Uncategorized

رواية تزوجت عاشقة فجعلتني أعشقها الفصل الثانى 2 بقلم عائشة البشير

 رواية تزوجت عاشقة فجعلتني أعشقها الفصل الثانى 2 بقلم عائشة البشير
رواية تزوجت عاشقة فجعلتني أعشقها الفصل الثانى 2 بقلم عائشة البشير

رواية تزوجت عاشقة فجعلتني أعشقها الفصل الثانى 2 بقلم عائشة البشير

كنت في حالة صدمه، شني اللي قاعد يصير معاي ياربي، تعالت الأصوات وبسرعه ماألتمو علينا كل اللي في الصاله، وعلى قد مادرنا شي قالت إنفيق، قمتها بسرعه وطلعت نجري وكل اللي شافني طلع ورائ وهما مش فاهمين شي، بس منظري وأني نجري وشايلها وهيا بالبدلة الكبيره والفجره اللي إمدندشه بيها كان مايوحيش بالخير????
خالد كنت مقعمز في الإنتظار وشاد رأسي بإيديا، وكل مره نتنهد تنهيده أطول من اللي قبلها????
خيري: هونها وتهون ياخالد، بإذن الله مافيها شي
خليل كيف خاش من الباب وجاي جيهتنا: لاحول ولاقوة الابالله، تي الناس كلهم تبعوك للعياده، ماصرفتهم إلا بستين واسطه، وأمك شادتها ورائ تبي مني يجيبها
خالد بعصبيه????: ماتجيب حد فاهم؟؟ والله نشوف واحده هنايا نقلب الدنيا قلب، أصلا هذا اللي يتبع دوة النسون هكي يصير فيه، مالي ومال المحضر والبلى أني، المفروض توا…. وسكتت لما إنفتح الباب وطلع الدكتور، خالد قدمت بسرعه وبخوف: شن صار يادكتور؟ كيف حال فرح؟
الدكتور بإبتسامه: ماتخافش المدام كويسه، شوية هبوط بس شكلها ليها أيام مش واكله شي، خليها الليله تبات وتأخذ تغذيه وبكرا…….
خالد ماقدرتش نستني لين الدكتور يكمل كلامه ودخلت لفرح كنت بنموت من الخوف علاها، شكلها وهيا ممدوده على السرير ووجهها الباهت وخالي من أي لون قادر يكسر قلبي كسر????، قربت ومسكت إيدها اللي كانت بارده
الممرضه: الحاجات اللي كانت لابستهم كلهم حاطيتهم في الكيسه هذي بس ياريت تجيبولها حوايج باش ترتاح كويس
خالد هزيت رأسي للممرضه اللي طلعت وأني عيوني قاعدين تابتين على فرح????: فرح 
فرح فتحت عيوني وشفت خالد قدامي واضح الخوف في عيونه، ظلمته معاي هلبا، شن ذنبه!! نزلو دموعي????
خالد بخوف: ليش الدموع يافرح حاسه بشي في حاجه توجع فيك، خليني إنادي الدكتور
فرح هزيت رأسي بي لا، بس خاطري نقوله قلبي واجعني، ومافيش حد يقدر يشفيني غيره، نبيه هوا???????? تقدر تجيبهولى؟؟
خالد قعمزت على حاشية السرير ومسحتلها دموعها: ليش ليك أيام مش واكله، هذي خطة بديله للإنتحار ولا كيف، ليش إديري في روحك هكي؟؟
فرح نبكي: مافيش حد راح يفهمني، ماحد عارف شني اللي قاعده نحس فيه، لو تحس ولو شوي من العذاب اللي عندي، مستحيل تلومني????
خالد كويس أنها بدت تحكي وإطلع اللي في قلبها، بالرغم من أنه كلامها هذا عذاب ليا بس عادي نتحمل على الأقل ترتاح ولو شوي، زدت ضغطت على إيدها اللي ماسكها: قوليلي وأني نحس بيك????
فرح وكأني كنت محتاجه حد يسمعني، إنهرت كليا: ليش أني !! ليش إيدير فيا هكي، علاش يخش لحياتي مدامه مش قد كلامه !! كيف هنت عليه كيف !! اللي قاتلني أنه هوا اللي فرض حبه عليا فرض وخلاني إنحبه، وسيبني بدون سبب مشي من غير مايبررلي أي شي رخاني بعد ماعلقني بيه،، قلبي أضعف من أنه يتحمل هذا كله،
كل لحظه وهو مش معاي نموت ألف مره، خلوني نموت ونرتاح????????
خالد مكانتش عارفه أنها بكلامها هذا قاعده تطعن في قلبي???? بدون رحمه، اس اس ياقلبي أتحمل أتحمل????: فرح ممكن تهدى، أهدي أستغفري الله حرام هالكلام، وبعدين دموعك غاليه ليش إضيعيها على حد مايسوى، هو اللي خسرك والله، مايعرفش قيمتك صدقيني، وماعرفش كيف يحافظ عليك، ماتعبيش روحك على واحد واضح أنه ماحبكش من الأساس
فرح بدموع????: خالد أنت مش مجبور تتحملني، أنت ماليكش ذنب وسكتت لما لاحظت أنه عصب من كلامي
خالد بعصبيه????: أنتي شن قاعده تقولي !! هالكلام معاش يتعاود فاهمه، أهم شي تكوني كويسه توا وبعدين نحكو في كل شي????
حاولت نلطف الجو شويه????: خليني إنوض نجيبلك حاجه تأكلها، وجهك يخوف اللي يشوفك توا مايقولش أنتي اللي كنتي في الصاله إمبكري، تخدعو فينا بالمكياج الزفت????
فرح ضحكت من بين دموعي غريب هالشخص كيف يقدر يتغير في لحظه، من الحزن للغضب للفكاهه، خطر على بالى شي قريته
“” الشخص الذي يتغير مزاجه وملامحه بسرعه لإسعادك … نيته بيضاء???? وأطيب شخص على وجه الأرض “”
فرح إبتسمت على الكلام اللي خطر في بالي: معقوله وليت شينه لهالدرجة؟؟،ونضت بنعدل رقدتي
خالد قربت منها وعدلتلها المخده، وإبتسمت: لا والله أنتي قمر في كل حالاتك????، شويه ونجي مانعطلش عليك
خالد مديت لخيري الكيسه اللي فيها الردي والفجره: باللهي برا كلم خوله تعطيك لبسه وعبايه لفرح، وجيبلي أي حاجه نلبسها ونحول هالهم هذا، 
خليل يضحك????: واللهي شكلك تقول كنت في حضره مش محضر، تي غير من ضاحك عليك ومخليك تلبسها
خالد قعدت نشوف لروحي ونشوف لخليل بربع عين????: خيرها واللهي إلا مليحه اللبسه غير أنت الذوق عندك هارب من يومه???? شن رأيك مش حلوه ياخيري؟؟???? ( كنت لابس الجبه الطرابلسيه عرفتوها، باللهي مش حلوه????)
خيري: مبردكم الزفت،هيا خلاص معاش تبي شي نمشي أني????؟
خالد: خلاص توا خليل يمشي يجيبلنا حاجه نأكلوها???????? وأنت برا جيب الحوايج
خليل بنص عين????: بالك نخدمو عندك وإحني مانعرفوش ياأفندى، لا يابابا حرك إيدياتك???? وفليساتك???? تقوى مرتك على حسابي مايصيرش هكي????
خالد: خزي عليك أنت وياه، هيا مره في العمر اللي طلبت منكم شي، تي تقول مش خوتي، خلاص مستغني عن خدماتكم أقلب أنت وياه من قدامي????
خيري بخوف????: أني ماتكلمتش أهو ماشي بنجيبلك الحوايج،وطلع بسرعه
خليل لما شاف خالد يشوفله بنظرة غل????: بلا جو عواويل الزفت، وأنت مشاعرك متحركه وقاعدلنا على سبلة، نبصرو معاك، وطلع بسرعه حتي هو
خالد ضحكت لما طلعو الزوز وباين خافو مني، تنهدت علاقتي بخوتي مش تمام بكل مش عارف هل أني اللي جابد روحي ولا هما اللي خذو على غيابي????‍♂️
قعدت مقعمز على الكراسي اللي قدام الدار لين جي خليل وجابلنا عشي
خليل بإستغراب: خيرك مقعمز برا لزاتك الطرابلسيه ولا كيف????
خالد بغضب????: تعرف مازال نسمعها منك الكلمه هذي والله لاعاد خوي ولانعرفك، مبردك معرفناكش أمتي بتكبر، عقلك فاضي الزفت????
خليل قعمز جنبي ومعاش قال ولاكلمه، جي خيري وباين راقيله????
خيري بعصبيه: شد البلى أنتم مستريحين إهنايا وأني وسكت لما رن تليفون خليل
خليل: نعم ياخوله، أي قاعد معاه، أي أهو كيف جي، كيف !! تي باهي باهي حصل خير ماتقوليش قدامهم أنتي، مسكر !!! باهي توا إنقوله يفتحه ويكلمها 
خليل شاف لخيري وإنفلق بالضحك????: تي كيف هربت منهم يعطيك دعوه
خيري ????: من فوق السطح، تي خليتهم جمهور واقفين قدام الباب كلهم يبو يجو، تي طانطا بالريموك وإن شاء الله تسدهم????
خالد بإبتسامه: كويس أنك ماجبت حد فكني من الجو الزايد اللي يديرو فيه
خليل: باهي أفتح تليفونك وكلم أمك ياخلوده ياحبيب قلبها ياغالي أنت????
خالد( أمي مايلتلي أني أكثر واحد في خوتي، يمكن من بعدي عليهم وهكي): تليفوني فاصل شحن، هات تليفونك نكلمها
خالد: نعم ياأمي، والله كويسه وأمورها تمام????، ليش تجي وتعبي روحك مافيش داعي للزحمه والله مافيها حاجه، لا لا شن تحرج ماتحرج توا أني نفهمها مادوريهاش، وشفت لخيري بضحكه????، لا ياأمي شني وين يبات????، والله أني اللي قتله ماتجيب حد معاك، خلاص باهي تمام، حاضر إن شاءالله
خيري: قتلك قوله مايروحليش الليله يدور وين يبات ولا☹؟؟ أصلا مني قلها بنروح وفريق الجيش قاعدين معسكرين عندنا????
خالد: خلاص هيا توكلو على الله أنت وياه الوقت تأخر
خليل ???? لخيري: شفته التافه ولا، يوزع فينا يفضي لروحه في الجو
خيري: خدي مصلحته شني مازال يبي في وجوهنا
خليل شد خالد من إيده: هيا حتي أنت روح معانا ياباشا مافيش مرافق قالو????
خالد بإنزعاج: تي حول يابلوه، مني إمسلطه عليا هالنفخ هذا، وخديت الكيسات وخشيت نجري للدار اللي فيها فرح وسكرت الباب بالمفتاح ????
فرح إنخلعت من خالد كيف خش بسرعه وسكر الباب بالمفتاح، بخوف: خالد شني فيه، وسكتت لما أشرلي بإيده نسكت????، وهو يضحك????، وضحكت حتي أني???? لما سمعت حد يتكلم من وراء الباب
خليل بصوت عالى: تحساب روحك هربت يادلوع الماما أنت، خزي على وجهك ياللي ماتتحشم المرأه مريضه وأنت شي ماتقدرش، أسمعيني يامرت خوي ردي بالك تخليه يضحك عليك راهو مافيشي ثقه خوي ونعرفه ههههههههه????
خالد عصبني خليل بكلامه تي هيا من غير شي مش متقبلتني وزادها هوا ، لكن مانقدرش نفتح الباب عارفه لصقه وبارد، بغضب: باهي ياخليل حسابك عند منال بعدين توا تشوف، وإنتبهت لفرح اللي ميته ضحك????، ااااه ياريتني نقدر نخليك ديمه فرحانه وتضحكي هكي????: تضحكي أنتي عاجبك عاد????،وقدمت جيهتها???? بس لما شفت ملامحها كيف تغيرو للخوف???? وخرت شويه: هيا نوضي بدلي حوايجك ولا عاجباتك هالواحده اليابسه اللي لابستيها، تقول محنطينك بيها????، مابعدك كيف متحملتاها???? 
فرح بسرعه ماتوترت وركبني الخوف لما شفت خالد يقدم جيهتي وعيونه مركزات عليا، بس وخر لما شافني خايفه منه، شعوري بالذنب راح يقتلني من إتجاهه عارفه روحي ضالماته هلبا، بس مش بإيدي مانقدرش نتقبله????
بدلت حوايجي وطلعت لقيت خالد حاط العشي على الطاوله
خالد قربت وشديتها من إيدها وساعدتها تتمدد على السرير: شويه نبدل حوايجي وإنادي الممرضه تركبلك تغذيه جديده بدل اللي كملت
فرح: والله خلاص ياخالد معاش نقدر
خالد مديتلها عصير رواخ: باهي أشربي هذي وخلاص، هيا على خاطري☹
فرح إبتسمت: باهي خلاص خلاها جنبي، توا نشربها بالشويه
خالد لميت الكيسات وغسلت إيديا وجبدت كرسي وقعمزت جنب السرير: ها شن تخبرينا ياست فرح????
فرح تحشمت من نظراته: شني تبيني إنقولك؟؟
خالد بنظرة حب????: نبي نعرف كل شي على زوجتي???? بصراحه هالأشياء المفروض عرفتها في فترة الخطوبه، بس أنتي ربي يهديك رأسك مسكر
فرح نزلت رأسي لوطه: أسفه ياخالد????
خالد مسكت إيدها بين إيديا: ليش الأسف يافرح؟؟ مش بينا هالحركات، بس من حقي نعرف ليش كنتي رافضه تكلميني ولانشوفك فترة الخطوبه؟
فرح تحشمت عارفه تصرفاتي بايخات: بصراحه كنت نحسابك بتمل وبتهرب، بس أنت شي لصقت????
خالد إبتسمت: طلعت لصقه يعني، شكرا ياست فرح، وبتوتر خايف من الإجابة بصراحه: فرح ليش وافقتي على الزواج مادامك ماتبيش ولا في حد غصبك؟؟
(( فرح إذكرت من حوالي عشره شهور، طبعا أمال هيا اللي حربت على موضوع خالد لين تم، ماعرفتش بشي إلا يوم جاب أهله، وقالولي الناس جايين من مكان بعيد عيب إنردوهم غير أطلعيلهم وبعدين ساهل، وطلعت لخالد مقابلة شرعيه على أساس????وقاعده مسكره رأسي مانبيش، بس كلام بابا معاي خلاني نفكر من جديد????
علي: أسمعيني يافرح أنت توا معاش صغيره والمفروض تعرفي مصلحتك، قوليلي ليش رافضه ماعجبكش خالد ولاكيف ؟؟
فرح تحشمت???? أول مره بابا يحكي معاي في مواضيع زي هذي: لا يابابا مش هكي بس أني نبي نكمل قرايتي، وبعدين هما مش من منطقتنا 
علي بجديه: القرايه مش حجه يافرح أنتي عارفه أنه حتي أني مستحيل نخليك توقفي قرايتك باش تتزوجي، بس الراجل مش معارض على موضوع القرايه وماعنداش مشكله إنك تقري، وبعدين منطقتهم مش بعيده هلبا ساعه ونص بالكثير تكوني عندنا، 
فرح سكتت معاش عندي حجه
علي: أسمعيني يابنتي أني بوك وأكيد تهمني مصلحتك قبل كل شي، الراجل ماشاء الله عليه وكل اللي سألناهم شكروه???????? والحق أني عاجبني، هالوقت قلو اللي زيه بخدمته وحوشه وسيارته وراجل على حاله، أني يابنتي مش دايملك ديمه مادابيا نتهني عليك وأني عيني حيه، وأنتي عارفه جلال وصالح كيف شادينها عليك وأني حي ومش قادرهم يبال ميت
فرح بحزن: بعيد السوء عليك بعد عمر طويل ان شاء الله
علي بإبتسامه: صلي إستخاره وخلي الباقي على ربي ))
فرح وفعلا صليت وحسيت أنه الموضوع عادي يعني لاإرتحت ولاإضايقت، فكرت ممكن أنه هالخطوه تساعدني نبدأ حياتي من جديد وننسي الماضي، قررت نعطي لروحي فرصه نعيش من جديد بعد اللي صار معاي????
خالد بإبتسامه: كويس معناها برضاك ومافيش حد جابرك، وكملت لما فرح هزت رأسه باإيه، حلو أنها إرتحتلي نوعا ما وبدت تحكي، فرصتي نعرف إجابة كل التساؤلات اللي قاعده إدور في رأسي: باهي وشني اللي صار ليلة الحفلة!! وليش كنت إمدايره إضراب على المأكله؟
فرح من حقه يعرف حتي لو كان هالشي ضايقني بحزن????: بصراحه اللي صار مكانش من مخططاتي، كنت ناويه نفتح صفحه جديده ونبدأ حياتي من الأول، بس المكالمه اللي جتني ليلة قرو الفاتحه قلبت كل الموازين، مجرد ماسمعت صوته عرفت إنه القوه اللي كنت نتصنع فيها كلها تبخرت، مانقدرش إنكون معا حد ثاني طول ماهو مسيطر على كياني وروحي عنده????
خالد كنت متوقع هالليله راح تكون بدايه حلوه بينا، وخصوصا أنها بدت ترتاح وتحكي اللي في خاطرها،
بس لاااااااااااا ✋ إستنو شن قاعده تقول هذي !!!
يعني ليلة فاتحتنا اللي مفروض تكون تحكي معاي فيها ونسهرو للفجر زي أي إثنين، 
الليله اللي ماضقتش فيها طعم النوم من الفرحه لأنها ولت مرتي والتوتر لأني بنشوفها ثاني يوم وبنحكي معاها لأول مره،
قضتها وهيا تحكي مع حبيبها الأول وتبكي، يعني هذا علاش عيونها حمر ومنفخات هذاكا اليوم من البكي عليه، شني اللي قاعد يصيرلي يااااربي،
الغضب اللي تجمع عندي وقتها كنت قادر نقتلها بدم بارد ولاتتحركلي شعره بس إيديا مربطات قلبي متحكم فيا????
????لا سلطة لنا على قلوبنا..فهي تنبض لمن أرادت ????
نضت وطلعت بسرعه بدون ولا كلمه وسكرت الباب ورائ، أول مره نحس بالضعف والإهانه بالشكل هذا، حتي خيانة فاتن مادارتش فيا هكي وقتها
مستحيل نقدر نوصفلكم إحساسي وقتها، مافيش أي راجل يرضي بهالكلام ويفوت اللي داراته بالساهل، أني عمري ماكنت ضعيف هكي شني دارت فيا بس????????
عارفين شعور أنك تبي تنسي وترمي كل شي وراء ظهرك وتمشي، بس في نفس الوقت عارف أنك لو مشيت راح تخسر روحك ونفسك، يعني راح تعيش من غير هدف في الحياه، وكأنك تائه في وطنك، وكأنك غريب وأنت بين أهلك، ماكنتش نقدر إندير أي خطوه، مافيش شي ساهل كل حل ليه عواقب وخيمه وأني المتضرر الوحيد????????
لو حكيت اللي قاعد يصير ونهيت هالزواج، راح تكون خيبة أمل كبيره ليا وكل العيله  راح يتشمتو فيا، يعني هذي نتيجة إختياري اللي هما كانو معارضيني عليه كيف راح تكون نظرتهم ليا وخصوصا بعد فشل إختياري الأول لفاتن، أني نفسي مش راح نقدر نواجههم ونواجه نظرة الناس ليا، أنتم كلكم عارفين المجتمع اللي عايشيين فيه للأسف????????
ولو سكتت وتحملت مش عارف قداش نقدر نصبر نشوف زوجتي قدامي وهيا موجوده جسد بس وروحها مع غيري، هالشيء عذاب ليا،
وصعب عليا نخسر كل شي بالساهل، والأصعب من هذا كله كيف نقدر نسيطر على قلبي اللي وكأنه قاعد يصارع بين الموت والحياة
بعد جدال كبير بين قلبي وعقلي اللي ماقدرش ينتصر فيه ولا واحد فيهم، قررت نصبر ونعطي فرصه للوقت ممكن يقدر يغير شي، بس قررت نكون حازم شوي ممكن هالتصنع يسهل عليا أني نتقبل برودها
الصبح طلعت جبت فطور لفرح وقهوه ليا، وجيت لقيت الدكتور عندها????‍⚕️
فرح لما شفت عيون خالد كيف كانو راح يطلعو من كثرة العصبيه ????لما سمع كلامي الأخير، توقعت منه أي شي وقتها إلا أنه ينوض ويطلع بهدوء هكي،????
وجعني خالد هلبا واضحه كسرة الخاطر في عيونه، أي راجل يفكر يرتبط ويتزوج متوقع روحه يعيش حياة حلوه وسعيده ويكون متهني ومرتاح،
بس خالد إنصدم في حالتي اللي قاعده أسيره للماضي، قضيت طول الليل وأني نبكي???? وماقدرتش نرقد وخالد معاش خش عليا بكل، توقعته روح بس الممرضه الصبح قتلي أنه قعد مقعمز طول الليل على الكرسي برا????
خالد قعدت واقف نستنى في الدكتور يكمل وكنت نتجنب نشوفلها، بس مانكذبش عليكم عيوني يلصلصو من تحت لتحت????????، إبتسمت لما إنتبهت أنها لابسه وشاح ومغطيه شعرها????
الدكتور تلفت لخالد: امورها تمام الحمدلله، كتبتلها خروج ورد بالك عليها ياعريس???? معاش نبو نشوفوها إهنايا مره ثانيه
خالد بإبتسامه: إن شاءالله، شكرا بارك الله فيك
فرح طلع الدكتور وخالد قاعد واقف في مكانه، قررت إنبادر لأني أني اللي غالطه، إبتسمت: صباح الخير كيف حالك اليوم؟؟????
خالد بصراحه كنت ميت من الفرحه ☺أنها هيا اللي بدت، بس لا شد روحك وين كلامك إمبارح على التجاهل والحزم،???? تصنعت الجديه????: صباح النور، هيا أفطري باش نطلعو
فرح: باهي، تعالا أفطر حتي أنت????
خالد بنظره على الجنب????: لا أني مانفطرش الصبح، نأخد في قهوه☕ بس، يلا خفي روحك، نمشي إنتم الإجراءات???? ونلقاك واتيه
فرح ماأستغربتش من معاملته البارده، ردة فعله في نظري أكثر من عاديه بعد اللي قلته، 
طلعنا ودقايق وصلنا للحوش???? اللي كان شكله من الخارج أكثر من روعه بالنسبه ليا????، والحديقه كانت تجنن وديكور الورد ????????????⚘????فيها يهبل ويفتح النفس☺، قعدت سارحه، وإنتبهت على صوت خالد
خالد????: طلوع للجنان من غير وشاح وعبايه وبروحك لا فاهمه،
فرح هزيت رأسي ودخلنا للحوش كان حلو وهادى وأثاته أنيق ومرتب
خالد: هذي دار النوم خشي إرتاحي، بعد العصر راح نمشو لحوش بوي العيله يبو يطمنو عليك
فرح هزيت رأسي وفتحت باب الدار اللي كانت خيال بكل معني الكلمه???????? كانت كبيره وواسعه والوانها تفتح النفس، إنتبهت لبتاتي اللي واخد جزء كبير من مساحة الدار: شني بيرتبهولي هذا كله،???? خديت حوايجي وقررت نأخد ندوش ونرتاح شويه
خالد فتحت الدار اللي كانت مقابله دار النوم، وإذكرت يوم نقلت داري اللي كانت في حوش بوي
(( صاحب خالد1: غير كان تقولي شني بدير بيها ياخالد
صاحبه2: هههههههه باش كان لزاته الطرابلسيه يلقي على شني يرقد
خالد بعصبيه????: أحترم نفسك ياراجل قلنالكم مية مره معاش تعاودو أمها الكلمه هذي،  وبعدين شن تلز ماتلز هذي تي عيب قدامك راجل راهو????
صاحبه1: هههههه توا نشوف الراجل كان مارقدتش في الدار هذي أكثر من دار النوم تعالا إتفل على وجهي????
خالد????: تفوووووو???? على وجهك من توا، واللهي الدار قاعده كويسه، وقلت مرات يجينا حد من بعيد يرتاح فاها عادي ليش مكبرين الموضوع ))
ضحكت على روحي وعلى الثقه اللي كانت عندي ماكنتش متخيل أنه أني أول واحد نرقد فيها، وقت ياسي????????
كنت واخد إجازة إسبوعين من العمل على أساس عريس????، الأسبوعين الأولات كنت نطلع على أساس نمشي للعمل بس لا كنت نمشي نقعمز في إستراحة واحد صاحبي لين يتم وقت العمل???????? مانقدرش نمشي للشركه ويقعدو جماعة العمل يضحكو عليا يقولو لزاته من أول يومين????????
وماكنتش نبي نقعد معاها في الحوش وقت أطول ونضعف قدامها????‍♂️
فات شهر كامل وأني نحاول على قد مانقدر نتجاهل فرح، بس إهتمامها بتفصيل يومي قدرت تعلقني بيها بدون شك❤❤
“” غلبتني وكنت أظن أن قلبي أبدا لايميل… 
تلك التي يسكن في ملامحها كل جميل…
رفقاً بقلبي ياحلوتي…
قد ذاب عقلي من حسنك وروعة التفاصيل “”
أني إنسان قريب سبعه سنوات عشت من غير عيله نتنقل من إستراحه لإستراحه، مافيش من يهتم بلبسي وأكلي وشربي وحتي أوقات راحتي،
بس هيا قدرت تأسرني باأبسط التفاصيل، إنوض الصبح نلقاها إمنسقتلي لبسه حلوه وأنيقه للعمل????
وقهوتي☕ وحاجه حلوه???? محطوطات على الطاوله، كندرتي???? ملمعه وجنبها شخشير نظيف????، نروح نلقا الحوش مرتب ونظيف والغذي واتي ومن أحلي مايكون، نخش للدار نلقاها معطره☺ وريحتها تفتح النفس للراحه، والبيجامه على السرير، واللبسه اللي بنمشي بيها للمحل في العشيه معلقه في العلاق، والأهم من هذا كله شكلها ديمه مرتب وأنيقه وتأخد العقل، ماقدرتش إنشد عليها ولا غلطه، كنت كل يوم العشيه نحط فيها عند أمي، وكل أهلي يشكرو فيها وفي إسلوبها ومعاملتها????، بصراحه ننقهر أوقات لما نشوفها تهدرز وتبصر مع الكل????، ليش لما تكون معاي مش هكي، معاملتها ليا رسميه هلبا،????
فرح كنت نحاول نعوض خالد بإهتمامي بيه وبإحتياجاته، نحاول نغطي شويه من تقصيري في حقه كزوجه، عارفه أنه مستحيل شي يأخد مكان شي بس على الاقل يخف إحساسي بالذنب شويه
كنت مروح بعد ماسكرت المحل ومتجه لحوش بوي، كنت شارد ونفكر في وليد اللي ليه فتره تليفونه مقفل ومش عارف كيف نوصل فيه، شديت التليفون وطلبت رقمه بس طلع مقفل، قفزت بسرعه لما رن التليفون من جديد توقعته هوا بس كانت أمي وقتلي نخطم عليها في حوش عمتي، خطمت خديت أمي وطلعنا، كنت مخطط نأخد فرح ونتعشو برا لازم نحكو شويه في هلبا تفاصيل عالقه بينا لازم كل واحد يوضح للثاني موقفه، تلاقينا أحني وخليل ومرته قدام الباب وخشينا معا بعض
خيري بصوت عالى: تي كيف ياأمي هذا وين تروحي،أني جعان نبي نتعشى قبل مانطلع مع الولاد
خالد بغضب: أحترم نفسك على مني تعلى في صوتك، ووين خواتك؟
خيري زفر بغضب: مندفسات يقرو أمتي طلعو من الدار هما????
خليل يضحك: ههههه خلوه ياخذ راحته توا، بعدين يطيح في واحده تحرم عليه الكلام بكل????
خالد بإنزعاج: أعقل ياراجل خيرك الزفت مش وقتها برادتك????
زاهيه: خلاص توا إنخش إنديرلك حاجه فيسع فيسع
خالد إنتبهت لمنال اللي قعمزت هيا وولدها وخليل تقول عليها ضيفه ولاقالت توقف وتعاون أمي حتي شويه، من يوم يومها هكي مغروره وشابحه روحها على الفاضي، كانت ماتجيش لحوش بوي إلا مره في الشهر تقريبا، جابده روحها بكل بس توا قعدت إنشوف فيها كل ليله إهنايا شكلها بدت تقلد غيرة السلفات عاد ???? إستاقضت على صوت قيس: عمو عمو وين العروسه، خالد هذا وين ركزت صح وين فرح !! ????
زاهيه طلعت مبتسمه????: هيا نوض ياخيري خود عشاكم أنت وبوك وخوتك
خيري بصدمه????: بسم الله العظيم حتى كأنه سحر مش بالسرعه هذي
خالد ماكنتش مركز معاهم: وين فرح ياأمي؟؟
زاهيه بفرحه: في المطبخ، ربي يحفظها إن شاءالله لقيتها موتيه العشي
خالد أشرت لخيري اللي كان نايض للمطبخ أنه يقعمز: توا إنجيبه أني خليك، خشيت وواضحه فرحتي بتصرفاتها في عيوني☺: أنتي شن قاعده إديري؟؟
فرح إنخلعت: أسم الله أمتي جيت، عمتي كانت طالعه والبنات يقرو قلت خلي إندير العشي خير مانقعد إمكسده بروحي
خالد قعدت إنشوف للسفره اللي تفتح النفس: يسلمو إيديك????
تعشينا وضمت فرح المطبخ من أمي، بصراحه معاملتها اللي أكثر من كويسه لأمي زايده مكبره صورتها في عيني❤
خالد كنت ناوي نحكي معاها بس متردد طقيت على باب الدار: فرح تعالى للصالون نبيك شويه
فرح بإستغراب أول مره ينادى عليا في الوقت هذا: باهي حاضر أهو جايه
فرح بتوتر: نعم خالد تبي شي
خالد بإبتسامه????: أي تعالي،وأشرتلها تقعمز جنبي، بس ولاكأنها شافتني وقعمزت في الجهة المقابله من الصالون????‍♂️
خالد بإصرار مهما دارت مش راح تقدر تهرب مني الليله لازم ننهي كل شي، نضت وقعمزت جنبها وشديت إيديها، حسيت بخوفها ورعشة إيديها بين إيديا: فرح ممكن تقوليلي لأمتي بتهربي مني☹
فرح بخوف: أنت شن تبي؟؟ 
خالد بجرأه: نبيك???? بصراحه معاش قادر نتصنع أكثر من هكي☺
فرح حاولت نجبد إيديا بس كان ماسكني بقوه، بخوف: كيف شن قصدك
خالد بحب????: قتلك نبيك???? وهلبا مش شويه
فرح بتوتر: بس أنت عارف أني….وسكتت لما قاطعني خالد
خالد بحزن????: عارف أنك تحبي واحد غيري وقلبك عنده، وعارف أنك كل ليلة تبكي عليه نسمع فيك، وعارف انك مش راح تنسيه بالساهل، بس أنتي مش عارفه أنك علقتيني بيك، مش عارفه أنك خديتي قلبي، مش عارفه أني مستحيل نخليك إضيعي من إيدي مهما صار، أعطيني فرصة يافرح والله راح إنسيك فيه، والله مايستاهل حبك مادامه فرط فيك بالساهل هكي، فيه غيره يتمني يشوف ضحكه منك بس
** لا أعلم كيف دخلتي قلبي.. لاأعلم كيف جعلتني أتعلق بكِ.. لاأعلم كيف أحببتكٍ.. لا أعلم لما ؟ وكيف ؟ ومتي ؟
كل ماأعرفه لو كان لي ألف قلب سأحبك وحدك ألف مره **
فرح كلام خالد زاد حسسني بالذنب، قعدت نبكي: والله متمنيه هلبا ياخالد، حتي أني نبي ننساه ونطلعه من قلبي بس الموضوع مش ساهل زي ماأنت متخيل
خالد مسحتلها دموعها: ليش الدموع يافرح، مانحبش نشوف دموعك، باهي كويس مادامك أنتي تبي تنسيه، خليني إنساعدك، والله ماراح نخدلك بس أعطيني فرصة 
فرح بصراحه كنت محتاجه حد يوقف جنبي بالك فعلا نقدر ننساه، لأنه من الواضح صعب ننساه بروحي، إبتسمت وهزيت رأسي لخالد????
خالد بفرحه????: نفهم أنك موافقه تعطيني فرصه !!
فرح: أي، بس
خالد ماخليتهاش تكمل وإحضنتها على طول،❤❤ حسيت من شوقي ممكن نكسرلها ضلوعها وهيا بين إيديا???? مش عارف كيف حبيتها بالشكل هذا????
فرح تحشمت ????لما حضني شكله فهمني غلط، بخوف: بس ياخالد مش هكي قصدي????
خالد طلقتها لما حسيت إنها إضايقت، وإبتسمت???? لما عرفت شن قصدها: أسف سامحيني ماقدرتش إنسيطر على روحي من الفرحه،???? عارف قصدك محتاجه شوية وقت تتاقلمي فيه وتأخدي عليا صح؟؟ وقتي كله ليك وتحت أمرك، أعتبرينا ياستي قاعدين مخطوبين ونتعرفو على بعض من أول وجديد، خليك متأكده أنه مستحيل يصير شي من غير رضاك تمام ياحبي❤❤
“” تبا للحب وأفعاله إذ يجعل من العزيز ذليل..
ومن كان يخشه بالأمس فهو اليوم به عليل “”
فرح ريحني كلامه: تمام
** جميل هو الإهتمام  والأجمل أن تصبح شي ثمين لدي شخص يخاف فقدانك يوماً **
خالد بفرحه????: طار النوم شن رأيك نشوفو فيلم نتفرجو عليه مع بعض
فرح ماكنتش نبي نكسر بخاطره، ونخرب فرحته: باهي????
خالد كنت طول الوقت فرحان???? بالخطوه الإيجابيه اللي صارت إمبارح بيني وبين فرح، قدرت نكسر حجز الصمت والخوف اللي بينا، رجعت من العمل وجايبلها معاي باقة ورد، كنت نسبق في الوقت باش إنشوفها بسرعه ونحضنها????، بصراحه لما حضنتها إمبارح حسيت قداش كنت ميت قبل،  حضنها أحياني????????،
بس تفاجأت بالضيف اللي لقيته عندنا………..
يتبع ……
لقراءة الفصل الثالث : اضغط هنا
لقراءة باقى فصول الرواية : اضغط هنا

اترك رد