رواية عصافير الغرام الفصل السسادس والعشرون 26 بقلم تسنيم محمود

أيهم: مساء الخير يا عم طارق… 

طارق بتعب شديد وبكاء: حرام عليك ابويا مات ومشفتهوش 

أيهم: بجد انا عارف ان الموضوع صعب بس عشان تفكر تغلط مع حد انت مش اده يا طارق! 

طارق بألم ووجع شديد: صدقني مش هقربلكم تاني.. بس ارحموني انا تعبت .. اوعدك اني هسافر ومش هتشوف وشي تاني ابدا 

أيهم: امممم هفكر وارد عليك … فرصة سعيدة 

…….. 

همس: صباح الخير 

عدي: صباح؟ … انتي فقدتى ذاكرتك ولا ايه؟ 

همس: اومال احنا ايه؟..

عدي: احنا المغرب 

همس بذهول: ناااااعم؟؟ 

عدي: روحي خدى شاور وتعالي كلى 

همس بنعاس: طيب 

اخدت شاور وغيرت هدومها وصلت المغرب وقرأت وردها اليومي ومن ثم جلست تتناول طعامها 

همس: انت بتحطلي منوم ف الأكل ولا ايه؟ انا مكنتش بنام كده 

عدي ماسك تليفونه: هو انا كنت قربت من الأكل اصلا يابنتي؟ بصي كلي كلي وانتي ساكته 

همس قربت منه وبصت ف التليفون: بتحب من ورايا؟؟ 

عدي ساب التليفون وضربها بالمخدة بضحك: بتفكري ازاي هاااه هو ده العشم برضو يا حمادة؟؟! 

همس ضحكت: بس يا حبيبي عايزه اكل 

عدي: طيب ياختي كلى .. 

……. 

بعد شوية وقت همس خلصت اكل وغسلت الأطباق وعدي نزل رايح شغله … رن هاتفها 

همس بضحك: بتكلميني ف الشارع؟؟ 

فاطمة: الله الله يا ست همس هو الشارع مبقاش اد المقام ولا ايه؟ الله يرحم جد جدك 

همس: والله ولا اعرفه يابا الحج 

فاطمة: بس ايه الواد الخنيق اللي هتتجوزيه ده؟ 

همس: نهار طين.. لو سمعك وانتي بتقولي عليه الواد مش بعيد يعلق رقبتك على باب زويله 

فاطمة: ايوا قولتيلي بقا الغيرة هتشتغل 

همس ضحكت: ايه يابت مش زوجي ! قرة عيني لازم اغير عليه

فاطمة بابتسامة: ربنا يسعدك يا قلبي ويتمملك على خير  

همس بمكر: عقبالك يا فطوم 

فاطمة: بس يا حلوة .. 

همس: فاطمة فاطمة اقفلي بسرعة معايا وايتنج

فاطمة: طيب ياختي روحي كلميه 

همس: ماشي السلام عليكم

……. 

في مقر شركات العسيلي 

حمزة: وعليكم السلام… وايتنج مع مين ده كله؟؟ 

همس بذهول: ده كله فين يا حمزة؟! انا مكملتش حاجه

حمزة: ايوا بتكلمي مين؟ 

همس: دي فاطمة صاحبتي 

حمزة بتعجب: مين؟! 

همس: احم فاطمة اتعرفت عليها من سنتين لما رجعت من امريكا 

حمزة: ملناش دعوه.. المهم 

همس بضحك: ايوا خلينا احنا ف المهم هههههههه 

حمزة بحدة: متضحكيش 

همس وهي تكتم ضحكاتها: سكت 

حمزة: هتيجي تشوفي الفيلا امتى؟! 

همس بعدم فهم: فيلة ايه؟؟؟! الفيلا بتاعتكم انا عرفاها كويس 

حمزة: لا مش الفيلا بتاعتكم دي فيلتي انا وانتي 

همس: افندم؟ لا طبعا ياعم انت بتقول ايه؟ وبعدين هتسيب اخواتك علشاني؟ عشان اقعد انا وانت ف مكان لوحدنا؟؟؟ انا اتعودت على مليكة وبحبها تقعد معايا 

ابتسم حمزة: انتي زعلانه ليه؟

همس بضيق شديد: عشان مينفعش تكون مبذر بالطريقة دي… قال فلتك قال ليه يعنى ليه هااا؟ انا عاوزه إجابة صريحة 

ضحك على زوجته البريئة: خلاص خلاص يا حبيبي متزعلش … تسمحيلي اخطفك بكره؟ 

همس بحماس: هتخطفني فين؟! 

حمزة: وكده يبقى اسمي خطفتك؟. 

همس: شوقتني .. دق باب المكتب 

حمزة: ادخل 

السكرتيره: مسيو حمزة عم حضرتك طالب يشوفك ضروري 

ابتسم حمزة بتسليه: اوك five minutes معايا مكالمة 

السكرتيره: أمرك يا فندم.. عن اذنك 

همس: مين دي يا حمزة بيه؟! 

حمزة: دي السكرتيره 

همس بغيظ من بروده: طب مع السلامة يا حبيب قلب السكرتيره… وقفلت الخط وهي تأكل بنفسها من القهر والغيظ 

ضحك حمزة وظل يتابع عمله على الحاسوب 

…… 

السكرتيره: موجود يا فندم بس خمس دقايق مع حضرته مكالمة 

أشرف بعصبية: انتي عارفه انتي بتكلمي مين؟ 

السكرتيره: اه يا فندم عارفه بس انا عندي أوامر 

أشرف بغل: ليك حق يابن اخويا 

السكرتيره: تشرب ايه حضرتك؟ 

أشرف والغل يأكل به: لا متشكر مش عايز 

سامر وهو ينظر لعم حمزة وابتسامة خبيثة تزين وجهه وأشرف هينفجر من الغضب: مروة 

السكرتيره( مروة ): أمرك يا سامر بيه 

سامر: شوفى بشمهندسه غزل وخليها تراجع الورق ده… وربع ساعة كده وابعتيها على مكتبي 

السكرتيره: تحت أمرك .. عن اذنكوا 

دخل سامر وهو مبتسم 

حمزة من غير ما يبصله: خير يا وش المصايب 

سامر: عاصر عمك كده ليه يا زومي؟؟ 

حمزة رفع وشه وبصله بابتسامة تنذر بالهلاك المبكر: اتلم يا سامر وعدى يومك على خير… أما بالنسبة لعمي ف سيبها بظروفها وعايزك تبقى قاعد واحنا بنتكلم 

سامر بابتسامة شريرة فهو يكره عم حمزة كالعمى: عيوني انت تؤمر

……. 

فاطمة ماشية ف الشارع وتليفونها مش مبطل رن 

فاطمة: الوو ايه يا ماما عايزه ايه؟؟ مبطلتوش رن ليه؟ 

والدتها: يا بنت الجزمه … دايما هابه ف وشي زي بابور الجاز ؟! 

فاطمة: اهي شتيمة منك فيكي بتلزقلك .. عايزه ايه؟ 

والدتها: ابقى هاتي معاكي جبنه كيري وعيش فينو وكيلو ونص بصل وكيلو طماطم وكيس مكرونة 

فاطمة بصدمة: يا نهار زي بعضه… وده ليه ده أن شاء الله عامله وليمة ياختي؟؟؟؟ 

والدتها: متتأخريش…. وقفلت الخط 

فاطمة واقفة مذهوله بتبص للتليفون: مهو انتي اكيد مش أمي.. اكيد لقيتيني على باب الجامع

…: اه والله شكل امي وامك اخوات ف الرضاعة هههه

فاطمة بخضة: بسم الله الرحمن الرحيم.. هو انت؟! 

عدي: ايه مش عاجبك؟ 

فاطمة: وتعجبني بتاع ايه يا روح الروح 

عدي بخبث: بجد انا روح روحك؟ 

فاطمة ف سرها: انت قلبها وعقلها وحياتها كلها…: انت واحد حيوان ومش محترم وامشي من هنا ياض بدل ما أعلم عليك 

عدي: افندم؟ تعلمي على مين يابت؟ 

فاطمة: عليك يا ننوس عين ماما.. واشلوحلك كمان 

عدي ببرود مميت: انا ننوس عين امي؟! ماشي هوريكي ننوس عين امه هيعمل فيكي ايه دلوقتي.. بس قبل كده تعالى علمي عليا 

فاطمة بصت حواليها والشارع فارغ من البشر: اه يا حيوان بيستغل ضعفي .. 

عدي مسك دراعها جامد قائلا بأعين من جحيم: قوليلي كده مين اللي حيوان؟ اصلي مسمعتش كويس للأسف 

فاطمة بقوة مزيفه شالت ايده: ايدك يا بابا لتوحشك.. دونت تاتش مي مش عشان انت طول بعرض بحلويات وعيون خضر هخاف منك واستسلملك …. يلا العب بعيد يا شاطر 

عدي بغضب يكاد يفتك بتلك الجميلة المتسولة: نهار ابوكي اسود… 

فاطمة: ما تحترم نفسك يا برنس .. انت هتعملي ايه اصلا؟؟؟ 

عدي بمكر طلع مسدسه ونفخ فيه وبصلها لقيها مبرقة عنيها على آخرهم من الصدمة: حلو صح؟! ايه رأيك بقا افرغه ف نفوخك؟؟؟ 

فاطمة: يالهوي استخبى بسرعة قبل ماحد يشوفك بالمصيبة اللي ف ايدك دي !! 

عدي قرب منها اوي اوي: خايفه عليا يا بطه؟! 

تلاقت عيناها المفعمه بالحب مع خضار عيناه قائله بغضب وزعيق: بطه ف عينك .. ابعد عني بدل اقسم بالله اصوت والم عليك الناس 

عدي بخبث: وان ما بعدتش؟ 

فاطمة وهي تنظر لجمال عيناه: هعمل كده مثلا….. يالهوووووووي بيتحرش بيااااا اللحق…

ضمها عدي من ظهرها ووضع يده على فمها: يابنت المجنونة!! 

الناس اتجمعت على صوت صراخها: في حاجة يا انسه الأستاذ بيضايقك ولا ايه؟ 

عدي باستنكار ورفعه حاجب متصنعا الحزن: انسسسسه؟؟! دي المدام بس هي للأسف مصابة بالصرع .. ادعولها ربنا يشفيها بقا 

الناس خبطوا كف على كف: ربنا يشفيهالك يابني.. روحي يابنتي مع جوزك 

فاطمة بحلقت عنيها مش مصدقة ضغطت على رجله وصرخت بجنون: ده كدااااب ده بيتحرش بيا ساعدوني 

عدي: عيب يا حبيبتي الناس يقولوا علينا ايه؟ خلاص تقدروا تتفضلوا 

الناس مشيوا وهو سابها وعلى وجهه ابتسامة مستفزه 

فاطمة بذهول وصدمة: مدام هاااا؟؟؟ عملتلي فضيحة ف الشارع… دا انا هشرب من دم أمك النهاردا 

عدي: اغلطي كمان مره !! بس بقولك يا قمري… انتي شكلك كده بتفكري هتتجوزي ازاي دلوقتي بعد الفضايح دي صح؟؟؟ 

فاطمة مبرقه عنيها عقلها مش قادر يقتنع بكلام ذلك المعتوه 

…….. 

في مقر شركات العسيلي 

حمزة: أهلا أهلا يا عمي اتفضل الشركة نورت 

أشرف: ايه اللي انت عملته معايا ده؟ 

حمزة: هو ايه اللي انا عملته يا .. يا عمي؟! 

جلس أشرف أمام مكتب حمزة حتى تتلاقى نظراتهم: سعادتك مش عارف عملت ايه؟ 

حمزة بسخرية: لأ سوري محصليش الشرف أعرف 

أشرف بعصبية: اتكلم مع اللي اكبر منك بأسلوب كويس يا ولد …

حمزة بمقاطعة وبرود قاتل: وطي صوتك لو سمحت 

أشرف بغضب: لما تخليني انتظر برا طول الوقت ده.. ده بالنسبة لسعادتك ايه؟! لما تعاملني زيي زي اي حد من العملاء ده بالنسبة لحضرتك ايه؟؟ 

سامر نفسه يضحك: احم أطلب لحضرتك ليمون؟! 

نظر له أشرف بقرف وجد سامر يستقبل نظراته بابتسامة باردة خبيثة 

حمزة ببرود: هكرر كلامي تاني وطى صوتك وانا هتغاضى عن الغلط اللي سمعته .. واه هو حضرتك جاي المقر الرئيسي لشركات العسيلي ليه؟ 

أشرف بغضب: هو مش مسموح اني اجي ولا ايه يا سعادة الباشا؟؟؟ 

حمزة بنفس البرود الذى سوف يقتل أشرف بالبطيء: لا حضرتك تشرف في اي وقت…. بس بصراحة خايف على حضرتك من الحسرة 

سامر بسخرية: هو حضرتك تعبان؟ اطلبلك دكتور؟ 

أشرف بضيق شديد وهو يفك رابطة عنقه: خلينا نتكلم على انفراد .. أحسن 

حمزة: قول اللي جاى هنا علشانه .. اصل يظهر ان الموضوع مهم مش مستحمل تأجيل ساعة واحده لحد ما ارجع 

نظر أشرف لسامر بغل ثم اعاد النظر لحمزة: الحسابات هنا أخبارها ايه؟!!! 

سامر في سره: الله دا الكلام جه ع الجرح .. وهتولع الله

……. 

فاطمة روحت بيتهم هتنفجر من الغيظ 

والدتها: مالك يابنت الهبلة 

فاطمة بصراخ: ابعدوا عن وشي الساعة دي .. لحسن حاسه اني هصورلكوا قتيل 

والدتها: نعم يا روح امك.. وطبعا كعادة كل ام مصرية شبشب سلم على وشها 

فاطمة بدوخة: طيب يا ستي شكرا .. دخلت اوضتها وحاسه بفرحة وغيظ وغضب وأحاسيس كتير ملخبطه جواها 

مسكت تليفونها: ردي يا همس الكلب… الووو 

همس: لحقت اوحشك 

فاطمة بصراخ وغيظ: اخوكي يا حيوانه 

همس بهدوء وصدمة: ماله اخويا 

فاطمة بغيظ ورايحه جايه ف الأوضة بتحكي لهمس كل شئ ومتضايقة بشدة: ….. شوفتي بقا 

كانت همس غير قادره على السيطرة على نفسها من شدة الضحك: والله انكوا مجانين هههههههه 

…… 

في مقر شركات العسيلي 

سامر بصدمة: عايز تعرف ايه حضرتك؟ 

أشرف: الحسابات 

سامر: لا دا انا سمعت صح بقا !! 

حمزة ببرود قاتل: هو حضرتك ناوي تتولى إدارة الشركات وانا معرفش ؟!! 

أشرف: وليه لأ؟؟؟ 

حمزة ضحك جامد ومش قادر يتحكم بنفسه من كثرة الضحك الساخر: لأ ايه؟ هي إدارة البنك والحسابات أثرت على عقلك ولا ايه يا عمي المصون؟ .. توقف حمزة عن الضحك متحدثا بجدية وهو يخبط يداه على مكتبه: لما ربنا يتولاني برحمته وابقى جنب ابويا ساعتها ابقى فكر ف اللي قولتهولي دلوقتي .. إنما دلوقتي احلم الأحلام مش وحشه 

أشرف بعصبية: متلفش وتدور عليا يابن سليمان 

حمزة اتحرك من خلف مكتبه وانحنى بجسده القوي أمام وجه عمه: اقسم بالله انا مستغرب نفسي اني سايبك تغلط للحظة دي .. يلا وقتك خلص 

وقف أشرف قائلا بغضب وزعيق: انت بتضردني يابن اخويا؟؟! 

حمزة: انا مش قليل الأصل علشان اطرد حد من مكان خاص بينا دي مش أخلاقي ولا انا ولا اخويا .. وبالنهاية انت عمي !! 

أشرف وهو يتجه نحو الباب ويشير له بيده كتهديد: هتندم يا حمزة العسيلي 

حمزة بسخرية متجاهلا كلامه: متنساش تحلم يا .. يا كان يقربلي ايه يا سمسيمو؟ 

ضحك سامر بهستيريا: كاتم ف نفسي من بدري هههههه عمك يا حبيبي 

حمزة بغضب وهو ينظر للباب وطيف عمه: انت تصدق ان ده وبابا أخوات؟؟! 

سامر: مش عارف الصراحة… بس ايه اللي طلعها ف دماغه؟ 

حمزة اتنهد بضيق وفك رابطة عنقه: بيلمحلى بالكلام ده من ساعة ما كان عامل تعبان .. 

……. 

اليوم التالي 

في فيلا العسيلي ماجي: أهلا أهلا ببنت الأكابر.. لسه صاحيه يا هانم

مليكة بخوف ودموع لمعت بعيناها الزرقاوات: صباح الخير يا طنط 

ماجي بسخرية: قولي مساء الخير 

مليكة بتعب ودموع: اوك 

جاءت شيري قائله بمياعة وهي تقبل والدتها من خدها وتنظر لمليكة: هااي.. وحشتيني اوي يا مامي 

ماجي بسهوكه: وانتي يا قلب مامي 

شيري بصوت هامس متحدثه بجانب مليكة مباشرة: اووه اوعى قلبك الضعيف ميستحملش 

ابتعدت مليكة وصعدت لغرفتها تبكي بشدة حتى اصتدمت بذلك العاشق الولهان 

سليم: مليكة انتي بتعيطي؟ 

مليكة بخجل واحراج وهي تمسح دموعها التى لا تتوقف عن الانهمار على وجنتيها: انا انا عن اذنك.. ودلفت إلى غرفتها غير عابئة بقلبه المحطم 

سليم بوجع وكسرة: مش ذنبي انهم أهلى… 

جومانا وهى تشير بيدها أمام وجه أخيها: مالك يا سليم واقف كده ليه؟ 

سليم بانتباه: هاااه لا مفيش 

جومانا بحقد: شايف الترتيبات ف الفيلا عامله ازاي؟ 

نظر لها سليم نظرة طويلة مغلفة بالضيق: اممم هي حلوة فعلا 

جومانا باستغراب: انت بتتكلم كده ليه؟

سليم: معرفش.. انا هروح بيتنا 

جومانا بصدمة: نعم عايز تسيب العز ده كله عشان تروح بيتنا؟؟؟! 

سليم بعصبية: اخرسي يا جومانا… ليكي سبع سنين عايشه برا وتفكيرك متخلف وجشع زي ما انتي وبصراحة مش منتظر منك انك تتغيري .. لأنك للأسف مش انسانه انتى أحقر بكتير من ان يقال عليكي بشر 

تجلس بغرفتها وحيدة كالعادة تضم قدميها إلى صدرها بوضعيه الجنين وتنهمر تلك الدموع اللعينة على وجهها فاتن الجمال

حتى دلفت تلك العقربة شيري 

مليكة بدموع: عايزه حاجه يا شيري؟؟ 

شيري: هو مينفعش ادخل اوضتك يا حلوة انتي ولا ايه؟

مليكة ببراءة: تؤ دي خاصة 

شيري: ايه ايه يا عنيا خا… ايه يا حبيبتي؟ قال خاصة قال 

وظلت تتنقل بأرجاء الغرفة: كل دي اوضتك؟ كل دي اوضة ملابس؟؟ …. ظلت تقلب بملابسها واكسسواراتها وتخرج منها أشياء معينة .. ايه الحاجات المقرفة دي واضح انك لوكل خالص 

……. 

في شقة عدي 

رن جرس الباب وكان الطارق هو حمزة العسيلي !! 

همس فتحت الباب وابتسمت 

حمزة: ايه القمر دا؟ 

همس بخجل: تسلملي عيونك يا 

حمزة: يا ايه؟! 

همس بكسوف ووشها أحمر: يا حمزة 

حمزة ببلاهة: كنت عارف ان اسمي حلو ويخطف القلب بس مش للدرجة 

همس ضحكت بخجل ودق قلبها بعنف: مش يلا بقا ولا ايه؟ 

حمزة: لا مش يلا قبل ما اخد بوسه 

همس بخجل ومازال وجهها محمرا: ده بعينك 

حمزة: عادي كلها أربع أيام وهطلع عليكي كل اللي بتعمليه فيا بس اصبري 

همس بضحك: اخاف انا من تهديداتك يا حمزة باشا 

حمزة بخبث قرب منها اوي وباسها من شفايفها برقه: قانون جديد… احنا مبنهددش 

همس واقفة متجمده مش قادره تصدق 

شدها من ايدها ونزلوا .. بعد ربع ساعة من الصمت أوقف السائق السيارة أمام الشركة التي بجمالها ابهرتها 

فتح لهم الحارس الباب وهي كل ده في صدمتها 

دلف حمزة إلى الداخل وهو يمسك يدها وخلفه طاقم كامل من الحراسة 

همس برعب: حمزة ايه ده؟ 

ركبوا الاسانسير وصعد للدور العشرون وهذا مقر مكتبه 

همس بصت للسكرتيره من فوق لتحت بقرف وهي تراها ترتدي ملابس قصيرة وضيقه جدا ميكب يغطي وجهها بأكمله …. وكأنها معزومة على العشاء وليس عمل 

السكرتيره بدلع وهي تلعب بخصلات شعرها: حمدا لله على سلامتك مسيو حمزة.. 

همس بغيرة ظاهرة وعصبية: ما تتكلمي عدل يا بتاعة انتي 

اتصدم حمزة ولكن ابتسم ابتسامة خفيفه 

السكرتيره بقرف قائله بصوت ناعم: ايه دي مسيو حمزة؟

همس بغيظ: المدام يا عنيا 

وضع حمزة يده على خصر همس وقربها منه جدا شعر بالرعشه التي تدفقت داخل جسدها: اتكلمي كويس 

السكرتيره بصدمة: ايه المدام؟!! انت اتجوزت؟؟! 

همس: اه يا حبيبتي اتجوز .. اول مره تعرفي؟؟؟ 

حمزة: قهوتي تجيلي على مكتبي… واطلبي عصير مانجو للمدام 

فتح له الحارس باب المكتب ودلف وراءه خلع عنه جاكيت بذلته السوداء وضعه بمكانه المخصص وأشار له حمزة بالخروج… فأنصاع له وخرج على الفور 

ظلت همس تنظر لجمال المكان بانبهار لعبقرية تصميمه وديكوره العصري الجذاب 

اقترب منها حمزة قائلا بابتسامة جذابة: عجبك؟! 

همس بذهول: طبعا انت بتهزر… ده مكتبك؟؟! 

حمزة: امممم 

همس: حلو اوي اوي يا حمزة.. ربنا يديك خيره ويكفيك شره يارب 

حمزة وهو يحاول كبت ضحكاته: ايه اللي عملتيه مع نور ده؟؟! 

همس بغيظ: مش شايفها بتكلمك ازاي .. دي بتحبك

حمزة بحنية: انتي طيبه اوي يا همستي 

همس: انا؟! دا انا شريرة خاف منى بقا  

حمزة ضحك: تؤتؤ مسمحلكيش تتكلمى عن حبيبتي بالطريقة دي…. اوك؟؟ 

حمزة وهو يقترب من المكتب: تحبي تقعدي مكاني؟؟.

همس: لا يا معلم اقعد انت انا بخاف من شكل المكتب اصلا هههههههه 

حمزة: ازاي ده؟! اومال بتذاكري ازاي؟ وتجيبي درجات حلوة كده؟ 

ضحكت همس ضحكات متتالية: مش عارفه بقا اهو ربنا ستر.. والا كنت هعمل كحك وادوقك منه 

حمزة بضحك: مبحبش الكحك وبعدين مينفعش تقللي من قيمة نفسك .. هو انتي اي حد ولا ايه؟ انتي دلوقتى همس العسيلي 

همس ضحكت وقعدت فوق المكتب وحمزة مبسوط بيها بل طاير من الفرحة 

همس بغيظ: قولي بقا مين اللي برا دي؟!!! 

حمزة: واحنا مالنا هي واحده جايه تشتغل 

همس وهي تقلد تلك الفتاة التي لم تعبر من حلقها: لا دي مش جايه تشتغل دي جايه تنقى عريس 

انفجر حمزة ضاحك على طريقتها بالحديث 

همس بحدة خفيفه: متضحكش ممكن تدخل وتشوفك وانت بتضحك وتعجبها اكتر 

لم يستطع السيطرة على نفسه من كثرة الضحك 

دقت السكرتيره الباب ودخلت قبل سماع اذنه بالدخول ولكن صدمت صدمة عمرها عند رؤية المنظر وجن جنونها عندما رأت همس تجلس فوق المكتب وحمزة بيضحك فهي للمرة الأولى ترى الابتسامة على وجهه 

حمزة نفسه اتصدم ولكن لم يبالي للأمر 

السكرتيره وهي مذهوله: العصير 

حمزة: حطيه عندك واتفضلي على شغلك يلا 

السكرتيره بضيق مكبوت: أمرك يا باشا .. وخرجت لتسمع همهمات الموظفين والموظفات على هذا الثنائي الذي خطف قلب الجميع 

دق الباب مرة أخرى ولكن تلك المرة كان أيهم دخل قائلا بمرح: حمزة حمزة حمزة !! 

حمزة: داخل ذريبة يا زفت؟ 

أيهم بلامبالاة: لأ .. داخل المكتب .. ايه ده همس ازيك 

همس ضحكت: ازيك انت يا جعفر زمانك 

أيهم: انا زي الفل يا قمر انتي… 

حمزة بغيظ: ما اطلبش لحضراتكم شجرة واتنين لمون؟! 

أيهم قعد: اه والله يا حمزة حاسس اني مهبط وهقع من طولي 

حمزة: غور أقع من طولك بعيد عني؟! 

أيهم: لا انا عايز اقعد معاك يا حبيبي

همس واقفة هتموت على نفسها من الضحك 

حمزة بغيظ: اه يا حيوان… ماشي يا أيهم ماشي 

أيهم: لا ماشي مرتين؟! الحق انفد بجلدي .. سلام يا عسل 

همس بضحك هستيري: يا خرابي ياني.. سلام 

حمزة بغضب طفيف: عجبك؟ 

همس بعدم فهم: هو ايه اللي عجبني؟!

حمزة بضيق: سي أيهم 

همس بدلال ودلع: تؤتؤ عيوني مبتعرفش تشوف او تعجب بحد غيرك 

حمزة: اه بتثبتيني حضرتك؟¡ 

همس بطفولة وهي تهز رأسها بنفي: ابدا ابدا .. ابتسم حمزة وقبلها من خدها: بكره الفراولة دي هتكون بتاعتي لوحدي ! 

…….. 

ماشية سرحانه تفكر بهذا الجحيم الذي تصارع الحياة من أجل أن تجد مخرجا منه ولكن لا محالة.. تجدف بكل قوتها ولكنها يا حسرتاه على حالها انها من الولايا 

تزوجت والدتها من رجل متزوج ولديه إبنه ثم تركهم في عرض البحر يسارعون بمفردهم .. ماتت والدتها من حسرتها .. ثم علموا بخبر وفاته بعد أن زوج ابنته صغيرة لم تكن تبلغ من العمر سبعة عشر سنة وانجبت ولد وأصبح عاق والآن بمفردها تدفع ثمن أخطائهم جميعا .. ثمن غلطة أمها انها تزوجت ذلك الرجل الحقير الذي يدعى والدها .. ثم ثمن غلطة حب اختها حب مراهقه لشاب قليل الأصل ألقاها هي وابنها ولم يسأل عنهم .. ثم غلطة أب لم يهتم الا بنفسه وألقى ابنته دون أن يسأل عن ذلك الشاب الذى يريد ابنته للزواج …. 

حتى جاءت سيارة يقودها صاحبها بجنون كأيهم مثلا كادت ان تصتدم بها ولكن إرادة المولى عز وجل فوق كل إرادة 

نزل من السيارة والغضب يتطاير من بين جفون عيناه التى عشقتها تلك الغلبانه

أيهم بغضب يكاد يقتلع عنقها: انتي حمارة ولا مبتفهميش؟؟ عميتي؟! ماتبوصي ادامك 

لم تصدر اي ردة فعل سوى أن فرت دمعه خائنه وهي تنظر لعيناه بحب رغم ما فعله معها ولكن ما هذا القلب اللعين الذي يجعلني اتخلى عن كرامتي لأجل انسان احببته… 

اتوجع أيهم من تلك النظرات نعممممم لان قلبه واخيرا

أيهم ببرود: سوري 

غزل وهي تمسح دموعها: لا على ايه هي جات عليك.. عن اذنك 

أيهم بلامبالاة فهو لم يستمع لدقات القلب النابض بعشقها ابدا وتكفى ضربه واحدة: مع السلامة 

ركب عربيته وانطلق وظلت هي تبكي فهذه الدموع هي ونيستها الوحيده .. 

…… 

في فيلا العسيلي 

أشرف: يا زين ما شرفت حضرتك؟!

أيهم ببرود: حضرتك بتكلمني انا؟؟ 

أشرف: ايوا انت .. واقف معووج واتكلم عدل 

أيهم: هو حضرتك عايز ايه بالضبط؟ اصل انا تعبان ولسه راجع من مأمورية وبتاع ومش حمل مناهدة فلو حضرتك عايز مني حاجه قولي وانا عيوني ليك .. 

بعد قليل من الصمت ونظرات أيهم وأشرف لبعضهما لا تنذر بالخير: اممممممم يظهر انها عطله ع الفاضي… عن اذنك يا عمو 

صعد لجناحه بالأعلى ليصتدم بها: يادي القرف 

شيري بعدم فهم: قولت ايه يا أيهم.. مسمعتش كويس 

أيهم ببرود: مقولتش… 

جومانا: هااي 

أيهم بسخرية واضحة: ايه رأيك يا جيجي ف الترتيبات؟! اتوقع ان الفرح هيكون رائع .. كنت اتمنى انك تكوني العروسة … فهمت جومانا ما يلمح إليه فتضايقت بشدة والقهر سوف يقضي عليها 

شيري بدلع: عقبالنا يا أيهومي 

أيهم في سره: عند ام ترتر ..،، اه اه ان شاء المولى .. سابهم ومشي 

شيري بهيام: شفتي يا جومانا قالي ان شاء الله 

دخل أيهم اوضة مليكة وكانت تجلس على طرف السرير تبكي 

أيهم بقلق: ملوكه في ايه يا حبيبتي؟ 

مليكة ببراءة وعياط: ابيه انا ربنا مش بيحبني صح

أيهم: ليه يا كوكي؟ 

مليكة: مش اللي ربنا بيحبه بيستجيب لدعواته؟؟! 

أيهم: وممكن ربنا لما بيحب عباده مش بيستجيب لدعواتهم على طول لأنه بيحب يسمع صوتهم كتير .. إنما انتي بتسألي ليه يا قمري؟ 

مليكة بدموع وحزن: علشان انا كنت بدعي اني اروح عند مامي وبابي بس مموتش 

أيهم بوجع: مش انتي عارفه انه حرام الإنسان يتمنى الموت؟؟؟ 

هزت مليكة رأسها بنعم وهي تمسح دموعها 

أيهم: يبقى متدعيش كده تانى اوك؟؟ ثم اكمل بمرح: حبيبتي يا كوكي عايزة تسيبيني تحت ايدين حمزة لوحدي؟ اموت والله 

مليكة بضحك: لا خلاص.. البوبي أولى 

أيهم بصدمة ومسكها من دراعها: البوبي أولى مني؟؟ طب انا زعلان مش هكلمك تانى 

مليكة: لا خلاص متزعلش.. 

أيهم: وايه اللي فكرك؟؟ 

مليكة بحنق طفولي وأصبح وجهها أحمر: طنط ماجي 

أيهم: لا انتي عايزه درس من بتوعي بقا .. مروحتيش مع حمزة الشركة ليه؟ 

مليكة: قالي الصبح وانا كنت عايزه انام ولما صحيت … (وقصت له ما حدث) بس كده 

أيهم بغضب مكبوت: اوك .. تعالى ناكل وبعدين نروح عند سامر 

مليكة بفرحة: اوك 

……. 

مر كام يوم وجاء اليوم المنشود… يوم زفاف حمزة وهمس ♥️ 

عدي: هتمشي وتسيبيني يا همسة؟ 

همس بدموع: اربع شهور مروا بسرعة ملحقتش اشبع منك يا عدي.. 

عدي بحنان مسح دموعها: ولا انا يا قلبي .. اوعى تنسيني بس 

همس: لو نسيتك انت افتكر مين؟ 

عدي بضحك: حبيب القلب ياختي .. هشوفك احلى عروسة يا همستي 

همس بخجل: عقبالك يا عدي ! 

عدي: بعدك على طول تعالى من الهني مون بسرعة عشان تخطبيلي .. الا صحيح هي مش جايه النهاردا ولا ايه؟ 

همس بضحك: هي تقدر ما تجيش .. بس انت شكلك واقع لشوشتك يا معلم 

عدي ف سره: اللي اتعمل فيها يخليها تقتلني ومش هلومها ..،، اه والله يابت يا همس، بس شكلي اتعميت مش عارف حبيت فيها ايه والله 

همس بضحك: ما اسمحلكش دي صاحبتي.. وبعدين انت طبقت المثل بالضبط مراية الحب عميا ههههههه 

عدي: اه يا خيانة.. ما كانت لسه صاحبتك 

همس بصوت واطي: خليها ف سرك بقا 

……. 

حمدي: لا يا باشا النهاردا فرح بنت مراتي هههههه 

مصطفى: امممم حمزة العسيلي !! 

حمدي: ايوا 

مصطفى: طب ما اديك قريب من الهدف 

حمدي: اللي بتفكر فيه خطر يا سعادة الباشا .. هكون محل للشك 

مصطفى بابتسامة سخرية: هم كده كده شاكين فيك 

حمدي بصدمة: نعمممم 

مصطفى: مالك مستغرب ومصدوم كده؟؟ روح روح اللحق الفرح 

حمدي بتعجب: هو في ايه سعادتك؟! 

مصطفى: مستغرب يا حمدي منين بتحب مراتك ومنين نفسك ف بنتها؟؟؟ 

حمدي: مش عارف.. مع الف سلامه 

وغادر حمدي متجها نحو بيته … 

……. 

في فيلا العسيلي 

أيهم: مالك يا سليم؟ 

سليم باستعجاب فهو وأيهم مش قريبين من بعض ابدا: احم كويس الحمد لله 

أيهم: عارف نفسك تسأل دلوقتي هو انا تعبان ولا ايه؟ مش كده؟ 

اتصدم سليم: أيهم انت مش طبيعي صح.. احم انا آسف ف اللفظ 

أيهم: لا يا معلم عادي .. باخد شتيمة احلى من دي بكتير

سليم بذهول: اا هو هو انت أيهم ابن عمي بجد ولا غيروك؟؟.. 

أيهم بضحكاته الرجوليه المهلكة بالنسبة لتلك التي تعشقه حد الجنون ولكن تراقب عن بعد: لا انت لسه ما تعرفنيش 

سليم: اشطا يا برنس.. دا طلع عندك سنان اهو وانا اللي كنت فاكرك مأتب 

أيهم: اه يا واطي… خدت عليا اوي انت 

سليم: لا بس بجد عاوز اعرف دماغك دي فيها ايه .. كان نفسي من زمان اتعرف عليك اكتر بس خايف منك اصلك …. 

أيهم بمقاطعة: بتنطح نطح … عارف 

سليم بصدمة وذهول: اللهم صل على كامل النور 

أيهم: عليه الصلاة والسلام .. قوم يالا من هنا خنقتني 

سليم: ايه يا معلم ما كنا لسه حلوين.. بتقلب مرة واحده كده ليه؟! 

……. 

فاطمة: بت يا شذا عشان نبقى متفقين.. إن جات بنت هتسميها فاطمة على اسمي اوك؟! 

مليكة ببراءة: اسم فاطمة وحش 

فاطمة بصدمة: نهارك طين.. طب حتى اعملي حساب اني قاعده !! 

مليكة بضحك: همس بتنادي صح يا زوزو؟!! 

فاطمة: اهربي اهربي ياختي  

ضحكت شذا بشدة: اااه كح كح منكم لله 

صباح بدموع: الف الف مبروك يا همس 

همس بسعادة بالغة: الله يبارك في عمرك يا ماما 

شاهدت مليكة هذا المشهد ففرت دموعها على وجهها وتمنت لو ان والدتها تقوم بضمها هكذا 

بعد كام ساعة …… 

ظهرت همس بفستان زفافها الأبيض الملكي ومكياجها الخفيف الرائع كانت تبدو كالأميرة وجاءت خالتها وبناتها حفل الزفاف العالمي وعيونهم منزلتش من على كل واحد ف الحفلة .. زغاريد وفرحة وسعادة بالغة تزين وجه الجميع… 

حمزة بفرحة: مبروك يا حبيبتي … وقبلها فوق جبينها واغمضت هي عيناها بخجل وتوردت وجنتيها

همس بخجل: الله يبارك فيك 

سامر: امتى هتبطلي العند ده؟؟؟ 

شذا: يا سامر بقا عايزه افرح .. 

سامر بعناد: برضو الفستان وحش وبطنك كبيرة 

أيهم: شذا ايه الحلاوة دي… اول مرة اشوف واحده بتحلو ع الحمل 

شذا بفرحة: ربنا يجبر بخاطرك يا أيهم زي ما انت جابر بخاطري كده 

أيهم بغمزة: اي خدمة … 

راحوا القاعة والكل اتجنن وكانوا مهيبرين ع الآخر 

سامر وأيهم وسليم وعدي الاربعه اتجننوا وغنوا اغاني شعبي وصوتهم كلهم احلى من بعض،، ورقصوا شعبي ومهتموش للصحافة والاعلام والوزرا ورجال الأعمال والمستثمرين والناس المهمه اللي ماليه الفرح .. جومانا وشيري وماجي وأشرف هيطقلهم عرق من شدة الغضب 

أيهم ومليكة غنوا وولعوا الفرح والعيون ما نزلتش من عليهم ودول المعروف عنهم ان صوتهم رائع بكل ما تحمله الكلمة من معنى … وقفوا الفرح على رجل والكل مندمج معاهم 

وقفت جومانا من مكانها وذهبت لتهنئة العروسين 

جومانا بدلع: مبارك يا ميزو بجد فرحتلك من كل قلبي 

اتغاظت همس بشدة 

حمزة ببرود صاعقي: ميرسي 

جومانا بغيظ متحدثه بجانب اذن همس: مبروك يا عروسة هه متجهديش نفسك كتير بقا عشان تقدري على حمزة أصله شقى اوي هههه 

همس بقهر ولكن تغلفت بالقوة وقالت برقتها المعتادة: الله يبارك ف حضرتك !! 

جلست مليكة بجانب شذا وفاطمة المبهورين بجمال صوتها هي واخيها 

فاطمة بصدمة: بت يا لوكا مين الواد اللي كنتي بتغني معاه ده؟؟ 

شذا: اخوها أيهم 

مليكة: صوتنا حلو؟ 

فاطمة: انتي بتهزري… صوتكم رائع ما شاء الله 

مليكة بمكر: صوت ابيه عدي حلو اوي برضو 

احمرت فاطمة خجلًا 

شغلوا اغنية رومانسية والكابلز بدأوا يرقصوا وطبعا همس وحمزة مثلوا ثنائي رائع .. خطفوا القلب بطلاتهم

حمزة بضيق: كانت بتقولك ايه؟؟ 

همس وهي متجاهله حديثه: معرفش 

حمزة بعصبية حاول اخفاؤها: همس متنرفزنيش 

همس وقد لمعت الدموع بعيناها الخضروات: كانت بب.. بتقول فرت دمعه من عيناها وهي خائفه منه بشدة من حدته الزيادة ….. 

شيري بدلع: أيهم ترقص؟! 

أيهم بلامبالاة: اوك 

فرحت شيري بشدة ورقص معاها وهو متخيلها غزل لقد لان قلبه لحبها ولكن يود إثبات العكس لنفسه

الأغنية خلصت وحمزة شال همس وطوحها بعد اصرار الثلاثة المجانين وأعلن الديجي ان أصحاب العروسة يقفوا وراها

ولكن حدث مالم يكن متوقع … لقد تلقت فاطمة الورد ! 

شذا بزعل: وانا عايزه أقف 

سامر بصدمة: يالهوي عايزة تتجوزي غيري ولا ايه؟.

شذا: تؤتؤ نعيد فرحنا من تاني 

سامر: اه يا حبيبي ع الهرمونات 

عدي بخبث متحدث بالقرب من فاطمة: قريب اوي ان شاء الله 

أحمر وجهها خجلًا وقد لاحظ أهلها الحديث….. انتهى الفرح وحمزة وهمس راحوا على الجناح الخاص بيهم بالفندق 

حمزة بسعادة بالغة: الف مبروك يا همستي… انا مش مصدق نفسي 

همس بخجل ووجه كالفراولة: …. استمعوا إلى أصوات عالية فخرجوا إلى التراس وجدوا مليكة وأيهم وعدي وسامر وشذا وسليم ووالدة همس وخالتها وبناتها يقفون بالأسفل يفجرون الألعاب النارية وعاملين اجدعها زفة …. فرحوا جدا وشاورولهم من فوق والسعادة تزين وجههم أجمعين 

انتهوا وعاد الكل إلى أماكنهم… كانت قد دخلت همس أولا ولكن صدمة حلت على حمزة عندما دخل بعدها