رواية قدري الحلو أنتَ كاملة بقلم نيرة محمد (جميع الفصول)

ماما ابوس ايدك عشان خاطري حاولي تقنعيه …خليه يرحمني ويسيبني في حالي ..انا مستحيل اتجوز الراجل اللي بيقول عليه ده ..انا ممكن اموت فيها 

قال الكلام ده ايمان وهي  بتعيط بانهيار صوت شهقاتها عاليا وبتبص لامها ونظراتها بتستنجد بيها لكن للاسف قابلها الضعف والخزلان 

امها بدموع وضعف ..عشان خاطري انتي وطي صوتك احسن يسمعك ويبهدلك ويبهدلني معاك ..انا مفيش في ايدي حاجه اعملها يابنتي ..انتي عارفه سالم وظلمه يا ايمان ميقدرش عليه غير ربنا …وبعدين مايمكن جوازك من كريم ده ..يبقي عوض ليكي عن اللي شوفتيه منه ..ويعيشك مبسوطه وتحبيه 

ايمان بصتلها بدموع ونطقت بقهر …احبه ..طب ازاي ياماما ده مشوه ..انا اخاف منه ..وبعدين هو انا وحشه عشان جوزك يرميني كده لاي واحد وخلاص ..والله حرام عليكوا اللي بتعملوه فيا ده ..حراااام 

قالت اخر كلامها وحطت ايديها علي وشها وانهارت في العياط بحزن ووجع 

امها حزينه وموجوعه عليها بس مش قادره تعملها حاجه ولاتقف في وش جوزها اللي في يوم كانت شيفاه سند ليها ولبنتها بعد موت ابو ايمان بس اتضح انها اتخدعت فيه واخدت اكبر مقلب في حياتها بجوازها منه بسبب ظلمه وجبروته ليها ولبنتها اللي مبينتهيش 

دخل عليهم فجاه سالم و باين علي وشه القسوه …بص لايمان بضيق وغيظ بسبب عياطها وصوتها العالي 

قرب منها ومسكها من طرحتها فجاه بغل ..بت انتي اخرسي بقا انا سايبك تدلعي من الصبح ..لكن كفايه اوي كده انا اتخنقت منك انتي وامك ..وبص علي امها واتكلم بقرف 

انا مش عارف كان عقلي فين لما اتجوزت امك دي ..لا وكمان جيالي ببنت اصل ناقص بلاوي اصرف عليها 

سكت شويه وهو متابع دموعهم ونظراتهم ليه وكمل بقسوه وحسم ..لكن يكون في علمك …كلمتي انا اللي هتتنفذ ..كريم وهتتجوزيه يعني هتتجوزيه حتي لو غصب عنك ..انا كفايه اتحملت مصاريفك سنتين ..يشيل هو حملك وهمك بقا ..وانا كفايه عليا امك  دي ومصاريفها …ولو علي انه محروق ..فمش من جمالك ياختي ..فاهمه ولا لا انتي 

ايمان بصت لامها لقت انها بتبص لجوزها بخوف وضعف عرفت وقتها انها اضعف من انها تقف قدامه وتراجعه في قراره عشانها 

ملقتش غير انها تتراجاه لاخر مره يمكن يرحم ضعفها ويلين …عشان خاطري ياعم سالم وحياه اغلي حاجه عندك ..متجوزنيش الراجل ده ..وانا والله هشتغل وهصرف علي نفسي ..بس بلاش ترميني كده لحد معرفوش ..وكمان انت نفسك بتقول انه مشوه ..يعني لو بنتك ترضهالي 

كل كلامها ورجاها ليه مهزوش ..هو اخد قرار انه يخلص منها ولازم ينفذه ..حتي لو هي رافضه ده 

بصلها ببرود واتكلم بابتسامه مصطنعه …انتي مش بنتي ..وعلي العموم عشان تكوني عارفه بس ..كريم في طريقه هو والمؤذون لهنا …ياريت تجهزي بسرعه ..عشان هتروحي معاه انهارده ……