رواية الاعمى الفصل الرابع عشر 14 بقلم ليلة عادل

القسم 9 ص

داخل مكتب ادهم ومعه اميرة

ادهم … ها فكرتى

اميرة … اه

ادهم … طب احكيلى

اميرة …(بحسم ) اللى حكيتهولك هو اللى حصل

(يخبط على المكتب بايده بغضب )

ادهم …(بشده) كدبتى ليه لما قولتى خرجتى من النادى العصر

اميرة … لا كنت ناسيه

ادهم … ناسيه روحتى فين بعدها

اميره … اتمشيت شويه

ادهم … اتمشيتى ها طب ماقولتيش ليه كدا من الاول

اميره … لانه الموضوع مش مهم

ادهم … مش مهم طيب دخلتى الفيلا ازاى

اميره … من البوابه

ادهم … انهى بوابه

اميرة ..من البوابه الاماميه

ادهم … بس دى كانت مقفوله ولا مروان عملك مفتاح

اميره … لا كانت مفتوحه هى كمان

ادهم … والاسعاف طبعا دخلت عادى

اميرة … اه

ادهم … دخل يابنى بتاع الاسعاف

ادهم … هى دى اللى فتحتلكم

رجل الاسعاف … اه

ادهم … متاكد

رجل الاسعاف … ايوا يا افندم

ادهم … اتفضل.انت … طبعا سكتى .اثبت يا استاذه ان الاسعاف لما جت معرفتش تدخل لان البوابه كانت مقفوله اتصلو بيكى وانتى خرجتى فتحتى البوابه بنفسك , انتى بقا دخلتى ازاى , ردى دخلتى ازاى

تصمت اميره قليلا تفكر على ملامحها الارتباك وبصوت مكسور تقول

اميره … نطيت من السور بتاع البوابه الخلفيه

ادهم …مقولتيش من الاول ليه كدا

اميره … خفت دى جريمة قتل

ادهم … حلو طيب نطيتى من السور ليه

اميره …لما دخلت لقيت البوابه مقفوله وكنت عايزه اطمن علي مروان

ادهم …(بسخريه ).. اممممم اذا كان كدا ونيتك خير لا نطى.. روحتى فين بقى بعد ما نطيتى

اميره .. دخلت الفيلا على طول

ادهم .. دخلتى الفيلا على طول اه اه لحظه كدا معايا

(يفتح ادهم اللاب يطلب منها ان تنظر الى الشاشه..مشهد ليها هى بتنط من الباب الخلفى للفيلا ثم تذهب من ناحيه اخرى)

ادهم …انتى عارفه الكاميرا الموجوده فى الفيلا اللى قصاد فيلا مروان صورتك يا استاذه ها هتحكى الحقيقه ولا احول الاورق للمحكمه وخلاص

اميره … حضرتك دى الحقيقه

ادهم … وانا مصدقك انتى تمام .. انا كدا هحول القضيه للمحكمه لان بالشكل ده القضيه اتحلت

اميره … ازاى

ادهم … بنت بتحب دكتورها قتلت مراته عشان تخلص منها وتتجوزه غيرة نسوان

اميره … والله ما قتلتها

ادهم … المحكمه بقى هى اللى تحدد وتقوليلهم ليه نطيتى وكنتي فين انا كدا خلاص الموضوع خرج من ايدى اكتب يابنى (اثناء حديثه مع الكاتب )

اميرة … (تبكى بعد صمت قليل وتفكير ) … الاسطبل

ادهم … (باستغراب) ايه

اميرة … كنت فى الاسطبل ممكن اشرب … (بعد ان تشرب) … شكرا..من حوالى شهر ونص كدا جاتلى رساله من تليفون مروان انه منتظرنى فى المكتب روحت , اول ما دخلت اتفاجأت بماجى طلبت منى انى ابعد عن جوزها واخوها واتهمتنى فى شرفى وهانتنى جامد . طبعا كان لازم ادافع على نفسى قولتها انى مش هبعد وكل اللى قالو لحضرتك منير

ادهم … كملى

اميرة … الاول اضايقت وفعلا ماروحتش يوم كامل بعدين رجعت اروح تانى وقتها هادى كان بيحاول يجر ناعم معايا طلب منى انه يشوفنى برا فى مكان رفضت فى الاول بعدين روحت اتفاجأت انه طالب ايدى طبعا رفضت

ادهم … ليه

اميرة … لانه مش شبهى و مش بحبه بس وقتها حسيت ان وجودى فى البيت ده هيجبلى المشاكل

ادهم … مشاكل ايه

اميره … ان بابا بدا يضايق اني فى بيت مروان كل يوم تقريبا من الصبح لبليل , ومشكله ماجى وحوار هادى , طبعا عشان مضيقش د/ مروان كدبت عليه قولته انى مسافره وفعلا سافرت حوالى 10 ايام لما رجعت كان نفسى اشوفه , افتكرت ان د/ مروان مره حكالى عن طريقه كان بيدخل فيها الفيلا وهو صغير ومحدش كان بيشوفه قررت اعمل كدا واشوفه من بعيد

ادهم … عملتى كدا كم مره

اميره … دى كانت المره الثالثه

ادهم … كملى

اميرة … كنت فى النادى قاعده مع حمزه انا عارفه ان د/ مروان فى الوقت ده بيحب يشرب القهوه فى الجنينه , سبته ومشيت روحت فضلت قاعده فى الاسطبل اكتب فى مذكراتى بس لحظت حاجه

ادهم … ايه هى

اميرة … محدش دخل ولاخرج خالص يعنى مفروض انه فى سايس وفى كيلا

مروان نفسه ولا دخل ولا خرج , بس انا قولت يمكن ماجى مدياهم اجازه هى بتعمل كدا على طول بتدى كل الخدم اجازه وهى مسافره ومروان بيقعد معايا او مع منير

ادهم … وبعدين

اميره … كملت قعدتى لحد ما جتلى الرساله جريت على طول لما وصلت على باب الفيلا لقيته مفتوح طبعا وقتها مكنتش مركزه , لانى عايزه اطمن على مروان انا جريت على الاوضه لان الاوضه بتاعت مروان فى الدور الاول اتفاجأت انها على الارض حاولت اساعدها لما معرفتش طلبت الاسعاف

هو ده كل اللى حصل والله العظيم

ادهم … مالمحتيش حد خالص وانتى قاعده

اميرة … لا خالص

ادهم … ولا حتى عند البوابه

اميرة … لا. حتى لو حد دخل او خرج مش هقدر اشوفه لان المكان بعيد والناحيه التانيه مستحيل

ادهم … سمعتى صوت زعيق اى حاجه

اميرة … لا

ادهم … ليه مش حكيتى كدا من الاول

اميرة … خفت حسيت انى هلبسها اكتر

ادهم … بصى اللى بتقوليه ده فعلا يثبت عليكى اكتر بس انا عايزك تكملى

اميره… مافيش حاجه ممكن اقولها تانى

ادهم … هادى فين؟

اميرة … معرفش اخر مره شقته فى الكافيه بعدها بيوم سبت الشغل

ادهم … كنتى كاتبه ايه فى الورق اللى فى المذكرة؟

اميرة … انا قولتك كلام عادى

ادهم … اميرة بتخبى ليه

اميرة … صدقنى مش بخبى

ادهم … ايه رايك فى سلوك ماجى؟

اميرة … من ناحيه

ادهم … يعنى اخلاقها ؟

اميرة … معرفش مكنتش بحب اتعامل معاها بس هى..ربنا يسهلها بقا

ادهم … كتبتى فى مذكراتك انها ست رخصيه مش كويسه شفتى عليها حاجه؟

اميرة … غيرة بنات مش اكتر

ادهم … اللى انتى كاتبه ده يوصلك لحبل المشنقه

اميرة … والله مقتلتها دى اطول منى اصلا هخنقها ازاى

ادهم … منطق بردو….اميرة مش ملاحظه ان غياب هادى ده شى غريب

اميرة … طبعا

(يدخل العسكرى يبلغ ادهم ان مروان برا يطلب ان يراه)

ادهم … خليه يدخل… اتفضل يا دكتور خير فى ايه

مروان … محتاج افهم

ادهم … تفهم ايه

مروان … سبب اسالتك

ادهم … يا عسكرى طلع اميرة بره

(اثناء سير اميره للخروج تنظر له نظرة لوم وعتاب لمروان بعد خروج اميره)

ادهم … ماجى كانت حامل

مروان … ايه

ادهم … زى ما سمعت

مروان … (ساكت مصدوم بيحاول ان يهدى)

ادهم …. انا مقدر موقفك فقدت مراتك و ابنك فى نفس اللحظه ولا هو مش ابنك !

مروان … نعم

ادهم … على فكره حتى لو قولت ابني هنعمل تحليل DNA

مروان … من غير تحليل مش ابنى انا وماجى علاقتنا منتهية من بعد الحادثه

ادهم … انت كنت شاكك فى سلوك مراتك عشان كدا كنت هطلقها

مروان … مش هو ده السبب

ادهم … مال ايه سبب الطلاق اوعى تقولى مشاكل

مروان … انا لو كنت عارف انها بتخونى كنت قتلتها وانا مبسوط

ادهم …وامال ايه السبب اللى يخلى راجل زيك لسه شاب ومراتك حلوة يبعد عنها , متقولش الحادثه فقدانك لبصرك ملهوش علاقه بالموضوع ده

مروان … مابقتش احبها

ادهم … و ده سبب كافى

مروان … بنسبه ليا كافى

ادهم …. ليه مطلقتهاش من بدرى

مروان … كتير اوى كنت بنهى كل شى بس هى كانت بتطلب فرصة , وانا كنت بديها لحد ما اميرة دخلت حياتى بطلت اركز معاها , اميرة كانت واخده كل تركيزى

ادهم … تفتكر بعدك عنها وجفاءك فى المعامله سبب فى الخيانه

مروان … هو فى سبب فى الدنيا يخلى ست تخون جوزها هى كانت قابله الوضع ده

ادهم … يمكن زهقت هى ست وليها حقوقها

مروان … لو كانت طلبت الطلاق كنت هطلقها من غير مناقشه وهى كانت واثقه من ده

ادهم … عارفه انك مش متمسك بيها يعنى

مروان … حاجه زى كدا

ادهم … طب ايه سبب الخيانه

مروان … معرفش

ادهم … تفتكر كانت بتخونك مع مين

مروان … تفتكر انا ممكن اكون عارف

ادهم … يعنى ممكن تكون شاكك فى حد ..حد مثلا كانت بتخرج معاه كتير شخص معين شخص قريب منها كدا يعنى

مروان … لامعرفش للاسف

ادهم … تفتكر اميرة تكون عارفه وعشان كدا قتلتها

مروان … لالا صدقنى ولا انا ولا اميرة لينا يد فى اللي حصل

ادهم … مصدقك بس دلوقتى كل الادله ضدها.. قولى هادى مين كان بيشوفه

مروان … كلنا

ادهم … يعنى تقدر توصفه

مروان … اخر مره شفته فيها كان فى الصوره اللى كانت فى الجاليرى وهو عنده حوالى 14 سنه , الكلام ده قبل الحادثه زى ما انت شايف اللى حصلى

ادهم …. انت قولت الصوره كانت فين

مروان … فى الجاليرى

ادهم … احنا فتشنا المكان مالقناش اى حاجه

مروان … يمكن شالتها فى مكان تانى لان الكلام ده كان فى بدايه الجواز .

ادهم … منير بره

مروان … اه

ادهم … يا عسكرى دخل منير والرسام .

(يدخل منير ومعه الرسام )

ادهم … منير ممكن توصف شكل هادى للرسام

منير … طبعا هو وشه طويل وشعره اسود وعينه واسعه وسودا وطويل حوالى 180و قمحاوى وبدقن

مروان… (بحاله زهول) … موصفات مين دى

منير … موصفات هادى

مروان … انا دلوقت فهمت

ادهم … فهمت ايه

مروان … ممكن تخرج الكل

ادهم … حاضر , خرجو اتفضل

مروان … اللى منير وصفه ده مش هادى

ادهم … ازاى انت قولت انك ما شفتهوش قبل كدا

مروان … ايوا , شفت صوره ليه كان 14 سنه كانت عينه زرقه ابيض واشقر اعتقد مافيش حد شكله بيتغير اوى كدا

ادهم … تقصد ان هادى اخوها هو عشقها

مروان … اسامه اسمه اسامه

ادهم … لا براحه عليا كدا وفهمنى كل شى من الاول

مروان … من سنه و10 شهور تقريبا ماجى قالتلى ان اخوها رجع من انجلترا طبعا رحبت بيه وجه البيت , بس بعد شويه بدات احس حاجات كدا لكن مش قادر ااكدها لان زى ما سيادتك شايف اعمى , مرتين كنا بره حد قالو اسامه , مره سمعتهم هما سوى لما طلعت قالى انه فيلم , انا كنت متاكد محدش يتوه عن صوت مراته , بس مشلول مش عارف اعمل اى حاجه ولا اتكلم مع حد , كمان اللى اكد شكوكى تغير اميرة انا متاكد انها تعرف حاجه , بس خايفه عليا من معرفه الحقيقه

ادهم …. يعنى انت عايز تقول من الاخر انه مش اخوها

مروان … ايوا

ادهم … متاكد

مروان… كل حاجه بتثبت انه مش اخوها شكله اختفائه المفاجئ اللى سمعته

ادهم … ممكن تكون عايشه علاقه محرمه معاه وممكن يكون واحد تانى

مروان …انا متاكد انا احساسى مايخونيش

ادهم … تفتكر هو ده اللى كانت اميره كتباه فى الورق اللى قطعته

مروان … اكيد

ادهم … تفتكر ليه قطعته

مروان … اكيد خايفه عليا من الحقيقه

ادهم … انا هجبها واتكلم معها

مروان … بس ممكن اكلمها انا قبل ماتدخلها

ادهم … موافق بس يشرط

مروان … ايه

ادهم … ما تمدش ايدك عليها تانى فاهم اتفضل

القسم 3 م

غرفه المكتب استراحه الظباط التى تجلس فيها اميرة يدخل مروان عليها تقف تقترب منه

اميرة … ها جاى تكمل

مروان … (بحزن) … اكمل ايه

اميره … (بخضه تمسك ايده) … مالك

مروان … كنتى عارفه

اميرة … عارفة ايه

مروان … انى غبى انى عبيط انى عايش مغفل اكتر من سنه ونص كنتى عارفه

اميره … (يصدمه ) … انت عرفت مين قالك

مروان … مش مهم مين اللى قالى المهم انك سبتيهم يضحكو عليا , سبتيهم يستغفلونى ويطعنونى فى ظهرى ازاى تعملى فيا كدا

اميرة … (تبكى) … خفت اقولك خفت عليك من الصدمه الحقيقه كانت هتقتلك

مروان … وانا دلوقتى ايه , على الاقل لو كنتى قولتلى كنت عرفت اخد حقى منهم بدل ما اعيش مغفل

اميره … انت مش مغفل انت احسن منهم وانضف منهم يمكن اتصرفت غلط بس انا افتكرت انى بكدا بحميك

مروان … بتحميهم مش بتحمينى

اميره … اقسم بالله ابدا , انا فكرت لو قولتك ممكن يجرالك حاجه من الصدمه , كنت عايزنى اقولك ايه ان ماجى بتخونك مع هادى وانه مش اخوها معرفتش الموضوع كان صعب اوى , عشان كدا بعدت مكنتش قادره احط عينى فى عينك

مروان … طب ما قولتيش الحقيقه ليه لما اتهموكى بقتلها

اميره … خفت عليك قولت اتسجن اتشنق بس هو ميعرفش الحقيقه اللى ممكن تكسره

مروان … كنتى هتودى نفسك فى داهيه عشانى

اميره … مش مهم المهم انك تكون كويس

مروان … للدرجه دى

اميره … انت متعرفش انت عندى ايه انت هنا .. (تمسك ايدو وتضعها عند قلبها) من غيرك ده مايدقش , هو بيدق عشانك انت وبس انت عندى اهم من حياتى

مروان … (بكسره )انا موجوع اوى

اميرة … اوعى تزعل هى متستهلش والله .. (تحضنه) .. اهدى مقدرش اشوفك كدا عارف هى اصلا ما تعتبرش مراتك دى كانت واحده عايشه فى البيت كانه فندق متزعلش دموعك انضف واغلى منها اهدى وحياتى

مروان … (دموع خفيفة وهو فى حضن اميرة) … للدرجه دى كنت مغفل للدرجه دى انا هنت عليها كانت تطلب الطلاق والله كنت هطلقها واديها كل حقوقها

اميرة … اهدى وحياتى عندك عشان خاطرى . والله ما تستاهل زعلك دى انسانه رخيصه كل اللى يهمها الفلوس وبس

مروان … (يبص بوشها يضع ايدو الاتنين على خدها وبحسم ) …انتى لازم تخرجى من هنا مش هسمح تقعدى يوم واحد هنا قولى كل حاجه تعرفيها متخفيش ها

اميرة … (تشاور بوجهها ) .. حاضر

(يخرج مروان واميره خارج الغرفه ويدخلو الى مكتب ادهم)

-مكتب ادهم

ادهم … ها نويا تقولى الحقيقه ولا

اميره … هقولك كل اللى عرفه بس ممكن لوحدنا

مروان … اميره متخفيش عليا مش هيطلع اسوئ من اللى سمعته

ادهم … اتفضلى انا سمعك

اميرة … مره كنت بعمل قهوة للدكتور , وانا خارجه شفتهم يعنى بيبسو بعض وقتها انصدمت مشيت قولت مش هاجى تانى

ادهم … ليه

اميره … ازاى اروح مكان فى القرف ده

ادهم … ليه مش حكايتى لمروان

اميره … اقوله ايه شفت مراتك واخوها بيبوسو بعض طبعا مش هيصدق

ادهم … يعنى مشكتيش انهم مش اخوات

اميره … كل اللى كان فى بالى انهم كانو بيعيشو علاقه محرمه مع بعض , اصلا كنت على طول بشفهم فى اوضاع غريبه متنفعش بين اخوات بس كنت بكبر دماغى , لحد ما بعتتلى رساله ورحت المركز فضلت تهنى وتغلط فيا بس لحظت ان كان كل تهددها على هادى مش مروان

ادهم … كملى

اميره … فى مره كلمنى هادى انى اقابله رفضت فضل يتحايل عليا وفقت وقتها عرفت انه عشيقها وانه كان يعرف ماجى من قبل مروان بسنتين وانها اتجوزت مروان عشان الفلوس والشهره , وان الفكره جتلها بسبب ان مروان بداء يتخانق معها عشان تاخرها المستمر وانه بالشكل ده هيخليها تقعد اكتر فى البيت , لان هادى او اسامه هيبقى جنبها خصوصا ان اخوها مقطعها من سنين مستحيل يرجع اوحتى يكلمها وان محدش يعرف شكله او اى معلومه عنه , زورو الورق

ادهم … قطعتى الورق ليه من المذكره

اميره … خفت حد يشفوه قطعته وحرقته , ووقتها اخدت القرار انى لازم ابعد لانى مكنتش عارفه اعمل ايه و مش قادره ابص فى وش د / مروان وانا حاسه انى بكدب عليه , ولا عارفه اقوله اصعب حقيقه يعرفها بشر

مروان … اعتقد دلوقتى الحقيقه اصبحت واضحه هى وعشيقها اتخنقو سوى وقتلها اميرة بقا تخرج

ادهم … اللى اميرة بتقوله ده ياكد انها هى اللى قتلت

اميرة … ليه

ادهم … لانك عايزه تنتقمى لشرف الدكتور غير كدبك اكتر من مره وانك بتخبى

مروان … والحل

ادهم … ان اسامه ده يتجاب..اميرة تعرفى ايه عنه

اميرة … كل اللى حكاه ان اسمه اسامه وخريج تجاره اه وساكن فى عين شمس

ادهم … مقلش عرفها ازاى

اميرة … (تفكر ) … اه اه افتكرت قال ان واحد اسمه كريم شغال معها هو اللى عرفهم على بعد فى حفله , وهى رفدت كريم ده عشان محدش يكتشفهم

مروان … سهله كدا يا فندم نشوف كل اللى اسمهم كريم وترفده قبل سنه ونص , وعددهم اكيد قليل ماكنتش فى ناس شغاله معها كتير

ادهم … ده اللى هيحصل

اميرة … يعنى هخرج برائه

ادهم … اكيد بس بشرط

اميرة … ايه هو

ادهم … تاكلى

اميرة … حاضر

– مع نظرات غيره من مروان

ادهم …. يا عسكرى تعال خد اميره

مروان … هنعمل ايه

ادهم … انت مش هتعمل حاجه لان انت من دلوقتى اصبحت متهم بعد كل ده

مروان … انا لوكنت اعرف صدقنى كنت قتلتها من زمان مش بالخنق بالحرق صاحيه .,.وبكل فخر

ادهم … وانا واثق انك مش القاتل بس ده القانون

مروان … ارجوك سبنى اساعدك بعدين اعمل اللى انت عايزه