رواية غيبوبة القدر الفصل الخامس عشر 15 بقلم رويدا القاضي

رواية غيبوبة القدر الفصل الخامس عشر 15 بقلم رويدا القاضي

رواية غيبوبة القدر البارت الخامس عشر

رواية غيبوبة القدر الجزء الخامس عشر

رواية غيبوبة القدر الحلقة الخامسة عشر

خولة: شن للي غير رأيك هكي فجأة شن الشئ للي صار معاك .
منى: حسيت فيه حنيت صدام للي فقدتها ليا وقت وبعدها فكرت في كلامك وامي كيف شايلة همي كأنه كل صبح لما تشوفلي عيونها يقولولي اتزوجي نبي نطمن عليك .
خولة: انت توا هكي ماشية صح وهاذي منى للي انا نعرفها .
منى: انا مانبيش نستعجل ولكن ربي يسهل مازال نبي نعرفه أكثر من هكي.
خولة: معاك فيه الكلام هذا لأنه حقك حبيبتي .
حاتم: ياودي صحة ليك كيف قدرت تلين قلبها بعد ماكانت مسكرة رأسها ع الموضوع اهو.
خالد: مش قصة لينت قلبها القصة اني نحبها بجد ونبيها هذا كله لانه نيتي صافية معاها.
حاتم: تستاهل كل خير ياصاحبي ربي يحنن قلبها عليك والله ماتحصل زيك.
خالد: سلمك ايه توا المصيبة انه بنت جيرانا معشش في حوشنا نفخت امهم ياراجل واحد معاش قدر يروح لحوشه.
حاتم: بالك حاطة عينها ع مالك .
خالد: والله مش عارف لكن الفرخة مش مزبوطة بكل مش متريحلها .
حاتم: قول لأمك وخواتك يكنسوها من الاخير.
خالد: ماهي بتقولي شن شفت منها وهيا ريحتها طالعة لشارع كله .
حاتم: عقلك في رأسك تعرف خلاصك مش صغير انت دير سبلة واطردها .
روان: 😏 اسمعي أسماء شن رأيك اليوم نديروا بيتزا
ع الحطب مش قلتي خالد يحبها.
أسماء: ايه يحبها وهلبا لكن فاضية انتي توا بتعبي روحك ع خاطر خالد لوحي عليك.
روان: وقداش خالد عندنا احنا.
هناء:🤨 شن شكلك حاطة عينك عليه يافالحة وانا نقول شن الصحبة اهيا للي جت فجأة هكي .
روان: عيب عليك والله مافي منه للي تقولي فيه بكل .
هناء: كان مانعرفك يا….. راني سميتك العطارة .
أسماء:😲 شن الألفاظ اهيا من امتى تتكلمي هكي والله لو يسمعك مالك ولا خالد لما يقتلوك.
حاتم: انا توا بنمشي للمدام نتلاقو .

خالد: قول نوض روح علاش تزين فيها هكي وتعب في روحك مروح حتى انا باش نكلم الحب .
منى: هذا غير يستنى فيا امتا نرضى عليه ونكلمه اشبح كيف مات معاش كلمني 😡 زعمك نتصل ولا بيقول هاذي خفيفة.
وانا مقعمزة نستنى في الأفندي خالد امتا يكلمني لين رن عليا رقم غريب فتحت الخط.
سارة: الو بالله عليك راك تسكري عليا الخط.
منى:🤬 مازال عندك وجه ياخاينة وتتصلي بيا مصح وجهك وخلاص خويا شهر ويسكر سنة وهو في غيبوبة وانتي استعجلتي امتا تتطلقي تحسابيه بيموت .
سارة: كلامها كان زي السم ينزل ع قلبي لكن هان عليا كلامها لما عرفت انه أنس مازال حي سكرت الهاتف وبكيت بكاء نحساب عيوني ينعمو بعدها لين للحظات بديت نشوف في كل شئ مضبب .
أحمد: تبكي تريشي الحمل وصار وانت اهر همي اصلا وظيفتك تغسلي وضمي والفراش وبس.
سارة:انا نبي نعرف حاجة وحدة بس أمي نعرف قلبها ميت وهنت عليها لكن انت كيف رضيت ع نفسك انك تاخد وحدة ماتحبكش وتسمم بالسم ولا تشوف وجهك.
أحمد: عادي المهم انا للي نبيه ايصير واخر همي تحبي ولا تكرهي .
سارة: كل يوم ايزيد كرهي ليه .
خالد: الو اه حبيبي .
منى: طيب فيك نزغرت شن من نصف ساعة نقعد ساعتين نستنى فيك .
خالد: خيرك والعة قبل كل شئ كلامك مش عاجبني بكل .
منى: ايه مضايقة وزدت انت كملت الباقي .
خالد: ايه قوليلي نفش في غلي فيك نفهمك لكن مش تقولي نستنى ومش عارفة شن .
منى: بلحق بجدك انت تحكي قصدك مصح وجهك وخلاص أسود رأس مافيش خير .
خالد: الله لاتربحه للي ضايقك وخلاك زي البركان باش تتفجري في وجهي .
وانا كيف فتحت الباب متع الجنان وخاش وتطلعلي النحس روان 🤦🏻‍♂️ ياوالله ليلة باينة من أولها وبدت عاد.
روان: خالد اهلين كيف حال صحتك ان شاء الله بخير .
خالد: الحمدلله وجيت فايت ومتى في حالة صمت وكاسرة اوذنها زي القطوس أنا متأكد.
روان: اسمع غدوا روح مبكري باهي .

خالد: نعم شن قلتي 🤨.
روان: غدوا بنديروا بيتزا ع الحطب ونعرف انك تحبها.
منى: ماشاء الله تعرف حتى شن تحب 🤬 وسكرت في وجهه الخط وانا نغلى عليه انا شن موقعي من الإعراب نبي نفهم بس.
خالد: عارفها انا بتولي حفلة خلي نتصل بيها توا.
منى: خيرك شن تبي ترن عليا ولا بتعزمني معاكم ع البيتزا .
خالد: ربي يهديك هادي فرخة جيرانا معقولة بديري منها قصة.
منى: تمام هيا هكي ولت معناها حتى انا غدوا بنمشي للمقبرة مش حتقول كلمة.
خالد:😤 اسمعي فكيني منه جو المساومات اهو شن جاب المقبرة لي هاذي.
منى: انت تغار من شخص ميت وحتى عظامه قريب يتحللوا وانا نسمع في وحدة تأمر فيك امتا تروح وبتوكلك بيتزا وعادي تبيني نضحك .
خالد: قتلك والله ماعندي بيها أي علاقة باش تبي نحلفلك ناقصني الا هيا قداش ليها ملوحة قدامي كان نبيها مانقعدش نستنى فيك انت.
روان:😲 صار هكي ياخالد انا ملوحة هين توا تشوف شن نديرلك انا لازم نعرفها من هيا باش نخرب بينهم .
أسماء: خيرك واقفة قدام المربوعة نحسابك روحتى انا .
روان:اه 🥴 نسيت هاتفي ماهو هذا علاش رجعت.
أسماء: باهي دقيقة خلي نرن عليك اتصلت بيها اهو يرن في جيبك 🤦🏻‍♀️.
روان: ياحليلي خلاص عقلي معاش يجمع هي تصحبي ع خير.
خالد: خليك ع الخط شوية وانت ساكتة طلعت خيرك شن واقفة اهنيا.
أسماء: ماما قتلي تأكدي الباب مفتوح ولا مسكر جيت لقيت روان دور ع هاتفها .
خالد: اسمعي الفرخة هاذي معاش نبي نشوفها في حوشنا تصرفوا انت وأختك .
أسماء: مانقدرش نطردها وانا ماشفت منها شئ وبعدين امك صاحبة امها والله لما تبهدلني .
خالد: توا نعرف انا كيف نتصرف .

أسماء: حرام عليك وهيا تبي ادير البيتزا ع خاطرك.
خالد: اعطيني فيها سم البيتزا للي منها مانبيش القهاوي كاتراث .
أسماء: تمام بنخش.
منى: مسكينة ياروحي عليها شايلة همك اكثر من خواتك تسخف المهم توا انا نعرف نتصرف بمعرفتي .
خالد: والله نحبك ولاعندي ولا نبي غيرك اصلا.
منى: انا معاش تضحك عليا بالكلمتين اهما بكل .
خالد: تي خيرك تسكري في رأسك مع من وربي غدوا لو تمشي للمقبرة ماهو صاير طيب.
منى: باهي معناها ديرها في بالك ماشية اهو قتلك وللي بديره ديره.
خالد: سكرت عليها وحذفت الهاتف ورقدت .
مها: في من كنتي تكلمي 😏 ولا حتى توا خولة.
منى: شن دخلك فيا الهي بي بطنك واسكتي .
مها: ماتخافيش عليها بطني امورها تمام غير انت ركزي مع الهاتف وحافظي عليه للي كنت تكلمي فيه واسلوب التهديد مش كويس 😉.
منى: ياماما تعالي لبنتك اسمعيها شن تقول .
أمينة: العار بعد ماشاب خش الكتاب شن تعالي لبنتك ذكرتوني بأيام كنتم صغار.
مها: بالنسبة ليا مزلت صغيرة الا لو منى كبرت .
أمينة: ايه صغيرة غير بتولي أم المهم خيركم تعيطو لين بوكم انخلع .
منى: خشت عليا وانا كنت نكلم في خولة وبدت تتباسل وتقولي انت تكلمي في حد.
امينة: عيب عليك يامها راك كبيرة وبعقلك .

مها:مش جديد عليك توقفي معاها من قبل انت هكي نقص يدي لو بنتك ماتحبش.
منى: في خاطري الحقيرة بتفضحني .
أمينة: وانت تحشمي خولة متزوجة وانت 24 ساعة ترغي معاها في الهاتف عندها حوش وراجل مش زيك انت نوم وبس.
منى: شن نكتة اهيا حتى خولة تبو تحرموني منها .
أمينة: للي يسمع يقول حبساتك ومربوطة بسلاسل مش مطلوق سراحك ياطوير.
خولة: حاتم بنقولك ع حاجة.
حاتم: قولي ان شاء الله خير .
خولة: لينا توا فترة الحق مليت من الحوش وبروحي وامك حتى بنمشيلها ياطالعة يا النساوين الجيهة عندها نبي حاجة نشغل بيها روحي.
حاتم: من توا خدمة ماخدمة فوتيها للي تبيه يوصلك لعندك وفكيني من وجع الرأس.
خولة: من قال نبي نخدم انا يالله نقيم الحوش شن هبلت نقطع روحي في مكانين .
حاتم: باهي ماتبيش تخدمي شن تبي بالزبط فهميني .
خولة: نبي بيبي يملا عليا الحوش تعبت وانا بروحي ومليت .
حاتم: ياريت والله لكن انت للي كنتي ماتبيش سبحان مغير الأحوال من عيوني .
خولة: تحشم شن من عيوني اهيا .
حاتم: 😏 باهي شن تبيني نقولك لا نبي حتى انا صغار.
منى: الصبح طلع خلي نمشي نقول لي بابا نبي نمشي للمقبرة ونشوف شن بيطلع معاه.
علي: تعبتني يابنتي بيها المقبرة لكن البسي وتوا نعرفك .
منى: سبحان للي زين حبه في قلبي أول مرة نمشي وانا مش مشتاقة لصدام ماشية باش نبي نتأكد من حب خالد ليا وبس سامحني ياصدام هذا حال الدنيا كان أمك انساتك .
” صح مستحيل ننساه لكن رح يقعد ذكرى زي أي ذكرى بدايتها حلوة ونهايتها مرة رغم انه فترة زواجي قصيرة هلبا نقدر نوصفها بأنها نهاية البداية “.

خالد: الساعة12 راحت فيا نومه خلي ندوش ونمشي لحوشهم نتسبل بعمي علي ومنها نعرف هيا وين .
منى: وصلت المقبرة معاش نحس بالوجعة للي كنت نحس فيها كل مانقرأ اسم صدام ع القبر معقولة خالد قدر يملك قلبي في الفترة القصيرة هاذي قربت من القبر
وقعدت نحكيله .
” انا متأكدة انك تتمنالي كل خير وعمري ماسمعت منك كلمة توجعني ولا موقف يخليني نحمل في قلبي عليك حتى أيام كنا في علاقة مش زواج كنت محافظ عليا وهذا للي علقني بيك لكن انا اليوم جاية بنقولك لقيت صدام ثاني”.
خالد: لبست وطلعت وصلت قدام حوشهم سيارة عمي علي مش موجودة لكن خلي نخبط .
أمينة: اهلين كيف حالك ياخالد .
خالد: الحمدلله كيف حالك انتى ياعمتي ان شاء الله بخير.
أمينة: الحمدلله .
خالد: وين عمي علي .
أمينة: تلقاه في المقبرة هوا ومنى.
خالد: طلعت طول لا بسلامة ولا صحيتي.
أمينة: اللطف هوا هذا خيره زي الملبوس زعمك شن صاير معاه.

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية غيبوبة القدر)