اسكريبت حكاوي الفارس الجزء الأول 1 بقلم سارة محمد

بشمهندس فارس 

هو : نعم ..

ممكن نقعد فى مكان بعد الشغل ..عاوزاك فى موضوع…

فارس : حاضر يا ساره انتى تؤمرى..

ساره : بشمهندسه ساره لو سمحت يبشمهندس.. 

وبعد الشغل ركبت عربيتها ووقفت قدامه وقالتله اركب…

كان وقتها بيكلم بنت وبيقولها 

سلام ابقى طمنينى عليكى…

ووقف قدام ساره وقالها…

انا هركب عربيتى قوليلى على المكان وهاجى وراكى..

ساره : لاء اركب من فضلك وهبقا ارجعك هنا تاانى يبشمهندس..

فتح العربيه وركب…

وطول الطريق هى ساكته ..

فارس : انتى عارفه ان فضولى دالوقتى هيموتنى…

وعاوز اعرف عوزانى فى ايه؟

وبالذات انتى…عارفه لو كانت اى واحده تاانيه قالتلى عوزانى انا كنت علقتها اسبوع وبعدين قعدت معاها ..

ساره ابتسمت وقالتله : ما انا علشان كدا عوزاك انت بالذات..

وصلوا الكافيه..

ساره : تشرب اى يبشمهندش…

فارس : قهوه..

كلمت الجارسون وقالتله واحد قهوه لو سمحت..

فارس : وانتى مش هتشربى حاجه ؟

هاتلها كابتشينو او قهوه او نسكافيه ولا تاخدى هوت تشوكلت..

بصيتله وقالتله : الكافيه اسمه قهوه بالشوكولاته..

وانا ولا بحب القهوه ولا الشوكولاته ..

هو فى سره دى متوحده دي ولا ايه ؟!

ساره : هندخل فى الموضوع على طول يا بشمهندس ..انا هبله علاقات..فاشله حب..مبقاش عندى ثقه فى نفسى بعد ما اكتشفت ان خطيبى بيحب واحده جارتنا وبيكلمها..مع انى كنت كويسه جدا معاه.. في يوم بعتتلى اسكرينات ل شات بينهم وقالتلى انا بقول انك تسيبيه قبل ما يسيبك..مش ده خطيبك برضو..اصل هو بيحبنى انا..ومش عارف يجيلهالك ازاى..

فارس : ورديتى عليها قولتيلها ايه؟

ساره : رديت عليها قولتلها انه مش خطيبى ورميتله شبكته فى وشه…

فارس : طيب ما انتى جدعه اهوو..

ساره : بس مش عارفه انسااه..

فارس : وانتى عوزانى انسيهولك..

ساره : لااء طبعاً ..انت بتقول ايه .

انا علشان عارفه انك زير نساء جبتك هنااا..

انا اكتشفت انى لازم ادخل علاقه جديده علشان انساه…عاوزه حياتى تبقا مظبوطه مفيهاش عيب اكون اسره واتجوز انسان محترم..

فارس : اه وزير النساء هيفيدك ب ايه ؟

ساره : انا اختى جوزها دكتور ..وصاحبه جاى من امريكا والمفروض انه جاى يكون اسره ويدور على شريكه تبنى معاه الباقى من حياته..

فارس حط ايده على خده وقالها : وبعدين..

ساره : انت الى هتقولى اعمل ايه علشان يشوفنى أنا الشريكه دى..

انا لما خطيبى راح خطب البنت دى ومندمش انه خانى ولا اعتذر حتى..

قررت انى انا الى اخطب…مش استني انى اتخطب..

واخطب احسن حد قدامى…

فااهمنى..

فارس مسك مج القهوه وقالهاا …

طيب والمقابل ايه ؟

ساره : نعم !! 

فارس : انا هرضى مقابل حاجه بسيطه…متخافيش .

ساره : عاوز كام ؟!

فارس : عاوز لما اتأخر متقوليش لصاحب المصنع …ولما اقف مع البنات متروحيش وتقوليله هااا…وتخفى كلام شويه معاه عنى..

ساره : وده طبعاً مكسب كبير ليك يبشمهندس انك ولا هيتخصملك ولا كمان هتتهزق..

او بصراحه صاحب المصنع كبير فى السن ..بضحك.. وانت اكتر واحد بيحب يسمع عنه ويخصمله..

فارس : وانتى اكتر حد هو بيحب يسمع منه…

فارس : خلاص اتفقنا يبشمهندسه…

ومد ايده علشان يسلم…

ساره : معلش …اسفه مبسلمش..

نزل ايده تانى وهو ببحاول يدارى احراجه بأبتسامه وقالها المهم اننا اتفقنا..

انا هقولك تدوبيه ازاى ..عارفه المعامله الى انتى بتعاملينى بيها دى..

ساره : اه ماالها؟

فارس : هتفيدك فى توقيعه اووى..بس انتى بس متستخدميهاش غير لما اقولك…

هو هيجى امتي؟

ساره : معزوم على العشا عند اختى بعد بكره ..

فارس : ماشى …انا همشى دلوقتى علشان عندى معاد….وبكره هقولك تعملى ايه بالظبط..

ونده على الجارسون..

ساره : خلاص انا هحاسب انا الى عزماك..

طلع المحفظه وقالها..

هو انتى عازمه سوسن صاحبتك ولا حاجه؟

تليفونه رن.. رد وهو بيحاسب الجارسون وقال…

خمس دقايق وهبقا عندك يا إيمى….

ساره : مش جاى اوديك..عند عربيتك؟

هو : شششش…وبصوت واطى اسكتى..

وقال مش هتأخر يحياتى وبعدين قفل…

وقالها ..يالا ..وصلينى زى ما جبتينى..

وهما فى العربيه..

ساره : عمر قلبك دق لواحده فيهم؟

فارس : الى بيعرف كل يوم واحده تعتقدى ان عنده قلب؟

ساره بضحك : انت معاك حق..طبعاً معندوش..

هى ايمى دى بنت المستورد الى بنتعامل معاه ؟

هو : عرفتى منين ؟

ساره بضحك : احنا معندناش ايمى فى المصنع ..انت عارف لو محمود بيه (صاحب المصنع) عرف هيخصملك كام ؟

وانت عارف كويس ان العميل ده مهم بالنسبالنا…

فارس : هو مش احنا اتفقنااا..ولاا ايه؟

ساره : اتفقنا ..بس ليه محمود بيه مش بيرفدك.. وبضحك دا الشهر الى فات خصملك 5000

فارس : مهو كله بسببك..

ساره : ما هو بصراحه موصينى عليك جامد وانا بكره النوعيه الى زيك دى…انت الخط بتاعك بينام من الضحك والمرقعه..انا عمرى ما شوفت بشمهندس انتاج بيعمل الى انت بتعمله ده..

فارس بصيلها بنرفزه ..

ساره : لا بس احنا اتفقنا اتفاق رجاله..متخاافش. 

فارس : اخيراً وصلت عند عربيتى حبيبتى…

شكراً على التوصيله..ياااا..

ساره قطعت كلامه وقالتله : العفو يبشمهندس..

وهى مروحه البيت بالعربيه..بدءت تفكر نفسها انها لازم تاخد بالها من فارس ده وتحطله حد علشان ده عربيد وبيعرف كل يوم واحده ويقدر يخطف قلبها فى اقل من ثانيه…

تانى يوم فى الشغل…

فارس جه متأخر كالعاده…

ساره راحتله وقالتله…

صدق بالله انى هموت واخصملك…

فارس : فوضك من شغل الحسابات ده وفكرى فى بكره بالليل..

ساره بنرفزه : ماااشى…

خلصوا شغل وطلعوا على نفس الكافيه…

فارس : انا عاوز نبقا نغير الكافيه ده..علشان انا كل مره اشرب حاجه وانتى لاء..

ساره : انا مبحبش اشرب حاجه…ابدأ يالااا

فارس : يالا ورينى صورته…

فتحت تليفونها ووريتله صورته..

فارس : طوله مناسب ومش لابس نضاره مع انه دكتور ودى غريبه وشكله مش بطال..

ساره : انجزنى..

فارس : لا بقولك اى انا بحب اشرح بأستفاضه..فركزى كدا معاايا وحاولى تستفادى من كل حرف بقوله علشان هتحتاجيه بعد كدا..

ساره اخدت نفس وقالتله : حاضر ..كمل..

فارس : هو شكل شخصيته مش ضعيفه وبما انه دكتور يبقى ذكى..

قولتيلى عنده كام سنه ؟

ساره : 30

فارس : مش كبير عليكى..انتى عندك 23 سنه بس..

ساره بنرفزه : انا عاجبنى كدا يسيدى ..

فارس : انتى حره..يعنى عندك انا مثلا عندى31 سنه عمرى ما اتجوز واحده ادك..دا انتى اد بناتى..

ساره : بس تمشى معااهم بس..صح ؟

فارس : احم..احم…

ساره : كمل كمل.. كمل علشان نخلص بقاا..

فارس : هو اكيد مر بعلاقات فى حياته لأن عمره مش صغير ف انتى لازم تكونى بكره قدامه كاريزماا..وجميله وواثقه من نفسك ولازم تكونى مش شيفااه كمان..

ساره : نعم !!! اول مره هشوفه فيها اعمل نفسى مش شيفااه ؟

سيف : سمعتى انا بقولك ايه ؟

وكل ما عينك هتيجى فى عينه ..تديرى عينك بسرعه ..خليه هو الى يفضل يبص هليكى ويستنى عينك هى الى تيجى فى عينيه مش العكس…

سيف : هتلبسى فستان لونه ايه ؟

ساره : كاشمير..

سيف : هتلبسى فستان احمر وهتحطى روج احمر ..

ساره : ليه يعنى رايحه فرح ولاا حنه؟

سيف : لازم تعلمى فى دماغه اول مره…

ساره : اوووف ..كمل..

سيف : متأفئفيش كدا…بطلى أفأفه

ساره سمعت منه كل الكلام وروحت جهزت الفستان والميك اب وكل حاجه علشان بكره..

تانى يوم فى الشركه…

محمود بيه عاوزك يبشمهندسه..

ساره : حاضر قوليله جايه…

خبطت على الباب ودخلت..

نعم يا محمود بيه

محمود بيه : فارس جه امتي؟

ساره : الساعه تمنيه بالثانيه كان هنا يا محمود بيه..

انتى عارفه يا ساره انك اكتر واحده انا مستأمنها على المصنع…وانك غلبتى الشباب..وانك اشطر منهم وبميت راجل…

وانك بتوقفي المصنع كله على رجل واحده يبشمهندسه ومن يوم ما اتعينتى هنا..وانا شايف فى عيونك نجاح مصنعى..

ساره : وانا يا محمود بيه عمرى ما اخيب ظنك فيا…

محمود بيه : الصفقه الى هنعملها مع العميل الأمريكى مهمه جدا زى ما انتى ما عارفه..وفارس هيتعامل معاه ومع بنته وانا خايف..

الصفقه مهمه..

ساره : يا محمود بيه انت الى بتصر ان فارس يحضر ..

محمود بيه : هو برضو مهندس الأنتاج هناا..

ساره : ممكن اسألك سؤال يا محمود بيه !

محمود بيه: اكيد يا ساره اتفضلى..

حضرتك انا شايفه انك بتهتم بفارس اوى واكتر واحد بتسأل عنه..وبترفض فى كل مره انك ترفده..ممكن اعرف ليه؟

محمود بيه : انا شايف ان الولد دا هيعتمد على نفسه ف يوم وبعدين والده الله يرحمه موصينى عليه..

ساره : حضرتك يا محمود بيه قد جدى مش والدى..ومع احترامى الشديد ليك..انا شايفه فيه برضو نفس الحاجه..

بس ازاى معرفش..

وخرجت من عنده وهى بتقول يا رب سامحنى على الكدب ده منك لله يا فارس دا انا هلم من وراك ذنوب بالهبل..

اول ما خرجت فارس راحلها وقالها…العشا النهارده صح؟

وهو معزوم عند اختك وانتى قاعده بقالك فتره عندها صح كدا؟

ساره بلعت ريقها وقالتله اه..

فارس : نو توتر..مفيش توتر متنسيش..وخليكى تقيله وابتسمى ومتبصيش فى عينه كتير

ساره : اه صحيح بقولك ايه بطل خروج مع البنت الى اسمها إيمى دى علشان محمود بيه بدء يشم ريحه الموضوع… وانت عارف ان الثفقه دى مهمه بالنسبالناا…

فارس : هحاول .

بالليل فى بيت اخت ساره..وصل الدكتور وكان العشا محطوط على السفره ..

الدكتور جوز اختها عرفه على ساره وعلى مراته وقعدوا يتعشوا..

ساره كانت فعلا متألقه…

محمود ( الدكتور ) : وانتى بقا بتدرسى ايه يا ساره..

ساره رفعت عينيها وبصيتله…

واختها ردت عليه وقالتله..

ساره خريجه زراعه وشغاله بشمهندسه جوده فى مصنع..

محمود : دى حاجه كويسه جدا..

ساره : وانت تخصصك ايه يا دكتور؟ 

محمود : جراحه…

قامت وشالت الأكل هى واختها…

وبعدين دخلت اوضتها وقعدت على السرير ومسكت تليفونها علشان تقول لفارس على الى حصل…

اختها دخلت عليها وقالتلها…

انتى مش هتخرجى ولا ايه؟

دا هما شويا الى هما قاعدهم..

لقيت فارس باعتلها رساله وبيقولها..متخرجيش تانى ولو سألوكى قولى تعبانه وبكدا هتشغلى تفكيره…

ساره بصيت لأختها وقالتلها : انا تعبانه ومش هخرج تانى ..

اختها قربت منها وقالتلها..انتى مجنونه ولا ايه؟

ما انتى كويسه اهوو..

ساره بصيتلها وقالتلها اقفلى الباب وراكى ولو حد سألك قولى زى ما قولتلك كدا..

اختها: انتى متأكده ؟

ساره حطيت رجل على رجل وقالتلهاا: اه…

واول اختها ما خرجت فى الصاله…

جوزها : اومال فين ساره؟

اختها : تعبت..

محمود : الف سلامه عليها..مالها ..ايه الى حصل؟

اختها : دماغها وجعتها شويه بس وناامت..

محمود : الف سلامه عليها..

طيب انا هستأذن بقا ..

هما : ليه ما تخليك قاعد شويه..

محمود : مره تاانيه بقا ان شاء الله..

تاانى يوم فى الشغل…

فارس : هااا ..ايه الى حصل..

ساره : انت متأخر تلت ساعات بحالهم يا مفترى؟

فارس : كنت سهران دا انا نايم بعد الفجر …وجيت وكمان مش عاجبكم

ساره : معلش..اصل احنا ناس ظالمه…

فارس : قولى الى حصل يالاا..

ساره : عملت زى ما قولتلى بالحرف الواحد واول ما دخلت سأل عليا واصر يعرف تعبانه مالى واول ما عرف انى مش طالعه مشي…وبعتلنا دعوه النهارده علشان فرح اخته الأسبوع الجااى لا وقال ل جوز اختى الدعوه ليك وللمدام ولأخت المدام….

فارس : طيب كويس جدا..

كملى شغل بقاا كل دا كلام ناس معندهاش ذمه خالص..وضرب كف على كف وبعدين قال والله م انا عارف ايه ده؟

ساره : دا انا برضوا ؟!!

يوم الفرح…

فارس : اسبقينى بعربيتك على الكافيه وانا جاى وراكى..

ساره : هتلطعنى زى المره الى فاتت ؟

فارس : والله والله هتلاقينى وراكى على طول..

ركبت عربيتها وهى سايقه فى عربيه خبطت فى عربيتها من قدام وفارس كان وراها على طول ..نزل من العربيه وطلع يجرى عليها..

وفتح باب العربيه وقالها

انتى كويسه؟؟

بدءت ترفع راسها وقالتله : اه..

فارس : مناخيرك بتنزف..رجعيلى راسك ل ورا كدا..

وشد مناديل كتير من علبه المناديل وفتح ايديها وحطلها فيها المناديل وقرب ايديها من مناخيرها وقالها خلى ايدك كدا ورجعى راسك ل ورا …

وخرج …فضل يتخانق مع الى خبطلها العربيه…واخد رقم عربيته..

وبعدين رجعلها بسرعه…

بص من الشباك عليها لقاها مغمضه عينيها ومرجعه راسها ل ورا ولسه حاطه ايديها الى ملهالها مناديل تحت مناخيرها…

فارس : هركن عربيتى بسرعه هنا واجيلك..

هزت راسها بماشى…

ركن عربيته بسرعه ورجعلها…قالها قومى وساق هو..

فارس: نطلع على المستشفى؟

ساره : لا ملهوش لزوم..

فارس : دا انتى وشك متغرق دم يبنتى 

ساره : لا انا هروح خلاص …اطلع على البيت لو سمحت ..

فارس : طيب رجعى راسك ل ورا علشان النزيف يقف وهسمع كلامك واطلع على بيتك بس لو وصلنا قدام باب بيتك والنزيف ده موقفش هنرجع تاانى المستشفى ..اتفقنا ؟

ساره : اطلع طيب الطريق واقف بسبب واقفتنا دى .. .

وهو سايق العربيه ..

طلع مناديل تانى وفضل يديلهااا..

ووصل قدام باب بيتها 

فارس : هاا وصلنا كدا دا البيت ؟

ساره : ااه ..

فارس : لسا مناخيرك بتنزف ؟

ساره : لاء ..

فارس : انتى بتكدبى ..المنديل الى انا لسا عاطيهولك مليان دم اهوو..

ساره بخوف : طيب انا هعمل ايه فى النهارده ؟

فارس بعصبيه  : ما يولع النهارده ..