قصة وجع الحياة الجزء الثالث 3 والأخير بقلم منى عبدالغني

=دخلت لقيتها قاعده مبتسمه بطريقه غريبه…وهو للدرجادي بيضحكك بقى؟ 

_عمر!!! ،بصيتله وانا مفزوعه ومتوتره..

=باين انك كويسه اوي في غيابي واني انا الوحيد اللي مدايق عليكي لا وكمان مقضياها وبتقابلي رجاله تانيه تكونيش سيبتيني عشانه؟! 

_عمر احترم نفسك ومتتعداش حدودك معايا انت في مكان شغلي وغير كدا انا مش بعرف رجاله دا عميل عندي وطبيعي جدا انه يكون هنا لأن دا مكان شغلي لو مش واخد بالك يعني وبعدين انت اللي عايش حياتك وروحت خطبت فا فيها ايه لما اعيش حياتي انا كمان انت مبقتش خطيبي… 

=لا يا رندا انتي هتفضلي خطيبتي حتى لو انتي مش عايزه وبعدين دي اول مره عميل يتكلم معاكي انتي لوحدك دايما يا نغم او حد تاني اللي بيكلمه او بيبقى نغم معاكي لو اتعاملتي مع عميل فا غريبه انك تبقى قاعده معاه لوحدك يعني؟ 

_خلصت كلامك اللي ملهوش لازمه دا جاي ليه بقى.. 

=جاي اقولك نرجع واني مش حابب بعدك عني اللي من غير اسباب دا. 

_والله! طب معلش ربنا يشفيك. 

=رندا متعصبنيش يا تفهميني انتي سيبتيني ليه من الاول يا إما انا هكلم عمو واقولوا اننا رجعنا. 

_انت اهبل يا عمر انت خاطب يا حبيبي فا روح اعمل الحركات دي على خطيبتك مش عليا انا ويلا اطلع برا عشان ورايا شغل مهم جدا.

=قربت منها ببطئ، قوليها تاني كدا… 

_كان بيقرب مني وانا ببعد عنه وطيت صوتي من التوتر والخوف، هي ايه؟ 

=حبيبي.. 

_ممكن تبعد 

=تؤ تؤ قوليها الأول. 

_عليت صوتي شويه، عمر لو مبعدتش عني انت حر.. 

=قربت اكتر، ايوه يعني هتعملي ايه؟ 

_هعمل كده، كنت لسه هضربه بالقلم فا مسك ايدي وكتف ايديا الاتنين ورفعهم. 

=انتي فاكره ان الحركات دي هتجيب معايا يعني رندا انا عارف انك لسه بتحبيني وبتكابري بس مش اكتر.. 

_هاا..لا مش بحبك. 

=همست في ودانها، لا والله بتحبيني. 

_عيط، ابعد عني لو سمحت. 

=بعدت وانا مخضوض من عياطها فجأه واصلا من امتى وهي بتعيط لما اهزر معاها او من امتى وهي مش بتعرف تفرق هزاري من كلامي الجد هي ليه بقت غريبه كده. ،انتي بتعيطي ليه؟ 

_مفيش لو سمحت يا عمر امشي انا عندي شغل وهسهر عليه لبكره فا عشان خاطري امشي. 

=اسف بس انا قاعد معاكي ونبقى نروح مع بعض. 

_انا مش هروح اصلا ممكن تمشي بقى! 

=ودي حاجه تخليني عايز ابقى معاكي اكتر.

_انت واحد قليل الادب ولو ممشيتش حالا هكلم الامن يجوا يخرجوك. 

=والله!! 

_اه 

=روحت قعدت، تمام كلميهم.. 

_اتنهدت واتكلمت بهدوء، لو سمحت يا عمر انا والله عندي شغل كتير وتعبانه ومش قادره فا امشي دلوقتي.. 

=الف سلامه عليكي بس انا قاعد بردوا ممكن تكملي شغلك اكني مش موجود على فكره.

_طلعت بره المكتب وانا متعصبه، يا عم علي يا عم علي اووف هو فين دا كمان؟

=مش موجود انا مشيته 

_لفيت بسرعه ازاي يعني تمش…، كان واقف قريب مني اوي ويمكن لو قربت خطوه واحده كمان كنت هبقي في حضنه. 

=ها كملي سكتي ليه؟ 

_بعدت بسرعه عنه انت لو ممشتش حالا انا بجد بجد ها… 

=ها ايه؟ 

_بص انا مش فاضيه لهزارك دا دلوقتي وانا اصلا مش فاهمه انت جاي ليه وبتعمل ايه هنا انا وانت مفيش حاجه تربطنا ببعض وانت واحد خاطب دلوقتي والحركات دي مينفعش تعملها وياريت ترجع لخطيبتك عشان زمانها قلقانه عليك.. 

=قربت منها وانا باصص في عيونها، امم طب احب افاجئك واقولك ان مبقاش فيه خطيبتي دي.. 

_؟؟

=مش مصدقاني والله مبقتش مخطوب واصلا مينفعش اكون مخطوب لحد غيرك عشان انا ليكي انتي بس و انتي بتاعتي انا بس ومحدش فينا ينفع يبعد عن التاني ولما انا حاولت معرفتش وملقتش حد ارتاح معاه زيك ومقدرتش احب حد نص حبي ليكي حتى..

_كنت واقفه مبتسمه وفرحانه من كلامه وقلبي بيدق جامد ومتوتره مليون احساس بيحصلي لما يبصلي في عيني ويقولي بحبك بتاعته دي..، فوقت من اللي انا فيه وشيلت الابتسامة اللي على وشي وركبت وش القويه تاني، اه واعمل ايه بقى؟ 

=رندا بلاش طريقه الكلام المستفزه دي انا مبحبش البرود.

_ عمر شايف العربيه اللي هناك دي؟ 

=اه دي عربيتي مالها! 

_روح يلا اركبها وروح على بيتك يلا سلام يا عمر، كنت لسه هجري على جوا لقيته مسك ايدي. 

=على فكره بقى انا مش هيدخل عليا حركاتك دي ماشي ويلا قدامي على المكتب. 

_نعم؟ 

=انا قولتلك مش هروح النهارده غير وانتي معايا وانتي قولتي عندك شغل هتدخلي تخلصيه ولا نمشي.. 

_بصتله بستغراب وانا مش عارفه اعمل حاجه عشان ابعده عني، لا خلاص هدخل.

=لا رسمك لسه حلو اهو.. 

_ممكن تسكت عشان اركز 

=من عيوني يا قمر. 

_كنت قاعده برسم بعد ما فشلت بكل الطرق اني اخليه يمشي وكان قاعد باصص عليا ومراقبني وكل شويه يقول تعليق يرخم عليا بيه وهو بصراحه مش فاهم انه كدا بيخليني احبه اكتر مش بيرخم…

=الوقت اتأخر اوي.

_قولتلك روح 

=وقولتلك مش هسيبك عادي جدا. 

_يبقى تسكت عشان انا مش هروح غير بعد الشروق. 

=لييه ما انتي قربتي تخلصي اهو ؟

_لا هي مش سهله كدا دا غير اني مستنيه العميل يجي ياخدها عشان انا اتاخرت عليه في رسمها ثانيه انا بشرحلك ليه اصلا وانت مالك!

=تمام انا هسكت عشان اتهزقت كتير النهارده. 

_ابتسمت وكملت رسم..

……………………………… 

_اووف اخيرا خلصتها يااه الساعه بقت 5 خدت مني وقت جامد اوي، لفيت ابص عليه لقيته حاطت ايده على خده ونايم قربت مني وقعدت على الترابيزه اللي قدامه وفضلت بصاله ومركزه مع ملامحه وهو نايم. 

_ انت عارف انت وحشتني قد ايه حاسه اني بقالي زمن مشوفتكش رغم اني كنت بشوفك.. عارف نفسي يطلع دا كله حلم ونرجع انا وانت زي زمان ومكنش بفكر في اي حاجه غير حبي ليك وحبك ليه كان نفسي حلمي يتحقق وانا وانت نتجوز كان زماني قادره احضنك دلوقتي واطمن قلبي بوجودك بس كل دا بقى صعب ومينفعش مبقاش ينفع انك تفضل جمبي عشان لو فضلت انا ساعتها هكون انانيه ومش بفكر غير في نفسي وسعادتي بس…. 

= فتحت عيني وفضلت باصص ليها شويه وهي بصالي ومتفجأه بس ساكته وفضلنا باصين لبعض، ليه هتكوني انانيه؟

_اتوترت، هو أن.. انت سمعتني؟! 

=ممكن تحكيلي وبلاش تاخدي قرار من نفسك احكيلي وفهميني ليه بتبعدي وانتي نفسك مش عايزه ليه بتتعبي قلبي وقلبك في قرارك دا فهميني يا رندا ارجوكي انا مش هقدر استحمل بعدك عني اكتر من كده والله!

_انا انا لازم اكمل الرسمه.. 

=مسكت ايدها وقومت وقفت قدامها، ليه بتتهربي مني ليه مش عايزه تحكيلي وتفهميني ايه سبب البعد ليه عايزه تاخدي قرار لوحدك يدمر مستقبلنا احكيلي يا رندا واوعدك مش هزعل ولا هخليكي تندمي انك حكيتيلي.. 

_انا هحكيلك بس عشان تبطل تلف حواليا بس انا مش موافقه اننا نرجع مش هقبل بدا ابداً مستحيل اجرحك  وانت معايا على حساب راحتي.

=تمام احكي بس الاول انا سامعك. 

_قعدنا انا وهو وفضلت ساكته بحاول اجمع كلامي اللي هقوله بحاول أفكر هقوله ازاي بطريقه مش يتجرح بيها بس مكنش فيه طريقه.. 

_عمر انا عندي سرطان 

=مسمعتش او مش فاهم انتي قولتي ايه! 

_عندي سرطان في المعده وفي مرحله الخطر وملهوش علاج.. 

=حسيت ان وداني صفرت وان الدنيا اغمقت فجأه حسيت ان في حاجه غلط واني مش سامع ومش فاهم حاجه من كلامها..، هو ايه ازاي ليه انا مش فاهم؟؟ 

_عيط من حالته وهو باصصلي وفي دماغه مليون سؤال عيط وانا شيفاه هيعيط ومتفاجئ من اللي قولته مكنتش عارفه ارد اقوله ايه تاني أو حتى اني اكدب عليه واطمنه وانا اكتر حد محتاج انه يطمن دلوقتي.. 

=حاولت افوق نفسي لما شفتها بتعيط بس مكنتش قادر امسك دموعي انا كمان، قومت قعدت على ركبي قدامها ومسكت ايديها الاتنين وانا بحاول اطمنها، لا اكيد ليه علاج وهتكوني بخير انا متأكد انك هتكوني كويسه وان ربنا هيشفيكي بلاش تيأسي وتحبطي نفسك انتي هتفضلي معايا انا عمري ما هسيبك واحنا هنشجع بعض على العلاج وهتخفي وهنتجوز وهنخلف وهنعمل كل حاجه حلمنا بيها مع بعض.. 

_عياطي كان بيزيد مع كلامه ودموع الصدمه اللي لسه بتنزل على خده. 

=متعيطيش انا معاكي والله ومش هسيبك متخافيش وبعدين انتي عايزانى اسيب القمر دا ازاي دا انتي لو حصلك ايه والله ما هسيبك ابدا.. 

_ضحكت 

=ايوه كده اضحكي وبلاش نكد مش لايق عليكي اصلا. 

*خبط ودخلت، انا اسف لو كنت جيت بدري شو.. 

اتفاجئت من منظرهم قدامي وهي قاعده بتعيط وهو قاعد بيعيط ومكنتش فاهم حاجه كنت واقف مش عارف اعمل ايه الف وارجع طيب ولا ادخل ولا ايه.. 

_قومت بسرعه انا وعمر ومسحنا دموعنا، لا أنا اللي اسفه يا استاذ.. 

*رامي يا بشمهندسه 

_ايوه ايوه فاكره حضرتك انا اتلغبط بس هجيب لحضرتك اللوحه حالا هغلفها بس، اخدت اللوحه وخرجت برا المكتب عشان اغلفها.. 

=اهلاً وسهلاً

*اهلاً بيك 

=.. 

*هو انت مش الشخص اللي شوفته وانا خارج من هنا امبارح بليل؟ 

=اه انا الظاهر ان ذاكرتك قويه اوي. 

*اه الحمدلله… بس هو كده انت سهران هنا من امبارح! 

=اه في حاجه؟! 

*انت واستاذه رندا وفي الكتب ولوحدكم لغايه دلوقتي؟؟! 

=هو في حاجه يا معلم انت عايز حاجه يعني انا مش فاهم انت مالك اسهر انا وهي لوحدنا ولا معانا حد انت ايه يدخلك يعني؟ 

*انا كنت بسأل مش اكتر يعني عشان غريبه ان بنت تسهر مع راجل لغايه الصبح يعني كده!..

=قربت منه وضربته بإيدي على كتفه، ما تحترم نفسك ياض اللي بتتكلم عليها دي خطيبتي وانت اصلا ملكش دخل إذا كنت سهران معاها ولا لا انت جاي تعدل علينا وبعدين تتكلم عنها بحترام بدل ما اسويلك وشك دا بأسفلت الشارع اللي برا دا والله. 

*مسكته من هدومه، ما تحترم نفسك يا استاذ انا كل دا ساكت احتراماً للمكان واستاذه رندا مش اكتر. 

=مسكت فيه انا كمان، وهي مش استاذه رندا دي اللي كنت بتتكلم عليها غلط دلوقتي ولا ايه. 

_دخلت عليهم لقيتهم ماسكين في بعض جامد اتدخلت ما بينهم بسرعه، في ايه يا عمر في ايه يا استاذ رامي؟!

=ما تشوفي العميل بتاعك دا اللي جاي يتكلم علينا وحش في مكان شغلك. 

*انا كنت بسأل مش اكتر ومعنى انك شوفتها بالطريقه دي فا يبقى انتوا غلطانين فعلا.. 

_ممكن تسكتوا وتفهموني ايه اللي حصل؟ 

=الباشا بيتكلم وحش علينا عشان شافنا قاعدين مع بعض ولا أكن واحد وخطيبته مثلا. 

*وهو يعني دا الصح يا استاذه انا بس حبيت ادي رأيي ونصيحه مش اكتر. 

_ممكن تبطلوا بقى اتفضل يا استاذ رامي اللوحات اهي واظن ان مش من حقك تتكلم عني أو عنه مهما كان أنا بعمل ايه وأحب اقولك اني معترفه بغلطنا احنا الاتنين بس مسمحش لحضرتك تبصلي نظره شك او اي نظره تانيه .

=رندا!! 

_استنى يا عمر.. انا كده شغلي ما حضرتك خلص وشكرا ليك واسفه لتأخيري اللي كان سبب ان يحصل دا كله واسفه للي عمر قاله وعمله. 

*تمام انا اسف يا استاذه رندا وشكرا لحضرتك عن اذنك.. 

=والله ؟انتي بتعتذري على ايه!

_عمر بطل عصبيه على الفاضي واعترف اننا مكنش ينفع نفضل مع بعض طول الوقت دا وانا مش خطيبتك يا عمر احنا مبقيناش مخطوبين فا ممكن متعاندش على الفاضي ويلا نمشي عشان مبقاش ينفع نفضل لوحدنا اكتر من كده. 

=رندا انا هخطبك تاني انا قولتلك اني مش هستغني عنك واننا هنرجع ماشي كان غلط افضل معاكي لوحدنا بس احسن ما كنتي تقعدي لوحدك وحد يعملك حاجه وساعتها مكنتش هبقي موجود وانا ايه كان يضمنلي ان سي زفت دا ميعملش فيكي حاجه. 

_عمر انا قبل ما احكيلك قولت اننا مش هنرجع واني مش موافقه انا مش مستعده ابدأ علاج واخد كيماوي انا مش هستحمل ابدا يا عمر ولو سمحت يلا نروح انا مش قادره ولا عايزه افكر اكتر من كده. 

=حاضر يا رندا نتكلم بعدين.. 

_روحت واول ما دخلت نمت على طول وانا مجهده وجسمي مش مستحمل اي حاجه من السهر والكلام اللي كان بينا. 

:رندا انتي كويسه يا بنتي تعبانه فيكي حاجه 

_لا يا ماما انا عايزه انام بس عشان كنت مطبقه في الشغل.. 

:تمام يا حبيبتي، خرجت وقفلت الباب ورايا وعيط مكنتش قادره اتخيل لسه ان بنتي تعبانه وانها ممكن في اي لحظه تروح مني ومتبقاش معايا تاني مش متخيله ان بنتي الوحيده تبقى تعبانه وانا حتى مش عارفه اعملها حاجه..

تاني يوم.. 

:صباح الخير يا حبيبتي 

_صباح الخير يا ماما 

:انتي رايحه فين كده 

_هعدي على الشغل تاني واشوف لو في حاجه ناقصه وبعدين هروح اقعد في اي حته كده عشان مخنوقه شويه. 

:طب استريحي شويه يا رندا انتي ملحقتيش تنامي يا بنتي 

_لا يا ماما انا كويسه الحمدلله سلام بقى يا حبيبتي. 

_نزلت وعديت على الشغل وقعدت شويه وبعدين نزلت وروحت قعدت في الكافيه بتاعنا مبرتاحش غير فيه من زمان حتى من قبل ما نتقابل انا وهو مكنتش بحب اقعد في مكان غير هنا ببقى قاعده فيه مرتاحه سماعتي في وداني وأغانيا المفضله شغاله وماسكه كتابي وبقرا فيه بكل استمتاع وانا بحاول اني مفكرش في اي حاجه مدايقاني خالص ولا المرض اللي عندي… 

=كنت متأكد اني هلاقيكي هنا. 

_حسيت بحد واقف قدامي فا رفعت راسي وبصتلوا.. 

=ممكن اقعد. 

_نعم يا عمر 

=وحشتيني 

_….. 

=تعالي نحاول بلاش تيأسي حاولي تاخدي العلاج ولو مفيش تحسن ساعتها اقعدي فعلا.. 

_مش هاخد الكيماوي دا ولا هدخله جسمي انا مش هستحمل يا عمر مش هستحمل ان شعري يقع وان ميبقاش عندي حواجب ولا رموش ويبقى شكلي وحش ومش عايزه انك تشوفني كدا.. 

=بس انا عايز أفضل جمبك اديني فرصه بلاش تاخدي القرار دا لوحدك انا عايز أفضل معاكي حتى لو في آخر ايامك انتي ليه عايزه تحرمينا من بعض؟…

_عشان انا مبقتش انفعك يا عمر انا مبقتش ولا جسد ولا حتى روح انا كل حاجه فيا بتموت بالبطئ وبعدين ليه اعمل كدا فيك وليه اعلقك بيا بلاش يا عمر وشوف حد يستاهلك فعلا.. 

=مسكت ايديها، طب قومي تعالي معايا. 

_على فين؟

=تعالي بس معايا. 

_ركبت معاه وانا مش فاهمه واخدني على فين ولا بيعمل ايه.. 

=انزلي. 

_عمر دا بيتي! 

=عارف انزلي بس بسرعه يلا.. 

_نزلت معاه وفضل ماسك ايدي وشاددني لغايه الشقه. 

=غمضي عينك. 

_هو في ايه يا عمر انت بتعمل ايه؟ 

=يلا بس اسمعي كلامي. 

_سمعت كلامه وغمضت عيني.. 

=سحبتها ودخلنا الشقه بعد ما امها فتحتلنا، فتحي عينك. 

_فتحت عيني ولقيته قاعد على الأرض ومطلع الخاتم مكنتش فاهمه هو بيعمل ايه!..

=تتجوزيني؟ 

_عمر انا قولتلك انه مي….. 

=رندا تتجوزيني؟ 

_عمر مش هينفع مش عاي….. 

=سيبك من اي حاجه انسى كل اللي حصلك تتجوزيني يا رندا وتعيشي معايا لغايه ما يفارقنا الموت؟.. 

_عيط مقدرتش اقول لاء اكتر من كده، موافقه. 

=لبستها الخاتم، يلا هنكتب الكتاب. 

_اييه؟ دلوقتي!! 

=اه يلا المأذون مستني مع ابوكي. 

_ماما بابا هو ايه اللي بيحصل؟! 

:عمر طلب انه يكتب كتابكم وتتجوزوا من غير فرح واحنا وافقنا. 

_بصتلوا وانا ممتنه ليه انه برغم رفضي وكل اللي قولتهوله وعملته بردوا مبعدش عني وفضل متمسك بيا، شكرا. 

=بوست ايديها، متشكرنيش. 

بارك الله لكما وبارك عليكما وجمع بينكما في خير 

عدي على الجمله دي شهرين وانا حالتي بتدهور اكتر واكتر بقيت ارفع من الاول ووشي اسود دايما حتى اني شعري بدأ يقع كل دا كان طبيعي وكنت عارفه انه هيحصل ومستحملاه بس اللي مكنتش مستحملاه هو عياط ماما وبابا كل ما بيشفوني كدا وقهرتهم على بنتهم وعياط عمر كل يوم بعد ما انام ودعاه لربنا انه يشفيني وأنه لسه مشبعش مني.. كل دا كان بيقهرني اكتر كان مخليني مدمره اكتر وانا شايفه اللي بحبهم متأذين بالطريقه دي.. 

=انتي كويسه؟ 

_لا مش قادره يا عمر تعبانه اوي 

=معلش استحملي يا حبيبتي وان شاء هتبقى كويسه وكل حاجه هتبقى بخير. 

_عمر.. 

=نعم؟ 

_ينفع توعدني اني لما اموت انك تعيش حياتك وتكمل مع حد غيري.. 

=رندا ايه اللي بتقول؟!…

_حطيت ايدي على بوقه، مش عيزاك تفضل حزين انت متعرفش نظره عينك اللي كلها دموع دي بتقتلني قد ايه انا كنت عارفه لما اتجوزنا اني هبقي فتره بس معاك وعشان كده انا مرفضتش اكتر من كده وحبيت ان اخر ايامي تبقى معاك بس انا مش عايزاك تفضل كدا بعد ما اموت هحس اني انانيه اوي وان كل حاجه بسببي. 

=مسكت وشها بإيدي وعيط، مش هقدر اشوف غيرك انا بحبك اوي يا رندا عشان خاطري بلاش تقولي الكلام دا انتي هتخفي وهتبقى كويسه وهنفضل مع بعض لحد ما نموت واحنا كبار في السن واحفادنا حوالينا.. 

_ضحكت بوجع، كان نفسي يبقى عندنا طفل يفكرك بيا كان نفسي اسيبلك حاجه مني بس ربنا مش كاتبلنا بقى.. 

=عشان خاطري يا رندا بطلي كلامك دا مش كل ما تتعبي تفضلي تقولي كلام زي دا انتي كدا بتقتليني انا.. 

_ابتسمت، متقلقش دي المره الاخيره. 

=يووه يا رندا بردوا؟، دورت وشي ومكنتش عارف امسك دموعي كنت مدايق وخايف ومش مستحمل كلامها ولا فكره انها تروح مني كنت فاكر اني هتعود مع الوقت بس مش عارف اتعود مش قادر اتخيل اني هصحي في يوم من غيرها.. 

_عمر

=…..

_بُصلي طيب خليني اشبع منك قبل ما اروح للي خالقني. 

= بصتلها وانا دموعي لسه على وشي، بطلي كلامك دا بقى هزعل منك بجد.. 

_قربت ايدي منه ومسحت دموعه، خلي بالك من بابا وماما. 

=…. 

_بحبك اوي يا عمر… 

=رندا لو مبطلتيش صدقيني همشي واسيبك!.. 

_…… 

=رندا انتي بتقفلي عينك ليه؟ بطلي هزارك دا بقى حرام عليكي… 

_……..

=لاء لاء رندا لاء يارب متخدهاش مني دلوقتي يارب مش هستحمل يارب اااه اااه يا رندا ااااه ليه ليه تسيبيني انا لسه مشبعتش منك احنا لسه محققناش كل احلامنا ليييه ليييه، حضنتها جامد وفضلت اعيط. 

-يلا يا عمر عشان ندفنها 

=لاء يا عمي لاء رندا عايشه هي عايشه وانا هروح البيت الاقيها صح؟ مش هي موجوده في البيت دلوقتي قولي عشان خاطر ربنا قولي انها لسه عايشه ومسابتنيش يا عمي… 

-مسكه من كتافه جامد، عمر فوق احنا لازم نستر مراتك رندا ماتت خلاص وراحت للي ارحم مني ومنك راحت للي خلقها يلا فوق عشان ندفنها. 

=فوقت فعلا وحاولت اتماسك وروحنا دفناها كنت بدفنها وبدفن معاها قلبي وروحي وحياتي كلها.. 

عدي سنه على موتها ولسه متخطيتش موتها لسه مش قادر استحمل ولا استوعب انها خلاص مبقتش في الدنيا مبقتش اعرف اشوفها مبقتش اعرف اطبطب عليها طب اعمل ايه يارب اعمل ايه نفسي اشوفها نفسي اروحلها… 

=روحت للقبر بتاعها، تعرفي انك وحشتيني اوي.. انا عارف انك مدايقه مني عشان انا لسه مدايق عليكي وعشان موقف حياتي بس انتي عارفه اني مقدرش اعيش من غيرك مقدرش اشوف حد غيرك انتي كنتي كل حاجه ليا سامحيني يا حبيبتي بس مش هعرف احققلك وصيتك مش هقدر انا اسف… 

“لقد ماتت حَبِيِبَتِي، وماتت معُها حياتي وقلبي وعمري بِإكمَلهُ.. لقد توقفُ كُل شئٍ بعد مُوتِكِ.. لو أعُد أراكِي لكِنَنِي لن أرَىَ غيرُكِ أبداً”????????️

لكل قصه بدايه ونهايه الفايده من القصه ان اللي عايزك فعلا هيعمل المستحيل عشانك حتى لو فيك عيب ايه او مرض اي لو شاريك وعايزك هحاول معاك يغيرك للأحسن عيحاول معاك تخف وتبقى احسن وهيفضل فاكرك للنهايه اللي بيحب مش بيبيع مش بينسى مش بيسيب اللي بيحب بيشتري اللي بيحبه وبيقبله بكل عيوبه ومميزاته بأخطائه المجنونه بطريقه كلامه بشكله الحلو او الوحش اللي بيحب بيبص الي بيحبه بقلبه مش بعنيه. ????

النهاية…..