Uncategorized
رواية العشق لا يعرف وطن الفصل الرابع عشر 14 بقلم أية إنسان
رواية العشق لا يعرف وطن الفصل الرابع عشر 14 بقلم أية إنسان
 |
| رواية العشق لا يعرف وطن الفصل الرابع عشر 14 بقلم أية إنسان |
رواية العشق لا يعرف وطن الفصل الرابع عشر 14 بقلم أية إنسان
_ دخل إياد الفيلا ووقف مذهول من اللي شايفه رجله مش شيلاه عينه مش مصدقه أن عز ابنه جسمه عايم علي وش البسين لمحت فريده اياد وبصت ليه فقفلت الفون وقالت : حمدلله على السلامه ولكن هو لا يستجيب فهو شبه الاموات .
_فريدة : مالك يا اياد في اي اياد ولكن لفت بصت مكان ما هو باصص وصرخت وقالت : عززززز …..في الوقت دة فاق اياد وجري نط في البسين وطلع ابنه وخرج كل اللي في الفيلا على صرخت فريده .
_ شال اياد ابنه وقال : عز عز قوم يا حبيبي علشان خاطري قوم وانا هخدك ونمشي من هنا الكل واقف مصدوم فوقعت سلوى فاقده الوعي وفريده جريت على ابنها فزقها اياد وقال : اوعي ابعدي عن ابني عز متسبنيش يا عز أنت الحاجه الحلوه اللي باقيه في حياتي وضم عز لحضنه وصرخ وقال : عزززززززز .
☆ ————– بقلم الكاتبة/ آية إنسان —————-☆
_ الفون بيرن عند أسر وكان ليل .
_آسر : الو ازيك يا ليل عامل اي .
_ ليل : الحمد لله بخير يا أسر طمني ابوك عامل اي .
_ تعبان اوي يا ليل وحاسس بالذنب اني مكنتش جنبه في الأوقات اللي فاتت دي .
_ متقولش كده يا أسر دة نصيبه خليك انت جنبه كام يوم وبإذن الله هيكون كويس بس عارف يا أسر البيت وحش من غيرك حاسس بفراغ .
_ هههههه مش للدرجه دي يا ليل .
_ هو صحيح انا معرفكش غير من ٥ شهور كده بس حاسس اني اعرفك من زمان اوي .
_ ربنا يديم صحبتنا يا ليل انت جدع اوي على فكره .
_ اتنهد ليل وقال : ربنا يسمع منك يا أسر ربنا يعلم اني بحبك قد اي .
_ اي الدراما دي يا عم خلي بالك من نفسك ومن الشقه .
_ يا عم اقعد هي دي شقه .
_ قاعد فيها ليه لما هي مش شقه .
_ طب سسسلام عليكوا انا بقى .
_ ههههه سلام يا خويا .
☆ ———— بقلم الكاتبة/ آية إنسان —————☆
عند هاجر واسماء :
_ اسماء : فهمتي بقى يا هاجر .
_هاجر : اسماء انتي بقالك ٣ ساعات بترغي عن طموحك وأحلامك ودة حلو بس انا مش فاهمه انتي عاوزه اي انا عاوزه المختصر المفيد لو سمحتي علشان انا تعبت .
_ المختصر المفيد أنه انا عاوزه اقدم يا في الاذاعه يا التلفزيون .
_ عاوزه تكوني مشهوره بقى وكده .
_ هههه اومال يا بنتي ومتقلقيش لما اتشهر هبقى اخدك معايا .
_ ايوه ايوه اتنيلي .
_ ميرسي .
_ سكتت هاجر شويه وقالت : بت يا اسماء هو انتي ليه مبتفكريش تقدمي المحتوي بتاعك على النت .
_ بمعني .
_ اقصد أن أنتي ابدأي واعملي صفحه ليكي علي الفيس واعرضي المحتوي بتاعك ومن خلال المتابعين تقدري توصلي اسرع .
_ تفتكري هقدر .
_ لو دة حلمك هتقدري .
_ بس دة هياخد وقت كبير .
_ طريق الالف ميل بيبدأ بخطوه يا اسماء .
_ خلاص هفكر وهرد عليكي .
_ اشطا وانا معاكي في اي حاجه .
_ ربنا يديمك ليا يا هاجر .
_ يلا بقى نمشي علشان انا هلكانه ودماغي هتفرقع .
_ اي دة من اي .
_ لا أبداً مش انتي بترغي بقالك ٣ ساعات ولا حاجه .
_ طب الحمد لله أنه مش انا .
_ يا رب هتشل .
_ بعد الشر يا مزه .
_ ههههه يلا قدامي يا بت .
☆ ————– بقلم الكاتبة/ آية إنسان —————-☆
_ رن موبايل عمرو وكانت ساره .
_ عمرو : نعم خير .
_سارة : عمرو هو أنا مش بوحشك !! ليه مش بقيت تكلمني زي الاول .
_ عاوزه اي يا ساره .
_ عاوزه نرجع زي الاول يا عمرو .
_ ساره قولتلك أنا مشغول ومش فاضي انا مسافر ولما ارجع هكلمك سلام ….. اوف كائن غلس والله ما فاهم آسر كان بيحبها على نيله اي .
_ الباب خبط ودخلت ميسون السكرتيره الخاصه بعمرو في الشركه .
_ ميسون : مستر عمرو بلغني أن في مشاكل كبيره في فرع الشركه في فرنسا ومحتاجين حضرتك هناك لان مفيش حد عارف يتعامل هناك مع المشاكل .
_ ماشي حضري التذاكر هنسافر بكره .
_ امرك مستر عمرو .
☆ ————— بقلم الكاتبة/ آية إنسان ————– ☆
في الصباح في فيلا العامري على الفطار :
_ عاصم : هاجر انتي عرفتي اللي حصل .
_هاجر : خير يا عمي حصل اي .
_ اياد .
_ ماله يا عمي .
_ ابنه مات .
_ اي عز مات ازاي الكلام دة .
_ مش عارف والله بس الخبر في الجرنال وانا حبيت اعرفك .
_ عمي انا كنت عاوزه اروح أعزي بس مش عاوزه اروح لوحدي ممكن حضرتك تيجي معايا .
_ ربنا يكملك بعقلك يا هاجر مهما كان دول بردو كان بينا معرفه بالليل نروح نعزي سوي .
_ ماشي يا عمي .
☆ ————- بقلم الكاتبة/ آية إنسان —————–☆
_ دخل أسر الصبح يطمن على أبوه وشافه بيقرأ الجرنال .
_آسر : صباح الخير يا بابا .
_ صباح النور يا حبيبي .
_ يلا علشان نفطر .
_ بقولك اي يا أسر .
_ نعم يا بابا .
_ ماهر مختار حفيده توفي وانا كنت عاوز اروح أعزي واجب يا ابني .
_ ماهر مختار مين يا بابا وتروح فين وانت عيان كده .
_ يا ابني دة زميل شغل البشمهندس ماهر مختار واتعاملنا مع بعض كام مره واجب اعزيه الراجل محترم .
_ على عيني وعلى راسي بس انت عيان ومش هتروح في حته .
_ خلاص روح انت وكلمني من هناك اعزيه .
_ على الرغم من أني معرفوش إلا أنه علشان خاطرك هروح .
☆ ————– بقلم الكاتبة/ آية إنسان —————☆
_ عند اسماء في البيت قاعده تفكر في كلام هاجر وفكرت لو اتكلمت عن الموضوع اللي شاغل العالم وهو الاضطهاد الديني للمسلمين في فلسطين وبورما والهند بس الاول محتاجه تجمع معلومات وقامت قعدت على النت تجمع معلومات وعرفت انها هتحتاج هاجر علشان الصور بس تخلص الموضوع الاول .
☆ ————– بقلم الكاتبة/ آية إنسان —————-☆
_ دخلت وعد عند هاجر الاوضه .
_وعد : مالك يا هاجر من وقت ما بابا قالك على خبر وفات ابن اياد وانتي ساكته وشكلك زعلان .
_ صعبان عليا عز اوي يا وعد كان طفل جميل اوي .
_ هو انتي تعرفيه .
_ شوفته مره واحده عنده حوالي سنتين انا حبيته اوي وزعلانه عليه اوي .
_ دة عمره يا هاجر وربك اكيد ليه حكمه من دة .
_ ربنا يرحمه ويصبر قلب أهله .
_ ربك مش بيسيب حق حد .
_ وعد اللهم لا شماته عيب كده .
_ انا مش شمتانه بس فرحانه أن ربنا اخدلك حقك منهم لانهم مكنوش كويسين معاكي .
_ وعد عيب كده اللي حصل زمان حصل خلاص .
_ ماشي يختي خليكي كده انا نازله الشركه سلام .
☆ ————– بقلم الكاتبة/ آية إنسان —————-☆
_ اتي الليل ولبست هاجر و نزلت مع عمها علشان تعزي وفي نفس الوقت خرج أسر علشان يعزي هو كمان .
_ وصل أسر الاول ونزل سلم على الناس اللي واقفه ووصل عند اياد واللي حاسس أنه شافه بس مش عارف فين وسأل عن ماهر مختار وواحد شاورله عليه وراح ليه وقاله : البقاء لله يا بشمهندس ماهر .
_ ونعم بالله يا ابني .
_ انا ابن اكمل السمري كان عاوز يجي يعزي ولكن هو تعبان ومش بيتحرك .
_ كتر خيره ربنا يبارك فيك يبني .
_ طيب هو كان عاوز يكلم حضرتك اتفضل .
_ خد ماهر الموبايل واتكلم بعيد علشان يسمع .
_ دخل عاصم العامري ومعاه هاجر وسلم على اياد وقاله : البقاء لله .
_ ونعم بالله.
_ سلمت هاجر على اياد وقالت : البقاء لله ربنا يرحمه ويصبرك .
_ فضل اياد ماسك أيدها وباصص ليها وقال : شكراً يا هاجر فسحبت هاجر إيديها ودخلت عند الستات .
_ قعد عاصم جنب اياد وشويه ودخل عليهم ماهر وقال لآسر : اتفضل تليفونك يا ابني .
_ فقام عاصم وقال : البقاء لله .
_ ونعم بالله شكراً يا عاصم .
_ على اي يا بشمهندس ماهر معملتش غير الواجب .
_ كان آسر هيستأذن ولكن سمع صوت زعيق جامد جاي من عند الستات فقام الكل يشوف في اي ومن ضمنهم أسر اللي اتصدم لما شاف هاجر .
_ سلوى : انتي جايه ليه يا هاجر جايه تشمتي فينا مش كده .
_هاجر : اشمت فيكم وهي دي حاجه فيها شماته .
_ اومال اي اوعي تكوني فاكره بكده انك هتكبري في نظرنا وهنجيلك ونقولك آسفين يا هاجر سامحينا يا هاجر .
_ رد عاصم وقال : انا بنت اخويا مش جايه غير علشان تعمل الواجب اللي انتو متعرفوش عنه حاجه .
_ دخل اياد وقال : أنا اسف يا عمي حقك عليا .
_ ردت سلوى : طبعا مهي جايه علشان كده بس بعينك اللي بتفكري فيه مش هيحصل .
_هاجر : انا مش بفكر في حاجه واضح أن حضرتك اعصابك تعبانه بعد اذنك وجت تمشي وقف قدمها اياد وقال : انا اسف حقك عليا .
_ ردت سلوى : انت بتتأسف لمين يا اياد مبقاش غير دي اللي تتأسف ليها كمان اوعى يغرك الدور اللي هي بتعمله دة هي بكده فاكره انك ممكن ترجع ليها .
_ رد عاصم وقال : لاااااا انتي كده زودتيها اوي بس عارفه العيب مش عليكم العيب علينا احنا اللي قولنا نعمل الواجب احنا بنتنا متربيه على الاصول اللي انتو متعرفوش عنها حاجه يلا يا هاجر وشدها عمها وخرجها بره .
_ في الوقت دة أسر عرف أن اياد هو نفس الشخص اللي شافه مع هاجر وفضل يفكر : هو اي اللي حاصل بينهم واضح أن العائلتين مش طايقين بعض ولكن خرج بهدوء وهو خارج شاف هاجر عمها حاضنها وبيقولها : من رحمه ربنا بيكي انك متجوزتيش اياد العيله دي كلها متعرفش الاحترام انا كنت غلطان لما خليتك تيجي هنا .
_ هاجر في حضن عمها متجمده مش بتتحرك لا بترد ولا بتعيط ولا اي رد فعل .
_ عاصم : هاجر يا حبيبتي انتي كويسه هاجر ردي عليا هاجر .
_ لكن هاجر مره واحده غمضت عيونها ووقعت في الأرض جري عليها أسر من غير تفكير وقال لعمها : انا دكتور وممكن اساعدها مسك ايديها وحس أن نبضها ضعيف شويه فقال : لازم تتنقل المستشفي وركب عربيته وعمها معاها ووصل المستشفي اللي كان شغال فيها قبل ما يسافر شالها أسر وزعق وقال ” دكتور بسرعه ودخلها اوضه الكشف والكل التف حوالين أسر لأنهم يعرفوه .
_ بعد شويه خرج الدكتور وقال : أسر ازيك هي الحاله اللي جوه تبعك .
_ رد عاصم وقال : طمني يا دكتور هاجر عامله اي .
_ ضغطها وطي شويه محتاجه راحه بس وانا ركبتلها محلول وهي هتكون كويسه بس تبعد عن التوتر لان دة غلط جداً عليها .
_ اتنهد عاصم وقال : شكراً يا دكتور …. ووقف قدام الاوضه وقال : حقك عليا يا هاجر .
_ قرب منه أسر وقال : متقلقش هتكون كويسه .
_ ابتسم عاصم وقال : كتر خيرك يا ابني تعبتك .
_ لا تعب ولا حاجه بس هي بيحصل ليها كده كتير ؟؟
_ لا أبداً هاجر مش بتشتكي من حاجه دي بتتنطط وتروح وتيجي وتسافر بس الدنيا مش عاوزاها تفرح تقريباً .
_ حضرتك تقصد اي .
_ اتنهد عاصم وقاله : مقصدش .
_ ابتسم أسر بخبث وقال : على فكره ممكن كتر الصدمات تؤدي للوفاه لازم لو عندها مشكله تعرضها على دكتور .
_ اتوتر عاصم من الكلام وقال : بس هي كويسه .
_ ممكن هي بتتعمد تكون كويسه قدامكم بس في بعدكم تعبانه لو حضرتك عاوز نصيحه احكيلي وانا اساعدك أو انا اتواصل مع والدها أو والدتها ونتكلم معاهم يمكن بتعاني من مرض نفسي .
_ لا مش هينفع اصل هاجر امها توفت وهي بتولدها وأبوها مات وهي ١٥ سنه .
_ حزن جداً أسر وافتكر عياطها لما ليل اتكلم عن أهلها وعن لما سألها عن أهلها وقالتله ميقلقش .
_ آسر : هو حضرتك عمها .
_ اه يا بني .
_ يمكن هاجر عندها صدمه فقدان أهلها علشان كده دة اللي مأثر عليها .
_ لا لا هاجر كانت عايشه عادي لحد ما قابلت اياد واتخطبتله ولكن قبل الفرح بشهر سابها ولغي كل حاجه بس هي بعدها عاشت عادي حتي مش اتأثرت وكملت حياتها عادي .
_ اه يعني هي كانت خطيبه اياد … بس هو سابها ليه .
_ والله يا دكتور مش عارف ومحدش عارف السبب اي بس اوقات بحس أن هو لحد دلوقتي بيحبها بس أهله هما السبب وخصوصاً وأنهم مش بيحبوا هاجر مع أن دي طيبه وقلبها ابيض وبتحب تساعد الناس بس الناس بقت تاخد بالشكل بس ومش بيهما الجوهر .
_ ربط أسر على كتف عاصم وقاله : متقلقش هتكون كويسه ولكن وهما بيتكلموا سمعوا صراخ هاجر فطلعوا يجروا عليها .