رواية تزوجت عاشقة فجعلتني أعشقها الفصل الرابع عشر والأخير 14 بقلم عائشة البشير

لأنّك تستحق السّعادة لا تغضب ولا تحزن؛ فهُناك دائمًا مخرجًا لكُلّ شيء، وخيرةً في كُلّ شيء، لم ينتهي الطريق!! فأنت تستطيع أن تتجاوَز هذه اللحظات، لا تدعها تسلُب منك ابتسامتك، ثِق أن القادم أفضل!! وسيُنسيك كُلّ العثرات، فقط ثِق بربّك وابتسم؛ و‏‎كُن على يَقين بأنّهُ يومًا ما سيأتي ما يُفرِحُ قلبك، ليس عِلمًا بالغيب، وإنما ثقة بربٍّ رحيم، فلا يعقبُ الأحزان إلا “سعادة”، ولا يعقبُ الحِرمان إلا “عطاء”، وهذا ليس قولي!! إنّما قول ربّي سُبحانهُ وتعالى:

(سيجعلُ الله بعد عُسرٍ يُسرًا)..

كُن مُتفائلاً وأحسِن الظنَّ بالله.. ⁦❤️⁩

فرح، بتوتر????: لا يابابا والله مش هكي الموضوع، أنت فاهم غلط

علي، بغضب????: شني هو اللي فاهمه غلط، باللهي هذي تصرفات يديروها، تي أنتي طالعه من حوش عيله مش من الشارع، في الأول قصة السحر حطوها في رأسك وهانوك وضربوك ولزوك وسكتي وزدتي كذبتي عليا وسترتي عليهم،

علي بعصبية أكثر????: وتوا راجل يختفي إسبوعين ومن غير سبب وكلهم يدورو عليه ويخلوك عندهم ويمنعوك أنك تخبري أهلك بأي حق، 

????تي حتي مرضتك ورقدتك في المستشفى كان مش هو غلط وإنفضح قدامي ماكناش نعلمو بيها بكل، والله أعلم شني مازال مدسوس ثاني، تبيني نخليك لين يديرولك شي مصيبه ونقعد حال فمي????

فرح بصراحه بابا عنده حق، هيا هكي المشاكل والقصص ملخبطه وماتفهمي شي، بتوتر????: بابا خليني إنوضحلك بالنسبه لقصة السحر فعلا هما غلطو فيا بس والله خالد ماليه ذنب أصلا ديمه يدافع عليا قدامهم ومايرضاش أنهم يقولو كلمه ضدي وبالنسبة  لما لزوني هما أستغلو غيابه لصالحهم لو كان موجود مستحيل يرضي بهالشي

علي، بغضب????: باللهي أسكتي ومعاش أدافعي عليه وشفناه لما روح ماهو قعد شهرين ماشفناش وجهه، باللهي تصرفاته هذي تصرفات واحد شاريك ورايدك

فرح????: ماهو حلفان بوه على أمه هو اللي خلاه مربط ومش قادر يتصرف، وبعدين يابابا لما بان  الحق جاني على طول وماعدل على حد، وكل العيله أعتذرولي على اللي صار وأني نسيت الموضوع تصير هالقصص في هلبا عائلات

علي????:وقصة أختفائه هذي شني وراها وليش مايبيش يحكي، في حد يمشي مع صاحبه مريض ومايخبر حد وأهله يلحقوه ويدورو عليه، والله أعلم قداش دايرها مره

فرح معاش عرفت شني بنقول، بس لازم نتكلم نزلت رأسي لوطه، وبخوف????: المره هذي أني اللي غالطه فعلا يابابا، أني اللي هنته وقصرت في حقه هو طلع لأنه كان معصب ومايبيش يغلط فيا ويضرني، وأني سكتت وماقلتش خفت لأنه الغلط مني????

علي بشك????: وهذي كذبه جديده ولاشني؟؟ ماكنتيش هكي يافرح ماشديتش عليك الكذب من قبل شني اللي غيرك

فرح هذا هكي صار وبابا فقد ثقته فيا، إمالا لو يعرف بقصة وليد وتصرفاتي مع خالد شني يدير????، بخوف: والله مانكذب يابابا هالمره، والله لو تبيني نحلفلك على المصحف نحلف عادي بس صدقني????

علي????: نوضي خشي يافرح وخليني أني نعرف كيف نتصرف في هالموضوع، وماتقوليش لحد والله يسمع صالح شني بيفكنا منه بعدين

فرح هزيت رأسي وخشيت وأني مسيطر عليا اليأس واضح بابا مش مصدق ولا كلمه مني اللي قلته، وأني كل تفكيري في خالد وكاسر خاطري????

عمران بعصبيه????: وهذي عمله إديرها الله إيسود وجهك زي ماديمه مسودلي وجهي مع الناس 

زاهيه????: بالشويه على الولد، ليش هالكلام 

عمران بعصبيه????: أنتي تسكري فمك فاهمه، هذا أخرة دلالك ليه، والباقي هناك واحد يختفي ولايقول وراى ناس مشغولين ولايتصل يقول يطمن حد ومرته المسكينه على شوي مشت فيها، عنده حق بوها يرفعها أحسن خليك هكي زي الكلب

خليل????: هدي يابوي مش هكي الكلام، وبعدين بوها مش من حقه يرفعها من غير مايفهم

عمران بعصبيه????: تي كيف مش من حقه، ماتشوفش في تصرفات خوك، تي أني على أخر الوقت نقعد نجري وراه من مكان لمكان، تي أنت بتموتني ناقص عمر، مادامك مش قد المسؤوليه ليش تظلم بنت الناس معاك

خالد عارف في نهاية القصه اللوم كله عليا، معاش عندي جهد نتكلم أو إناقش حد، خلي كل واحد يفهم اللي بيفهمه، معاش يهمني حد كان غير يردولي فرح معاش نبي شي????

خالد، بحزن????: عارف روحي غالط وعندك الحق يابوي في كل كلمة قلتها، وبرجاء????: بس طلبتك هالمره بس برا لبوها وخليه يردهالي، هو قال يروح بوك وخليه يكلمني ونتفاهمو باللهي يابوي هالمره????

عمران، بغضب????: والله ماتعبي خليك هكي زي الكلب باش تحط دماغك في رأسك، ومشي خش لداره وقربع الباب

خالد بعياط????: ليش ديمه أني الغالط، علاش مافيش مره وقفتو معاي تي أي عيله اللي زيكم هكي، تي الواحد يمشي ينتحر ويرتاح ويريحكم معاه

خليل????: قعمز ياخالد وأستغفر ربك، بوي بس معصب وتاعب وكيف واصل من مشوار طويل، توا يهدأ وزيد كلمه 

خالد، بحزن????:أصلا بوك من يومه هكي معاي يدورلي في سبله على أبسط شي يطيح فيا

خيري????: أني من بكري ساكت ومانبيش نتكلم، بس واللهي الغلط فيك ياخالد، تي تمشي وتخلى عيله كلها قالبه عليك الدنيا تي قعدنا لا ليلاً ليل ولا نهاراً نهار

زاهيه، بغضب????: أنت أسكت وضم فمك ياخيري

خيري????: أهو سكتت هذا فاش فالحين أنتم غير فيا أني

زاهيه، بهدوء????: ياخلوده معليشي خليها هاليومين حتي ترتاح وتشد صحتها ومنه توسع خاطرها وغير يرتاح بوك ويهدأ توا إنزيدو نحكو معاه ومايصير إلا اللي تبيه إن شاءالله

خالد تنهدت بحزن????، مافيش حد فاهمني أني نبيها توا، ياسر الأيام اللي فاتت إنحرمت منها ???????? نضت وخشيت للمربوعه وقربعت الباب

زاهيه بحزن????: ياناري عليه هالولد طول عمره وهو شاقي ماأرتاحش بكل

خيري????: هو اللي جايبه لعمره من قاله عليه

زاهيه، بغضب????: مش قلنالك ضم هالفم اللي عندك أنت

خليل????: تبي الحق ياأمي هو غالط خليه يشوف نتيجة أخطائه، وحتى بوي مابعده الحق راجل في عمره مفروض مقعمز ومرتاح مش شاقي في جرتنا

منال بنص عين????: أصلا الراحه في هالحوش راحت من لما خشتله هاللفعه فرح

خليل، بغضب????: منال سكري فمك ومعاش تدخلي في حاجة ماتخصكش، ونوضي حطيلي حاجه نتسممها

خيري????: على أساس هيا اللي وردة مغمضه ياناري، تي ربي يكون في عونك ياخليل على هالحرباء اللي عندك

زاهيه????: تي تحشم ياولد وأستحي على وجهك عيب هاللي تقول فيه

خيري، بعصبيه????: تي الواحد ينوض ويقلب وجهه خير من هالحوش، ناض وطلع وقربع الباب

قصي بخوف????: تي خيرهم كلهم مع البيبان يابابا

خليل????: أسكت ياقصي وأنت لسانك ولا أطول منك

زاهيه، بضحكه????: تي كان تسمعه شن قال اليوم هو اللي فضح كل شي

خليل بصدمه: معقوله !!????

سالم خاش من الباب، بفرحه????: أووووو البكايه عندنا، يامرحب مرحبتين مرحبا????????

فرح، بإبتسامه????: أهلين ياسالم، ونضت سلمت عليه

سالم قعمز: أمتي جيتي؟؟

زينب، بحقد????: جت العشيه، عمي وعمتي مشو جابوها أشبح شني فيه ومايبوش يقولو

سالم، أستغفر الله من هالسوسه هذي، بإبتسامه مستفزه????: حوش بوها وتتفضل في أي وقت، وبعدين كان بوي جابها !! وفيه حاجه ولامافيش أنتي ليش أدخلي في رأسك؟؟

فرح نخصت سالم من جنبه وبهمس: فكنا منها باللهي عليك توا معاش تسكت

زينب????: وأنت خيرك واقفلي على سبله، شفتي ولدك ياعمتي أني والله معاذ نازلتها مادامكم هكي ماتبونيش وتلزو فيا، وناضت طلعت بسرعه وعلى أساس متكنطيه وراقيلها

سالم????: مشيت جدي اللي يسمع يقول ياناري مقطعه روحها بين فوق ولوطه، وهيا بالشهر ماتنزل????

سعده: تي عيب ياسالم مية مره قتلك فكني منها ومن همها وأنت رأسك من رأسها

فرح، بخوف????: ربي يهديك ليش ترد عليها، توا تعاود لصالح وتزيد تكذب من عندها شني يفكنا منه بعدين????

سالم????: والنبي قضي أمهم كلهم، يمشو يشيطو مع بعضهم، وبإبتسامة????: أسمعي والله ميت من الجوع ورأس وخيتي، وبعدين نبو بسبوسه راهو☺ أيواه خلي نستفيدو منك هاليومين????

سعده????: تحشم ياولد اللي يسمع يقول أحني قاطعين عليك المأكله، خلي أختك ترتاح كيف طالعه من العياده اليوم

سالم بصدمه: كيف !!????

فرح، بحزن????: هذا اللي صار ياسالم، وبابا سكر رأسه وجابني معاه

سالم، بحيره????: تي هو كيف يدير هكي الزفت؟؟ وبعدين بوي عنده حق يافرح

فرح????: باللهي ماتزيدنيش حتي أنت ماهو حكيتلك أني الغالطه وبابا مش مصدق، أسمع باللهي أعطيني تليفونك نكلم خالد مادامه ماما في المطبخ

سالم????: تبي الحق حتي أني مش مصدق، وبعدين أنتي وين تليفونك؟

فرح خديت تليفون سالم وخشيت للدار وسكرت الباب بالمفتاح ورنيت على خالد

خالد شفت تليفوني يرن، زفرت بملل????: أستغفر الله شني يبي هالبارد هذا مش راح نرد فكني منه، وبعدين فكرت أنه ممكن فرح يكون فيها شي،  بخوف????: أيوا سالم 

فرح، بحزن????: هذا أني ياخالد

خالد، تنهدت براحه????: أهلين يافرحتي، كيف حالك أنتي كويسه؟؟

فرح، بدموع????: لا ياخالد مش كويسه بابا مش مصدقني وماباش يسمع مني

خالد، بغضب????: معاش تبكي خلاص ماتزيديش إتعبي روحك، ماتخافيش مافيش حد يقدر يأخذك مني كان نخطفك ونهرب أني وياك

فرح مش عارفه شني اللي خلاني نضحك من بين دموعي????: هههه عاد أنت هذا فاش فالح غير في الهروب

خالد، بغضب????: شني اللي يضحك فيك، تتسهوكي عليا باهي يافرح تكبري في حسابك راهو

فرح، بأسف????: مش قصدي أسفه، خيرك معصب أنت

خالد، بحزن????: كيف تبيني إنكون باللهي تي باهي اللي قاعد ماتفجرتش لحد توا، تعبان ياروحي نبيك جنبي????

فرح????: روح عمي وخليل؟

خالد، بغضب????: زيدي تجاهلي أمي يافرح قتلك تعبان نبيك جنبي تسأليلي على عمك روح ولا لا، غذوه جايك وتطلعي معاي غصبآ عن الكل فاهمه وإلا واللهي مايصير طيب

فرح خفت يدير شي وبابا يزيد يسكر رأسه أكثر، أنتي قادره تهديه يافرح تصرفي، بأسف????: أسفه ياحبي والله مش قصدي وأني تعبانه أكثر منك، بس لازم تهدأ مافيش شي ينحل بالعصبيه

خالد، بحزن????: أنتي قادره تهديني بكلمه ليش قلبك قاسي عليا هكي، ماتوقفيش معاهم ضدي حتي أنتي ياروحي، معاش قادر نتحمل ياقلبي راهو☹

فرح وجعني خالد واضح من صوته تعبان هلبا، وحتي أني تعبانه????، بس لازم نصبره ونصبر روحي معاه، بإبتسامه: مستحيل نوقف ضدك، بس أنت ماتتهورش وتستعجل وتزيد تكبر المشكله أكثر، أعطيني يومين بس توا إنزيد إنكلم بابا

خالد بتعب????: علاش كلهم ضدنا ياقلبي، كرهت أمها هالحياة السوده

فرح، بخوف????: معاش تحكي هكي ياخالد، ماتخوفنيش عليك باللهي مش ناقصني أني

خالد ااااف هيا تعبانه وأنت تزيد عليها ياخالد باللي تقول فيه، أبتسمت غصبآ عني: ماتخافيش عليا ياروحي أني زي الجن على قولت خيري مايصيرلي شي

فرح، بدموع????: ماتسيبنيش وتخذلني ياخالد باللهي عليك والله نموت هالمره

خالد????: بعيد السوء عليك ياقلبي، أنتي شني قاعده تقولي والله لو ندفع روحي فداك مستحيل نتخلى عليك يوم لو مهما يصير ومهما يحاولو يبعدونا أنتي ليا أني وبس لو كان أخر يوم في عمري❤

فرح، أبتسمت????: ربي مايحرمني منك إن شاءالله❤ 

خالد، بحب????: ترقديني على صوتك ياعمري تعبان قداش يوم مش راقد، مستاحش نرقد في حضنك????

فرح، بإبتسامه????: سلامتك من التعب، وقعدت نهدرز عليه لين عرفته رقد لما سكت،

اليومين اللي وعدت بيهم خالد ولو أسبوعين،???? وقاعدين على نفس الحالة، خالد جي خمسه مرات وبابا قاعد مسكر رأسه يبي عمي يجيه ويتفاهم معاه، وعلى حسب كلام خالد حتي عمي مسكر رأسه ومتحمش ومش عارف شني بيقول لبابا

خالد بغضب????: نجي غذوة وتطلعي معاي فاهمه، معاش يهمني حد منهم، بأي حق يشدوك عليا هكي أنتي مرتي حتي حرام اللي يديرو فيه علاش يحرمو فينا من بعض

فرح، بحزن????: مانقدرش إندير هكي أنت عارف لو روحت معاك من غير علمهم معناها ننسي شي اسمه أهلي ومانقدرش نكسر كلمة بابا

خالد????: وأني ننحرق يافرح هلبا عليا أنتي وياهم ضدي،

فرح????: أني مش ضدك ياخالد بس مانقدرش نرجع معاك من غير موافقة بابا أفهمني باللهي عليك

خالد????: تي أني ماصدقت تفكيت من ماضيك اللي معرقل حياتنا وإنحل كل شي يطلعلي بوك بهالقصه، تي كيف بنتصرف باهي

فرح إذكرت لوليد، نبي نسأل عليه بس خفت من خالد، بتوتر????: كيف حاله هوا باهي معاش رجعتله الحاله اللي قلت عليها

خالد، بغضب: خايفه على أمه ينعن???? أني قاعد نموت في غيابك وأنتي تفكريلي فيه

فرح خيرني أني زي العبيطه تي غير علاش متكلمه الزفت، بخوف????: والله ماقصدي ياروحي والله معاذ فيه حد يهمني غيرك أنت، باللهي أهدا خلاص، والله مجرد سؤال عادي مانقصد بيه شي

خالد، بغضب????: حتي هوا مانندريش على أمه من يوم المستشفي نتصل بيه مقفل ومشيت لحوش أخته مالقيت حد أشبح وين هجو

فرح????: مرات سافرو من جديد، خلاص هدي شويه ياروحي، كل يوم تكلمني وانت معصب وراقيلك حتي مش كويس ليك هكي

خالد????: تي نار راكبه في أمي شني نهدأ مانهدأ غدوه تكوني عندي غصبآ على الكل، سكري توا وخلي التليفون جنبك شويه نعاودلك، وسكرت من غير مانسمع ردها، وخشيت لحوش بوي وأني مش ناوي على الخير????

فرح في هالأسبوعين، عامر حول لحوشه الجديد وسالم بدي صيانة في الشقه، وجلال روح وبدي يكمل في حوشه، وأخيرا قرر يخطب وقال لأمي إدورله على ذوقها هيا، وأمي فرحانه وناويه تعرسهم مع بعض، وخواتي فاطمه ونورا ليا أسبوعين في حوش أهلي ولا قالو نجو ونشوفو أختنا، نعمه مره مره تكلم فينا، كل واحد لاهي في حاله وناسي الثاني ” الدنيا تلاهي “

خالد خشيت من الباب، وبعياط????: أمي يأمي

خلود????: خيرك خاش تعيط ياخالد شني فيه؟؟

خالد بإستغراب????: أنتي إهنايا !! أمتي جيتي؟؟

خلود????: توا قبل شويه ماهو غدوه طالعين لألمانيا جيت بنشوفكم ونسلم عليكم، بس ماقلتليش خيرك تنادي بصوت عالى إن شاءالله خير 

خالد????: تمشو وتجو بالسلامة ان شاء الله، أسمعي ياخلود مادامك إهنايا باللهي ساعديني نقنع بوي ورأس وخيتي

خلود، بإبتسامه????: حاضر ولايهمك بإذن الله مانروحش لين نتهني عليك

عمران طلع من الدار????: شني قاعدين توشوشو على الباب

خلود، بهمس لخالد: تكلم بالشويه وسايسه ماتخليشي يعصب، وتلفتت لبابا بإبتسامه????: لا شي يابابا غير خالد قعد يسأل فيا على خوله قال لينا فتره ماشفناها، 

زاهيه طلعت من المطبخ بسفرة الشاهي: أي والله وكل مانكلمها تقولي أسامه مش فاضي ياماما، أني نحس فيه حاجه صايره معاهم معقوله من يوم السبوع معاذ شفناها وهيا في نفس منطقتنا، وبعدين عمل شني هذا اللي مايفضاش حتي خمسة دقايق باش يجيبها تشوف أهلها

عمران بغضب????: أيواه نقي على البنت وعبيلها رأسها بالدوه الفاضيه، خليها مادامها كويسه ومتفاهمه هيا وراجلها ماتخشيش بينهم

زاهيه، بعصبيه????: تي شني درت أني مادابيا متهنيين ومرتاحين لكن يجيبها نشوفوها على الأقل مانبوها تبات السنين، حتي ساعه وتروح

خوله خافت النقاش بين بوها وأمها يكبر أكثر ويعصب بوها ومايصيرش من موضوع خالد،???? فتكلمت بسرعه????: ياماما أني توا بنطلع منكم بنخطم نسلم عليها وتوا نقوللها تزوركم، مرات صح أسامه مش فاضي وهيا ماتبيش إدير مشاكل لروحها، صبيلنا شاهي ياماما????

وعم الصمت بين الكل ناض خالد بعد ماأشر لخلود وقعمز في جنب بوه، وناضت خلود قعمزت جنب عمران من الجهة الثانيه

عمران بإستغراب: إن شاءالله خير، شني تتلصقو عليا الصاله واسعه ولا ضاقت عليكم????

خلود، بإبتسامه????: والله يابابا أستاحشنا فرح، مخليه مكانها بينكم

خالد، بحزن????: أمتي يابوي بتحن عليا وتمشي لعمي، راهو ولدك حتي أني ليش كل مره تكسرو بخاطري

خلود، برجاء: ورأسك يابابا طول عمري نعرفك متفهم ومارديتلنا طلب، برا معاه هالمره بس على خاطري????

خالد، برجاء????: والله هالمره وأخر مره، عقلت خلاص معاش ندير شي ورأس أمي

زاهيه بضحكه????: خلي رأسي في مكانه سلم وليدي، أنت والله ماتشعف، وسكتت لما فنصو فيها خالد وخلود مع بعض????????

عمران????: وأنتم الإثنين متفاهمين عليا ولا كيف

خلود????: لا مش هكي يابابا، لكن والله طول الموضوع وعيب حتي قدام أهلها ليها أسبوعين عندهم وماحد مشالها

عمران????: وأني ماشديت حد ولاقلت لحد ماتمشيش أهو راجلها قدامك كلميه يمشي هوا

خالد????: تي رجليا طاحو من المشي وعمي مسكر رأسه يبيك أنت، قالي أنت مانتفاهمش معاك جيبلي بوك

عمران????: ماهو عارفينك عيل ودماغك ربع، أستغفر الله العظيم وخلاص 

خلود تأشر لخالد يهدأ ماتبيشي يتعارك هوا وبوه ومايصير شي، برجاء????: وراسك يابابا برا معليشي فرح ماقصرتش معانا كلنا حتي على خاطرها هيا

عمران: يستر الله، يصير خير إن شاءالله 

خالد، بعصبيه????: شني يستر الله يابوي غدوه تمشي راهو

عمران نط فيه بغضب????: يستر الله إمالا مني بيستر، ساسي ومتشرط راهو كان مشيت على خاطر فرح مش على خاطرك

خلود بخوف????: خلاص يابابا هدي روحك، خالد مش قصده غير متوتر من الموضوع لأنه طول بس، وقعدت تأشر لخالد تبيه يطلع خايفاته بعصبيته يخرب كل شي????

خالد نضت خشيت للمربوعه وإتصلت بفرح وهدرزنا شويه وماقلتلهاش على اللي صار خفت بوي يغير رأيه مانبيش نعطيها أمل على الفاضي

ثاني يوم العشيه

جلال: فرح ديري قهوه بسرعه عمك في المربوعه

فرح إنصدمت???? معقوله وعلاش خالد مقاليش: باهي باهي

خالد بغضب????: وين أمشي بوي ياأمي مش على أساس بنمشو لأهل فرح اليوم

زاهيه: والله ماقال وين ماشي قال طالع شويه وجاي

خالد، بغضب????: الزفت من الصبح وأني نتبع فيه مانبيشي يغيب عن عيني، طلعت دقيقتين نرجع نلقاه مختفي، خشيت للمربوعه وقربعت الباب أتصلت بفرح طلع خارج التغطيه، زفرت بغضب????: حتي أم التغطيه واقفه ضدي، بديت نخرط ماتلومونيش???? ( كنت نكلم في فرح على تليفون أمها ولا سالم )

عمران، بإبتسامه????: والله هذا اللي صار ياشيخ علي، والموضوع مش مستاهل راهو، وولدي الغالط أني عارفه من يوم يومه رأسه مسكر ومايسمع لحد الله غالب ، ومايهمكش فيه الأيام اللي فاتو تأدب وبإذن الله يحرم يعاود صنعته من جديد

علي: أني والله ماعندي شك لافيك ولافيه، بس حط روحك في مكاني أني بو ونخاف على بنتي والوقت هذا معاش يطمن وأنت شايف القصص اللي قاعدين نسمعو فيها كل يوم، اللي قتل مرته واللي يعذب فيها، واللي واللي واللي وهلبا قصص، وأني اللي خلاني نزيد إنشك سكوت فرح وكذبها عليا المره الأولى وسكوتها في العمله هذي وحتي لما مرضت ماقالت????

عمران????: والله بنتك بنت أصل ومتربيه عز التربيه ومافيش مره قصرت معانا ولاشفنا منها العيبه، وأني جايك اليوم وطالبك وإن شاءالله ماتردني، تخليها تروح معاي 

علي خش داخل: فرح تعالي شويه نبيك، وخش للدار وفرح وراه وسكر الباب

فرح، بتوتر????: نعم يابابا

علي أشر لفرح تقعمز قدامه: يابنتي اللي درته كله على خاطرك نبيك يكون ليك قدر وهيبه قدام الكل ومافيش حد يقدر يتجرأ ويغلط فيك مره ثانيه

عمك جي وتأسف على اللي صار وطالبك تروحي معاه وترجعي لحوشك وراجلك أنتي شني قولك

فرح بنقز من الفرحه???? وأخيرا هالموضوع إنحل بس تحشمت من بابا ونزلت رأسي لوطه، بفرحه☺: القول قولك يابابا اللي تشوفه صح ديره

علي بإبتسامه????: معناه وتي روحك وأطلعي مع عمك، بس أسمعيني يابنتي عمرك ماتنسي أنه عندك عيله ولو شني ماصار مستحيل يوقفو ضدك، وياريت معاذ تكذبي ولا تغطي على حد أنتي واخذك زوجه مش لعبه وتأكدي لو شني ماصار حوش بوك مفتوح ومستحيل يتسكر في وجهك، بس يابنتي ردي بالك تنزلي من قدرك ولا إذلي روحك لحد مهما كان يكون

خالد أستنيت بوي وماجاش، وتليفون أم فرح قاعد خارج التغطيه، قلت نطلع إندير دوره على حوش أخت وليد بالك نلقا حد ونسأله على وليد اللي شاغلني عليه حتي هوا

بس أول ماخشيت للشارع تفاجأت من الزحمه وصوت العياط والدوشه اللي صايره في الشارع????????

فرح طلعت مع عمي ووصلنا للحوش ولاقتنا عمتي في الباب

زاهيه بفرحه☺: أهلين يابنيتي نورتي وأنستي، معقوله ياحاج خيرك ماقلت مخلي الولد على نار مسكين من بكري وهو يزازي ويستني فيك

فرح، بإبتسامه: أهلين بيك ياعمتي 

عمران: مش لازم كل شي تعرفوه، وينه خالد هوا

زاهيه: طلع إمبكري شويه ويجي أكيد، ولا توا نتصل بيه نفرحه ☺

فرح إتصلت عمتي بخالد كم مره بس ماردش، إبتسمت????: عادي ياعمتي مرات نازل وناسي التليفون في السياره ديمه يدير فيها، توا يشوف مكالماتك يعاود

خالد ركبت السياره وأني حاس الدنيا مظلمه في وجهي وهموم الدنيا على أكتافي سبحان الله زي الحلم، وحطيت رأسي على الدومان ونزلو دموعي وأني نذكر في الموقف اللي صار قبل شويه 

Flashback 

خالد خشيت للشارع وتفاجأت بالزحمه والدوشه اللي صايره قدمت وشفت نور الدين متكي على الحيط وشاد رأسه بإيديه، درست السيارة ونزلت بسرعه

خالد قربت من نورالدين، وبخوف????: خير يانورالدين شني صاير !! ووين وليد ليا أيام نتصل بيه ماحصلته، وجيت كم مره للحوش مالقيت حد 

نورالدين نزل رأسه بأسف????: وليد عطاك عمره ياخالد

خالد بصدمه????: كيف !! أنت شني تقول !! بطل من غير براده

نور الدين، بحزن????: الله غالب هذا حد عمره

خالد ملامح نور الدين ماتوحيش أنه يكذب أو يبصر، وبعدين زحمة الناس وصوت العياط اللي طالع من داخل دليل على اللي قاله، قعدت في دوامه ماقدرتش نستوعب الخبر، نشوف للكل اللي واقفين واللي يتهامسو بإستغراب????

تلفتت لنورالدين وقعدت نهز فيه بقوتي كلها، وبغضب????: تي قولي نكذب نبصر عليك، تي كيف يموت هكي كيف من إسبوعين ماكان فيه شي، وعيطت بأعلى صوتي: لاااااااااااااااااا يارفيقي لا كيف يمشي ويخليني، هوا مازال صغير ماشاف شي من هالدنيا، ليش تأخذه ياربي ليش، وطحت لوطه على ركابي لما إنهارت كل قوتي????

نورالدين، بحزن????: وحد الله ياخالد، كلنا ليها ربي يرحمه ويغفرله 

خالد، بإنهيار وبكي????: تي كيف صار هكي كيف !! تي كان معاي مافيه شيء 

نورالدين، بحزن????: ليه فتره تعبان بس هوا كان مدرق وماباش يقول لحد ولا عالج، لين تمكن فيه ومات بعد أول جرعه كانت قويه وماتحملهاش

خالد، ببكاء????: ليش ماقالش ليش يضيع روحه هكي؟؟

نورالدين، بحزن????: الله غالب حتي أني ماسمعتش إلا لما رفعناه لتونس بعد الحادث، الدكتور قال أنه حجم الكتله اللي في رأسه كبر هلبا وهذا سبب الحاله اللي تصير معاه لما معاش يقدر يشوف

خالد حسيت بالذنب لأني لما قالتلي أخته على الكتله وأني فكرتها شي عادي ولهيت ونسيت الموضوع، بأسف وبكي????????: سامحني يارفيقي سامحني، وقعدت نشوف لنورالدين، برجاء????: باللهي مات حق يانوري والله مامصدق كان يقولي معاك على الموت يارفيقي كيف يموت قبلي ويخليني كيف????

نورالدين، بحزن????: الله غالب ياخالد هذا حد يومه، أدعيله بس

خالد بكيت وعيطت لين فشلت وقاعد مش مصدق ومره مره نسأل نورالدين ولا حد من الموجودين????: باللهي هو مات حق ولا تكذبو، ونرجع ننهار من أول وجديد لما إياكدولي الخبر????

Now

خالد قمت رأسي لما سمعت تليفوني يرن أمي، بتعب????: نعم ياأمي ! شني فيه ! خيره شني يبي؟ باهي أهو شويه وجاي????، ولعت سيارتي وطلعت وأني مكسور ومقهور على رفيقي اللي راح وهو في عز عمره ومالحقش يفرح ولا يتهني بشيء، تنهدت ونزلت دموعي: ربي يرحمك ويغفرلك ياوليد????????

خيري، بضحكه: والله يافرح أنتي طلعتي من هني وهوا لبسوه العفاريت السبعه من هني، هو من قبل زي الجن وزادت تخلطت عليه الحكايه????

عمران: تحشم ياخيري، وتلفت لزاهيه وينه ولدك لتوا مش كلمتيه 

زاهيه، بإبتسامه: أي كلمته لكن ماقلتلاش فرح روحت، قتله يبيك بوك وخلاص

خيري، بضحكه????: أحسن خلي إنوض نسكر الباب بالقفل باش مايخشش فجأة????

عمران????: مش عارف أمتي بدير عقل وبتكبر

خيري????: توا لما يجي أفتحي أنتي يافرح خلي إنشوفوه شني بيدير????

خالد وصلت للحوش وظهري مكسور اللي صار لاكان في البال ولا في الحسبان، فجأة هكي سبحان الله زي الحلم????، دخلت المفتاح في الباب وتفاجأت???? لما ماباش يفتح، بعصبيه????: ناقص أمي أني حتي البيبان واخدين فيا حصه، وفتحت فمي بصدمه لما إنفتح الباب وشفت اللي واقفه قدامي، لا أكيد تتخيل أنت الأيام هذي مش طبيعي، قعدت نسكر في عيوني ونفتح لو كانت خيال راهو أختفي بس هذي قاعده، قربت ومديت إيدي نبي نتلمسها حقيقه ولا لا بس قعدت تابت زي العرصه لما…..

فرح فتحت الباب وإبتسمت???? على منظر خالد اللي واقف مصدوم ومش مصدق وهو يرمش في عيونه، قعدت واقفه وساكته، بس سخفني شكله ضاعف هلبا وعيونه حمر وحتي ملامحه باهته، سكرت الباب وقدمت بسرعه حضنته????: إستاحشتك ياحبي❤

خالد، بصدمه????: يعني أنتي حق مانحلمش أني؟؟

فرح بعدت شويه، وبإبتسامة☺: شوفيني أهو قدامك، لا ماتحلمش ياعمري

خالد جبدتها في حضني، وإنهرت بالبكي????، حالتي وقتها لاتوصف كل المشاعر تلخطت عليا، حزن وفرح، قهر وحسره، سعاده وتعاسه، ضحك وبكي، 

معاش عرفت نبكي ونحزن على رفيقي اللي راح???? ولا نفرح ونضحك على فرح اللي ردتلي☺، كيف بنقوللها كيف بنوصلها الخبر، كيف راح يكون موقفها????، ياربي ليش مافيش مره فرحتي تكمل????

فرح إستغربت???? من بكي خالد وإنهياره وهوا حاضني، حسيته زودها شويه في ردة فعله، معقوله هذا كله على خاطري، سحبت روحي منه، وقعدت نشوفله بتعجب????: خالد خيرك ليش هالدراما هذي كلها، ماتوقعتش ردة فعلك هكي أوفرتها بصراحه????

خالد ماقدرتش نشوف لعيونها ولا نقيم رأسي ليها، بس لازم تتكلم ياخالد، راح تسمع توا ولابعدين الأحسن تسمع منك أنت أحسن، بحزن????: فرح تعالي نقعمزو في الجنان شويه

فرح مشيت وراء خالد وأني مستغربه في حركاته وحالته واضح مش طبيعي وفيه شي، يارب إن شاءالله خير، معاش عندي طاقه نتحمل أي شي، تكلمت بسرعه وخوف????: خالد شني فيه تكلم بسرعه باللهي عليك

“” أيها الحزن….

رفقاً بقلوبنا فهي لم تعد تحتمل أكثر “”

خالد قدمت وشديت إيديها، وبحزن????: الموت حق علينا كلنا ياروحي، والبقاء لله وحده، واللي وسكتت لما قصت عليا فرح????

فرح بخوف????: شني هالمقدمه ياخالد تكلم بسرعه قولي في مني !! ونزلو دموعي????

خالد قويني وقويها ياربي، وبدموع????: في ماضيك ورفيقي يافرح

فرح زفرت براحه لما ماقالش واحد من أهلي، بس شني قصده بماضيك !! وتجمدت لما قال رفيقي، برجاء????: لا ياخالد باللهي ماتقولهاش، ورأس أمك وبوك ماتقولها

خالد، بدموع????: البقاء لله ياروحي

فرح نزلت من الكرسي زحف وقعمزت قدام خالد، وبرجاء: باللهي ياخالد قول أي حد ثاني باللهي ياخالد قول أي حد أي حد إلا هوا ورأسك، ماتكسرنيش فيه ياربي????

خالد نزلت لمستواها وخذيتها في حضني، وبدموع: كسرتنا وحده يافرحته

فرح وقتها بس حسيت أنه وليد هوا قلبي فعلا، وهذا وين إنكسرت كسر صعب جبره، الموت حاره وبالأخص لما يكون هالشخص هو أول أسباب فرحك في هالحياة، عيطت بقهر وحسره: لا ياربي لا ليش هو ليش

خالد لا عرفت نصبر فرح ولا نصبر روحي، خليت فرح اللي مقعمزه تندب وتعيط، ووقفت لما طلعو أهلي يتجارو لما سمعو العياط، ومديت أيدي قدام أمي لما قدمت لفرح، بدموع: خلوها ماحد يقربها

عمران، بخوف: شني صار خيركم شني جاكم؟؟

زاهيه، بخوف: تكلم ياولدي في مني هالمصيبه تكلم !!

خيري، بصدمه من حالة فرح اللي تخبط وتعيط: إن شاءالله غير مش في حد من أهلها

خالد إتكيت على الحيط ونزلو دموعي، شني بنجاوبهم !! شني بنقول !! كيف بنبرر هالموقف !!

 مانعرفش كم إستمرينا على هالوضع فرح اللي تعيط وحالتها تصعب على الكافر، ولا أهلي اللي مابطلوش أسئلة، ولا أني وحزني وحيرتي على الموقف اللي إنحطيت فيه، لحد ماعيطت أمي

زاهيه، بعياط: ألحقوني المرأه بتموت

خالد نضت بسرعه لفرح اللي معاش قادره تتنفس، قمتها في غمري وطرت بسرعه مخلي وراى أهلي اللي بتأكلهم الحيره من الموقف اللي صار

مرت ليلة مظلمه وكئيبه وطويله عليا فقدت فيها شخص من أعز الناس على قلبي، وليد ماكانش بس صاحبي كانت أعز حتي من خوتي هو الوحيد اللي وقف معاي في الوقت اللي حتي أهلى وقفو ضدي، جرحي كبير وكسرتي أكبر من فقدت وليد، ولا من منظر فرح اللي كل ماتفيق تعيط وتنهار أكثر ويطرو يعطوها إبرة مهدئ????????

ثاني يوم

خالد خليت فرح راقده بعد ماعطوها أبرة مهدئ، وطلعت ماشي للجنازة، ماكانش فيه هلبا ناس أشخاص معدودين، محرها وقت تنزل غاليك وتحطه في هذيكا الحفره وبإيدك تحط التراب عليه

خالد تمت الجنازة وإستأذنت منهم ورجعت لفرح في  العياده، أول ماخشيت شفت فرح مقعمزه على السرير وتبكي بهدوء????

فرح، ببكي: دفنتوه خلاص، حطيتو عليه التراب، كيف طاوعكم قلبكم هكي إديرو فيه????

خالد قربت وخديتها في حضني، بدموع????: البقاء لله، سلامتك أنتي ياروحي، وحدي الله يافرح هذا حد يومه، هو تعذب وتحمل وقعد ساكت، أدعيله ربي يتقبله برحمته

فرح، بإنهيار: معناها كان عارف ياخالد

 أصلا بروحي أستغربت كيف يتخلي عليا هكي حتي بعد ماخيرته، ماكانش يبي يعلقني فيه أكثر وهو عارف أيامه معدوده، ضحي بروحه على خاطر مايبكينيش ويقهرني عليه، ليش دار هكي ليش،

عادي كنت راضيه يخذلني ويكسر قلبي مليون مره بس مايموتش، علاش ياربي تأخذه هو قاعد صغير، ليش تكسرني فيه

آآآآآآه ياقلبي آآآآآآه ????????

توقعتها ماتصير لكن صارت

عزيز يندفن روحه على توارت 

نحساب أن والله مايعزوني

ومانحسب نا تنزل دموع عيوني

لا كأينه في البال ناس يجوني

يقولو غلاك اليوم روحه طارت

توقعتها ماتصير لكن صارت

عزيز يندفن روحه على توارت 

نحساب أنا والله مانجربها

فقدت عزيز ودمعتي نسكبها

ومانحساب نار الفقد نا نقربها 

لكن الله غالب الموت إختارت 

توقعتها ماتصير لكن صارت

عزيز يندفن روحه على توارت 

زاهيه، بخوف????: فرح وينها ياخالد !! كيف حالها؟ شني اللي صارلها ؟؟ من إمبارح وأني نتصل بيك نبي نطمن عليها تليفونك مقفل

 خالد، بحزن????: فرح كويسه ياأمي باللهي اللي صار إمبارح مايطلع لحد ويقعد بينا، أحني الليله طالعين لمصر نبو نرتاحو شويه

عمران بغضب????: تي فهمنا شني اللي صاير !! كيف فجأة هكي تقول طالع لمصر

خالد، بحزن????: ورأسك يابوي راهو حيلي منهد وماعندي جهد إناقش ولا نجادل حد، أني ومرتي مسافرين نبو نرتاحو شويه ونغيرو جو شني صار يعني، ووقفت، هيا بسلامتكم توا

زاهيه، تنهدت بأسف????: توصلو بالسلامة ياوليدي

عمران، بغضب????: عاجبك تصرفاته هالولد بيجلطني باللي يدير فيه، الصبر ياربي الصبر

خيري خش ومستغرب????: خيره خالد طالع ومايشبح في حد قدامه نكلم فيه ومايردش 

عمران: خوك هذا هبل خلاص دماغه هرب مسكين

خيري قعمز وتنهد????: قبل بنقوله على صاحبه وليد ياناري توفي أشبح سمع بيه ولا لا

عمران،بإستغراب????: لا حول ولا قوة الا بالله إنا لله وإنا اليه راجعون، خيره شني سبب الوفاة

خيري، بحزن????: قالو عنده المرض في الدماغ( اللهم ماعافينا وإياكم )

خالد سافرنا لمصر في نفس الليله كل همي كان نبعد فرح من أهنايا فتره لين تهدأ وتتحسن شويه وتتقبل الصدمه مانبيش حد يعرف أو يفهم شي وتكثر الدوه ونخسر كل شي

فرح قعدت إسبوع وأني حالتي كل يوم في الزايد دموعي ماوقفوش نهائي حتي وأني راقده نحلم بيه وإنوض مفزوعه ودموعي على خدي، قعدت باليومين والثلاثه مانطقتش حرف ولا ناكل ولا نشرب، لدرجة أهلي ماقدرتش نكملهم كان خالد يبعتلهم في رسايل على أساس أني ويقوللهم أنه سعر المكالمات غاليه أهنايا

واجعني خالد اللي تعذب معاي وماسبينيش ولا لحظه، بس الحاله اللي أني فيها مش بإيدي، الموت أعظم مصيبه ممكن تصيب المؤمن، وواعره هلبا تفقد جزء من روحك، شعور الفقد واعر هلبا ماحدش راح يفهمني أو يحس بيا اللي جرب هالشعور????????

خالد لما يأست من تحسن فرح إطريت نرفعها لدكتور أمراض نفسيه، والحمد لله من 5 جلسة بدي في تغير ملحوظ، اليوم سكرنا شهر في مصر وعمي بعتلي رسالة بأن عرس خوت فرح الأسبوع الجاي ولازم نروحو باش نحضرو العرس

خالد، بإبتسامه????: ها ياروحي شن رأيك نحجزو غدوه

فرح????: عادي على راحتك

خالد بإبتسامه????: لا على راحتك أنتي ياقلبي، ماتبيش تحضري عرس خوتك

فرح????: عادي كله زي بعضه نحضر ولا مانحضرش مافيش فرق

خالد تنهدت بقهر هذي حالة فرح صح تحسنت على لما جينا بس مرجعتش فرح الأولي????

حجزت ثاني يوم ورجعنا يوم الأحد وفرح طلبت نحطها في حوش أهلها على طول

أمينه، بصدمه????: معقولة!! هذا كله صار!! ماتقوليش خالد صبر عليك شهر ياناري

فرح????: تي أي شهر، من لما تزوجنا وهو صابر، خالد ماقربش عليا بكل ياأمينه

أمينه????: حيييييي من غير كذب !! معقوله قريب تسكرو سنة متزوجين راهو، كيف هكي ؟؟

فرح نزلت رأسي، بأسف????: أني اللي مانبيش وهو ماغصبنيش على شي

أمينه بصدمه????: كيف إديري هكي يافرح حرام عليك راهو، فاهمين أنك تحبي وليد بس خالد شن ذنبه تظلميه هكي، حتي ربي مايرضاش بيه اللي درتيه، راهو الملائكه قاعده تلعن فيك كل ثانيه

فرح خفت من كلام أمينه زعما حق يلحقني الذنب مني اللي درته في خالد، بخوف????: أنتي شفتي على عينك ماأرتحتش بكل من حاجه لحاجه، كل مانقول خلاص ارتحت ونبي نقرب منه يصير شي يعرقل الموضوع 

أمينه????:  أسمعي يافرح والله لو واحد ثاني راهو لوحك قداش ليه مش ملزوم يتحمل نزواتك هو راجل وليه حقوق عليك غلط اللي قاعده إديري فيه، واضح من صبره عليك أنه يحبك هلبا وشاريك ماتخسريشي باأنانيتك يافرح وليد مات خلاص أني مش راح نقولك أنسيه أو طلعيه من قلبك بس أعطي لروحك ولخالد فرصه أنكم تعيشو وترتاحو، مافيش حد يموت على حد يافرح، أرتاحي توا أكيد تاعبه وفكري في كلامي كويس

فرح فعلا كنت تعبانه بس ماقدرتش نغفي لحظه وكلام أمينه قاعد يدور في عقلي، أني من أول يوم مع خالد وأني حاسه بالذنب إتجاهه بس كل مره نحاول نصلح اللي بينا يصير شي ويخرب علينا، 

فعلا خالد مايتعوضش فكرة أني نفقده أو يتخلى عليا في يوم من الأيام تخوفني وتخلى جسمي يرجف، يارب قدرني ونقدر نتخطي هالحاجز اللي داخلي????????

بعد مرور ثلاثة سنوات

خالد مر وقت طويل وتغيرت فيه هلبا حاجات

                 ( خلود وعماد )

عماد دار العمليه وتعب هلبا وقضي فترة علاج طبيعي طويله هلبا ومتعبه، بس اللي كان مهون عليه وجود خلود في حياته كانت سانداته وتدعم فيه ديمه ومافيش مره قالت تعبت أو مليت

 رجع عماد يمشي على رجليه من اول وجديد، وحياته هو وخلود من أحسن مايكون وجابو ولد زي العسل إلياس عمره 4شهور 

عماد مثال للراجل المناسب اللي تتمناه كل أنثي حنون ومتفهم ومتواضع ومتصالح مع الكل

وخلود مثال للمرأة الأصيله اللي وقفت في ظهر زوجها وسنداته وحاولت على قد ماتقدر أنها تكون قوته في ضعفه 

                   ( خوله وأسامه )

خوله حرجت مره وإثنين وثلاثه بس كل مره بوي يرجعها بحجة أنه مافيش سبب كافي يخليها تحرج 

وهيا ماقدرتش تحكي السبب الأساسي، إتحملت وصبرت خوفا من بوي ومن نظرة المجتمع للمطلقة 

بس الفتره الأخيرة تقول أنه أسامه قاعد يتغير للأفضل بالأخص بعد زادت عليهم بنت وسموها نور وعمرها سنه

أسامه من الأشخاص المتشددين عقليا يميل للعنف في أغلب الأحيان مايحبش يوري لحد ضعفه وإستسلامه ديمه يحاول يتصنع القوة والجبروت بس أكيد لابد أنه يلين شويه مع المواقف والعشره

خوله إنسانه مغروره ومتسلطه بنوعها بس بعد زواجها من أسامه إطرت أنها تتنازل عن هلبا حاجات وأولها شخصيتها المتكبره وصبرت وتحملت أو خلينا نقولو تعودت وتحاول تتعايش مع الواقع

                ( خليل ومنال )

خليل من النوعيه الهاديه وهذا اللي مخلي زواجه من منال مستمر لهالحظه متحملها رغم حقدها وأنانيتها، وزاد عليهم ولد ثاني، توا عندهم قصي وعدي

                     ( خليل )

شخص فكاهي من الدرجه الأولي ومش إمدير حساب للدنيا، عايش كل يوم بيومه، من فتره خطب ندى أخت وليد الله يرحمه، شافها مره وعجباته وتقدملها، بس بوي قاعد مايبيش يزوجه، على كلامه لين يدير عقله في رأسه ????

فرح وحتي أحني تغيرو عندنا هلبا حاجات 

                     ( سالم ورغد )

علاقتهم جباره بصراحه رغم كل اللي صار معاهم واللي عاشوه وحرمانهم من بعض سنين طويله، وأخيرا أجتمعو في بيت واحد وبالحلال، وعندهم زوز بنات سجي وساجده 

                  ( عامر وسناء )

عايشيين حياتهم ومرتاحين ومتهنيين وعامر فرحان بصغار سناء ويحبهم يمكن لو صغاره من دمه ولحمه مش راح يحبهم هكي، قصتهم إمتثال لقول الله (وعسي أن تكرهو شيئا وهو خيرا لكم)

                  ( جلال وأميره )

جلال هالشخص المتسلط المشكاك وأخيرا هدي وألتزم بحوش وعيله، وأميره بنت جيرانا قدرت تجيبه للطريق، وعندهم ولد وبنت هبه وأحمد

                   ( صالح وزينب )

أكثر واحدين قاعدين على حالهم وزينب قاعد تجري وماتدري على الصغار بس ربك قاعد مارزقهمش من غير شهد اللي عمرها توا 10 سنوات، ربي يرزقهم ويرزق كل محروم????

خالد أكيد كلكم تسألو شن صار بيني أني وفرح، للأسف أطلقنا????????

فرح يابارد???? ليش تكذب معاش تفاول هالفال الباهي????

خالد تي خليني نرعشهم شويه????

فرح ياسر أني اللي مرعشني بعمايلك ديمه???? وحرمتني من العرس اليوم☹

 اليوم عرس علاء ولد عمتي على هاجر بنت عمه سبحان الله ليهم أكثر من 4 سنوات مخطوبين وكل مايحددو موعد العرس يموت حد من أقاربهم ويطرو يأجلو، طبعا السيد خالد ماخلانيش نمشي للعرس????????

خالد لا محلاني ومخليك ماشيه لعرس واحد كان يبيك من قبل، هني روحك ياماما????

فرح تي كان نعرف مني إمقايلك بس أنه كان يبيني????

خالد أني نعرف كل شي يخصك ياقلبي ياروحي أنتي????❤( طبعا عرفت انه علاء ولد عمتها اللي كان يبيها لما إذكرت عركتها هيا ووليد على خاطره من قبل)

فرح☺ خلاص بطل يابارد تعالا نحكولهم شني اللي صار

Flashback 

فرح روحت مع خالد يوم السبت بعد كملنا عرس سالم وجلال، طول الطريق وكلام أمينه يتردد في دماغي

أمينه: أسمعيني يافرح والله أني تهمني مصلحتك، خلاص الماضي راح ومعاش يرجع ليش تظلمي في روحك وفي خالد معاك، أنسي يافرح ولاماتنسيش بس ديري روحك تتناسي، أعطي فرصه لقلبك يتنفس من جديد، حرام إضيعي خالد من إيدك اللي زيه مستحيل يتعوض، شغلي دماغك وبطلي هبال

خالد، بمزح: اللي واخذ عقلك????

فرح، بإبتسامه????: تتهني إن شاءالله 

خالد، بإستغراب????: أني قصدك؟؟

فرح، بإبتسامه????: أي أنت ليش عيب ولا حرام ولا ممنوع مثلا نفكر فيك????

خالد، بفرحه: لا ياقلبي لا عيب ولا حرام ولا ممنوع ليش تتعصبي بس، مديت إيدي وشديت إيدها وبستها، وبحب: والله ياروحي متمني أنك ترجعيلي زي قبل تهدرزي وتضحكي وتبصري، والله حياتي مظلمه من غير ضحكتك

فرح بضحكه????: بطل براده وأنتبه قدامك مازال مانبيش نموت

خالد معاش عرفت نفرح ولا كيف إندير، إبتسامتي مافارقتش وجهي طول الطريق لين وصلنا وأخيرا فرح وجهها يضحك من جديد????

خالد كنت مقعمز إندخن في الجنان، تلفت لفرح اللي واقفه في فم الباب وتنادي، بعصبيه: تي كيف تطلعي هكي خشي ألبسي حاجه الجو مصقع توا تمرضي

فرح، بإبتسامه: باهي تعالا شويه نبيك ولوح اللي في إيدك

خالد تنهدت بملل ونضت بسرعه، ودفيت فرح الداخل، وبعصبيه: تي خشي ياهمي الجو مصقع، علاش ماتهتميش بروحك قداش بنقعد في جرتك أني

فرح هذي فرصتك يافرح، قدمت من خالد وحضنته، وبدموع: ممكن معاش تعيط عليا وبعدين أني مانبيش نهتم بروحي نبيك أنت تهتم بيا

خالد معاش قدرت نتكلم لفيت إيديا عليها وحضنتها بقوة، وذبت مع الريحه اللي حاطتها ????أول مره نشمها عليها????، إستاحشتها وكل عرق في جسمي قاعد ينبض يبيها، بس خايف تصدني زي كل مره هذا ليش مخليها هيا اللي تبادر

فرح لما خالد ماتكلمش حاولت نبعد، وبدموع????: ماعجبكش كلامي ماتبيش تهتم بيا مليت مني

خالد مديت إيدي ومسحت دموعها، وبحب❤: ليش هالدموع ياعويناتي، مستحيل نمل منك ياقلبي، في حد عنده طفلة حلوه زيك ومايهتمش بيها????

فرح، بحزن????: باهي ليش تعيط وتعصب عليا

خالد بست على جبينها???? وحضنتها من جديد، بحب❤: أسفه ياقلبي بس والله كله لمصلحتك، معاش نبي نشوفك تعبانه أو مريضه ثاني

فرح، بإبتسامه????: باهي ممكن نحضرو فيلم مع بعض

خالد، بفرحه☺: أكيد ممكن ياروحي، هو أني نطول شي معاك ونقول لا

فرح كنا مقعمزين ومنسجمين مع الفيلم لحد ماوصلت رسالة لتليفون خالد فتحها وإبتسم وسكر التليفون وحطه جنبه، بدي الفار يلعب في عبي????

قربت وأتكيت على رجل خالد، وبإبتسامة????: مني باعتلك مسج في هالوقت

خالد هذي على شني ناويه الليله تصرفاتها غريبه كيف نقدر نقاومها، بحب❤: واحد معاي في العمل ياحبي

فرح زعما حقه ولا يكذب، بتوتر????: خالد حبيت من قبل مافيش مره حكيتلي شي

خالد عادي ماأترش فيا السؤال????: يعني قصه قديمه وأنتهت من زمان مافيش داعي نحكي فيها

فرح، بخوف????: حبيت مره واحده ولا هلبا????

خالد هذي لشني تبي توصل بالضبط، بإبتسامه????: هلبا ياقلبي، ولما شفت ملامحها اللي تغيرو للغضب، بضحكه????: بس الهلبا هاذم كلهم أنتي حبيتك بمليون طريقه❤

فرح أبتسمت???? على كلامه، زعما نسأل على التعليقه ولا لا، تي شني قاعده تقولي يافرح مش هكي المفروض تتصرفي، باهي كيف بندير إمالا????، قعمزت بسرعه وشديت لخالد أيده، بتوتر????: ممكن نسأل سؤال؟

خالد مش طبيعيه رسمي ديمه لما تكون عند أهلها وتروح هذا حالها لين نشك أنهم بدلوهالي????، تلفتت وقعمزت مقابلها، وبإبتسامة????: تفضلي أسالي ياعمري

فرح، بتوتر: أنت تحبني أو لا؟ ????‍♀️ تي مش هكي ياهبله????

خالد إمالا توا شني كنت إنقول أني????، معليشي عاود ياخالد هما هكي يبو حد يسايرهم على قد عقلهم????، بحب❤: نحبك هذي كلمة قديمه أني نعشقك، وقربت وبستها من خدها???? بصراحه منظرها بالتوته الورديه اللي لابستها لايقاوم????

فرح، بتوتر????: باهي ليش ماقربتش……..وسكتت تحشمت ونزلت رأسي لوطه 

خالد هذي شني تقول شني تقصد؟؟ معقوله !! مديت إيدي ورفعتلها رأسها فوق، وبحب❤: روحي أنتي تبي هالشيء، متأكده؟؟

فرح، بخوف????: علاش أنت ماتبيش؟؟

خالد، بفرحه☺: لا ياعمري أكيد نبي ونبي ونبي وهلبا مش شويه????، بس مانبيش نجبرك على شي????

فرح، بإبتسامه????: ومني قال أنك راح تجبرني؟؟

خالد قدمت وشديت وجهها بين إيديا، تصدقو عيوني دمعو من الفرحه???? تعبت هلبا على خاطر هاللحظه هذي، بفرحه☺: متأكده ياقلبي أنك راضيه❤

فرح إبتسمت وهزيت رأسي بالإيجاب????

خالد حضنتها بحب ولهفه وشوق????، بس بعدتها بسرعه، ونضت وقفت: خليك في مكانك ماتتحركيش 

فرح مديت أيدي وشديت أيده، بخوف????: وين ماشي

خالد: بنطلع نعيط ونجي، لازم نفرغ من الطاقه اللي عندي شويه باش مانضركش????????

فرح مسكت إيده: باللهي قعمز بلا هبال نخش نرقد راهو????

خالد رجعت في لمح البصر قعمزت قدامها، ????: وين ترقدي ياقلبي أني ماصدقت حنيتي عليا، معاش فيه نوم من الليله خلاص????

فرح ضحكت بصوت عالى على ملامح وجهه اللي مستحيل حد يفسرها، فرحان ومش عارف كيف يتصرف، وتحركت بسرعه وخديت تليفونه فضولي بيقتلني نبي نعرف مني اللي بعتله الرساله????

خالد????: لا إلا الضحكه هذي، بتبدي اللعب شكلك وقربت وبستها بحب ولهفه???? وحتي وهيا بين أيديا قاعد مش مصدق أنها خلاص بعد كل هالتعب ولت ليا❤❤

Now

فرح وهكي كانت أول ليله لينا❤❤

خالد أحلي ليلة في عمري والله❤، فعلا متعة الشي اللي تتعب على خاطره أحلى بهلبا من الشي اللي يجيك بالساهل❤????

فرح ????وليش باقي الليالي مش حلوات ولا مش عاجبينك????

خالد لا ياقلبي مش قصدي، والله العمر كله جنبك جنة❤، بس ياحبي ديمه البدايات ليها طعم مختلف???? شن نرأيك نوريك توا الطعم المختلف????

فرح لاتوريني ولانوريك أقعد فيها????

خالد تي غير تعالي ياحبي ليش زعلتي????

فرح شوف كلامك وتوا تعرف ليش زعلت????

خالد باللهي كلامي فيه شي يزعل، باهي خلاص ياقلبي أني أسف عارفتيني مانحبكش تزعلي،???? مانبيش تمر علينا دقيقه واحده وأنتي زعلانه مني????

فرح ربي يخليك ليا❤، بس أستني نبي نقول شي، ماحدش يفكر أني نسيت وليد أبدا الحب الأول مستحيل حد يقدر يأخذ مكانه أو يمحيه، بس خالد فعلا ملئ عليا حياتي خلاني مانقدرش نفكر في غيره 

“” رأيت فيك كل ماأريد.. كل ماأحتاج.. كل ماأحب..! وأحيانا مالا أطيق.. وهكذا أحببتك “”

خالد???? أحم أحم راهو أني قاعد أحترميني شويه

فرح ولأني محترماتك ياحبي نذكر فيه قدامك????، لأني مانقدرش نذكره في غيابك هالشي يخليني خاينه في نظر نفسي، وبعدين أنت أكيد إنجنيت تغار من شخص ميت????

خالد ماهو هذا اللي مخليني ساكت أنه ميت ودافنه بإيدي ربي يرحمه????، وإلا شفتي شن درت فيك باش تحرمي تنطقي أسم حد غيري على لسانك???? هيا تعالي ياسرك دوه

خالد تعالو جاي شويه???? بما أنه فرح خشت بنقوللكم شي، كل يوم نحمد في ربي على هالنعمه اللي أني عايش فيها وطول هالثلاثة سنين نقول أنه حياتي كامله ومكتمله بفرحتي والحمدلله

بس الكمال لله لحد هالوقت ربي مارزقناش بصغار وعالجنا قداش مره وكل دكتور يطلعلنا بقصه مختلفه لين كرهنا العلاج، مفكر بعد مافرح تناقش مشروعها الفتره الجايه، نطيرو للأردن، أدعولنا ربي يكمل علينا ويرزقنا ويرزق كل محروم????????

‏وتبقى أفضل الأمنيات هي أن يجد كُلٌ منّا من يستطيع أن يسكُن إليه وبه، من نبدأ معهُ وننتهي معه، أن لا نُعاني من الفقد، أن نجد من يُهوّن علينا مُرّ العيش، من يبقى كما عرفناهُ أوّل مرّة، أن لا نقطع طريقًا كاملاً مع شخص ثم نكتشف أن عمرنا تناثر هباءً، أن لا نُخدع، أن لا نفقد.. ويبقي العشق دائما وأبدا ينبض في قلوبنا ????