رواية قدري الحلو أنتَ الفصل الثالث عشر 13 والأخير بقلم نيرة محمد

مش عارفه ليه حسيت اني قلبي اتقبض وعايزه اعيط اوي لما سمعت صوته وهو داخل علينا ونظراته لاول مره تكون بارده اوي كده 

حاولت ارد وابرر كلامي اللي اكيد سمعه بس لساني وقف وقلبي كمان وقف لما شوفت دموع ماما وهي بصاله ونظراتها كلها خوف من رد فعله 

خرجت من تفكيري ومقدرتش اقول غير  كلمتين في منتهي التوتر …ارجوك هفهمك 

كان وصل اودامها واتكلم ببرود كالثلج ..مش عايز افهم حاجه ..لاني سمعت كل حاجه 

سكت شويه كانه بيفكر في حاجه بس في الاخر نطق وحسمها …بصي يابنت الناس ..اودام والدتك اهو انا اللي بعتزر منك لاني ظلمتك وظلمت نفسي معاكي في الجوازه دي خاصه انها جت بسرعه بس ده عشان كنت بحبك وبعشقك بجد وكان نفسي اعوضك اي يوم شوفتيه وحش بعيد عني ..بس للاسف نسيت ان قلوبنا مش بايدينا وزي ماقلبي حبك انتي قلبك مقدرش يحبني واللي حزين عليه انك للاسف كنت اتمني انك تخرجي ز ي ما انتي …بس انتي اللي اديتي موافقتك اني المسك وللاسف ماكنتش اعرف انك مغصوبه ماكنش عمري رجولتي تسمح اني اجي  جنبك ..بس اللي حصل . بس لكده وكفايه اوي ظلم ليا وليكي مقدرناش نتفق فانتي ….

قبل ما ينطقها صرخت بدون وعي منها وجرت حطت ايديها علي شفايفه تمنعه ونطقت بدموع وترجي …متنطقهاش ارجوك 

الحيره اتملكته اتكلم بعصبيه ..انتي عايزه ايه بالضبط يا ايمان ..انا حقيقي مابقتش فهمك 

ايمان مشاعرها متلخبطه حاسه نفسها ضايعه حست انها عايزه تعيط اوي عشان تطلع كل اللي جواها وبالفعل حطت ايدها علي وشها وانفجرت في العياط 

امها بتعيط علي عياطها ومش عارفه تقول ايه ولاتعمل ايه بس لقت ان امثل حل انها تخرج بهدوء وتسيبهم يتفاهموا مع بعض وكفايه تدخل منها اللي ممكن يكون سببه نهايه حياتهم سوا 

انسحبت بهدوء ومحدش خد باله منها وكريم كان واقف ومربع ايديه وبيبصلها بخنقه منها وعليها 

عارف ان مشاعرها متلخبطه وفي نفس الوقت كرامته وجعاه وبتقوله انه يطلقها حالا بس حالتها منعاه 

استني لغايه ماتهدي خالص من عياطها وبعد ماشافها مسحت دموعها أتكلم بهدوء …كل عياطك ده ليه ..انتي مش عايزه حريتك وانا هديهالك 

ايمان بصوت مبحوح ..انا بعيط لاني مش عارفه ولا فاهمه مشاعري ايه من ناحيتك ..لكن اللي متاكده منه اني مش عايزاك تطلقني 

كريم اتنهد بتعب ورد بجديه …بصي يا ايمان انا هديكي فرصه تفكري وانا بعيد عنك عشان ميكونش فيه ضغط …شهر واعرف ردك عايزه تكملي حياتك معايا ولا لا…ولو لا يبقي اديكي حريتك وكل حقوقك كامله واوفرلك شقه تقعدي فيها مع والدتك عشان متحتاجيش لحد ابدا …فمتخافيش من الناحيه دي وفكري براحتك ومن غير ضغوط تمام 

ايمان بضعف ..وانت هتروح فين 

كريم بهدوء …هقعد في شقه واحد صاحبي مقفوله من سنين مفتاحها معايا من ساعه ماسافر كندا ..وهديكي العنوان وكلميني لو احتاجتي اي حاجه ماشي 

ايمان هزت دماغها علامه الموافقه علي كلامه وسابها بعدها وخرج وهي بتفكر في كلمه كلمه قالها 

في بيت هند 

يعني كلمت عمو علي انهارده يا ادهم ولا بتضحك عليا 

ادهم بضحك . يابت اتهدي بقا هي الحاجات دي فيها ضحك والله كلمته و رحب وهنروحله بكره بالليل باذن الله 

هند بلهفه ..يعني الخطوبه بكره 

ادهم بغيظ ..خطوبه ايه يابنتي بس ..مش لما اشوفها ويحصل قبول بينا ولو كده ممكن نقرا الفاتحه بكره لكن الخطوبه قدام شويه

هند بفرحه ..لا ان شاء الله تعجبوا بعض ونفرح بيكوا بقا 

ادهم بابتسامه ..ان شاء الله ياحبيبتي

تاني يوم  بالليل في بيت الحاج علي 

كانوا قاعدين كلهم في قاعده بسيطه عائليه ومترحب بيهم جدا 

ادهم وهند ..وام سلمي وابوها لكن هي لسه مخرجتش 

اتكلمت هند بفرحه ….ممكن ياعمو ادخل لسلمي اجيبها 

علي بطيبه ..اتفضلي ياحبيبتي ماهي اختك برضوا 

اكيد ياعمو واكتر 

دخلت هند وبعدها اجت هي وسلمي اللي وشها في الأرض ومش قادره ترفعه 

جمالها كان بسيط وهادي بس عليها براءه وهدوء يحبب اي حد فيها بسرعه 

اتكلمت بخجل ….السلام عليكم 

كلهم ردوا السلام واولهم ادهم اللي حس براحه غريبه اول ماشاف وشها البرئ 

دخلت قعدت جنب ابوها وهي بتلعب في ايدها من كتر التوتر ومش عارفه ترفع عنيها لعنين ادهم 

ابوها حب يديهم فرصه يتعرفوا فسبوهم لوحدهم وقاعدوا في الصاله قدامهم وسابو الباب مفتوح عشان يشوفوهم  

سمعت صوت ادهم ….اذيك ياسلمي 

ردت بتوتر.. الحمد لله 

ادهم بابتسامه لخجلها وتوترها ..مش عايزه تساليني علي حاجه او تعرفي عني حاجه 

اخيرا رفعت عنيها لعنيه وغصب عنها حبها اللي مخبياه ظاهرله زي ماهند قالت …انا عارفه عن حضرتك حاجات كتير هند بتتكلم عليك كتير ..وبعدين احنا جيران وكده يعني 

ادهم بمشاكسه ..وانتي اخده بالك من حضرتي من كلام هند بقا عني وكده صح 

سلمي بصدمه ..لا ابدا اصل يعني هي بتحبك وبتتكلم عليك كتير وكده 

ادهم صعبت عليه من توترها مع انه بيضحك معاها بس طمنها ….انا بهزر معاكي علي فكره …بس انا عايز اعرف انتي موافقه نقرا الفاتحه ولا لا 

سلمي بخجل اشد هو فهمه وهي بتقوم …اللي بابا يشوفه 

بعد شويه كانوا قروا الفاتحه واتفقوا علي معاد الشبكه وروحوا وهو قلبه كله راحه وسعاده مش عارف سببها واتمني من قلبه انه يسعدها وميظلمهاش 

عدي عشرين يوم من مهله التفكير اللي كريم عطاها لايمان 

كانت حاسه بفراغ ووجع وبتعيط علي طول ونادرا مابتقعد مع امها وقاعدتها في اوضتها وبس وكل مابتفتكر كلامه حنانه طيبته كل تصرف كان بيعمله بتعيط اكتر انها جرحته 

كانت قاعده بالليل علي السرير وسرحانه دخلت عليها امها وهي حزينه علي حالها قعدت جنبها وطبطبت عليها بحنان ….هتفضلي كده لغايه امتي يا ايمان 

ايمان بحزن …مش عارفه 

هدي بحب ..ماهو اداكي فرصه تفكري ولسه 10 ايام ويعرف ردك …انتي عايزه تكملي مع جوزك ولا لا ياحبيبتي 

ايمان بخنقه بكاء …انا مش فاكره ليه غير كل حاجه حلوه ياماما …مينفعش كريم مايتحبش والله 

هدي بفرحه …تقصدي ايه 

ايمان بدموع …اقصد اني حبيته ياماما بس ماحستش غير لما بعد عني وزعل مني 

هدي بحنان ..مابعدش ولا حاجه ياحبيبتي احنا لسه فيها …روحي وقوليله انك بتحبيه وهو اكيد هيسامحك خاصه انه هيقدر انك لسه صغيره ومشاعرك متلخبطه 

ايمان بابتسامه بعد مامسحت دموعها ..تفتكري 

هدي …ومتاكده كمان 

بالليل 

باب الشقه خبط عليهم خافوا يفتحوا بس هدي قالت.بخوف.. ميين

سالم بلهفه ..افتحي ياهدي متخافيش 

هدي برعب مسكت ايد بنتها اللي رعبها مايقلش عنها حاجه ….انت ايه اللي جايبك دلوقتي ..امشي من هنا ياسالم وماتجيش تاني 

سالم بترجي ..عشان خاطري ياهدي سامحيني وافتحي الباب ده متخافش مني 

هدي بمراره .

مسبتش ليا غير الخوف منك ياسالم …امشي من هنا وانساني 

سالم بحزن…ده اخر كلام عندك 

هدي بقوه …ومعنديش غيره 

سابها ومشي واخر امل في رجوعها ليه انتهي وراح 

تاني يوم الصبح 

ايمان بتخبط علي عنوان كريم اللي ادهولها قبل كده  .

بعد شويه فتح الباب واثار النوم باينه عليه بس لماشافها قلق …ايمان مالك في حاجه حصلت ولا ايه 

ايمان بخجل ..طب دخلني الاول ممكن 

كريم باحراج ..اه اكيد اتفضلي 

دخلت وهي مكسوفه وهو قفل الباب وبصلها … في حاجه حصلت 

ايمان بصتله بتوتر وردت ..هو انت مش قولتلي افكر 

كريم بجديه …ولسه الشهر ماخلصش 

ايمان بصدق ..بس انا مش عايزاه يخلص ابدا 

كريم بترقب ..تقصدي ايه 

ايمان قربت منه وحطت دماغها علي صدره واتكلمت …ياريت متحرجنيش وتبعدني عن حضنك ..كريم انا مش عايزه اطلق منك ابدا 

كريم قلبه بيدق جامد بس مش قادر يصدقها ….انتي مامتك قالتلك حاجه او ضغطت عليكي 

ايمان بحزن انه مش مصدقها ..محدش قالي حاجه ..كريم انا الفتره دي حسيت اني اني 

وسكتت ودمعت بس كمل هو بلهفه لما حس بصدق مشاعرها …انك ايه 

ردت بهمس ..بحبك بجد 

حاول يبعدها عنه عشان يبص في عنيها بس هي مسكت في حضنه اكتر 

قلبه وعقله وكل حاجه فيه اتحركت لما سمعها بتهمس بضعف …وحشتني 

بعدها عنه واتكلم بجديه رغم قلبه اللي بيتنفض من تاثره بيها خاصه وهو بيعشقها ….مينفعش يا ايمان علي الاقل دلوقتي 

ايمان بزعل  ..ليه  ..انت مش عايزني 

كريم بصدق ..اكون كذاب لوقولت كده ..بس هترجعي تندمي وساعتها مش هسامحك ولا اسامح نفسي 

ايمان مردتش بالكلام بس بسته من جروحه اللي في وشه بحنان ولهفه وعمق وهي بتهمس بحب ….انا حقيقي بحبك ياكريم حتي لوحسيت متاخر بس المهم لحقتك قبل ماتروح مني 

كريم بعدها عن وشه رغم انه مش عايزها تبعد  ….ايمان انا بحبك ومش مسؤل عن نتايج اللي بتعمليه ده 

ايمان قربت منه تاني بحب واتكلمت بصدق ….وانا مش هندم لاني بحبك بجد 

شالها فجاه ومشي بيها وهو بيضحك ويقول …انتي اللي اختارتي بقا وانا بصراحه ماصدقت 

بعد سبع سنين في حفله لتخرج كليه الطب 

واقف كريم  وهو في قمه وسامته بعد ما اثر جروحه راحت بفعل العمليه وكان  مبتسم  وفي قمه سعادته وجنبه هدي الابتسامه ودموع الفرحه نازله علي وشها وهي شايفه ايمان واقفه بتستلم شهاده التخرج وهي كلها فرحه وثقه 

سمعت صوت صغير بيكلمها ..تيتا ا نا مبسوط لمامي جدا 

يعني كده هي بقت دكتوره حلوه وهتكشف علينا كلنا 

ده صوت يامن صاحب ال5سنوات ابن كريم وايمان ونتيجه لحبهم الصادق 

هي ابتسمت وباسته  وكريم نزل لمستواه ورد بحنان…ايوه ياحبيبي ماما احلي دكتوره في الدنيا كلها  تعالي نقولها مبروك 

مشوا ناحيتها وهي جايه عليهم وعلي وشها احلي ابتسامه حضنت كريم اوي وهي مدمعه من فرحتها …شكرا ياكريم ..شكرا بجد …حقيقي انت قدري الحلو 

كريم بادلها حضنها وهو بيتكلم بحب …متشكرونيش يا ايمان انتي اللي احلي نعمه في حياتي ودخلتي نورتيها ربنا يخليك ليا ياحبيبتي انتي ويامن

ايمان نزلت لمستوي يامن وخدته في حضنها وكلمته وهي بتبص لكريم بحب ..تعرف يايامن اني بحبك اوي انت وبابي 

يامن ببراءه ..عارف يامامي واحنا كمان بنحبك وتيتا كمان 

ايمان ابتسمت وكريم مسك ايديها وايد ابنهم ومشوا ناحيه هدي اللي قاعده علي الكرسي وبتبصلهم بفرحه وبتدعيلهم بالسعاده 

ايمان باست ايديها ..يارب اكون قدرت افرحك انتي وبابا الله يرحمه ياماما

هدي بدموع فرحه ..وانهي فرحه ياايمان ربنا يهنيكي ويوفقك ياحبيبتي 

ايمان بابتسامه …يارب ياست الكل ويخليكي لينا 

قرب منهم الفوتو جرافر ..عشان يتصورا صوره عائليه 

واتصوراوكانت احلي صوره بتجمعهم وايمان بتهمس لكريم …بحبك اوي 

كريم بابتسامه…وانا اكتر ياحبيبتي 

تمت