.. 

عزيز: عارف.. 

ريم: وبتقولها في وشي.. 

عزيز: طب قوليلي اعوضهالك ازاااي.. 

ريم: عايزة اسافر شهر عسل…