رواية احتواء قلب الفصل الثامن والعشرون 28 بقلم عبير سليم

رواية احتواء قلب الفصل الثامن والعشرون 28 بقلم عبير سليم

رواية احتواء قلب البارت الثامن والعشرون

رواية احتواء قلب الجزء الثامن والعشرون

رواية احتواء قلب الحلقة الثامنة والعشرون

بعد مرور ثلاثة أيام
في ايه يا بني انت رحت و قلت عدولي انت قاعد عندك كل ده بتهبب ايه ما ترجع بقى انا والبشمهندس محتاجينك يا بني آدم انت
فهد : أنا مش قاعد بمزاجي يا صاحبي انا قاعد قوة و استجبار انا لو فمع.. تقل مش حيحصل معايا كده
هادي : يا حبيب اخوك مالك يا ضنايا
فهد : اخوك متمرمط اوي يا هادي و ربنا
هادي : هههههههه ليه بيعملوا فيك ايه العالم دي بيخلوك تمسح السلالم و اللا بتنفضلهم الشقه
فهد : ياريت يا اخويا ياريت كان اهون وربنا حمايا العزيز من ساعة ما وصلنا و بعدها عرفنا ان نجلا حامل و هو مسيطر عليها سيطرة كامله مقعدها جمبه مبيخليهاش تقوم لحظه هو اللي بياكلها فبؤها و هو اللي بيشربها اللبن و بيديها الدوا و يفضل يلعبلها فشعرها لحد ما تنام
هادي : وانت بتعمل ايه
فهد : بعمل عبيط و ربنا عشان مخسرهوش عشان انا مع كل اللي بيعمله فية ده بحبه وربنا
هادي : ههههههه أيوة يعني بردو بتعمل ايه
فهد : قاعد بتفرج عليهم لما حتشل حيجل. طوني اه يا اني ياما حاسس اني حيجرالي حاجه وربنا يا هادي لا انا خلاص تعبت وربنا
لا و تشوفه بقى و هو بيأكلها خدي دي يا حبيبتي
و هي تقولله مش قادره يا بابا تعبت من الاكل
فهو يقوللها عشان خاطر بابا حبيبك
تقولله عشان خاطر ك انت بس يا حبيبي
تفتكر يا بابا البيبي حيطلع حلو
يقوللها اه طبعا حيطلع قمر زيي طبعا
زيه ليه انا عاوز افهم أمال أنا بعمل إيه دوري أنا ايه في الفيلم ده ميطلعش شبهي انا ليه امال لو مكنتش انا البطل كان عمل ايه بطل ااه بطل من ورق ده انا محصلتش كومبارس فاكر لما كانوا بيقولوا الدور الصامت اهو هو انا الصامت ده يا اخويا
مكنش يومك يا فهد كان مكتوبلي كل ده فين بس ياربي
هادي : هههههه هههههه خلاص يا فهد بجد مش قادر وربنا
فهد : مش قادر من كلمتين امال انا اعمل ايه ده لولا حماتي اللي مصبراني وربنا كان حيجرالي حاجه كنت حرمي نفسي في البحر اللي ادامي ده و اريح نفسي انت فكرك انا بقدر اجي ناحيتها بتجرا و اقعد جمبها او اكلمها كلمه يا لهوي عارف التلميذ الخيبان اللي كان المدرسين بيقعدوه في اخر الفصل اهو انا كده زيه بالظبط وربنا
هما قاعدين مع بعض عمالين يفتكروا ذكرياتهم سوا من يوم ما اتولدت و انا قاعد على جمب اغني ظلموه
دي حماتي بتستنى اول لما تلاقيه بينام على نفسه تاخدني و تتسحب بية بالراحه عشان اعرف اقعد معاها شويه و ايه بنتكلم بالهمس قبل ما يصحى و يشوفنا
هادي : لا بجد فهد انت بتكلم بجد يا عيني عمي صلاح حالته صعبه اوي تصدق صعب علية
فهد : ده انا اللي صعبان عليا نفسي اوي و حالتي اصعب و ربنا اهئ اهئ
هادي : يا عيني يا فهد بص انت هات مراتك و تعالى قللهم عندي شغل
بص حاول تمهد معاهم الموضوع عشان مش عارف حيعمل فيك ايه الصراحه
فهد : ادعي لاخوك يا هادي
هادي : قلبي معاك يا غالي اه صحيح كنت حنسى اقولك فرح همسه و عمرو يوم الجمعه ان شاء الله يعني لازم تيجي عشان عمرو ميزعلش منك
فهد : حاجي و ربنا لاجي و علية و على اعدائي بقى اه دي مراتي مليش دعوة و اللا وربنا لاطلبها في بيت الطاعه
هادي : ياعيني عليك يا فهد الله يصبرك يا حبيبي يا سلام بقى عندي شغل
يقفل معاه : بص يا فهد انت تتكلم معاه بالراحه كده اه ده زي ابوك بردو ربنا يهديك يا صلاح يارب
تدخل ليه : فهد انت بتكلم نفسك يا حبيبي
فهد : اعمل ايه بس من غلبي
فاديه : ههههههه طب معلش تعالى ياللا الفطار جاهز
فهد : وهما العرسان فين يا ترى صحيوا و حيفطروا معانا و اللا لسه نايمين و حيفطروا لوحدهم
فاديه : هههههههه لا حيفطروا معانا ههههههه فهد معلش حبيبي انا عارفه ان صلاح مزودها معاك حبتين بس عشان خاطري متزعلش منه طب وربنا بيحبك اوي
فهد : امال لو مكنش بيحبني كان عمل ايه
فاديه : اعذره يا فهد معندهوش غيرها
فهد : و مجيبتيلوش غيرها يتلهى فيها يا اختييي
فاديه : حنعمل ايه النصيب بقى انا حقولك بعد ما خلفنا نجلاء و بقى عندها اربع سنين قلت اتابع بقى عشان اجيبلها اخ و اللا اخت لفيت على دكاترة اسكندريه و القاهره كلهم و اخدت علاج ملوش اول من آخر و عملت عمليتين و ولا في فايده و معرفتش أجيب تاني صعبت على عمك صلاح من البهدله اللي اتبهدلتها عند الدكاترة قاللي كفايه كده و ربنا يخليلنا نجلاء مع انه كان نفسه فولاد كتير و مع ذلك كان بيحبني و يخاف علية من الهوا و طول عمره احن علية من امي و ابويا و الشهاده لله عمره ما زعلني و لا قاللي كلمه تحسسني اني اقل من اي ست بالعكس طول عمره بيحبني و شايلني في عنيه و بقت نجلاء كل حياته عمره ما خرجها من حضنه و بردو مكنش بيكتم على نفسها كان يقوللي البنت لو ملاقتش راحتها مع أهلها حتدور عليها برة و الكبت للبنت مش صح كان ماسك العصايه من النص يشد و يرخي عاوزة اروح فرح واحده صاحبتي يا بابا روحي يا حبيبتي بس حوديكي و اروح اجيبك عاوزة ابات عند طنط ناديه يا بابا روحي يا حبيبتي دول عشرة العمر كبرت فحضنه عاش معاها كل مراحل حياتها هو اللي علمها ازاي تمسك القلم و تكتب اول حرف هو اللي كان بيحفظها القرآن و يعلمها ازاي تتوضا و تصللي كان بيذاكر معاها يوم بيوم لحد ما اتخرجت و بقت عروسه مبيطقش عليها الهوا لما كانت تسخن بس شويه يفضل طول الليل قاعد جمبها بالكمادات و فجأة اتاخدت من حضنه و بعدت عنه متزعلش عشان خاطري استحمله اليومين دول بس و مسيركم تمشوا و مراتك تبقى فحضنك و انا بقى اللي يطلع غلبه فية
فهد : يا حبيبتي يا ماما انا بحبك اوي
فاديه : وانا بحبك اوي يا فهد انت ابني يا فهد ربنا يكرمك يا حبيبي يارب و يهنيكم يسعدكم يارب
الحق ده عمك بينده ياللا قوم
فهد : حاضر حاضر
صلاح : تعالي يا حبيبتي اقعدي
نجلاء : حاضر يا بابا
فهد : صباح الخير يا بابا
صلاح : صباح النور يا فهد يا للا يا حبيبتي اشربي اللبن الأول
نجلاء : مش قادره و الله يا بابا مش طايقه ريحته
صلاح : معلش يا نور عيني عشان خاطري عشان نجلا الصغيره تطلع مكلبظه كده مش نشفانه و مسلوعه
نجلا : تفتكر حبقى ام حلوة يا بابا
صلاح : حتبقي احلى ام في الدنيا كلها يا قلب بابا
نجلاء : و حضرتك حتبقى احلى جدو في الدنيا كلها يا حبيب قلبي انا
فهد : الصبر من عندك يارب حتشل و ربنا ماما بقولك عاوزين شجرة و كوبايتين ليمون هنا لو سمحتي
صلاح : ده ماله ده في حاجه يا فهد
فهد : اااه في
صلاح : في إيه اتكلم
فهد : حاضر اهوه حتكلم بسم الله الرحمن الرحيم ربنا يجعل كلامنا خفيف عليهم بص يا عمي طبعا انا عارف انك مبسوط جدا و احنا هنا و انا و ربنا العالم مبسوط بشكل ياااه مش قادر اقولك لدرجة اني مش عاوز امشي بس حنعمل ايه بقى غصب عني والله فرح عمرو صاحبي و الشغل كمان مستنيني ياعمي و لازم ارجع و إلا انا و بنتك حنقعد نشحت على باب السيده
صلاح : و لا يهمك يا فهد روح يا حبيبي احضر فرح صاحبك و شوف شغلك ربنا يقويك يارب و تبقى اكبر محامي في الدنيا كلها يا حبيبي
فهد : بجد يعني حضرتك مش زعلان
صلاح : و ازعل ليه يا حبيبي بالعكس خالص
فهد : ياااه الحمد لله ريحت قلبي و الله نجلاء اعملي حسابك بقى نتغدى و نمشي يا قلبي
صلاح : حيلك حيلك مين اللي يمشي
فهد : يا لهوي مين اللي يمشي ايه بابا هو حضرتك فقدت الذاكرة احنا اللي ماشيين
صلاح : قصدك انت ماشي يا حبيب ابوك روح شوف شغلك و عيش حياتك لكن بنتي حتفضل هنا انا لسه مشبعتش منها سيبهالي شويه
فهد : انا بردو قلت ازاي يوافق كده بسهوله اننا نمشي اتاريك بقى عاوز تزحلقني عشان يخلالكم الجو
لا على جثتي و ربنا انا ماحمشي من هنا غير و مراتي فايديا
فاديه : اهدى يا فهد عشان خاطري صلاح مينفعش يا حبيبي فهد يمشي لوحده ميصحش يا صلاح دول لسه عرسان يا حبيبي يعني يرضيك هو يمشي و بنتك حبيبتك تقعد بعيد عن جوزها
صلاح : نجلا انتي عاوزة تروحي معاه
نجلاء : اااه يا بابا
صلاح : اااه يا ندله
نجلاء : معلش يا بابا ده غلبان و الله وانا حجيلك تاني و الله يا حبيبي
صلاح : حتجيبها
فهد : حجيبها و ربنا بس بنروح ابوس ايدك
صلاح :غوروا جتكم الارف
فاديه : ماكلتش يا صلاح
صلاح: نفسي اتسدت
يسيبهم و يدخل اوضته وفهد يدخل وراه و يقعد جمبه : زعلان للدرجه دي
صلاح : بتوحشني اوي يا فهد البيت من يوم ما خدتها و مشيت بقى ملوش طعم
انا عارف يا فهد انك زعلان مني بس غصب عني انا محيلتيش غيرها يا فهد كل حاجه وحشه من غيرها انا كل ما امها تعمل اكله هي بتحبها مبقدرش احطها فبؤي كل ما بقعد في مكان بتحبه بسيبه و اقوم
فهد : للدرجه دي
صلاح : بكرة لما تتحط فنفس موقفي حتحس بية و تبقى وقتها قول الله يرحمك يا حمايا كان عندك حق
فهد : متقلش كده ربنا يطول في عمرك و يخليلك لينا و تشوف ولادنا و ولاد ولادنا
صلاح : يا لهوي دول كانوا يحطوني في المتحف بقى
فهد : هههههههه ربنا يديك الصحه
صلاح : امانه عليك تخللي بالك من نجلاء و تأكلها كويس دي حامل يا فهد
فهد : اطمن و الله نجلا دي حبيبة قلبي
صلاح : عارف يا حبيبي
تدخل نجلا : حبيبي اللي زعلان لا مقدرش على زعله يا ناس
صلاح : امشي يا بكاشه يا بتاعة فهد
نجلاء : لأ و ربنا مقدرش على زعله يا ناس
صلاح : انت واقف كده ليه اتفضل اطلع برة عاوز اقعد مع بنتي شويه
فهد : انت اتحولت كده ليه يا لهوي منك حتشلني
نجلاء و صلاح : هههههههه هههههههه
نجلاء : حبيبي هو فرح عمرو امتى
فهد : يوم الجمعه ان شاء الله يا حبيبتي
نجلاء : و حينفع نرقص معاهم يا فهودتي
فهد : اااه ان شاء الله ده انا ححزمك و انتي ترقصي ده على اساس انك متجوزة سوسن
نجلاء : نرقص سلو حتى
فهد : لو على السلو نرقص مفيش مشكله
ايدك يا قمري عشان نرقص
نجلاء : هههههههه قلبي يا ناس
هادي : ترقصي يا جنتي و اللا تعبانه
جنه : لاء يا حبيبي انا مش تعبانه
يطلعوا كلهم عالبيست و يرقصوا سلو جمب عمرو و همسه اللي الدنيا مكنتش سايعاهم من الفرحه
عمرو : الف مبروك يا همستي
همسه : مبروك لينا يا حبيبي
عمرو : من امتى حبيبك
همسه : من اول لحظه عيوني شافتك فيها يا عمرو
عمرو : ياااه اول مره اعرف ان اسمي حلو كده
تنتهي الرقصه و يقعدوا في الكوشه و الكل يروح ناحيتهم عشان يتصوروا معاهم
والد عمرو و مامته : الف مبروك يا ولاد
الله اكبر على جمالكم ربنا يحميكم من العين يا حبايبي يارب
همسه : ميرسي يا ماما ربنا يخليكي
يطلع ابوها و مامتها و جدتها عشان يسلموا عليها و يتصوروا معاهم
و بعدهم يونس و اسماء و جيلان و بيسان
و هادي و جنه و فهد و نجلاء و كل زملاء العمل و الأصدقاء الكل يسلم عالعرسان و يباركولهم و يتصوروا معاهم
تنزل من العربيه و تروح ناحية القاعه تلاقي اللي بينده عليها فتلتفت ليه : عدي
عدي : مبروك لاختك
ذكرى : شكرا يا عدي
عدي : انتي لسه جايه دلوقتي ده انا قلت انك اكيد معاها من الصبح
ذكرى : عادي يا عدي
عدي : ماشي ادخلي انتي و انا حدخل بعدك عشان محدش يشوفنا و احنا داخلين مع بعض
ذكرى : ماشي
تدخل ذكرى و تتحرك بين المعازيم و اول ما تشوف همسه في الكوشه و هي لابسه فستان الفرح تحضنها اوي : الف مبروك يا حبيبتي
همسه : الله يبارك فيكي يا ذكرى
تسلم ذكرى على عمرو : الف مبروك يا عمرو
عمرو : الله يبارك فيكي يا ذكرى
يقرب عدي من عمرو و همسه و يسلم عليهم : الف مبروك يا عمرو الف مبروك يا همسه
عمرو : الله يبارك فيك يا عدي عقبالك أن شاء الله
عدي : ان شاء الله يا عمرو
و يروح على تربيزة يونس : حمد الله على السلامة يا باشمهندس
ازيك يا فهد عامل ايه
فهد : الحمد لله عقبالك
عدي : ان شاء الله قريب اوي عن اذنكم
يبص فهد ليونس و ميتكلموش
اما ذكرى تروح تقعد جمب مامتها و تسلم على جدتها : كده بردو يا تيته يرضيكي ان همسه متعزمنيش عالفرح و اني اعرف من بابا لولا كده مكنتش عرفت ان اختي بتتجوز
جدتها : و انتي حد عارف اراضيكي فين يا ذكرى و بعدين دي كانت رغبة همسه هي اللي حددت عاوزة مين يحضر و مش عاوزة مين
ذكرى : افهم من كده ان وجودي مش مرحب بيه
مامتها : انتي بتقولي ايه بس يا ذكرى ده فرح اختك يا حبيبتي و انتوا اخوات و ملكمش غير بعض ولازم تكوني جمب اختك
ذكرى : اخوات اه بإمارة انها مكنتش عاوزاني احضر فرحها و اني لولا عرفت بالصدفه مكنتش عرفت اصلا و لا حضرت
جدتها : اللي حصل بقى
تبص ذكرى الناحيه التانيه تلاقي هادي و هو قاعد و ماسك جنه من ايديها و بيتهامسوا و بيضحكوا و عنيه كلها حب ليها فتركز عنيها عليهم شويه لحد ما جنه تاخد بالها منها : هادي مش اللي هناك دي ذكرى اخت همسه
هادي يبص لها و ملامح وشه تتغير فثانيه و كأن عمره كله عدى عليه في اللحظه دي صوتها بيرن فأذنه : عشان انت لقيط ملكش اب و لا تعرف انت مين
يغير وشه بسرعه : أيوة هيا
جنه : حلوة اوي يا هادي
هادي و هو بيبوس ايدها : انتي احلى يا نور عين هادي بحبك يا جنتي
جنه : بحبك يا هادي
تحس ذكرى انها اتضايقت لما لمحته اول ما شافها غير وشه بسرعه ولما شافته بيبوس ايد جنه
تقرر تقوم و تخرج من القاعه تلاقيه بردو بينادي عليها : انتي ماشيه بدري كده ليه
ذكرى : مش عاوزة اقعد
عدي : قشطه يبقى نروح عندي نكمل سهرتنا سوا
ذكرى : مليش مزاج عاوزة اروح
عدي : اسمعي الكلام بقى و انا حروقلك مزاجك عالآخر و حتنبسطي اخر انبساط
ذكرى : تعبانه يا عدي صدقني
عدي : طب و لو قلتلك اني عندي حتة ملف بتاع مناقصه جديده حتخللي الناس بتوعك يطيروا في السما
ذكرى : لا لو كده يبقى افكر
عدي : مفيش وقت للتفكير انتي حرة انا حركب عربيتي و حطلع الشقه وانتي و راحتك بقى
تركب ذكرى عربيتها و تحصلله من غير تفكير : كنت متأكد انك جايه وحشتيني اوي
ذكرى : عدي وحياتك
عدي : انتي اللي حياتي و قلبي تعالي بقى متبقيش غلسه يسحبها من ايدها على اوضة النوم و هي ماشيه وراه من غير تفكير و لا احساس خلاص بقى كل اللي هاممها و شاغلها الفلوس و بس
بعد شويه تقوم و هي تعبانه و حاسه ان الدنيا بتلف بيها : مالك يا بطل اتحسدتي و اللا إيه
ذكرى : قلتلك تعبانه و مليش مزاج انا قايمه
عدي : كده بردو بتقلبيني ماشي على كيفك يا مزة
تقوم ذكرى و هي بتلف نفسها و تدخل الحمام و فجأة الدنيا كلها تلف بيها و متحسش بنفسها
يسمع عدي صوت ارتطام يجري يفتح عليها باب الحمام يلاقيها مرميه في الأرض : ذكرى
يحاول يفوقها فتفوق بعد شويه : إيه ده انا فين
عدي : اغمى عليكي و شيلتك و حطيتك هنا بس تعبتيني أوي على ما فوقتي
ذكرى : اااه راسي بتوجعني اوي
عدي : مانتي عشان وقعتي يا زوزو مش بقولك اتحسدتي
خليكي بايته هنا انتي تعبانه مش حتقدري تروحي و بكرة ابقي امشي حطفيلك النور و نامي متخافيش مش حاجي ناحيتك انتي اصلا خلصانه يا باشا
ذكرى فعلا تغمض عنيها و تنام من غير ما تحس
الفرح ينتهي متأخر و الكل يسلم عالعرسان و كل واحد فيهم ياخد عيلته و يمشي و هما بيتمانولهم السعاده
اسماء : عقبال بناتنا يارب يا يونس نفسي افرح بيهم
يونس : ان شاء الله يا حبيبتي نفرح بيهم
اسماء : يارب يا حبيبي يارب
هادي : حبايب قلبي اللي كانوا منورين الفرح عقبالكم يا حبايبي يارب
بيسان : ميرسي يا ابيه هادي العروسه كانت حلوة اوي زي القمر
هادي : و انتوا كمان حلوين و زي القمر يا بوسي
هما حلوين بعقل يا عمتي دول يخبلوا يطيروا النوم من العين و اللا طريقة كلامهم بصي بيصوصوا كده زي العصافير يا لهوي بانا ياما و اللا المصطلحات الانجليزيه بينطقوها عسل ده انا احنا مكناش بنتعلم عنجليزي واصل
جميله : هههههههه وربنا انت ملكش حل شفتي ابنك يا غاليه يا عيني مخه ضرب
غاليه : طول عمره يا اختي بس المره دي العمليه مستعصيه معاه و زي ما نتي شايفه كده من وقت ما فاروق رجع البيت بالف سلامه و هو مفيش على لسانه غير البنتين التوأم اللي شافهم و عماله اقوله خلاص بقى يا حبيبي انساهم انت خلاص مش حتشوفهم تاني
أدهم : لا مين قال كده حشوفهم تاني ان شاء الله
جميله : فين بقى ان شاء الله مش بتقول باباهم خرج هو كمان
أدهم : من هادي اخوهم هو اخد رقم تليفوني و انا معايا رقم تليفونه حكلمه و اتصرف حعمل اي حجه عشان اشوفهم انا عرفت ان مراته حامل حسال عليها
غاليه : إيه حتروح تولدها
جميله : على اساس انه دكتور نسا و اللا دكتور بشري من أساسه ده انت دكتور بيطري يا بني
أدهم : حتصرف بقى
غاليه : الحقيني يا جميله ابن اخوكي مخه ضرب خلاص و انت حتي لو شفتهم تقدر تقوللي حتعمل ايه يعني انت فاكر مثلا انك حتى لو اتقدمت هما حيوافقوا عليك
جميله : لا بقى يا غاليه فدي ملكيش حق و هو في زي أدهم
غاليه : طبعا مين يشهد للعروسه ما هو حبيب القلب
بس ازاي واحده عايشه في القاهره حترضى تيجي تعيش هنا فبنها
أدهم :على اساس اننا عايشين في عشة فراخ ده احنا عايشين في فيلا و عندنا مصنع و مزارع و اصطبل خيول و مزرعة مواشي في ايه يا امي هو احنا شويه و اللا ايه
غاليه : و الله العظيم انت اهبل و الكلام معاك يضيغ الوقت عالفاضي فين مراد اخوك مشفتهوش من الصبح فينه ييجي يرحمني منك شويه الله يرحمك يا سليم يابني يارب محدش كان بيريح قلبي غيره كده تروح و تاخد معاك ابنك يا سليم وحشتني اوي يا حبيبي
جميله : كده بردو يا غاليه هو ده اللي اتفقنا عليه
غاليه : مش قادره يا جميله غصب عني ابني وحشني اوي انا بتكلم معاكم لكن ربنا وحده العالم باللي بية مانتي مجربه و عارفه يا جميله
جميله : طب عالاقل انتي ربنا معوضك يا براجلين ربنا يحميهم لكن انا معييش حد و عشت عمري كله وحيده لا عيل و لا راجل
أدهم : كده بردو يا عمتي هو مش احنا اللي دايما تقولي علينا ولادك و ان ربنا عوضك بينا
جميله : ولادي و الله يا حبيبي بس ابني وحشني اوي يا أدهم ابني اللي ملحقتش اشوفه و لا اخده فحضني و لا اشم ريحته يادوب فتحت عيني و بقوللهم فين ابني لقتهم بيقولولي البقاء لله ربنا استرد وديعته
استرد وديعته اااه يا قهرة قلبي عليك يا ضنايا ده انا قلت هو اللي حيعوضني عن أبوه هو اللي حعيش عشانه عمري كله راح مني بسهوله كده من قبل حتى ما اشوفه و لو مرة واحده مرة واحده طب كان جالي ليه ليه
غاليه : حقك علية يا جميله حقك علية يا اختي حسه بيكي و الله حسه بيكي ربنا يعيننا و يعوصنا خير يارب
أدهم : خلاص يا جماعه حقكم علية انا عشان خاطري متعملوش كده ربنا يخليكم لينا يارب
جميله : ربنا يباركلنا فيكم يا حبيبي يارب
أدهم : امال رشا مفيش اخبار عنها
غاليه : لاء من يوم ما غارت ومشت و مفيش عنها اخبار منها لله البعيده هي السبب في كل ده
جميله : السبب ليه بس يا حبيبتي ده عمره
غاليه : ليه نسيتي انها كانت متخانقه معاه قبل ما يروح لقضاه يا حبيبي خلته اخد ابنه و جرى بيه من ادامها زي ما يكون مش هاين عليه يروح لوحده من غير ابنه مش هاين عليه يسيبهولها عارفها مش حيهمها غير نفسها
جميله : خلاص يا غاليه اهدي يا حبيبتي فين مراد يا أدهم
ادهم : مراد مع عاصم صاحبه
جميله : اه صحيح ده بكرة فرحه نسيت
عقبال فرحكم يا ولاد اخويا يارب
أدهم : يارب يا عمتي بس البنتين التوام القمرات دول انا مستعد اعمل اي حاجه بس اخد واحده منهم
غاليه و هي بتحاول تهدى عشان جميله : وانت على كده بقى محدد عاوز مين فيهم
أدهم : لاء
غاليه : الصبر من عندك يارب يعني ايه لاء
أدهم : يعني مش حتفرق يا ماما اي واحده فيهم و خلاص مش حتفرق ام شعر اسود و اللا ام شعر بني ماهما كده كده نسخه من بعض
جميله : لاء ازاي بقى يا أدهم بيفرق طبعا بيفرق في الطبع و الصفات مانت عندك ابن الحاج عثمان ماهو عنده ولدين توام واحد ماشاء الله عليه و على اخلاقه و التاني سهران كل يوم عالقهاوي و سمعته زي الزفت و اهم تواءم
أدهم : بصوا احنا نظبط الدنيا بس و مش حتختلف اخويا ياخد اللي عاوزها وانا اخد التانيه انا راضي يا ستي
غاليه : و انت كنان وزعت التركه انت واحده و مراد واحده طب افرض بقى مراد مش عاوز
أدهم : لا مفيش حاجه اسمها مش عاوز مش بمزاجه احنا اخين ناخد اختين مفيهاش جدال دي.
غاليه : يارب صبرني شيليه ادامي يا جميله روح شوف اخوك فين يا بني آدم انت حتجنني
أدهم : حروحله حاضر عند العريس زمانهم دلوقتي بيحموه و بيدلعوه و يدلكوه ما هو بكرة حيتجوز بقى ويعيش يا بخته عقبال عندنا يارب
😢ايوة يا حاج ابراهيم الليله حنته و بكرة دخلته ان شاء الله
ابراهيم بحزن : ربنا يسعده و يهنيه يا مرسي
مرسي : انت لسه زعلان يا حاج ابراهيم
ابراهيم : حزعل من ايه بس يا مرسي ده موضوع فات عليه سنين انا اللي قاهرني ان كان المفروض ان عاصم ده يبقى ابني انا و إبنها وتبقى حنته هي فرحتي انا و اتباهى و اقول بجوز ابني لكن حقول ايه كل شئ نصيب
مرسي : معلش يا حاج ابراهيم ربنا يعوضك خير
ابراهيم : يعوضني خير في ايه و بمين هو انا معايا حد مانا اهوه زي مانت شايف مقطوع من شجرة لا عيل و لا تيل و على ايدك صرفت كتير و رحت و جيت و ولا فيه فايده لا نفع معايا طب و لا دوا و اهوه اللي حبتها حب الدنيا كله استحملت شويه و لما زهقت و كان نفسها تبقى ام و ده حقها سابتني و خلتني طلقتها و اهيه انجوزت و خلفت و النهارده حنة ابنها و بكرة فرحه يبقى عوض ايه اللي حستناه هو في حسرة اكتر من كده
و رحت انجوزت بعدها واحده و اتنين و تلاته لكن لا خلفت و لا لقيت راحتي مع واحده منهم زي ما يكون الزمن حلف علية ما ارتاح و لا قلبي يطمن
مرسي : ياااه مكنتش اعرف ان جواك كتير اوي كده يا حاج ابراهبم
ابراهيم : انا اللي جوايا محدش في الدنيا دي كلها ممكن يحس بيه اه لو الزمن يرجع بية مكنتش سمحت لحاجات كتير اوي انها تحصل و مكناش وصلنا كلنا للي احنا فيه دلوقتي
صحيح ان ربك لبالمرصاد يمهل ولا يهمل
مرسي : انت تقصد ايه يا حاج ابراهيم اوعى يكون قصدك على الموضوع القديم
ابراهيم : و هو في غيره يا مرسي تفتكر ان كل اللي بيحصل معانا ده مش ذنبه ذنب اللي عملناه
ده عقاب ربنا لينا يا مرسي هو اللي احنا عملناه ده شويه ده احنا عملنا اللي الشي.. طان نفسه ميعملهوش اااه و الف اااه
كان عقلي فين لما سمعت كلامه و مشيت وراه بقى انا اعمل كده في ابن عمي بدل ما اصون لحمه و اخده فحضني اعمل فيه كده بايدي
ياااه تعرف يا مرسي انه لو كان عاش كان زمانه دلوقتي بقى راجل اد الدنيا كان زمانه كبر و اتجوز و خلف
يا ريتنا كنا سيبناه يعيش ده كان هو ده اللي حيكونلي عوض من ربنا و حيكونلي الابن اللي مخلفتهوش لكن حنقول ايه و نعيد ايه حسبي الله ونعم الوكيل في اللي كان السبب
مرسي : معاك حق فكل كلمه قلتها ربنا اخد حقه مننا كلنا كل واحد فينا قلبه وجعه على حاجه محدش فينا ارتاح و لا داق طعم الراحه ما عدتش يا حاج لا هي عدت علينا
اديك اهوه و اخوك و انا اللي ربنا وجع قلبي على بتي و ربك خدها عنده و هي لسه عروسه ملحقتش تنام على فرشتها و لا تفرح بحاجتها و يادوب ولدت و راحت للي خلقها و جوزها رمالنا البت بتها و راح اتجوز و عاش حياته و انا و امها اللي انكوينا بفراقها
ابراهيم : قللي يا مرسي انت عارف يعني ايه ضنا ازاي جالك قلب تعمل اللي عملته ده وتنفذ اللي طلبه منك اسماعيل ازاي جالك قلب تعمل اللي عملته ده فعيل لسه يادوب عينه بتفتح للدنيا ازاي قدرت تحط عينك فعنيه و انت بتعمل فيه كده و بتدي لنفسك حق مش من حق اي حد في الدنيا انه ينفذه
مرسي : لا انا معملتهاش و لا جالي قلب اعمل فيه كده انا عندي ولاد مقدرتش مقدرتش انفذ اللي هو طلبه مني
ابراهيم : الله امال عملت ايه يا مرسي فهمني قللي عملت ايه في الواد
مرسي : خلاص معدش ليه لزوم الكلام دي حاجه راحت من سنين
إبراهيم : استنى عندك مش حسيبك تمشي يا مرسي من غير ما افهم ايه اللي حصل بالظبط
مرسي : خلاص بقى ليه عاوز تفتح و تقلب في دفاتر قديمه فات عليها عمر بحاله مش عاوز مشاكل بقى اللي راح راح خليني اربي البت الغلبانه اللي معادش ليها في الدنيا غيري
ابراهيم : و ربنا يا مرسي و ربنا مش خايف من بقية حسابه متفتكرش ان الحساب كده خلاص اتصفى لا يا مرسي دي البدايه و ده حساب الدنيا مبالك بحساب الاخره
متخافش يا مرسي من حاجه بت بنتك ليها رب مش حينساها لكن انا لازم افهم ايه اللي حصل و عملت ايه في ابن عبد الرحمن الله يرحمه وديته فين يا مرسي قللي الله يخليك انا عبد الرحمن مبيفارقش بالي و لابيسيب أحلامي دايما يجيلي في المنام و يلومني بيعتب علية و يقوللي يا خسارة صلة الرحم اللي بيننا يا ولاد عمي ياللي مكنش لية غيركم في الدنيا ياللي كنت بعتبركم اخواتي مش ولاد عمي
خلص ضميرك من ربنا و احكيلي اللي حصل يا مرسي يمكن العقاب يقف و الحساب يخلص و نرتاح كلنا
مرسي : حتكلم حتكلم يا حاج ابراهيم حتكلم عشان انا تعبت و الحمل زاد على صدري و النوم بقاله سنين مجافي عيني و نفسي ارتاح حتكلم و حقولك على كل حاجه و كل اللي حصل من وقت ما اخوك اسماعيل كلمني لحد اليوم المش.. *ئوم ده

يتبع….

لقراءة الفصل التالي : اضغط هنا

لقراءة باقي حلقات الرواية اضغط على : (رواية احتواء قلب)