اسكريبت حبيبتي الصغيرة الفصل الأول 1 بقلم سولييه نصار

-ايه الفستان اللي انتي لابساه يا رباب روحي غيريه ؟!

زعقت وانا متضايق فيها …بصتلي بعند وقالت :

-لا يا عز مش هغيره …

مسكت ايديها وزعقت :

-اولا اسمي ابيه عز …ثانيا لما اخوكي الكبير يقولك اعملي كذا تعمليها من غير كلام …

بعدت وهي بتزعق:

-انت مش اخويا …مش اخويا هو عافية

بصيتلها بصدمة …عيونها كانت مدمعة …حسيتها مجروحة من غير ما افهم ليه !!!

– رباب !!!

زعقت ليها ماما وقربت وهي بتقول :

-ازاي تكلميه بالشكل ده انتي هبلة وبعدين عنده حق ده فستان تروحي بيه الفرح …روحي غيريه لاما مفيش فرح …

-اووف بقا …مش راحة حتة …بقلم سولييه نصار

وسابتنا ومشيت

-احسن دي بنت قليلة الرباية

-اهدي يا ماما عليها شوية …

طبطبت امي علي كتفي وقالت:

-متزعلش منها يا عز انت عارف رباب عقلها مفوت …شوية كده وهتيجي بنفسها تعتذر منك

-مش مهم يا امي رباب اختي وانا مش زعلان منها

-ربنا يرضي عليك يا بني بعد موت ابوك انت اللي اهتميت بينا وصرفت علينا …صحيح انت مش من دمي بس ربنا يعلم غلاوتك عندي

مسكت ايدها وبوستها وقولت :

-وانتي امي …انتي اللي اهتميتي بيا وربتيني

-ومش هرتاح الا لما افرح بيك يا عز

اتوترت بعدين بصيتلها وقولت :

-إن شاء الله …دلوقتي انا ورايا شوية شغل مهم هروح اوضتي اخلصه

-اعملك شاي ولا عصير يا بني

– لا يا ست الكل تسلم ايديكي

وبعدين سيبتها ومشيت ….

…

قعدت علي مكتبي وانا متضايق من تصرف رباب …صحيح هي مش اختي من دمي بس يعتبر انا اللي ربتها…كان عندي تسع سنين لما امي ماتت …بعدها بسنة ابويا قرر يتجوز ماما صابرين أرملة ومعاها بنت عندها سنتين …صابرين رغم انها مرات ابويا بس كانت بتعاملني احسن من ابويا ذات نفسه …مكنتش بتفرق بيني وبين رباب …وخليتني اساهم في تربية رباب

..لما بقا عندي اتناشر سنة ابويا كمان مات ..

ساعتها حسيت باليتم ..حتي ماما صابرين انهارت …مكناش عارفين ايه هيبقي حالنا …قررت هي تشتغل …بس انا  رفضت وخرجت اشتغل في ورشة نجارة …كنت بتعلم واشتغل في نفس الوقت وهي كانت بتساهم في الشغل وبتشتغل خياطة …لحد ما ظروفنا بدأت تتحسن …خلصت ثانوية ودخلت صيدلة  …فضلت اشتغل في الكلية كمان واجتهدت لحد ما اتخرجت بتفوق وبشتغل في شركة أدوية كبيرة ساعتها ظروفنا بقت مرتاحة اووي…خطبت مرة بس هي مرتحتش وفسخت الخطوبة من وقتها مفكرتش اعيد التجربة تاني .!!!

الباب خبط فخرجت من شرودي

-ادخل

دخلت رباب وهي حاطة عينيها علي الأرض وماسكة كوباية عصير مانجا اللي بحبه

حطت العصير علي المكتب وقالت:

-اسفة  متزعلش مني …

ابتسمت وقومت وانا بقول:

-ازعل من مين يا عبيطة ده انتي اختي

عيونها دمعت وقالت:

-بس انا مش بعتبرك اخويا يا عز ليه مش عايز تفهم

سكت بتوتر وقولت:

– انا مش فاهم.

صرخت وهي بتبكي وقالت:

-لا انت فاهم كويس…..مشوفتش ازاي انهارت من سنتين لما خطبت لمياء ..انت عارف وحاسس بمشاعري

-رباب

– انا كنت بغير منها …ب*موت من الغيرة عارف ليه

-رباب اطلعي برة!!!!

زعقت فيها عشان تفوق …كنت متوتر مش حابب اسمعها لحد ما قالت هي بصوت عالي :

-عز انا بحبك !

-رباب !!!!

لقيت ماما بتزعقلها من ورانا …اكيد سمعتها!!!

يتبع ..