Uncategorized
رواية غلطة أخي الفصل الخامس 5 بقلم عبير سليم
رواية غلطة أخي الفصل الخامس 5 بقلم عبير سليم
 |
| رواية غلطة أخي الفصل الخامس 5 بقلم عبير سليم |
رواية غلطة أخي الفصل الخامس 5 بقلم عبير سليم
لم يتح لنا القدر الفرصه لاختيار آبائنا و أمهاتنا
كلنا نتمنى من هم يهبون لنا الحب و الحنان و من هم يمنحونا العطف و الأمان و من نجد معهم الراحه و السكينه و نشعر معهم بالاطمئنان
و لكن اذا قدر الله لنا من لا يتصف بتلك الصفات فماذا علينا ان نفعل سوى ان ندعو الله ان يعوضنا خيرا عن هذا الابتلاء
يوم جديد يحمل معه السعاده و الفرحه لهؤلاء الذين تعبوا و اجتهدوا فكان التفوق من نصيبهم و هم الآن يخططون لحياتهم القادمه التي يتمنوها و لكن هناك من لم تكن تلك السعاده من نصيبها و سيظل ذاك المسمى بكلمة اب ان يعكر صفو حياتها ويعكس مرآة فرحتها لحزن عميق
تبكي بشده بعد أن سمعت ما قاله لها
فايزة : حرام عليك يا عبد الكريم ليه كده تكسر فرحتها ليه اتقي ربنا فينا شويه بقى بدل ما تاخدها في حضنك و تفرح ان بنتك رفعت راسك وجابت مجموع كبير
تقوم تزعلها و تكسر بخاطرها كده
عبد الكريم : ترفع راس ايه و رجل ايه يا ولية انا بنتي ترفع راسي يوم ما تشتغل شغلانه حلوة و تصرف بيها على البيت
و اللا يوم ما تتجدعن و تستلقطلها عريس حلو كده و يخليني اتباهى بيه وسط الشارع و الحته انما تقوليلي نجاح و شهاده هاءو
أنا لا بتاع نجاح و لا تلزمني الشهادات في حاجه
فايزة : و هي الشغلانه الحلوة دي مش عايزه تعليم حتشتغل ايه من ما يكون معاها شهاده حتشتغل خدامه
عبد الكريم : و ايه يعني لما تشتغل خدامه و لا عيب و لا حرام دول بياخدوا اد كده على قلبهم
فايزة : لا حول ولا قوه الا بالله العلي العظيم
لله الأمر من قبل و من بعد حقولك ايه ما هو اللي زيك مفيش في دماغه غير القرف اللي لحس مخك و بقى كل همك الفلوس اللي تاخدها و تصرف بيها عالمدعوء اللي بتشربه
لكن لحد بنتي و مستقبلها لاء و انا بقى اللي حقفلك يا عبد الكريم و بكون في علمك فريده حتكمل تعليمها و حتدخل الكليه اللي هي عاوزاها و مطرح ما تحط راسك حط رجليك
انا بقالي سنين مستحملاك و مستحمله قرفك عشان خاطر الغلابه دول فمش حسيبك تضيعلي البت
عبد الكريم و هو بيلوي دراعها ورا ضهرها : انتي بتعلى صوتك علية يا وليه و كمان بتقولي مستحمله قرفي طب انا بقى حوريكي القرف اللي بجد
و يمين طلاق ما هي داخله هندسه بتاعتها دي و يوم ما تعتب رجلها فيها حكون كاسر لها رجلها و مطلقك و رميكم في الشارع
فريده : سيب ماما يا بابا حرام عليك خلاص انا مش حدخل هندسه خلاص انا حدخل تجارة وحشتغل و حصرف على نفسي ارتحت كده
عبد الكريم : قصدك حتشتغلي و تصرفي على نفسك و تجهزي اختك و اللا عاوزبن تودوها لبيت جوزها عرة البت فرحها بعد سنتين اعملوا حسابكم تكونوا مجهزينا سامعين جتكم الهم
يسيبهم و يخرج و تاخد فريده فايزة في حضنها : متعيطيش يا ماما متعيطيش يا حبيبتي عشان خاطري دموعك غاليه عندي اوي يا ماما
فايزة : حقكم علية انتي بليتكم بأب زي ده و الله خسارة فيه كلمة اب
حنعمل ايه دلوقتي بس ياربي
فريده : كله مقدر و مكتوب يا ماما و محدش بيهرب من اللي مكتوبله
و متزعليش نفسك يا حبيبتي و متخافيش علية يا ماما
خلاص يا ست الكل و لا يهمك هي شهاده يعني و اللا اكتر مانا كده كده حبقى خريجة جامعه
خلاص مش مشكله ابقى مهندسه المهم اقدر ابقى كويسه
فايزة : بس انتي طول عمرك نفسك تبقي مهندسه يا حبيبتي
فريده : محدش بياخد كل اللي هو عاوزه يا ماما
فايزة : عمرك ما اخدتي حاجه يا ضنايا
فريده : و انا مش عاوزة اخد حاجه يا ماما انا حشتغل جمب دراستي عشان اعرف اصرف على نفسي و اساعدك في جهاز فريال و تعليم فرح
فايزة : طول عمرك راضيه بقليله و بتطلعي اللقمه من بؤك و تحطيها في بؤ اخواتك يا حبيبتي
فريده : اديكي قلتي اهوه اخواتي يا ماما و اخواتي ليهم حق علية
خلاص يا ماما متزعليش نفسك و سيبيها على ربنا و ليها رب يدبرها و محدش يعرف الخير فين و ربنا قال في كتابه الكريم
و عسى ان تكرهوا شيئا و هو خير لكم
و قال و عسى أن تكرهوا شيئا و يجعل الله فيه خيرا كثيرا
فايزة : و نعم بالله و الله يا فريده ما في حاحه مصبراني على الدنيا دي غيرك انتي يا حبيبتي و الا كان زماني ولعت في نفسي من زمان و ارتحت
فريده : و تموتي كافره يا ماما ده احنا بنتشبعط في رضا ربنا
فايزة : اعمل ايه ما هو من غلبي
فريده : طب و احنا نهون عليكي تسيبينا ده احنا بنتستند على بعض يا ماما ده انا لما بفتح عبنيه على صوتك و وشك بحمد ربنا انك معانا و في حياتنا
فايزة : انا اللي بحمد ربنا كل يوم عليكي يا حبيبتي ربنا يكرمك و يديكي و يعوضك خير يا فريده يا بت قلبي يا رب
و يوقفلك ولاد الحلال في طريقك و يكفيكي شر المستخبي يا قادر يا كريم يا رب
فريده : الله على الدعوات الحلوة ربنا ميحرمني منها يارب
فايزة : و لا يحرمني منك يا قلب امك
????????????????????????????????
في المساء في منزل عبد الله
حيث يستقبل المهنئين لنجاح أحمد
وحشني و الله يا عبد الحميد
عبد الحميد : انت اكتر يا عبد الله الف مبروك يا بطل عقبال الشهادة الكبيرة ان شاء الله
أحمد: الله يبارك فيك يا عمي
كوثر : معلش و الله يا جيهان معرفتش اجي لسمر و اباركلها على نجاحها في الاعداديه كنت مشغوله بأحمد
جيهان : لا و لا يهمك يا كوثر ما عمها جه و عمل الواجب و بعدين ما نتي اتصلتي بالتليفون و باركتي و بعدين دي اعدادية يعني انا المهم عندي الثانويه العامه ان شاء الله
كوثر : لا اطمني سمر ما شاء الله عليها شاطرة و متفوقه و ان شاء الله حتبقى دكتورة و اللا مهندسه
جيهان : هي عاوزة تبقى زي أحمد
كوثر : ربنا يديها اللي هي عاوزاه بس مقلتليش بقى يا سمورة طلعتي الكام على المدرسه
سمر : طلعت التانيه و على فكرة المفروض كنت اطلع الاولى فرقت معايا على درجه واحده
كوثر : التانيه بردو حلو و زي الفل اتجدعني انتي بس عشان الصعب جاي ده احنا شفنا تعب في الثانويه العامه مش شويه خالص
سمر : لا انا واثقه من نفسي كويس يا طنط و عارفه اني حجيب درجات عاليه
كوثر : طب قولي ان شاء الله الأول
عبد الحميد : شايف ولادنا متفوقين ازاي يا عبد الله بصراحه ابنك و بنتي دول هما الفورة اللي في العيله ربنا بجعلهم من نصيب بعض
عبد الله و هو يفهم مغزى كلام أخيه : ربنا يجعل نصيبهم في الطيب يا عبد الحميد يا اخويا
عبد الحميد : و انت بقى عاوز تتخصص ايه يا ابو حميد و اللا لسه مقررتش كده كده لسه بدري على الكلام ده
أحمد : لا انا مقرر من زمان ميكانيكا ان شاء الله
عبد الله : كان نفسي و الله يتخصص حاجه تانيه بس هو مصمم عشان يساعدني في الورشه
سمر : بس انت كده حتبقى ميكانيكي يا احمد و هدومك تبقى متبهدله على طول
أحمد : انا حكون مهندس ميكانيكا يا سمر و بعدين لما هدومي تتبهدل من عمل ايدي و مساعدتي لوالدي ده يبقى شرف ليا و تاج على راسي
جيهان : بس الميكانيكا دي بهدله يا حبيبي و تعب جامد عليك
احمد : مفيش تعب و لا حاجه والنبي صلي الله عليه وسلم قال من بات كالا من عمل يده بات مغفورا له
صدق رسول الله صلى الله عليه وسلم
عبد الحميد : عليه افضل الصلاة و السلام ربنا يبارك فيك يا احمد يا ابن اخويا يا رب
يقطع حديثهم طرق الباب فتجري امنيه تفتحه فتقول بفرحه : مها جت و تقى جت
طبعا أحمد أول ما يسمع اسم تقى الفرحه تنط في قلبه على طول و ضحكته الجميله تترسم على وشه
يدخلوا كلهم حمدي و شريفه و مصطفى و مها و تقى كلهم جايين عشان يباركوا لاحمد
طبعا يسلموا على كل الموجودين
و يباركوا لأحمد
تقى : ازيك يا سمر
سمر: اهلا يا تقى ازيك
شريفه : عاش من شافك يا جيهان يعني كان لازم نتقابل صدفه
جيهان : معلش بقى يا شريفه ما انتي عارفه مشاغل البيت مبتخلصش
و الحمد لله اننا بتقابل في الفرح
تقى : مبروك يا ابيه احمد انا فرحانه اوي انك نجحت و حتبقى مهندس
احمد : الله يبارك فيكي يا مشمش عقبالك يا حبيبتي لما تبقي مهندسه او دكتورة قمر
شريفه : يسمع منك يا أحمد يا رب
كوثر : تقى دي ست البنات و بكرة تبقى احسن بنت في الدنيا كلها
سمر : تقى تبقى مهندسه و دكتورة كمان طب ازاي يا احمد انا اعرف انها ضعيفه اوي في الدراسه
شريفه : مين اللي قالك كده يا حبيبتي مين قالك ان تقى ضعيفه
سمر : سلمى اختي مش هيا مع تقى في نفس الفصل و بتاخد معاها الدرس و هي قالتلي ان تقى ضعيفه و الميس بتضربها كتير و بتطردها من الحصه
تقى و الدموع بتجري في عينيها : انا مش ضعيفه انا مكنتش بفهم منها و بعد كده بقيت شاطرة و بجاوب معاها كويس
أحمد : ايه يا سمر الكلام اللي بتقوليه ده مشمش شاطرة و انا مبحبش حد يكلم مشمش بالطريقه دي
متزعليش يا مشمش حقك علية انا :
أمنيه خدي مشمش تغسل وشها و ادخلوا انتوا و مها و العبوا جوة
جيهان : ايه يا جماعه في ايه بس احنا حنزعل و اللا ايه سمر متقصدش و الله حقكم علية انا
شريفه : لا يا حبيبتي و احنا بردو حنعمل عقلنا بعقل الصغار و كلهم ولادنا
عبد الحميد : ازيك يا حمدي عامل ايه
حمدي : الحمد لله و الله بخير
جيهان بهمس لكوثر : في ايه يا كوثر هو أحمد زعل أوي كده ليه
كوثر : مشمش غاليه اوي عند احمد ببحبها زي امنيه بالظبط و هو مبيحبش حد يزعلها
جيهان : اه قلتيلي بقى
سمر : أحمد هو انا لو مفهمتش حاجه ممكن أبقى اجي تشرحهالي
أحمد : مش انتي لسه قايله يا سمر انك شاطرة و متأكده من نفسك و على العموم يا ستي و لا يهمك طبعا احنا ولاد عم و لو احتاجتي أي حاجه انا تحت أمرك
سمر : شكرآ يا أحمد
????????????????????????????
بعد مرور عدة أيام
شريفه : حسبي الله و نعم الوكيل فيه البعيد
حمدي : كفاياكي بقى الراجل حيولع من كتر حسبنتك عليه
شريفه : مبيجرالوش حاجه ده محصن
حمدي : عينيه ليكي و لفريده يا ام فريده حاضر و الله و انا ان شاء الله حكلم ناس من العملاء بتوع البنك عندنا من اللي عندهم مكاتب و ان شاء الله حشوفلها شغلانه كويسه
فايزة : بس زي ما قلتلك يا ابو مصطفى
حمدي : فهمت والله ان شاء الله مش حتتعارض مع جامعتها و ان شاء الله حتذاكر و تنجح و ربنا حيعوضها كل خير
فايزة : يا رب يا اخويا يا رب تفتكروا ربنا حيعوضنا عن اللي بنشوفه مع عبد الكريم
حمدي : الأيام كفيله انها تعوضنا عن كل حاجه و السنين بتجري و دوام الحال من المحال و قادر ربنا يبدل الأحوال وان شاء الله ربنا حيكرمها و يعوضها خير
فريده طول عمرها طيبه و خدومه و الشارع كله بيحلف بأخلاقها و اكيد ربنا مش، جيضيعها
فايزة : يا رب يا ابو مصطفى يا رب يا ما نفسي السنين تجري بقى و اشوف فريده و اخواتها اسعد ناس في الدنيا
شريفه : حتجري يا فايزة و حتاخد معاها الحلو و الوحش زي موج البحر لما بييجي ويسحب معاه كل حاجه و راجع تاني
فعلآ مفيش أسرع من جري الأيام والسنين
و تمر أعوام و تليها أعوام و ليس هناك اسرع من مضي الأيام
يااه خمس سنين مروا بسرعه أوي كده
بس يا ترى مروا ازاي ايه ده
ده أحمد خلاص بقى في البكالوريوس و أيمن و مصطفى دخلوا كلية التجارة أما مشمش تقى هانم بقت في الاعداديه السنه دي و القطاقيط الصغيرين أمنيه و مها بقوا فاولى اعدادي
طب هما وحشوني اوي السنين دي كلها انا سبتهم و معرفش عنهم حاجه خلال الفتره دي كلها
يا ترى حصل معاهم إيه و إيه أخبارهم هو انا لسه حتكلم
يا للا بينا نروحلهم و نشوف اخبارهم ايه
احنا اهوه على اول الشارع اللي أبطالنا الحلوين ساكنين فيه
ايه ده انا سامعه صوت القرآن الكريم في المكان الصوت عالي اوي و في كراسي كتير و صوان و مقرئ لا بقى ده كده أكيد في حاجه حصلت
يا ربي هو ايه اللي حصل معقوله حد يكون جراله حاجه مات يعني و انا مش عارفه بعد اذنكم يا جماعه انا حروح اقرب منهم و افهم ايه اللي بيحصل و اعرف مين اللي مات
الله ده أحمد موجود في العزا يا لهوي ده هو اللي بياخد العزا بنفسه
انا سامعه حد بيكلمه يا ترى مين اللي مات عندك يا احمد استر يا رب
شد حيلك يا أحمد
أحمد : ابويا مات يا عمي ابويا مات و سابنا
حمدي : كلنا معاكم يا احمد و انا معاكم يا حبيبي مش انا عمك حمدي يا حبيبي
كان عاجبك حاله و هو تعبان كده هو تعب كتير و الحمد لله ان ربنا رحمه ادعيله يا أحمد هو دلوقتي مش محتاج غير دعواتكم
أحمد : ربنا يرحمك يا بابا يا رب انا متشكر اوي على وقفتك معانا يا عمي
حمدي : يا خبر ابيض انت بتشكرني على ايه يا احمد ده ابوك الله يرحمه كان اخويا و صاحبي و حبيبي و عشرة عمري انا قلبي قايد نار عليه و ربنا العالم بس بايدنا ايه نعمله
مفيش في ايدنا حاجه غير نقول
انا لله و انا إليه راجعون
و بعدين أنا عاوزك تشد حيلك و تقوى كده عشان امك و اخواتك يا حبيبي انت دلوقتى مكان ابوك يا احمد و لازم تاخدهم في حضنك و توصلهم لبر الأمان
أحمد : دول حياتي و روحي يا عمي حمدي
حمدي : عارف يا بني و متاكد انت طول عمرك راجل و اد المسئوليه يا حبيبي ربنا يحميك لشبابك يا رب
احمد : طب روح استريح يا عمي ده حضرتك صاحي معانا من امبارح بالليل منمتش روح و ارتاح شويه عشان خاطري
حمدي : لاء يا احمد انا مش تعبان و انا مش حمشي غير لما العزا يخلص
أيمن كمان كانت حالته صعبه جدا مبطلش عياط على ابوه طول العزا و مصطفى مسابهوش لحظه و لا عبد العزيز ساب احمد كانوا واقفين معاهم وقفة رجاله
الشارع كله ستات و رجاله و شباب واقفين معاهم بيشاركوهم حزنهم على وفاة ابوهم كلهم بياخدوا العزا تحسهم كلهم اهل المتوفي
????تبكي بهيستيرية و كيف لها الا تبكي على رفيق عمرها و زوجها و رب بيتها
و النساء حولها يؤدين واجب العزاء : يا حبيبي يا عبد الله رحت و سيبتني لمين يا حبيبي
يا وحدتي من بعدك يا عبد الله راحت عشرتك الحلوة يا حبيبي
يا خراب بيتك يا كوثر يا خراب بيتك يا كوثر
شريفه : صللي على النبي يا كوثر حرام عليكي اللي بتعملي ده انتي كده بتاذيه
انتي مؤمنه و موحده بالله يا حبيبتي و اللي بتعمليه ده حرام ميرضيش ربنا انتي حتكفري و اللا ايه
كوثر : غصب عني يا اختي غصب عني و الله مش بايدي مش قادره اصدق ان عبد الله خلاص راح مبقاش موجود معانا
خلاص مشي وسابنا و مش حنشوفه تاني
ملحقش يفرح بحد من ولا ده يا اختي لا لحق يفرح بنجاح احمد و لا ايمن و لا شاف أمنيه و هي عروسه
شريفه : نصيبه يا كوثر و عمره انتهى لحد كده يا حبيبتي و بعدين يعني كان عجبك اللي كان فيه يا كوثر ده ربنا رحمه يا حبيبتي
ده الله يرحمه من يوم ما احمد دخل الكليه و هو جاله الفشل الكلوي و جري على المسشفيات و غسيل كلى
كل شويه و هو كانت حالته تصعب على الكافر ده هو نفسه كان بيدعي ربنا انه يسترد وديعته و يرتاح
كوثر : عارفه عارفه انه كان تعبان يا حبة عيني عارفه انه تعب كتير و استحمل كتير ربنا يجعله في ميزان حسناته يا رب بس كان معانا في وسطينا حسه معانا انا كنت عاوزاه يفضل موجود حتى لو كان شوية عضم في قفه ليه يا رب كنت سبتهولنا يا رب
شريفه : حنعترض على حكمة ربنا يا كوثر ربنا مينفعش نقوله ليه يا حبيبتي قولي اللهم اجرني في مصيبتي و اخلفني خيرا منها
كوثر : اللهم لا اعتراض يا رب اغفر له و سامحه يا رب
اللهم اجرني في مصيبتي و اخلفني خيرا منها يا رب
فايزة : أيوة كده اذكري الله و استغفري ربنا عبد الله كان راجل طيب و يتحزن عليه بس ما يعزش على اللي خالقه
كوثر : الصبر من عندك يا رب
كانت تقى و مها و فرح قاعدين مع أمنيه اللي مش مبطله عياط
كلهم أطفال مش فاهمين حاجه بيحاولوا يواسوا بعض بأي كلمه و خلاص
تقى : كفايه عياط بقى يا أمنيه عينيكي حتوجعك يا حبيبتي
أمنيه : بابا مات يا تقى مش حشوفه تاني خلاص
مها : طب تعالي باتي معانا النهارده
أمنيه : لاء يا مها انا عاوزة انام في حضن ماما حبيبتي
تدخل عليهم سمر : موني يا حبيبتي تعالي يا للا عشان تاكلي انتي ماكلتيش حاجه من الصبح
أمنيه : مش عاوزة يا سمر
سمر : مفيش حاجه اسمها مش عاوزة انتي كده حتتعبي حتاكلي يعني حتاكلي
أمنيه : قلتلك مش عاوزة
تقى : خلاص يا سمر سيبيها براحتها متغصبيش عليها
سمر بانفعال: و انتي مالك انتي انا بكلم بنت عمي انتي ايه دخلك بيننا
مها : سمر من فضلك اتكلمي مع اختي كويس هي معملتلكيش حاجه
سمر : و هي مين دي عشان تقدر تعمللي حاجه و بعدين لما تتكلموا معايا متقولوش سمر اسمي دكتورة سمر و اللا انتوا ناسيين اني في كلية الطب
تدخل شريفه على الصوت : في ايه يا بنات صوتكم عالي كده ليه
سمر : مفيش يا طنط انا عاوزة امنيه تاكل و تقى بتقوللي سيبيها براحتها
شريفه : لا يا حبيبتي مينفعش اسمعي كلام سمر و قومي كلي
تقى : قوليلها دكتورة يا ماما أصلها بتزعل من اللي بيقولها سمر كده
شريفه : و ماله دكتورة دكتورة دي حاجه تفرحنا كلنا المهم يا للا يا مونه عشان تاكلي
تخرج سمر من الأوضة
تقى : يا باي عليكي بت سم فاكرة نفسها يا ما هنا يا ما هناك و كل ده عشان حتبقى دكتورة و الله ده العيانين حيطفشوا منها
فرح : متزعليش يا تقى هي كده علطول رافعه مناخيرها في السما و بتعامل الناس بتكبر
تقى : لاء هي طول عمرها بتكرهني زي ما اكون قاتلالها قتيل
تروح على المطبخ و تدخل عليها امها
في ايه يا سمر صوتك كان عالي جوة ليه انا مرضتش ادخل لما لقيت شريفه دخلت
سمر : بكلم امنيه تقوم الزفته اللي اسمها تقى دي تحشر نفسها في الكلام و انا البت دي بكرهها مبحبهاش
جيهان : ليه عملتلك ايه بس
سمر : كده بكرهها من يوم ما احمد زعقلي بسببها و انا بكرهها
جيهان : يااه انتي لسه فاكرة ده الكلام ده من خمس سنين
ده انتي قلبك اسود اوي حتعملي عقلك بعقل عيله
سمر : لاء يا ماما هو احمد طول عمره بيعاملها معامله خاصه و كل ما تكون موجوده قال ايه مشمش مشمش
جيهان : يخيبك انتي بتغيري و اللا ابه يا بت طب يا للا بينا يا للا خلينا نروح
سمر احسن بردو عشان انا انخنقت من الجو ده
ينتهي العزاء و كل شخص يذهب الى بيته و يظل أهل المتوفي
شريفه : كوثر انا حبات معاكي النهارده يا حبيبتي
كوثر : لا و ربنا ماحد حيبات معانا انا حنام انا و ولادي
شريفه : مينفعش يا كوثر عشان خاطري
كوثر : عشان خاطري انا انا محتاجه اكون انا و ولادي لوحدينا
شريفه : خلاص يا حبيبتى اللي يريحك وانا ان شاء الله من الصبح بدري حكون عندك
كوثر : متتعبيش نفسك يا شريفه انتي تعبتي معايا اوي ربنا يكرمك يارب و يخليلك صاحب بيتك
شريفه : اخس عليكي يا كوثر ده احنا اخوات يا هبله
ناخد شريفه البنات و ينزلوا و هما كانوا اخر ناس نازلين من عندهم فتقابل احمد وأيمن
و هما طالعين على السلم : شدوا حيلكم يا ولاد و خالوا بالكم من امكم دي تعبانه أوي
تقى :البقيه في حياتك يا ابيه احمد البقيه في حياتك يا ايمن
أحمد و أيمن : حياتك الباقيه يا مشمش ربنا يخليلك بابا و ماما يارب
يطلع أحمد هو و أيمن يدخلوا الشقه و يلاقوا امهم ماسكه صورة ابوهم و عماله تعيط
و اول ما تشوف ولادها داخلين عليها تفتحلهم دراعاتها يترموا فيها هما الاتنين و يبكوا هما التلاته بصوت عالي اوي بكاء طالع من القلب قهرة وحسرة على اب مشافوش منه غير كل خير و حنيه و حب و حنان و اهتمام و احتواء
اب و نعم الكلمه
ابوكم مات يا ولاد ابوكم سابنا خلاص و مشى يا حبايبي الف رحمه و نور عليك يا عبد الله
سيبتنا لمين يا حبيبي رحت و سيبتنا لمين يا غالي
احمد : عشان خاطري يا ماما كفايه يا حبيبتي احنا ولادك و سندك في الدنيا يا امي
كوثر : ربنا يخليكم لية يا رب و يجعلكم سند لية و لاختكم يا حبايبي يا رب
تعبناك معانا يا حبيبي اربع سنين و انت شايل الحمل كله فوق راسك يا حبيبي من كليه لورشة ابوك لجريك معانا في المستشفيات
أحمد : يا ريتني كان بايدي اقدمله عمري كله بس كان يفضل معانا يا امي
كوثر : خلاص هو عمره كده ربنا يطول في عمركم يا رب و يعوض صبري بيكم خير يا ولادي يا رب
بعد شويه ياخد احمد اخوه الاوضه بتاعتهم و يرتمي ايمن في حضنه و يبكي بمرارة
احمد : ايمن عاوزك تجمد كده يا حبيبي
أيمن : البيت وحش أوي من غيره يا أحمد يعني خلاص اتحرمنا من فطاره معانا يوم الجمعه و انحرمنا من نزولنا معاه فى صلاة الجمعه و صلاة العيد و التراويح و اتحرمنا من لمتنا حواليه في شهر رمضان
احمد : احنا اتحرمنا منه صحيح لكن هو في مكان احسن بكتير الله يرحمه بابا تعب و اتعذب كتير يا أيمن و بعدين احنا لازم ندعيله كتير و نطلعله صدقات كتير وقتها حنفرحه اوي في قبره وحيبقى مبسوط مننا و نبقى ردينا جزء بسيط من حقه علينا
أيمن : أنا بحبك أوي يا أحمد خليك جمبي متسيبنيش
أحمد : و انا روحي فيكم يا حبيبي ربنا يخلينا كلنا لبعض يا رب و بعدين احنا لازم نجمد كده عشان ماما و امنيه ماشي يا أيمن
أيمن : حاضر يا حبيبي
كلام كتير يتكلموه الاخين مع بعض
بعد شويه تدخل كوثر عليهم و تلاقيهم حاضنين بعض و نايمين
تقفل عليهم الباب و تدخل عند امنيه
تلاقيها نايمه تغطيها و تخرج
تدخل اوضتها و تمسح بايدها على المكان اللي كان بينام فيه و هي بتبكي
تفتح الدرج و تطلع صورة هناء : هناء، يا حبيبتي عبد الله راحلك يا هناء سبقني و راحلك يا حبيبتي عقبالي انا كمان لما احصلكم يا اغلى الناس
تمسك صورها معاه
عبد الله جوزي و حبيبي و اخوبا و ابويا و كل دنيتي حتوحشني اوي يا عبد الله فرافك حيبقى صعب علية اوي يا حبيبي ربنا يقويني عشان اكمل مشوارنا يا رب لحد ما احصلك يا حبيبي
كده كده يا قلبي يا حتة مني
يا كل حاجة حلوة فيّ
كده
كده هتمشي و تسبني وحدي
في الحياة و الدنيا ديّ
كده
يعني إيه
يعني خلاص أنا مش هشوفك ثاني
مش هلمسك
مش هحكي ليك عن حاجة تاعباني
يعني إيه
يعني خلاص أنا مش هشوفك ثاني
مش هلمسك
مش هحكي ليك عن حاجة تاعباني
كنت روحي لما كان جوايا روح
عمري ما إتخيلت إنك يوم تروح
كنت روحي لما كان جوايا روح
عمري ما إتخيلت إنك يوم تروح
مش فاضل لي مني غير حبة جروح
مع السلامة يا حبيبي و في أمان
عمري ما هقول يوم عليك ماضي و كان
عمري ما أنسى مهما طال بيّ الزمان
آه
يا له من ليل طويل كيف له ان يمر عليها مر الكرام
و لكن لا بد من فجر بعد كل ليل يزيل ظلامه و يبدد وحشته و يحيله الى نهار مشرق تتجد تتجدد فيه الآمال
????????????????????????????
تمر الأيام و تبدا الحياة تسير في طريقها
ربنا يكرمك يا رب يا ابو مصطفى و يعللي مراتبك كمان و كمان يا قادر يا كريم يا رب
حمدي : ربنا يخليكي يا ام فريده بس انا معملتش حاجه لكل ده
فايزة : كل ده و معملتش ده انا مش عارفه من غير وقفتكم معانا كنا حنعمل ايه ربنا يجازبكم عنا كل خير يا رب
حمدي : العفو متقوليش كده يا ام فريده و بعدين فريده ما شاء الله عليها اجتهدت و فعلا تستاهل كل خير و برغم انها كانت بتشتغل و بتروح الكليه و بتجهز اختها الا انها نجحت
فايزة : كله بفضل ربنا و بنفسك معانا يا ابو مصطفى لولا الشغل اللي جبتهولها لا كنا رحنا و لا جينا
حمدي : تمام و دلوقتى بقى عاوزها تجهزلي كل اوراقها عشان أن شاء الله حقدملها في الفرع الجديد للبنك
فايزة : بجد بجد يا استاذ حمدي يعني فريده حتشتغل في البنك
حمدي : قولي يا رب بس
فايزة : يا رب يا رب
شريفه : طمنيني على اخبار فريال
فايزة : اخبارها منيله على دماغها بعد ما هرتنا طلبات في الخطوبه و عاوزة و عاوزة و عاوزة و مرحمتناش لا انا و لا اختها الغلبانه
و جيبنالها كل اللي احتاجته و زياده اهيه كل يوم و التاني جوزها ضاربها و مغضبها و تجيب ابنها و تيجي تقعد بالشهر و في الاخر تروح زي الجذمه
شريفه : ما هو لو كان عارف ان ليها راجل حيجيب لها حقها مكنش عمل كده
فايزة : و احنا نعمل ايه بس مش ابوها اللي منه لله اخد حتتين الدهب اللي كنت شايلاهم للزمن و راح اتجوز
حمدي : مبيسالش عنكم خالص يا ام فريده
فايزة : و ربنا ما نعرفوا عنه حاجه بس وصلتني اخبار انه خلف الولد اللي كان حيموت عليه
حمدي : منه لله ده ربنا حيحاسبه حساب عسير بقى حد يبقى عنده تلت بنات و ميسالش عنهم
فايزة : تصدق و تأمن بالله
حمدي : لا إله إلا الله
فايزة : احنا مرتاحين منه بس اللي صعبان علية ان البنات يتيتموا و ابوهم عايش على وش الدنيا
حمدي : ان شاء الله ربنا حيعوضهم خير
شريفه : يا للا بينا احنا بقى يا فايزة عشان نلحق نقعد مع كوثر شويه و نعدوا على تقى و فرح ناخدوهم من الدرس
فايزة : يا للا بينا يا اختي
????????????????????????????????
بعد خروجهم يتصل حمدي على اخوه حامد
ازيك يا حامد وحشني اوي يا اخويا
حامد : و الله لو كنت اتوحشتني زي ما بتجول كنت تاجي تزورني
حمدي : معلش يا خويا حقك علية مشاغل و الله
حامد : الله يكون في العون طمني عليك و على عيالك عاملين ايه
حمدي : الحمد لله و الله بخير زي الفل
حامد : خلصوا علامهم و اللا لسه
حمدي : هههههه خلصوا ايه بس يا حامد ده مصطفى يا دوب لسه داخل كلية التجارة و تقى في سنه تالته اعدادي السنه دي
و مها في اولى اعدادي
حامد : تمام حوي يعني تقى حتمتحن اعداديه السنه دي
حمدي : ايوة ان شاء الله يا اخويا خير في حاجه
حامد : كل خير ان شاء الله على العموم خلاص هانت و الامتخانات جربت و اني حيبجى لية زيارة عنديكم عشاان حيكونلي كلام تاني معاك
حمدي : تشرف و تنور يا اخويا
يغلق معه الهاتف ليجد زوجته تحدثه : خير يا حامد
حامد : نويت والنيه على الله اروح اخطب تقى بنت حمدي لعبد الوهاب
امينه : ايوة بس يعني
حامد : هو ايه اللي بس و يعني ما تتكلمي دغري و جيبي من الاخر في ايه
امينه : اصلها تربية مصر حتعرف تعيش معانا اهنيه في الصعيد و تتعود على عاداتنا و تجاليدنا
حامد : ايوة طبعا و غصب عنها تتعود
امينه : طب و انت ايش دراك يا واد عمي ان اخوك حيوافج مش يمكن يجولك البت لساتها صعيرة و اللا يجولك لاء معتعيش في الصعيد
حامد : طب خليه يجولها و اني اجطع علاجتى بيه ليه ده اني اخوه الكبير و كلمتي لزمن تمشي عالكبير و الصغير
حامد لما يجول على حاجه توحصل يبجى لازمن توحصل