Uncategorized

رواية تزوجت عاشقة فجعلتني أعشقها الفصل العاشر 10 بقلم عائشة البشير

 رواية تزوجت عاشقة فجعلتني أعشقها الفصل العاشر 10 بقلم عائشة البشير
رواية تزوجت عاشقة فجعلتني أعشقها الفصل العاشر 10 بقلم عائشة البشير

رواية تزوجت عاشقة فجعلتني أعشقها الفصل العاشر 10 بقلم عائشة البشير

** أحببتك عهدا والعهد دين لايموت **
خالد حضنت وليد: كل سنة وأنت بألف خير، والله ليك وحشه يارفيقي
وليد قعدت نستنشق في الريحه، هالريحه نعرفها كويس عالقه في خشمي ومستحيل ننساها، معقوله حتي بعد هالوقت ريحتها مانسيتها 
خالد إستغربت في وليد اللي قعد حاضني بقوته كلها، بضحكه????: معقوله هذا كله مستاحشني؟
وليد بعدت شويه وتنهدت بحزن وتسللت دمعة حسره من عيوني
خالد بصدمه: لا ياوليد تبكي !! خيرك يارفيقي؟؟
وليد مستحيل نقول لخالد نبكي لأني شميت ريحة فرحتي فيك، تنهدت بحزن: إستاحشت ريحة بلادي، الغربة صعبه يارفيقي
خالد بحزن: واللهي ياوليد أنت اللي زايد مصعبها على روحك ومكبر الموضوع أكثر من اللازم، وبعدين الناس بدت تنسي اللي صار معاكم، ياسرك تعب وتشحوير وأقعد في بلادك وريح روحك،
وليد تلفتت لندى وأشرتلها إتجي، بتوتر: بعدين نحكو في هالموضوع، إن شاءالله خير 
فرح كنت مضايقه ومش عارفه شني اللي قاعد يصير معاي، معاش عرفت روحي شني اللي قاعده نحس فيه، ميولي لخالد الفتره الأخيرة مشوش تفكيري حاسه روحي مشاعري متلخبطه ومش فاهمه شي، اللي نحس فيه مش شي طبيعي، وخصوصا حركة العطر اللي درتها اليوم أني ماكنتش هكي، معقوله???? !!؟؟
** مهما كانت تجربتك سيئة مع الحب، وعتراثك الكثيرة فيه، وألمك منه، وجرحك الكبير الذي خلفه من خذلك، ومهما كان غضبك منه، ولعنتك المستمره لحظك السيء معه
هناك جزء من قلبك الفاضي يتمني وبشدة أن تملؤه مجددا بهذا الداء الممتع مع شخص مختلف **
“كاذب من قال أنه أغلق باب قلبه ولو أقسم لك ” 
خالد لما رن تليفوني إبتسمت ودرست السيارة على اليمين: نستأذنكم شويه 
وليد بإبتسامه:خود راحتك ولايهمك، يامتاع المغربي أنت ????
خالد بحب????: أهلا ياروحي
فرح بإبتسامه ????: أهلين ياخالد، وين أنت؟؟
خالد: في الطريق ياقلبي
فرح: وصل صاحبك؟ 
خالد: أي وصل وهو معاي في السيارة 
فرح، بتوتر: وأخته ؟
خالد بإبتسامه: أي حتي هيا معانا 
فرح بإنزعاج: باهي كويس،رد بالك عليها
خالد بفرحه☺: روحي !
فرح قعدت ساكته???? 
خالد بإبتسامه????: روحي ! 
فرح زدت إضايقت أكثر عجزت نفسر الإحساس اللي داخلي
خالد بإستغراب: روحي تسمعي فيا؟؟
فرح بحزن: نعم !!
خالد قلت خلي نستفزها شويه، بالك تتكلم وتريحني، بغضب مصطنع????: شني اللي قاعد يصير معاك هذا !! نعرفك عاقله قبل شني حركات الصغار هاذم ؟؟
فرح بغضب: طلعتلك عيله توا !! أصلا أني الغالطه اللي نغار عليك، بس أنت….. وإنخرست لما إستوعبت اللي قلته????
خالد أيواه????وبإبتسامة: صار تغاري ياحبي،علاش ماتقوليش هكي من الأول????
فرح بإرتباك: لا مش هكي بكل ،بس طلعت من غير قصد الكلمه
خالد: مغروره !! عندك علم أنه الكلام اللي يطلع من غير قصد هو اللي طالع من القلب????
فرح اااف شني اللي قاعد يصير معاي ياربي، بتوتر: لا تحليلك غلط، مانبيش نعطلك خلاص، توصل طمني، سلام
خالد: هههههههه هربت المغروره 
وليد الموقف اللي داره خالد ونزوله من السيارة على خاطر مكالمه، ذكرني باللي كنت إندير فيه لما تجيني مكالمه من فرح ماكنتش نبي نكلمها قدام أي  حد، ماكنتش نبي حد يسمع صوتها، ماكنتش نقدر نكلمها من غير مانتغزل فيها ونخاف حد يسمع غزلي ليها ويحسدني عليها، كنت وقاعد نحبها أكثر من أي شي في هالدنيا، آآآآآآه ياربي ليش هكي صار !!
خالد ركبت السياره وكانت إبتسامتي وفرحتي معبيه وجهي: معليشي سامحوني عطلت عليكم
وليد بإبتسامه: لا عادي، ربي يهنيكم يارفيقي 
خالد????: أن شاءالله يارب????
سالم بحزن: تي حتى شهر رمضان والعيد ماحسيتهم، وأني نستني فيك تكلميني وتقوليلي مبروك
فرح بحزن: واللهي الله غالب بابا قاعد ماردش عليا، لكن ولايهمك مش راح نروح المره هذي لين إنكملك موضوعك
سالم برجاء: باللهي ورأس وخيتي هنيني، مش توا يجو خالاتك والبناويت تلهي معاهم وتنسيني !!
فرح: ههههههههه ماتخافش مش راح ننساك، جلال ماروحش حتي على خاطر العيد
سالم: خوك هذا من قبل نفسيه وزاد، روح إسبوع في رمضان ورجع ثاني، تعرفي حتي حوشه عامر واقفله عليه ويجيبله في العمال ويرفع وهو مش معدل بكل
فرح: وين واصلين هما توا؟؟
سالم: واللهي توا في رمضان كملو الجبس، توا عامر بيبدأ في الزواق وبعدين العمال بيمشو لحوش جلال
فرح: باهي كويس ماشاء الله، معناها عامر قريب يطلع وتفضالك الشقه????
سالم: تي راضي حتى في عشه غير بوك يوافق بس????
فرح: إن شاءالله ربي يسهل
سعده بصوت عالى: يافرح !! ياسالم !!
فرح: هيا تعالي نشوفو أمي خليناها بروحها
سالم: إندير مكالمه ونجيك، تي قاعدين ماعيدناش الزفت جوي قاعد مصفاش????
فرح: صار جوك يصفي بناس دون ناس، باهي يامصلحجي توا تشوف????
فرح إبتسمت لسناء: وين الصغار إمالا واللهي إستاحشتهم هذا كله راقدين معقوله
سناء أشرت على شهد بعيوني: بعدين توا إنزلهم
فرح مافهمتش سناء شن قصدها بحركتها، وإبتسمت: شهوده بتقري السنة هذي؟
شهد شافت لأمها بخوف وسكتت، زينب: أي بتقرأ إن شاءالله 
فرح بإستغراب: خيرك يازينب منبهه عليها ماتتكلمش ولاكيف 
سعده بنص عين????: هذا حالها كل ماتقول البنيه كلمه تفنص فيها تخليهالها في رقبتها، تي أسكتي راهو غير اليوم عيد باش نزلتها قبل مانشوفو فيها حتي بالإسبوع وهيا فوقنا
زينب تجاهلت كلام أمي، وبهزوه: شن جو رمضان معاك يافرح عاد هالسنه هذي مع عيلة جديده، إن شاءالله غير ماحشمتيناش بعمايلك وتطيبك اللي يدره الكبد 
سناء: لا فرح ماشاء الله عليها يازينب في العواله خير مني ومنك????
فرح أستغفر الله العظيم شني هالمخلوقه هذي أختصاصها نكد وفتنه هالحركات مش غريبه على زينب، مانبيش إنتعب روحي ونحكي معاها ماعنديش خلوق للمشاكل وبروحي مضايقه وجوي أبصر كيف
وليد: تعرف شارع ال……… ياخالد؟؟
خالد: أي كيف مانعرفاش مش بعيد هلبا على حوشي
وليد: خلاص خش منه حوش أختي غادي
خالد وصلنا قدام حوش أخت وليد كانت تسكن في مصراته مش بعيده علينا مسافة بسيطه، نزلت أخته وخشت الداخل
وليد بإبتسامه????: بارك الله فيك ياخلوده سامحنا تعبناك يوم العيد نزلت لطرابلس على خاطرنا
خالد: ماعنديش فيه جميل، وبعدين عيد المرأه تبي أهلها أكيد راح ننزل لطرابلس غصبآ عني ????
وليد بإستغراب: قصدك مرتك من طرابلس؟؟????
خالد بإبتسامه: أي طرابلسيه على قولت العويله????
وليد: نحسابها من مصراته واحده من أقربائكم ماحكيتليش شني اللي جمعك بيها????
خالد????: موضوع يبي تقعميزه توا شوف العويله وإرتاح وبعد العشي نقعمزو في القهوه ونهدرزو
وليد بإبتسامه: باهي تمام ????
خالد شديت تليفوني على أساس بنرن على فرح بنقوللها وصلت، بس تراجعت في أخر لحظه: خلي نستناها تتصل هيا، إنشوفها مشغوله عليا ويهمها أمري ولا لا ( أول مره عقلي يغلب قلبي في حاجه تخص فرح )
فرح كنت مشغوله على خالد رغما أني طلبت منه يطمني لما يوصل بس هو ماأتصلش زعما قاعد ماوصلش؟؟ لكن كيف من العشيه قالي في الطريق وتوا قريب المغرب أكيد وصل من بكري، معليشي يافرح رني أنتي هالمره، بس أني اللي رنيت إمبكري، ااااف علينا رني وخلاص
خالد وصلت لحوش أهلي، وعاد ماغابيكم في يوم العيد واحد خاش وواحد طالع، كنت مقعمز في المربوعه مع بوي وخوتي، وعقلي مش معاي، تصدقو قعدت كل دقيقه نشوف تليفوني بالك رن وأني ماشفته ونتأكد أنه صوت الرنه عالى أو لا، نستني في إتصالها على أحر من الجمر وكأني سنين ماسمعتش صوتها❤
( كونها هيا اللي تبادر وتتصل باش تطمن عليا هالشيء يعنيلي هلبا، بصراحه كنت محتاج أنها تهتم بيا شويه نبي مقابل لإهتمامي بيها، نبي نشوف هل عطائي ليها وصبري عليها قاعد يجيب في نتيجه أو لا)????
ضحكو عيوني بفرحه???? لما شفت تليفوني يرن نضت بسرعه وطلعت من المربوعه
عامر ولد عم خالد: تي خوك متزوج وإمداير علاقه !! تي شوف عيونه كيف ضحكو الضحكه هذي كلها
خيري بنص عين????: لا إطمن ياحنه عيونه يضحكو هكي لمرته بس، خوي ونعرفه????
عامر: تي شوفولنا مانحصلوش واحده طرابلسيه زيها????
خيري????: تي والنبي عيد راهو نوض من قدام وجهي خير مانفسدلك خليقتك
خالد بفرحه: ياهلا بعمري????
فرح بخوف: أنت كويس؟؟
خالد بإبتسامه: أي ياروحي كويس
فرح: وصلت لمصراته؟؟
خالد: أي وصلت
فرح زفرت براحه: باهي الحمدلله ياربي
خالد بإستغراب: خيرك يافرح شني فيه
فرح: شي، بس على أساس إطمني أول ماتوصل، خفت عليك
خالد: ياروحي أنتي ماتخافيش أني كويس
فرح: وعلاش ماكلمتنيش باهي؟؟
خالد: على أساس نبي نتغلى عليك شويه، كنت نبي إنشوفك بتتصلي بيا ولا لا
فرح بإبتسامه: تختبر فيا يعني؟؟
خالد????: حاجه زي هكي !!
فرح بإبتسامه????: إطمن غالي وهلبا مش شويه 
خالد بفرحه: فرحتي تبيني إنجيك توا عادي راهو????????
فرح بصدمه????: لا شني إتجي توا !! هبلت شكلك
خالد: ماهو حضرتك ماخليتيش فيا عقل، رافعتيه معاك????❤
فرح نسمع في دوشة برا أكيد خالاتي جو، تكلمت بسرعه: خالد هيا باي توا خالاتي جو، وسكرت من غير مانسمع رده
خالد: باهي غي….ههههه سكرت الهبله???? توا بس نقدر إنقول اليوم عيد، بعد اللي سمعته فرحتي مش عاطيها لحد، قعدت كلمتها تتكرر في دماغي( إطمن غالي وهلبا مش شويه )❤❤
خلود بخجل????: ماما عماد كلمني وقالي غدوة بيجي هوا وأمه بيعيد علينا
زاهيه: باهي قوليله تفضلو، وأنتي ياخوله شني بيجي خطيبك ولا لا
خوله بحقد????: مش عارفه ياماما مكلمنيش أصلا
خوله كانت حاسه بالغيرة من خلود لأنه خطيبها على طول يكلم فيها ويأخذ في رأيها في الحوش وفي كل التفاصيل الصغيره قبل الكبيره، 
بس هيا أسامه حتي لما تتنازل هيا وتكلمه يتحجج بأي شي باش يسكر، كانت هازيه على أختها كيف ترضي بشخص مقعد، الواضح أنه الهزوه بتنقلب عليها????????
منال: طول عمرنا نعرفو المرأه ثاني يوم العيد تمشي لأهلها، كيف فرح تمشي اليوم
زاهيه بتحذير: أسمعيني كويس فرح ماتدخليش فيها ياسرك اللي درتيه فاهمه، وبعدين خالد نازل اليوم لطرابلس بيجيب صاحبه رفعها على طريقه مش معقوله ينزل اليوم وينزل غدوه علاش التعب
خلود: بعدين فرح رمضان كله ماشافت أهلها، قعدت لاهيه معانا في تجهيزات العرس، والله لو واحده ثانيه ماديرش ربع اللي داراته، بارك الله فيها
منال سكتت بغل وهيا تسمع فيهم كيف يشكرو في فرح، ماعندها ماأدير المره الأولي فاتت على خير المره الجايه أكيده هيا الخاسره، قررت تتجاهل فرح على قد ماتقدر باش ماتحطش روحها في مشاكل
أمينه: أحكيلنا شني خديتي للعرس يافرح
فرح: ماخديت شي لبسي كله قاعد جديد علاش الفساد
أمال بصدمه: هييييي ياقهرتي، كيف ماتاخذي شي، هذي فرصتك ياغبيه عرس خواته بيأخذلك بالسيف عليه
ريما: ياسر ياأمال الراجل وراه عرس ومصاريف وهيا عندها صح ليش الفساد 
أمينه: علاش هو مايبيش يأخذلك يافرح
فرح: لا والله هو يقولي خودي اللي تبيه، بس أني قلت عندي مش لازم، خذيت قفطان وبدلة للعيد وخلاص
أمال: خلوهالي هذي الليله تبي دروس مكثفه، خزي مدقنه ????
فرح: مبردك ياأمال، خيرها تهاني ماجتش
أمينه: اليوم في حوش العيله غدوه توا إتجي
فدوى: أمتي إمروحه أنتي يافرح؟
فرح: بعد غذوه، أسمعوني يابنات نبي نوتي روحي للعرس إديرولي????
أمال????: حيييي على العبيطه هذي، تي خليه يرفعك للمزين يامضحكه إديرلك كل شي
فرح بخجل: نتحشم إنقوله نبي المزينه وكان سألني شني بديري؟؟ إنقوله بندير الحلوه والله مانقدر
أمينه: أمتي العرس هو؟؟
فرح: الإسبوع الجاي 
فدوى: اليوم الخميس مازال سبعه إيام معناها ماأديرش من توا، مايجي العرس لين تلقيه طالع من جديد
فرح: باهي كيف إندير إمالا؟؟ قبل عابيه غدوه بنحني مايصيرش معناها
أمال: وووووووك عليا وووووووك، أطلقوني عليها خلى ندفنها إهنايا ماعندها ليش إمروحه، ياقهرتي????
فرح????: تي شني قلت أني !! خيرك ياأمال؟؟
أمال:تي أشحطي روحك يامضحكه، بري حني في المزينه تطلعلك قنينه وإمساويه، هذا أول عرس ليك في العيله لازم تكوني فلة شمعه منوره????
فرح: مانعرفش واحده تحني غادي، ومش معقوله إنزله لطرابلس على خاطر حنة
أمال: تي أني إنوض نطلع خير مايجيني شلل رباعي من المضحكه اللي قدامي
طلعت أمال وقعدو البنات يضحكو????
فرح: خزي تضحكو عليا، تي قولولي كيف نتصرف 
أمينة: ولايهمك فروحه في واحده نعرفها تمشي لكل مكان المهم فلوسك بس توا نكلموها توا تجيك يوم الإثنين تحنيك وإديرلك الحلوه، لكن أسمعي رجليك وإيديك اللي بتحنيهم ديريلهم الحلوه قبلها بيوم باش مايتحسسش جسمك
فرح: باهي عادي، غير شوفيها وأكديلي عليها????
فدوى: أسمعي شن رأيك ياأمينه غدوه لما إتجي تهاني ترفعها لسهيله إديرلها تنظيف بشره وحمام مغربي???? 
أمينه: أي فكره عادي، عندك فلوس يافرح
فرح بإستغراب????: أي عندي، بس غدوه جمعه أكيد مسكرين
فدوى: تي ماهو تهاني تعرفها توا تكلمها تفتح العشيه عادي
وقعدو البنات كل واحده تقولي في فكره شني إندير وكيف نتصرف، ورجعت أمال قعمزت معانا فضوليه ماتقدرش لازم تعرف كل شي????
(( بنات خالتي فعلا أقرب من خواتي، ديمه واقفين معاي ومتعبتهم ))❤❤
وليد بإستغراب????: معقوله شفتها مره في المحل عجباتك خطبتها وتزوجتها تي شني هالقصه الغريبه
خالد بإبتسامه????: نصيب يارفيقي
وليد: عيلة مني نساباتك؟؟
خالد: عيلة ال……وسكتت لما قدم جيهتنا نور الدين راجل أخت وليد
نور الدين: تي كان نحسابك جاي للقهوه هذي ياوليد راهو جبتك معاي
وليد: خالد اللي جابني أني مانعرفهاش
خالد????: مني الشاب ماعرفتناش ياوليد
وليد: هذا نور الدين ولد خالي ونسيبنا، وهذا خالد صاحبي يانور الدين
خالد مديت إيدي????: أهلا وسهلا تشرفنا تفضل قعمز معانا
نور الدين????: أهلين بيك، بارك فيك، أي عادي خلى إنجيب قهوتي وإنجي
خالد بإستغراب????: هذا ولد خالك الناجي قصدك؟؟
وليد: أيه هو، سبحان مغير الأحوال ياراجل، بعد موت أمه وبوه إنقلب مليون درجه????
خالد: سبحان الله ماقتليش كيف ماتو؟؟ وكيف خليت أختك ترجعله؟؟  هذاكا اليوم في تونس قتلي توا إنهدرزلك ومعاش فتحنا الموضوع !!
وليد: خالي ومرته ماتو بحادث قالو طانطا ركبت فوق سيارتهم
خالد: إن شاءالله هاذم اللي في طريق ال……..؟؟????
وليد: أي هما
خالد: لا حول ولا قوة الا بالله، تي على حسب كلام الجماعه قالو لقطوهم بالطرف، شفت ربي يمهل ولا يهمل خدي جزاته على اللي داره فيكم????
وليد: أي حتي أني سمعت هكي، تي عادي كله زي بعضه توا معاش يفيد شي اللي صار صار ????
وبعد وفاتهم بشهر جانا نور الدين لتونس وقال طلق مرته لأنه مش متفاهم هو وياها وماتبيش بنات نسرين يعيشو معاهم، وقال أنه يبي يرد نسرين ويربو بناتهم، وأني بصراحه كنت نبي نتهني عليها، أني مش عايشلهم ديمه، ربي يسعدهم إن شاءالله ????
خالد: بعد عمر طويل ياراجل، المهم أنها مرتاحه ومتفاهمين ربي يهنيهم….. وغيرنا الحديث لما جي نور الدين قعمز معانا
فرح: صباح الورد
خالد: وينك إمبارح؟؟
فرح: قعدت إنهدرز أني والبنات وبعتلك رسالة ماهو!!
خالد بغضب????: أني لما إنرن المفروض تردي مش تتجاهليني، وبعدين الرسالة شني بندير بيها أني وين إنصرفها؟؟
فرح بإستغراب????: خيرك ياخالد صبح قاعدين
خالد: تي لا صبح لا ليل، ماقدرتش نرقد بكل تعودت عليك في جنبي، وحتي إتصلت بيك ماتبيش تردي، وتي روحك جايك العشيه????
فرح بصدمه????: لا باللهي عليك شني تجيني !! أحني متفاهمين غذوه العشيه
خالد????: مصارش رجعت في كلامي، مانقدرش نقعد لغذوه من غير مانشوفك
فرح☹: باللهي ياخالد من غير جو والله مستاحشه أهلي أمتي جيت أني؟؟ راهو رمضان كله ماجيتش !!
خالد????: وأني مني بيا باهي، علاش ماتستاحشيش فيا؟؟
فرح بإبتسامه????: من قالك مش مستاحشاتك، إستاحشتك بس غذوه تجيني زي ماتفاهمنا
خالد????: أسمعي ياأنتي باللهي أعطى التليفون لفرح بسرعه
فرح بصدمه????: خيرك ياخالد أني فرح، شكلك مش راقد صح????
خالد????: بلا تسهويك هاتي فرح بسرعه
فرح????: خالد بطل يابارد
خالد☹: أنتي فرح صح !! باهي توا أنتي فرح قلتيلي إستاحشتك اللي هو قصدك إستاحشتيني أني صح !!
فرح بإستغراب: أي قتلك إستاحشتك ياخالد بس خيرك أنت، حييييي شن قلت أني????‍♀️
خالد بفرحه????: ياروح خالد أنتي، وأني مستاحشك موت ياعمري، خلاص إنجيك العشي معناها????
فرح بصوت عالى: لااااااااااا
سعده من برا: خيرك يافرح تعيطي
فرح ااااف منك ياخالد: لا شي ياماما
أمال فتحت الباب????: خيرك يامنجوهه تعيطي
فرح: شي شي سكري الباب شويه وإنجيكم
خالد قعدت نضحك على ردة فعلها ياعليك طفله طحت فيها
فرح قاعده مادرت شي كيف يجيني العشيه، قررت نأخذه بالسياسه زي مايقولو، بهدوء: خالد تسمع فيا !!
خالد: نعم يافرحتي، أصلا مانسمعش في غيرك????
فرح: والنبي ياخالد ماتجيش قاعده مادرت شي أني
خالد بإستغراب: شني بديري؟؟
فرح اااااف ياعليك هم، بتوتر: بندير حاجات بنات أنت ماتعرفهمش
خالد: عادي ياروحي قوليلي مرتي أنتي لازم نعرف شني بديري؟؟
فرح شكله فاضي هذا ويجبد فيا بالحكي????: غير أسمعني نبي نطلع العشيه أني وبنات خالتي بنمشي للمزين
خالد بغضب????: شني لا أكيد، ردي بالك تطلعي من الحوش فاهمه، توا إنجي أني ونرفعك وين ماتبي
فرح بحزن☹: بس أني نبي البنات معاي هما يعرفو أنت شني تعرف؟؟
خالد: نعرف هلبا حاجات توا إنروح بيك ونقولك شني نعرف باهي????، طلوع من غيري لا يافرح، إنجي أني ونرفعك حاضر????
فرح وجعتني روحي معناها مش راح يصير شي، بدموع????: هذي أول مره نطلب منك حاجه، باهي خلاص شكرا معاش نبي شي، وسكرت التليفون وقعدت نبكي 
أمينه فتحت الباب: تي خيرك عطلتي يافرح؟ تهاني كلمت المرأه و…… بصدمه: تي خيرك تبكي شني فيه، وإنتبهت لتليفوني خالد رجع يرن بعد ماسكرت: تي ردي الراجل يتصل
فرح????: خليه مانبيش إنرد
أمينه: تي خيرك شني صار؟؟
فرح: ماصار شي من اللي خططناه إمبارح قالي ماتطلعيش
أمينه: تي غير ردي الراجل يتصل قاعد
فرح: لا مش راده، إنتبهت للمسج اللي وصلني (( تعرفي ماترديش واللهي لما إنجيك توا ))ورجع يرن ثاني
أمينه: تعوذي من الشيطان وردي عليه، بالك ربي يهديه
خالد تفاجأت لما قعدت تبكي معقوله على خاطر طلعه هكي إدير، هيا صح مافيش مره طلبت مني حاجه بس كيف تبيني نخليها تطلع مع بنات خالتها بروحهم، زادت عصبتني لما سكرت عليا ومعاش ردت
فرح????: نعم !!
خالد بحزن: ليش تبكي باهي؟؟ وكيف تسكري عليا أني قاعد نحكي
فرح????: مش قتلي لا خلاص شني مازال بتقول ثاني
خالد بغضب????: تي بطلي بكي الزفت، عارفتيني مانحبكش تبكي ولا لا؟؟ أسمعيني يافرح 
فرح: نعم !!
خالد????: خلاص بري، بس تمشي بشروطي راهو
فرح بفرحه????: بجد، خلاص موافقه
خالد ضحكت على لهفتها????: تي غير أسمعي شروطي قبل
فرح بسرعه: موافقه عليهم كلهم، شكرا بجد
خالد ياعليك طفله كلمه قادره تغيرها من حالة لحاله????
خلود خشيت وفي إيدي سفرة العصير: السلام عليكم 
عماد بإبتسامه: وعليكم السلام ورحمة الله وبركاته 
خلود حطيت السفره على الطاوله، وقدمت من عماد، ومديت إيدي بإبتسامه: أهلين كيف حالك؟ كل سنة وأنت طيب
عماد: تمام بشوفتك، وأنتي بخير وديمه معاي إن شاءالله 
خلود بخجل: إن شاءالله، يارب
عماد: ليش قعمزتي بعيد، ماتخافيش مانقدرش إنديرلك شي بحالتي هذي
خلود مش قصدي، مافكرتش هكي أبدا، وجعني عماد والحزن واضح في عيونه، نضت وقعمزت في الصالون اللي في جنب كرسيه وزدت قربت كرسيه مني أكثر، وبإبتسامة: مش خايفه منك ولاشي، أصلا وجودك معاي أمان بالنسبه ليا، بس خفت نقعمز قريبه منك تهزأ عليا وتقول مش محترمه ومطفوشه????
عماد مسكت إيدها، بإبتسامه: ربي يقدرني ونسعدك ان شاءالله، تعرفي حاسك حاجه كبيره عليا، مش عارف كيف نشكر ربي عليك، وكأنه ربي بعتك تعويض ليا بعد اللي عشته باش تحلي إيامي????
خلود بخجل: لو تبي تسعدني فعلا، أدعي أنه ربي يجمعني أني وياك بالحلال????، ومايفرقش بينا لأي سبباً كان
عماد بفرحه☺: أنتي متخيله أني ممكن نفرط فيك بعد مالقيتك، أنتي السعاده اللي إنحرمت منها سنين، ربي مايحرمني منك❤
خالد كنت واقف ونتفرج على فرح ومستغرب شني هذا كله، هيا ماجابتش إلا شنطه واحده، منين جابت هذا كله
علي: غير خش خود طاسة قهوه ياخالد
خالد: واللهي إلا عندي في السياره ياعمي، وبعدين ورانا مشوار، صحيت بارك فيك، ماتنساش ياعمي لازم إتجو راهو، وباش تقول للولاد باللهي عليك 
علي: إن شاءالله بإذن الله، ربي يتمم على خير 
خالد: إن شاءالله يارب، هيا يافرح
فرح طلعت أني وسالم لما سمعت خالد ينادي، بإبتسامه: أني واتيه
خالد اااف هالسالم هذا زي اللصقه، مش مخليها دقيقه شوره، تحشم ياخالد خوها الزفت????‍♂️، ماهو هذا اللي قاهرني أنه خوها ومانقدرش نبعده عليها????
فرح خش سالم وأني قربت لبابا، بإبتسامه: بابا أني مش طالعه لين تعطيني الموافقه على الموضوع اللي بالي بالك????
خالد الفضول قتلني زعما شني الموضوع ????
علي: أني عارفه وهو لاصق فيك، درهلك كبدك، خلاص بإذن الله يصير خير
فرح بفرحه: يعني موافق !!
علي: مبدئيا إيه، بس قوليله مافي شي لين يطلع عامر من الشقه، وراهو هو اللي يشطبها بفلوسه مايعباش عليا في شي
فرح إضبطت بابا، وبست على رأسه: باهي خلاص اللي تبيه إيتم، وناديت بصوت عالى: سااااااالم 
سالم طلع يجري مخلوع: بسم الله شني صار؟
فرح، بإبتسامه☺: البشاره توا نبيها????
سالم جي يجري وحضني، وبفرحه: قولي والله ☺
فرح بفرحه????: والله وافق????
سالم بست فرح على رأسها، وتلفتت لخالد اللي مازاله شويه وينحرق????: ماتشبحليش هكي أختي وفي حوشنا أيواه إندير اللي نبيه????
سالم قاعد مش مصدق، حاس الدنيا مش سايعتني من الفرحه وأخيرا ياربي الحمدلله الحمدلله 
“” سيجبر الله بخاطرك يوماً ما، فقد كن على ثقة بأن ربك الذي خلقك لن ينساك أبداً “”
خالد: شني هذا كله يافرح؟ 
فرح: هاذم حاجات خديتهم أمس(( طبعا هاذم تعليمات أمال، فلست بيا خلتني نصرف اللي قدامي وورائ على عرس واحد، كارثة هالبنت هيا والفلوس أعداء????))
خالد: ومنين جبتي الفلوس؟
فرح: عندي شويه، وخديت من سالم شويه
خالد: علاش ماتكلمتيش راهو رديناله فلوسه
فرح مش عارفه كيف بنطلب منه، بتوتر: عادي مره ثانيه، خالد ممكن نطلب طلب !!
خالد بإبتسامه: أدللي ياروحي عيوني ليك????
فرح، بإبتسامه: يسلمولي عيونك????
خالد لا في هلبا تطورات شكلي كل يوم بنجيبها لأهلها باش نسمع كلام زي توا????
فرح، بتوتر: أمس عجبني قفطان في ال…… وفلوسي تمو ماقدرتش نأخده
خالد: ههههه وخيرك خايفه ومتوتره أنتي، هذا هو الطلب يعني
فرح: مانبيش إنثقل عليك ماهو
خالد: طلباتك أوامر ياروحي، خلاص توا نمشو ونأخذوه
فرح بفرحه: شكرا ياخالد
خالد بصراحه كنت مستغرب خيره الأيام اللي فاتو نقوللها خودي تقولي لا عندي توا شني خطر عليها تأخذ هذا كله، شكله في حد لاعبلها في رأسها????
فرح طبعا لاشفت قفطان ولاشي، أمال هيا اللي شايفاته وبعتتني ليه، قتلي لازم تأخذيه وتلبسيه في الحفله، وحطتني أني وخالد في موقف محرج، يعطيك الهني ياأمال????
فرح مشينا للمحل وباين من مكانه وهيئته نار ياحبيبي نار????، فعلا القفطان يجنن عجبني وحتي خالد عجبه وخشيت قسته وطلع يقتل عليا
خالد القفطان طلع يجنن عليها????: خلاص هيا حوليه، خديت القفطان ومشيت بنخلص
صاحب المحل: تمام ياأستاذ تبيه
خالد: أي إن شاء الله، كم حسابك؟؟
صاحب المحل: بي…………
خالد إنصدمت صح هو حلو لكن السعر مبالغ فيه هلبا، وأني ماعنديش المبلغ هذا حاليا: واللهي الحق أني جاي من مكان بعيد وماعنديش المبلغ كامل توا، نعطيك نص المبلغ توا ونقدر نخليلك بطاقتي ولا الجواز ضمانه، وغدوه نجيبلك الباقي بإذن الله????
صاحب المحل قام عيونه لفرح اللي طلعت من حجرة القياس: واللهي ممنوع لازم المبلغ كامل،???? لكن على خاطر عيون الحلوه هذي عادي تأخذه حتي من غير فلوس
خالد الدنيا ظلمت قدامي شني قاعد يقول هذا،???? هجمت عليه زي الثور الهايج كسرته تكسير، وتلفتت لفرح اللي كانت واقفه جامده في مكانها، جبدتها بغضب وطلعت إنسب ونلعن????
خالد????: ينع???? هذا المحل جيتيه أمس؟؟
فرح نرعش وبنموت من الخوف: لا والله ماجيته
خالد????: معاش تكذبي يانعن???? يابنت ال….. توا قبل شويه قلتي شفتيه وعجبك تضحكي عليا تحسابيني عيل
فرح بدموع: مش أني اللي شفته واللهي هذي بنت خالتي….. وإنخرست لما وقف خالد فجأة 
خالد وقفت السياره على اليمين، حاس روحي نرعش من كثر الغضب معاش قادر نتحكم في روحي، تلفتت لفرح، وبتهديد وعياط????: الجو هذا مايمشيش عليا فاهمه، نحط أمك في حوش أهلك تندفسي فيه لين إنجي نأخذ أمك، خيره الأيامات اللي فاتت ماتبيش تأخذي وتقولي عندي شني اللي جاك توا تكلمي يانعن????
خالد الشيطان لعب في عقلي لعبه مش طبيعيه، ولعت وطلعت وطول الطريق إنسب ونلعن، أستغفر الله ياربي، وفرح طول الطريق تبكي وماقالتش حتي كلمه، وأني كل مانشوفها تبكي إنزيد إنعصب أكثر????
وصلت للحوش وأني حاسه روحي فاشله من كثر البكي، وخالد ماخلى كلمه ماقالها وأني فضلت أني نسكت لأني مهما قلت مش راح يصدقني وقتها، حطني في الحوش وطلع
خالد قاعد معصب وقلت أحسن شي مانتواجهش أني وياها الوقت الحالي، لأني مانقدرش نضمن روحي شني ممكن إندير، مانبيش نندم????
فرح قررت أني نستناه ونفهمه كل شي، بس إتاخر هلبا وإنشغلت عليه وخصوصا أنه طلع وهو معصب، قعدت حايره بين نتصل بيه أو لا، بس من خوفي عليه تنازلت وإتصلت بس مقفل، زاد ركبني الخوف أكثر
لما سمعت صوت الباب نضت بسرعة وبخوف: خالد أنت كويس !! وينك لتوا؟ خوفتني عليك???? !!
خالد بنص عين????: لا واللهي صحة وجه زي اللي عندك ماشفتش بصراحه
فرح إنصدمت من كلامه شن قصده هذا؟؟????
خالد بإستفزاز: هو نفسه اللي ضاحك عليك????
فرح????: أنت شني تقول؟؟
خالد????: أسمعيني أني الجو هذا مانبيش أمه، أحكي شني فيه بينك وبينه ينعن????
فرح كنت غالطه لما قلت أكيده لما يروح يكون هادي ونقدر نتفاهم معه، بس لا روح وهو معصب أكثر من قبل ومافهمتش شني فسرله دماغه، وشني اللي قاعد يفكر فيه، مشيت بسرعه لدار النوم وسكرت على روحي بالمفتاح
خالد ماتعرفش أنها بتصرفاتها وسكوتها هذا تخليني نشك أكثر، دماغي بيتفجر من التفكير، معقوله هو نفسه اللي كانت تحبه، كل مانذكر إنها مشتله أمس بروحها الشياطين كلهم يطنطاطو قدام وجهي، أستغفر الله العظيم، نضت قربعت باب الدار قريب كسرته وماخليت ماقلت كلام مايتصوراش العقل وماسكتش لين حسيت روحي خلاص فشلت وطاقتي كلها نزحت، واللي يقهر أنها ساكته وبارده حتى بعد هذا كله????????
فرح لو عيطت وواجهته مش راح نوصلو لحل وراح يزيد الخلاف يكبر أكثر من هكي، قررت نسكت ونتحمل ونصبر عليه لين يهدأ????
وحده من وصايا خالتي عزيزة لما الراجل يشد أنتي أرخي????
الصبح نضت وفتحت الدار وإنصدمت ????بخالد اللي راقد على الكرسي متاع الكنبه اللي كانت محطوطه مقابله الدار، وجعني كيف رقبته مش معدله ونومته مش مريحه وشكله واضح عليه التعب تقول طول الليل كان يصارع????، معليشي تنازلي ثاني وبادري أنتي يافرح هذا الوقت المناسب????
قدمت منه وقعدت نهز فيه بالشويه: خالد خالد نوض عدل نومتك????
خالد ماعرفتش أمتي رقدت أو كيف غفيت، فتحت عيوني وشفتها قدامي، وقفت بسرعه نحاول نتجاهلها، بس تفاجأت لما حضنتي بقوة
فرح مافيش إلا هكي حضنته محاوله مني لإمتصاص غضبه، بحزن☹: خالد ممكن تسمعني لو سمحت، أعطيني فرصة نشرحلك باللهي عليك
خالد فعلا أني قدامها أضعف من ماتتصورو????، رجعت قعمزت وقعمزتها جنبي، بتحذير: تكلمي نسمع فيك، بس ردي بالك تحاولي تكذبي فاهمه !!
فرح، بحزن: لو تبيني إنجيب المصحف ونحلف عليه أني مانكذبش عليك عادي، ونضت: خليني إنجيبه، بس وقفت لما شد إيدي ورجع قعمزني
خالد: تكلمي، مصدقك من غير مصحف
فرح بحزن: واللهي بنت خالتي هيا اللي قالتلي على المحل وأني أول مره نخشله، واللهي عمري ماشفته الولد اللي فيه ولانعرفه،صح قتلك شفت القفطان ونبيه، بس والله لاشفته ولا مشيت للمحل من أصله ، وبديت نبكي: كله من أمال هيا اللي قالتلي هكي ديري أني مادخليش والله????
خالد مانقدرش إلا نصدقها، البراءة اللي في عيونها مستحيل تكذب، حضنتها: خلاص بطلي بكي وأنتي دموعك على سبله
فرح بدموع: ماهو أنت ظلمتني من غير ماتسمع مني، ماتوقعتش أنك تفكر فيا بالشكل هذا????
خالد تنهدت بحزن: باللهي ياروحي ماتلوميني كيف تبيني نسمعه هكي يتكلم عليك قدامي وتبيني نسكت والله مانقدر، تي باهي اللي ماتفجرتش ولا مامتش من عصبيتي
فرح حضنته ونبكي????: باللهي ما تقول هكي، معاش تجبد سيرة الموت على لسانك، أكيد أنت مش راح تسيبني زيه صح????
خالد أفرح ياخالد مش هذا اللي تبيه بس لا مش هكي قاعده إدخل فيه في كل شي بينا???? 
كيف بنفهمها أنها في الوقت اللي تجبر فيه بخاطري قاعده تجرح في قلبي من غير ماتعلم????: خلاص ياروحي، هيا تأخرت على عملى ونبي قهوه من إيديك الحلوات
خالد: تمام هي شويه وطالع، لا تو إنجيبلك معاي أهي واتيه، هههههه تي صقع عليك نتحداك تجيبلي زيها من أي قهوه، باهي تو إنشوفو
فرح: خالد قهوتك واتيه
خالد: حبي صاحبي برا صبيله طاسة حتي هو
فرح بدلع: باهي العطر قبل????
خالد????: فرح من غير جو المره الأولى وسكتت، تو ماشي للعمل عيب هكي????
فرح☹: تزعلني يعني !!
خالد زفرت بملل????: صبرني ياربي، تي شني هالحركات يافرح، باهي بخي شويه بس لكن
وليد: ساعه باش تطلع ياباشا، شكلها السهره صباحي إمبارح????
خالد????: نفتكا من خيري تطلعلي أنت ياعليك هم، هاك شد قهوتك وأركب هيا
وليد: هذي القهوه اللي تتحداني علاها، أستني مش راكب لين إنذوقها قبل????
خالد: ماطيحني في العواويل الزفت ذوق ذوق????
وليد???? لا ياوليد أكيد غالط زيد ذوقها، والله نفسها مره واحده ذقتها وبنتها مستحيل ننساها،
شني اللي قاعد يصير معاي المره الأولى العطر وتوا القهوه ????
يتبع ……
لقراءة الفصل الحادى عشر : اضغط هنا
لقراءة باقى فصول الرواية : اضغط هنا

اترك رد