رواية زين الجزء الثانى الفصل الرابع 4 بقلم سحر فرج

عمر كان وصل المستشفى واول لما دخل سأل عن دكتور حسام وبلغوه انه قاعد فى الكافيتريا .

عمر باستغراب بينه وبين نفسه قال : كافيتريا!! طب ازاى؟

العيال دى بتعمل أيه هنا بالضبط ؟ لا يكونوا هربانين من البنات وانا معرفش ؟!

وراح على الكافيتريا واول لما دخل شاف زين اخوه وحسام ومعاهم كمان يوسف قاعدين وبيتكلموا فقرب منهم وقال : بتعملوا ايه هنا من غيرى يا خونه ؟

الكل بأستغراب اتفاجأه بعمر وزين بصله وقال : اهلااا يا بيه اخيرا انت شرفت .

عمر رد وقال : اه شرفت يا اخويا، استنى انت دلوقتى وبص ليوسف وقال : الف سلامه على استاذ عاصى يا يوسف خير ماله طمنى كلنا قلقانين عليه والله .

و………….

يوسف : الحمد لله يا عمر اطمن وربنا يسترها، وليه تعبت نفسك بس وجيت يا ابنى!؟

عمر رد وقال : ربنا يطمن قلبك عليه يارب، وبعدين تعب ايه بس اللى بتقول عليه ده احنا اخوات يا يوسف وانت ياما وقفت جمبنا فى حاجات كتير يا باشا، ولا نسيت .

يوسف رد وقال : متقولش كده يا عمر وزى ما أنت بتقول إحنا أخوات وجميلكم ووقفتكم دى عمرى ما هاقدر أنساها أبدا .

فضلوا الشباب يتكلموا شويه وبعدها حسام ويوسف قاموا وقفوا علشان يروحوا يطمنوا على عاصى وعلى شاهى كمان اللى كانوا سايبنها لوحدها فى أوضه المكتب بتاعه حسام .

وقام زين وعمر كمان وفعلا الكل خدوا بعضهم وراحوا على مكتب حسام واول ما دخلوا اتفاجؤا ان شاهى مش موجوه فى المكتب.

يوسف بصلهم وقال : اكيد راحت لباباها عند الرعايه المركزة انا هاروح اشوفها هناك .

حسام رد وقال: استنى يا ابنى انا كمان جاى معاك وأنت يا زين خد عمر وارجعوا على الفيلا زمان طنط والبنات قلقانين عليكم، روحوا وطمنوهم وأنا شويه كده لما اطمن ان الحاله استقرت الحمد لله هاجى بعدكم على طول .

زين بصله وقال: لا يا حسام انا هافضل مع يوسف شويه لحد ما نطمن كلنا مع بعض ونرجع على.الفيلا ، مش معقول أمشى من غير ما أطمن أنا كمان على استاذ عاصى .

حسام اتنهد وقال: اللى تشوفوه يا زين يالا بينا نروح على الرعايه ونطمن كمان على شاهى ونشوفها هى فين ؟

______________________

وعند الاسطى حسن فى البيت الكل كان قاعد قلقان على عمر واللى جراله وعاوزين يتصلوا ويطمنوا عليه .

ام أيه بصت للاسطى حسن وقالت : ما تيجى يا حاج نتصل ببنتك أيه أو سميحه هانم بنفسها ونطمن على عمر ونشوف اخباره إيه دلوقتى .

الاسطى حسن بصلها باستغراب وقال : الوقت اتأخر يا أم أيه والصباح رباح لما يطلع النهار نبقى نتصل ونطمن او اقولك ناخد بعضنا كلنا من بدرى ونروح ونطمن بنفسنا ونعمل الواجب .

أم أيه ردت وقالت : ياريت والله يا حاج اهو نعمل الاصول والواجب وبالمرة نشوف أيه ونطمن عليها قبل ما تسافر تقضى شهر العسل .

جت عبير على صوتهم وهما بيتكلموا وفرحت وقالت : ياريت والنبى يا بابا دى أيه أختى وحشتنى أوى وعاوزة اطمن عليها واشوفها قبل ما تسافر.

الاسطى حسن بحزن قال : ومين سمعك بس يا عبير دى وحشتنى أوى أوى .. وبقولكم ايه اعملوا حسابكم اول لما يطلع النهار هانروح لهم ونطمن عليهم بنفسنا .

عبير بفرحه بصت لباباها وقالت : يعيش بابا يعيش بابا .. انا هاروح اكلمها واتس ولو ردت عليا هاقولها اننا جايين لهم الصبح ، واشوفها.

اه صح???? هى عند حسام فى بيت مامته ولا عند ليل فى الفيلا .

ام ايه : بتهيئلى عند ليل فى الفيلا.

وفعلا دخلت عبير اوضتها على طول وسابت مامتها وباباها قاعدين لوحدهم بيتكلموا .

الاسطى حسن بص لام ايه وقال : عقبال لما نفرح بيكى انتى كمان يا عبير يا بنتى .

أم أيه : يارب يا حاج يارب

وربنا يديك الصحه وطوله العمر لحد ما تشوف احفادك بأذن الله .

_________________________

وفى المستشفى الشباب كانوا اطمنوا على عاصى فى الرعايه، بعد ما حسام بلغهم ان الحاله مستقره ااحمد لله، وطلب من يوسف أنه ياخد شاهى ويرجع على البيت لأن وقفتهم دى ملهاش أى لازمه وبالمرة يستريحوا شويه ولو فى اى حاجه هايتصل عليه على طول.

وفعلا يوسف خد شاهى بعد ما شكر الشباب على وقفتهم معاه طول اليوم وركب عربيته ورجع على الفيلا .

وحسام وزين وعمر كل واحد فيهم ركب عربيته ورجعوا كلهم على الفيلا عند البنات .

وأول لما وصلوا الفيلا وركنوا عربياتهم حسام استأذن من زين انه هاينتظر بره فى العربيه لان الوقت اتأخر عقبال لما هو ينده لأيه مراته من جوا علشان يروح يبات عند والدته .

زين ضحك وقال : يا أبنى أنت!!

تستنى برة أيه بس وبتاع أيه ، هتاخد مراتك فى وقت زى ده وتروحوا فين بس وتخض الست الوالدة .. تعال أدخل معانا ونسهر كلنا مع بعض احنا والبنات وبعدين من بدرى نرجع على الفندق كلنا نشوف موضوع السفر و شهر العسل اللى مكملش ده .

عمر بهزار بصلهم وقال: ادخل ادخل يا حسام ده البنات مستحلفه ليك انت وزين باشا على تأخيركم كل ده عليهم ربنا معاكم .

زين برخامه رد وقال : طيب ادخل يا ظريف اودمنا ما أنت السبب فى كل اللى بيحصل معانا ده من الول ولا نسيت حضرتك.. كان زمانا فى الفندق معاهم

وووو…….

عمر بهزار بصله وهو بيضحك وقال : وأيه وأيه قول يا كبير قوووول يا وحش ههههههه ????

زين زغده فى كتفه وقال بغيظ : لم نفسك يا عمر وأدخل اودامى بدل ما المك بمعرفتى يا أبوا لسان طويل أنت، لما أشوف آخرتها معاك ايه؟!

فضلوا يضحكوا كتير هما التلاته

ودخلوا الشباب التلاته على جوا والفيلا كانت هاديه جداً جداً والظاهر الكل كان نايم حتى البنات نفسها .

زين بأستغراب بصلهم وقال : معقول كلهم ناموا من غير ما ينتظرونا ويطمنوا على عاصى ولا حتى علينا؟! انا مش مطمن ربنا يستر .

حسام رد وقال : أنت هاتقلقنى ليه بس يا زين أكيد تعبوا من كتر الانتظار وناموا من اليوم الطويل اللى هما مروا بيه مش اكتر .

عمر رد وقال : أنا ماليش دعوة أنا كنت مع مراتى طول الوقت “وظبطها” كمان ومش هاتعملى حوار زى مراتتكم .

زين بنرفزة ضربه فى صدره وقال : ما قولت لم لسانك اللى عاوز القطع ده يا بهيم أنت ، أيه “ظبطها” دى ، أنت كنت مع واحده من الشارع يا حمار أنت ولا إيه????

عمر بحزن رد وقال : انت بتضربنى ليه يا عم أنت مكنتش كلمه وقولتها وانا بهزر .

حسام بضحك بص لعمر وقال : يخرب بيت عقلك يا عمر الصراحه و تستاهل أكتر من كده .. أيه “ظبطها” دى مش عيب تقول كده يا متخلف انت على مراتك .

زين بنرفزة بص لحسام وقال: أنا غلبت معاه والله يا حسام ومش عارف هايعقل أمتى الواد ده بس ؟

المهم تعالوا نطلع على فوق ونشوف البنات فين بالضبط، اكيد سهروا مع بعض لحد ما ناموا .

وفعلا طلع الشباب على فوق والدنيا كانت هُس هُس وهاديه جدا .

لحد ما فجأه خرجت سماح من اوضتها وأتفاجات بيهم هما التلاته اودمها ، وابتسمت أول لما شافتهم وقالت : أهلا يا عرسان أخيرا وصلتوا ، ده إحنا قلقنا عليكم جدا ومحدش فيكم كان بيرد علينا خالص وفى الاخر البنات زهقت ودخلت تنام من كتر التعب اللى شافوه طول اليوم .

زين رد على خالته وقال : معلش يا خالتوا والله موبايلى فصل شحن وحسام كذلك اعذرونا وعمر يا دوبك جالنا فى الاخر واتاريه نسى موبيله هو كمان هنا ومن كتر استعجاله.

سماح ردت وقالت : حصل خير المهم انزل اجهزلكم لقمه تكلوها زمانكم جعانين .

حسام رد وقال: متتعبش نفسك يا سماح هانم إحنا أكلنا لقمه خفيفه وأحنا فى المستشفى وأنا اصلا متعود أنام خفيف .

زين : وانا كمان يا موحه مش هاقدر اتفضلى حضرتك كملى نومك وأحنا كمان هاندخل وننام .

سماح بصت لهم هما التلاته وقالت : طيب بصوا بقى وركزوا معايا

شاهندا نايمه فى اوضتك يا عمر .

وليل فى أوضتك يا زين .. وأيه مراتك يا حسام نايمه فى أوضه الضيوف اللى هناك دى .

وبعدها قالت : تمام .. تصبحوا على خير بقى ولو عزتوا اى شىء أنا نومى خفيف بلغونى على طول .. سلام يا عرسان وربنا يسعدكم .

وفعلا دخلت سماح على اوضتها وقفلت الباب وكل واحد فيهم راح على اوضته اللى قالت عليها سماح حتى حسام ، ودخلوا وقفلوا الباب وراهم على طول .

وخلال ثانيه واحده بس خرجوا التلاته من أوضهم فجأه وهما مصدومين ????

وكلهم فى نفس واحد : مراتى مش موجوده فى الاوضه .

كلهم بصوا لبعض وبكل استغراب زين

قال : حتى انت وهو!! طيب يا ترى راحوا فين فى وقت زى ده؟ وبعدين إحنا لسه طالعين من تحت ومش موجودين حتى فى الجنينه .

عمر بصدمه رد وقال: مراتى اتخطفت ولا ايه يا جدعان نهار اسوح ????

حسام باستغراب رد وقال: هايكونوا راحوا فين بس من غير ما يبلغونا او يبلغوا طنط سميحه او حتى طنط سماح ؟!

زين بكل استغراب رد وقال : مش عارف ومش قادر افكر دماغى وقفت ، تعالوا ننزل ندور تحت جايز كانوا فى المطبخ واحنا محسناش بيهم او جايز يكونوا فى الجنينه واحنا ماشفنهمش .

وفعلا نزل الشباب التلاته بمنتهى السرعه على تحت وكل واحد فيهم دخل مكان مختلف يدور فيه حتى المطبخ واوضه المكتب وللاسف ملقوش حد منهم خالص .

عمر بصلهم وقال: مش بقولكم اتخطفوا .

زين بعصبيه بصله وقرب منه وقال : اقسم بالله يا عمر لو ما بطلت الهبل اللى بتقوله ده لا هاتشوف شغلك معايا مم هنا ورايح .

حسام بصلهم وقال : طب والحل هانعمل ايه دلوقتى يا زين ؟

وفجأه جت فكرة فى دماغ زين وقال : تعالوا ورايا انا عارف ممكن يكونوا راحوا فين .

عمر بصله بغيظ وقال : يادى النيله السودا .. هايكونوا فين يعنى يا زين ما تنطق وتقول على طول.

زين لسه هايقرب من عمر بكل غيظ ويضربه حسام لحقه وقال : سيبك منه الواد ده ويالا بينا نشوف هما راحوا فين يا زين .

وفعلا خرج زين ومعاه حسام بمنتهى السرعه وعمر جرى وراهم وقال خدونى معاكم ، عاوز اشوف مراتى .

خرجوا على الجنينه وراحوا ناحيه البسين من ورا عند اوضه الضيوف اللى “ليل” كانت قعدت فيها زمان اول لما وصلت الفيلا .

واول لما وصلوا هناك الدنيا كانت ضلمه جدا جداااا وحسام بص لزين بكل استغراب وقال : أيه بس اللى هايجيب البنات هنا يا زين فى الضلمه دى لوحدهم ؟!

الدنيا ضلمه جدا زى ما انت شايف ومفيش اى اضاءه حتى توحى انهم قاعدين جوا .

عمر لسه هاينطق ويقول رأيه هو كمان ، زين بصله بكل غيظ ومن خوفه ???? سكت خالص.

زين بص لحسام وقال: اصبروا بس انا حاسس انهم هنا ان شاء الله .. اصل هايكوا راحوا فين بس .

زين قرب من الباب وخبط خبطه صغيرة جايز حد يفتحله .

عمر قرب ووقف جنبه وبمنتهى السرعه خبط على الباب بكل شده وقال : شاهندا شاهندااااا انا جيت يا حبيبتى انتى جوا صح؟

زين بكل عصبيه بصله وقال : تصدق انت انسان غبى ، يا متخلف انت ايه اللى بتعمله ده بس افرض هما نايمين دلوقتى تقوم تخضهم بالمنظر ده يا حمار انت .

عمر بصله وقال: حمار حمار انا عاوز مراتى ماليش فيه .. افتحى يا شوشوووو انا هنا يا حبيبتى وخلاص حبيبك عمر جه.

اتارى البنات فعلا قاعدين جوا وسامعين كل كلامهم وميتين من كتر الضحك على هبل عمر وخفه دمه وعمالين يضحكوا عليه وعاوزين يشوفوا هما فعلا قلقوا عليهم ولا لا لما وصلوا الفيلا ومالقهمش فى اوضهم .

باااااك ….

البنات كانت سهرانه فى الجنينه بعد ما حاولوا انهم يروحوا اوضهم ويناموا ومجلهمش نوم للاسف من كتر القلق ، وفى الاخر قرروا انهم ينزلوا هما التلاته ويسهروا تحت عقبال لما الشباب يوصلوا من المستشفى .

واول لما سمعوا صوت كلاكس العربيات بتاعتهم ليل بكل حماس قالت : قوموا بسرعه معايا الظاهر الشباب وصلوا .

شاهندا : هانقوم معاكى فين بس ؟!

أيه : أه صح هانروح فين يا ليل ؟

ليل : يا بنتى تعالى معايا منك ليها لازم ندوخهم علينا شويه مش كفايه سابونا كلهم وراحوا على المستشفى من غير حتى تليفون واحد منهم يطمنا.

أيه بغيظ : عندك حق يا ليل فعلا يالا بينا .

وفعلا ليل خدتهم بسرعه من غير ما الشباب تشوفهم علشان لفوا من الجنينه من ورا وراحوا على اوضه الضيوف اللى فى الجنينه عند البسين .

ودخلوا ونوروا نور بسيط جدا جدااا وقعدوا ينتظروا ويشوفوا هل فعلا الشباب هايقدروا يوصلوا ليهم ولا لا .

لحد ما فعلا بعد شويه وصل الشباب عندهم زى ما ليل كانت متوقعه من زين وخبطوا على الباب .

شاهندا بصوت واطى جدا : افتحى بقى يا ليل الباب اهو جم اهم وكانوا بيدوروا علينا لحد ما جولنا لحد هنا.

ليل بصت لها وقالت : لا مش هافتح خليهم يتجننوا شويه مش كفايه القلق والتوتر اللى عيشونا فيه طول النهار .

أيه ردت وقالت : الصراحه عندك حق يا ليل انا كمان زعلانه من حسام ده حتى مجاش فى باله خالص انه يتصل عليا ويطمنى عليه .

شاهندا بتوتر ردت وقالت : اوووف عليكى انتى وهى انا هاروح افتح .

زين من بره بص لحسام وعمر وقال : استنوا كده انت وهو انا سامع صوت همس جاى جوا .

عمر بصله وقال : يا شوشو ياااا شوشوووووو افتحى يا حبيبتى انا هنااااااا .

زين حس انه غلط فى حق ليل اوى فقرب من باب الاوضه وبصوت كله ندم

قال : ليل حبيبتى انا عارف انك جوه وعارف انك زعلانه منى ، بس غصب عنى والله ، كان لازم اروح ليوسف وأطمن على اخوه عاصى واقف جنبه فى ظرف زى كده .. متعودتش حد يقف جنبى فى شدتى واسيبه لوحده فى شدته ، سامحينى يا حبيبتى واوعدك انى مش هاسيبك لوحدك تانى ابدا من هنا ورايح بس ارجوكى افتحى وطمنينى عليكم.

ليل فرحت جدا من جواها ان زين حس باللى عمله معاها فقررت تسامحه ، وقامت وقفت وقربت من الباب ولسه هاتفتح

أيه شدتها وقالت بصوت واطى جدا : يا سلام يا أختى أنتى وهى ، زين واعتذر ليكى وحس بغلطه وعمر وهايتجنن على شوشو وانا اضرب دماغى فى الحيطه يعنى بقى ولا ايه????

البنات ضحكت اوى بشويش فاليل قالت : فى دى عندك حق يا صاحبتى ويادوبك هاتكمل كلامها سمعوا صوت حسام وهو بيقول : أيه روح قلبى ، انا عارف انك سمعانى وعاوز اقولك ان اللى حصل غصب عنى والله ، انتى عارفه طبيعه شغلى ومقدرش اشوف حد مريض وبين الحياه والموت ومحتاج ليا واديله ضهرى، فارجوكى تعذرينى وتسامحينى يا قلبى .

أيه اخيرا هديت هى كمان وفرحت باللى سمعته وسامحت حسام على طول لانها فعلا عارفه كويس اوى ظروف شغله ومقدراها وفخورة كمان بيه وبكل اللى بيعمله.

وفجأه باب الاوضه اتفتح وخرجوا التلت بنات وهما مبتسمين وكل شاب من الشباب قرب من حبيبته بكل فرحه وخدها بين ايديه ومن غير ولا كلمه طلعوا على اوضهم بكل رومانسيه .

وكل احد فيهم خد مراته على اوضته وقفلوا الباب وراهم.

واخيرا اتقفل على كل عريس وعروسته باب اوضه واحد بعد يوم طوييييل من القلق والخوف والتوتر .

وقضوا اليل مع بعض وعوضوا فيه كل اللى هما فقدوه من الحب والشوق والدلع والرومانسيه.

____________________

وبعد كام ساعه طلع النهار والساعه بقت سبعه الصبح والاسطى حسن كان لبس وفطر كمان ونزل على تحت بعد ما جهز نفسه وجهز عربيته وكان قاعد فيها فى انتظار أم أيه وعبير ينزلوا من فوق علشان يسافروا على القاهرة ويروحوا ويطمنوا على بنتهم أيه وعلى عمر كمان .

أم أيه نزلت هى وعبير وكانوا شايلين حاجات كتير جدا جدا علشان يدخلوا بيها على سميحه هانم .

لحوم وبط وحمام وفاكهه وشيكولاته وحلويات وفطير مشلتت صحيت من بدرى وعجنته وخبزته هى وعبير مع بعضهم .. وحاجات كتير جدا جدا تانى من خيرات الريف المصرى .

الاسطى حسن اول لما شاف الشنط دى كلها فى أيديهم اول لما نزلوا بصلهم بكل استغراب وقال : ما شاء الله طول عمرك كريمه وصاحبه واجب يا أم أيه .. بس لحقتى جهزتى كل الحاجات دى إمتى ؟

أم أيه ردت وقالت : كله من خيرك يا حاج حسن ربنا يخليك لينا وميحرمناش منك ابدا .. وبعدين انا صحيت من بدرى وانت نايم وعملت شويه فطير مشلتت للعرسان .

عبير : يا سلام يا ست ماما ما انا عملته معاكى انا كمان وساعدتك فيه .

أم أيه ردت وقالت : متزعليش يا عبير معلش مقصدش والله .. اصلى مش متعوده انك تقفى معايا وتساعدينى فى الاكل كده .

عبير بصت لها وقالت: لا اتعودى يا ماما من هنا ورايح هاقف جمبك يا قمر واساعدك فى كل شىء .

الاسطى حسن بفرحه بصلهم وقال: ربنا يهديكى يا عبير يا بنتى ويفرحنى بيكى قريب انتى كمان واشوفك احلى واجمل عروسه يا ستى .. ممكن تركبوا بقى علشان نتوكل على الله ونوصل بالسلامه قبل ما الجو يحرر علينا فى الطريق .

وفعلا ركبت عبير وامها العربيه بعد ما حطوا الشنط كلها والاسطى حسن طلع بالعربيه على القاهرة على طول .

وخلال ساعتين كانوا وصلوا اودام باب الفيلا وركنوا العربيه اودام فيلا زين.

و……………