رواية التضحية الفصل التاسع عشر 19 بقلم آية حسن

رواية التضحية الفصل التاسع عشر 19 بقلم آية حسن

رواية التضحية البارت التاسع عشر

رواية التضحية الجزء التاسع عشر

رواية التضحية الحلقة التاسعة عشر

اكرم: ولد طرف وقنين، لكن عنده ع البنات نوعا ما فقد بوه وهو صغير، سيبه وخلاه مع امه مستحيل يرضى شي فيها لانها هي الوحيدة اللي قعدت معاه، رباه جده لكن قبل فترة قصيرة توفى 💕
بريق: بنت جنسيتها سعودية لكن عايشة في ليبيا، الكبيرة في عيلتها امها من الطباع الواعر لكن معتمدة عليها في كل شي، عندها حلم كبير ومالكة لمحل علي دورين للفيلوات، للامانة حلو كله، شن اللي يخليها قريبة من روايتنا زعما؟ 💕
الحلقة التاسعة عشر🔥
#شهد_الساعدي
ندى: كلميلي امي توا تقولك، اني معش فهمت شي 😧
ليال ومرام خافو يحسابو نوري سيب ندى ياناري💔
شهد كلمت نورية: ايواا خويلة كيف حالك وصحتك؟ 🦋
نورية: الحمد لله، انتي شن صحتك توا انشالله احسن؟ 💕
شهد: الحمد لله، ندى مصدومة شن في صايرة حاجة؟ 🤔
نورية: كلمتني ام نوري وقالو العرس بعد اسبوعين حني مجهزين كل شي وحتى البطاقات موزعات لان الموعد الاول هكي والتاجيل كان كلام بس غر ندى مكبرة الموضوع هلبا مزال تبي تعطل متلا؟ 🤔🤔
شهد: اي عندك حق ربي يتمم بالخير 🦋
سكرت شهد الخط وفهمت البنات المصدومات، وكلهم فرحو لندى لانها قداش ليها تستنى 🖇🥀
مرو الاسبوعين، شهد تعبانة لكن توتي مع ندى لان زينب مش معاهم تزوجت فمضطرة شهد تقعد مع ندى 🖇🦋
حتى يوم الحفلة مع ندى من الصبح ومشت معاها للمزين لين وصلو للصالة جت خنساء مرت احمد خو ندى ومعاها ولدها (عبد الرحمن) عمره سنتين 🥺❤

خنساء: شهودة، شفتي ولدي، ماقلتيش عليه شي ☺️💕
شهد: الله واحد عليه، حويته ع العوينات اللي زي البحر🧿💙
ندى: زي عمه، الله يرحمه ويسامحه يارب العالمين🥺💔
شهد قعمزت وشدت عبدو الصغير وقالت: انشالله عمرك اطول من عمره واحلى من عمره يارب العالمين💔
ندى وخنساء يشوفو لشهد، معقولة مزال تحب عبدو؟ 💔
شهد: هي انتي وياها ياسر بلا بكي، ندوش بتحدفي الباقة؟
ندى: لالا مانبيش بنعطيها لاي وحدة نعرفها مخطوبة وخلاص 💐💐💕
طلعت شهد بتشوف نورية تعرفو من لقت؟ روبين 😠
روبين: اهلاا شهودة كيف حالك، عقبالك يارب😈
شهد: لو سمحتي ماتسلميش عليا وخليك بعيدة، لو نسيتي اللي درتيه، اني لا، نحب نطمنك مش حتشوفيني لابساته لان من من اولوياتي يا… عاقلة 😉
روبين: قداش ما قلبك اسود 😧شن تقصدي بكلامك؟ 🤔
شهد: اي قلبي اسود، لما تحسي احساسي تو تعرفي، ربي ياخد فيك الحق 🦋
مشت وخلتها، طبعا العريس يعز شهد لدرجة كبيرة خشت وسلمت وصورت مع العروسين وطلعو للصالة 🤤🔥
خنساء: شهودة تعالي نبيك شوية، اسمعي تعرفيني نعزك، محل عبد الرحمن يبو يبيعوه، واني نبي نعطيك علم لانك وحدة من العيلة، احمد هو اللي قالي نقولك.
شهد: اولا واخيرا ح ينباع عادي، صحتين ع الشاري، صح اني كنت نبي ناخده لكن ماعتقدش توا الحق ☺️
روبين بخبث سمعت كل شي وكيد عندها خطط زي كل مرة، طلعت شهد علي غفلة شافت روبين زبطتها سمعتهم 😠
تمت الحفلة بكل نية طيبة من ناحية العرسان، لكن في ريحة خبث بدت تفووح😈
شهد قررت تشري محل عبدو، شاورت عيلتها ووافقو، توكلت لاحمد وقالتله لكن للاسف المحل نباع💔
احمد اعتذر من شهد لان لو يعرفها تبيه كان خلاه 🥺
تعرفو من شراه؟ واحد من طرف روبين، طبعا شهد ماوقفتش، وعرفت القصة اللي كالاتي: روبين وعدت الشخص اللي شري المحل بحقه لكن منين عندها هي؟ فالشخص هدا قبل بعرض شهد لكن زاد في سعره 10الاف ومع ذلك شهد شرت المحل✌🏻
بعد ما ارتاح بالها من ناحية المحل تفرغت للجامعة، بعد حوالي يومين كلمت علي تبيه معاها لان هي ماتعرفش شي في كلية الهندسة وهو طبعاا متخرج منها 💕
علي وافق وكان يوم عيد ميلادها وهو عارف، ف شرط عليها انها تروح معاه لحوشهم بعد ما يكملو الاوراق
تلاقو وسجلت شهد وبعد شهر امتحانات القبول، روحت مع علي لحوشهم لقت ليال وسعاد مجهزين عيد ميلاد بسيط لشهد كان عيدها ال18🎂🔥
فرحت معاهم مع انه كان غريب شوية الصبح وهكي لكن الجو جميل، وبعدين فتحو موضوع خطوبة ليال ومحمد💍
سعاد: كلموني الناس يبو يعطو كلمة، سالنا ع العيلة الحق ماعاب فيهم حد، الا ان هما يسكنو بعيد علينا بس😓
شهد: اي صح، ومدامه يسكنو بعيد ديرو زي علي فضانية وبيان مع بعض 🦋
صارت الخطوبة علي قد النية حلوة وبسيطة 💍🖇

شهد مع امها علي سفرة الغدي 🦋
شهد: بعد غدوة امتحان القبول، خايفة وربي هي🥲
امل: ربي معاك يابنتي، لكن هالمحل اللي شريتيه كيف يقعد مسكر هكي معقولة؟ 🤔
شهد: خليه توا، في محل بناخد منهم بضاعة، انشالله خير وخلاص 🦋
دارت شهد امتحانها والحمد لله قبلوها في كلية الهندسة ✌🏻
وجي التجهيز لعرس ليال ومحمد وسارة وعلي مع بعضهم كان العرس متعب لان خويلة سعاد ولدها وبنتها يعني طقوس عرس البنت وعرس الولد مع بعض ويوم الحفلة كان الاصعب شهد مع سعاد طول الوقت، خشت ليال ومحمد وصورو وفرحت في حفلتها وبعدين طلعو بكري لان الدخول في مصراتة، المهم سعاد دمعت لان بنتها بعيدة عليها، مشت معاها خالتها وبناتها والباقي قعدو حضرو دخول علي وتم العرس الاكتر تعب في هالرواية 🥵❤
الكل حب وتزوج الا شهد، وفي الذكرى الرابعة لوفاة عبد الرحمن شهد وكأنها الذكرى الاولى او كأنه توفى امس، بكي ودموع بس، بعد ماتهنت علي صاحباتها وقرايتها وشرت المحل قعدت بروحها 💔
مقعمزة شهد تتصفح وتبكي لقت شاب منزل منشور علقت عادي جداا عليه💌
الشاب: نكملو مع بعض، وحيدين الحال من بعضه 🥺💔
شهد معش ردت ونست الموضوع، ناضت صلت وكلت حاجة وبعدين خشت ع الرسائل لقت نفس الشاب باعتلها رسالة تقول: يسعد مساك 🥀
شهد ردت: ومساك، يارب 🦋
الشاب: ركبني اليأس قلت مش حترد، اسمي اكرم 🥀
شهد: اسفة الحق كنت مشغولة، عاشت الاسامي، اني شهد🦋
اكرم: عاشت الاسامي شهودة، عرفيني بيك اكتر ☺️☺️
عرفت شهد بنفسها واكرم برضو وهدرزو شوية مع اسئلة 🥲
اكرم: شهودة، ارتبطتي قبل؟
شهد: اي ارتبطت والظروف فرقتنا، توفى من 4سنين 💔
اكرم: الله يرحمه، اسف لو ازعجتك بالموضوع، حبيت نسال بس 🥲🥲
شهد: لالا عادي ماادور شي، وانت جربت الارتباط قبل او لا؟
اكرم: كنت مرتبط وبروحها سيبت وتخلت واختارت صاحبي بعدي ماتبيش تباعد، وتوا تبي ترجع 🙂💔
شهد: ربي يهديها، ماتفهمهاش كيف، عموما فرصة سعيدة اكرم🦋☺️
اكرم: اني اسعد بالتعرف عليك، شكلك مشغولة؟ 🤔
شهد: والله غدوة اول يوم ليا في الجامعة نوتي في روحي ☺️
اكرم: بالتوفيق، الحق اني نتمنى نكمل قرايتي، لكن ماتنفعش القرايا توا، الواحد لازم يكون روحه اولى ☺️👌🏻
شهد: صح مابعدكم انتو الشباب كله علي راسكم، عموما موفق وربي يحفظك ويبعتلك بنيت الحلال ☺️🤲🏻
اكرم: ويحفظك يارب، منغير لف ودوران، ترضي تكوني انتي بنيت الحلال هادي؟ …فكري وردي عليا غدوة 🥺🥀
شهد معش ردت، قلبها يقول كملي عقلها يقول فكري 🥲
وكلت امرها لله وتوكلت تاني يوم للكلية، طبعا الوضع جديد، لقت بنية زيها اول يوم فتعرفو علي بعض🖇
شهد: هلا، اسمي شهد، الوضع زي بعض اول يوم معليشي🥲
البنت: اهلين، اني بريق، اي تعرفي مستغربة شوية اني🥲
شهد: سالت ع المحاضرة طلعت بعد ساعة، تعالي نقعمزو في الكافي 🤍🕊
بريق: تعالي هي نقعمزو ونهدرزو حسيت روحي نعرفك من قبل ☺️🦋

شهد: لحظة بس انتي صاحبة المحل اللي بناخد منهم البضاعة، جيتك من سبوعين فاتو 🦋
بريق: اي اي صح، تفكرتك شهودة، شنجوك 🥺❤
شهد: الحمد لله اني مرتاحتلك من قبل تعالي نبيك في موضوع بناخد رايك فيه 🤤
بريق: تعالي هي توا نحللو كل شي مع بعض هي🤤
شهد: تمام هي، وحكتلها قصة اكرم بكل صراحة 🥲
بريق: حسيته مستعجل، انتي عطيتيه رقمك ولا مزال؟ 🤔
شهد: بعتتله رقمي وخديت رقمه لاكن ما اتصلش بيا 🤭
بريق: ماعليك ، لو فعلا مُصر عليك ح يتصل بيك منغير نت ☺️
شهد: تمام به، اني مش ح نكلمه ولو صادق ح يتصل 🦋
فجاة اتصل اكرم، سبحان الله تقول حاس بيها 🤤
بريق: قصدك هو هدا؟ ردي عليه وخليك عادية جدا🙂
شهد: ايواا، صباح النور، اكرم ولا غالطة؟ 🤔😉
اكرم: صباح الورد، اكرم مش غالطة، عموما حلو الاسم طالع منك، قلت نشوف شن صاير فيك اول يوم في الجامعة ☺️
شهد: حلو يومي الحق، تعرفت علي بنوتة ومقعمزة معاها المحاضرة بعد 10دقايق
اكرم: به كويس، نبيك تفتحي انترنت تشوفي الماسنجر، حسيت فيه مشكلة، يلا تمشي انتي مش فاضية 😅
شهد: تمام بعدين نشوفه توا عندي محاضرة، سلام هي☺️
بريق: كانت تسمع فيها: زعما شن فيه الماسنجر؟
شهد: فوتي موضوعه، بعدين ساهل، هيا نوضي نحضرو اول جحيم في هالهندسة 😂❤
خشو حضرو المحاضرة وشهد تفكيرها مش مع اكرم بكل🥲
اكرم منغير ما يشوف شهد حبها من كلامها واسلوبها وعفويتها، رسمي الولد حبها ❤
بريق فوتت يومها مع شهد وكان يومهم حلو الزوز، 🖇🦋
بعد ما روحت شهد، تفكرت اكرم والكلام اللي قاله الصبح، فتحت نت وهنا كانت الصدمة…… مافيش مشكلة بالعكس كان في كلام حلو اكرم قاله ل شهد وغزل 🥺❤
شهد ذابت مع الكلام🤤 لكن في الاخير قال: نبي نشوفك🥺
شهد نرددت في الاول بعدين شافت صورة ليها محترمة وبعتتهاله 🥲🥲
اكرم اول ما شاف شهد انخبط فيها عجباته رسمي وزااد حبه ليها هلباا🤤❤
ومن هداكا اليوم تقدرو تقولو ان شهد ارتبطت، وعلاقتها كانت جدية وشعورها حلو 🖇🦋

لاول مرة بعد وقت طويييل شهد تكون فيه فرحانة هكي وكان احلى شعور في حياتها كلهاا احلى حتى من اي شعور حب حسااته قبل، كانه هدا هو الحب الحقيقي ليها؟ 🦋