رواية هتلر الداخلية الفصل السابع والعشرون 27 بقلم جنى غنيم

” سأعطيك كل ما في قلبي من طيبة و حب ، و لكن احذر مني إذا غضبت فأنا النسخة الأنثوية من إبليس “

#بقلمي 

من مذكرات هتلر الداخلية ♡

الدفئ و الأمان الموجودين في الدنيا كلها في حضنه هو معقولة بعد السنين دي كلها هضعف و أحب تاني مش جايز يكون حب مجدي مجرد إعجاب أو مراهقة و أن فعلا مراد بيحبني ، صراع بين قلبي و عقلي مش قادرة اتخطى الذكريات السودة اللي عيشتها معاه لدرجة أني كل ما اشوف راجل يظهر قدامي صورة مجدي كرهني في صنفهم ! بس المتأكدة منه أني عمري ما حسيت بالأحاسيس دي قبل كده مش عارفة بحس أني زي الصنم لما مراد بيبقى قريب مني !

لقيت مراد بيشد على مسكته ليا و دفن وشه في رقبتي و كنت حاسة بأنفاسه السخنة و فجأة والدة مراد نادت عليه و قالت : يلا يا مراد الفطار جاهز ..شوف چنی لو نامت صحيها

قال مراد بضيق و كان على نفس وضعيته : حاضر يا ماما ثانية 

حسيت نفسي مخنوقة مش قادرة انسى اللي حصل من مجدي في اسوء ليلة من الليالي السودة اللي عيشتها و مرة واحدة زقيته بعيد عني مقدرتش انطق بكلمة كل اللي قدرت اعمله أني برقت ، راح مراد قفل الباب كنت عايزة اتكلم و اصرخ بس مش عارفة ايه المانعني ، مراد جاب من الدرج علبة قطيفة و وقف قدامي و فتحها و كانت سلسلة فضة معقولة كان مهتم بكلامي ؛ انا فاكرة لما كنا قاعدين على الكورنيش و قولت انی بحب السلاسل الفضة .

كانت دعوة صامتة قرب مني و لبسني السلسة و باس رأسي و كل ده و كنا ساكتين و مسك ايدي و قال بتوتر : چنی ،، أنا …..

و لسة هيكمل كلامه قاطعه صوت مامته : يلا يا مراد بتعمل ايه كل ده الأكل هيبرد 

مراد بعصبية : ما قولنا حاضر جاي 

ابتسمت مش عارفة على ايه هل فعلا أنا فرحانة بالخطوة دي ؟ و لا هفضل افكر في مجدي ؟ 

رجع مراد شعره بأيده لوراء بإحراج و قال : هتفضلي ساكتة كتير 

چنی ردت عليه بتلقائية و كأنها بنت بضفاير عندها 16 سنة : أنتَ عايزني اقول ايه ؟ 

مراد بسرحان في ملامحها : أي حاجة حلوة زيك 

چنی ضحكت و قالت : أنا شايفة نطلع قبل ما طنط تقتلنا أحنا الأتنين 

مسك مراد أيد چنی ، باصت چنی عليه و على ايده و سكتت طلعوا و قعدوا على السفرة ف قالت سلوى بمرح : أخيرا عصافير الكناريا شرفوا 

كانوا قاعدين بياكلوا ، كان الجو دافي وسطهم الجو اسري اللي دايما چنی كانت محرومة منه  بس كانت سرحانة بتفكر و خايفة في نفس الوقت مش قادرة تنسى كمية الوجع إللي في حياتها ، مراد لاحظها بس فضل ساكت عشان متضيقش ف قالت سلوى : مالك يا چنی‌ ساكتة ليه الأكل مش عجبك ..مراد قالي أنك ملكيش في الأكل ده 

چنی‌ بإحترام : بالعكس الأكل جميل أنا بس مش نايمة كويس و مجهدة لأن الفترة الأخيرة كانت مليانة مغامرات و لا أجدعها فيلم جيمس بوند  

ضحكت سلوى و كملوا أكل في نفس الصمت 

” أنا إنسانة من كثرة طيبتي و أعطائي الحب لكل من حولي أرادت الدنيا أنا تعطيني أسوء هدية لديها و هي الذكريات المؤلمة ، أعتقد أن كل شخص يهدي هدية على حسب منظوره للأخر ، و لكن أنا أريد أن أشكرها بدونها لم كنت أعرف أنني ساذجة لهذا الحد ! ” 

#بقلمي

من مذكرات هتلر الداخلية ♡ 

خلصوا أكل و قعدت چنی على كنبة و مراد قعد قدامها و بيبصوا لبعض ، مراد كات منتظر أب ردة فعل منها و لكن چنی‌ ساكتة ؛ و ده شئ خوف مراد لأن دي مش طبيعة چنی .

معقولة تكون رفضة الفكرة بس مكسوفة تقول ، طلعت سلوى من المطبخ و قالت لمراد : مراد أنزل جيب الطلبات دي عشان احضر الغداء و يا ريت تجيب من الهايبر متكسلش و تجيب من أي سوبر ماركت 

مراد قام و اتكلم بضيق : حاضر يا ماما و بوجه كلامه لچنی : ما تيجي معايا 

ردت سلوى بسرعة و قالت : لا أنا عايزاها معايا تونسني … أنزل لوحدك 

نزل مراد و هو مضايق و قعدت سلوى جانب چنی و قالت : أنا نزلت مراد عشان اقدر اتكلم معاكي براحتنا … شكلك عايزة تتكلمي ابدأ أنا و لا أنتِ ؟ 

چنی بهدوء : يا ريت أنتِ تتكلمي أنا جاية عشان أسمعك 

ابتسمت سلوى و قالت : أنا أبقى صديقة ابوكي و عمامك و جارتهم كمان و متربيين سوى ، سامر و سمير و سالم دول تلاتة اخوات من عيلة الحلواني ابوكي و عمامك ، سامر هو البكري و عنده مجدي ولي العهد و سمير هو الأخ الوسط بس متجوزش و سالم هو الأخ الصغير و عنده بنتين توأم أنتِ و أختك بالمناسبة والدتك كانت أعز صديقة على قلبي ، بس كان في مشكلة جدك كان بيفضل سالم عن الكل لأنه اطيب اخواته و أخر العنقود و كمان لما شرفتي أنتِ و ليان مش عارفة اقولك سعادة جدكم  سمير مكنش عنده مشكلة من ناحيتكم و دايما بيحبكم  … المشكلة الأكبر كانت في سامر و مراته العقربة.  الحقد كان مالي قلبهم … بعد وفاة جدك و في توزيعة الورث اكتشفوا الكارثة ان سالم واخد النصيب الأكبر و كمان ابوهم شرط عليه أنك تاخدي نص الميراث لما تتمِ السن القانوني 

قاطعتها چنی بدموع : اشمعنى أنا ..ليه يعملوا فيا كده ؟ أنا ذنبي ايه اعيش في الجحيم ده بدل ما ابقى وسط اهلي اتحرم منهم و اعيش حياة مش حياتي ليه …لييييييه ؟

اتنهد سلوي و قالت : كل واحد مكتوب قدره من قبل ما يتولد يا چنی ربنا رحيم بعباده بس أنتِ مش واخدة بالك ، مراد سألني نفس سؤالك و برضو هرد بنفس الإجابة لغاية دلوقتي منعرفش الوحيد اللي معاه الإجابة هو جدك الله يرحمه ، وقتها قعدوا يدوروا على اي ورق يثبت هو ليه عمل كده ، بس مرات عمك العقربة قررت تعمل سحر اسود ليكي أنتِ و أختك 

چنی وشها بهت و قالت :في مقابل أننا نموت و لما عرف بابا أننا في خطر من عمي سامر قرر يبعتنا على دار أيتام  ، لما عرف بابا بالمصيبة الأكبر و هو حوار  السحر ده كنا وقتها في الدار و حاول كتير أنه يفكه بس معرفش و بدأ ييجي تهديدات بموتنا و أحنا في الدار ، قرر يرجعنا بس وقتها واحدة فينا بس هي اللي رجعت و كانت ليان ، و مرات عمي راحت لعبد الحميد اللي رباني و شيلت اسمه و طلبت منه يخطفني و يقتلني بس للأسف حظي و حظهم الأسود عيشت ، مش ده اللي عايزة تقوليه  

سلوى بصدمة : أنتِ عارفة كل حاجة اهو 

چنی بسخرية: ليه ما أنا لسة بكتشف حاجات لأول مرة اسمع عنها لغاية مبقتش عارفة مين الصادق من الكداب ؟

سلوى اتنهد بخزن و قالت : بصي يا بنتي انا في رسالة لازم اوصلها عشان وقت ما اموت يكون ضميري مستريح ، انا مريضة بورم خبيث و منتشر في كل جسمي و حالتي بقت ميؤوس مني 

قاطعتها چنی بخضة و مسكت ايدها و قالت : مفيش الكلام ده العلم دلوقتي اتطور مينفعش تيأسي بالسهولة دي …ده مراد محروم منك بقاله سنين لازم تقاومي عشانه 

ابتسمت سلوى بحزن و قالت : اسمعي الكلام يا چنی الورم انتشر في كل الجسم ، الموضوع بقى مسألة وقت … اللي عايزة اقوله إيمان كانت بتحبكم حب مش طبيعي من قبل حتى ما تيجوا الدنيا … بس للأسف في مقابل انها تحتفظ بالحمل ماتت 

قاطعتها چنی : أزاي يعني هي مشفتناش و لا مرة 

سلوى : ايوة إيمان كانت بتعاني من المرض القلب و مقدرتش تستحمل الطلق بقوته و اصلا ولادتكم كانت صعبة اوي ف ضحيت بزهرة شبابها عشانكم ، سالم مكنش عايز الجنين اصلا مش بقولك كانت قصة حب ابوكِ و امك اسطورية و عايزة اقول كمان اني انا و سمير عمرنا مأمنا لعبد الحميد إنسان غامض متعرفيش هل فعلا طيب و لا خبيث بس نوال طيبة اوي و ملهاش في الكدب عمري ما قبلت انسانة نقية بشكل ده 

چنی بتساؤل : هو أنتِ تعرفيهم ؟ و سمير عايش و لا ميت ؟ و لو عايش ليه مدورش عليا انا و ليان

سلوى : علاقتي بيهم كانت سطحية بس نظرتي للناس متخيبش ابدا ، عمك سمير عايش في الإمارات و يعني من فترة للتانية كان بيطمئن علي ليان من الوقت للتاني … ما هو أحنا كنا مقتنعين أنك يعني …سكتت بإحراج 

ف قالت چنی : أني مت !

سلوى : بصراحة اه و قولنا كده أن العمل أتفك … بصي يا چنی كلنا مرينا بذكريات وحشة في الماضي بس القوي هو اللي يقدر يعدي الصعوبات دي 

چنی بغضب مكتوم : عمري ما كنت قوية اصلا و محدش مر بربع اللي أنا مريت بيه أحنا مش هنضحك على بعض ، ممكن أسألك سؤال أنا جاية ليه النهاردة انا عارفة كل ده ،كل اللي عملتيه أنك فتحتِ الجرح تاني و كل الكلام ده مش فارق معايا 

سلوى بحزن طلعت الجواب ده من جيبها و قالت : أنا جايباكي النهاردة عشان الجواب ده بس توعديني أنك متفتحوش غير بعد ما أموت و حاجة تانية طلعت ورقة مكتوب عليها رقم و قالت : و ده رقم عمك سمير اتصلي بيه هيساعدكم في حل مشكلتكم 

چنی اخدت منها الورقة و الجواب بإستغراب و قالت : هو أنتِ كنتِ عارفة أن أهلي بيشتغلوا في الممنوعات

سلوى بتوتر : لا 

بصت چنی ليها و سكتت ، سلوى : أسألك أنا بقى بدل أنتِ ساكتة بس تبقى صريحة معايا ..بتحبيه 

چنی بصتلها بإستغراب و قالت : بحب مين ؟ 

سلوى : مش قولتلك تبقى صريحة معايا 

چنی : الكلام ده ميطلعش برة تمام … أه بحبه و اه حاسة بإعجاب ناحيته و عارفة أنه بيحبني بس مش هينفع 

سلوى : ليه ..مراد مش وحش 

چنی بضعف : جايز عشان مش قادرة اعدي الماضي و جايز برضو أن حبي لمجدي مخلص مش عارفة بس اللي أعرفه أن مينفعش علاقتي بمراد تكمل 

سلوى بعصبية : ليه مش صريحة مع نفسك ليه عايزة تعذبي نفسك ! مراد بيحبك يا چنی افهمي بقى 

چنی بعياط : انا عمري ما كنت صريحة مع نفسي قد النهاردة …أنا بحب مراد بس مش هينفع مش هينفع في حاجات كتيرة في حياتي هو ميعرفهاش و مينفع حد يعرفها 

مراد كان رجع و واقف و سامع كل حاجة ورا الباب و عينه دمعت و مرداش يفتح بمفاتيحه و خبط على الباب ، قامت سلوى تفتح ف قالت بتعب : مفتحتش بمفاتحيك ليه 

مراد بلجلجة : اصل يعني … نسيت المفاتيح في جيب البنطلون الرصاصي 

چنی قعدة بتمسح وشها بمنديل ف وقفت و قالت : عايزاك يا مراد عشان افتكرت مشوار مهم ليا 

سلوى مقدرتش تقول حاجة 

مراد دخل البلكونة و دخلت وراه چنی و قالت ببرود : عايزة مذكراتي يا مراد 

مراد بضحك : أنتِ جاية النهاردة عشان المذكرات 

چنی رفعت شعرها بأيدها و قالت : اه انا جاية عشانها…يا ريت شنطتي بالمرة 

دخل مراد جاب الشنطة و رجع و قال : اتفضلي شنطتك 

چنی بغضب مكتوم : و المذكرات ؟

ابتسم مراد ببرود و قال : مش هتاخديها يا چنی 

چنی بعصبية : بلاش تبقى لزج و ترمي بلاك على بلى الناس 

مراد متجاهل كلامها و قال :معلش اصل انا مراد الوحش اللزج …عايزك تفتحي اخر رسالة كده على موبايلك اظن تخصك و أه صحيح عربيتك في الجراچ تحت و المفاتيح في شنطتك 

فتحت چنی موبايلها و قرأت بصوت عالي محتوى الرسالة : (تفتكري يا چنی مين السبب في حياتك الخربانة هل مجدي فعلا و لا الأستاذ الدكتور المحترم عبد الحميد و يا ترى ايه علاقته بوالدك سالم الحلواني و لا حد تاني برة الليلة دي ، محتاجة تراجعي حساباتك …فاعل خير )

بصت لمراد بقلق و لسة هترد بييجي اتصال على تليفونها من رقم غريب و قبل ما ترد …مراد بيقولها : افتحي الأسبيكر

ردت چنی ف قال الشخص : كفارة يا هتلر باشا 

چنی بتوتر : هو أنتَ ..عايز ايه ؟

– يا ستي بطمئن عليكي بشوفك قرأتي الرسالة و لا لسة 

چنی بصت لمراد و قالت : ده أنتَ مراقبني بقا طب بقولك ايه ما تقولي أنتَ مين و نتقابل راجل لراجل و نتأكد من حوار بطاقتك مكتوب فيها دكر و لا حاجة تانية 

– لا أنا معجب قديم و بعدين أنا راجل غصب عنك و هو مش برضو مكتوب في بطاقتك نتاية و لا ايه اصل انا اعرف انا المشكلة في اسمك مش في نوعك

ضحکت چنی و قالت :أصل انا مليش في شغل الحريم ده ..بدل عاملي فيها راجل يبقى بلاش شغل من وراء الشاشات ده 

– أصل أنتِ واحدة ميتاخدش منك كلمة ما أنا برضو مش ضامن شغل المجانين 

چنی بتوتر : بتلمح على ايه 

– أخبار الهلاوس ايه معاكي …شكلك مش فاكرة الحادثة اللي كانت من عشر سنين لما كنتِ بتقضي أجازتك في اسكندرية 

چنی بدأت تعرق و تتوتر : ما تخليك واضح 

-ما أنتِ فاتحة الأسبيكر خليني ساكت أحسن أنا متأكد أنك افتكرتي و الدليل على كلامي العلبة الصفرة اللي دايما معاكي في شنطتك ..خلي بالك على نفسك شكلنا هنتسلى كتير الفترة الجاية يا هتلر باشا اه صحيح مبروك على الترقية !

و اتقطع الخط مراد بيبص على چنی لقى خطين دموع نازل على وشها و قامت و لسة هتطلع مسك مراد ايدها و قال : يبقى كلام الراجل ده صح…قصده ايه …حادثة ايه اللي بيتكلم عنها 

شدت چنی ايدها و طلعت جري برة الشقة و لسة مراد هيطلع وراها وقفته سلوى : هو في ايه چنی بتجري كده ليه 

مراد بعصبية : مش عارف حاجة …المذكرات هي اللي فيها الأجوبة 

دخل مراد جري على اوضته و قفل الباب بالمفتاح و سلوى كانت واقفة مش مستوعبة أي شئ 

“مالي أرى اليأس في عينيك مرتسما

‏وقلبك الغضُّ بالأحزان قد وُسِما 

‏طمئن فؤادك فالأقدار حانية

وفي الحياةِ سرور يعقُب الألما” 

ركبت چنی عربيتها و هي منهارة و طلعت العلبة الصفرة من شنطتها و اخدت منها خمس برشامات و كان برشام مهدأ و بدأت تسوق و رنت ليان عليها و قالت : ايه يا چنی أنتِ فين ؟

چنی بفتور : أنا جاية في حاجة ؟ 

ليان : لا بطمئن عليكي معلش يا چنی أنا و قاسم مضطرين نسافر بكرة الصبح عشان الدنيا مقلوبة في الخلية (المافيا )

چنی : أنتِ في البيت 

ليان : اه في حاجة 

چنی‌ : في حاجات مش حاجة ممكن تقابليني في الكافيه اللي على أول الشارع 

ليان : اه عادي طب ليه منتكلمش في البيت ..اه صحيح مازن بيسأل عليكي و عايزك ضروري  

چنی : في كلام مش هينفع حد يعرفه غيرك …بعدين ممكن بس تطمنيه عليا 

ليان : اه طبعا اكيد

چنی : تمام أنا قدامي عشر دقايق بالكتير و هوصل 

اتصلت چنی‌ بعم شهامة بس للأسف مردش عليها ، اتعصبت چنی و كملت سواقة 

عند مجدي 

بدأ مجدي يفتح عينه بتعب لقى نفسه في أوضة بيضة و متعلق محاليل في أيده و فيه بنت ماسكة ايده و نايمة و بيركز في ملامحها بيلاقيها شيرويت بينادي عليها بصوت خافت ف بتصحى ف قال : أنا جيت هنا ازاي و بتعملي ايه هنا ؟

شيرويت بتعب بسبب الحمل : كنت داخلة نفس الكافيه اللي كنت فيه و شوفتك مرمي على الأرض و اتصلت بالأسعاف و بس كده 

مجدي بجمود : تمام تقدري تمشي خلاص أنا بقيت كويس 

شيرويت بحزن : يا مجدي أنا…

قاطعها مجدي :قولتلك أمشي انا مش محتاج شفقة من حد !

بصيتله شيرويت بنظرة عتاب ، مجدي دور وشه الناحية التانية بعيد عنها ف قامت شيرويت بحزن و مشيت

عند چنی 

دخلت چنی الكافيه لقت ليان مستنياها قعدت قدامها ف قالت ليان :مال وشك مخطوف كده ليه 

چنی ببرود : أنا عايزة اسافر معاكم 

ليان بعصبية : و حياة امك 

چنی بجمود : اخرسي و وطي صوتك هحكيلك كل حاجة 

حكت چنی كل حاجة لليان ف قالت چنی : مالك متنحة كده ليه 

ليان بصدمة : أنتِ عايزاني بعد كل ده يكون ردة فعلي ايه مثلا اتحزم و ارقص …معلش بقا حادثة ايه اللي بيتكلم عنها 

چنی بدموع : محدش المفروض يعرف حاجة عن الموضوع ده 

ليان بعصبية : انطقي و بلاش عناد …و ايه حوار الهلاوس ده 

چنی بحزن : هحكيلك 

فلاش باك *

چنی بتتكلم في التليفون و بتعیط: يعني ايه اتجوز أنت متأكد يا فريد ؟

فريد بحزن : يا چنی أهدي أنتِ عارفة مجدي كلب ميسواش دمعة واحدة منك 

چنی‌ بإنهيار : أتجوز مين بقا إن شاء الله؟ 

فريد : زميلته في الجامعة اسمها شيرويت بيقولوا أنها كانت معجبة بيه اصلا 

چنی ‌بهدوء : تمام اقفل دلوقتي يا فريد عشان سايقة 

كانت مركزة في السواقة و بتدور على علبة المهدأ و كان في علبتين صفر و اخدت العلبة الغلط و كانت علبة فيها حبوب الهلاوس 

چنی محتسش بنفسها غير لما بنت متجاوزتش 12 سنة اتخبط و كانت حادثة في منتهى البشاعة و ماتت البنت 

انتهي الفلاش باك *

ليان برقت و قالت : و طلعتي منها ازاي ؟ 

چنی بحزن : عم شهامة ساعدني و طلعت منها زي الشعر من العجين محدش يعرف بالموضوع ده و انا شخصيا كنت بدأت انساه طبعا انا في نظرك دلوقتي انا قتالة قتلة 

ليان بعصبية: انا مش مستغربة من الحادثة انا مستغربة أنك معاكي برشام هلاوس و مهدأ 

چنی‌ بتعب : مش هقدر احكي عن الموضوع ده ارجوكي 

ليان : ماشي انا مش هضغط عليكِ و مراد هتعملي معاه ايه 

چنی : و لا حاجة عشان مفيش حاجة اصلا تتعمل ..الموضوع هينتهي من قبل ما يبدأ ..هتعرفي تقنعي قاسم 

ليان : اه الموضوع بسيط هنقول أنك تعبانة و مختاجة تريحي أعصابك و مازن هتقوليله الحقيقة 

چنی بتحذير : محدش هيعرف غيرك أنتِ فاهمة 

ليان بتساؤل : و المذكرات ممكن بسهولة يعرف منها 

چنی : لا في دي طلعت ناصحة اصل اللي مع مراد دي نسخة ، الأصلية انا شايلاها في حتة الجن الأزرق ميعرفش طريقها ..و بالنسبة لمازن مش لازم ابدا يعرف اني مسافرة احنا هنقول اني رايحة اوصلك و بس عشان انا متأكده انه هيبلغ مراد 

ليان : تمام ..يلا بينا نطلع عشان نحضر العشا 

عند مراد 

مراد رمى المذكرات بعصبية و قال : يعني ايه مفيش اي حاجة عن الموضوع 

اتصل بمازن ف رد : الو يا مراد 

مراد بعصبية : چنی جت ؟

مازن : اه بس دخلت اوضتها ترتاح و ليان دخلت تحضر العشا 

مراد : تمام يا مازن شكرا ليك 

عند ليان و قاسم 

ليان بتحضر الشوربة و قاسم واقف جانبها ف قال : انا مش مقتنع بكلامك ده على فكرة 

ليان بتحط ملح على الشوربة و بتقول : يا بني هكدب عليك ليه البنت عايزة ترتاح شوية و تفصل عن العالم الخارجي ايه المشكلة 

قاسم : اختك مش راضية عن شغلنا ازاي ترضى بكل سهولة تيجي معانا في عش الضبابير 

چنی ‌ قالت من وراهم : عشان فعلا عايزة ارتاح يا قاسم 

لفوا ليها ف قالت ليان : لابسة و رايحة فين

چنی بتوتر : افتكرت مشوار معم هعمله و آجي على طول ساعة زمن بس 

قاسم بتساؤل : في الوقت ده 

چنی‌ : اه 

ليان : تحبي حد يوصلك 

چنی بتعب : لا مفيش داعي انا طلبت اوبر عشان تعبانة و مش هقدر اسوق عربيتي 

نزلت چنی و راحت مبني المخابرات و لقت صديق ليها ف سلمت عليه و قال : هتلر باشا و لا اقول چنی عادي 

ضحكت چنی و قالت : ازيك يا مصطفي انت تقول اللي أنت عايزه ..هو الجينيرال فوق ؟

– لا ده لسة اجازة و بكرة اول يوم ليه شغل

چنی طلعت ظرف من جسبها و قالت : عايزاك بكرة اول ما ييجي تديله الظرف ده 

-في ايه الظرف ده ؟

چنی : بلاش أسئلة كتير تمام  

– طب اشربي حاجة طيب 

چنی : مرة تانية يا درش  

في صباح جديد 

چنی واقفة و جانبها الشنط و بتقول بصوت عالي : ممكن تخلصوا بقا عشان هنتأخر 

مازن بيتاوب و بيقول : طب ما كنت آجي معاكي 

چنی ببرود : يا بني انتَ لسة بعماصك أنت بتقول ايه و بعدين احنا مش رايحين رحلة انا هوصلهم و آجي على طول تمام 

قاسم و ليان خرجوا و قالوا : احنا جاهزين 

چنی‌: اخيرا ..طب يلا عشان منتأخرش 

في مكتب اللواء عثمان 

دخل مراد و قال ببرود  : صباح الخير يا عثمان باشا 

عثمان بتعب : اقعد و بطل رسميات دي

مراد قعد و قال بفضول :كنت فين الفترة دي ؟

عثمان : كنت في الصعيد ها حاجة تانية عايز تعرفها و لسة هيكمل كلامه اتفتح الباب و واحد سلم ظرف لعثمان و طلع 

مراد : مين باعت الظرف ده 

عثمان ببرود : مش مهم هقرأه بعدين 

مراد بشك : لا افتحه انا عايزة اعرف فيه ايه

عثمان : على فكرة ده مبعوت ليا انا بس ماشي نفتحه و قرأه بصوت عالي و كانت الصدمة 

( طلب استقالة 

السّيد وزير الداخلية 

تحيّة طيّبة وبعد، 

أنا المقدم چنی عبد الحميد الرشيدي،  يُرجى التَكرُّم بقبول طلب الاستقالة من وزارة الداخلية ، لمجموعةٍ من الأسباب الشخصيّة والظّروف الخاصّة الأُخرى، ومع الشّكر والاعتزاز على كافّةِ الدّعم المُقدّم خلال فترة خدمتي ، وحُسن المُعاملة الطيبّة من الجميع في الوزارة ، مع الاحترام والتقدير. اسم المُوظّف: چنی  الرشيدي ) 

مراد بعصبية : دي اتجنت رسمي بقا

و بييجي اشعار رسالة على تليفونه بيفتح بيلاقيها من چنی و كاتبة ( أنا اسفة)

مراد بيحاول يتصل بيها 

( هذا الرقم خارج نطاق الخدمة ، حاول الأتصال به في وقت لاحق 

This number in not available at this moment,  please try again later )

مراد بعصبية : تليفونها خارج نطاق الزفت … هي بتعمل كده ليه 

طلع مراد جري من المكتب و اتصل على مازن ف رد :ألو 

مراد بعصبية : چنی فين

مازن بفزع : مالك متعصب كده ليه راحت توصل ليان و قاسم المطار و جاية

مراد بصدمة :مطار …انت قولت مطار ، يا غبي چنی ‌هتسافر دي مقدمة طلب استقالة رسمي و بتقولي انا اسفة و حياة امي ما هعدي الموضوع ده بالساهل 

مازن : طب أهدي بس انا هحاول اوصلهم 

مراد بيركب عربيته و بيقول : مش هتعرف اقفل انا هتصرف .. و بيلاقي رقم غريب باعتله رسالة صوتية بتقول : مراد انا قاسم دلوقتي احنا في المطار و چنی هتسافر معانا الحقها قبل ما تضيع منك الطيارة فاضل عليها ساعة و نص هتلحق توصل …مضيعش الفرصة من ايدك 

ساق مراد بأقصى سرعة ممكنة 

في المطار 

چنی قاعدة جانب ليان و ساندة راسها على كتفها و قاسم جه و معاه قهوة 

و سمعوا أنهم المفروض يتحركوا عشان الطيارة ربع ساعة و هتتحرك و قاسم متوتر و بيبص في ساعته ف قالت چنی‌ : مالك بتبص في ساعتك كتير كده ليه 

قاسم بتوتر : لا عادي بتأكد انها مظبوطة 

چنی‌ بملل : مش يلا بقا عشان نتحرك 

بدأو يتحركوا و فجأة بيسمعوا صوت من وراهم : چنااااااا

بتبص چنی‌ بتلاقيه مراد و مادد ايده ليها و قال و هو بينهج : متسبناش يا چنی‌‌ متسبناش في ناس كتير بتحبك و عايزاكِ

چنی ‌بتبص على ايده الممدودة و على ليان و قاسم و لسة هتتكلم ……..