اسكريبت جنان رسمي الجزء الأول 1 بقلم سارة أسامه نيل

بالعاميه..

الحلقه الأولى…

_ دا هو شرطي يا ماما علشان أتجوزه، وأنا قولتله الكلام ده والقرار له 

_ردت أمها بمنتهى العصبيه: إنتي اتهبلتي في عقلك يا بت ولا أيه، دا جنان رسمي يا مريم، فوقي قبل ما تندمي.

_ هزت رجليها بعصبيه وقالت: مين قال إن هندم يا ماما، دي صحبتي ومش عايزين نفترق ونفضل طول العمر مع بعض.

_ البت دي نيتها مش صافيه يا مريم، وكفايه طيبتك وهبلك الزياده ده

_ بطلي تقولي عليها كدا يا ماما هديل صديقة الطفوله وعمري، بقالنا ٢٣ سنه مع بعض 

أنا من ساعة ما وعيت على الدنيا وإحنا مع بعض 

_ كان يوم مطلعلوش شمس يوم مع سيبتك مع البت دي لغاية ما كلت راسك.

_ لو سمحتي يا ماما متقوليش كدا، ويلا لو هنخرج نكمل الجهاز.

_ ربنا يهديكي يا مريم يا بنتي قبل ما يفوت الآوان .

= نزلت مريم وامها وفضلوا ماشين في شوارع حاره “النحاسين” علشان يركبوا اي مواصله تخرجهم من الحاره ويروحوا السوق. 

فجأه قطع الطريق عليهم عربيه صغيره..

مريم قلبت عينها ونفخت بضيق..

_ عاجبك إللي بيحصل ده يا حماتي.

_ وإللي بيحصل ده يعجب من يا ابني، مش لاقيه كلام اقوله ألا ربنا يهديها ويزيح الغمه دي عن دماغها.

_ بعدت عينها عنه وقالت: دا إللي عندي يا سي معتز عجباك ماشي مش عاجبك نفض الموضوع ده .

_ بصلها بغضب شديد وقال دون توقع: خلاص يا مريم أنا موافق بس متجيش تندمي وتعيطي بعدين، أنا وامك براءة من قرارك ده … بس صدقيني هتندمي وبكرا تقولي معتز قال ..

_ ضربت الحاجه بدريه على صدرها وقالت: إنت هتوافقها في جنانها ده يا معتز … إنتوا هتحسروني يا ابني 

_ هعملها إللي هي عايزاه يا حماتي وبكرا تيجي ندمانه متقلقيش ..

_ رفعت راسها لفوق بثقه وقالت بجهل تاما وثقه عمياء: أنا واثقه من هديل متخافش مش هندم، أما أتصل بيها أقولها دي هتفرح جدا ..

_ اااه كلميها وقوليها معتز وافق يتجوزنا احنا الأتنين علشان ما نفترقش … الحاره بكره تضحك عليكي .. هما دلوقتي بيقولوا ان عقلك أكيد مش مظبوط ..

_ لو سمحت يا معتز بلاش تريقه ..

_ ضحك باستهزاء: مش تريقه يا عيون معتز دا ثناء على تضحيتك العظيمه وعطائك الامنتهي.. تعرفي يا مريوم بكرا هتطلعي تريند … يلا محدش قدك يا باشا ..

“المرأة التي وضعت زواج زوجها من صديقتها شرطًا لزواجها” 

شوفي الإنسياب والعذوبه …. آآآه والله … مريم الخولي حديث الساعه..

_ معتز !!!!!!

_ يا عيونه لَمعتز..

_ أوووف فصيل..

_ بقى أنا إللي فصيل … طب يلا اركبي.. 

يلا يا حماتي علشان اوصلكم للسوق ..

= بصتله الحاجه بدريه بقله حيله وحزن على حاله أبنتها ليطمأنها بنظراته..

_ متقلقيس يا أمي أنا هنفذلها إللي في دماغها بس هعلمها درس مش هتنساه في حياتها كلها  

_ الحيه هديل كلت دماغ مريم يا معتز والحاره كلها هتضحك علينا وأنا عارفه إنها هتندم بس هتتوجع وهتتصدم فيها … البت دي بقت خطر على مريم يا ابني..

بنتي بقت عامله زي الهبلة وبتصدق أي حاجه تقولها..

_ هتفوق يا حماتي … بس لازم تتعلم الدرس … ولازم الوجع ده ..

_ ربنا يستر وبهديكي يا مريم يا بنت بطني..

************************

_ أيه رأيك يا ماما …. مش قولتلك هتنفذ إللي أنا عايزاه ومن غير ما أقولها كمان ..

_ إنتي بقيتي مسيطره عليها خالص يا بت يا هديل … بس أنا خايفه… الحاره هيقولوا علينا إحنا وحشين وخطفنا الراجل من البت ..

_ لا متقلقيش يا ماما … هما هيقولوا  … بس على مريم مش علينا إحنا 

_ ازاي بقى!!

_ هيقولوا أنها هي هبله ومجنونه … لأن الحاره كلها عارفه إن دا شرط مريم علشان تتجوز معتز … وأنا عيني رافضه بس هي متمسكة …. شوفتي بقى..

_ دماغك سم يا بنت نظيمه..

_ أمال يا نظنظ … هو احنا بنلعب ولا أيه 

بكرا  وأخيرا  هتجوز معتز وكمان أيه على عفش الهبلة مريم من غير ما نكلف نفسنا قرش واحد .. يدوبك هجيب شنطة هدوم معتبره لزوم الحبشتكنات ..

_ بس افرضي معتز مقبلكيش .. إحنا عارفين انه بيحب مريم ..

_ بكرا انسيه مريم واسمها وأقدر استولى على عقله بالغصب زي ما دخلت حياته بالغصب… واخليه يطلق مريم وترجع لأمها بخبيتها 

وبعدين متقلقيش معتز هيكره مريم لواحده… مش هيقبل يكمل حياته مع واحده بطيشها وهبلها ده ولا يقدر يستأمنها على عياله بعد إللي هي عملته … 

وكمان إللي حصل يأكدله أنها واحده بايعها ومش بتحبه وإلا ما كانت قبلت بكدا أبدا وكمان اقترحته …

اصبري عليا دا أنا هقلب حياتها سوااااااد …..

يتبع…..