رواية صدفة غيرت حياتي الفصل العاشر 10 بقلم نشوه عادل

رواية صدفة غيرت حياتي الفصل العاشر 10 بقلم نشوه عادل

رواية صدفة غيرت حياتي البارت العاشر

رواية صدفة غيرت حياتي الجزء العاشر

رواية صدفة غيرت حياتي الحلقة العاشرة

وقفت ميرال ع صوت هالة ولفت وشها ليها بعد ما خلصت كلامها وبمنتهى الاستغراب سألتها: هو حضرتك تعرفى بابا وماما؟!
قربت منها هالة وخرجت السلسلة اللى برقبتها وبعدين طلعت سلسلة من رقبتها هى كمان واول ما شافتها ميرال اندهشت لانها كانت نص السلسلة التانى: ايه ده😳 ده النص التانى ازاى وصلك انا مش فاهمة اى حاجة!
هالة: السلسلة اللى برقبتك دى كانت بتاعت امك الله يرحمها مش كده؟
ميرال: ايوة بس انتى عرفتى منين بالله عليكى قوليلى الحقيقة بلاش تلعبى بأعصابى كده!
هالة: هيام امك تبقى اختى التوأم يا ميرال
صدمة ع وش الجميع كنزى وادهم وميرال ويونس … ميرال: ايه يعنى انتى خالتى؟ ازاى مش ممكن انا ماما عمرها ما جابتلى سيرة ان ليها اهل او عندها اخوات انتى اكيد بتضحكى عليا
يونس بصدمة: يعنى ميرال بنت هيام ومحمد
هالة طلعت جابت شهادة ميلادها هى وهيام وشوية صور ليهم مع بعض وعطيتها لميرال اللى كانت حاسة انها تايهة ومبقتش فاهمة اى حاجة وبعد ما خلصت

ميرال: طب.. طب ليه ماما محكتليش عنك قبل كده لا هى ولا بابا؟
هالة: انا هحكيلك كل حاجة انا وامك الله يرحمها كنا بنتين توأم ولينا 4 اخوات ولاد شقايق جدك اللى هو ابويا كان باشا من البشوات الكبار اصحاب الشركات والاطيان وعم منصور ابو محمد ابوكى كان فلاح بيزرع اراضى ابويا بس ربى ابوكى وصمم يعلمه تعليم عالى واتخرج من كلية الهندسة واتعين فى شركة جدك وكان بيحب امك جدا وهى كمثل من ايام طفولتهم ولما ابوكى اتخرج قرر يتقدم ليها لكن كعادة البشوات رفض جدك ومش بس كده طرده هو واهله من البلد كلها ولما امك عارضته وقالت انها موافقة حرمها من المدرسة وقعدها بالبيت
ميرال: وبعدين🥺
هالة اخدت نفس وكملت: امك كانت مجنونة بأبوكى عشان كده قرروا يهربوا ويتجوزوا وانا وعمك يونس اللى ساعدنا امك تهرب لان هو وابوكى كانوا اصحاب اوى ع فكرة عمك يونس مش بس جوزى ده ابن عمنا انا وامك ومن بعد ما اتجوزوا سابوا البلد كلها وانقطعت الاخبار وحاولت كتير اوصل لاى حاجة عن امك وابوكى وحاولت انا ويونس كتير وفشلنا لحد ما عرفت من الجرايد عن حادثة سفينة الحجاج اللى ماتوا فيها وشوفت صورهم واسمائهم ودخلت فى غيبوبة بعد الخبر لكن مكنتش اعرف انهم خلفوا لان امك كان عندها مشكلة وصعب تخلف ويشاء القدر الدنيا تلف والزمن يدور وترجعى لحضنى من تانى
ميرال بعياط: من اول مرة شوفتك فيها وانا بحس اتجاهك شعور غريب وكأن فيه رابط قوى بينا بس عمرى ما كنت اتخيل انك تكونى خالتى وتوأم امى اه انتى شبهها اوى بس كنت بقول صدفة وكنت بحس براحة وامان وانا فى حضنك بجد
اخدتها هالة فى حضنها وقعدت تطبطب عليها بحنان راحت كنزى وقفت ادامهم وقالت: وانا وانا خدونى فى حضنكم
ضحك الكل عليها وقرب يونس من ميرال واخدها بحضنه وقالها: انا كان عندى بنت بس يعلم ربنا انك من اول يوم دخلتى فيه البيت ده وانا بقيت بعتبر ان عندى اثنين والبيت ده بيتك ولو فكرتى تخرجى براه هكسر رجلك
وصل كريم ع البيت واول ما شافته ميرال لفت وشها الناحية التانية حاول يكلمها لكنها رفضت تسمعه وسابت المكان وطلعت ع اوضتها ووراها كنزى
كريم ليونس: عمى ميرال عرفت كل حاجة وشكلها مش هتسامحنى ابوس ايدك اعمل اي حاجة وخليها تسامحنى ارجوك
يونس: اهدى اهدى ميرال هتعيش معانا لانها فرد من العيلة
كريم: مش فاهم؟
حكتله هالة كل حاجة وقرب منها كريم وهو ماسك ايدها وبيبوسها: والنبى يا طنط ارجوكى اقنعيها تسامحنى انا .. انا بحبها والله العظيم بحبها بجد وعايز اكمل الباقى من عمرى ليها
هالة طبطت ع خده برفق وقالتله: اطمن هتسامحك
بعد مرور شهر حدثت فيهم احداث كتير جدا .. كريم قدم استقالته من الشرطة واشتغل مع عمه بالشركة وساب البيت بعد الحاح طويل ع عمه لان ميرال محبتش وجوده وكنزى وادهم قربوا لبعض اكتر والحب زاد واتقدملها ادهم والنهاردة خطوبتهم
فى غرفة كنزى والميك اب ارتيست بتجهزها .. ميرال بتصفير: ايوة يا عم هتبقى عروسة وهتذلينا بالدبلة وشبكنا بدبلته ودبسناه

كنزى: عقبالك يا لمضة
ميرال: هيييييييح لسه ملقتش فتى احلامى يا اختشى
كنزى اتغيرت ملامحها والدموع نزلت منها وميرال اتخضت: ايه ده فى ايه مالك؟
كنزى: انتى مش شايفة انك جيتى ع كريم اوى يا ميرال
ميرال: انا مجتش ع حد ومن فضلك متجيبيش سيرته تانى ده واحد كداب ومخادع
كنزى: حرام عليكى بجد انتى عارفة كويس اوى انه بيحبك وهيموت عليكى انتى متعرفيش كان بيعمل فيا ايه بسببك ومتعرفيش كان خايف اد ايه من موقفك لما تعرفى الحقيقة انتى سامحتينا كلنا ليه مش قادرة تسامحيه
ميرال: عشان كدب عليا
كنزى: مش بايده ولا غلطه ده غلطنا كلنا يعنى مكنتيش تسامحينا احنا كمان يا ميرال انتى كمان بتحبيه انتى بتبقى نايمة وبتخترفى باسمه طب ليه تعاقبى نفسك وتعاقبيه بالقسوة دى تعرفى انه قدم استقالته من الشرطة بعد ما بقى مقدم ودى رتبة كبيرة اوى بالنسبة لواحد فى سنه شكله اتغير وبقى بهتان وكمان النهاردة خطوبتى ومش هيحضرها عشانك وانا بجد نفسى اخويا يحضر 🥺
ميرال طبطبت عليها: طيب اهدى وبطلى عياط عشان الميك اب هيبوظ انا هروح مشوار مهم
كنزى: رايحة فين وسايبانى؟
ميرال: هتعرفى لما ارجع
نزلت ميرال بعد ما اخدت حاجة من الدولاب ركبت تاكسى ومشيت … عند كريم اللى كان نايم فى اوضته بالشقة بتاعته وهو فاتح اللاب ع صور ميرال والدموع نازلة منه فجأة سمع صوت تكسير جاى من المطبخ فكر حرامى سحب مسدسه وراح ع هناك
كريم: اثبت مكان…….. وقبل ما يكمل اتفاجئ بميرال واقعة فى الارض وفوقها الكوبيات والاطباق
ميرال: مين الحيوان اللى علق المطبخ ده
كريم بصوت مخنوق: انا
ميرال: ما انت حيوان فعلا
شدها كريم بسرعة لحضنه وهو بيعيط وعمال يشم ريحتها اد ايه وحشته
كريم: انا كنت متأكد انك هتسامحينى بس بس ليه كل ده ليه انا كنت بموت فى بعدك
ميرال: بعيد الشر عنك يا حضرت الظابط
كريم: لا ظابط ايه بقى انا قدمت استقالتى خلاص
ميرال: ما انت هترجع شغلك تانى
كريم: مستحيل الشغل ده هو السبب اللى خلانى خسرتك
ميرال: لا وانت الصادق السبب اللى خلاك تقابلنى ما هو اسمع بقى يا ترجع ع شغلك يا اما ……….
كريم: ابوس ايدك من غير تهديد كفاية لحد كده بعد انا استويت
ميرال: طب يالا يا معلم البس اللى ع الحبل وظبط نفسك عشان خطوبتنا
كريم: خطوبتنا؟

ميرال: اه ما انا اخدت قرار اننا هنتخطب النهاردة مع كنزى وادهم يالا معدش فيه وقت نروح نجيب دبلتين ونلحق الحفلة يا عم
وبالفعل اتخطب الثنائى ميرال وكريم وادهم وكنزى … بعد مرور شهر اتجوزوا برضه فى نفس اليوم
بعد 6 سنين جواز مليئة بالاحداث منها ان ميرال كملت تعليمها واتخرجت من كلية التربية وبقت معيدة بالكلية وكريم رجع ع شغله وحقق نجاح كبير اما ادهم وكنزى سافروا امريكا وحضروا دراسات عليا ورجعوا ع مصر والغريب بقى ان كنزى وميرال حملوا فى نفس الوقت وكنزى خلفت تيام اما ميرال خلفت تيم وصل الكل ع فيلا العوامرى وقضوا يوم ظريف جدا مع هالة ويونس وكانت حفلة ثغننة عسان عيد ميلاد تيم وتيام السادس وبيخلص ع الكل وهم قاعدين بياخدوا صورة عائلية…..
وبكده يا حلويين نقدر نقول توتة توتة خلصت الحدوتة وميرال وكنزى مطلعوش توأم بس طلعوا بنات خالة انا محدش يتوقعنى💃🤭 شكرا من كل قلبى لكل بنوتة دعمتنى ع الرواية سواء باللايك او بالكومنتات اللى بجد كانت بتدخل الفرحة ع قلبى كل مرة كنت بنزل فيها وكمان القمورات اللى كانت بتشاركنى توقعاتها واغلبهم كان بيكون صح بجد شكرا من كل قلبى❤ وان شاء الله هرجع برواية اقوى 😍
*****ولسه الجاى دمار بحروف وكلمات من نار 🔥*****
تمت.

لقراءة باقي حلقات الرواية اضغط على (رواية صدفة غيرت حياتي)