قصة أحببتك رغماً عني الجزء الأول 1 بقلم منى عبدالغني

بارك الله لكما وبارك عليكما وجمع بينكما في خير.

_كنت نايمه على السرير وعماله بعيط ولما سمعت الجمله دي فضلت اعيط اكتر انا دلوقتي هبقي مرات واحد انا معرفهوش ومعرفش اسموا ولا حتى شفتوا قبل كدا ابويا بعني ليه بس عشان كنت حمل عليه بعد ما امي ماتت قولتلوا كتير اني هنزل اشتغل وهصرف على نفسي بس ميجوزنيش دلوقتي انا لسه متمتش العشرين حتى ومهتمش بكلامي وبردوا عمل اللي في دماغوا…

انا مريم عندي 18 سنه ولسه في أولى جامعه كليه تربيه فنيه و بعد ما امي ماتت قعدت من الجامعه بسبب ان بابا حالتوا النفسيه والصحيه اتدهورت ومقدرش ينزل يشتغل ويجيب فلوس وبعديها بشهر لقيتوا بيقولي ان في عريس متقدملي ولازم اتجوزوا ومدنيش فرصه اعبر عن رأيي حتى

=يلا يا مريم عشان تمشي مع جوزك

_جوزي الكلمه غريبه ولسه مش مستوعباها امشي مع مين دا بيتي ومش عايزه اروح في حته ومش عايزه اسيبوا. ؛ بابا انا مش هروح في حته.

=بقولك قومي يا مريم البسي عشان تمشي

_…….؛ كانت نبره صوته معناها انوا هيتعصب وبابا لما بيتعصب بترعب منوا ومش بحب ابداً عصبيتوا عشان كدا فكتني من العناد وقومت البس

لبست اي حاجه وخرجت كان واقف شاب كويس مش وحش ومش حلو ومش فارق معايا اي حاجه تخصوا

=يلا سلام يا مريم 

_محضنيش حتى محاولش يودعني غير بكلمه سلام مش مصدقه ان ابويا يعمل كدا فيا!! مردتش عليه ومشيت ونزلت

*ازيك يا مريم

_….. 

*انا مراد واللي بقيت جوزك دلوقتي

_……

*مش عايزه تكلميني يعني! 

_…. 

*تمام خلاص انا هسكت احسن 

_كنا في الطريق وكان بيكلمني ومكنتش قادره ارد ومعنديش نفس ارد عليه حاسه اني قرفانه من نفسي ومن حياتي ومش طايقه حاجه فيها ومش طيقاه هو كمان فضلت بفكر واعيط من غير صوت لحد ما روحت في النوم 

*مريم  مريم اصحى وصلنا 

_ايون حاضر ،  صحيت كنا واقفين قدام عماره من 4 أدوار. 

*يلا نطلع احنا الدور التاني متقلقيش مش هتعبك من السلم يعني 

_طيب 

طلعنا ودخلت الشقه كانت كويسه وحجمها متوسط والوانها حلوه وشكلوا كدا بيعرف يختار حلو. 

_انهي اوضتي! 

*اوضتك!  اه قصدك الاوضه بتاعتنا شاور على اكبر اوضه في الشقه تقريبا ؛ هي دي 

_تمام اوضه الأطفال فين بقى 

*اللي هناك دي 

_تمام شكرا 

*استنى انتي رايحه فين اوضتنا اهي رايحه اوضه الأطفال ليه 

_بص بقى انا واحده عندها 18 سنه ومتجوزه غصب عني ومعرفكش اصلا ومش عايزه اعرفك فا ملكش دعوه بيا ولو قربت عليا هزعلك تمام! 

*……، ايه الراديو اللي فتح دا في ايه؟ 

دخلت ورزعت باب الاوضه وقفلت عليا بالمفتاح وقعدت اعيط لغايه ما حسيت انوا نام فا خرجت اتوضيت ودخلت اصلي وادعي واعيط لربنا خلصت وكنت عايزه اغير هدومي ومش عارفه هما حطوها فين لأنهم كانوا وخدنها مني من امبارح ، دخلت الاوضه اللي نايم فيها لقيتها عندوا خدتها وكنت طالعه.. 

*انتي بتعملي ايه 

_ها  لا دا انا كنت باخد هدومي بس 

*ماشي خلصي واقفلي الباب والنور وانتي طالعه 

_حاضر، خرجت بعدين استوعبت اني كنت قالعه الطرحه يعني يالهوي انا كنت بشعري قدامه وهو شافني  

يالهوي عليا غبيه ، دخلت غيرت ونمت. 

*مريم يا مريم اصحى 

_صحيت على خبط الباب وسامعه حد بينده عليا بعدين استوعبت انا فين واني خلاص اتجوزت نزلت من عيني دمعه مسحتها على طول وقومت ، ايوه نعم 

*البسي حاجه واخرجي عشان أهلنا برا

_طيب، أهلنا هه ويجي ليه هو مش بعني ليه خلاص جاي يشوف ايه بعد ما رمي بنتوا لواحد غريب 

_خرجت وقعدت جمبوا وفضلت ساكته وحتى مش بضحك ولا برد على اي حاجه بيقولوها

*ايه يا مريم مش ناويه تعملي حاجه يشربوها 

_طيب، قومت دخلت المطبخ وانا مش عارفه مكان اي حاجه فيه وخدت اي عصير وخرجتلهم 

=طب يلا احنا نمشي ونسيبهم بقى 

_ليه يا عمي ما انت قاعد خليكوا وافطروا معانا انت وبابا وماما 

=لا يا ابني مره تانيه ان شاء الله 

+هنسيبكوا تفرحوا ببعض شويه بقى انتوا لسه عرسان جداد وان شاء الله هنيجي تاني يا حبيبي  يلا سلام يا حبيبتي

_لقيتها خضتني وقعدت تطبط عليا شويه بعد كدا سابتني ومشيت حسيت وهي حضناني اني عايزه اعيط انا لسه مش مستوعبه اللي انا فيه انا لسه صغيره وكنت عايزه اعيش حياتي انا كمان لسه خارجه من صدمه موت امي فا ليه يعملوا كدا ، حسيت فيها بدفي الام وكنت نفسي اعيط في حضنها بس مسكت نفسي عشان خلاص مفيش حل انا اتجوزت والحكايه خلصت خلاص…. 

*مش هتاكلي حاجه 

_لا شكرا 

*مريم علي فكره انا مش هئذيكي ولا متجوزك اشغلك خدامه عندي 

_طب ليه اتجوزتني ليه؟ 

*مش هقدر اقولك دلوقتي بس اوعدك اني هكون كويس معاكي 

_تمام

*هتفضلي طول اليوم قاعده في الاوضه يعني 

_نعم 

*تعالي برا شويه نقعد مع بعض 

_لا شكرا 

*خلينا نتصاحب على الاقل ومتعاملنيش كازوج ليكي لو مش عايزه 

_مش عايزه صحاب انا عايزه اقعد لوحدي 

*تمام يا مريم براحتك وعموما لو عوزتي حاجه انا برا. 

_فضلنا كدا شهر انا دايما قاعده لوحدي وهو بينزل يقابل صحابوا ويرجع متأخر عشان ميحسش بزهق وهو قاعد لوحدوا ولما كان بيحاول يتعامل معايا كنت بصدوا وبخليه يندم انوا كلمني أو انوا فكر يتجوزني اصلا وانا نفسي فعلا يندم يمكن يبعد عني ويطلقني وهيبقي احسن. 

*كدا الشهر اللي كنت واخدوا اجازه خلص والمفروض اني من بكرا هنزل الشغل وانا وهي متكلمناش ولا مره  مع بعض ومش بتديني فرصه اصاحبها حتى ودايما مبينه انها قويه انا مش حابب اشوفها كدا ومش عارف اعملها ايه!.. 

*مريم انا نازل الشغل 

_…. 

*سلام 

_كنت صحيت وسمعاه بس مش عايزه ارد عليه ومش متقبله الفكره بصراحه ومش عايزه اتعامل معاه ؛ استغليت فرصه انوا نزل ولبست ونزلت اتمشى شويه بدل ما انا محبوسه بقالي شهر وهو بصراحه كان بيقترح عليا ننزل مع بعض بس مكنتش بوافق. 

فضلت ماشيه في الشوارع ومكنتش حافظه الأماكن بس مكنش فارق معايا غير اني عايزه ابقى لوحدي وبس

_كان الوقت اتأخر والساعه بقت 7 والدنيا بقت ليل ثانيه الساعه 8 يعني انا كدا بقالي 7ساعات في الشارع يالهوي كنت ماشيه وبفكر وكمان دخلت مكتبه وقعدت اقرأ ومحستش بالوقت دا زمان مراد رجع اكيد ولو ملقنيش ممكن يكلم بابا ؛ 

كنت بحاول اشوف انا فين وبحاول افتكر انا كنت جيت ازاي المكان دا ومش عارفه ومش فاكره والدنيا ليلت والساعه 9 وانا كل دا مش عارفه امشي ازاي ومش عارفه اعمل ايه كنت خايفه اوي وحسيت اني لوحدي ومليش حد يخاف عليا

*رجعت من الشغل وكنت داخل بدور عليها 

مريم يا مريم انتي لسه نايمه كل دا ولا ايه ،  دخلت اوضتها ملقتهاش طب هي راحت فين فضلت بدور زي المجنون عليها ومش عارف اتصرف ازاي وعمي لو عرف هيدايق جدا وهيتعب وممكن يندم انوا أمن عليها معايا. 

_كنت ماشيه بعدين سمعت موبايل بيرن وكان صوتوا واطي اوي ومش عارفه الصوت من فين ايه دا ثانيه دا موبايلي بس صوتوا واطي كدا ليه فتحت الشنطه وطلعتوا لقيت اكتر من20 مكالمه من رقم غريب الرقم رن تاني فا رديت 

_الوا 

*الوا يا مريم انتي فين انتي روحتي فين وازاي متقوليش وازي مترجعيش لغايه دلوقتي انتي بتستهبلي قولي انتي فين حالا

_كنت سمعاه بيزعق وفضلت اعيط على اني مش عارفه اروح ومش عارفه انا فين ومش عارفه اعمل ايه وعلى انوا بيزعقلي 

*طب فيه ايه بتعيطي ليه حصلك حاجه 

_…. 

*يا مريم بالله عليكي تردي عليا قوليلي انتي فين حتى 

_مش عارفه مش عارفه انا فين ومش عارفه اروح انا خايفه ومحدش معايا انا زهقت من كل حاجه ومبقتش مستحمله قولت كل الكلام اللي كنت عايزه اقولوا وكنت بزيد في العياط 

*طب معلش ممكن تهدي دلوقتي وقوليلي شايفه ايه جمبك اي حاجه اي يافته او محل قوليلي شايفه ايه بس وانا هجيلك متخافيش

_حاولت اهدي وفضلت ابص حواليا ، ايوه شايفه كافيه اسموا… 

*طب اهدي وخليكي مكانك ومتتحركيش وانا جايلك حالا 

_حاضر 

في أقل من ربع ساعه كان جه فعلا 

*مريم انتي كويسه حصلك حاجه حد عملك حاجه 

_لا انا كويسه 

*طب الحمدلله، مريم متنزليش تاني غير ما تقوليلي انتي عارفه انا قلقت اد ايه وعارفه انا لو كنت قولت لباباكي كان ممكن يعمل ايه بلاش تهور بعد كدا وبدل ما انتي مش عارفه المكان كويس يبقى متنزليش غير معايا  فاهمه! 

_كنت سمعاه وبعيط وخايفه منوا ومن طريقتوا 

*طب انتي بتعيطي ليه دلوقتي 

_عشان بتزعق وانا مش بحب حد يزعقلي 

*خلاص حقك عليا يلا بس اركبي عشان نروح عشان تعبان ومش قادر 

_ركبت معاه وفضلت ساكته لحد ما وصلنا 

*يلا ادخلي استريحي وانا هعمل حاجه نكلها مع بعض 

_حاضر 

بعد 3شهور 

_انت ياض اصحى يلا عشان الشغل 

*ياض انا يتقالي ياض 

_عاجبك ولا مش عجبك 

*عاجبني يسطا وهو انا اقدر برضوا 

_شاطر يلا قوم البس عقبال ما احضرلك الفطار 

*ماشي 

يمكن من بعد الموقف اللي حصل قربنا انا وهو من بعض واقدر اقول اننا بقينا أصحاب واكتشفت انوا شخصيه كويسه وبقيت احب هزاروا وشخصيتوا بس كاصحاب  لكن مش قادره اشوفوا جوزي لسه مش قادره اتخيل حاجه زي كدا. 

*مريم مريم انتي فين تعالي بسرعه اقولك حاجه

_كان راجع من الشغل عمال ينده وكنت باخد شاور فا خوفت يكون حصل حاجه فا حطيت الفوطه عليا وطلعت بسرعه ، ايه في ايه حصل حاجه 

*…. 

_ايه يا مراد مبحلق في ايه 

*مفيش ان انتي مش لابسه حاجه ليه 

_دور وشك يا زباله وبعدين ما انت اللي خضتني وخلتني اخرج بسرعه وانا بستحمي في ايه بقي حصل ايه عشان تنده دا كلوا 

*طب ما تفكك من اللي كنت هقولوا وتعالي نعمل حاجه احسن 

_حاجه ايه 

*تعالي بس هقولهالك في الاوضه جوا 

_اه يا زباله انت عايز حاجه قليله الأدب مش رايحه معاك في حته ومش هسمعك انا هدخل البس ، ودخلت بسرعه الاوضه وقفلت الباب وقلبي كان بيدق جامد ممكن عشان خايفه لا اكيد عشان كنت بجري عادي يعني 

_ها كنت عايز حاجه ولا مش هتقول بردوا 

*لا هقولك تعالي اقعدي ، بصي يا ستي انا روحت الجامعه بتاعتك ودفعتلك المصاريف عشان تروحي تكملي جامعتك ومتبقيش ولا أقل مني ولا من اي حد 

_مراد انت بتهزر صح قول والله ما بهزر انت بجد عملت كدا بجد! 

*اه والله يا بنتي ومن الاسبوع الجاي هتروحي الكليه بتاعتك ان شاء الله 

_شكرا اوي يا مراد بجد شكرا وحضنته

*العفو انتي صحبتي ومراتى وهعملك اي حاجه تفرحك 

_استوعبت اني حضناه فا خرجت من حضنوا بسرعه وقولتلوا اسفه 

*عادي ولا يهمك انا زي جوزك بردوا 

_بس رخامه بقى 

*ضحك، حاضر 

كنت بدأت اروح الجامعه تاني وكان مراد بيوصلني دايما وبيجي ياخدني ونروح سوا وكنت فرحانه اوي وحسيت اني رجعت طالبه جامعيه واخيرا بعيش سني بس كان لسه حمل اني واحده متجوزه دا كان فوق دماغي ومدايقي لاني كنت دايما نفسي أقع في قصه حب حلوه وبعد كدا اتجوز… 

*خلصي يلا عشان منتاخرش

_حاضر جايه اهو 

*لما تخلصي كلميني وهجيلك ماشي 

_حاضر 

*متتعامليش مع زمايلك الرجاله 

_حاضر 

*ومتهزريش مع….. 

_حاضر يا مراد خلاص والله حفظت مش ههزر مع حد ومش هتعامل مع رجاله ومش هعمل مشاكل مع حد خلاص بقى مش نفس الاسطوانه دي كل يوم 

*خايف عليكي بس مش اكتر 

_متقلقش عليا وراك راجل

*طبعا اومااااال????

_بتتريق وضربتوا على ايدوا 

*يا ستي لا ويلا انزلي وصلنا 

_ماشي سلام 

_ازيك يا منون

:ازيك يا حياتي عامله ايه

_الحمدلله 

:كلمتي محمد صحيح 

_لا و اكلموا ليه 

:معرفش بس هو بيسأل عليكي كل ما يشوفني من ساعت لما كنتي مبتجيش هو مكلمكيش ولا ايه! 

_لا مكلمنيش وفكك منوا ويلا عشان المحاضره هتبدأ 

:اشطا يلا 

_يااه كانت محاضره ممله اوي 

:فعلا دكتور بارد 

_احيه اسكتي 

:في ايه هو انا كذبت في حاجه مهو بارد فعلا وعمال يتعصب علينا وشغال طول المحاضره زعيق ولا اكننا أطفال ابتدائي وبعدين دا يعتبر في سننا اصلا يعني أكبر مننا ب 5سنين بس هو عشان دكتور لازم يكبرها علينا 

_كنت ببصلها وببرق وهي عماله تكمل وولا هنا خالص

: هو انتي مالك ساكته ليه ، متقوليش دكتور بارد ورايا 

_اه 

:احيه بجد ورايا؟ 

_امممم اخرسي بقى هتخلينا نشيل الماده الله يحرقك 

:لفيت ولقيتوا فعلا واقف وباصصلي ومربع ايدوا ، طبعا لو حلفتلك اننا مش بنتكلم عليك انت مش هتصدق صح! 

_دكتور والله دي منه هبله ومخبوطه في دماغها ومش بتعرف هي بتقول ايه وحيات أغلي حاجه عندك ما تشيلنا الماده يا دكتور 

:ايوه فعلا مريم عندها حق

_اسكتي انتي كلامك بيعمل مشاكل 

=ضحكت عليهم  متقلقوش مش هعملكوا حاجه بس ياريت يا انسه منه تيجي المكتب معايا ثانيه 

_سلم على الشهداء اللي معاك 

:يالهوي ليه والله انا غلبانه والله اسفه مش هعمل كدا تاني 

=في ايه لكل دا هقولك حاجه مش هعملك حاجه متقلقيش

_ربنا معاكي يا حبيبتي انا همشي انا بقى 

:اه يا ندله يا بياعه 

_سلام ، كنت عماله اضحك ومش عارفه الدكتور هيعمل فيها ايه دلوقتي ربنا يستر عليها بقى اتصلت بمراد عشان يجي 

_الوا يا مراد انا خلصت 

*ماشي ادخلي اي كافيه جمب الجامعه عشان ممكن اتأخر شويه عشان عندي شويه شغل ومتخافيش مش هتاخر اوي 

_لا عادي براحتك وانا هستناك سلام

*سلام

_دخلت قعدت في الكافيه زي ما قالي وقعدت اقرأ في كتاب وبشرب عصير وشويه وحسيت ان حد بيشد الكرسي اللي جمبي وبيقعد فا افتكرت مراد وصل 

_ايه دا انت جيت مش كن…..  

محمد انت قاعد هنا ليه؟ 

^ازيك يا مريم عامله ايه 

_نعم يا محمد عايز ايه قاعد هنا ليه 

^مفيش لقيتك قاعده لوحدك فا جيت اقعد معاكي ونتكلم شويه 

_لا شكرا مش عايزه اتكلم وممكن تمشي لو سمحت، كنت خايفه اوي مراد يجي ويشوفنا قاعدين مع بعض مراد مش سهل ومش بيعدي الموضوع لو فيه راجل اتعامل معايا حتى لو بيسأل على حاجه مش اكتر. 

^طب ممكن تقوليلي كنتي مختفيه ليه بقالك اكتر من 4 شهور 

_وانت مالك 

^لا انتي عارفه انا مالي كويس يا مريم وياريت تردي عليا انا كل دا بتعامل بهدوء ومش عايز اتعصب عشان مدايقيش مني 

_لا والله انت فاكر نفسك مين يا محمد هو عشان اتكلمنا كام مره مع بعض هتفتكر نفسك مسؤول عني أو حاجه خليك في حالك يا محمد وملكش دعوه بيا عشان متزعلش 

^ودا من امتى يا مريم انا وانتي بنحب بعض و الجامعه كلها عارفه دا كويس 

_لا يا بابا دا الكلام اللي انت قولتوا واللي انت عايز تصدقوا لكن انا مفيش بيني وبينك اي حاجه ولو سمحت قوم امشي حالا 

^مش همشي يا مريم وعلى فكره انا هاجي اطلب ايدك من باباكي وأعتقد انوا هيوافق بمأنوا عايز يخلص منك   من بعد ما مامتك ماتت وبقيتي حمل عليه 

_الجمله وجعتني وفكرتي بكل حاجه وان بابا فعلا عمل كدا وجوزني مراد عشان يرتاح مني ولو كان ساعتها محمد اللي كان أتقدم كان زمانوا هو اللي متجوزني دلوقتي ،

 _لا والله وهو انت فاكر ان بابا هيوافق عليك اصلا ولا انا هوافق دا يبقى بعينك 

^طيب هتشوفي وتعرفي ان كلامي صح سلام يا مريم 

_في داهيه  فضلت قاعده بفكر في كل حاجه ومدايقه وفجأه لقيت مراد داخل ومتعصب