رواية عبط ميكس الفصل الرابع 4 بقلم نرمينا راضي

رواية عبط ميكس الفصل الرابع 4 بقلم نرمينا راضي

رواية عبط ميكس البارت الرابع

رواية عبط ميكس الجزء الرابع

رواية عبط ميكس الحلقة الرابعة

علفكرة أنت بتفكرني بزوقله
–زوقله مين ؟
–الكلب بتاعي
–لأ كده قلة أدب
–مش قصدي
–ملقتيش غير الكلب اللي تشبهيني بيه ؟
–الأسد يمشي ؟
–اه كده تمام
–على أساس إن الأسد نوع من أنواع الفواكه ؟؟
–هو ممكن أطلب منك طلب؟
–ده أنت لو طلبت عنيا.. أكيد مش هدهملك اومال هشوفك عيونك بإيه ؟.. عيونك دي ولا لنسيز؟
–ممكن تركزي معايا ؟
–عيونك ولا لنسيز ؟
–عيوني
–حلوين
–نركز بقى شوية ؟
–ها معاك
–حلو.. بعد ما عرفتي حقيقتي ممكن توعديني متعرفيش حد ؟
–كل حاجة ليها مقابل
–ده أنتِ استغلالية بقى !

–إن مكنتش أستغل الظروف اللي احنا فيها دي و نتجوز أبقى مغفلة
–نتجوز !! زريبه أنا لسه عارفك امبارح !
–أنت مش بتؤمن بالحب من أول نظرة ولا ايه يا زعلوك ؟
–يا ستي ماشي بس أنا في وضع ميسمحش ارتبط.. أنا حياتي مرهونة بالخطر
–نظرة عيونك لوحدها خطر.. لينسيز دي ؟
–يادي النيلة
–لينسيز ؟
–عيوني
–حلوين
–أنا مكنش ينفع أعرفك حقيقتي بس ارتحتلك وواثق فيكِ
–واثق فيا ؟ شكرًا على ثقتك الغالية
–أنتِ ليه رد فعلك هادي جدًا لما عرفتي الحقيقة
–عشان أنت شبه أبطال الروايات.. استحالة تكون شخص عادي.. نظرة عيونك كلها غموض.. دي لينسيز دي ؟
–يخربيت أمي والله العظيم عنيا
–ده أنت اللي عنيا
–كلميني عن نفسك
–مبحبش اتكلم عن حد مش موجود
–ليه قولتيلي إن اسمك زريبه وأنتِ اسمك مش كده؟
–عشان أنا حياتي عامله زي الزريبه أي حد بيدخلها.. بيديني على قفايا وعينك متشوف إلا النور.. فص ملح وداب
–فص ملح !
–وداب
–الملح ليه فص ؟
–المثل بيتقال كده
–بتعملي ايه في حياتك
–عايشه وخلاص مبعملش حاجة
–مجربتيش تشيلي المسؤولية ليه؟
–مش عاوزاها تتعود على الشيل
–ردودك بتقتلني

–بتشتغل ايه مع الشُرطة ؟
–الحقيقة يا زريبه أنا كنت شغال مع عصابة كبيره وضميري أنبني فبلغت عنهم وخدت جزاتي.. اتسجنت تلت سنين وخرجت اشتغلت مع الشُرطة كعميل سري.. وحاليًا مأمور إن أمسك أي تهمة على عصابة غسيل أموال مكونة من أربع رجال أعمال.. وفي اتنين منهم كانو موجودين في الحفلة بس حضرتك بوظتي كل حاجة
–أنهي شرطة اللي بتشتغل معاها ؟
–الشرطة المدرسية… أكيد المباحث.. أنا مش ناقص غباء الله يرضى عنك
–هتخطفني امتى ؟
–اخطفك !
–المفروض تخطفني في قصرك وتنزل فيا جـلد وتطفي السجاير تحت باطي
–مبشربش سجاير
–هي دي المشكلة.. عارف لو كنت بتشرب كان زمان السيناريو مشى زي منا مخططة
–مش فاهم قصدك
–تيجي نتجنن ؟
–ازاي ؟
–نلعب استغمايه
–اقولك مهمتي فشلت تقولي نلعب !
–استغمايه
–يا ولي الصابرين
–هنلعب استغمايه ولو لقتني هتجوزني
–ولو ملقتكيش ؟
–هكون ورا الكُشك اللي هناك ده
–طب بالسلامه أنت يا فوزي يا خويا.. أنا مروح
–وهتسيبني ؟
–هو أنا خلفتك ونسيتك ؟

–طب تيجي ناكل سوا واهو يبقى منبار وفته
–المثل بيقول عيش وملح
–بزمتك في حد بياكل عيش وملح ؟
–مسموش منبار اسمه ممبار
–خلاص يا زعلوك مش هنخسر بعض عشان مصارين العجل
–أنا مُرهق.. هروح
–قول حاضر ومتعاندش معايا
–حاضر
–اي اللي حاضر..! أنت بتاخدني على قد عقلي ؟
–ابوس ايدك اعتقيني لوجه الله
–مش حابب تعرف انا عرفت بعملية حماتي ازاي ؟
–حماتِك !
–أمك
–أنتِ خلاص صممتي عليا !!!
–هتجوزك غصب عن ميتينك
–ميتيني !!؟
–ميتينك اللي هما اهلك اللي ماتو.. دماغك متروحش بعيد.. أنا بنت ناس متربية
–واضح
–خلي نيتك سليمة عشان تعدي يومك على خير
–ايه شغل البلطجة ده !
–علفكرة أنا اعرف عنك كل حاجة
–بتشمي على ضهر ايدك مثلًا
–يعني اي اشم على ضهر ايدي يا زعلوك.. حد قالك اني شمامه وبضرب بودره.. عيب ده احنا هيبقى بينا عيال
–انجزي في ليلتك دي.. عارفه عني كل حاجه ازاي؟
–تعرف راضي السيد ؟

–ايه !! ده رئيس العصابة اللي كنت شغال معاهم بس هرب قبل الشرطة ما تمسكه
–أنا بنته
“اقسم بالله ابويا لو عرف إن مخلياه رئيس عصابه وهو في الحقيقة مدير مدرسة على باب الله ليعلقني على باب زويله”
–بنته !!!
–لا لا بتهزري اكيد
–دي بطاقتي
–مستحيل.. مش معقول
–أنتِ عايزه مني ايه بالظبط !!؟
–أنا عايزه اوصل لبابا بأي شكل وانت عايز تساعد الحكومة عشان يضمنوا انك مبقتش مع العصابة.. كفتنا واحدة.. اي رأيك نشتغل مع بعض ؟
–…….
–ساكت ليه يا زعلوك ؟
–سيبيني افكر يا زريبه
–فكرت ؟
–أنا لحقت !
–تمام.. من انهارده احنا فريق واحد
–مفيش منك مهرب.. اعمل ايه
–حواجبك
–احترمي نفسك
–أنت الشيطان قاعد في نيتك.. قصدي عليها نموسه.. هشها
–اهشها ! حاضر يا زريبه ههشها
–تحب نتعشى سوا ؟

–بعد ما عرفت انك بنت الراجل اللي وداني في داهيه ؟
–راعي مشاعري
–مش هعرف
–ليه؟
–أنا مش راعي بقر
–اممم واحد ليك صفر ليا المرادي
–احنا نروح دلوقت وبكره نشوف هنهبب ايه
–يزن
–ها ؟
–هتوحشني
–……
–ساكت ليه؟
–حلو اسمي منك.. بس زعلوك احلى
–زعلوكي
–والله ما زعلوك غير اليوم اللي شفتك فيه
–بقولك.. من ضمن مهمتي اللي جايه واللي القدر فرض عليا تبقي معايا فيها.. انك تكوني بتكلمي لغات
–اشمعنا..؟
–عشان هتمثلي انك سيدة اعمال اجنبيه.. المهمة اللي جايه صعبة
–هبهرك
— معاكِ لغات إيه !
— عربي وإفيهات أفلام
–أنا ماشي.. سلام
–زعلـوك.. زعلوكي… زعلولو.. زعازيعو !!!
–ايه.. ايه.. ايه ياللي هتنقطيني ايـه ؟؟!!
–خدني في طريقك.. والله مهعمل صوت
–أنا ليا الجنة إن مستحملك
–شالله تنستر
_____________

“الساعة ١ بعد منتصف الليل”
–صحيتك ؟
–حد يتصل بحد بعد نص الليل يا مفترية
–في سؤال محيرني يا زعلوك
–نامي يا زريبه مش ناقص وجع دماغ الله يرضى عنك
–طب قولي بس.. مش فيه مواقع تواصل؟
–اه
–طب ليه مفيش مواقع تنام ؟
–……
–الو.. زعلوك.. زعلولو !!

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية عبط ميكس)