اسكريبت الخائن الفصل الثاني 2 بقلم سولييه نصار

صرخت لما حسيت أن العربية هتدوسني لقيت حد شدني وحضني…. زقيته وقولت :

-ابعد عني  يا خاين يا غشاش…. أنا بكرهك عارف فاهم يعني  ايه بكرهك…

-منتهى حبيبتي أهدي شوية…. اهدي ابوس ايديكي.

-طلقني يا زين…. طلقني مستحيل أعيش مع خاين زيك

بعدين زقيته وجريت علي بيت بابا.

…….

بعد ساعة.

كنت منهارة من العياط في حضنها… كنت حاسة إني هموت… قلبي كان بيوجعني… ليه يعمل  كده…. ليه يكسرني بالشكل ده.

-كفاية يا حبيبتي وجعتي قلبي.

-خانني يا ماما بعد العمر ده خانني

-بس انتي بتقولي أنها مراته.

-وهتفرق ايه كده أو كده خيانة.

بعدت ماما شوية وقالت:

-يا بنتي هو اتجوز وده حلال شرعا معملش حاجة غلط.

كنت ببصلها بصدمة وقولت :

-ماما انتي بتقولي ايه؟ بقولك خانني

-دي مش خيانة يا حبيبتي ده شرع  ربنا.

قومت وانا متعصبة وقولت:

-لا لما يتجوز من ورايا خيانة…. لما يكدب عليا خيانة…. لما يخدعني خيانة…. كان بيستغلني يا ماما.

قامت ماما ومسكت أيدي وقعدتني وقالت :

-أنا مش حابة ازعلك بس الغلط غلطك  يا منتهى

-غلطي!!!

-أيوة انتي اهملتي جوزك… نفتيه من حياتك واهتميتي بعيالك  أكتر.

قومت واتعصبت وأنا بقول :

-معقول انتي يا ماما تقولي كده تقفي في صفه

-يا بنتي أنا…

-أنت ايه يا ماما… انتي ايه بس… أيوة أنا أهملت…. بعدت بس هو اهمل أكتر مني أنا كنت في البيت الأم والأب…. كنت أنا اللي بودي البنات المدارس…. أنا اللي كنت بذاكرلهم… أنا اللي كنت بسال وبهتم بيهم…. سبت شغلي عشان خاطرهم….. زين حتي ميعرفش بناته في سنة كام يا ماما… زين رمي عليا كل الحمل وهرب… اهتم بشغله بس… قوليلي بعد ده كله وبعد الإهمال وحرق الأعصاب ده يحقلي اعرف راجل غيري…. قوليلي يا ماما ردي عليا!

-يا بنتي ده راجل غيرك مش هيستحمل الإهمال انتي تستحملي لكن هو لا

-أنا مش مصدقة أنك بتفكري كده افتكرتك هتدعميني

-يا بنتي اسمعيني بس.

-خلاص يا ماما أنا فهمت… انتي مش حابة إني اقعد هنا… تمام أنا هرجع بيتي واحط جزمة في بوقي واستني البيه…. ما خلاص اهلي باعوني.

ولسه همشي لقيت ماما مسكت أيدي وقالت :.

-روحي جيبي هدومك من البيت واقعدي هنا.

……..

-يخربيتك يا ملك ازاي تقوليله انك حامل وانتي لا زين لو عرف مش هيرحمك.

-اللي حصل يا دعاء بقا… مش عارفة اعمل ايه انا خايفة زين يسيبني… واحد غني زيه مينفعش اسيبه  يفلت من أيدي.

-هتعملي ايه طيب.

ابتسمت بخبث وقالت :

-هطير مراته من ايده وساعتها مش هيلاقي غيري في وشه.

-ازاي بقا.

-هقولك.

……….

دخلت بيتي بسرعة وأنا بحضر الهدوم بسرعة فجأة وقفت لما لقيت حد دخل البيت… طلعت علي الصالة ولقيت زين.

-منتهى حبيبتي انتي هنا!

رفعت رأسي وقولت :

-أنا هحضر شنطتي وهمشي…

طلع المفتاح وقفل الباب كويس وقال :

-لا مش هتطلعي

-يعني ايه…

-يعني هتبقي هنا لحد ما نحل مشاكلنا.

لسه هزعق معاه لقيت صوت رسالة علي الواتس فتحتها واتصدمت لما لقيت…..