اسكريبت حبيبتي الصغيرة الفصل الثالث 3 بقلم سولييه نصار

قومت وانا متوتر وقولت :

– ماما انتي بتهزري صح ؟!!!دي أخ…

-رباب مش اختك يا عز وده اللي تجاهلناه انا وانت لحد ما البنت حبتك واتصدمت …

قامت ومسكت ايدي وقالت:

-عز انا مش هلاقي زيك لبنتي رباب ..

كان نفسي اوافق …..مقولتش ده لنفسي مباشر قبل كده بس رباب بالنسبالي حلم بس برضه مينفعش هي تستاهل الافضل وانا مش الافضل ليها بصيت لامي بكسوف وقولت:

-بس انا مش عايز اتجوزها يا ماما…رباب اختي ..

ومتقلقيش هي كده كده هتنساني عشان همشي من البيت

-براحتك يا بني

حسيتها زعلت وده ضايقني بس لو بتحب بنتها فعلا هتعرف انها تستحق الافضل مني .

…….

مر يومين وانا بنقل حاجاتي للبيت الجديد وبشتري حاجات تلزمني لما دخلت عليا امي الأوضة وقالت:

-عز يا بني …رباب قالت ان واحد زميلها في الكلية حابب يتقدملها وعايز يقابلك .

وقعت الكرتونة من ايدي وحسيت أن قلبي واجعني …حاولت اسيطر علي نفسي وابتسمت وقولت:

-اسمه الثلاثي يا امي وهسأل عليه بقلم سولييه نصار

-حاضر يا بني هجيب اسمه من رباب

…….

انتقلت شقتي الجديدة وكنت بسأل عن وائل اللي جاي يتقدم لرباب ..انا مكسوف وانا بقول كده بس بجد كان نفسي امسك عليه حاجة او يطلع وحش ..

المهم ميتجوزهاش …ودي كانت انانية مني …امي عرضت عليا اللي بحلم بيه وانا بغبائي ضيعته …وكان صعب اطلب ايد رباب منها

……

-متأكد يا حسن ان الواد كويس وعيلته محترمة …يعني مفيش اي غلط

بصله حسن بصدمة وقال:

-مالك يا عز اول مرة اشوف واحد عايز يطلع اللي هيتقدم لاخته وحش انت مفروض تفرح يا راجل

اصل…..

-اصل ايه يا عزوز ….شكلك وقعت ومحدش سمي عليك …وقال ايه رباب اختي رباب بنتي …انت طلعت مش سهل ….

-رباب تستحق الاحسن مني

-يا شيخ اتنيل هي هتلاقي احسن منك فين اصلا …انت دايما كنت بتحميها…انت الوحيد اللي مستحيل تأذيها ولا تبكيها…انت بتحبها اكتر من حياتك يا عز …عشانها رفضت امك تتبهدل وخليتها في البيت عشان تراعي رباب وانت اللي كنت بتطحن في الشغل …معلش دلوقتي رد عليا مين احق واحد برباب…بعدين انت ناقصك ايه ها قول …انت طيب ومحترم …خريج جامعة صيدلة بتشتغل في شركة أدوية محترمة ومستواك المادي كويس …وهتعيشها عيشة محترمة قولي بقا انت متستاهلهاش ليه !

– انا اكبر منها بسبع سنين الفرق كبير

حط حسن ايده علي قلبه وقال:

-اه هيجيبلي الجلطة البعيد منك لله يا ابو مخ تخين…قولي يا عزوز انت طلعت من صيدلة ازاي بتفكيرك ده مفروض مكانوش خرجوك من اعدادي

وايه يعني سبع سنين محسسني انهم سبعين سنة …روح يا راجل ومضيعش حبك من ايديك وبطل قلة أدب …

….

كلام حسن بطريقة ما حفزني…واقنعني كمان …انا مش ناقص حاجة فعلا انا بحب رباب حب حقيقي وعارف اني هسعدها تغير كده مقدرش اشوفها مع واحد تاني …

دخلت البيت فقربت مني امي وقالت:

-ها يا عز الواد طلع كويس نتصل نجيبه

– لا مش هيجي انا اتصلت بيه ورفضته من برا برا

-ليه يا بني بس هو صدر منه حاجة وحشة …عرفت حاجة عنه مش مضبوطة

-لا هو كويس بس انا رفضته

سكتت امي وهي بتبصلي بحيرة فمسكت ايديها وقولت:

– انا عايز بجد اتجوز رباب ومش هستحمل انها تكون لغيري واوعدك اني دايما احافظ عليها واحبها

-بس انا مش موافقة

جات رباب من ورا امي وقالت كده وهي متعصبة …رفعت حاجب واحد بعدين ابتسمت وغمزت ليها وكملت كلام مع امي .

.ايه رايك الخطوبة نعملها بعد اسبوعين والفرح بعد ما تتخرج الاوزعة دي

-موافقة يا بني طبعا

صرخت رباب وقالت:

-هو انا شفافة يعني مش مفروض تاخدوا رايي

قربت منها وقولت :

– كنت بفكر اعمل رسومات ثري دي في شقتنا اللي هنتجوز فيها ايه رايك

ابتسمت بخجل وقالت:

-وهتعملي مطبخ أمريكي

-نعمل يا ست البنات

-هتعملي مكتبة للروايات الرومانسية

-لااااع روايات رومانسية لاااع جرزة وقطمها جحش

ضحكنا كلنا ..احيانا بتجيينا فرص تفرحنا بس بغبائنا مش بنستغلها…انا قررت استغل فرصي عشان ابقي سعيد …مهما كان انا استحق السعادة❤

تمت