رواية تزوجت عاشقة فجعلتني أعشقها الفصل الثانى عشر 12 بقلم عائشة البشير

** مشكلتي !!

انني لا أتجزأ… هكذا أحضر بإندفاع كبير… أهب مشاعري دفعة واحده… اعطي الأشياء أحجاما تفوقها…

وحين أسقط !!

لا أسقط متفرقآ… أسقط بثقلي كله **

خالد فتحت السيارة وقعدت إندور على الطاقم اللي لقيته تحت كرسي فرح، بس لفت إنتباهي الباكو اللي عليه شعار محلنا، وفضولي خلاني نفتحه وإنصدمت لما شفت التعليقه اللي فيه????

هذي منين جابتها؟؟ خديت المفتاح وفتحت القجر متاع سيارتي بس إنصدمت ???? لما لقيت باكو التعليقه اللي واخذها لفاتن من قبل قاعد في مكانه، بس كيف فرح منين جابتها؟؟ هالتعليقه ماجبتش منها إلا قطعتين واحده خديتها أني والثانيه خدها…….. !!!!!!!!!

لا لا لا لا معقوله ????

وفجأة ???????? وكأن الأوجاع نصبت خيام إقامتها فوق قلبي????????

خالد من الصدمه عجزت عن الحركه معقوله هما الإثنين، عمري ماتوقعت ننحط بين نارين، ولا بين مرتي وحبيبتي، وصاحبي وأعز حتى من خوتي????

مش عارف كم قعدت الصدمه مأثره عليا وشاله حركتي، وندعي يارب نكون غالط يارب ماتختبرنيش في أغلى إثنين على قلبي، وتنهدت بحزن وقهر لما شفت تليفوني يرن فرحتي????

معقولة في يوم سجلتها فرحتي تكون هيا فرحة أعز صحابي وكأنه الفرحه ماتعرفش طريقها لقلبي????

فرح زفرت بغضب: ااااف تي وينك هذا كله ياخالد

زاهيه: هاك يافرح حاجاتك جابهم خالد وخفي روحك وأطلعي بسرعه باش تستقبلي معاي الناس

فرح أستغربت ليش ماردش عليا ولا كلمني أني باهي، خيره زعما، خلاص يافرح مرات لقي عمتي قدامه عطهولها عادي يعني????

خالد كلمت أمي وعطيتها الباكو، وتوجهت للمكان اللي خليت فيه وليد، عقلي يقولي أهرب ياخالد أختفي من هالدنيا ريح روحك وبعد عليهم، بس قلبي دايرها فيا????

وليد، بإبتسامه: نحسابه شدوك الداخل تي قلت دقيقه قعدت ساعه????

خالد شفت لوليد بنظره هو الوحيد اللي ممكن يفهمها، لأنه حالة قلبه مش خير من حالة قلبي، اللي مالكه قلوبنا أحني الإثنين واحده

وليد بخوف: خيرك ياخالد شني فيه؟؟ خيره وجهك هكي !!

خالد نزلت رأسي لوطه وتنهدت بحسره، شني بنقولك خديت فرحتك يارفيقي، خديت روحك وضحكتك، خديت قلبك وبسمتك، خديت عمرك ودنيتك، تلفتت لوليد، وبحزن: كنت مسجلها فرحتي يعني أسمها فرح، صح؟؟

وليد بحزن: صح !!

خالد اااااااه ياقلبي اااااااه، تنهدت بقهر: قداش تحبها يارفيقي؟????

وليد إستغربت???? من حالة خالد، شني جاه فجأة، بحزن: حبيتها أكثر من ماتتصور، حبيتها من صغري من أول مره شفتها في حلمي، هيا الأمل الوحيد اللي كان في دنيتي، ونزلو دموعي اللي غلبوني????: أني عشقتها مش حبيتها،مش قادر ننساها ثانيه، بس القدر والنصيب رفضو أنهم يجمعونا، ورفعت عيوني المدمعات للسماء:???? ياربي مادامك حرمتني منها في الدنيا كافيني بيها في الأخره يارب???????? 

“” ربما تستطيع أن تنسي من أحببته وخانك، ولكنك أبدآ لن تستطيع أن تنسي من حالت بينك وبينه الأقدار “”

خالد من قبل لما كنت نسمع في وليد يوصف قداش يحبها، وكيف يناجي في ربي بيها، لما ماكنتش نعرف من هيا المقصوده من كلامه، كنت نحزن على حاله، وأني بروحي ندعيله،

بس توا كلامه قاعد يقطع في قلبي????، وأني عارف أنه يقصد اللي سلبت مني روحي وعقلي، كيف نقدر نتحمل كيف !! حاسس روحي بننجن????، هجمت على وليد بكل قوتي، طلعت حزني وقهري وحسرتي كلها عليه????

وليد كل مانقول أهو اليوم بنرتاح وبننشغل في شي ونطلعها من تفكيري شويه، نلقا الدنيا كلها معاندتني ولازم يصير شي يقولي ماتحلمش هيا موجوده في كل نفس قاعد تأخذه باش تعيش????

حتي خالد اللي كان يخفف عليا، هو اليوم اللي فتح جروحي لما سألني عليها، قعدت نمسح في دموعي ونحاول نسيطر على روحي وعلى قلبي اللي ينزف دم لما تنجبد سيرتها، بس فاجأني خالد لما هجم عليا بالضرب وماعطانيش فرصه حتي نفهم شن قصده باللي داره لما لزني والناس واقفين يتفرجو قدام الصالة????

خالد وأني نلهث من الغضب والمجهود اللي بذلته، بصوت عالى: معاش نبي إنشوف وجهك قدامي فاهم، ينعن????

وليد حاولت نسند روحي على طولي وقدم واحد من الشباب سندني، وأني مش فاهم شني اللي صار كيف خالد يديرلي هكي، كنت نبي نلومه نعاتبه نسأله كيف وبأي حق يدير اللي داره، بس قدرت الموقف والناس اللي موجودين وسكتت وتحملت في روحي، وطلعت وأني مكسور ومجروح من رفيق عمري اللي راهنت الدنيا عليه????????

خليل كان يجيب في خوله ومنال من المزين، وخيري على أساس بيجيب خلود بس لما عماد أصر أنه هو اللي يجيبها، قعد خيري وراهم بسيارته وخلاص

وصلو للصالة مع بعض، وعلى طول لما سمع خيري باللي صار من الشباب،

خيري بخوف????: شني فيه ياخالد؟؟ 

خالد بعصبيه????: مافيه شي أقلب وجهك من قدامي

خيري: تي الناس كلها تحكي على صاحبك اللي دقدقته، شني صار بينكم؟؟

خالد بغضب????: باش تفهم أنت قتلك مافيه شيء 

خيري: أستغفر الله العظيم، هيا تعالا باش إدخل خلود

خالد بغضب????: برا دخلها أنت أخطوني الليله خير مانقربعها على رؤوسكم

زاهيه: وينه خالد !! شوفيه يافرح باش يدخل أخته

فرح، بتوتر: نكلم فيه مقفل، أشبح خيره؟؟ وغطيت وجهي لما طق الباب

خيري: هيا شني أهو خليل برا، بتخشو ولا مازال

زاهيه: وين خالد؟؟

خيري: قاعد برا

خلود: ناديه أني نبيه هوا يدخلني

خيري: ماباش مسكر رأسه، وخيرني أني مش عاجبك ولاشني؟????

خلود بحزن☹: مش هكي، بس أني كنت متفاهمه أني وياه، شني اللي غير رأيه، كلميه يافرح باللهي عليك

فرح: تليفونه مقفل من بكري، ناديهولي باللهي ياخيري 

خيري????: ياعليك دلع بنوت الزفت

منال: شني صار !! خليل قاللكم بنطلع كأنكم معطلين؟؟

خلود: قوليله شويه بس خلي يجي خالد

خيري طلع ورجع، وبغضب????: ماباش يجي، بتطلعي وإلا نحلف حتي أني نطلع ومادخلنيش فيك

خلود بحزن: باهي خلاص????

فرح خشو البنات مع بعض خوله مدخلها خليل وخلود مدخلها خيري، حطوهم على الكوشه وصورو معاهم وطلعو، كنت خايفه ومتوتره طول الوقت مافهمتش خالد شني اللي جاه فجأة، ماباش يخش يصور حتي مع خواته،

طبعا العرسان ماخشوش للصالة لأنه أسامه ماجاش بكل مع أهله، وعماد لأنه أسامه ماجاش فتحشم أنه هوا يخش حسها لقطه بايخه، بس خش لغرفة العروسه وصور هو وخلود، وخوله طلبت أنه المصوره تمشي معاها باش تصورها هيا وأسامة غادي(( طبعا حتي الدخول كانو دايرينه في صالة عيلة عماد وعيلة أسامه مع بعض، بما أنه العرسان أقارب، والعرايس خوات))

خالد كنت صابر وساكت بس على خاطر مانخربش على خواتي فرحتهم، نمثل في البرود وأني في داخلي نار والعه????

كيف بنشوفها !! كيف بنتعامل معاها !! كيف بنتصرف نتكلم ونسألها ونفتح جروحها ونبعدها عليا أكثر من قبل????، ولا نسكت ونعفس على قلبي ونسيب صاحبي وننسي جميله ومعروفه ووقفته معاي????

فرح طلعنا بنوصلو البنات لاحظت أنه خالد مش طبيعي وماتكلمش ولا كلمه وطول الطريق يزفر بغضب، ماقدرتش نتكلم أو نسأله شني فيه، لأنه عماته كانو راكبين معانا????

خالد ماكنتش قادر نشوفلها نار راكبه فيا???? إنحطيت في موقف من أصعب المواقف اللي ممكن يتخيلها أي إنسان????، كنت خايف عليها مني !! خايف إنضرها وأني معصب ونطلع غضبي عليها زي مادرت في وليد

ياربي ساعدني أرشدني للصح، ماتخلينيش نخسرهم الإثنين ????

** كسروني أغلى إثنين على قلبي وفي نفس الوقت، زي مايكونو متفقين ومتفاهمين عليا **????????

خالد وصلنا قدام حوش أهلي وتنهدت بقهر: أنزلي يافرح خليك الليله مع أمي

فرح إنصدمت ????هذا أكيد مش خالد، كيف كان فرحان باللي صار بينا قبل الحفله وكان لقاني مانمشيش، شني غيره !! قعدت نشوفله ومارديتش نستني في عماته ينزلو، بخوف: خالد شني فيه !! شن صار !! أنت كويس؟؟

خالد شني بنقول !! كيف بنسألها عليه !! ممكن لو عرفت أنه رجع لليبيا تسيبني???? مجرد الفكره بس خلتني إنجن نفقد عقلي، بغضب????: قتلك أنزلي أني ينعن????

فرح خفت من منظره اللي ماكانش يبشر بالخير، بتوتر: مش نازله روح بيا للحوش????

خالد بعصبيه????: عناد هو صار، باهي تلقي اللي يجيك إمالا، وطلعت بسرعه ????

فرح كنت بنموت بالخوف من شكله وزادها سرعته لين السياره حسيتها ماتمشيش على الأرض، مافيش دعاء نعرفه وماقريتاش، قريت كل السور اللي نحفظهم، علاش أني ديمه هكي مش مكتوبلي نفرح ونرتاح بكل????????

عماد بحزن: كنت متمني إندخلك لحوشنا وأني شايلك في حضني، بس حتي أبسط أمنياتي مش قادر نحققها

خلود وقفت قدام عماد ونزلت لمستواه، ومسكت إيده، وبإبتسامة: يكفيني أنك تشيلني في قلبك هذا الأهم عندي، وبعدين مش تقولي أنه دخول واحده زيني لحياتك من أكبر أمنياتك؟؟

عماد، بإبتسامه: أنتي أكبر من كل أمنياتي، ماكنتش نتوقع أنه ربي يرزقني بواحده حتي في ربعك، ربي مايحرمني منك❤

خلود، بفرحه: خلاص أمنيتك الكبيره أني وقعدت ملكك، ليش تهتم بالأمنيات البسيطه، بإذن الله طول ماأحني مع بعض مش راح يصعب علينا شي❤

“يأتي أحدهم وكأنه ينير في روحك ماكان مظلما “

رغم عجز عماد عن الحركه بس هذا مامنعهمش أنهم يقضو ليلتهم من أحلى مايكون????❤

أسامة????: باللهي خشي أمسحي وجهك بسرعه العفن هذا مانحباش أني

خوله بحزن: علاش مش حلو☹

أسامه قعمز على الصالون وقعد يلعب بتليفونه، وبهزوه???? : ومني باللهي اللي ضاحك عليك ومقايلك حلوه، حلاوتك توا تبان على السرير????، أما منظرك يحشم راهو، هيا خشي خفي روحك أغسلي وجهك نبو نكملو بكري العيلة يستنو????

خوله قعدت مصدومه من كلام أسامه صح كان جاف وبارد معاي أيام خطوبتنا، بس ماتوقعتش أنه يكون بالحقاره والدنائه هذي، معقوله يقولي هكي في أول ليلة لينا مع بعض، 

خشت للدار وهيا أول مره تحس أنها ضعيفه ومكسورة بالدرجه هذي????????

وأسامة ماقصرش أنه يزيد يكسرها ويذلها أكثر من هكي لما عاملها وكأنها أداة للتسلية وإشباع الرغبه، وماحسسهاش أنها عروس وفي أحلي ليله في عمرها

“”  وعلى نياتكم ترزقون “” ????????

خالد قدمت بسرعه وجبدت وشاحها والخمار من على وجهها، وبعصبيه????: حولي عبايتك بسرعه تحركي

فرح إنصدمت من حركته شن قصده هذا، لا إراديا شديت عبايتي بإيديا وتشبتت فيها وكأني نبي نحمي روحي، بخوف????: كيف !! شن قصدك ياخالد؟؟

خالد قربت وقفت قدامها، وعيوني في عيونه اللي دمعو من الخوف، بقهر: بعد كل هالفتره اللي عشتاها معاي، وبعد كل اللي درته على خاطرك، وصبري عليك، ومتحملك وعافس على قلبي وساكت، قاعد إنشوف في نظرة الخوف في عيونك مني، خايفه مني !! واني اللي خايف عليك من نسمة الهواء

مش حاسه بالأمان معاي !! وأني اللي نحس روحي أضعف إنسان قدامك

 لهالدرجه هذي كارهتيني !! وأني اللي عشقتك بكل تفاصيلك ????????

فرح بدموع????: لا ياخالد والله، وإنخرست لما……..

خالد ماكنتش قادر نتحمل أكثر، مديت إيديا وبقوة جبدت عبايتها اللي تمزقت وطاحت على الأرض، شديت التعليقه اللي لابستها، وبقهر: هذي منه صح !! تكلمي منه ولا لا ؟؟????

فرح صدمتي شلت كل جزء في جسمي، حسيت الدموع تحجرو في عيوني، شن قصده!! كيف عرف!!????

خالد سكوتها أكد شكوكي بس مازال نبي نسمعها منها نستني فيها تكسرني أكثر ماأني مكسور،????

لما لاحظت أنها عاجزه تنطق، رفعتلها رأسها وعيني في عينها كنت نبي إنشوف ردة فعلها لما نتكلم، بحسرة????: وليد خليفة ال……..، هو اللي واخذ قلبك ومخليك معاي جسد من غير روح، صح ؟؟

عيونها اللي لمعو بحزن وإنكسار ودموعها اللي نزلو بقهر وخذلان لما إذكرت أسمه، طعنوني قتلوني قتل، إنهارت كل قوتي في لحظه نزلو دموعي بحسره????: ليش أني يافرح ليش أني؟؟ علاش تكسروني أنتم الإثنين???? طحت على الأرض وقعدت نبكي زي العيل????

فرح قاعده ماأستوعبتش اللي صار، هاللحظه أصعب من لحظة خذلاني من وليد????????

إنهيار خالد بالشكل هذا قدامي كنت أضعف من أني نتحمل منظره وهو مكسور ومجروح مني، خلاص يافرح بطلي أنانيه جي الوقت اللي يستحق فعلا تنازلك وتضحيتك

“” إرتباطك بماضيك… لا يعطيك الحق بأن تظلم من يعيش في حاضرك…! ???? “”

فرح قعمزت قدام خالد ومديت إيديا اللي يرجفو ومسحت دموعه، بحزن????: أني قاعده نستمد في قوتي منك، نبيك تكون الظهر اللي يسندني، القلب الحنين اللي يحتويني في حزني، كيف ترضي بشيء زي هذا يكسرك هكي

خالد، بدموع????: منين تبيني إنجيب القوه وأني نشوف في حبك ليه في عيونك????

منين بنجيب القوة وأني أعز إثنين عندي خذلوني????

منين بنجيب القوة وأني نشوف في مرتي عاشقه أعز صحابي????

فرح “أعز صاحبي” شن قصده????؟؟ كنت ناويه نواسيه نراضيه حتي ولو على حساب نفسي مستحيل إنخليه بالشكل هذا، بس كلمته الأخيره نفت كل شي، كيف وليد هو صاحب خالد معقوله !!????

خالد كنت مركز في عيونها نبي إنشوف فيهم شي يعكس كلامي يخيب توقعاتي، بس للأسف مافيهمش إلا الحزن والحسره????

خالد أنت ماتستناش في شفقه من حد أنت أقوي من هكي، مفروض مايهزكش موقف زي هذا؟؟ مسحت دموعي وحاولت نسيطر على روحي تصنعت البرود ووقفت وأني نشوفلها كيف جامده في مكانها وتهز في رأسها يمين ويسار وكأنها تحاول ترفض أستيعاب الموقف، ببرود????: لمي حوايجك كلهم بكرا نرفعك لحوش أهلك، وجودك في حياتي معاش يعنيلي شي فعلا حبك لعنه ونبي نتخلص منها في أقرب وقت، وطلعت بسرعه بدون وجهه محدده

فرح  هالشخص كيف قادر يلعب دورين في وقت واحد القوة والضعف، الحزن والبرود، زاد جرحي ملح بكلامه الأخير، معقوله حتى هو بيتخلي عليا، معقوله يخذلني فيه، قداش ناويين يكسروني مره????

مانعرفش قداش قعدت مقعمزه في نفس المكان وأني نستني فيه يخش ويحضني ويقولي مانقدرش من غيرك زي كل مره، بس هالمره غير طلع ومارجعش ولا كأني نعنيله أي شي????

مني إنلوم؟؟ خالد اللي حسسني بالأمان وعطاني أمل فيه وخلاني نرتاحله ونطمن معاه وفجأة يتركني????  

ولا نلوم وليد اللي علقني فيه وسلب روحي وخذلني من أول موقف وهرب من غير مايعطيني أسباب????

ولانلوم روحي لأني كنت ضعيفه لدرجه رخصت روحي للإثنين وهما ماقصروش في تعذيبي????

فاتو أسبوعين وكل يوم يمر أسوء من اللي قبله، خالد من لما طلع معاش رجع وتليفونه مقفل ومافيش حد شافه من لما كنا في الصالة، كل يوم يفوت يزيد اليأس يسيطر على الكل أكثر، مافيش أي خبر عليه????????

زاهيه بدموع????: يابنيتي بالك في حاجه بالك تعاركتو قولي عادي كيف يطلع هكي ومعاش يرجع

فرح طول هالأسبوعين كانوا دموعي هما الجواب الوحيد لكل أسئلتهم???? مانقدرش نقول أي شي وخالد مش جنبي مني بيدافع عليا، ويحميني منهم لو عرفو اللي صار ????

عمران، بحزن????: ياسر وأنتي شادتيها على البنيه ماتشوفيش في حالتها حتى هيا، خالد مش صغير ومادامه مافيش أي خبر مش كويس لحد توا، معناها هو بخير وربي يرجعه بالسلامة إن شاءالله 

خش خيري من برا وهو يتنهد بملل: قتلك شن رأيك يابوي نسألو على الحدود مرات مشي لتونس

عمران، بشك????: ماأعتقدش تي قتلك مارفع معاه شي كيف بيمشي لتونس

خيري: خليل كلم واحد يعرفه في بوابة زلطن وقاله توا نتأكد إذا كانت سيارة خالد خشت لتونس ولا لا

فرح وكأني إذكرت شي كان غايب على بالي، تكلمت بسرعه: خيري تعرف وليد خليفة ال………؟؟

خيري بإستغراب????: هذا صاحب خالد ولا لا !!

فرح عندي إحساس أنه لما طلع مني مشاله أكيده مش راح يسكت هكي بالساهل: أي لو تعرفه أنت ولا تقدر تتواصل معاه كلمه أكيد يعرف حاجه ????

خيري: بس هما تعاركو ليلة الحفله ماأعتقدش أنه يمشيله بعد اللي داره فيه????

فرح إنصدمت ????كيف تعاركو !! هو وليد رجع لليبيا أصلا ????!! بس أمتي !! كيف عرف خالد بقصتي أني ووليد !! هلبا أسئلة إدور في رأسي ومش قادره نلقالها جواب، خالد الوحيد اللي يقدر يريحني من هالحيره

زاهيه بخوف: وعلاش تعاركو مرات هذا علاش خوك طلع ومعاش روح، مرات هالولد دارله حاجه، وووك عليا????

عمران بغضب????: تي أسكتي الولد صاحبه من زمان وأني نعرفه مستحيل يديرله شي، ووليد ماليشي فتره راجع لليبيا، وبعدين خلافهم مش سبب يخلي خالد يختفي هكي، في حاجه ثانيه أكيد 

فرح كل مره قاعده ننصدم أكثر من قبل وليد وخالد صحاب من قبل وأني كيف ماكنتش نعرف أو أني مركزتش، معناها صاحبه اللي جابه من المطار هو وأخته (( وليد )) ????

زاهيه، برجاء: باهي مادامكم تعرفوه، كلموه شوفوه بالك يعرف وينها ولاشافه

خيري: أني مانعرفاش كويس، وتوا ليل بس غذوه توا إنشوف نسأل بالك حد يعرفه

ثاني يوم

منال بحقد????: ياعليك وقاحه عندك حتى راجلك مهناش قاعده لاصقه فينا، المفروض أنك روحتي لأهلك

زاهيه بعصبيه????: منال ضمي فمك وأحترمي نفسك، عمك هو اللي رافض أنه فرح تروح لأهلها، والله لو يسمعك تشوفي شني يصير فيك

منال خافت وسكتت????

فرح اللي صار خلاني مانقدرش نفكر كويس، صح كلامها أني شني اللي مخليني نقعد إهنايا، ليش ماكلمتش واحد من خوتي جاني، أصلا ليش كل مره نكلمهم وماحكيتش اللي صار بكل، هما بروحهم لو عندهم علم بغياب خالد مستحيل يخلوني دقيقه إهنايا، نضت من جنبهم من غير ولا كلمه

فرح بتوتر: عمي أني سمعت كلامك ومابيتش نخدلك وخذيت بخاطرك لما قتلي خليك إهنايا ومافيش حد لازم يعرف باللي صار، بس بعد أذنك أني بنكلم خوي يجيني، قعدتي إهنايا الوقت هذا كله وخالد مش موجود فيها إهانه ليا????

عمران: لا يابنتي الحوش حوشك، وأني والله تهمني مصلحتك ومادابينا الموضوع ماينتشرش ويكبر أكثر، على الأقل لين نعرفو حاجه على خالد

فرح، بحزن: بس سامحني ياعمي أني معاش نقدر نقعد أكثر من هكي، وتلفتت بفزع لما خش خليل وهو داهش وواضح جاي يجري

خليل، يلهث: يابوي قالولي خالد خش لتونس بس مش في سيارته خش في سيارة إسعاف????

عمران فز من مكانه، بخوف: كيف !! أنت شني تقول؟؟

فرح أخر شي سمعته سيارة إسعاف????????

علي: فرح كل مانكلمها نحس صوتها مش طبيعي فيها حاجه، بالك قالتلك حاجه أنتي؟؟

سعده، بإستغراب????: لا والله ماقالتلي حاجه، وبعدين من أمس الصبح معاش كلمتني

علي بغضب????: وخيرك أنتي ماكلمتيها المفروض شفتيها اليوم لما ماأتصلتش بالك فيها حاجه، شني هالقلب اللي عندك

سعده بخوف????: والله ماخطر على بالي توا نتصل بيها توا

علي????: تي شوفي الساعه توا 11 غير بتخلعيها في هالليل، خلاص خليها للصبح

فرح فتحت عيوني وقاعده نشوف في الصوره مضبابه قدامي

خلود لما أنتبهت لفرح فاقت، قدمت جيهتها بسرعه، بخوف: فرح أنتي كويسه !! تبي حاجه؟؟

فرح بدت الصوره توضح عندي شويه شويه، وعلى طول إذكرت أخر شي سمعته خالد !! تونس !!  سيارة إسعاف !!، تكلمت وصوتي يادوبك يطلع: خالد ياخلود????

خلود، بحزن: إن شاءالله يرجع بالسلامة يارب، بابا وخليل مشو لتونس ليهم يومين قاعدين يدورو عليه

فرح تنهدت بحزن: وين أني؟؟

خلود: أنتي في العياده بس ماتخافيش أنتي كويسه بس صارلك إنهيار عصبي لما سمعتي اللي صار

فرح معناها ليا يومين وأني مانعلمش بروحي، نزلو دموعي????: ليش إيدير فيا هكي ياخلود، أني مانستاهلش هذا كله????

خلود، بحزن????: ياسرك يافرح، بإذن الله مافيه شي وراح يرجع إن شاءالله 

فرح نبكي: يارب????

خيري: أيوا من معاي؟

عصام: خيري عمران ال….. ولا لا !!

خيري: أي تفضل من معاي

عصام معاك عصام صاحب خليل، غير نتصل بتليفون خليل نلقا فيه مقفل، وإذكرت أنه عاطيني حتي رقمك، قلت نتصل بيك أنت وخلاص

خيري: أهلين بيك، واللهي خليل في تونس، إن شاءالله خير تفضل

عصام: أها، لقيتوه خوك خالد قصدك؟؟

خيري، بحزن: لا واللهي مافيش شي لحد الأن

عصام: أني اليوم الصبح وصلتني معلومه أنه طلع من تونس وراجع لليبيا

خيري، بصدمه????: كيف متأكد من الخبر أنت؟؟

فرح: كويسه يابابا مافيا شي 

علي، بخوف????: وينك أمس ماأتصلتي؟ واليوم من الصبح تليفونك مقفل !!

فرح معاش عرفت شني بنقول مانبيش إنخوفهم عليا، وبالأخص أنه الدنيا ليل والوقت متأخر: أمس كنت في حوش عمي والبنات جايين ولهينا في الهدرزه، وطاح من إيدي التليفون لما إنفتح الباب

علي بإستغراب: خيرها سكرت

سناء: مرات فصل ياعمي أرجع عاودلها

علي إتصل من جديد: مقفل !! زعما شن اللي صار

عامر: شني بيصير يعني مرات فصل الشحن يابوي، عادي تصير هلبا

علي وهو مش مرتاح، وبشك: ممكن !! شن صار في حوشك ياعامر

عامر: مازال حاجات بسيطه بس، نفكر أخر الشهر نحولو إن شاءالله 

سعده: إن شاءالله على خير، وحوش جلال شني

عامر: واللهي ياأمي أني تعبت من العمل نطلع طول نوقف على العمال وتعالا إهني وبرا غادي وجيب هذيكا، كملتله  الزواق ووقفت وسكرته

علي: خلاص بارك الله فيك أنت كفيت ووفيت، كلمه وقوله ياسرك من هالجو اللي إدير فيه، يروح ويدير دوره على حوشه ويعرس ويريحنا

سعده، بفرحه☺: إن شاءالله، نعرسوله هو وسالم جميع، والله عاجبتني مروه بنت مفتاح ونبيها لسالم، وجلال قالي ماتفكريش فيا، شوره عنده واحده في باله

علي بحده: وسالم موافق على اللي تقولي فيه!!

سعده????: وعلاش مايوافقش؟ وين يلقا أحسن من بنت خاله؟؟

علي بغضب????: وكان بنت خاله أنتي ماتقراريش بدله، وبعدين سالم عروسته واتيه وهو رايدها ويبيها، وأنتي تعرفيها

سعده بصدمه????: من قصدك !! إن شاءالله غير مش هالملعونه رغد

علي بعصبيه????: أي رغد بالك مش عاجباتك؟؟ أني كلمت بوها وتم الموضوع خلاص، مانبيش نسمع كلمه هكي ولاهكي فاهمه

سعده بخوف????: بس هيا….. وسكتت لما قطع عليها علي بغضب????: لابس ولاشي، خلاص هالموضوع تسكر وأني مانبيش نخسر ولدي على سبب تافه، ريحينا عاد من هالدوه الفاضيه

خالد أكيد كلكم تفكرو كيف قدرت نخليها ونهرب أو نسلم فيها بسهوله، بس لا أني مادرتش هكي، كلامي الأخير ليها كله كان في لحظة غضب كنت عارف ومتأكد أني مش راح نقدر إنطبقه طلعت وأني في بالي نرتاح لين نهدأ باش مانغلطش فيها، بس تفاجأت بالحادث اللي صاير قدامي????

خالد نزلت من السياره بسرعه????: لاحول ولاقوة الابالله، شني ياشباب كيف حاله؟؟ بس قدمت بسرعه لما ركزت على السياره????: ياربي أستر ياربي لا ماترفعاش وهو زعلان مني لا ياربي مش اليوم

الدكتور: المريض حالته حرجه وانت عارف وضع المستشفيات إهنايا ووضع البلاد اللي متدهور، نصيحه أنكم إطلعوه لتونس باأسرع وقت

نور الدين: تمام يادكتور، راح نشوف سيارة إسعاف، ياخالد خليك إهنايا شويه وجاي بإذن الله مانعطلش

خالد بحزن????: تمام، قاعد من غير ماتقول، ماقدرتش نخلي وليد في وضع زي هذا وخصوصا أني حاس بالذنب أنه أني السبب في اللي صارله، لو صار فيه شي مش راح نسامح روحي????

طلعنا لتونس في نفس الليله وأني كنت مع وليد في سيارة الإسعاف،

ماعرفتش شني اللي خلاني نسكت ومانقول لحد وكأني كنت محتاج فترة راحه من كل شي،

 اللي كان مطمني أني عارف أنه فرح بخير ومامشتش لحوش أهلها، كنت نتواصل مع خلود  وهيا إطمن فيا عليها، كنت طالب منها ماتقول لحد

 كنت نكابر ونعفس على قلبي وأني بعيد عليها، واللي زايدني وليد طول فترة علاجه وهو ينادي بإسمها، وكأنه كان متعمد يعذبني ويزيد جروحي????

لما عرفت أنه فرح تعبانه ماقدرتش نمسك روحي أكثر خلاص، لازم كل شي يأخد مجراه الطبيعي، وحتي ولو كان هالشي مش لصالحي، المهم عندي هيا وبس????????

فرح نزلو دموعي???? بقهر وعيوني معبيات لوم، كيف هنت عليك كيف، نضت بسرعه وماعدلتش على الكالونا اللي طاحت وإيدي اللي قعدت تنزف، وقدمت وحضنته بلهفه وشوق، ودموعي ينزلو: كيف هنت عليك تخليني هكي كيف؟؟????

خالد، بحزن????: أنتي كويسه !! سامحيني بس كان لازم نبعد باش نقدر نفكر كويس ونأخذ قرار يريح الكل

فرح زدت تشبتت بحضنه أكثر، وبدموع????: راحتي وراحتك أننا نكونو مع بعض، ماتخلينيش ثاني باللهي عليك 

خالد اااااه ياريت نقدر نأخذك ونختفي من هالعالم، بحزن????: بس قصتنا فيها ثلاثة أطراف، أنتي وأني وهو، بعدتها من حضني ومسحت دموعها، 

وتكلمت وأني كلي حسرة وقهر بس لازم إنضحي لازم نخليلها القرار، وغصبآ عني تصنعت الإبتسامة: هو يبي يشوفك يافرح، وأنتي عندك حق الإختيار مهما كان خيارك أني راح نكون في صفك، أهم شي عندي سعادتك حتى لو كنتي مع غيري????????

فرح معاش عرفت شني إنقول إنحطيت في موقف صعب، كنت متوقعه أنه راح يتأسفلي ويقولي خلينا ننسو اللي فات أنتي ليا أني وبس، بس تفاجأت بيه قاعد يخير فيا بينهم الإثنين ???? ليش أني لعبة، بيحذفوني بينهم والشاطر هو اللي يوصل الأول????

معقوله هو ماحبنيش،???? كيف يدير فيا هكي، كيف قدر يسيبني هكي، معقوله يخيب ظني فيه بالشكل هذا

تعادلت الكفتين عندي، الإثنين تخلو عليا وهنت عليهم وأني في عز حاجتي ليهم، رجعت للسرير وأني كلي خيبه????

** ماوجعنيش غيابك.. قد ماوجعني ظني الحلو فيك **

فرح، بحزن????: ممكن تناديلي حد يمسحلي الدم، وبعدها خليه يخش وأني نبي إنشوفه أصلا

خالد طلعت وحاسس بجرح قلبي كل ماله يزيد،???? كيف تقدر تسلم فيها ليه، كيف تقدر تعيش من دونها ياخالد، كيف تتحمل أنها تكون مع غيرك، كيف إضيعها من إيدك وتعطيهاله بالسهوله هذي، بحزن: تقدر تخش ياوليد????

“” في مرحلة ما من حياتك، سوف تدرك ان بعض الناس يمكن أن تبقي في قلبك ولكن ليس في حياتك “”