رواية لو تعرفين وش يعني قهر الرجآل ما ابتسم ثغرك لـغيري رجل الفصل السادس 6 بقلم النور
رواية لو تعرفين وش يعني قهر الرجآل ما ابتسم ثغرك لـغيري رجل الفصل السادس 6 بقلم النور
رواية لو تعرفين وش يعني قهر الرجآل ما ابتسم ثغرك لـغيري رجل البارت السادس
رواية لو تعرفين وش يعني قهر الرجآل ما ابتسم ثغرك لـغيري رجل الجزء السادس
رواية لو تعرفين وش يعني قهر الرجآل ما ابتسم ثغرك لـغيري رجل الحلقة السادسة
فتحت عيونها ..اشعه شمس …ماليه الغرفه ..ريحة حلوه ..ناظرت مكانها اللي هي فيه … وش جابها هنا ..بعدها استوعبت هي في الرياض عدلت جلستها ..لفت يمينها كان جالس على الكرسي وفي يده كتاب ولابس نظارته
ناظر فيها وهو يقول : صباح الخير
شوق ناظرت فيه من غير ما تقول أي شي :…………….
ابتسم وهو يقول : شكلك كنتي تعبانه امس ..ماشاءلله على طول نمتي
شوق وقفت وهي تتجهه للحمام أكرمكم الله ….بعد ماطلعت
ناظرت فيه بضيق وهي تقول : في ناس معك ف الغرفة ….نور الشمس ضايقني وانا نايمة
محمد يقرى في كتابه وهو يقول : والله هذا روتيني اليومي ..حاولي تتعودي عليه
شوق : افتح الستاير اذا كل اللي في الغرفة قاموا
محمد سكر كتابه وهو يقول : هذي غرفتي والله
شوق ناظرته بقهر: من يوم جينا وماعلى لسانك الا هذي غرفتي هذي غرفتي ..طيب عرفت انها غرفتك والله ..صاير غريب و كريهه
محمد : للأسف الرياض تغير طبعي في كل مره اجيها
شوق اتجهت للستاير : طيب بسكر الستاير
محمد ناظر فيني بعناد: اشعة الشمس تعطيك نشاط وحيويه ..وتفاؤل وانتي انسانه كلك سلبيه ..خليها تنقيك شوي
ناظرته ويدي على خصري : ماشاءلله شلون عرفت اني كلي سلبيه
وقف وهو يقول : سيماهم في وجوههم ..أنزلي افطري تحت ..انتظرك
لف على شوق وهو يقول : شوق ..ماتدرين وين الاكياس اللي جبتها من لندن
شوق : قدامك
قرب من عند الاكياس واخذ هدايا امه ونور وهو يقول : لا تتأخرين
طلع من الغرفه و شوق منقهره من دكتاتوريته اللي طلعت في الرياض
رفعت شعرها واخذت كارديقان طويل و واسع وطرحتها وطلعت من الغرفه متجهه لدور الارضي بس ما تدري ليش وقفت ..شلون جتني جراءة انزل بلحالي بدون احد ..واتصرف كأن البيت بيتي
رجعت بسرعه لغرفتي ..خفت …شعور فجأة تملكني شعور خوف .. تخيلت كلامهم عني تحت ..تخيلت محمد وش يقول لامه عني ..عن البلشه اللي ابتلش فيها ..قفلت الباب …وكأن نوبتي رجعت لي
ــــــــــــــــــــــــــــــــــــــــــــــــــ ـــــــــــــــــــــــــــــــــــ
انتظرها عند الدرج كأنه داري مستحيل تنزل ..شافها طلعت ..وسرحت شوي ..وبعدها رجعت بسرعه للغرفة ..ابتسم …حالتها اذا ما تعالجت ممكن تتطور وتتحول للعزلة ..رجع لحد الغرفه وفتحها
دخل الغرفة لقاها جالسة وحاطة يدها على خدها تفكر بأشياء متعبه قرب منها: ليش تأخرتي
شوق لفت علي وبهدوء : ما ابغى انزل …انت ليش رقيت
محمد بكذب : نسيت عطر نور هنا..تعالي يالله معي تحت
شوق هزت راسها بالنفي : لا موب لازم
توجه للكيس وهو يقول : …في ناس تدور في راسهم افكار غريبة ..يعني ..افكار ممكن تموتهم وهم مايحسون …يعني اعطيك مثال ..مم …يفكرون الناس وش بتعلق عليهم ..يفكرون بالاسئلة اللي ممكن تنطرح عليهم ويتورطون ما يعرفون جوابها
اخذ العطر وهو يلف عليها : و اعطيك مثال اوضح …. يفكرون بالطرف الثاني ( يقصد نفسه ) تفكير سلبي ..يعني يفكرون ان له وجهين ..ممكن قدامهم يكون الشخص المثالي ..واذا وخر عنهم ..طلع الشخص الدنيئ اللي ممكن يتكلم عن أي احد بشكل بشع
رفع نظره عليها كانت عيونها مرعوبه من كلامه تناظر فيه وعيونها معلقه على عيونه : انت ..كيف تعرف ..انت تخوفني
ابتسم : درست عشر سنين بس عشان اعرف نظرتك اللي في عيونك هذي وافسرها
شوق وخوفها زاد : انت جبت اللي في راسي ..مستحيل ..تكون هذي دراسة …انت فيك جني
قرب من عندها : شغلي سورة البقرة ..يمكن يطلع الجني اللي فيني ولا عاد افهمك
رجعت على ورا وهي تقول : صرت اخاف منك.. والله انك مخاوي
توجهه للباب وهو يقول : من علمك كلمة مخاوي …ههههههههه شكل العيشة في لندن ما غيرت فيك شي …لف عليها وهو يناظرها : موب قلت لك العيشة مع الدكتور النفسي اصعب من العيشة مع مريض نفسي ..يالله تعالي تأخرنا على امي
وقفت و هي متأثره من كلامه ..وخايفه من كلامه ..له تأثير قوي في الاقناع ..وجهه وطريقة كلامه ..وابتساماته في الوقت الغلط ..مشيت جمبه
فاجأني بحركة ارعبتني ..شبك يدينه في يديني
رفعت عيوني بخوف تجاهه
محمد بصوت واطي : لا تخافين ..وقت بسيط ..امي قدام
ــــــــــــــــــــــــــــــــــــــــــــــــــ ـــــــــــــــــــــــــــــــــــــ
في بيت ام سيف
جالسه على طاولة الافطار وهي تقول : مدري يمه ..بس موعدنا بعد شهر من الحين
ام سيف : مافيه مجال يقدمونه
سارة : لا ..مايمدينا ..يمه هذا استشاري بريطاني يعني احمدي ربك اننا لقينا ..
ام سيف وهي تشرب شاهيها : زين الحمدلله ….شلون نور ..ماتدري شلونها
سارة بصراحه : والله يمه انا اشك فيها ..اتوقع انها صدق موب راضيه على سيف ..ما ادري وش اللي خلاها توافق ترجع له
ام سيف : وش اللي شككك طيب
سارة : يعني كل ما افتح معاها الموضوع مهمله فيه ..حتى اقول لها قضي ترفض ..و ساعات تعذرب في سيف بقوه يعني موب متحمسه لشي ابد
ام سيف ناظرت في بنتها : يا خوفي يا سارة غاصبها سيف
سارة نفي : لا لا مستحيل ..ماتعرفين نور يمه انتي زين
سيف دخل وهو يسلم : السلام عليكم
ام سيف وسارة : وعليكم السلام
جلس على الطاولة وبدا يفطر : شلونك يمه
ام سيف ناظرت فيه : بخير ..انت شلونك ..ماعاد صرنا نشوفك لو شوي
سيف ناظر فيها بدون أي ردة فعل : موجود ..وين بروح
ام سيف ب انفعال خفيف : انت غاصب بنت الناس على شي
سيف ناظر امه وفهم قصدها قال بجمود :ما غصبت احد
ام سيف : تعلمني فيك يا سيف ..
سيف ناظر امه وقال ينهي الموضوع : شي بيني وبينها…خليني اتفاهم معها بطريقتي ..هذي زوجتي ..وانا مسؤول منها ..
وقف وهو يقول : تبين شي
ام سيف ناظرت فيه بخوف من شيء يدور في رأسها: سلامتك
قبل لا يطلع قال: سارة خلي الخدم يجهزون القهوة على المغرب قبل لا يجي الشيخ ويجون ابو سلطان و سلطان
سارة : طيب
ام سيف ناظرته لحد ماطلع وهي تقول : صار قاسي اخوك يا سارة
سارة ناظرت في امها : كلامه غريب ..اول مره اشوفه يكلمك بهالطريقة
ام سيف هزت راسها : اعرفه ولدي …السالفه عنده كلها عناد
سارة : المهم انا بروح لغرفتي والعصر بطلع اخلص شغلي ..توصين على شي
ام سيف : سلامتك
طلعت سارة وتفكير ام سيف مشغول ب سيف وطريقة كلامه القاسيه ..ولدها سيف الاول كان رحوم ..عطوف لابعد درجة على امه واخواته ومستحيل يرفع صوته عليها او يعلي كلمته على كلمتها ..سيف صار معه شي غير حياته كلها ..وش صار معك يا سيف … وش اللي غير احوالك .. وش اللي قسا قلبك سرحت ..
تذكرت قبل 34 سنة
في غرفه مافيها ضوء من النور جالسة ..ويديني على رجولي ..وعيوني غرقانة دموع ..طفلي ..ولدي ..ماعاد عندي ولد … مات …انا ذبحته …انا ذبحته
بكيت بصوت عالي كعادتي من يوم ما راح طفلي .. ضوء يخترق الباب دخل عليها ..وفي يدهه طفل صغير ..قرب من عندها وهو يقول : ربية عندك ..هذا ولد رجلك ..امه سعاد ..بس الحين امه آمنة
اخذت الولد وعيوني ما تميز ملامحه من كثر الدموع المتجمعة قلت بصوت واطي : س..سيف
الجد : صار اسمه سيف ..ولد آمنه
ضميته على صدري بكل قوة : ..مشكور عمي ..مشكور والله …آآآ ..والله مدري كيف ارد لك إللي سويته لي ..
جلس على ركبه وهو يقول : تردين لي المعروف ..انك ماتفتحين فمك بكلمة ..لاي احد يسألك
هزيت راسي وانا ضامه الطفل على كتفي …
ــــــــــــــــــــــــــــــــــــــــــــــــــ ــــــــــــــــــــــــــــــــــــــ
صحيت الصبح وانا ادور له اثر ..شكله ما دخل امس …ولا جاني ..يالله الحمدلله ..دخلت الحمام اكرمكم الله …طلعت وانا اسمع طق خفيف على الباب ابتسمت وانا عارفه من ورا الباب
قلت بصوت حنون : تعال سلومي
دخل سالم وهو مبتسم
قربت منه وانا اقول : صباح الخير
ناظر فيني بخجل : صباح النور
سما : شلون سلومي اليوم
سالم : طيب ..بس انتي وين ..أمس مانمتي عندي
سما : اسفه سلومي ..أليوم انام عندك اوكي
سالم هز راسه وهو يقول : اوكي
سما : يالله ننزل نفطر
سالم : طيب
نزلت انا وسالم ..لحد طاولة الطعام
سمعت عمي ابو وليد وهو يصبح علي : صبحك الله بالخير يا ابنيتي
جلست وانا اقول : صبحك الله بالنور والسرور …شلونك
ابو وليد ب ابتسامه : بخير الحمدلله ..وانتي ان شاءلله ارتحتي في النومه
سما : الحمدلله ..
دخلت حنان وهي تقول : صباح الخير يا عروسة
ابتسمت لها : صباح النور
جلسنا على الطاولة وعمي يقول : يالله سموا
حنان لفت على ابو وليد : وليد وين
ابو وليد ناظر سما : سافر امس العشا …جته شغله ضرورية …قالك انه بيسافر
هزيت راسي بالنفي : ماقالي شي ..
حنان ناظرت سما بخجل : ايه ..هو دايم كذا بين يوم وليلة تلقينه مسافر
قلت وانا ماهمني الموضوع : الله يسهل طريقة
حسيت بنظرات ابو وليد اللي تناظرني بغرابه ..يمكن لاني ما انفعلت بزيادة او يمكن ملاحظ شي ثاني
ــــــــــــــــــــــــــــــــــــــــــــــــــ ـــــــــــــــــــــــ
جالسه في غرفتي ..بدون أي احساس باقي على زواجي يوم وليله …ابد مو حال عروس ..فرق بين حالي الان وحالي قبل اربع سسنوات ..
اخذت نفس وانا ارد على سارة : هلا سارة
سارة بقله حيلة : وش تسوين
نور : جالسه
سارة بصراخ : جننتيني هذا حال وحدة زواجها بكره
نور : هههههههه هدي هدي ..والله كنك انتي العروس موب انا
سارة بتعب من نور : تعالي عندي احس بتوتر ..
نور ب استغراب : ليه
سارة : بعد وحده بتمملك الحين اكيد خايفة
نور ب استهبال : انا الحين اخاف تخوفين سلطان ..وانتي تقولين لي خايفه
.. على العموم مانيب جايه خليني في حالة الكابه اللي انا فيها
سارة بتوتر : والله لتجين خلصي احتريك ..
سكرت وجهها …وقفت وهي تناظر الجوال ..يالله صدق مالي خلق حتى اني ارفع يدي ..
اخذت عباتي وشنطتي وطلعت متوجهه لبيت سارة
رفعت جوالي ورجعت اتصل عليها لحد ماردت : وينك سارة صارلي ربع ساعه عند الباب
سارة : ادخلي ..ادخلي .
نور : طيب خلهم يفتحون الباب
سارة : ترى سيف موب ف البيت ارقي شوي بيجي على وقت الملكة
نور ارتاحت : طيب
سكرت من سارة وارتحت ان سيف موب ف البيت …دخلت البيت و اتجهت للدور الفوقي بدخل غرفة سارة حسيت بيد شدتني وسحبتني بدون ما احس في نفسي ..انا في غرفته
كنت اناظر برعب في عيونه الخبيثه ارتجفت وانا اشوفه قدامي مرجع يديني لورا و جسمه قدام جسمي ما يفرق عنا الا سانتي ..ناظرت فيه وانا عيوني مرعوبه من حركته
ناظر فيني بخبث وهو يقول : ماقدرتي تصبرين شكلك ..جيتيني لحد غرفتي .
ناظرت فيه ب اشمئزاز : فكني ..انا جاية لسارة ..وخر قبل لا احد يشوفني
ناظر فيني بكل خبث وهو يقول : انا لابسة روب ..وانتي ب عبايتك ..واضح انك جايه قاصدة غرفتي …وش تبيني اسوي الحين
قلت له وانا ارتجف من كلامه ..كلامه قوي ..: ما ابيك ..تسوي شي ..خلني اطلع
ضحك وهو يقول : جيتيني بكل سهولة ..تبينني اخليك تطلعين كيف
نور كنت انتفظ وكأن صايبتني نفاظه : سيف …انا ..لو
سيف : شكل تأثيري قوي عليك ..واضح انك كنتي تكذبين وانتي تقولين انك ما تحبينني
نور ناظرت فيه بقرف و كرهه : ما اكذب ..
سيف : يعني ماتحبينني
نور ب اصرار : اييه ..و للابد ما راح احبك
سيف ب تشتت بين الحقيقة والكذب : بس انا احبك
نور وهي تحاول تفك نفسها : لو وش ماسويت ..والله ما اتقبلك ..خلك تحبني ..بس انا ..ليوم القيامة انت بتبقى شي ندمانه عليه طول العمر ..لو يرجع الزمن لين ورا ..والله العظيم ما اكرر غلطي فيك يا نذل
كلامها ازعجني .. واضح انها صادقة ..مسكت يدينها بقوة ونظرتي تغيرت حسيت ب اهانه في حقي شديت على يدينها وانا اقرب منها : اعتذري
نور : لو تموت
سيف : موب من صالحك
نور : ماراح اعتذر
سيف نزلت راسي لـ عنقها وانا اقول لها : ماراح تعتذرين
حسيت بقرف وانا احاول ابعد عنه : انت مجنون ..والله العظيم مجنون .. خلني اروح ..خلني اروح منت مستفيد شي
ثبتها وحطيت راسي على عنقها …وانا اقول لها : خلي كبريائك يخسف بك اجل طبعت قبله على عنقها بهدوء
نور قلت بجنون ما ابغاه يقرب ما ابغاه يلمس مني شعره ابغا اطلع : حسبي الله عليك يا سيف …الله ينتقم لي منك …ابعد …خلاص …خلاص …اسفه …ابعد ..أسفه
وقفت وانا اسمعها تعتذر ناظرت فيها وانا اقول لها : لا تسوين شي انتي منتي بقده ..اقدر اكمل اللي سويته …. بس حسيت انه موب وقته ابدا
نور كنت اناظر فيه بصدمة ..مصدومه من جرائته ..و وقاحته معي ..
فك يديني بعدت عنه بسرعه وطلعت من الغرفة ..ونزلت بسرعه مرعوبه نفس اول مره قابلته هنا……
جلست على سريري وانا مبسوط من اللي سويته فيها ..خلها تعرف كيف تتعامل معي ..ولا تسوي شي اكبر منها
وقفت عند باب البيت وانا منصدمة منه لحد الان ..ابغى ارجع البيت مافيني حمل اكثر ..دقيت على سارة وقلت لها اني برجع البيت ..ما اقدر اجلس اكثر من كذا
ركبت السيارة وانا كارهه نفسي ..وكارهه ريحة العطر اللي لازقه فيني بسببه
نزلت بعد مالبست ثوبي وغترتي للمجلس احتري عمي صالح ..وعبدالله يجي والشيخ
جلست على جوالي وانا اتذكرها ابتسمت وضحكت بشكل هستيري هذا وانا بس بستها شلون لو ……ههههههههههههههههههههه
دخل عبدالله ب زيه العسكري وهو يقول : عسى ما تأخرت
سيف : على الوقت …اخلص البس وتعالي
عبدالله : يالله دقايق و اجي
رجع عبدالله بعد مالبس وجلس وهو يقول : يا حليلها سارة هههههههههه والله مانيب مصدق انها بتتزوج
سيف : صدق بعد ..لازم تتزوج
عبدالله : ماشاءلله اختي اليوم ملكتها واخوي بكرة زواجه
سيف : وانت عقبنا ان شاءلله .. المهم هذي تحاليل ساره خلها معك
عبدالله اخذ التحاليل وهو يشوف ذياب
دخل ذياب وهو يقول : السلام عليكم
سيف : وعليكم السلام
ذياب بزعل : تستهبل توك تعلمني عن الملكة
سيف : كل شي جا سرعه ..ولا انت تدري كل شي اخبرك عنه
جلس وهو يناظر في سيف بشك : ليش متكتمين على الملكة ..المفروض الكل يدري
عبدالله بحلطمة: من جد وش صاير ..انا احس اني منقطع من الدنيا بسبب هالدوام
سيف هز كتوفه وهو يقول : مدري والله ..الحريم عليهم حركات
عبدالله وقف وهو يقول : شكلهم جوا ..قوموا
سيف وقف واتجهه لـ الباب وهو يقول : يالله انك تحيهم ..ارحبوا يا هلا والله و مسهلا
ابتسم ابو سلطان وسلطان وهم يردون عليه
قرب عبدالله منهم وهو يقول : يا هلا والله يا ابو سلطان ..يا هلا والله بالنسيب
سلطان : رفع الله مقامك ..تسلم
ذياب وهو جاي من بعيد : يا مرحبا والله بالنسايب
سلم عليهم ودخلوا المجلس وبعدها بربع ساعة جاء ابو صالح وعياله ..و ابو زياد و عبدالرحمن ..
بعد السلام والسؤال عن الحال ..
سيف بهمس لـ عبدالرحمن : وين زياد
عبدالرحمن : مسافر صار له يومين ..ان شاءلله انه بكرة بيجي
سيف : الله يهون دربه
انور : ماشاءلله دكتور
ابتسم سلطان وهو يقول : الحمدلله على كل حال
انور ضحك وهو يقول : وشفيك شكلك مرتاع تعود على الوضع
صالح : شكلك الي مروعك جلسة عماني وهم يناظرونك
سلطان بحكمة : يحق لهم يناظرون ..باخذ من عندهم بنتهم لازم يتأكدون من كل شي
صالح : الله يوفقكم و ييسر لكم امركم
سلطان : تسلم
بدا المقهوجين يباشرون بالقهوة والمجلس ملئ بالكلام بين هذا وبين هذا
وقف سيف وهو يشوف محمد داخل : السلام عليكم
قرب من محمد وهو يبتسم : وعليكم السلام
محمد بوجهه جامد : شلونك يا سيف ..عساك بخير في غربتك
سيف : بخير الحمدلله …شلونك انت عساك بخير
محمد وهو ضاغط على يد سيف : بخير دامك بخير
سيف : حيّاك الله ..
تقدم محمد وهو يسلم على الضيوف
دخل الشيخ وهو يسلم : السلام عليكم
الكل : وعليكم السلام
الشيخ وهو يجلس : أعذروني يا اخوان على التأخير اليوم ولله الحمد عقدت قرآن اكثر من ثلاثة شبان ..اسأل الله لهم التوفيق
الكل : آمين
الشيخ : بسم الله الرحمن الرحيم ..وين وليّ العروس ..والعريس
اخذ سيف جواله وهو يتصل على امه : هلا يمه ..خلي سارة قريبه من باب المجلس …ايه ….شوي ان شاءلله …يالله
سكر الجوال وهو يوقف ويتجهه لجهة المملك ..وسلطان كذالك
جلس سيف بجانب المملك و في الجهه الاخرى سلطان
المملك : بسم الله
سيف بهدوء : لحظة يا شيخ ..قبل لا تملك يا سلطان ..بقول لك شي قدام هالوجية الغانمة ومانيب مستحي
سلطان بهدوء : سم
سيف بصوت واطي : انت الحين منت بمآلك على اختي بس لا والله ..انت مالك على بنتي ..وقطعة من قلبي ..ودم يمشي في شرآييني ..طول عمري معيشها زي ماتبغى هي ولا عمري قصرت معاها بشي .. صدق ان ابوي ميت بس عمري ماحسستها انها يتيمه ..صرت لها الابو والاخ وكل شي هي تبيه …قبل لا تملك ابيك توعدني انك تحطها في قلبك قبل عيونك وتخاف ربي فيها ..وان ماعيشتها نفس العيشة اللي هي فيها تعيشها عيشة احسن منها ..
ابتسم سلطان وهو يقول : الله يقدرني واحطها في عيوني ..اختك معي في أمان يا سيف
ابتسم سيف وهو يقول : توكلنا على الله
بدا الشيخ يكتب العقد بعد ماشاف التحاليل .. بعد ماخلصت وقف وهو يقول : وين العروس يا ولدي ؟.
وقف سيف و الشيخ يمشي وراه
وقف عند الباب وهو ينادي سارة
كنت عند الباب واقفه خايفه مرعوبه من اللي سويته ..سمعت صوت سيف وهو يناديني حسيت ان الشي صار جد ومافي
مجال للهروب ..مافي مجال اقول لا ما ابي …توكلت على الله احاول اطرد وساويس زياد عني….
الشيخ : هل تقبلين بـ سلطان ابن متعب الـ… زوجاً لك يا أبنتي
قلت بهدوء : أقبل
دخّل سيف الدفتر وعطاني القلم وهو يقول : وقعي هنا
وقعت وانا يديني ترتجف ..خلاص الحين زياد انتهى ..ماله في قلبي شي ..مع توقيعي هذا لازم انسى كل شي يخص زياد لازم انسى اسمة بعد ولا أذكره ابدا
ضمني سيف وهو يقول : مبروك يا عيون اخوك ..ألحمدلله ..
ابتسمت وانا اقول : الله يبارك في عمرك
جتني امي وعيونها مليانه دموع ضمتني وهي تقول : مبروك يا سويرة ..مبروك يا بنتي …مدري متى مشى الوقت وصرتي عروس قدامي …الحمدلله
ضمتني امي بقوة ..كنت محتاجة هالضمة …
بعدها رقيت لغرفتي وقفت عند المراية وانا اقول : لا تبكين …سارة ..لا تبكين ..انتي قوية …انتي قوية …لا تبكين ..لا تبكين ..لا تبكين على زياد ..لازم يصير هالشي من اول ..لا تبكين
جلست على سريري ..جتني رساله من عبدالله
( وين رحتي ..تعالي تحت المجلس ..سلطان جالس ينتظرك )
نعم ..وش ينتظرني ؟؟!!
رجعت دقيت على عبدالله
عبدالله : وينك يا بنت ؟!.. الرجال ينتظرك تحت……
سارة وعيونها بتطلع من محجرها : وش ينتظرني ؟؟!!
عبدالله بملل : سارة بلا دلع بنات انزلي
سارة : خله يتوكل على بيتهم مانيب نازله
عبدالله : اخلصي علي انزلي ..بلا دلع
سارة : ما ابي انزل
عبدالله بهدوء : لا تطولينها وهي قصيرة انزلي اخلصي
سكر عبدالله الجوال ..
ياربي وش انزل اسوي .. طلعت من غرفتي وانا نازله تحت ..مالي خلق ابد
شفت عبدالله واقف
قربت منه وانا اقول : تستهبل عبدالله .. ما استعديت ولا شي
عبدالله وهو يناظرها : شكلك زين ..فكينا من الرجال يبغى يسلم عليك
سارة : افففففف
دخلت المجلس قالت بصوت هادي : السلام
رفع راسه وهو يقول : وعليكم السلام
جلست بهدوء
قال : شلونك سارة
سارة : بخير ..وانت
سلطان ب ابتسامه : بخير الحمدلله ..مبروك
سارة وهي منزله راسها ما شافته : الله يبارك فيه
سلطان ناظر فيها : انـ…..
وقفت بسرعه وهي تقول : عن اذنك
طلعت من المجلس بسرعه وهو يناظرها مستغرب ..ماجلست دقيقة ..عقد حواجبه ب استغراب وش تحس به … حتى ما خلتني اكمل الكلام اللي بقوله
ــــــــــــــــــــــــــــــــــــــــــــــــــ ــــــــــــــــــــــــــــ
ام زياد : يا حليلها سارة الله يوفقها
لفيت على امي ب استغراب : ليه يمه
ام زياد ب استغراب : تستهبلين ..اليوم تملكت سارة على سلطان الـ…
شهقت بقوة وكأن بغت تطلع روحي مع الشهقه
ناظرتني امي وهي تقول بخوف : رشا ..وش فيك
رشا تمالك نفسي ..والصدمة اللي انا فيها : ولا شي ..
ام زياد : يا حليلها والله اخر وحده توقعت انها تملك
وقفت وطلعت من الصاله وانا مصدومة من سارة شلون ما خبرتني ..اكيد ماتبي يطلع خبر لـ زياد ..ماتنلام يا رشا اذا ماقالت لك ..كل شي تقولينه لزياد انتي
شهقت مره ثانية وانا اتخيل لو درا زياد وش ممكن يسويي الحمدلله ان زياد برا الديرة ..ولا كان صارت اشياء واشياء ..
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــ
في بيت ابو وليد
ابو وليد : حنان ..بكرة عرس سيف ال …و مكلمني ابو صالح راسل لكم دعوات …أنتي و سما
حنان : يا حليلهم ..ولدهم هذا هو اللي كان غايب عنه اربع سنين
ابو وليد : ايه هو ..العرس عائلي ..بس اصر ابو وليد على جيتكم
حنان : الله يوفقهم .. لا بروح ..ان شاءلله انا وسما
دخلت سما وهي تسلم : السلام عليكم
ابو وليد وحنان : وعليكم السلام
جلست سما وهي تصب لها شاهي
حنان : بكرة انا وياك معزومين على زواج من عائلة ال… ان شااءلله
سما : اا..اروح
حنان ب استغراب : ايه تعالي معي
سما بخجل : ..احس انه يعني موب مناسب
حنان : لا يناسب خليني اعرفك عليهم ..ويعرفون ان عندنا مرت ولد جميلة نفسك
ابو وليد يناظر فيها بحنان : ليش يا بنتي ..روحي انبسطي و وسعي خاطرك
سما : و سالم
ابو وليد : عند لطفيه
هزيت راسي بالموافقه وجلسنا نسولف لحد ما استأذن عمي و دخلت معه حنان
جلست بلحالي ..أتفرج على التلفزيون ..شكلهم كلهم ينامون بدري ..حتى سلومي نام مبكر اليوم
قلبت في القنوات بطفش .. صار له يومين ماشفته ..احسن ..مدري ليش ما ارتحت له ..
سهيت بجوالي لحد ماحسيت بصوت الباب ينفتح ..رفعت راسي كان هو داخل وفي يدينه ملفات
نزلت راسي بدون اهتمام
دخل وجلس كأنه ما انتبه لي
كان يكلم : اوكي …اليوم ما اقدر ..خليها بكرة ..توني واصل ..ما يمديني .. خلاص ان شاءلله بكرة تكون عندك ..
سكر الجوال وانا اسمع الحوار شكله بينه وبين بنت ..والله و طلع راعي بنات بعد
لف علي وهو يناظرني : انتي هنا ؟؟
وقفت وانا اقول : اسفه ماكان قصدي اسمع مكالمتك
رجع فتح جواله وهو يقول : مايهم ..سالم وين
سما : نايم
شاف ساعته كانت تشير لـ 11 ليلا
قال بصيغه امر : سويلي شي اكله
ناظرت فيه وبكلامه وبطريقة كلامه ضغطت على نفسي مع اني ما احب هالاسلوب : وش تبغى
وليد : أي شي
دخلت المطبخ وانا منقهره من اسلوبه الوصخ معي ..بس سكت ما ابغى اتكلم ..
ما اعرف مكان الاغراض ..ولا ادري وش اسوي .. شفت كورن فليكس على الدرح وحليب جمبه ..اخذت الحليب و حطيته على النار
بعد ماخلص حطيت فوقه الكورن فليكس ..و وديته له
نزلته على الطاوله اللي قدامه ورجعت لمحلي
ترك جواله وناظر الاكل اللي سويته ورجع يناظر فيني : من جدك انتي ولا تستهبلين على مخي ..مانيب فاضي انا
ناظرت في : ليش وش سويت
اخذ نفس : جايبه لي كورن فليكس كني بزر
ناظرت فيه بقهر : انت قلت لي أي شي ..صح ولا لا
وقف وهو يناظرني : قلت لك أي شي زي الناس …تدرين من متى ما اكلت هالاكله من عشرين سنه
ناظرت فيه : والله مشكلتك ..انت حارم نفسك
قرب مني وهو يقول : انا ماعندي بال على الحريم .. افهمي شغلك زين ..لا تخلينني اعصب زيادة
بعدت عنه وانا منقهره من طريقة كلامه قلت له بعصبيه : اخاف مطلع لي تأشيرة من الفلبين .. ترى انا انسانه موب خدامه عندك
قرب من عندي وهو يقول بصوت حاد : يوم تزوجتك كنتي عارفه وش لك وش عليك ..لا يكون تبينني اعاملك كنك صدق زوجتي ..انتبهي انتي هنا بس عشان سالم ..وعشان راحته و راحتي
ناظرت فيه وقلت بتكرار : انا ماني خدامه
جلس وهو يقول : كلنا عارفين قبل لا اتزوجك كنتي وش في بيت اهلك
ناظرت فيه قدر يجرحني النذل ويوصل لـ جرح كبير ناظرت فيه : ما اعتبرهم اهل ..
وليد : مشكلتك هذي ..من الحين اقول لك ..اي شي اطلبه منك ..كلمتك تكون حاضر ان شاءلله .اي كلمه غيرها تحملي عواقبها
ناظرت فيه بحقد ورقيت لغرفتي وانا منقهره لحد الصميم…..
فتح باب الغرفه ناظرته وبعدها قمت عن السرير وجلست على الكنبه ..اخذ بجامه من الخزانه ..و
ناظرني وهو يقول : صحيني بكرة الساعه عشر الصبح ..في الغرفه اللي قدامك
قلت بهمس : فكه
وليد لف عليه : وش قلتي
سما : ولا شي
طلع من الغرفه وهو يسكر الباب وراه
انقهرت من حركاته المستفزة …سكرت الباب بالقفل وانسدحت على سريري ..وكأن النوم حالف اليوم ما يجيني من القهر …ضغطت على نفسي وحاولت انام بالغصب
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
فتح عيونه بعد نومه طويلة ومتعبة .. شاف الساعه كانت 9 المساء
رجع غمض عيونه ..سمع صوتها من بعيد وهي تقول : انت جاي لعندي منشان تنام بس
فتح عيونه وهو يقول : انام ..وامس وش كنا نسوي
قمر وهي تضحك : ما بيكفي ..قوم لحتى نطلع ع الضيعة
زياد : من عيوني كم قمر عندي
قمر وهي تمد الجوال : جوالك من الصبح عم يرن ..ما حبيت صحيك
اخذ الجوال منها ورجع استرخا على السرير
فتح السناب جات وبدا يشوف سنابات عيال عمه ..فتح عينه بقوة ..وهو يشوف عبدالله (اخو سيف ) مصور مع رجال وكاتب ( مع النسيب ) النسيب ..النسيب ..من عنده غير سارة تتزوج قلبه بدا يدق ..كانت نبضات قلبة شوي وتطلع من صدره … رجع فتح سناب جات ذياب ..كان الشخص موجود في كل سنابات عيال عمه
اخذ جواله واتصل على رشا
زياد بصوت واطي وبخوف من الرد : رشا …من اللي تملك ؟؟
رشا انتفضت ما كانت متوقعه انه بيدري بهذي السهولة قال بارتباك : من قالك ؟؟
زياد بقلة صبر : من اللي تملك ؟؟
رشا غمضت عيوني بقوة وانا اقول : سـ…سارة
زياد انصدم عيونه معلقه على الفراغ اللي قدامه ويدينه ترتجف : ش..شلون سارة ؟؟
رشا بسرعه : زياد اهدى …اهدى
سكر الجوال وطلع يركض متوجهه للمطار
ــــــــــــــــــــــــــــــــــــــــــــــــــ
لقراءة الفصل التالي:اضغط هنا
لقراءة باقي حلقات الرواية اضغط على ( لو تعرفين وش يعني قهر الرجآل ما ابتسم ثغرك لـغيري رجل )