اسكريبت وجدتك في النهاية الجزء الأول 1 بقلم نورسين حمدي

_حجاب ايه اللي عايزة تقلعيه بتهزري صح ؟

-مش بهزر يا ماما انا مش هلبس حاجة مش  مقتنعة بيهاا!

شدتني من شعري بعصبية :مش مقتنعة بايه يا بت، انتِ فاكرة عشان كبرتي مش هعرف امشي كلمتي عليكي

بعدت شعري من ايدها ورديت بعند : هقلعه يا ماما ودا قراري خلاص 

دخلت اوضتي وقفلت الباب وقعدت اعيط : انا مش وحشة والله انا بس مش حاسة اني لابساه عن اقتناع هي عمرها ما كلمتني عنه او ليه احنا لابسينه زي ما اكون لابساه عشان الناس اللي نعرفهم لابسينه وخلاص اصلا هي وبابا عمرهم ما حاولوا يتكلموا معايا كأني واحدة كبيرا وليها مخ بتفكر بيه كانوا قافلين عليا لدرجة خنيقة وخاصة ان معندهمش غيري بيوجهوني زي الروبوت لحد ما بابا مات من سنتين بعدها الوضع اتغير شوية الضغط ع الاقل خف عني، اللي كبر فكرة ان اقلع الطرحة حبي لشادي هو جارنا ومنفتح شوية او  شويتين تلاتة بس بقول انه لما يحب بجد هيستقر هو عنده صحاب بنات كتير وكلهم بشعرهم وبيلبسوا ضيق وبيحطوا ميك اب اوفر حسيت انه عمره ما هيبصلي وانا بالمنظر دا فقررت اقلع الطرحة واغير نظام لبسي جايز ساعتها يبدأ يقرب مني..

*******************************

ماما كانت رافضة القرار لحد اخر لحظة بس انا خلاص مش هغيره، كلمت صاحبتي ونزلت عشان نجيب هدوم جديدة تناسب الاستايل اللي عايزاه

_ ايه يا سارة كل دا تأخير يلا عشان هنلف كتير

بصتلي بعتاب :يعني خلاص يا مرام هتقلعي الطرحة بكرا

_ ايوا هقلعها بكرا

– وانتِ كدة مبسوطة ؟حتى لو شادي اتأثر وحبك هيكون عشان شكلك مش اكتر دا بالنسبالك حب حقيقي ؟

بضيق : لا اكيد مش عايزاه يحبني عشان شكلي بس ع الاقل اكون ف نفس ستايل النظام اللي بيحبه، المظهر الخارجي مطلوب بردو عادي

سارة بسخرية : والله ! براحتك يا مرام بس بكرا تفوقي

_اووف مش كل شوية الكلام دا يا سارة هتيجي ولا اخرج لوحدي 

– جاية يلا .. 

*************************

جبت هدوم كتير  كلها ضيقة حسيت بضيق بس كابرت وحاولت اقنع نفسي انها مناسبة هما بصراحة عجبوني وشايفة انهم شيك اوي، صحيت تاني يوم عشان اروح الشغل، بشتغل دكتورة تحاليل ف معمل  كنت بلبس وانا بتخيل سيناريوهات كتير لما شادي يشوفني بستايلي الجديد انا بشوفه كل يوم وانا نازلة الشغل بيكون رايح شغله هو كمان، بكراش عليه من زمان وعرفت انه شغال ف شركة محاسب وباين ان ظروفه المادية كويسة جدا…. 

لبست شميز كاشمير وربطه من قدام وبنطلون ابيض وكوتشي كاشمير، سبت شعري وجبته ع الجنب كدة وكان جاي شوية على عيني هو لونه بني فاتح زي لون عيني بردو، حطيت فاوندشن يليق مع درجة لون بشرتي هي فاتحة شوية وحطيت روج كاشمير وكملت بقيت الميك اب، كنت ببص لنفسي بانبهار مكنتش مصدقة ان دي انا وان شكلي هيبقى حلو كدة طلعت برا وماما كانت بتحضر الفطار بصتلي بقرف ودورت وشها الناحية التانية

-مفيش صباح الخير حتى يا ساتر

_ ربنا يهديكي يا مرام

– انتِ شايفاني كافرة في ايه

_الفطار عندك جاهز وانا داخلة اشوف اللي ورايا

سابتني ومشت كنت عارفة انها زعلانة مني بس مش هفضل طول عمري انفذ طلباتهم من غير تفكير انا معدتش صغيرة!

فطرت ونزلت تحت مكنش لسه نزل فضلت واقفة شوية لحد ما لمحت انه ماشي ورايح يركب عربيته، طلعت م البوابة وتعمدت امشي م الحتة اللي ماشي فيها وانا عاملة نفسي مش مركزة معاه لاحظت بطرف عيني ان نظراته كانت متسلطة عليا وشي سخن وكنت متوترة وبعدين فجأة لقيته قطع طريقي ووقف قدامي

بابتسامة : صباح الخير

بتوتر : ص.. صباح النور

لاحظت انه بصلي من فوق لتحت مقدرش يخبي نظرات الإعجاب وانا كنت حاسة ان قلبي بيرقص وخطتي هتنجح

_ انتِ راحة شغلك اكيد شفتك ماشية لوحدك والشارع مفيهوش حد والمواصلات اصلا بهدلة فقلت اوصلك

– لا لا ملوش لزوم انا بروح كل يوم لوحدي وخدت على بهدلة المواصلات وبعدين انت اكيد عندك شغل

_ هو شغلك فين

– ف شارع نور الدين 

_ طب دا انا حظي حلو بقى قريب م الشركة اللي بشتغل فيها اصلا مش هتأخر ولا حاجة احنا جيران ولازم اعمل معاكي الواجب يلا اركبي مش الجيران لبعضها ولا ايه

كنت مترددة الاول وبعدين حسيت انها فرصة عشان اتعرف عليه اكتر ف ابتسمت وركبت معاه

*ف الطريق 

_ بتشتغلي ايه بقى ف المعمل دا

– دكتورة تحاليل

_ ما شاء الله وعلى كدة كنتي دحيحة بقى

-اه اوماال 

ضحكنا وهو فضل باصصلي فاتكسفت وبصيت الناحية التانية : تعرفي انك حلوة اوي وانتِ بتضحكي

– احم. ش.. شكرا

ضحك: شكلك بتكسفي،صحيح نستيني أسألك اسمك ايه من ساعتها

_ مرام

– اسمك حلو اوي وانا شادي ابو الفرج  

وصلت ونزلت م العربية مشيت ولاحظت انه فضل باصص عليا لحد ما طلعت المعمل 

لاحظت ان الكل كان مستغرب مني وكتير منهم بصلي بقرف عشان قلعت الحجاب بس انا كنت متوقعة رد الفعل دا 

**************************

بعد اليوم دا شادي بقى يقصد ينزل ف نفس الميعاد اللي بنزل فيه وكان بيصمم انه يوصلني بحجة ان طريقه نفس طريقي لحد ما بدأنا ناخد على بعض وتعرفنا اكتر كان بيحكي عن صحابه البنات وان هما زي اخواته وكان دايما بيحاول يركز ع النقطة دي وبصراحة كنت بفرح لما احس انه قاصد يفهمني انهم مجرد صحاب ومع الوقت لما نقرب هطلب منه يبعد عنهم

كنت راكبة معاه وبنتكلم زي كل يوم

-مش ناوية تديني رقمك بقى

اتخضيت من طلبه المفاجئ : رقمي.؟ ليه؟

– يعني مش احنا بقينا صحاب ولا ايه

خفت يكون معتبرني زيي زي صحابه عادي فرديت بجدية : شادي لو انت فاكرني زي البنات اللي تعرفهم فأنت غلطان انا مش بتاعة كدة

ولع سجارة ورد بعصبية : وعلاقتنا دي عبارة عن ايه معتبراها مش علاقة اصلا صح ؟ ردي

فضلت ساكتة وبصتله بلوم خفت اقوله اني مش هقبل غير انها تكون علاقة رسمية يفكرني مدلوقة عليه

غمض عينه ونفخ دخان السيجارة وقال بهدوء : طب انتِ في مشاعر من ناحيتك ليا متنكريش انا حاسس بدا وانا كمان.. بحبك يا مرام

مكنتش مصدقة اللي سمعته وحسيت اني هموت م الفرحة 

_ رديييي يا مرام

عيني دمعت وانا بتكلم : وانا كمان بحبك بس مش هعرف ارتبط غير ف علاقة رسمية يا شادي شغل الصحوبية دا مش بتاعي

ابتسم ومسك ايدي حسيت اني تلجت فجأة مكنتش عارفة اعمل ايه لسه جوايا حاجة بتقولي اللي بتعمليه غلط بس بتجاهل الصوت دا حسيت ان قلبي بيدق جامد وهو بصلي وكمل: بس كدة يا ستي وانا اصلا مش عايز غير دا بس كنت خايف اقولك كدا علطول وتكوني لسه مش متأكدة من مشاعرك، انا هاجي اطلبك من مامتك انهارده بليل ها ايه رأيك

ضحكت والفرحة مش سيعاني، هزيت راسي بموافقة وسحبت ايدي من ايده براحة 

************************ 

دخلت الشقة وانا بغني كنت عايزة اعرف ماما ان شادي هيجي بليل صحيح العلاقة بينا الفترة الأخيرة بقت شبه معدومة بس لازم اعرفها 

كانت قاعدة ف الصالة بتتفرج ع التليفزيون فقعدت قدامها 

بصتلي باستغراب : خير !

_ في عربس جايلي انهارده بليل هيطلبني منك

– عريس! عريس مين دا وأهله مين وعرفته امتى؟

ضحكت : مش هتصدقي لو قلتلك دا شادي جارنا لو تعرفيه محاسب ف شركة محترمة

حسيت بشبح ابتسامة على وشها بس هي دارتها عشان زعلها مني وردت بسخرية :وانتِ واثقة من أخلاقه بقى ولا انا بسأل مين هه

رديت بعصبية :قصدك ايه يا ماما اني معنديش اخلاق مثلا

– بلا قصدي بلا مقصديش انا قايمة اشوف الناس اللي جايين دول 

***************************

دخلت اكلم سارة واقولها على اخر الاخبار

_ مش هتصدقي اللي حصل

– ايه بسرعة قولي

اتنططت وقلت بفرحة :شادي هيجي انهارده يتقدملييي

كنت عارفة ان سارة مبتحبش شادي ولا مرتاحة لعلاقتنا بس هي حست بفرحتي وردت بنفس الحماس 

– بجدد انا بصراحة مكنتش متخيلة انه ياخد خطوة زي دي ربنا يفرحك يا ميرو

***************************

_ لولولولولولولولي 

يا دبلة الخطوبة عقبالنا كلنااا ونبني طوبة طوبة ف عش حبنااا

كنا ف القاعة وحاسة ان الدنيا بدأت تضحكلي اخيرا، صحابي جم عشان يسلموا عليا وهو صحابه سلموا عليه بردو لحد ما لقيت صحابه البنات كمان جم وكان لبسهم كلهم مقرف بطريقة مقززة انا برغم اني قلعت الحجاب بس مفيش مرة وصلت للمرحلة دي وهو قام يسلم عليهم اللي دهشني انهم كانوا بيسلموا عليه بالاحضان، حسيت ان الدم طلع ف وشي ومكنتش طايقة اي حد حتى هو

_ الله شادي عروستك زي القمر بس شكلها كئيبة ولا ايه 

وضحكوا كلهم 

بصتلهم بغيظ وحاولت اتماسك عشان الليلة تعدي اللي ضايقني اكتر كان فيهم واحدة كانت بتبصلي من تحت لتحت وكأنها عايزة تموتني نظرتها مش طبيعية وحسيت انها مش طايقاني 

فضل مزاجي وحش والكل كان ملاحظ 

سارة : في ايه يا مرام الناس مستغربين من منظرك والكل بيسأل

_ مفيش يا سارة انا كويسة بس مصدعة شوية

بصتلي بعدم تصديق : هنعرف بعد الخطوبة!

اليوم عدى والكل روح م القاعة والمفروض ان شادي وأهله معزومين عندنا واحنا ف العربية رايحين البيت سألني : كان مالك بقى يا مرام

حسيت ان عايزة انفجر فيه بس مطلعش مني غير كلمة واحدة : مفيشش

_ مفيش بردو ؟كنتي غيرانة من صحابي انا عارف بس متوقعش انك تطلعي غيورة اوي كدا

بدأت انفعل : غيورة!، انت شايف ان طبيعي يجوا يحضنوك كدة وانت قاعد جنب خطيبتك يعني بجاحة ولبس مقرف زيهم دا عادي ؟

ببرود : عادي يعني يا مرام هما جايين جامع دي خطوبة طبيعي يلبسو كدة وهما حضنوني على اساس اننا اخوات مفيش حاجة وانا قايلك دا قبل كدة

_ اخوات! مفيش حاجة اسمها كدة وفي واحدة فيهم كانت بتبصلي بغل وباين جدا انها مش طايقاني اكيد بتحبك

حسيت انه اتوتر : اا.. انت. بب. بتتخيلي كلهم بيعتبروني اخوهم 

وبعدين كمل بزعيق : وبعدين احنا هننكد من اولها قلنا صحاب خلصنا بقى

عيني دمعت مكنتش متخيلة ان اليوم دا يبوظ بالشكل دا لومت نفسي اني فتحت موضوع صحابه انهارده كان لازم استنى شوية بس غصب عني مقدرتش استحمل المنظر  

**********************

عدى اسبوع من ساعة الخطوبة كنا بنتكلم كل يوم بس امبارح شدينا ف الكلام بسبب كومنت عل صورته من نفس البنت اللي كانت بتبصلي يوم الخطوبة

_ شادي يا انا يا صحابك ف حياتك

على صوته:انتِ اكيد اجننتي صحابي حاجة وانتِ حاجة تانية

_ المفروض ان انا الانسانة اللي هتكمل معاها حياتك ومفيش حاجة اسمها صحوبية ولاد وبنات اصلا

بسخرية : انتِ هتعمليلي فيها شيخة دا انتِ قلعتي الحجاب عشاني

اتوترت وقلبي فضل يدق : اا.. انت .. انت  بتقول ايه

_ فكرك اني مش عارف انك بتحبيني من زمان كنت بشوفك بتبصيلي على طول بس مكنتيش ف بالي الصراحة، لما شفتك بعد التغير وعديتي من قدامي توقعت سبب التغير دا وموافقتك انك تركبي معايا اكدلي احساسي ولا ايه؟

فضلت ساكتة حسيت باحراج كبير وقرفت من نفسي قفلت ف وشه وانهارت كنت فاكرة اما اتخطبله السعادة هتدخل حياتي بس اكتشفت ان  يمكن كنت  سعيدة اكتر قبل ما يدخلها مفيش اي حاجة مشتركة بينا ومفيش تفاهم مفييش

********************************

وانا مروحة الشغل لقيت موبايلي بيرن افتكرته هو بس لقيتها ماما : الو 

_ بتقولي اييييه