رواية مقتحمة غيرت حياتي الفصل الثلاثون 30 بقلم نورهان ناصر

كانت تجلس إلي جوارها بأعين باكية وهي تتطلع إليها وتغشي عيناها الدموع ، نظرت إلي جسدها الذي أصبح ضئيل من شدة إعياءها وتعبها بينما كانت تركض أسماء علي فراش المشفي بإعياء شديد جسدها موصل بأجهزة استشعار نبضات القلب و نائمة في سكون تام منذ أكثر من أسبوع وهي علي تلك الحالة

 تحدثت قدرية بدموع وهي تمسك بيدها :  عارفه انتي الوحيدة اللي ملكيش ذنب في أي حاجه حصلت رغم كدة وقعتي انتي ضحية للانتقام كنتي دايما مطيعه ليا روحي يمين يا اسماء تروحي روحي شمال تروحي ومفيش علي لسانك غير حاضر يا خالتي ……صمتت قليلاً تبتلع الغصة التي تشكلت في حلقها …. لتكمل بدموع …..كنت بحس بيكي كل ليلة تدخلي اوضتي تبوسيني علي خدي وتغطيني كويس وانا  …….انا ولا …….. مرة عاملتك بحنية ولا مرة حضنتك ولا مرة عاملتك كويس كنت دايما بضربك واهينك و اقولك امك بتكرهك كان قلبي قاسي عليكي أوي رغم ده كله عمرك ما اشتكيتي دايما علي وشك ابتسامه راضية رغم حزن عيونك بس مكنتيش بتبيني لحد حزنك وضعفك أنا اذيتك في شرفك وقولت عليكي كلام باطل وقذفتك بالباطل وطول عمري وانا بأذي فيكي وانتي ملكيش ذنب  الكره ده اتولد جوايا من وقت ما بنتي ماتت وامك كانت السبب وقتها كانت حامل في دينا اختك انتقمت منها فيكي وفي اختك بس والله غصب عني أنا لسه مريضة محدش يعرف السر ده غيرك ….ايوه انا لسه  مخفتش  منها ……اعمل ايه مش بأيدي انا اللي جبت دكتور وخليته يقولكم اني شُفيت تماما من الانفصام علشان …….علشان …أقدر اتجوز  ابوكي …و وانتقم من اختي ….. ……اجهشت في البكاء …..وهي تتابع بانتحاب بس الحقيقه اني لسه بعاني منها … طب تعرفي يا اسماء في نفس الليلة اللي خرجتي فيها علشان تشوفي علا صاحبتك واللي المفروض انفذ فيها خطتي وقتها انا نزلت علشان اشوفك حتي استغربت وقتها إنك أول مرة تتاخري بره اوي كدة ……..و ملقتكيش كان وقتها الأوان فات وانتي اختفيتي ساعتها دخلت اوضتي فضلت اعيط ودمعتي منشفتش و لما جه  الصبح  اتحولت  لوحش تام يفتري علي لحمة ولقتني بقف في نص الشارع وبقول بعلو صوتي انك خاطية وجبتلنا العار  …….توقفت عن استرسال الحديث عندما حركت أسماء يدها و تساقطت العبرات من عينيها دلالة علي انها تستمع لكل كلمه نطقت بها 

قدرية بدموع :  همشي أنا بقي اخاف لو بقيت اكتر من كدة تحضر واذيكي انا حبيتك والله …..عارفه مش هتصدقيني بس والله حقيقه انا لو في وعيي مش هعمل فيكي كدة انا اصلا مش قادرة اصدق إني كنت هموتك ……. انا اسفه يابنتي علي كل حاجه عملتها سامحيني بس حزني علي بنتي وحقدي وقسوة قلبي مع تأثير السلبي للانفصام كل ده اثر معايا وخلي الشخصية التانيه تسيطر عليا لدرجة لغت شخصية قدرية الحنونه تلاقيكي …..مستغربه صح خالتك قدرية وحنونه مش لايقه صح …كان زمان يا اسماء مفيش احن ولا اطيب من قلبي بس مع مرضي اللي كبر معايا أثر عليا خالص وبقيت اقسي من الحجر  وكرهي وحقدي وكسرة نفسي اني مش هخلف تأتي كل ده شجع شخصية التانيه وملاها بالشر والحقد وخلاني أذل اختي وادمر حياتها واذيكي يا اسماء انا همشي وهبعد عن حياتكم علشان ترتاحوا فعلا ابوكي كان معاه حق لما قال كفاية قدرية واحدة بس دلوقت أدركت ليه قال كدة سامحوني ! 

كفكفت دموعها بيدها وهي تقترب منها بهدوء بعد أن نهضت عن كرسيها ثم انحنت قليلاً عليها وقبلتها من خدها بحنان وازالت دموعها بيدها ثم ابتسمت قائلة

قدرية ببسمه: سلام يا أسماء 

أنهت كلمتها وهي تتسحب خارجة من الغرفة بينما كانت الممرضة تنتظرها علي باب الغرفة 

قدرية بامتنان: شكرا يا بنتي 

الممرضة بقلق : العفو 

قدرية بهدوء: مفيش داعي تقلقي خالص أنا ماشيه 

الممرضة بتوتر: اصل لو الظابط سيف شم خبر انك شوفتيها هروح وري الشمس 

قدرية وهي تحادث نفسها: حقه يخاف عليها وهو أنا يعني عملتلهم ايه غير إني اذيتهم  

قدرية بتذكر : هي حركت أيديها وعيطت ابقي شوفيها 

الممرضة : ده رد فعل كويس إنها استجابت ليكي و إن شاء الله هتفوق من الغيبوبة دي الدكتوره قالت إنها مؤقتة بس وربنا يسهل وتفوق بسرعه 

قدرية بهدوء: يارب يلا سلام عليكم ابقي طمنيني عنها الله يباركلك 

الممرضة ببسمه: حاضر 

خرجت من باب الطوارئ تجر قدميها حسرة وحزنا علي حالها كانت تنزل درجات السلم وتتساقط دموعها حزنا  وهي تتذكر كيف عاني منها الجميع ولكنه أمر خارج عن إرادتها فهي للأسف تعاني من انفصام الشخصية منذ زمن بعيد ولم تشفي منه للأسف الشديد أذت نفسها وغيرها بلا شعور منها 

_ قوم ريح شوي بقالك علي الحال ده من اسبوع 

نطق بهذه الكلمات جاسر وهو يقترب يجلس بجواره علي مقعد في حديقة المشفي 

سيف بتعب : جاسر أنت إيه اللي  جابك مش قولتلك روح الساعة 3 الفجر جي ليه ؟ 

تحدث جاسر بعتاب: ايه يا عم سيف ده اللي جابني صاحبي اللي محتاجني ولازم اكون واقف معاه 

سيف بدموع : تعبان يا جاسر ! 

أنهي سيف حديثه ليعانقه جاسر بقوه مشدداً عليه بيديه وتحدث بدموع : فتره وهتعدي وهتقوم إن شاء الله 

سيف برجاء : يارب يا جاسر بقالها اكتر من اسبوع في غيبوبه اتحرمت من صوتها من اني اشوف عنيها انا تعبان من غيرها مش قادر أشوفها في الوضع ده

جاسر وهو يربت علي ظهره: هتقوم إن شاء الله وهتعملها فرح كبير  كمان 

ضعفت نبرة صوته وهو يقول ببكاء في حضن صديقه

سيف بدموع  : فرحها ….فرحها كان المفروض يكون الاسبوع اللي فات وهي لسه غايبة في عالم تاني وسيباني هنا لوحدي انا مش بنام يا جاسر عيني مبتغفلش وهي مش معايا 

جاسر بدموع : اتماسك علشانها هي بتاخد قوتها منك أنت وبعدين الدكتورة طمنتك  هي غيبوبة مؤقتة لأن أعضاءها الحيوية في حالة كويسه بس الصدمة اللي اتعرضتلها خلاتها اختارت تدخل غيبوبة بإرادتها مش سهل بردو اللي مرت بيه 

سيف وهو ينتحب بقوة: طب وانا مفكرتش فيا اعمل ايه من غيرها و … و …حالي هيبقي عامل ازاي وهي بعيدة عني …ليه  …ليه تدخل في غيبوبة  ….ليه ؟؟ 

جاسر بدموع: اهدي يا سيف إن شاء الله هتقوم ….صمت قليلاً يبتلع تلك الغصة التي تشكلت في حلقه. ……ليتابع بمرح ….طب والله هي أصيلة علشان تأجل ميعاد فرحك وتعملوه معانا انا وندي الشهر  الجي خصوصاً إن امتحانات الثانويه هتبدأ أهو 

سيف بدموع: آه صحيح فكرتني خرج حمزة من هناك 

جاسر بضيق: خليه ينشف شوي ! 

سيف بتعب: هو راجل يا جاسر وبعدين امتحاناته قربت خليه يخرج كفاية كدة كدة كدة أنا مراقب ابو عاصم من خلال الشريحه ومتقلقش مش باين ليها اي أثر في جلده دي شريحه متطورة وباعلي جودة 

جاسر بتنهيدة: إيمتي نخلص بقا منهم ومن كل المشاكل دي 

سيف بارهاق: قربنا يا صاحبي للنهاية !

جاسر وهو ينظر إلى السماء : بس عارف إحنا ولا في رواية أو مسلسل هندي آه والله مين كان يصدق إن دينا ومراتك أخوات أو إن أمها تبقي عايشه لا وإن خالتها تكون مريضة شيزوفرينيا يااااااااااه ده ولا في الخيال يا سيف 

سيف بتعب: عندك حق انا لو حد كان قالي اني هتجوز اخت دينا مكنتش صدقته أو إني أحبها كدة بس سبحان الله ربك لما بيقدر لكل واحد نصيبه من الدنيا دي بيبقي سبحانه حاسب له كل خطوه بيخطيها سبحانه القدير العليم شوف الدنيا قد ايه صغيرة ربك دبر كل حاجه علشان النهاية دي أسماء تلاقي أختها وأمها وعلشان خالتها دي يكون ليها مبرر بافعالها خلاها مريضة وليس علي المريض حرج

جاسر بتنهيدة قوية : فعلا معاك حق بس اللي مرينا بيه مش سهل خالص ده انا كنت هتجنن عليك لما مروان قالي علي عربيتك ……

أنهي كلمته ليشرد ويعود بذاكرته لأحداث الاسبوع الماضي

عودة إلى الوراء 

جاسر بحزن : هو ده المكان يا مروان ؟! 

قالها ثم جثي بعقبيه علي الارض بقهر وهو ينظر لسيارة صديقه المهشمه 

اقترب مروان منه ونزل إلي مستواه وهو يضع يده علي كتفه يربت عليها ودموعه تتسابق في الهطول من عينيه  

مروان بحزن: أيوة هو ده المكان يا جاسر بس ….

قاطعه جاسر وهو يصرخ بعنف ويهز رأسه : أكيد مكنش فيها لازم ندور كويس أنا عايزك تعملي دورية تنشيط للمنطقه دي كلها نزل عساكرك يدوروا كويس أنا واثق إنه في مكان هنا بسرعه يا مروان مفيش وقت نضيعه

مروان بحزن: حاضر 

نهض عن الأرض وأخذ يكلم مساعده بأن يرسل له دورية عساكر مكثفه لمحاصرة المكان بأكمله حتي يعثروا علي الظابط سيف و زوجته 

مضت نصف ساعة وكان المكان يعج بالكثير و الكثير من العساكر وانطلق كلا منهم يبحث في اتجاه معين 

فذهب جاسر مع مروان وبعض العساكر وانطلق مساعد مروان ومعه العساكر يبحث جيدا حول المنطقه 

بعد مرور ساعة من البحث المتواصل تقابل جاسر مع مروان ومساعدية ثم صرخ جاسر بانفعال شديد

جاسر بغضب : هيكون فين يعني دورتوا كويس 

تحدث مروان بحزن وهو يحاول تهدئة صديقه ولكن كيف له أن يهدأ هو او حتي جاسر فالوضع لا يتحمل فهذا سيف أكثر من مجرد صديق و زميل لهم فهو بمثابة اخ حقيقي لهم 

مروان بحزن: هندور تاني وتالت لحد ما نلاقيهم 

تحدث أحد العساكر بقلق : حضرة الظابط في بيت في قلب الغابة دي بس بس يعني بيقولوا عليه إنه مهجور وفي ست عجوزة عايشه فيه لوحدها مجنونه يعني 

أقترب جاسر منه بغضب شديد ثم أمسكه من تلابيبه وهو يصرخ به في حدة

جاسر بحدة : فين مكانه وليه ما قولتش من بدري اتكلم 

تحدث العكسري بتوتر: اصل اصل هو بيت وحيد بس وفي الغابة ف ..

صرخ جاسر يقاطعه وهو يوجه أوامره للعساكر بالتوجه إلي ذلك البيت وقد دب الأمل في قلبه أن يجد رفيق الدرب هناك 

توجه العساكر ومعهم جاسر و مروان قاصدين بيت تلك العجوز 

_ طب ادخل ارتاح يا ابني شوي وانا هفضل جنبها شكلك مرهق اوي 

قالتها السيدة صاحبة الوجه المبتسم والبشوش وهي تدلف الي الغرفة بعد أن نقلوا أسماء من علي تلك الأريكة لكي تاخذ راحتها أكثر 

رد عليها سيف وهو يهز رأسه بمعني” لأ” وهو يقول 

سيف بتعب : لأ أنا كدة مرتاح شكرا ليكي ادخلي انتي نامي دلوقت وانا هفضل معاها للجرح ينزف تاني أو حرارتها ترتفع 

أومأت برأسها وابتسمت له علي حُـبه لزوجته واهتمامه بها ثم قالت وهي تميل رأسها للأرض بحزن

: انا اسفه يا بني معنديش تلفون هنا في بيتي زي ما انت شايف أنا عايشه هنا لوحدي من بعد ما ابني استشهد الله يرحمه وانت عارف هو مكنش متجوز مات وملهوش يا حبة عيني سند أو ذكري منه بس انا حبيت أقعد في البيت ده هنا علشان ليه فيه ذكريات كتيرة 

نهض سيف واتجه ناحيتها ، رفع رأسها ثم قبًلَها 

ومسح دموعها بيده وقام باحتضانها وهو يقول لها بصوت هادئ يشوبه التعب 

سيف بتعب: انا إبنك وأسماء تبقي مرات إبنك وبنتنا هي حفيدتك انا مش هسيبك تقعدي هنا لوحدك كفاية وحدة بقا 

بكت بشدة وهي تشدد من احتضانه بقوة وهي تقول : مش هقدر يابني انا اتعودت أقعد هنا خلاص المكان ده ارتبط بيا ومقدرش اسيبه بس اوعدني متنسانيش وتبقي تيجي تزورني أنت وأسماء و غُفران بنتكم 

أخرجها سيف من حضنه بهدوء وهو يقول : أوعدك  يا أمي 

ابتسمت من بين دموعها وهي تقول بحزن ولهفه: أمك!!!

أزال سيف دموعها وتحدث بهدوء رغم تعبه : أيوة أمي كل أم شهيد انا أبقي أبنها وهي تبقي أمي ! 

اتسعت ابتسامتها لتقبل أعلي رأسه بحب وتقول بصدق ونبرة صوتها يتخللها البكا: ربنا يحميك لشبابك ويوفقك في حياتك وشغلك يارب ! 

آمن علي دعاءها فاستأذنت هي وخرجت تاركه له مساحه مع زوجته وأغلقت الباب خلفها وهي تستند عليه وتبتسم من بين دموعها ثم تقول : و نعم الصحاب يا زين هو فعلا راجل ربنا يحميه ويبعد عنه كل شر 

كانوا جالسين وتعلو ضحكاتهم القذرة في أرجاء المكان تحدث ماهر الاخ الشقيق لأبو عاصم بخبث شديد وهو يقول: احسن حاجه مفرحه قلبي غير طبعاً رجوعك لينا يا اخي هي أننا خلصنا من الظابط سيف كان عملنا قلق كبير 

تحدث ابو عاصم بمكر : اهم حاجه تكون نفذت اللي قولتلك عليه أنت عارف كويس مش بسهوله هيموت ده صقر المخابرات 

تحدث ماهر بخبث: نفذت طبعاً منا عملت حسابي بردو و مراته المسكينة اكيد هتموت معاه في القنبلة اللي جيه 

ابو عاصم بخبث : امال سيادة اللواء فين ؟ 

اجابه ماهر وهو يرتشف من كأس الخمر الذي في يده : في اجتماع بخصوص التهمة اللي كانت موجهه للظابط سيف قال ايه في استدعاء ليه ؟ 

ابو عاصم بشك : تفتكر شكوا فيه ؟ 

ماهر بلامبالاه: مظونش ده مدسوس بقاله عشر سنييين في وسطيهم هيشكوا فيه دلوقت وحتي لو شكوا اهو هيبقي لمصلحتنا هما هيتلخموا فيه واحنا هنبعد عن الأنظار والعيون اللي مقيدة حركتنا ونتفرغ بقا لشغلنا عايزين نرجع للعراق بقا 

رد عليه ابو عاصم وهو يبتسم بخبث: مش قبل ما نتطمن علي الظابط سيف مش ده الواجب بردو ….أنهي كلمته وهو يضع يده علي جانب وجهه يتحسسه ليتذكر  كيف عامله سيف وقام بضربه بقسوة شديدة ليتوعد له أكثر 

ماهر بمكر : الضربة التانيه هتقضي عليه 

متقلقش 

ابو عاصم بشر : اتمني !

أغلق الباب وعاد أدراجه بهدوء ومازالت الصدمة تسيطر عليه ، ذهب حمزة يمشي بهدوء حتي لا يثير الشك به واتجه الي مكان منعزل عن المخيم وأخرج هاتفه وضغط علي بعض الأرقام ولكن من دون فائدة فلا أحد يجيب ظل يعاود الاتصال مراراً وتكراراً بدون جدوي 

حمزة بقلق : رد يا جاسر رد عليا 

بينما علي صعيد آخر كان مازال يسير بحثا عن ذلك المنزل المهجور كما يقولون فهو حقٱ يستعجب لكلامهم فكيف يكون مهجورا وتسكنه امرأة ، أطلق جاسر تنهيدة قوية عقبها وهو يهتف بتوتر 

جاسر بقلق: هو ده البيت ؟ 

أومأ العسكري له، فتقدم جاسر وخلفه مروان صوب الباب 

دق جاسر علي الباب بروية وانتظر دقائق معدوده حتي أتاه الرد

فتحت السيدة مبتسمه كعادتها وهي تقول لهم : خير يا ابني ! 

رد جاسر والقلق يسيطر عليه : ف ..فيه ظابط ..عربيته انفجرت قريب من المكان ده ….شوفتيه 

اتسعت ابتسامتها لتقول : يبقي أنت جاسر صح 

استغرب جاسر أنها تعرفه إلا أنه لم يعقب سوي بإيمأه من رأسه بأنه هو من سألت عنه ثم تحدث بنفاذ صبر

جاسر بقلق: هو سيف موجود هنا شوفتيه 

هزت راسها بإيجاب وتابعت: أيوة هنا كويس يا ابني انك جيت مراته تعبانه انا مردتش اخوفه عليها لانه أصلا مرهق بس حرارتها مرتفعه اوي ولازم تروح المستشفي دي نزفت دم كتير 

جاسر بحزن : انا هدخل اشوفه 

افسحت له المكان وتنحت جانباً وهي تقول : اتفضل يا إبني هو عينه غفلت شوية صحيه وامشوا علي المستشفي 

دخل جاسر وكاد يدلف إلي الغرفه التي يقيم سيف بها إلا أنه تراجع ولم ينسي الأصول في مثل هذه المواقف فتنحنح وقال بهدوء مصطنع فقد فقد السيطرة علي أعصابه من شدة توتره وخوفه عليهم 

جاسر بهدوء مصطنع: طيب هستاذنك تدخلي تصحيه انتي ! 

هزت راسها بتفهم وزادت نظرة الإعجاب به كما حدثها سيف عنه وقالت : حاضر  ……أنهت كلمتها ودلفت إلي الغرفه فوجدت سيف مازال يجلس علي الأرض ويضع رأسه علي جانب الفراش ويده تمسك بيدها رغم تعبه وألم رأسه

ابتسمت علي ذلك المشهد واقتربت بهدوء منه وربتت علي كتفه بحنان ففاق سيف مزعورا وهو يقول بفزع 

سيف بفزع: أسماء !!!

تحدثت السيدة بروية : اهدي يا ابني مفيش حاجه أسماء كويسه أهي قدامك قوم تعالي صاحبك جاسر بره مستنيك يلا وأنا هغير لأسماء هدومها و ….

قاطعها سيف بصرامه: لأ محدش هيقرب منها ……صمت يتابع نظرة التعجب  التي ارتسمت وجه السيدة مما تفوه به ….فتنحنح وتابع …..  انا اسف يا امي بس انا ههتم بيها 

هزت راسها بقلة حيلة وهي تومأ له ثم خرجت و أغلقت الباب خلفها وجلست مع جاسر الذي تلفت أعصابه من الانتظار وتحدثت بهدوء: هو شوية وهيخرج 

أومأ جاسر لها 

بينما في داخل الغرفة كان سيف يقف عاجزاً لا يدري ماذا يفعل 

سيف بحزن : طب أعمل إيه مش عارف افكر مش هينفع أحط النقاب علي ….صمت قليلاً وهو يتذكر  شيء ما …..ليهتف بحزن ….ده اتحرق مع العربية وقت الانفجار …طب اعمل ايه …يا الله ساعدني 

أقترب سيف منها وحملها بين يديه بهدوء وحذر شديد   ونادي علي السيدة بصوت مرتفع نسبياً

سيف : يا أمي عايز طرحه تكون خفيفه من عندك ولو فيه حد مع جاسر يا ريت يستني بره 

فهم جاسر ما يرمي إليه ليقول له : تمام يا سيف أنا كلمت عربية الاسعاف اللي معانا وهما علي وصول 

سيف بتوتر : بسرعه يا جاسر الجرح هيتفتح تاني ! 

أتت السيدة تحمل في يدها طلبه وناولته إياه من خلف الباب فوضع سيف الحجاب علي وجهها وخرج وهو يحملها 

جاسر بدموع: سيف أنت كويس ؟

سيف بحزن : لأ أنت عارف ….. استعجل يا جاسر بسرعه حرارتها مرتفعه اوي ونزفت كتير اكيد محتاجه نقل دم بسرعه 

جاسر بقلق: طيب طيب ثم أخرج جهاز اللاسلكي وهاتف مروان بتوتر …..مروان اخبار عربية الاسعاف ايه وصلت ….. طيب  تمام أوي هو هيخرج بيها دلوقت 

جاسر بتوتر : يلا يا سيف عربية الاسعاف مستنيانا بره 

أومأ سيف له واتجه ببصره الي السيدة يشكرها التي فهمت نظرته وابتسمت له ودعت الله أن يحميها ويحفظها له ثم غادر سيف و جاسر و وجدوا سيارة الإسعاف تنتظرهم  فأخرجت الممرضة النقالة ووضع سيف أسماء عليها بحذر وصعد إلي جوارها بينما توجه جاسر إلي سيارة مروان وانطلقت السيارتان تشقان الطريق 

عودة إلى الواقع

جاسر بهدوء : ولو لا إتصال حمزة بينا تاني لكنا في خبر كان 

سيف بتعب : معاك حق  ….أنهي كلمته ليعود بذاكرته لتلك الليلة. …..

عودة إلى الوراء

من داخل سيارة الإسعاف 

كان يجلس إلي جوارها وهو يتابع عمل الممرضة التي تقيس لها الضغط وتوصل جهاز استشعار نبضات القلب بها 

الممرضة بتوتر: لازمها نقل دم بسرعه وحرارتها مرتفعه اوي 

سيف بتوتر : منا عارف ………صمت قليلاً ثم تحدث بتعجب ….. هو ماله ده بيسوق بسرعه اوي كدة ليه  ….قالها سيف بسخرية …ثم ما كاد أن يخاطبه كي يزيد من سرعته قليلاً حتي وجد السيارة تكاد تطير من شدة السرعه فقد كان السائق يقودها بسرعه رهيبة و  غير معقوله ! 

فصرخ سيف بحدة : انت يا مغفل انت براحه  ….أنهي كلمته ليقع بصره علي أسماء التي كانت تتحرك عن النقالة بعنف نتيجة القيادة المتهورة ليصرخ بحدة شديدة

سيف بغضب : وقف يا حيوان أنت ! 

الممرضة بقلق: هنموت كدة هو ماله بيسوق بسرعه كدة ليه ؟

كانت سيارة جاسر تسير خلف سيارة الإسعاف ولاحظ جاسر سرعتها المتهورة فتحدث بتوتر شديد

جاسر بتوتر : هو ماله السواق ده ؟

اجابه مروان الذي ينظر إلي السيارة : مش عارف ده شكله مجنون بيسوق كدة ليه ده ؟ 

جاسر بقلق: لا اللي بيحصل ده مش طبيعي في حاجه هتحصل ….أنهي كلمته ليتلقي اتصالا هاتفيا من حمزة 

نظر جاسر الي الرقم ليزداد شكه ويرد علي الهاتف سريعاً 

جاسر بقلق: قول اخبار كويسه بقا !  …….قالها جاسر برجاء

حمزة بتوتر : انا شاكك في حاجه كدة انتوا فين 

جاسر بقلق: احنا رايحين على المستشفي بس سواق الإسعاف بيسوق بطريقه غريبة 

حمزة بتوتر: خليه يوقف بسرعه حاطين قنبله فيها ! 

جاسر بصدمة : سيييييييف لأ لأ 

مروان بقلق: في إيه ؟! 

جاسر بقلق: قول لبقيت العربيات تقطع الطريق علي عربية الاسعاف دي في جاسوس هنا بيناتنا وهو من رجالتك بسرعه يا مروان 

هز مروان رأسه وأخرج اللاسلكي و أعط الأمر لجميع السيارات أن توقف تلك السيارة المجنونه والخارجه عن السيطره 

بينما في داخل السيارة كان سيف يصرخ بانفعال شديد عندما رآه الدم يزداد ليغرق ثياب أسماء ، بينما فقدت الممرضة وعيها نتيجة صدمة رأسها بجدار السيارة ، كان سيف في حالة يرثي لها لا يعرف ماذا يفعل

لحظات و وجد جميع دوريات التي قد أرسلها صديقه مروان تقطع الطريق علي تلك السيارة المجنونه ، ليتوقف السائق أخيراً فيصطدم راس سيف بقوة وتقع أسماء من علي النقالة بعنف عقبه فتح الجرح وانهمار الدم منها كالشلال 

بينما خرج جاسر من سيارة مروان سريعاً وهو يهرول حتي يخرجه قبل أن تنفجر حتي  تمكن من فتح الباب فوجد سيف يحمل أسماء ويخفي وجهها في صدره ويبكي بحزن 

سيف بدموع : الجرح اتفتح من جديد الغرز اتفكت بتنزف الحقني يا جاسر بسرعه ف فين عربية مروان 

جاسر بدموع: اخرج اخرج بيها بسرعه يا سيف العربية هتنفجر 

أنهي جاسر كلمته وهو يخرج سيف ويجذب يده معه بينما يحمل أسماء

حتي ابتعدوا عن السيارة ببضع خطوات بسيطة وكاد يعود جاسر ليخرج الممرضة  وما كاد يخطو خطوه واحده حتي انفجرت السيارة 

فزع جاسر بشده وتراجع للوراء فتحدث سيف بتعب وصوت مجهد 

سيف بانتحاب: بسرعه وديني علي اقرب مستشفي يلا مفيش وقت نضيعه

أومأ جاسر له  و صعد السيارة سريعاً بينما بقي مروان وعساكره يتولون التحقيق في هذا الانفجار المدوي 

بعد مرور نصف ساعة وصل جاسر أخيراً إلي أقرب مشفي وساعد ت الممرضات في وضع أسماء علي النقالة بروية يتبعهم سيف إلي أعلي حتي وصلوا إلي باب غرفة العمليات فدلفت الطبييه سريعاً إلي الغرفه وكاد سيف أن يدخل الغرفه معهم فاستوقفته الطبيبه بعمليه وهي تقول: ممنوع يا فندم ! 

ثم دخلت وأغلقت الباب خلفها 

بقي سيف جالساً والقلق والتوتر والخوف مشاعر كثيرة سيطرت عليه في آن واحد 

مضت ساعتان قضاهم سيف كأنهم الدهر كله وعاشّ فيهم أسوأ لحظات حياته فمنذ أن بدأت العملية لم يخرج أحد ليطمأن هذا المسكين الذي تقطع قلبه و جفت دموعه فلم يعد لديه مزيد 

قطع الصمت المريب صوت جاسر وهو يهتف بتوتر

جاسر بتوتر: إن شاء الله خير وهي هتكون كويسه 

إن شاء الله 

ما كاد سيف يرد عليه حتي فتح باب العمليات وخرجت الطبيبه ، فوقف سيف وجاسر معا واتجه سيف نحوها وهو يهتف بانفعال شديد

سيف بحدة : ده كله في إيه إيه اللي بيحصل جوه بقالكم تلت ساعات جوه ومفيش حد يطمني عليها 

تحدثت الطبيبة بعملية: يا فندم ده شغلنا وبعدين المريضة حالتها كانت حرجه وأحنا عملنا واجبنا 

تحدث جاسر وهو يحاول تهدئة صديقه: اهدي يا سيف مهو ده شغلهم بردو يعني هما بيلعبوا جوه 

صرخ سيف بانفعال: اللي جوه دي روحي لازم يطمنوني عليها انا مش عارف أتنفس هموت من قلقي وهما طولوا اوي افهموني !

قالت الطبيبه بحزن : مقدره حالتك دي والله بس عمتا هي كويسه و أعضاءها الحيوية تمام مفيهاش حاجه وسيطرنا علي الوضع ووقفنا النزيف والحمدلله أنه مكنش نزيف داخلي ده سطحي بس ….

ابتلع ريقه بتوجس من سكوتها فجاءة ليقول بصوت مبحوح خافت 

سيف بضعف : بس ايه …

الطبيبة بحزن : مش عارفين ليه دخلت في غيبوبة ؟

اتسعت حدقة عينه بصدمة كبيرة وشعر كما لو أن الدنيا أظلمت فجاءة و عقبه شعوره بالدوار ليترنح ويقع علي الارض فاقد للوعي 

فزع جاسر وهبط لمستواه واسرعت الممرضة تأتي بنقالة لكي يوضع سيف عليها الذي لم يتحمل الصدمة وبعد مرور يومان 

استيقظ سيف وفتح عينه بوهن تطلع الي الغرفة بذهول ثم ما لبث أن نهض سريعاً وهو يقول بضعف : أسماء ! 

فاق جاسر من نومه علي صوته يهتف بإسم زوجته فاقترب منه ووضع يده على كتفه وقال له بهدوء : اهدي هي كويسه جدا واللهي 

سيف بتوتر : أنا نايم بقالي قد ايه؟ 

جاسر. هما اربعه وعشرين ساعة انت كنت متعب اوي وكان لازم راحه فعلشان كدة طلبت منهم يخلوك تنام 

……….

قاطعه سيف وهو يقول بلهفه : و أسماء أسماء فاقت مش كدة 

أمال جاسر رأسه للأرض بحزن شديد وقال : لأ مع الاسف الدكتورة قالت إنها كويسه جدا بس هي اللي اختارت تدخل في غيبوبة قالت إنها كمان اتعرضت لصدمه كبيرة وده أكيد ليه سبب في أنها تختار تدخل في غيبوبة 

سيف بدموع : طب و مقالتش هتفوق منها إيمتي؟

جاسر بحزن : قالت ممكن تقعد اسبوع او اكتر علي حسب رغبتها هي عايزة تفوق منها إيمتي وقالت إنه الافضل ندخل ونكلمها يمكن تفوق

سيف بدموع : عايز أشوفها

جاسر بتوتر : مامتها عندها دلوقت استريح وهاخدك ليها 

سيف بتعب : لا أسماء محتجاني أنا مش حد تاني

بينما في الخارج 

كانت تقف أمام غرفتها تنظر إليها من زجاج الغرفه بدموع وهي تقول بوجع

دينا بدموع: يا حبيبتي يا اختي كنتي قدامي طول الوقت … صمتت لتتذكر كيف ارتاحت عندما بكت في حضنها وكيف كانت تشعر نحوها بمحبة لا تعرف سببها 

دينا بدموع: هتقومي إن شاء الله