رواية بنت الجيران بداية التزامي الفصل السادس 6 بقلم إسراء رمضان

جهاد قاعده مع محمود واول لما قالها هتقلعي الحجاب ف الفرح اتعصبت”

جهاد بعصبيه: أنا مش موافقه 

محمود مستغرب: مش موافقه ليه

_لاني عمري ماهقلع حجابي علشان الناس تتفرج عليا هو أنا سلعه رخيصه اوي كدا

محمود مستغرب كلامها: انتي ازاي بنت وبتقولي كدا اي بنت ف الدنيا بتقول انها عايزه تخلع حجابها يوم فرحها وأنها ليله ف العمر يعني

جهاد: دول بنات تفكيرهم غيري بيبقى كل تفكيرهم ازاي هعمل فرح محصلش ازاي ههيص واتبسط بس أنا مش معقوله هفرح وانا ببتدي حياتي بذنوب أنا هفرح واتبسط لما ابتدي حياتي بطاعه

محمود بيرد راحت مقطعاه: بس ….

_واه صحيح يعني اي ليله ف العمر دي يعني بناخد اجازه يومها من الملكين الي ع كتافنا ولا بنبقى واخدين عهد ع ربنا أن اليوم دا مش محسوب

محمود مندهش من تفكيرها: خلاص ياستي متعصبيش نفسك مفيش حجاب هيتخلع يوم الفرح براحتك

“جهاد كملت القعده بضيق ومكنتش حاسه انها مرتاحه رغم أنه وافق انها تلبس حجابها يوم الفرح “

“بعد ما العريس مشي جهاد قاعده ف وسط اخوها ووالدها ووالدتها”

والدتها: مبروك ياجيجي واخيرا هخلص منك يابنتي مع اني كنت خايفه من حوار الاسدال داه بس عدت ع خير

جهاد مستغربه: مبروك ع اي هو أنا لسه صليت استخاره ولا عرفته اساسا

والدها: يابنتي محمود عايز يجي يلبس دبل الأسبوع الجاي وابقي اتعرفي عليه براحتك

احمد: صح ياجهاد ابقى اعرفيه ف فترة الخطوبه امال هما عملوها ليه

جهاد مدايقه: مش عارفه ليه حاسه اني مخنوقه من الموضوع داه بس اديني معاكو لما اشوف اخرتها اي

______”

“عبد الرحمن كان قدام بيتهم راجع من الصلاه شاف العريس وأهله خارجين”

_حس بصدمه وفضل واقف متنح ومش مستوعب الي شافه 

راح جري ع والدته

امي مين الناس الي خارجه من بيت طنط ام احمد دي

“والدته بفرح”: دا عريس لجهاد ربنا يسعدها يارب ويفرح كل بنت ويستر بنات المسلمين

عبدالرحمن مستغرب: استني استني يعني اي عريس 

والدته بدهشه: عريس ياواد هتتجوز اله

“عبدالرحمن اتعصب ودخل اوضته”: ضيعتها من ايدك يا عبدالرحمن طول عمرك هتفضل غبي 

فتح البلكونه علشان يشوفها ملقهاش

بعد درس العلم استناها قدام المسجد اول لما شافها نده عليها 

بصتله : نعم 

_كان فيه كلام كتير عايز يقوله بس مش عارف وحس أنه هيعك الدنيا اكتر فقالها أنا آسف ندهت غلط وسابها ومشي

“جهاد مستغربه وحست بحاجه وبدأت تاخد بالها من وجوده حواليها “

“باليلل وهي بتقرأ قرآن عبد الرحمن جه ع بالها وهو بينده عليها  فتحت بلكونتها

  شافته واقف ف البلكونه الي قصادها اتكسفت ودخلت بسرعه

بتكلم ف نفسها 

اي الغباء داه اي اللي خلاني افتح البلكونه دلوقتي

حست بحاجه تجاه عبدالرحمن وراحت خابطه ع قلبها وقالت مهما تعمل مش هفتحك الا لحلالي  وأفتكرت محمود 

اترمت ع السرير وبتفكر

_هتلبسي الدبله الاسبوع الجاي خلاص ياربي أنا ليه مش مرتاحه مع أنه وافق ع كل حاجه

فجأه سمعت صوت عبدالرحمن وهو بيقرأ قرآن من عند الايه الي وقفت عندها جهاد

بتكلم ف نفسها: معقوله عبدالرحمن يكون بيسمعني كل يوم وانا بقرأ معقوله يكون مهتم بيا وبعدين خبطت ع دماغها استغفر الله العظيم دا اكيد مدخل من مداخل الشيطان نامي ياجهاد نامي انتي هتبقى عروسه قريب

“ونامت فعلا”

“عدا الأسبوع وجه معاد تلبيس الدبل”

الزغاريت بدأت وكان الكل فرحان 

عبدالرحمن واقف ف البلكونه حاتط ايده ع قلبه وحاسس بغصه وأنه مش قادر يستحمل يشوفها متجوزه حد غيره 

فرش سجادة الصلاه وبدأ يدعي ربنا 

يارب أنا مرضتش اسعى إليها ف الحرام وكان نفسي اكون حلالها يارب عوضني بيها لأن دي الوحيده الي قدرت تخليني اقرب منك دي سبب اني افوق من الغفله  الي أنا كنت فيها يارب 

والدته كانت واقفه ع الباب وهو ميعرفش وسمعته

_لما انت بتحبها مقولتش ليه كنت خطبتهالك

عبدالرحمن بندم: كنت خايف مقدرش أسعدها وكنت لسه ماشي ف طريق الالتزام وخايف متوفقش عليا

والدته: طب مكلمتهاش ليه ولمحتلها

عبدالرحمن: دي غاليه اوي ياماما اغلى من اني اتكلم معاها عادي كدا بس أنا لسه عندي امل أن ربنا هيكتبها من نصيبي

_____

“ف بيت جهاد”

الكل متجمع وفرحان الا جهاد حاسه بغصه ف قلبها ومخنوقه ومش قادره تتكلم علشان متكسرش الفرحه الي ف عيون أهلها

محمود: مبروك ياعروسه

جهاد: الله يبارك فيك

محمود طلع الدبل وقالها افردي ايدك 

لسه هيمسك أيدها راحت شاداها

الكل استغرب 

جهاد ندهت ع والدته تعالي ياطنط انتي لبسيني الدبله 

محمود استغرب: وانا روحت فين هو مش مفروض أننا مخطوبين

جهاد : مخطوبين مش متجوزين انت زيك زي اي حد مش محرم ليا ومينفعش تلمس ايدي

الكل ف حالة ذهول من كلام جهاد 

والدتها خافت الخطوبه تبوظ راحت قرصتها ووطت عليها وقالتلها بسوط واطي 

_بلاش تعقيد الناس كدا هتطفش عديها

والدت محمود: مفهاش حاجه يابنتي لما يمسك ايدك دا كان خاطب قبلك خطيبته كانت بتشبك أيدها ف ايدو ويخرجو سوا

جهاد بعصبيه: دي ثوابت ف الدين ياجماعه انتو بتهزرو يمسك ايدي ازاي وفين حديث النبي صل الله عليه وآله وصحبه وسلم 

لما قال: “لأن يطعن في رأس أحدكم بمخيط من حديد خير له من أن يمس امرأة لا تحل له”

محمود بعصبيه: لا انتي كدا معقده بقى

جهاد بعصبيه بردو: أنا مش معقده انت الي خاربها ومش عارف ثوابت دينك واي الصح واي الغلط

“حصل مشكله وجهاد رفضت أن محمود يمسك أيدها ويلبسها الدبله وخرج العريس وأهله زعلانيين من الي حصل”