رواية غيبوبة حب الفصل الأول 1 بقلم رودينة جاب الله

= بس يا عبد الرحمن بس يا حبيبي يلا نطلع 

يومها ابويا اخدني وطلعني برا ، ماكنتش عارف اي حاجة ولا مدرك اي شئ غير أن ماما مابتردش عليا !! انا زعلتها ف حاجة طيب ؟! انا والله عملت الhome work  بتاعي كله مش بترد عليا ليه ! 

قعدنا 3 ايام ف الشقة ناس طالعة وناس داخلة وكلهم لابسين اسود ! وبيقولوا لبابا شد حيلك هو يعني اي شد حيلك 

_ بابا بابا 

= نعم يا عبدو 

_ هو ماله حيلك كل الناس بتقولك شده ! يعني اي 

= والله ما انا عارف اشده يا بني !

اسبوع من غير ماما مش بتكلمني ولا بتتصل حتي عليا وماعرفش هي راحت فين بس انا مش لاقيها ولا حتي اخدتني معاها زي ما هي متعودة !

_ بابا 

= نعم يا عبدو

_ هو ماما مش بتكلمني ليه هي زعلانة مني 

= لا يا حبيبي مش زعلانة منك ولا حاجة

_ اومال هي فين ؟ عند جدو ؟ 

= لا يا حبيبي .. ماما .. ماما عند ربنا دلوقتي 

_ الله .. طب ماخدتنيش معاها ليه 

= مينفعش تاخدك معاها بس هي دلوقتي علشان عند ربنا فهي حاسة بينا وسمعانا 

_ طب ممكن تقولها انها وحشتني 

= ووحشتني انا كمان والله 

_ وحشتينا اوي يا ماما .. احنا مستنينك 

= لا إله إلا الله .. بس بقي يا عبدو ! بص يا حبيبي انا هحضر شنطتك ونروح بيت تاني اتفقنا ؟

_ ليه هنروح فين 

= هنروح بيت بابا التاني 

_ مش دا بيت بابا كمان 

= ايوة يا حبيبي والتاني كمان بيتي 

_ طيب بس ممكن ماما تيجي هنا وتقعد تدور علينا 

= لا يا حبيبي ما هي ماما هتتأخر عند ربنا لغاية احنا مانروحلها بقي بعد عمراً طويل 

_ يعني اي 

= يعني يلا بقي جهز نفسك وانا هحضر الشنط 

ماكنتش فاهم حاجة ساعتها غير ان ماما عند ربنا وكنت مبسوط اوي علشان ماما بتحب ربنا واكيد ربنا بيحبها بس كمان كنت زعلان منها علشان ماخدتنيش معاها .. عمرها ما راحت مكان من غيري !!

لبست وبابا حضر الشنط وبابا اخدني وروحنا بيت بابا التاني وهناك فتحتلنا ست جميلة اوي الباب لما شافتني اخدتني ف حضنها وكمان كانت شايلة بنوتة صغيرة علي ايدها .. 

_ ازيك يا عبدو 

= الحمدلله يا طنط 

_ لا انا عيزاك تقولي يا ماما 

وطيت صوتي=وطي صوتك ماما ممكن تزعل 

_ طيب موطي صوتك كدة ليه 

= اصل بابا قالي انها سمعانا دلوقتي واكيد هتزعل لما تعرف اني هقولك ماما 

باستني وحضنتني واخدتني اوضتي تغيرلي هدومي وحضرتلي السرير علشان انام 

_ اطفيلك النور يا عبدو

= لا 

_ طيب يا حبيبي تصبح ع خير 

= وحضرتك من اهله 

كنت نايم خايف اوي .. انا متعود انام ف حضن ماما ! ماما دايماً كانت بتزعق مع بابا علشان كان بيقولها ان مينفعش انام معاهم بس هي كانت بتصمم وعمرها ما نامت من غير ما تنيمني ف حضنها الاول .. وحشتني اوي وانا عايز حضنها دلوقتي !! 

تاني يوم صحيت وكنت متردد اطلع برا الاوضة ولا عيب ! ماما قيلالي لما نبقي عند ضيوف ماينفعش نتحرك غير لما يسمحولنا .. طيب انا زهقان اوي وانا لوحدي 

بعدها بشوية طنط او ماما زي ما طلبت اقولها دخلت عليا 

_ اي يا عبدو قاعد لوحدك ليه 

= حضرتك ماسمحتليش اخرج ! وماما قيلالي مانتحركش غير بإذن من اللي احنا ضيوف عنده 

_ يا حبيبي .. تعالي يا عبدو تعالي ألعب مع بسنت 

= مين بسنت ؟

_ بسنت دي اختك 

وابتدت اللعنة ! مش اختي .. بسنت مش اختي ! بسنت تبقي بنت الست اللي بابا اتجوزها 

عدت الايام وانا كل يوم بفتكر ماما بس بحكيلها كل تفاصيل يومي وبتناقش معاها كتير اوي وبحسها دايماً بترد عليا وانا بسمع كلامها وانفذه .. بفتكر اول يوم ماما خدتني فيه المدرسة .. كان يوم غريب ، كان جوايا مشاعر متداخلة من فرحة وخوف وتوتر بس كل اللي اعرفه انه كان يوم حلو ! .. أمي مارضيتش تمشي غير لما عرفتني علي ولد وسابتنا ومشيت .. ولحسن حظي الولد دا كان عمر .. صديق عمري وكفاحي 

_ مالك يا بثنت بتعيطي ليه 

= العلوسة بتاعتي ضايعة (العروسة)

_ ماتعيتيش انا هجيبلك علوثة تانية (ماتعيطيش _ عروسة)

كنت زي اي طفل ألدغ ف حرف السين !! الموضوع كان عاملي ازمة بس الحمدلله اتحل وبكلمكم عادي اهو 

عدت الايام ودخلت 3 اعدادي .. كنت دايماً بجتهد اني اجيب مجموع واتفوق وكمان نفسي ربنا يكرمني في 3 ثانوي علشان اقدر اجيب مجموع وادخل طب زي بابا ما بيتمني !

يوم النتيجة كنت خايف اوي ومتوتر ..

_ ماما ، بابا اتأخر اوي كدة ليه 

= اصبر يا حبيبي زمانه جي 

_ بابا بيخبط افتحوا بسرعة 

بسنت جريت تفتح الباب 

_ اي يا بابا عملت اي 

= بص يا عبدو انت عملت اللي عليك والتوفيق دا بتاع ربنا 

_ ايه يا بابا سقطت يعني ولا اي

= لا مش حكاية سقطت يعني بس انت مجرد طلعت الاول ! 

_ اي اللي حصل 

= طلعت الاول ياواد ألف مبروك يا عبدو

* ألف مبروك يا حبيبي 

_ الله يبارك فيكِ يا ماما 

= بسنت انزلي هاتي من عمك سعيد حاجة ساقعة ووزعي مع ابنه محمد ع المنطقة كلها 

_ لا يا بسنت ماتنزليش 

= ليه يا عبدو

_ بسنت ماعاديتش صغيرة علشان تمشي مع محمد ف الشارع لوحدهم ! انا هنزل اوزع انا 

حضني=كبرت وبقيت راجل يا عبدو يعتمد عليه 

..

لما سمعته بيزعق اني انزل .. دخلت اوضتي وبقيت مستغربة انه اول مرة يعمل كدة وماعرفش عمل كدة ليه بس ف وسط تفكيري لقيته دخل عليا الاوضة 

_ احم ممكن ادخل 

= اه طبعاً

_ دخلتي اوضتك ليه ؟ انتِ زعلتي مني ؟ 

= لا هزعل منك ليه ؟ 

_ علشان انا قولتلك ماتنزليش بس والله انا خايف عليكي 

= انا عارفة يا عبدو ومازعلتش .. استني هنا ثواني 

جابت علبة من الدولاب_افتحها 

= الله دي الساعة اللي وريتهالك كانت عجباني 

_ ايوة 

= جبتيها ازاي دي .. بجد مش عارف اقولك اي ربنا يخليكي ليا 

طبعت قبلة علي خدي_مبروك يا عبدو 

سابتني ومشيت بعد اللي عملته دا ! انا عارف انكم شايفني صغير ، صح ؟ بس انا حاسس اني بحب بسنت اوي ، كل صحابي بيحبوا ف الدرس .. كلهم بيقلولي انهم بيحبوا بنات إلا انا .. عمري ما حبيت بنت غيرها ولا عايز احب غيرها اصلاً ! ، اكيد لما اكبر هقول لبابا يجوزهالي وهيوافق 

..

بعد مرور 3 سنين 

_ رايحة فين ؟

= نازلة الدرس 

_ ودا منظر بنطلون تنزلي بيه الدرس ؟

= وانت مالك 

_ طب عدي ليلتك وادخلي غيري البنطلون دا 

= مالكش دعوة بابا مش هيقولي حاجة عليه

_ وانا بقولك مانتش نازلة كدة 

= وانت تقولي انزل ولا مانزلش ليه 

* مالكم يا ولاد صوتكوا جايب اخر الشارع 

_ فيه انها لابسة بنطلون مايتلبسش وعايزة تنزل بيه كدة 

= يا ماما مالهوش دعوة يا ماما 

* اسمعي كلام اخوكي يا بسنت وادخلي غيريه 

= يووووه 

* ادخل صالحها 

_ انا ماغلطش علشان اصالحها

* ما انت طول عمرك بتصالحها حتي لو هي غلطانة اي الجديد

_ بس المرة دي لا يمكن اصالحها 

..

_ ممكن ادخل ؟ انا اسف 

= ..

_ خلاص بقي قولتلك انا آسف 

= ..

_ هجبلك شيكولاتة طيب 

= ..

_ ما البنطلون مايتلبسش الاه 

= اومال عملينه ليه علشان يتقلع 

_ لا عملينه علشان اي بنت تانية تلبسه انما انتِ ست البنات وماينفعش تلبسيه 

= يا سلام 

_ اه والله ، وبعدين شكله ملفت اوي للنظر يعني يرضيكي تنزلي والناس كلها تفضل تبصلك وتاخدي عليهم كلهم ذنوب 

= لا طبعا مايرضنيش 

_ طب ما خلاص بقي كنتِ بتصيحي ليه 

= علشان انت ماشوفتش ٥ دجايج رباية 

_ يا جدع 

= بالله 

_ ماتخلنيش امد ايدي عليكي وانتِ شاحطة كدة

= ماتقدرش 

_ استعنا ع الشقا بالله 

جري ورايا وهد حيلي بالله وفضل يجري ورايا لغاية ما مسكني برضو 

_ ها اقدر ولا ماقدرش

= تقدر يا عم ماتخليش خلقك ضيق كدة 

_ اممم ناس مابتجيش غير بالعين الحمرا .. انتِ ماروحتيش الدرس ليه صحيح ؟ 

= ما انت اخرتني بقي هبقي اروح مجموعة تانية 

_ طب حيث كدة بقي اعمليلنا كوبايتين نسكافيه وتعالي البلكونة 

عبد الرحمن جزء كبير من حياتي ماقدرش استغني عنه .. مشاعري متغيرة من ناحيته بقالها فترة ! مش حساه اخويا بس هو عمره ما هيشوفني غير اخته ! اول مرة احس الاحساس دا واعتقد دا اللي بيسموه الحب ؟ تفتكروا ممكن يجي يوم من الايام ويحبني ونتجوز ؟ 

..

عدت الايام وانهاردة احنا قاعدين ف القاعة  .. فرح واحدة بنت صاحب بابا اكيد مش فرحي انا وعبدو يعني بلاش شغل روايات ! انتوا بتقروا ل رودينه جاب الله ولا اي ؟! 

الفرح كان حلو اوي .. المكان مليان حب .. كلنا بنحضر افراح بس مش كل الافراح بنحس بأحساس الحب فيها .. واضح اوي الفرح علي وش العريس والعروسة وباين الحب اللي طاغي بينهم .. كمان باين فرحة اهلهم وصحابهم .. الفرحة الحقيقية اللي بجد مش مجرد رايحين علشان يشوفوا شكل العريس ولا يقدروا تمن الفستان ! ناس رايحة فرحنالهم من قلبها واللي يقعد ف المكان يتعِدي من حبهم ويحبهم هو كمان ..!

الفرح خلص وكان حلو جداً وانا كنت مبسوطة اوي لفرحة اهل الفرح ، ركبنا العربية والدنيا كانت ضلمة جداً وفيه شابورة وف لمح البصر كانت حياتنا مقلوبة 180 درجة !

_ حاسب حاسب حاااااسب

يتبع ……