رواية تزوجت عاشقة فجعلتني أعشقها الفصل السابع 7 بقلم عائشة البشير

**وكُن على يَقين أن لكَ ربٌ لن يَخذلكَ أبدآ ????** 

طلعت وأني مجبور الخاطر وضحكتي معبيه وجهي☺، كنت حاط جميع الإحتمالات السيئة، ماكنتش متوقع أنه فرح ممكن إدير اللي داراته????

فرح ماكانش قدامي إلا هكي، عارفه روحي ضعيفه، ماقدرتش نواجه عيلة خالد لما ظلموني، كيف راح نقدر نواجه مجتمع بحاله وأني مطلقه???? كان لازم إنضحي، تنازلت على كرامتي وقررت نرجع مع خالد، يمكن هو خير من هلبا غيره

كنت نشوف لخالد كيف فرحان وبيطير من الفرحه عيونه يضحكو بروحهم???? ماكانش متوقع الموضوع راح يفوت بالسهوله هذي، بس لا وحياتك لما نطلعهم هالشهرين من عيونك وتوا تشوف????????

خالد الفرحه اللي حاس بيها، ماحسيتهاش حتي يوم عرسي قبل مانواجه الواقع المر، 

كنت نفكر أنه تضحية فرح هذي على خاطري مستحيل تمشي بالساهل، كنت ندعي ربي يقدرني ومانخيبش ظنها فيا، اللي داراته مستحيل إديره إلا بنت أصل وعيلة، حافظت على سمعة وأسرار عيلتي بالدرجه الأولي، ومخلتش راجلها ينهان من أي حد وحتي لو كانت هذي الإهانه من حقها، فعلا صبري ماراحش على الفاضي، وقتها بس عرفت أنه 

“” مايؤخر الله الجميل إلا ليرزقك بالأجمل ???? “”

^^^^^^^^^^^^^^^^^^^^^^^^^^^^^^^

سعده بغضب: كيف تخليها تروح معاه يلوحها أمتي مايبي، وأمتي مايبي يجي يرجعها، شني يحسابها ملوحه ولا ماعندهاش من يأخذ حقها؟؟

علي بعصبيه: شني تبيني إندير، بنتك اللي غالطه لو كنت نعرف من الأول، والله مانخليها تقعد دقيقه واحده عندى، راهو أني بروحي وصلتها لحوشها

سعده بصدمه: كيف وعلاش ماقالتش هكي من الأول

علي بغضب: وين نندري عليها وأني اللي نقول عاقله ومتهني عليها هكي إدير حشمتني قدام الراجل معاش قدرت نرفع رأسي فوق

سناء كانت تسمع، ليش درتي هكي يافرح ليش: ياعمي مستحيله فرح إدير هكي أكيده في حاجه ثانيه مايبوش يقولو عليها

علي: والله يابنتي بروحي ماأني مصدق، بس هيا قالت هكي بروحها، واعترفت باللي داراته، وباهي الراجل اللي طلع ولد ناس وتفهم أنها صغيره وغلطت

سعده: والله لو واحد ثاني معاذ جاها، وأحني اللي حاطين العيب فيه، ياحشمتنا قدام الناس????

^^^^^^^^^^^^^^^^^^^^^^^^^^^^^^^

زاهيه بصوت عالي: أنت كيف إدير هكي؟؟ ياويلك من ربي على اللي إدير فيه، تفرق بين ولادك !!

عمران بغضب: تعرفي تنقصي صوتك !! على مني هالعياط !! وأنتي قلتيها ولادي ماتدخليش بينا فاهمه !!

زاهيه????: لا ندخل لما إنشوفك تقهر في واحد فيهم، أنت هكي تكره فيهم في بعضهم، اللي بنيته أني في عمر هديته أنت في يوم

عمران????: شن قصدك أني اللي غالط توا؟؟ أنتي ماتشوفيش في تصرفات خالد اللي دلعتيه لين فسد، الولد عمره ماسمعلي كلمة من يومه داير اللي في رأسه ولامقدرني ولا إمدايريلي أي إعتبار، ولا نسيتي موضوع فاتن وكيف حشمنا وخلى سمعتنا في الوطا بطيشه، ولاتسكيرة رأسه على الطرابلسيه اللي جابها وفضلها على بناويت عيلته

زاهيه????: وأنت شورك معاش تنسي، الحمدلله الحق طلع وأني ولدي إمربياته كويس وكنت عارفه انه مايديرش العيب، وبعدين خيرها الطرابلسيه مش بنت ناس وعيله، وأهو شوفت عينك طلعت خير من بنت العيله خرابة البيوت هذي

خيري: شهادة لله يابوي أنها فرح بنت عيله ومتربيه، من أول ماجتنا ماشفنا منها العيبه، وبعدين لو واحده من عيلتنا قصدك بتسكت على اللي درتوه فيها وكيف إتهمتوها وحلفتوها على المصحف، ولابتسكت على مدة أيد بنتك عليها وكيف لزيتوها من الحوش !!

زاهيه: لا بوك هذا كله مش هامه ولا إمدايرله إعتبار، لو واحده مصراتيه راهو أهلها رحلوك من إهنايا، وأنت عين تضحك وعين تبكي، ياسرك طغيان وأعترف بغلطك، المفروض أنت اللي تمشي لفرح وتعتذر منها ومن أهلها وتروح بيها وتريح وليدك

عمران????: أيواه هذا اللي تبيه أنتي أهم شي خلوده عندك والباقي تولع فيهم النار

زاهيه بثقة: أني ولادي زي بعضهم عندي، وعمري مافرقت بينهم وأهو على عينك وأسألهم، اللوم والعتب عليك أنت ياكبير العيله????

خوله????: ياماما كيف تبيه يرجع فرح، نسيتي حلفت بابا ولا كيف

عمران: أمك هذي الله غالب عليها، خلاص كبرت وبدت تخرف وتنسي????

زاهيه????: توا طلعتلك عوجه، وأنتي ياللي ماتتحشمي على وجهك، هكي ربيتك أني كيف تكذبي وتتبلي على مرت خوك؟؟

خوله بخوف????: أني ياماما والله مش مني، منال هيا اللي عبتلي رأسي، وبعدين منال اللي قتلي أنها شافتها تصب في حاجه في غذي خلود ولما جينا شفتها حق شاده الشيشه وتصب منها في طاسة الميه، شني عرفني أني أنها منال اللي مخططه لهذا كله????

خيري????: أنتي ومنال فوله وإنقسمت على إثنين، ماشاءالله عليكم صراحه عندكم تمثيل ماشفناه حتي عند الممثلين، قليلات أدب وتربيه

عمران بغضب????: تعرف تسكر فمك وتحترم نفسك ولا لا، ونوض كلم خليل شوفه شن صار معاه، وكيف حال منال؟؟

طلع خليل، وتنهدت زاهيه باأسف???? على تصرفات راجلها اللي عجزت تلقالها تفسير، معقوله ????يكون هذا كله خوف من أهل منال اللي حتي هما ليهم أسمهم ومكانتهم العاليه في المدينه !! ماهو مافيش تفسير إلا هكي لتهاونه وتسامحه مع منال بعد الشي اللي داراته في بنته????

^^^^^^^^^^^^^^^^^^^^^^^^^^^^^^^

خالد شديت إيد فرح بإبتسامه????: حبي شن رأيك نتعشو برا قبل مانروحو للحوش????

فرح: لا شكرا ماعنديش نيه????

خالد: باهي ياعمري ليش ساكته من لما طلعنا من حوشكم، ولا عبرتيني حتي بنظره، وأني اللي ميت عليك☹

فرح: وشني تبيني نقول مثلا !! نحكيلك على الإهانات اللي سمعتها بسببك، ولا كسرة خاطري، ولا نقولك قداش بكيت بسبب ظلمكم ليا????

خالد بحزن????: ياروحي أنتي، سلامة خاطرك ياعمري، والله عارف وحاس بيك، بس ربي عالم أنه كسرت خاطري أكبر منك بأضعاف، بس اللي صار مقدر ومكتوب لا بإيدي ولا بيدك

فرح إنتبهت للسياره اللي إتبيب على خالد اللي مش مركز في السواقه، جبدت إيدي منه بالقوه، وبغضب????: من غير دوه فاضيه، وأنتبه للطريق أني مانبيش إنموت بسببك، ياسر اللي درته فيا أنت وأهلك

خالد اااخ الصبر ياربي، غلطان من قالك المرأه تنسي وتسامح بسهوله???? تسامح ممكن???? بس أنها تنسي هذي مستحيله????‍♂️، توا بذلني بيها هالعمله ناقصني هم أني، أستغفر الله ياربي، عليت المسجل وسكتت وأني نفكر في الأيام الجايه شني داستلي ثاني..

^^^^^^^^^^^^^^^^^^^^^^^^^^^^^^^

علي تنهد بأسف????: وهذا اللي صار، حطتني في موقف صعب، إنخرست وتحشمت قدام الراجل

صالح بغضب????: تي كيف إدير هكي هذي، وأحني اللي كنا نحسابوها مظلومه، وظلمنا الراجل

عامر بعدم تصديق????: متأكد هيا هكي قالت، تي هيا جت وأيدها مكسره وحالتها حاله تقول حد عافجها طريحه، سألته عليها هذي؟؟

علي????: والله هذي فاتت عليا، قتلك إنصدمت من اللي قالاته، تبلكمت ومعاش عرفت شني نقول ولا كيف نتصرف

صالح بغضب????: أكيد عنده حق يضربها ويكسرها حتي التكسير بعد اللي داراته هالكلبه هذي، اه لو حاضرها بس راهو وريتها الدلع كيف شكله

عامر????: ياسرك حتي أنت، مش لهالدرجة هذي عاد، وأنت ديمه متسبل عليها، هذي أختك في النهاية حتي لو هيا الغالطه توقف في صفها قدام راجلها، باش مايحسش أنها رخيصه وهاينا علينا ويزيد يهينها هو????

علي: خلاص توا اللي صار صار، والحمدلله اللي جت على هكي، ياعامر شوفلي سالم مش عاجبني راهو، والموضوع اللي طالعلي بيه جديد هذا، هالولد بيتعبنا معاه

عامر: يابوي انتم مكبرين الموضوع، البنت هو كان رايدها ويبيها من قبل ليش تزيدو تكسرو بخاطره هكي، وشني فيها لو مطلقه يعني هذا نصيب الله غالب

صالح بغضب????: لا واللهي قالك شني فيها، وليش شن ناقصه هوا باش يأخذ واحده مطلقه، راجل وسيد الرجاله وياخذها سيدة سيدتها

عامر????: باللهي بطل الغجريه والعنصرية اللي عندك هذي، وبعدين في الدين حسب مانعرف مافيش الكلام هذا، ولا انتم دينكم يختلف ياجماعة اللحي????

صالح وقف وبعصبيه????: ياللي ماتتحشم على وجهك، أنت اللي تزيد تكبرله في رأسه تبيه يأخذ واحده مستعمله زيك ياكلب، أني معاش دخلي فيكم إن شاءالله تنفلقو على سطاش، وطلع بسرعه

عامر وجعه كلام صالح???? بس حاول يخلي روحه عادي قدام بوه: عاجبك يابوي كلام صالح هذا، والله لو تسمع كلامه يوذينا كلنا في داهيه راهو، وبعدين هو شن دخله في سالم، أسمعني يابوي أنت شفت اللي صار فينا المره الأولى لما غاب وصار اللي صار، 

المفروض الغلط هذا معاش يتكرر ماتعرفش شني ممكن إيدير المره هذي، تخليه يأخذ اللي يبيها ورايدها هو، ولا تخسره بكل لا سامح الله، أني عارف أنك طول عمرك مؤمن ومتفهم وعمره ماكانت نظرتك للناس هكى، وأنت عارف أنه بنات الناس كلهم زي بعض ولو كانت مطلقه يعني هذا مش غلط ولاعيب ولاحرام مادامه كانت متزوجه بالحلال ومادارتش شي يغضب ربي، وبعدين الدنيا نصيبات والله أعلم ربي شني داسلنا

علي تنهد وحاس أنه كلام عامر صح، بس نظرة الناس هيا اللي تكسر الظهر: والنعم بالله، يصير خير إن شاءالله

^^^^^^^^^^^^^^^^^^^^^^^^^^^^^^^

فرح وصلنا للحوش وخشيت ومانحكيلكمش على حجم الدهشه اللي صابتني من المنظر????

خالد كنت متحشم ومنزل رأسي لوطه، الحوش مقلوب فوقي لوطي، نشوف لفرح اللي قعدت واقفه ومصدومه في المنظر، حي وكان تشوف دار النوم إمالا شني إدير????

فرح بعصبيه: شني هذا ليش هالفوضي، كيف كنت عايش في هالمزبله????

خالد كل شي صار فيسع فيسع، كان نعرف أنه بتروح معاي بالساهل هكي راهو جبت حد نضفه، بخجل: واللهي هذا حال راجل عايش بروحه شهرين، شني متوقعه تلقيه يلمع ومعطر????

فرح: بارد، هذا يبي شهر باش يرجع حوش من جديد????

خالد بإبتسامه: البركه فيك ياروحي، والله الحوش نور بوجودك، ???? توا تشوفي كيف في لمح البصر يولي يلمع لمع، بفضل مجهوداتك الجباره طبعا????

فرح: أي ماهو شغاله عندك أني

خالد: لا ياروحي حاشاك، خلاص توا إنساعدك، ومش لازم كله إضميه الليله، بالشويه بالشويه عليك

فرح بحزن: ياربي الناس تروح تلقي ورد وشموع????، وأني نلقا مزبله???? شني هالحظ اللي عندي????

خالد????: ياروحي أنتي فداك الورد والشموع اللي في الدنيا كلها، قربت وإحضنتها: اااااه ياقلبي اااااه كيف قدرت نعيش من غيرك بس

فرح توترت ولساني بلعته???? تكلمت بصوت واطى: خلاص بعد????

خالد زدت حضنتها بقوة أكثر????: لا عاجبني الجو هكي، الحياة من غيرك ظلام والله، هكي بس ردت فيا الروح????

فرح: أكيد بتكون ظلام وأنت عايش في وسط الكناسه هذي، حول خلاص أمتي بنلحق إنضم هذا كله????

خالد: هههههههه ماهو قتلك توا إنساعدك خلاص عاد، بعدت وشديت وجهها بإيديا: ياعمري أنتي ربي مايحرمني منك???? وبستها ???? طويله???? لين حسيت بيها تفرفش إدور في النفس????

فرح بغضب وهيا تتنفس بصعوبه: يابارد عندي الجيوب الأنفيه مش قادره نتنفس إلا من فمي????

خالد رجعت حضنتها بحنيه: أسف ياعمري والله ماكنت نعرف أسف????، قعدت حاضنها لين حسيت أنها النفس رجع طبيعي عندها، بعدت شويه وحطيت رأسي على رأسها: شن رأيك ياروحي إنباتو الليله في فندق???? وبكرا إنجيبو حد ينظف الحوش مانبيش إنتعبك

فرح وكأني كنت مخدره بس كلامه هذا فيقني بعدت بسرعه، وبخوف: لا أني نبي نتعب شن دخلك أنت، هيا الصالون ليك وريني فلاحتك، وخشيت نجري

خالد ااااخ ياقلبي???? قداش بتهربي يعني، قعمزت على الصالون وفتحت التلفزيون ومنسجم على الأخر، وفزيت بخوف لما سمعت فرح عيطت بأسمي 

فرح بعياط: خااااااااااااااااالد

????عرفت انها شافت الكارثة اللي في دار النوم، وقفت بسرعه وعلى أساس نرتب في الصالون????

فرح بغضب: خاااالد شني هذا اللي في الدار، كيف هكي

خالد بحزن????: ماهو ياروحي ماقدرتش نتحمل غيابك، قعدت عايش بين حوايجك وريحتك

فرح بعياط: صبرني ياربي، تجيبهم كلهم إجدد توا إتشوف، لما نفلس بيك????

خالد تهبل حتي وهيا معصبه???? بهيام????: من عيوني أنتي تأمري أمر ياقلبي❤

^^^^^^^^^^^^^^^^^^^^^^^^^^^^^^^

خليل: هذا اللي صار يابوي، لازم تتربي باش تفكر مليون مره في الجديد قبل لاإدير شي زي هذا

عمران بعصبيه: أنت أكيده هبلت، أني شن قلت الموضوع يقعد إهني ولا لا

خليل: كيف نسكت يابوي كيف نرضي باللي داراته عادي وكأنه ماصار شي، مانقدرش يابوي مانقدرش 

خيري: صح يابوي خليهم يربو بنتهم شويه، اللي داراته مش حاجه ساهله، نسامحوها عليها بالسهوله هذي

عمران بغضب: أنت تسكر فمك فاهم ماتتدخلش في حاجه ماتخصكش، وأنت ياخليل تمشي توا لنساباتك وتعتذر منهم وتروح بمرتك وتهني روحك فاهم

خليل: سامحني يابوي والله مانقدر، شني أني مش راجل ولاكيف، نقول كلمه وفي نص ساعه نرجع عليها، أني اللي عندي قلته، بنتهم تقعد عندهم لين تتربي وتجي للطريق ياأما معاش تلزمني حتي أني بالناقص منها ومن أهلها

زاهيه إبتسمت لخليل وكأنها تشجع فيه على موقفه????????

عمران: لا أنتم أكيد بتهبلوني في هالحوش خلاص معاش عندي كلمه بينكم ولا كيف؟؟

خيري بصوت واطى لخليل: زعما نقوله على خالد توا ؟؟

خليل: تي مش شايفه فاصل، فوته توا مش ناقصنا هم

خيري: تي كيف إنفوته ناسي أنه بوك حالف على أمك !! وجودها معاه حرام توا

خليل وكأنه كان ناسي وإستاقظ: باهي قوله وربي يستر

خيري بخوف: أسمعني يابوي بنقولك على حاجه

عمران بغضب: شن مازال ناقص غير أنت شن داير من مصيبه أنت الثاني؟؟

خيري بهزوه????: لا مش أني، واللهي مادرت حاجه????

عمران: ياربي صبرك عندك صحة وجه حتى تضحك ياحيوان، ياللي ماتتحشم

خيري بخوف: خالد روح بمرته

زاهيه إبتسمت: ربي يهنيه إن شاءالله 

عمران بغضب????: لا أنتي خرفتي رسمي، شكلك ناسيه حلفتي???? 

خليل: لازم تسأل على الكفاره يابوي، حرام هكي

عمران بعياط: لا سائل ولاشي تمشي تخلى ولدها ينفعها

خيري: كيف هكي يابوي !! شن تقول أنت؟؟

زاهيه بكسرة خاطر????: خليه ياخيري خليه، مادامه هان العشره هكي والله معاذ نقعدله فيها، ونضت بسرعه، وناضو خليل وخيري  وخوله وراها

^^^^^^^^^^^^^^^^^^^^^^^^^^^^^^^

خالد قعدت نخدم معا فرح أيد بإيد وكل ماتشوفني مقعمز تعيط، وأني إنوض زيني زي الراجل الطيب???? وطبعا لايخلو الأمر من المناوشات????

فرح بغضب: ياريتني ماروحت، لو كان نحسابه الحوش هكي والله……..وسكتت لما قرب خالد وسكرلي فمي بإيده

خالد بتحذير????: الكلام هذا معاش نسمعه فاهمه، هذا حوشك تحلمي مازال تطلعي منه إلا زيارات بس، تسمعي فيا

فرح قمت عيوني وتلاقو مع عيونه، ماعرفتش شن صارلي سرحت، ماسمعتش أصلا شن قال بكل هزيت رأسي وخلاص????

خالد مانحبش أنها تسكت قدامي نكره نشوفها ضعيفه هكي حتى لو كانت معاي، زفرت بغضب: ليش ديمه تحسسي فيا أني مش هامك، وأنتي أهم من النفس عندي????

 ليش وجودي وعدمه واحد عندك، وأني في غيابك قلبي يتكسر لمليون قطعه????

ليش ديمه تطمسي في فرحتي، وأني كان نلقا نجيبلك سعادة الكون كلها ونحطها في عيونك، ليش يافرح ليش؟؟

فرح سكتت وقعمزت على الصالون معقوله أني أنانيه هكي، تنهدت: لا ياخالد مش هكي، بس أنت الإنسان الصح في الوقت الغلط????

خالد قدمت وقعمزت على الطاوله اللي قدامها وشديت وجهها بإيديا، وبضعف: شني فيه زايد عليا يافرح كيف خلاك تحبيه هكي قوليلي شن دارلك باش مش قادره تشوفي غيره، أحكيلي كيف شكله كيف يتصرف معاك شني كان يقولك، أوصفيلي كل شي فيه مستعد نغير روحي وكل شي فيا باش تحبيني زيه

فرح بدموع: ماحد يقدر يأخذ مكان حد ياخالد لو شني مايدير????

خالد كل مانقول قربت خلاص، تزيد تبعدني أميال، نزلو دموعي وأني قلبي يتوجع من كلامها، مافيش راجل يشوف مرته قاعده تحب واحد غيره بالشكل هذا ويتحمل ويسكت، مش مني قلبي عافس فيا????????

فرح ماتوقعتش اني ممكن نشوف خالد بالضعف هذا قدامي ولا يبكي، مانقدرش نقوللكم قداش حسيت روحي حقيره وقتها، هو شن ذنبه !!

المفروض أني أكثر واحده نفهم حالته هذي لأني أكثر واحده توجعت من الخذلان، يارب قويني على خاطره يارب????، قدمت ومديت إيدي مسحتله دمعته: مافيش داعي تشبه حد ولا تقلد حد، أني مانبيكش تتغير ياخالد نبي نحبك هكي زي ماأنت☺

خالد إبتسمت من بين دموعي، قادره بكلمه تقتلني وبكلمه ترد فيا الروح، قدمت وحضنتها بقوة وكأني نبي ندخلها بين ضلوعي ومعاش تقدر تطلع????❤

فرح حاولت نغير الجو الكئيب اللي خشينا فيه، بضحكه: خلاص بعد يابارد كسرتلي ضلوعي????

خالد ضحكت???? وطلقتها بست على رأسها???? وتكلمت برجاء: يعني فيه أمل أني نسكن إهنايا، وحطيت إيدي على قلبها❤

فرح إبتسمت وهزيت رأسي بالإيجاب: أنت وشطارتك عاد????

خالد إبتسمت: ربي يقدرني ونسعدك ياعمري، والله حياتي من غيرك ماتسوي

فرح: يلا عاد يابارد، عارفاتك تتهرب من الخدمه راهو ياكسول????

خالد☹: والله تعبت هلبا ياروحي خلاص خليه غدوه الباقي، تعالي خليك جنبي????

فرح: باهي نكمل المطبخ بس، وإندير حاجه نأكلوها ماجعتش أنت؟؟

خالد: شني ماجعتش هذي، والله بطني في ظهري???? أسمعي خلاص كملي المطبخ أنتي، وأني نطلع نجيب حاجه من برا على السريع

فرح: باهي باهي ياخالد، تبي تهرب وله؟؟

خالد????: ماعندي وين نهرب قاعد على قلبك العمر كله ياروحي، وبغمزه????: ولا شن رأيك تعشيني حاجه ثانيه???? خلى نقعمز كأن هذا????

فرح بخوف: لا لا خلاص برا زينه، بس ماتعطلش؟

خالد????: ياخوافه، مانعطلش عليك حاضر، عارفك ماتقدريش تقعدي دقيقه من غيري????

فرح????: لا ماتصدقش روحك، غير جعانه بس????

خالد: باهي باهي نتفاهمو عليه بعدين الكلام هذا???? وطلع

فرح تنهدت لما طلع خالد: ياربي قويني ياربي أنت قادر على كل شي، قدرني ننساه مانبيش نظلم خالد أكثر من هكي ياربي ساعدني????

** اللهم أجعلني قويه يالله.. صبوره.. وراضيه على قضائك وقدرك..

 اللهم سهل عليا الأمور التي تقف على عاتقي وأجعل فرجها قريب يالله **

كملت المطبخ وخالد قاعد ماجاش شفت الساعه لقيتها س9، قلت نخش إندوش لبين ماجي، وتفاجأت لما طلعت من الدوش ومالقيتاش، زعما علاش تأخر، خديت التليفون وكيف بنرن عليه سمعت الجرس يرن: هههههه ماشي من غير عقل حتي مفتاحه ناسيه

فرح قربت على الباب: مني؟؟

زاهيه: هذا أني يافرح أفتحي

فرح إنصدمت شن جايبهم في هالوقت، زعما خالد فيه حاجه، لا ياربي فتحت بسرعه ونسيت حتي أني من غير وشاح، بس مجرد ماشفت خيري إستاقضت على روحي وخشيت نجري لبست ملاية الصلاة

زاهيه قربت وإضبطتني: الحمدلله على سلامتك يابنيتي، نورتي حوشك، ونزلت رأسها لوطه: سامحينا يابنيتي ظلمناك 

فرح كنت واقفه ومنسبها نستني فيهم يقولولي شي عن خالد، يعني مش معقوله جايين هالوقت باش يقولولي سامحينا

خوله بخجل: كيف حالك يافرح؟؟ أني أسفه على درته، والله ماكنت نعرف اللي قاعده تخططله الكلبه هذيكا

فرح قاعده نشوفلهم من غير رد، إنتبهت لخيري اللي خاش وساند خلود عليه اللي كانت شبه مخدره، قرب وحطها على الصالون

خيري: كيف حالك يافرح؟ أنستي حوشك

فرح قاعده نستني في حد يتكلم ويقولي خالد صارتله حاجه، هزيت رأسي بالإيماء على سؤال خيري

زاهيه بإستغراب: أمالا وين خالد، سيارته مهناش برا

فرح إبتسمت وكأنه هالوقت بس إستاقضت يعني مافيش شي من اللي في بالي، الحمدلله ياربي، وأخيرا نطقت: تفضلو إرتاحو ليش قاعدين واقفين، وتلفتت لما سمعت الباب إنفتح

خالد بإستغراب: فرح حبي خيري جي إهنايا، شفت سيارته برا، وإنصدم لما شاف أمه وخيري وخلود وخوله مقعمزين في الصالون

خيري ضحك????: خيرك إنخلعت !! شكله حصانا جراي???? عشي وجو، هات هات والله وخيك جعان????

زاهيه بحزن: وكلمه منك كلمه مني، هذا اللي صار، خليه يقعد بروحه توا يندم ويعرف روحه قداش غالط

خالد شفت للبنات ورجعت شفت لأمي: باهي كيف تخلوه بروحه في الحوش مني بيه

زاهيه: خلود وشايف حالتها مانقدرش نخليها، وخوله قالت تخاف تقعد بروحها في الحوش جبتهم معاي وخلاص، خليه يتربي ويشعف على عمايله

خالد تبي تربيه على حسابي وأني شن ذنبي تقعدولي بالمرصاد هكي، اللي ماعنده حظ لا يتعب ولا يشقي????

زاهيه: سامحنا ياوليدي ضايقناك، لكن عارف أنت ماعندنا وين نمشو ومافي حد يعرف بهالموضوع، مانبوش نشهدرو باأرواحنا

خالد: لا ياأمي شني تقولي أنتي، شني إضايقوني الحوش حوشكم وعلى حسابكم، وتلفتت لخيري بنص عين????: شني حتي الأخ بايت إمالا؟

خيري بضحكه: وأنت خيرك كان تلقي تأكلني، لا ماتخافش غير نستني مش فرح قالت بدير شاهي ! عيب نروح من غير مانشربه، مرات تحرج ولا حاجه????

خالد هذا اللي كان ناقصني غير برادة خيري????، نضت وخشيت على فرح في المطبخ، كنت متحشم منها، كيف بنقوللها أستقبلي أهلي عندك بعد اللي داروه فيها، وقفت وقعدت نتفرج عليها كيف تحوس????

فرح إبتسمت: خيرك سيبت أمك وجيت، تبي حاجه

خالد إبتسمت: لا غير إستاحشتك بس????

فرح: بطل براده ياسرك عاد، ومديتله المترد اللي فيه الحلو، وأني شديت سفرة الشاهي: هيا تعالا عيب نخلوهم بروحهم

خالد????: أستني يافرح، خشي غيري حوايجك قبل

فرح قعدت إنشوف لروحي????: خيرهم حوايجي؟ وبعدين أني لابسه الملايه مش باين شي 

خالد تنهدت وأشرت على السروال اللي لابساته: معليشي ياروحي لين يروح خليل بس، وبعدين ألبسي اللي تبيه????

فرح هزيت رأسي????: باهي أرفع الشاهي قبل مايبرد

خيري????: تعرف واللهي تبيها من زمان، عجبني خليل في اللي داره الحق، المفروض شاحط روحه هكي من قبل 

خالد: أنت ماتدخلش ياخيري، رد بالك تخش فيه هالموضوع، خليه يحل مشاكله بروحه، وتلفتت بإبتسامه لفرح اللي طلعت وكانت لابسه قفطان واسع ومش إمبين شي من جسمها

زاهيه: سامحينا يابنيتي طبينا عليكم في هالوقت؟ الله غالب ماعندنا وين نمشو، معليشي تحملينا بنضايقوك إيامات 

خالد تنهدت بحزن???? غير علاش متكلمه ياأمي خليتيني أني مهدتلها الموضوع قبل، عيوني على فرح نستني في ردة فعلها????

فرح بإبتسامه: لا ياعمتي تفضلو في أي وقت الحوش حوشكم، وبعدين شني إضايقوني هذي، مافيش حد يضايق من أهله

خالد كان خاطري إنوض نحضنها على كلامها هذا، وهيا إموليه ورديه نفس القفطان اللي لابساته تسهف بصراحه???? ماتخليش في الواحد عقل

كل موقف قاعد يصير يبينلي أنه فرح أحلى هديه رزقني بيها ربي، وأنها تستاهل نصبر عمري كله وأني نستني فيها تتقبلني❤❤

خيري: توا قداش كفارة حلفت بوي ياخالد

خالد وكأني توا بس إذكرت حجم الورطه اللي حطت على رأسي????، تنهدت بحزن ليش أني مش مكتوبلي نرتاح ونتهني زي الناس: صيام شهرين ياخيري

خيري إبتسم: معناها أنساتك أمك شهرين ياخلوده????