رواية زين الجزء الثانى الفصل الثالث 3 بقلم سحر فرج

عمر باستغراب كمل نزول السلم هو وشاهندا وقال : مالها دى هى مش بترد ليه؟؟

وبعدين أيه المعامله دى بس يا جدعان ده انا عريس ولا انتم مش واخدين بالكم.

سميحه بتضحك على كلامه وقالت : على اساس أنها مش عروسه هى كمان وفى أول يوم فى شهر العسل بتاعها ومش عارفه تتلم على عريسها زى ناس .

عمر بصدمه رد وقال : انا شامم ريحه تريقه وحسد فى الموضوع ولا إيه؟ وبعدين زين فين هو وحسام مش شايفهم ليه؟

سميحه بضحك ردت وقالت : تعال يا واد انت واقعد كده وانا هافهمك على كل حاجه بلا تريقه ولا حسد بلا بتاع.

وفعلا شاهندا راحت قعدت جنب مامتها وفى حضنها .. وعمر راح قعد جنب والدته، وبدأت سميحه تحكيله كل اللى حصل مع حسام وزين من ساعه ما عمر خد شاهندا وطلع اوضته وموضوع تعب عاصى اخو يوسف .

عمر بصدمه واستغراب بصلها وقال : هو فى ايه يا جدعان .. اكيد فى حد فعلا باصص لينا فى أم الجوازة دى .. أنا أتعب يوم دخلتى وأدخل المستشفى، وحسام وزين بدل ما يكونوا قاعدين مع عرايسهم وبيقضوا شهر العسل فى منتهى الرومانسيه و…………???? قاعدين دلوقتى فى المستشفى مع يوسف فى ايه عاوز اعرف بالضبط؟؟

وايه اللى بيحصل معانا ده بس يا ربى ؟

وقبل ما سميحه ترد عليه جت دادة زينب وبلغت الكل أن الأكل جاهز على السفره .

سميحه قامت وقفت وقالت : ممكن نقوم ناكل كلنا دلوقتى ونكمل كلامنا واحنا بناكل .. يالا يا ليل، يالا يا أيه يا حبيبتى قومى، وانتى يا شوشو يا حبيبتى هاتى جوزك واسبقونا على السفره .. قومى يالا يا سماح .

عمر اول واحد قام وقف وقال : انا ميت من الجوع والله يا سوسو، قوموا يالا بدل ما والله هاسبقكم وأخلص الأكل كله لوحدى ، أنا عريس يا جدعان وعاوز أتغذى كويس .. وقرب من شاهندا وهمس فى ودنها وقال : ولا ايه يا قطه .

شاهندا ضربته فى كتفه وقالت : يا ابنى لم لسانك ده واعقل بقى جننتنى معاك.

سميحه بضحك ردت وقالت: اهو ده اللى مش هايحصل ابدا يا شوشو متتعشميش فيه خير ، ده “عمر الجبالى” اللى هايفضل كده طول عمره بلسانه الطويل .

عمر هرش فى شعره وقال : عجبك اللى خالتك سميحه ومراتى عاملينه فيا ده يا ليل .. يرضيكى كده يا بنت خالتى ؟

ليل كانت سرحانه وحزينه ومش واخده بالها من كلام عمر ولا كلامهم كله .

أيه طبطبت على كتفها وقالت : كلمى عمر بيكلمك يا ليل .

ليل انتبهت وقالت : بتقول حاجه يا عمر !؟

عمر من نظره ليل وعيونها الحزينه عرف على طول هى زعلانه من أيه فقرب منها

وقال : اتفضلى قومى معايا يلا الاكل هايبرد وانا ميت من الجوع .. قومى يالا بسرعه .

ليل بحزن ردت وقالت : لا انا مش جعانه قوموا انتم كلوا بالهناء والشفاء، وانا هانتظر زين لما يرجع هو وحسام .

عمر بغيظ رد وقال : طب والله والله يا ليل يا بنت خالتى لو ماقومتيش معايا حالا دلوقتى لا هازعل منك اوى وهاخصمك ولسانى مش هايجى على لسانك تانى ابدا .

سميحه قربت من ليل بكل حنيه، ومدت ايديها ليها وقالت : قومى يا حبيبتى، ده انتى على لحم بطنك من الصبح أنتى وأيه وشاهندا .. كلى لقمه صغيرة وكملى اكلك لما زين يرجع بالسلامة انا مش عارفه بس ايه اللى بيحصل فينا ده بس ؟

ليل علشان خاطر متزعلش عمر ولا خالتها قامت وراحوا كلهم وقعدوا على السفرة وعمر علشان يضحكها قال أول لما شاف الأكل اللى على السفره : اوووووبا يا حلاوتك يا دادة زينب ياللى مدلعانى دايما ، جمبرى واستاكوزا وسمك وكاليمارى وكل السى فووود اللى فى البحر، احمدك ياااااارب.

الكل فضل يضحك على عمر وكلامه وهزاره اللى دايما مالى المكان كله .

حتى ليل نفسها ضحكت وبصت لشاهندا وقالت: الله يعينك يا بنتى على عمر ولسانه وعمايله دى.

شاهندا: فعلا الله يعينى.

عمر بص لشاهندا وقال????: بتقولى حاجه يا مراتى يا حبيبتى؟؟

شاهندا ردت وقالت: ابدا يا حبيبى مش بقول حاجه خالص صح يا ليل???? يلا ناكل بقى علشان جعانه جدا جداااا.

وفضلوا يضحكوا ويهزروا طول ما هما قاعدين على السفره.

_____________________

وفى مكان تانى خالص وبالتحديد فى “السجن” كان “حسان” اخو سعاد مرات ابوا ليل قاعد وبيتكلم بصوت واطى اوى علشان محدش يسمعه هو وصاحبه “صابر” اللى اتحبس معاه بسبب خطفهم ليل ومحاوله اغتصابها هى وشاهى فى مزرعه عاصى ابوا شاهى من فترة، وكانوا قاعدين بيختطوا أنهم لازم يهربوا من السجن ده بأى طريقه، وأنه استحاله يقعد هنا حتى ولو يوم واحد تانى ابدا.

حسان بعصبيه بص لصابر وقال : شغل مخك يا حمار انت وفكر معايا هانهرب من هنا ازاى وفى اسرع وقت؟؟ انا لازم اخرج باى طريقه وادور على ليل وانتقم منها أشد انتقام هى والزفته اللى اسمها شاهى دى .. هى السبب فى اللى حصل معانا ده كله وهى السبب اننا فى الحبسه السودا دى .

صابر بصله وقال: وطى صوتك هاتودينا فى ستين داهيه وحد يسمعنا ويبلغ عننا،

وبعدين يا شيخ ارحمنى معاك بقى انت وست ليل بتاعتك دى، مش كفايه دبستنى معاك فى المصيبه دى من الاول ، انا ماليش دعوة بيك من هنا ورايح لو عاوز تهرب أهرب يا عم محدش ماسكك بس بعيد عنى انت

فاهم ????

حسان بغيظ بثله وقال : يا حمار انت

انا عاوز اخرجك من هنا علشان انت صعبان عليا وكمان علشان انا كنت السبب فى اللى حصلك.

صابر بكل غيظ رد وقال : يا سلام يا سى حسان بقى انا صعبان عليك ولا انت اللى عاوز تهرب من السجن بأى طريقه علشان تشوف حبيبه القلب اللى اسمها ليل وتنتقم من شاهندا.

حسان اتنهد وقال : يا ابنى افهم أنا عاوز أهرب أنا وانت ونبعد بعيد اوى ونروح اى حته بعيد عن عيون الحكومه لحد ما الجو يهدى خالص وينسوا موضوع الهروب ده ويفقدوا الامل انهم يلاقونا.

وبعدها انت من سكه وأنا من سكه ومالكش فيه بقى أدور على ليل ولا أشوفها ولا حتى اخطفها وانتقم منها مالكش فيه .

صابر رد وقال: لا يا عم لو عاوز تهرب فكر لوحدك ومتعملش حسابى معاك انا عاوز اخلص الكام سنه اللى اتحكم عليا بيهم دول واطلع على خير من هنا .

حسان بعصبيه شده من دراعه وقال : ياض اجمد كده وبطل الخوف اللى انت فيه ده تصدق انا غلطان انى بفكر ليا وليك وعاوز اخرجك من الحبسه اللى احنا قاعدين فيها دى واستاهل كمان ضرب الجذمه.

صابر قام وقف وبعد عنه وقال : بقولك أيه فكك منى واللى عاوز تعمله اعمله لوحدك وبعيد عنى سلااام يا ????صاحبى.

حسان بغيظ وعيون كلها شر قال : غور فى ستين داهيه أنا اللى غلطان كتك القرف غاوى فقر وخنقه وحبسه، خليك مرزوع فيه لحد ما تموت وتعفن زى الكلاب .

صابر بغيظ بصله وقال: برضه مالكش دعوة بيا انت فاهم.

ورجع سرح حسان من جديد وفضل يفكر فى اى طريقه تهربه من السجن ده ويرجع يشوف ليل من جديد وياخد منها كل اللى هو عاوزه بأى طريقه ممكنه حتى ولو كان فيها موته، المهم انه يطولها ويكسرها.

________________________

وفى المستشفى كان حسام خرج ليوسف وشاهى علشان يبلغهم بحاله عاصى وانهم نقلوه على الرعايه المركزة لخطورة الحاله ومقدروش يدخلوه عمليات دلوقتى .

يوسف بقلق وتوتر رد وقال: انت بتقول ايه يا حسام يعنى أيه الحاله خطيرة ، فهمنى بالضبط عاصى اخويا ماله وعنده ايه قولى وطمنى ؟

زين قرب من يوسف وحاول يهديه

وقال : اهدى يا يوسف علشان خاطر شاهى انت شايف حالتها عامله ازاى واكيد شويه وباذن الله حالته هاتتحسن ويخرج من هنا بالسلامه وممكن منحتجش لعمليه اصلا والحاله تستقر .

حسام بص ليوسف ورد وقال: جرى أيه يا يوسف أجمد كده وادعيله انه يقوم بالسلامه علشان خاطر بنته اللى واقفه مموته نفسها من العياط دى.. وأن الكام ساعه الجايين دول يعدوا على خير ، ووقفتكم هنا ملهاش اى لازمه خد شاهى وارجعوا على البيت لان الزيارة ممنوعه نهائى فى الوقت الحالى.

شاهى بدموع مغرقه وشها قالت : أنا مش هامشى من هنا غير لما أشوف بابا وأطمن عليه بنفسى .. استحاله أسيبه وأرجع على البيت استحاله يا دكتور استحاله .

يوسف حاول يتمالك نفسه شويه لما شاف حاله شاهى وقرب منها وبدأ يطبطب عليها وقال : اهدى يا حبيبتى مش هانمشى من هنا غير لما نطمن عليه .. بطلى عياط انتى علشان خاطرى وان شاء الله هايقوم بالسلامه ويرجع معانا على البيت بس ادعيله .

زين تعالوا ننزل الكافيتريا نشرب أى حاجه وتريحوا رجلكم شويه من الوقفه دى، وغمز ليوسف علشان يفهم علشان خاطر شاهى وحالتها .

يوسف فهم على طول زين يقصد ايه وبص لشاهى وقال : تعالى يا حبيبتى ننزل نشرب قهوة تحت ونستريح شويه ونبقى نطلع تانى على طول .

شاهى : لا انا مش هاروح فى اى مكان انا هافضل واقفه هنا لحد ما اشوف بابا واطمن عليه بنفسى انزلوا انتم لو حابين .

حسام خد نفس طويل وحس انه مصدع جدا وبصلها وقال : طيب تعالى اقعدى فى مكتبى وشويه كده وهادخلك ليه وتشوفيه مع انه ممنوع بس علشان خاطرك هاخليكى تشوفيه بنفسك .

وفعلا خدوا بعضهم كلهم وسابوا شاهى بعد محايله كبيره فى مكتب حسام وهما نزلوا على الكافيتريا يكلوا اى شىء ويشربوا قهوة كمان وريحوا رجلهم شويه .

شاهى فضلت قاعده لوحدها فى المكتب بتاع حسام وطول ما هى قاعده كانت بتدعى ربنا ان باباها يقوم لها بالسلامه ويرجع على بيته وفجأه ………

سمعت موبيلها بيرن ومدت ايديها ومسكته عرفت انها مامتها اللى بترن عليها.

وكأنها ما صدقت أنها رنت عليها فى التوقيت ده بالذات وردت بكل عصبيه وقالت : افندم يا مديحه هانم فى حاجه؟؟

وبعدين لسه فاكرة حضرتك ان ليكى بنت وليكى زوج تسألى عليهم يا هانم .

الام باستغراب لرد شاهى ردت وقالت : فى ايه يا شوشو بتتكلمى معايا كده ليه يا حبيبتى؟

شاهى بكل وجع جواها وخوف على باباها وقلق وحزن ردت وقالت : فى انك مش أم يا مديحه هانم .

فى انك برضه مش زوجه يا مديحه هانم .

فى ان حاسه انى يتيمه وماليش حد وأمى عايشه على وش الدنيا يا هانم .

فى انى مفتقده الحب والحنان والحنيه والطيبه والاهتمام والاحتواء اللى بشوفهم حواليا فى كل مكان ومن كل أم لأولادها.

فى انى اتربيت غلط بفضل اهمالك وبعدك عنى واهتمامك بشغلك وبأصحابك وحفلاتك وسفرياتك هنا وهناك .

فى انى مش عارفه الصح من الغلط ، الحلال من الحرام ، الخير من الشر .

وااااااه

اخب اقولك ان جوزك فى الرعايه المركزة يا مديحه هانم

جوزك بين الحياه والموت وحضرتك كنتى قافله موبيلك علشان محدش يزعجك وانتى قاعده مع صحباتك فى المزرعه .

وفى ثانيه كانت شاهى انهارت من العياط وقفلت الموبيل بتاعها بسرعه قبل ما تسمع أى رد من امها .

وفى وسط دموعها دى كلها ووجع قلبها وحزنها باب الأوضه اتفتح فجأه ودخل الدكتور “معتز” وانصدم اول لما شاف الحاله اللى كانت شاهى فيها .

دكتور معتز بهدوء بصلها وقال : أنا آسف إنى دخلت على طول من غير استئذان، بس كنت مفكر أن دكتور حسام موجود هنا .

شاهى بتحاول تمسح عيونها من الدموع وبصتله وقالت : حصل خير حضرتك بس دكتور حسام سابنى هنا استريح شويه ونزل الكافيتريا هو وزين وعمو يوسف .

معتز تخيل ان الحاله اللى هى فيها دى بسبب باباها فقال : ان شاء الله ربنا هايطمنك عليه متقلقيش وبلاش الدموع دى يا انسه شاهى ارجوكى وادعيله انه يقوم بالسلامه بأذن الله .

شاهى بحزن ردت وقالت: ارجوك تطمنى يا دكتور معتز انا مش هاقدر اسامح نفسى ابدا لانى السبب فى الحاله اللى هو فيها دى .. انا السبب، انا السبب بس كان غصب عنى .

معتز مش فاهم شاهى تقصد ايه بأنها السبب!! بس حاول يطمنها ويهديها لانها صعبت عليه جدا جدااااا.

شاهى قامت وقفت وقربت منه وقالت : لو سمحت ارجوك يا دكتور معتز ممكن تخدنى وتخلينى أدخل لبابا وأطمن عليه وأشوفه واقوله يسامحنى أرجوووووك .

معتز بصلها وقال : انا اسف يا أنسه شاهى بس دكتور حسام مانع الزيارة عنه نهائى وده فعلا فى صالحه ياريت متزعليش منى .

شاهى برجاء وتوسل ردت وقالت: ارجوك يا دكتور اسمحلى ادخله واشوفه واوعدك انى مش هاكلمه خالص ولا هاتعبه فى اى شىء نهائى ارجووووك اتوسل اليك.

معتز علشان الحاله والانهيار اللى هى فيه ده ابتسم وقال : طيب علشان خاطرك انتى بس اتفضلى معايا وهادخلك بنفسى وتشوفيه وتطمنى عليه.

شاهى باستغراب مكنتش فاهمه يقصد ايه فقالت: على فين؟

معتز : يا بنتى مش عاوزة تشوفى باباكى وتطمنى عليه اتفضلى هادخلك بس ارجوكى خليه سر بينى وبينك ومتبلغيش دكتور حسام انى سمحتلك بالدخول، اتفقنا .

شاهى مسحت دموعها ووشها وتلقائيا قربت من معتز ومسكت أيده وقالت : انا مش عارفه اشكر حضرتك ازاى متشكرة جدا جدااااا.

معتز بما أنه راجل صعيدى اتفاجأه بأيد شاهى على أيده وحس بشىء غريب حصله لأول مرة يحسه فى حياته وعيونهم اتلاقت لثوانى هو وشاهى .

فشد أيده بسرعه وشاهى انتبهت انها عملت حاجه المفروض متحصلش من بنت مؤدبه فبعدت وقالت : أنا أسفه انا مقصدش اللى حصل غصب عنى .

معتز علشان ميحرجهاش قال: ولا يهمك حصل خير واتفضلى معايا .

وخرج من باب مكتب حسام وشاهى وراه على طول وراحوا على طول على اوضه الرعايه المركزة اللى فيها عاصى ودخلت شاهى بكل هدوء بعد ما لبست اللبس الخاص بحجرة الرعايه المركزة.

________________________

وفى الفيلا عند سميحه، عمر بعد ما خلص الأكل على طول طلع اوضته وغير لبسه وخد من شاهندا جرعه رومانسيه على السريع???? وبلغهم انه هايروح على المستشفى هو كمان علشان يقف جنب يوسف فى الظروف اللى زى كده وساب البنات ليل وأيه وشاهندا قاعدين فى جنينه الفيلا منتظرين وصول حسام وزين فى اى لحظه .

ليل بقلق بصت لأيه وقالت : ما تتصلى يا بنتى انتى بحسام وشوفى الاخبار ايه وطمنينا ولا هايباتوا هناك دول ولا ايه بالضبط ؟

أيه : يا بنتى رنيت عليه كذا مرة ومردش عليا هاعمل ايه تانى بس يا ليل وبعدين اكيد مشغول او الحاله خطيرة بدام مردش او كلمنى خالص كده .

شاهندا : انا مش عارفه بس عين مين اللى حسدتنا كلنا وعامله فينا كده .. حد يصدق اننا يوم صباحيتنا كلنا نقضيه فى المستشفى .

ليل : يا سلام يا اختى البركه فى استاذ عمر هو السبب فى كل اللى بيحصل ده وبسبب البلاوى اللى خدها .

شاهندا وأيه ضحكوا أوى وشاهندا ردت وقالت : انا مش عارفه ولا مصدقه لحد اللحظه دى ان عمر يعمل فى نفسه كده ، مجنون طول عمره بس متخيلتش انها توصل معاه للمنظر ده واللى عمله .

ليل : اضحكى يا شوشو اضحكى الله يسامحك يا عمر يا ابن خالتى كنا زمانها فى شهر العسل و ………..

أيه بضحك ردت وقالت: سكتى يعنى ما تكملى يا لولو .

و………….. ايه؟

ليل اتكسفت جدا وحاولت تتوه الكلام وبصتلهم هما الاتنين وقالت : انتم ناسين حاجه مهمه جدا على فكرة والظاهر من كتر اللى بيحصل معانا نسينا كلنا الموضوع .

شاهندا باستغراب ردت وقالت : اللى حصل معانا ده ينسينا كل حاجه فى الدنيا، بس بجد نسينا أيه يا بنتى انطقى!؟

ليل ردت وقالت: نسينا السفر يا هانم انتى وهى، وشهر العسل وميعاد الطياره بتاعتنا اللى هاتقوم الصبح بدرى على ايطاليا .

شاهندا بصدمه ردت وقالت ????: اه صح انا من كتر اللى حصل نسيت خالص حكايه السفر دى، طيب والعمل أيه؟ إحنا أصلا مش عارفين اى شىء عن حسام وعن زين حتى عمر راح لهم اهو ويا عالم هايرجعوا أمتى بالضبط .

أيه ردت وقالت : لا انا منستش وفاكرة بس مش بأيدى أى شىء اعمله غير الانتظار والأفضل انكم كمان تعملوا زيى بالضبط لان فعلا مش عارفين الساعات الجايه دى لسه مخبيه لينا ايه؟

وفضلوا يتكلموا كتير ويرغوا لحد ما تعبوا من كتر الكلام وطلعوا على فوق .

فادخلوا أيه تنام فى اوضه لوحدها لحد ما حسام يرجع، وشاهندا راحت على اوضه عمر، وليل دخلت اوضه زين .

____________________

شاهى كانت دخلت عند باباها فى الرعايه واول لما دخلت انصدمت لما شافت كميه الخراطيم اللى متوصله بيه واجهزة التنفس ،

فقربت بشويش وبكل هدوء منه

وبكل حزن قالت: سامحنى يا بابا ارجوك .. سامحنى يا حبيبى كان غصب عنى .

ياريت تشد حيلك وتقوم بالسلامه وتخف انا محتجالك اوى اوووى يا بابا .. محتاجه انك تعوضنى عن السنين الطويله اللى اتحرمت منك فيها .. محتاجه حبك وحنيتك وحنانك اللى مفتقداهم .. محتاجه اهتمامك وخوفك عليا .. محتاجه لمه ودفء العيله ارجوك يا بابا .

وفجأه حست بأيد بتهون عليها ولفت نفسها وشافت الدكتور معتز اودامها، فامد أيده ليها وخدها وخرجها بكل هدوء من الرعايه .

معتز : ادعيله يا انسه شاهى، ادعيله أنه يقوم بالسلامه وبدل الحزن والعياط اللى انا شايفه ده .. هو محتاج الدعاء منك ، روحى أتوضى وصلى وادعى ربنا كتير وبإذن الله ربنا هايقبل دعائك ويقوم بالسلامه .

شاهى ابتسمت بحزن ومسحت دموعها وقالت : يارب ياااااارب

وانا متشكرة جدا لحضرتك انا فعلا هاروح اتوضى وأصلى وأدعى لبابا .

معتز ابتسم وقال : طيب اتفضلى معايا اوريكى مكان المسجد المخصص للسيدات .

شاهى مشيت معاه فعلا وراحت علشان تصلى وتدعى لباباها .

عمر كان وصل المستشفى واول لما دخل سأل عن دكتور حسام وبلغوه انه قاعد فى الكافيتريا .

عمر باستغراب بينه وبين نفسه قال : كافيتريا!! طب ازاى؟

العيال دى بتعمل أيه هنا بالضبط ؟ لا يكونوا هربانين من البنات وانا معرفش ؟!

وراح على الكافيتريا واول لما دخل شاف زين اخوه وحسام ومعاهم كمان يوسف قاعدين وبيتكلموا فقرب منهم وقال : بتعملوا ايه هنا من غيرى يا خونه ؟

الكل بأستغراب اتفاجأه بعمر وزين بصله وقال : اهلااا يا بيه اخيرا انت شرفت .

عمر رد وقال : اه شرفت يا اخويا، استنى انت دلوقتى وبص ليوسف وقال : الف سلامه على استاذ عاصى يا يوسف خير ماله طمنى كلنا قلقانين عليه والله .

و………….