Uncategorized
رواية فيروز الفصل الرابع والاخير 4 بقلم اسماء احمد
رواية فيروز الفصل الرابع والاخير 4 بقلم اسماء احمد
 |
| رواية فيروز الفصل الرابع والاخير 4 بقلم اسماء احمد |
رواية فيروز الفصل الرابع والاخير 4 بقلم اسماء احمد
_ريحانة مين؟
_فيه واحده في عيلتكم اسمها ريحانة.
_ايوه بنت عمتي.
_هي دي اللى عملت السحر، والسحر دا قوي وأنا مش هقدر افكه، بس ممكن ادلك علي حد يفكه، بس لازم يتفك بسرعه.
“أحمد كان مصدوم من الكلام اللى قاله الشيخ، ازاي ريحانه تعمل كدا! وليه؟، والورقه اللى كانت في البلوره مين حاطتها؟ قرر إنه يروح لخديجه الاول قبل ما يروح لريحانه علشان يسألها علي حاجه”
_ لو سمحتِ يأم محمد تيجي بس تقعدي مع فيروز لأنها تعبانه شويه علي بس ماروح مشوار كدا، ومش هتأخر.
“الشيخ قاله متسيبهاش لوحدها لأن ممكن تأذي نفسها، ومفيش حد من أهله ولا أهلها معاهم في نفس المحافظه، فنده جارتهم، وراح يقابل خديجه”
_خير؟ مش كفاك الكلام اللى قولته المره اللى فاتت جاي تكمل النهارده؟
_خديجة أنتِ البلوره اللى جيباها دي، كنتي سيباها عند حد، قبل ماتديها لخديجة؟
ردت بإستغراب_لأ.
_طيب جبتيها منين، وكانت موجوده البلوره أول ماروحتي ولا وصيتي عليها مثلًا؟
_لما روحت الاشكال اللى هناك معجبتنيش فوصيت على واحده شكل معين، وجبتها من عند ريحانة.
_ريحانة بنت عمتي؟
_ايوه.
_وهي فتحت محل امتا؟
_دا فتحاه من فتره، انت متعرفش؟
_لأ، انا من ساعه ماخطبت فيروز، وانا بعدت عن ريحانة خالص، ومعرفش حاجه عنها.
الصمت دام للحظات قطعته خديجه:
_يعني اللى عمل كدا ريحانة؟
_أكيد.
_معقوله قلبها اسود للدرجادي؟ طب وليه هي عايزه تأذي فيروز ؟ وليه حاطته ليا، أنا مش فاهمه حاجه.
_اصلًا الورقه اللى كانت في البلوره مفيهاش أي سحر، هي بس كانت عايزه تتهمها فيكي، أنا آسف بجد ياخديجه.
“احمد فضل يحكي شويه مع خديجه، وبعدين قرر إنه يروح لريحانة ويفهم منها ليه عملت كدا، وراح لها واتقابلو”
_اخبارك يا ريحانة عامله ايه؟
_الحمدلله، أخبارك أنت وفيروز.
_الحمدلله كويسين وبخير.
_فيروز كويسه؟
رد عليها بابتسامه_دا فيروز زي الفل.
ردت باستغراب_ديما يارب في أفضل حال.
طلع أحمد الورقه من جيبه وقال_اقريلى كدا يابنت عمتي الورقه دي.
اخدتها وفتحتها واتكلمت بثبات_ مش عارفه اقراها ايه الكلام الغريب دا؟
_ياشيخه بجد؟ طيب مش الكلام دا أنتِ اللى كتباه او عارفه اللى كتبه، فإزاي مش عارفه تقريه.
_أنا معرفش حاجه عن الورقه دي.
اتكلم بهدوء_قوليلى بس حطيتها لخديجه ليه فالبلوره؟
_أحمد أنا مش فاهمه حاجه، ورقه إيه دي وبلورة ايه.
_البلوره اللى جات خديجه اشترتها منك علشان تهاديها لفيروز.
سكتت وكأنها بتفتكر_ ااااه فعلا جات خديجه تشتري مني بلوره وقالتلى أنها لخديجه بمناسبه فرحهم، حتي وقتها قولتلها اعملي صورهم في طاره كمان هيبقو الاتنين حلوين.
_مانا عارف كل دا، بس ليه حطتيها لخديجه، عايزه تدارى انك أنتِ عملتي السحر لفيروز في خديجه صاحبتها؟
ردت بصدمه_سحر ايه يا أحمد؟ انا معرفش حاجه، معقوله خديجه تعمل سحر لصاحبتها! طب ليه، هي اه لما كانت فالمحل عندي قالتلى إن يابختها بيك وإن على طول فيروز محظوظه، بس متخيلتش إن يكون قلبها اسود وبتحقد على صاحبتها للدرجادي.
_بطلي كدب بقى، خديجه مقالتش كدا.
اتكلمت بإندفاع_وانا هكدب ليه يعني؟
_ماهو انا مش عارف فيروز عملتلك ايه علشان تحقدي عليها بالشكل دا وتدمرى حياتها اللى يادوبك بدأت، وكمان بتكدبي وعايزه تجيبيها فخديجه.
_أنا معملتش حاجه.
_قوليلى بس فين مكان السحر دا وانجزى.
سكتت شويه بعدين اتكلمت بغل_في المقابر.
_ليه ياريحانة تعملى كدا ليه؟ فيروز اذتك فإيه؟ ايه الضرر اللى سببتهولك علشان تأذيها بطريقه دي، ايه ذنبها؟
_وأنا ذنبي إيه إني افضل أحبك من ايام ماكنا أطفال، وتيجي هي تاخدك في شهور مني؟ إيه ذنبي أنام كل يوم معيطه بسببها وبسبب حرقه قلبي والغيره منها، ذنبي إيه اتحصر علي احلامي اللى حلمتها معاك وانا بشوفها هي بتحققها معاك، ذنبي ايه اشوفها هي مشاركاك كل حاجه في حياتك وهو اصلا دا مكاني والمفروض أنا أكون مكانها مش هي، أنت المفروض ليا أنا وبس، أنا اللى حبيتك سنين واعرفك اكتر منها وأنا استاهل الحب مش هي، وأنت رفضتني ورفضت حبي بسببها.
“كان مصدوم من كلامها معقوله كل دا شيلاه فقلبها ناحية فيروز!!! كملت كلام”
_مش ناسيه لما جيتلك من سنتين وقولتلك اني بحبك وقتها أنت رفضت تتقبلني أنا وحبي، وقولتلى إنك بتحب فيروز وأن أنا زي اختك، متخيل كسر قلبي وقتها كان إزاي؟
_علشان فعلا أنا مكنتش شايفك غير اخت، ودا مش ذنبي.
_ولا ذنبي إني حبيتك ولسه بحبك وهفضل أحبك لآخر العمر.
_وايه اللى استفدتيه أنتِ لما عملتي كدا؟
_فيروز تفضل تتعذب بسحر دا لحد ماحياتها تبوظ وتموت وأنا وانت نتجوز، دا اللى عايزاه.
_انتِ مجنونه بجد، أنتِ مش انسانه طبيعيه.
_أنا مجنونه بحبك، اللى حاولت اخفيه طول السنين اللى فاتت ،ولما أنت بعدت عني وشبه الكلام بينا اتقطع بعد ماكنت اقرب حد ليا، وكل دا بسبب فيروز، أنا بكرهها اوي بكرهها لدرجه ممكن كنت اقتلها بإيدي، بس كنت أنت هتفضل لسه بتحبها وتكرهني أنا، علشان كدا سحرتلها علشان أنت اللى تكرهها واتهمها في خديجه ومحدش يشك فيا.
_وانتِ فاكره إن دا حب؟ أنتِ فاهمه الحب غلط، اللى بيحب حد ميقدرش يإذيه ولا يشوفه تعبان ولا يفرض نفسه عليه بإي طريقه مباشره أو غير مباشره، اللى بيحب حد وعايز يبني معاه علاقه، مش بيبنيها علي أساس هدم علاقه حد تاني او إنك تأذي حد تاني علشان نفسك، إللى انتِ فيه دا هوس وجنون مش حب.
“مشي احمد وجواه حزن الدنيا، على مراته اللى حياتها باظت واتشقلبت، بسبب واحده كان بيعتبرها زي اخته، اللى قرر يبعد عنها اول ماخطب علشان ميأذيهاش بقربه ليها لما تشوفه مع فيروز، معقوله اللى كان بيعاملها زي اخته وبيحبها تكون شايله الحقد دا كله؟ مكنش عارف يعمل ايه ولا يفكر فإيه بس المهم فيروز دلوقتى ياخدها ويوديها لشيخ تاني علشان يتفك السحر دا، بس الوقت أتأخر فقرر إنه يروح الشقه لفيروز وبكره يشوف الموضوع دا، وهو مروح جابلها الاكل اللى بتحبه وشوكولاته، وسلسلة رقيقه على شكل فراشه”
_تعالي كلي ياروزه جبتلك الاكل اللى بتحبيه.
_مليش نفس يا أحمد.
_ياحبيبتي هو أنتِ حد مفهمك إنك عايشه بالطاقة الشمسية؟ هتموتى يا وليه من قله الأكل.
ابتسمت ابتسامه باهته_ طيب جايه، هروح بس اغسل ايدي.
“احمد كان مستنيها، بس سمع صوت كسر قزاز جاي من الحمام جرى يشوف فيه ايه لقيها ماسكه حته قزازه من المرايه اللى كسرتها، ورايحه تقطع ايدها، جرى عليها واخد منها القزاز وزعق فيها وقال:”
_انتِ بتعملي ايه؟
_مش عارفه.
_يعني ايه مش عارفه.
_يعني فيه صوت جوايا بيقولي اعملي كدا، لحد ما انا تعبت منه.
_انتِ اتجننتي؟
“احمد عارف انها مش واعيه للي بتعمله، ومش قادر يلومها، بس قلبه كان هيوقف وهو شايفها رايحه تنتحر، اخدها في حضنه وطبطب عليها، بخوف من انه يفقدها، وراحو اتعشو ولبسها السلسله، ونامو، وفي الصبح قام قبلها، مسك تليفونه وبعت لخديجه إنها تيجي تقعد مع فيروز في شقه لحد ماهو يرجع من برا، رجع بص تاني عليها قرب منها وساب بوسه علي قورتها وهو بيقول بهمس”
_النهارده لازم يتفك السحر دا ياحبيبتى ومش هسمح لحد يأذيكي تاني واسف والله ليكي لأن كل اللى حصلك دا بسببى، بس هعوضك عن تعب الشهور اللى فاتت دي والله وهعمل كل حاجه تفرحك وتسعدك، استنيني وراجعلك وهاجى الاقيكي زي الفل ونتناقر تاني وتنكدى عليا عادي.
“قام لبس وراح للشيخ واخد منه العنوان بتاع الشيخ تاني وراح له وحكاله كل حاجه، واخده على المقابر بتاعت عيله احمد لان هناك مدفون السحر، والطريق كان طويل وبعيد، وراحو والشيخ جاب قزازه ميه حط فيها مسك وفضل يقرأ على القزازه ويمشى فالمقابر لحد ماوصل لمكان السحر ووقف، وحفر شويه وطلع كيس أسود، فتحه كان فيه عظمه وفرده جزمه كانت لفيروز وحاجات غريبه، والشيخ اخد الحاجات دي وحطها فالميه وبعد شويه قال لأحمد ان السحر كدا اتفك وان السحر دا كان مميت وناوي علي موتها، بالمرض او بالهلاوس والوسوسه.
“أحمد قلبه كان لسه مقبوض ولسه مارتحش برضو، ومكنش هيرتاح غير لما يشوف فيروز قدامه وهي كويسه، وراح لها وهو عايز يسابق المسافات، علشان تخلص ويوقف قدامها ويحضنها ويقولها خلاص مفيش تعب تاني، وفعلا راح وهو مبسوط، بس لقي ناس ملمومه تحت عمارتهم وسمع الناس بتتكلم وتقول “لا حول ولا قوه الا بالله” ” الاسعاف اهي جايه” قرب وسط الناس وهو قلبه مقبوض، لقي خديجه فالارض بتعيط وجنبها جثه هامدة على الارض متغطيه بملايه، رجليه تقلت مكنش قادر يتحرك، مشى ناحيه خديجه اللى اول ماشافته زاد بكاها، واتكلمت:”
_كنت جنبها، وقالتلى الشقه كلها تعابين عايزه تعضها واشباح وفضلت تعيط وتصرخ، حاولت اهديها وروحت اجبلها ميه بس لاقيتها نطت البلكونه.
_ااااه يعني السلسله دي اللى ماسكها على طول فإيده بتاعت مراته اللى اتوفت؟
_ايوه يستي، ومن وقت ما ماتت وهو اتنقل مستشفى امراض العقليه، يعيني اتجنن عليها، طول نهار يكلم نفسه ولما تسأليه بتكلم مين يقولك بكلم فيروز حبيبتي.
_حياتهم ادمرت بسبب السحر، حسبى الله ونعم الوكيل في قريبته دي.
_اه والله يابنتى حسبى الله بجد دمروا بيت وشخصين، بس اوعي تقولى لحد اللى حكتهولك دا ليروحوا يمشونا من المستشفى، دي برضو اسرار مرضي، انا حاكيت ليكي انتي بس.
_متخافيش.
“احمد جه قرب عليهم لأنهم من بدرى واقفين بعيد وبيبصو عليه، ويحكو عنه بصوت مش واصله”
_انتو من بدرى واقفين وباصين عليا انا وفيروز ليه؟
اتكلمت واحده منهم بإرتباك_ لا خالص احنا مش مركزين معاكم اصلا.
_احسن، وياريت تمشو من هنا لأن انا مبحبش حد يشوفنا واحنا بنتكلم، يلا يافيروز ياحبيبتى نكمل كلامنا واقولك هنسمي ولادنا ايه.