رواية التضحية الفصل الثاني 2 بقلم آية حسن

احمد: شاب كبير وعاقل دكتور وعنده مستقبل حلو، خاطب بنت عمه بعد علاقة 4سنين يحبها وتحبه هو ولد حلو عيونه ملونات وجسمه رياضي وطيب عصبي لكن لما يزعل تندم انك زعلته في يوم من الايام

سامر: شاب عايش حياته في تركيا بالطول والعرض روح من سنة فاتت لان امه مريضة وهو راس ولد وعنده اخت وحدة بس…. لكن شن علاقته ب أبطالنا؟

سارة: اصغر شخصية معانا لكن مش هلبا، اصغر من شهد بسنة لكن تقرا في نفس دفعتها بيضا وشعرها اصفر وعيونها عسلياات وجهها ديما احمر، راس بنت في عيلتها امها تعبانهة لانها تعاني من كانسر طيبة وضحوكة ما تحبش القرايا لكن عندها مستقبل في الكيكاات

كانت شهد مروحة من المدرسة طبعا لحوش خالها وقفت ع السوق بتشري حاجات لقت ولد قنين وواضح عليه متعلم ممكن متخرج او مزال طالب في الجامعة

شهد كانت مش مفكرة في موضوع اعجاب وهكي.

كانت تكلم في زينب الولد قعد مركز معاها كيف تتكلم لانها اصلا لما تتكلم في التليفون تكون ملفتة للانتباه.

الولد حاير مش عارف شن ياخد ف سألها: عفوا معليشي

شهد: زوبة نهدرزو بعدين سلام…

تفضل خوي في حاجة؟

الولد : والله العيلة طلبو مني نوع كريمة لكن اني معرفتش اما نوع، تساعديني لومافيش مانع.

شهد: عادي خود النوع هذا وانت متطمن

وكل حد مشي في حاله طبعا الولد ح تعرفوه منو بعدين

قعد الولد كل يوم يمشي لنفس السوق في نفس الوقت علي امل ان يلقى شهد لكن مافيش فايدة تمت امتحاناتها

وبعد مرور شهرين………! نتيجة ندى غدوة

شهد وزينب يهدرزو بعد ما زوبة طاحت في حفرة الحب

زينب: اني نحب شخص.. كيف بدينا في العلاقة

شهد: اهااااا….. واني نقول وينك مختفية ت مية مية

زينب: اسمه سامر(قالت اسم العيلة) 20سنةكويس العمر؟

شهد: كويس اي فرق بينكم 3سنين حلو لكن العيلة مار عليا اسمهم…… اهاا حق حق اخته كانت تقرا معاي اسمها سارة !

زينب: اي صح صار تعرفيهم بااهي كويس

شهد: العيلة كويسة الحق ربي يوفقك معاه حبيبتي

اتفقت شهد مع بنت خالتها انها تجيها وترفعها لحوش ندى بتحضر معاها النتيجة وبترفع هديتها،

وعمكم عبدو يستنى منها في زيارة، واول ما جت عيونه فضحوه من الفرح

شهد كانت عادية وبالها مع ندى، واخيرا طلعت النتيجة ونجحت ندوش ممتاز

طبعا عبدو جاب لندى تليفون جديد وكيكة والجو لووز

نورية: سلم وخيها ربي يفرحني بيك مع من تبي يارب

ندى: شني في وحدة معينة واني ما نعرفش ولاكيف؟

عبدو: اي في، لكن مش حنقول عليها توا، بعدين توا تعرفوا

شهد كانت مش مدورة وهدا زاد من نار عبدو كيف مش معبرتني بكل؟ شني جماد قدامها؟

شهد: ربي يتمم علي خير، خودي هادي مني اني ندوش

ندى: يوخيتي سلمها محلاها، ربي ما يحرمني منك.

كانت سلسلة اسم لندى…. بعد شوية طقطق الباب، كلهم سكتو، ناض عبدو فتح الباب.. طلعت روبين

الكل تفاجئ من جيتها زعما شن العملة اللي باديرها؟

نورية: منو يا عبدو؟ كان بنية قوللها تخش سلم ولدي مرات وحدة من صاحبات اختك

عبدو بكل تقزز: هادي روبين ي امي تعالو وحدة منكم ادخلها

عبدو ما يحبهاش خش وخلاها ع الباب لقي شهد في الصالة شادة التليفون وتضحك ركباته ناار الغيرةخش لداره وكان ناوي يقول لشهد عاللي في قلبه وخش لحمام داره (حاشاكم) وقعد يفكر تحت المية

شهد وندى مقعمزين، ندى تساير في روبين لانها متحبهاش

عبدو كيف طلع من الدوش ومن عادته ان ينادي امه اول ما يكمل وكل الحوش يعرفو الشي هذا

ندى جاها تليفون ونورية يباركولها حتى هي

شهد خشت لدار ندى وكانت مقابلة دار عبدو وطبعا سكرت عليها الباب لانها تحشمت وهكي

اما روبين قعدت في الصالون

عبدو: امي ……. يا امي…… تعالي نبييك

شهد بصوت عالي: تتكلم في التليفون مش فاضية بيك

ناضت عمتكم روبين بكل صحة وجه خشت لعبدو في داره الموقف كان مش حلو بكل قصدي بنت خاشة لشاب بروب الحمام وربي ما لقطة حلوة بكل

شهد شافت الموقف جتها صدمة

عبدو استغرب من روبين ولما شاف شهد كيف مصدومة من الموقف تغير جوه للاسوء

عبدو: انتي شن اديري هني؟

روبين: قلت مرات تبي حاجة، وبعدين خيرك عليا ما تكلمش فيا الا براس خشمك، وقربت منه (روبين دايبة في عبدو)

شهد كانت مركزة معاهم لكن صوتهم كان ما ينسمعش ولما شافت الحركة الاخيرة ناضت بكل علو صوت

شهد: ندى تعاالي

عبدو: حولي عليا غادي واطلعي برا بلا عار راك زي اختي!

روبين: به تمام كنت بنعاونك بالك تبي حاجة… وطلعت

عبدو: حي عليك عملة يا عبدو شهد شافت كل شي

ندى: شهد خيرك تعيطي؟ ما تروحيش خلي الهم تروح قبل

شهد: احسن لو تروح لان بنفصل عليها هالعيلة

ندى: شن دارتلك حاجة ولا شنو؟ قولي لو ضايقاتك

شهد: لالا ما دارت شي لكن هي لو تروح افضل راه

ندى: لحظة امي تنادي تو نجيك

عبدو كمل لبسه و شعره وريحته وتوكل لشهد

عبدو: فاضية شوية نبي نقولك حاجة لو سمحتي

شهد: لو عللي صار امبكري اني ما دخلنيش فيك انت وياها، ونوعدك مش حنقول لندى، ولو عندك اضافات تفضل

عبدو: اللي صار امبكري اني مالياش علاقة بيه هي تتلصق هالدحناسة بنقولك علي موضوع ثاني ونبيك تفهميني يا بنت الناس ولو سمحتي ما تفهميش غلط تمام

شهد: سكر ع الموضوع الاول، وانشالله خير قول شن في؟

عبدو: في وحدة معجب بيها ونحبها واني ماعنديش عالبنات لكن هي من الاول مش عارف شن صارلي ، شن تنصحيني ندير معاها راسها مسكر وملكة في العناد

شهد: ههههه، ومنو سعيدة الحظ، وضحلها كل شي احسن ليك وليها

عبدو: اني سعيد بيها اكتر، باهي امالا اسمعي تو نقولك مني هي سعيدة الحظ علي قولتك

شهد من داخل في شوية نار لان عبدو مايتعوضش: قول هي نسمع فيك

عبدو: من الاخير ومنغير لف ودوران انتي راه، وحتى امي وخوي يعرفو، تعرفيني مش متع بنات لكن هكي منغير ولا شي، نتمنى ما ترفضيش، فكري علي راحتك وردي عليا

شهد اول مرة حد يعترفلها بحبه فانصدمت شوية ووخرت في وراها مرايا متع الدولاب خبطت فيها وطلعت من الدار تجري للصالة قعمزت منغير ما تتكلم حتى كلمة لين روحت روبين بش قدرت تستوعب….

نورية حست بشهد متوترة وعبدو مشت لولدها مرات دار لقطة للبنت غلط وهكي

نورية: خيرك ياولدي حايس في روحكو؟ والبنت حتى هي حسيتها مش علي بعضها

عبدو: اني قلتلها معجب بيك ونبيك لكن هي خافت وهربت اني منبيش نخسرها يا امي

نورية: ممكن توترت من الكلمة بس عادي خليني نتصرف

مشت نورية قعمزت جنب شهد وندى كانت تتكلم في التليفون طبعا نورية حكت لشهد الموضوع

شهد من داخل فرحانة مع انها هي رافضة الارتباط، لكن بعد ما كلمتها نورية زادت ارتاحت وبعدها في الاخير قالت: خويلة الموضوع شوية كبير عليا لكن حنفكر فيه وانشالله خير

روحت شهد وما فتحتش الموضوع لندى لان لو عرفت حتزعل بحكم ان خوها حيخلي شهد معش تجي بموضوعه

قعدت تفكر في الموضوع، لقت ان القبول اقرب من الرفض والعلاقة ناجحة، العيلة كويسة ومن جميع الجهات فكرت لقت الموضوع نااجح

بعد حوالي اسبوع شهد وعيلتها انتقلو لحوش جدها(عيلة بوها) في جهة قريبة من الكورس والمدرسة وحوش ندى، المهم شهد قعدت مرتاحة من ناحية المواصلات

طبعا بحكم ان الحوش معاهم حتى عمهم فلازم من السترة المهم شهد تبي حوايج خدت فلوس من بوها وقعدت بين فترة وفترة تطلع تشري في محل لفت انتباهها خشت ولقاته محل عبدو…. كمية الصدفة المهم خشت وفرحت لما لقت محله قريب علي حوش جدها هدرزت وعبدو عيونه فاضحينه وبعدين جاب سيرة العلاقة اللي بينهم

شهد تحاول تقول: لا منبيش لانها ما تبيش تكون خفيفة وعيلة، لكن قعدت ساكتة جزء من الوقت وبعدين……

شهد: بكل صراحة اني فكرت في الموضوع وبصراحة اكثر اني موافقة لكن هي حاجة وحدة بس (ندى) كيف بنجيبلها الموضوع وشن حتكون ردة فعلها؟ اني مش مستعدة نخسر وخيتي علي خاطر حد معليشي

عبدو جاته غصة في قلبه: باهي خليها ع الوقت وخلاص، واني آسف

شهد: مرات الوقت هذا هو اللي يزيد من الحاجة اللي تحس فيها تجاهي

عبدو: انشالله يارب خليها عالوقت واني مهما طال الوقت حنستناك ي شهد

روحت شهد وهي حايرة قلبها يقول كملي وعقلها يقول لا، ثاني يوم في الكورس طبعا كان الصيف في نهايته قريب المدرسة تبدا، وندى خلاص طلعت من المدرسة بتمشي للثانوي وشهد شهادة اعدادية وبروحها وروبين حتى هي شهادة لكن تانوية

زينب كملت الثانوي خشت لكلية IT

كانو كلهم يهدرزو قبل ما يخشو للحصة

شهد: خايفة منها الشهادة وربي ي بنات

زينب: انتي قدها شهودة، ما تخافيش

ندى: هي واعرة لكن انتي قدها شهودتي

روبين: علي حد علمي انك شاطرة فكينا من جو السوس

كلهم قعدو يشبحو لبعض لين نادت المدربة علي ندى عندها ملاحظات، زينب وشهد قعدو يتمشو

وجي عبدو بيروح بندى، اول ما شافاته روبين مشتله جري

روبين: هلا هلا، وينك ع النت؟ علاش ماتردش عليا؟

عبدو: اول شي اني ما نقبلش في بناتثاني شي من وين جبتي ايميلي؟ ثالث شي اني في وحدة معجب بيها نبي نرتبط بيها، خلاص فوتيني

روبين: لقيتك معلق علي صورة شهد وندى فعرفتك انت وكلمتك عادي يعني،،، ربي يهنيك بيها

شهد وزينب يهدرزو في نفس الموضوع ، شهد تحاول توضح

زينب: فاهماتك والله العظيم لكن ندى مش هكي طبعها حتتفهم الموضوع صدقيني انتي خايفة بزيادة

شهد: انشالله خير…….. شوفيها كيف تدحنس عليه شوفي

زينب: ربي يتبت علينا العقل والدين معقولة هكي بايعة كرامتها! ربي يهديها،

روبين تبي اطيح عبدو لكن زعما يصير اللي تبيه؟

هدا اللي بنعرفوه في الحلقة الثالثة