رواية طفلة أرهقت قلبي الفصل الرابع 4 بقلم عائشة البشير

رواية طفلة أرهقت قلبي الفصل الرابع 4 بقلم عائشة البشير

رواية طفلة أرهقت قلبي البارت الرابع

رواية طفلة أرهقت قلبي الجزء الرابع

رواية طفلة أرهقت قلبي الحلقة الرابعة

“” أحيانا يرزقنا الله بهدايا على هيئة أشخاص.. نتشاجر ونتخاصم معهم… نخطي ونتفق في نفس الوقت… نبكي ونفرح معاً… نستطيع أن نفعل معهم كل شي إلا الفراق “”
دنيا مشيت وأني مستغربه من اللي قاعد يصير، مش عمتي قتلي تعالي غذوه شني اللي خلاها تبيني الليله، قعدت نتبع في حسام وأني ساكته، بس إنصدمت لما فات باب الحوش الرئيسي ومتوجه للباب الخلفي للمطبخ، تلفتت بخوف لما سمعت صوت ورائ، وقبل مايطلع صوتي ماحسيتش إلا بحد مسكرلي فمي وساحبني معاه
أحمد بغضب😠: واللهي لما نوريه أني يضربني قدام الكل على خاطر واحده زي هذي
سعد😒: تي حتى أنت مزودها بطل تسهويك وأعقل راهي مهما كانت في الأخير بنت عمك
أحمد: يانعن🤬 توا كلكم طلعتو مؤدبين والإحترام يقطر منكم، تي كلكم عيونكم بيطلعو فيها وميتين على جسمها ال🤬 وأشبح شني تفكرو بينكم وبين نفسكم ولا غير أني اللي نتكلم حاطين الغلط فيا
سعد😒: ماحدش قالك ماتفكرش لكن أسكت قدامهم مش لازم تفضح روحك وتخليهم يأخذو عليك فكره غلط
أحمد بعياط😠: تي إن شاءالله يولعو مع بعضهم، وقعد يتحسس في خشمه وفكه اللي يوجعو فيه من ضرب حسام، وبحقد: تي والله لما نتحاسبو عليها ياحسام حركتك هذي
سعد تنهد بملل، يستر الله منك، أشبح شني أخرتها معاك أنت ورأسك اللي معشش فيه حمار😅
سعيد: شني جو المحل ماشيه أموره
عادل: واللهي الحمدلله ياعمي، أهو الواحد يطقطق على رأسه
سعيد: شني الشركه معاش فيها شي
عادل: لا والله مكسده من الحرب واقفه، بس أهم شي المعاشات تمشي وأمتي ماترجع ترجع😅
سعيد ينعس فيه النوم ومعاش قادر يقاوم😪: أي هذا المهم المعاش
عادل لاحظ أنه عمها شكله يبي يرقد ومقعمز بالسيف، تحشم ووقف: هيا نستأذنك ياعمي، تصبح على خير
سعيد وأخيرا😪: أذنك معاك، وأنت من أهل الخير
عادل توجهت لحوشنا وأني معصب😡 ماقدرتش نحكي معاها، هذي ثاني مره حسام الزفت يخرب عليا🤨
عند دنيا ضربت حسام اللي كان قايمها ومسكر فمها بإيده، على بطنه برجلها، نزلها وهوا يتوجع
حسام ماسك بطنه ويتوجع: يامتوحشه
دنيا😡: أنت شن كنت بدير؟؟
حسام وهو قاعد يتوجع: ياغبيه خفتك تعيطي من القطوسه وتفضحينا
دنيا فعلا إنخلعت لما تلفتت وشفت قطوسه سوداء عيونها بس اللي يلمعو، وكنت بنعيط بس أيده اللي كتمت صوتي، وبتوتر: وليش بنفضحك أنت على شني ناوي !!
حسام، بهزوه😏: مش ناوي نخطفك ماتخافيش!! بس كنت نبي نحكي معاك شويه
دنيا، بنص عين😒: كنت شاكه أصلا أنه مش عمتي اللي تبيني، قول شني تبي بسرعه مرات حد يشوفنا
حسام😕: باهي تعالي نخشو للمطبخ أفضل من وقفتنا إهنايا

دنيا كنت متردده بس حابه نعرف شني بيقول، بخوف😦: باهي بس بسرعه بنروح
حسام خايفه مني الهبله، مش عارفه أنه أني اللي بديت نخاف منها😅 أبتسمت ومسكت إيدها وجبدتها معاي
دنيا، تفاجأت من حركته: تي حول أطلقني مني سمحلك تشد أيدي أصلا😠
حسام من غير مانتلفت، وبثقه😌: أني سمحت لروحي وبعدين خايف عليك تلاقيك قطوسه ثانيه أو شي يخوفك ياطفله😏
دنيا إضايقت من كلامه واثق في نفسه هلبا هالمغرور😒: أصلا أني مانخافش وبعدين معاش تقولي طفله مانحبهاش الكلمه هذي
حسام جبدتها ووقفتها قدامي، وبإبتسامة😊: عارفك قويه وماتخافيش، بس قوتك تزيد وأنتي جنبي، وبعدين ياطفلتي لازم تحبي أي شي نقوله تمام😊
دنيا، بهزوه😒: لا واللهي شكلك صدقت روحك، ورفعت صبعي في وجهه بتهديد وبصوت عالى : أسمع….. وسكتت لما حسام حط يده على فمي😐
حسام، بصوت واطي🤫: أسسسس تعيطي وين تحسابي روحك، وتلفتت وفتحت باب المطبخ الخلفي، وبأمر: خشي نتفاهمو الداخل
دنيا تنهدت بضيق وخشيت جبدت كرسي وقعمزت جنب الباب، ربعت إيديا وحطيت رجل على رجل، وبلوية شارب😕: هيا تفضل ياسيد حسام أنطق هالجوهره
حسام ضحكت على منظرها😅: هههههه ليش هوا فيه جوهره غيرك😉
دنيا توترت من غمزته، ونزلت رجلي وعدلت تقعميزتي، وأني نشوف فيه كيف سكر الباب وجاب كرسي وقعمز قدامي، بتوتر: بعد شويه المطبخ واسع
حسام، بإبتسامه😊: هكي أحسن باش نسمعك كويس وتسمعيني
دنيا قمت رأسي وجت عيني في عينه أول مره نركز على عيونه العسليات كنت من صغري نخاف نشوفله أو نحط عيني في عينه، فيهم شي خلاني منجذبه ليه وماقدرتش إنزل عيني، ومافقتش على روحي لين تكلم هوا
حسام بهيام😍: ماكنتش عارف أنه عيوني حلوين لهالدرجه هذي
دنيا بتوتر: بطل براده وتكلم شني هوا اللي تبي تحكيه؟
حسام وأني هايم في جمالها😍: لو بنحكي اللي نبيه عمري كله مايكفينيش
دنيا😒: معناها أختصر أني مش فاضيتلك عمر بطوله
حسام بضيق🤨: ولمني فاضيه إمالا ياست دنيا
دنيا😠: اااااف حالتك مستعصيه بكل
حسام😡: ماهو كله منك مش فاهم أنتي عبيطه ولا تستعبطي عليا
دنيا: أنت واحد وسكتت لما حسيت تليفوني يهز في جيبي
حسام بغضب😠: مني اللي يتصل بيك في هالوقت
دنيا تجاهلت حسام وفتحت الخط: نعم أي لا لا ماعنديش، أهو جايه، ورفعت رأسي لحسام اللي قارن حواجبه: هذا بابا يبيني نروح بيرقد وأني ماعنديش مفتاح
حسام زعما عادل روح ولا لا، وبرجاء🥺: كنت نبيك تقعدي شويه، قاعد ماقلت شي الزفت
دنيا😏: ماهو أنت فالح غير في تشحيط عروقك عليا، كأنك تكلمت من بكري راهو قلت اللي تبيه، ووقفت بنفتح الباب
حسام مديت أيدي وشديت أيدها، وبإبتسامة😊: دنيا ممكن نعقدو إتفاق أني وأنتي بما أننا أصدقاء يعني
دنيا بإستغراب🤔: واللي هوا !!

حسام😊: ممكن معاش نتعاركو، مش درنا إتفاق المره اللي فاتت أنه نقعدو أصدقاء ماصار منه شي☹
دنيا😕: ماهو أنت أسلوبك مستف……. وسكتت لما ناض حسام ووقف قدامي وهوا قاعد شاد إيدي
حسام، بحب😍: وعد معاش نستفزك ولا نعصبك ولا نعلى صوتي عليك، وكل شي تبيه مني حاضر، بس أعطيني فرصه نكون جنبك ماتبعدينيش عليك باللهي
دنيا ماعرفتش شني نقول، بس أني فعلا محتاجه حد يوقف جنبي، مالقيتيش إلا هالمغرور تشدي أيده وتوقفيه جنبك😏، مهما كان هوا قاعد أفضل من غيره🙄، أبتسمت😊: أوكي، بس ماتخلينيش نوثق فيك وبعدين تخذلني
حسام😍: معقوله نخسرك بعد مالقيتك مستحيل، وعد نكون جنبك على طول مهما صار
دنيا، بإبتسامه😊: هيا وصلني زي ماجبتني
حسام، بفرحه: حاضر أنتي تأمري أمر😍
دنيا وأخيرا هاليوم أنتهي وأني فرحانه وحاسه براحه😊، أول مره شخص يقولي أني جنبك على طول مهما صار، ولأول مره نحس أنه في حد مهتم بيا وخايف عليا
حسام قبل مانوعدها هيا، خديت وعد على نفسي أني نصونها ونقدرها، نكون سندها وحمايتها، نحارب الظروف ونوقف في وجه أي حد على خاطرها، نحاول نغير من تصرفاتها ونأخذ بإيدها ونوريها الصح من الغلط، ربي يقدرني ونكون أمانها اللي تلجأله في عز خوفها🤲
مرو يومين روتينيات، يوم السبت في حوش خالتي
مؤيد🤨: كان تشوفيها ياأمي كيف لزتني هذاكا اليوم على شوي قتلتني بموس اللحم هالشريره
دنيا😒: هوا ياخويله اللي نرفزني ببرادته وأني كنت على أعصابي وقتها
ناجيه😏: عاد أني ماغابيه فيه مؤيد وبرادته والله أوقات يزودها حتى أني أمه كان نلقي نخنقه
مؤيد شفت لدنيا اللي تشوفلي بشماته وترقصلي في حواجبها🤨: أيواه تلاقو عليا البنت وخالتها، مني يقدركم أنتم يامعشر النساء
ناجيه😠: بطل تفتفيت وبرا جيب أختك بتتغذي معانا
مؤيد😒: وخيره راجلها مايجيبها، خطوه أهو الحوش تجي حتى بروحها
ناجيه😠: وأنت شني اللي إدير فيه وبعدين ترضاها أختك تقعد تخطف في الشارع بروحها
مؤيد😤: تي زوجناها باش نرتاحو منها تشد راجلها وتقعمز، تي زوجوني أني وكان مازال شفتو وجهي قدامكم😅
ناجيه قامت المخده وحذفتها على مؤيد😠: خزي ياللي ماتتحشم، تي أنت مني اللي داعيه عليها أمها بتأخذك، طول وخيبه😒
إنتصار من المطبخ: تي مش أمها بس اللي داعيه عليها، أمها وبوها وجدها وحناها وملقطه دعى الصلاح في ليلة القدر اللي بطيح فيه 😂
مؤيد😒: ننن ننن ننن أنتي ألهي في طنجرتك خير ماتشيط زي كل مره وسكري فمك خير مانجي نفسدلك وجهك
ناجيه، بملل: باهي نوض وأنت ماد وجهك بحداي زي البنيه وأستحي وتحشم على وجهك، عيب حتى قدام بنت خالتك تضحك عليك شوفها
دنيا صح كنت نضحك بس مسكت ضحكتي بالغصب 🙂أول ماشافلي مؤيد برفعة حاجب🤨
مؤيد😒: أستغفر الله العظيم ماتخلوش الواحد مرتاح، هي أقعدو فيها أهو طالع كان مازال شفتوه وجهي، وناض طلع
ناجيه، بصوت عالى: 🤨يامنجوه قبل ماتنتلف برا جيب أختك، بعد ماطلع،بإبتسامه😊: ربي يهديك ويصلح حالك، ويرزقك من بابه الواسع ويفتحها قدامك ياوليدي
دنيا أبتسمت 😊وأني نسمع في خالتي تدعي لمؤيد، نضت وخشيت للمطبخ بنساعد إنتصار، وخويله خشت تصلي
إنتصار، بإبتسامه😊: العشيه بنمشي أني وخوله للسوق تمشي معانا !!
دنيا نقرض في السلاطه🙁: مش عارفه حتى خويله بتمشي قصدك !!
إنتصار: لا لا ماأعتقدش، تي بري معانا غيري حتي جو، مؤيد يحطنا في السوق ويطلع إندورو براحتنا😁
ناجيه من باب المطبخ: شني كملتو ولا تبو مساعده؟
إنتصار: لا لا ياماما أرتاحي أنتي ماتوصل خوله لين يكون الغذي واتي
ناجيه😊: باهي يابنيتي ربي يريحك ويعطيك مافي بالك، ونشوفك في حوش راجلك مرتاحه ومتهنيه
إنتصار: إن شاءالله ياماما وربي يطولنا في عمرك
ناجيه أبتسمت، وتلفتت بفرحه☺ للباب لما سمعت صوت خوله
خوله: السلام عليكم ياعويله😁

ناجيه بفرحه☺: أهلين ياخوخه أنستي يابنيتي، خشي خشي
خوله سلمت ع أمها وأختها ودنيا وقعمزت وهيا تتنفس بصعوبه: وووك عليا نمشي خطوتين ندهش مش عارفه أمتي بنحطه وبنرتاح
ناجيه قربت من خوله وقعمزت قدامها، بخوف😟: خيرك ياخوله شني تحسي !! بالك في حاجه توجع فيك؟؟
خوله أبتسمت على خوف أمها عليها: لا ماما مافيا شي غير المشوار دهشني بس😊
إنتصار😏: ماتخافيش ياماما تدلع عليك بس محلها هيا قاعده في الخامس، بلا حركات مفرخ أدلعي غادي على صلاح مش علينا😉
ناجيه، بإبتسامه😊: خلي تدلع على أمها وأنتي شني واجعك😒 توا نشوفوك ياحنه شني إديري بعدين😁 ربي يسهل عليك ياخوخه وتنوضي بالسلامه أنتي وعويلك
خوله شافت لإنتصار بهزوه😏 وأبتسمت لأمها: ربي يخليك ليا ياماما ومايحرمني منك ياغاليه
ناجيه: 🤲ربي يحفظكم ليا كلكم ونشوفكم مرتاحين ومتهنيين هذاكا حد الدنيا عندي😊
دنيا كنت نشوف لخالتي بحسره وحاسده بناويتها عليها، مافيش أي وجه مقارنه بينها وبين أمي أبدا، قعدت مركزه على خالتي ونشوف في حنيتها وخوفها على بناويتها ومتمنيه أمي تكون في ربعها بس، ياريت تعطيني شويه من وقتها وتقعمز معاي تنصحني تنبهني على حاجات غلط تشاركني حتى ولو أشياء بسيطه، تحسسني بحنانها وأني مهمه عندها 💔😔
ماما كل همها عملها وبس مرات نشك أنها ناسيه أنه عندها بنت أصلا، كنت ديمه نقول ياريتني جيت في عيله ثانيه غير عيلتي ديمه نحسد في صحباتي لما يحكو على عيلاتهم ولماتهم مع بعض، حاسه روحي محرومه من أبسط الأشياء 😔
حسام مقعمزين أني وعادل في المحل، نأكلو في سندويتشات
حسام بضيق: ماقلتليش في شني بتحكي مع دنيا هذاكا اليوم؟
عادل مستغرب🤔: وأنت خيرك معشش في الموضوع، حاجه ماتخصكش فوته
حسام: لا معشش ولا شي فضول بس، مادامها تخصك معناها تخصني مش صحاب وخوت ولا غيرت رأيك😒
عادل بضحكه😁: هوا في حد يطيح في بلوه زيك ويقدر يتفكى منها، تذكر زمان شني درنا في الحاج عبدالله صاحب الحوازه اللي ورانا 😅
حسام وهوا يذكر🤔: ياناري كل موسم نقطعوله في الليم أخضر ونطرحوله فيه تحت الشجر، إن شاءالله غير يسامحنا ماربح شي من ورانا😂
عادل: كان ديمه يجي لبوي ويشكي يقوله كله من ولد أختك الملعون هذاكا يجيكم يومين يخسرني ألوفات ويقلب الدنيا ويروح😅
حسام🙄: على أساس أني بس اللي ملعون وأنتم عاقلين ماشاء الله، تي ماهو كلكم مشتركين معاي😏
عادل: لا أحني عاقلين غير وين تجي أنت تجبد فينا وراك😆
حسام بهزوه: مكلبه من يوم يومكم غير تبو من يقودكم😒

عادل😁: وأنت ماشاء الله عاد شاد القياده وأحني نتبعو فيك، تذكر خليفه ولد الطاهر اللي شركناله القومات متاع الطانطا، قالك هذاكا اليوم قريب ختش مسكين🤣🤣
حسام: لا لا كله كوم وعملة الزيت اللي صبيناه في مخزن خالي بشير كوم ثاني تي منظر مرت خالي فاطمه وهيا تنوض وتتبلط في الزيت قاعد بين عيوني لتوا🤣😂
عادل: تي ماصارلها شي كان مازاد قواها وشدلها عظامها حتى هوا زيت زيتون ياكبدي😂
وبالذكريات الجميله ومشاغبات الطفوله وكل واحد يحكي ويتذكر موقف من عملاتهم الشيطانيه اللي داروها نسو موضوع دنيا🤭
دنيا تغذينا وضمينا المطبخ وأصرو البنات نطلع معاهم للسوق
ناجيه: نوضي يابنيتي غيري جوك وشوفي حتى الناس وأنتي ديمه مكبوبه في هذاكا الحوش
دنيا مش راضيه بكل، بس تحشمت من خالتي والبنات اللي شاديين فيا: باهي خلي نكلم بابا نستأذن منه، نضت على أساس بنخش لدار البنات نكلم بابا بس وقفت في الممر وتفاجأت من كلام مؤيد😞
مؤيد، بغضب😠: ياأمي ليش تقوليلها تمشي معانا خليتيها تقعد معاك كيف نرفعها معاي بشكلها هذا يشبحها حد يعرفني يحسابها واحده من خواتي
ناجيه، بأسف: ربي يهديها خالتك ديمه نقوللها قعمزي لبنتك وعلميها راهي معاش صغيره واللبس هذا معاش يناسبها لكن شي مش معدله
مؤيد ضغط ع سنونه وبغضب😤: أني الكلام هذا مايخصنيش كان بتمشي هيا معاش رافعهم بكل حتى بناويتك، تي منظرها ولبسها يحشم، اللي يشوفها بيقول طالعه تعرض في روحها ولا بترقص
ناجيه بغضب😠: تحشم على وجهك عيب شني هالكلام اللي تقول فيه، راهي بنت خالتك وزي واحده من خواتك
مؤيد😡: تي والله لو واحده من خواتي تلبس هكي نقتلها قتل، وبعدين خواتي متربيات ومحترمات وأنتي مش زي خالتي ربيتيهم وأدبتيهم على الصراط المستقيم وحتى لو بوهم ميت عارفين وراهم راجل ومايرضوش يوطولي رأسي، كلماها تلبس حاجه مستوره كأن بتمشي ولا تقعمز معاك
دنيا كلام مؤيد وكأنه سكاكين إنغرسو فيا معقوله متحشم ومستعر مني لهالدرجه، شني ذنبي أني لو مافيش حد نصحني ووجهني كويس، كنت على لحظه بننهار ودموعي بيخونوني بس لا سندت طولي وحاولت نقوي روحي، مش راح نخلى حد يستضعفني أو يستقوي عليا، خشيت للبنات في الدار، وأبتسمت غصبآ عني: إنتصار ممكن تعطيني حاجه نلبسها، ماكنتش نحساب روحي بنطلع كأن هذا راهو جبت معاي
إنتصار: عادي حبيبتي أهو الدولاب على حسابك خشي خودي شني تبي، بس في الشك يناسبوك
دنيا أبتسمت بحزن لإنتصار لما فهمت قصدها، فتحت الدولاب وقعدت نشوف لبسها كله طويل ومستور وماعندهاش بلوزه فوق الركبه، عكس دولابي اللي في الشك فيه أي حاجه توصل للركبه أصلا، خديت بلوزه وخشيت للحمام
ناجيه فتحت الباب وشافت لإنتصار اللي واقفه تلف في وشاحها على المرايه، وبضيق: وين دنيا إمالا؟؟
إنتصار: في الحمام(( أكرمكم الله )) ياماما خيرها!!
ناجيه: أسمعي سلم بنيتي كلميها أنتي خلى تلبس، وسكتت لما سمعت باب الحمام (( أكرمكم الله))إنفتح
خوله بإبتسامه: ماشاءالله يادنيا طلعت عليك البلوزه أحلى من إنتصار المعظمه هذي، مشطيها منه😁
إنتصار قرنت حواجبها: يابارده خزي عاجباتك روحك وأنتي موليه زي الدبه مع بطنك اللي تتكركبي بيها
ناجيه تلفتت لدنيا وتغيرت ملامح وجهها للفرحه☺ لما شفتها مغيره حوايجها ولابسه بلوزه من إنتصار فضفاضه ولتحت الركبه بشويه: ماشاءالله يادنيا والله صادقه خوله طالعه عليك خير من إنتصار
إنتصار شبحت لأمها بغيض ولتفتت لخوله اللي ميته بالضحك على منظرها من كلام أمها، وبعصبيه😡: بطلي ضحك وأطلعي معاش وقت تبيلك ساعه وأنتي تتكركبي باش توصلي السياره
دنيا طلعنا وأني مضايقه وجوي مش صافي بكل، وطول الطريق نتجاهل في مؤيد وحتى لما يكلمني مانردش نكتفي بهز رأسي، وجعتني منه كيف يفكر فيا هكي وهو يعرفني أكثر واحد شبه متربي معاي كان ديمه عندنا لما كان صغير تعلق بي بابا هلبا بعد وفاة بوه، بس لا يادنيا ماعندكش حق تلومي مؤيد اللوم كله على بوك وأمك، وتكيت رأسي على المرش وأني أفكاري ترفع وتجيب لحد ماوقفنا في السيمافرو، وقمت عيوني من غير تركيز للسيارة اللي وقفت جنبنا، نزلت عيوني ورفعتهم بسرعه بصدمه لما أنتبهت أني لمحت ماما في السياره، قعدت مركزه ونحاول نكذب عيوني بس لا هيا والله ونفس حتى الوشاح اللي طلعت بيه الصبح، كيف هذا مني اللي يسوق !! وكيف تركب معاه !! قعدت نشوف للسياره للخلف بالك في حد معاهم بس لا مافي حد كانو بروحهم وواضح من ملامحهم المبتسمه أنهم يهدرزو ومنسجمين، إنفتح السيمافرو وطلع مؤيد وبسرعه ماأختفت السياره من قدامي واللي شفته شوشلي عقلي أكثر وأكثر

في حوش مبروك كانو البنات مقعمزين في الجنان ويهدرزو
سرور، بضيق: أمتحاناتي النهائيه قريب، نبي حوايج وبوي مسكر رأسه قالي مارافعه مني جنيه للعيد
علا: مش لازم حوايج جدد، بري في حوايجك ولا بدلتك العسكريه عادي
سرور: واللهي باش يقعدو يضحكو عليا، كلهم يستنو في الإمتحانات باش يطرحو وأني نمشي في البدله العسكرية هذا ماناقص والله مانلبسها لو كان مانمشيش بكل
سنيه جايه وفي أيدها سفرة القهوه والكيكه: إمالا قعمزي وخلي تريح عليك السنه، تعرفيه بوك كان سكر رأسه سلامتك
سرور بتفكير: ياريتني مصاحبه دنيا على الأقل إستفدت منها عندها لبس مش عادي
علا ضحكت: خزززززي مصلحجيه، ومن قالك ماتصاحبيهاش، أصلا حتى عمركم قريب على بعض
سرور: ماهو هيا شايفه روحها وحاله صايره فيها وحتى تكلميها ماتردش وتشبحلك بهزوه
سنيه: فرصتك مازال قدامك أسبوعين ولا ثلاثه أكسبيها من توا
سرور بتفكير: زعما !! وناضت وقفت بسرعه
سنيه: خيرك ياهبله !! على وين ؟؟
سرور: خلي نمشي إندير عليها دوره وناخذها باللسان من توا ويذوبك إنلحق نمشط منها لبستين ولاثلاثه للإمتحانات ومشت تجري🏃‍♀️
علا ضحكت: خزي هالهبله بتمشي إطيح روحها على خاطر لبسه تحساب بتقدرها دنيا😏
سنيه بضحكه: ديما هكي سرور همها المظاهر وخلاص، ومدت لعلا فنجان قهوه: هاك خودي القهوه صقعت، وفكينا منها، وقامت رأسها وأبتسمت لمحمد اللي جاي جيهتهم
محمد: محسوب في القهوه ولا لا، وتلفت لعلا، وأبتسم: كيف حالك ياعلا؟
علا من غير نفس: كويسه الحمدلله
سنيه: قعمز حموده أهو فنجان سرور مشت وخلاته، وكيكه جايبتها علا تهبل😉

محمد شبح لعلا وأبتسم: لا مادامها هكي تستاهل تقعميزه إمالا، وجبد الكرسي وقعمز قعد يهدرز هوا وسنيه على القرايه وعلى طلبة الجامعه، ومره مره يتجه بعيونه لعلا اللي ساكته وتشرب في قهوتها بهدوء
سنيه أستغلت أنه علا مش مركزه عليها وغمزت لمحمد وهو فهمها وهز رأسه بمعني أيه
سنيه شهقت بصدمه وهيا تشوف لتليفونها: هييييي تليفوني معاش فيه شحن، خلى إنوض نحطه في الشحن ونجي، وناضت بسرعه من غير ماتشوف لعلا
علا هالحيوانه توا كيف نحاته من الشحن فل مسرع فرغ، مابردها هيا وحركاتها اللي زي وجهها
محمد وهو يشوف في الإنزعاج الواضح في ملامح علا، تنهد بضيق: شن جو القرايه ياعلا ؟؟ خيرك ساكته متحشمه ولا شني !!
علا، بتوتر: كويسه لا ليش بنتحشم عادي يعني ماعندي مانقول هذا علاش ساكته
محمد، بإبتسامه😊: باهي راهو مانأكلش في الحلوين أني ليش متوتره أرخي روحك
علا معقوله باين عليا للدرجه هذي، بإرتباك: لا مش متوتره عاديه جدا🙁
محمد ضحك وهو يشوف في حركاتها المعاكسه لكلامها: علا بصراحه أني ليا فتره بنحكي معاك في موضوع بس متردد وخايف من ردك😞
علا شكله نفس الموضوع اللي قالتلي عليه سنيه، بضيق: أها ليش شني اللي مخليك تخاف
محمد يفرك في إيديه في بعض ومتوتر: ماهو تصرفاتك معاي وتجاهلك ليا خلتني نتوقع أنك ممكن تصديني، وأني يعلم الله بيا أني رايدك بنيه صافيه وشاريك بالحلال😊
علا أبدا ماكنتش متخيله أنه محمد يفكر فيا بالشكل هذا طول عمري معتبراته ولد عمي وزي عادل بالضبط، ماتوقعتش يجي يوم ونسمع هالكلام اللي متمنياته من شخص ثاني منه هوا، بإنزعاج🤨: بس أني مانفكرش في المواضيع هذي توا ومانبيش شي يلهيني على قرايتي
محمد، أبتسم😊: بس مني قالك أني راح نلهيك على قرايتك أو راح نوقف في طريقك، أني أكثر واحد ممكن ندعمك أنك تكملي قرايتك، وأنك تحققي رغباتك ويكون ليك مستقبل مزهر هالشيء يسعدني أكثر واحد
علا🤔 شني بنقوله هذا !! كيف بنصرفه !! أحسن شي نهرب، وقفت بغضب😠: على ماأعتقد رغباتي ومستقبلي حاجه ماتخصكش، وهربت جري🏃‍♀️ لأني عارفه روحي مانقدرش نجاري بالكلام واحد متعلم ومثقف كيف محمد😓
سنيه اللي كانت واقفه وراء الباب سمعت كل شي طلعت وهيا تشوف بأسف لمحمد اللي واضح مضايق ومزعوج من تصرف علا، بس مجرد مارفع رأسه وشافها أبتسم وبغمزه😉: شكلها ثقيله هلبا بنت عمك وواضح بتعبني معاها، ووقف وطلع من الحوش وهو الحيره مسيطره عليه ومش عارف كيف بيتصرف معاها
ومن محمد نمشو طول لحسام اللي كيف وصل للحوش من طلعته الصبح وأول ماخش من البوابه أبتسم وهو يشوف لحوش خاله
سعاد اللي غلبها النوم وهيا مقعمزه على التلفزيون ناضت مخلوعه من صوت تسكيرة الباب: حسام هذا أنت، نحسابها دنيا روحت وجت

حسام وليش هيا وين باش تروح
سعاد بعدم إهتمام: في حوش خالتها قتلها تجيني بعد ماتروح على الأقل تؤنسني وتقصر عليا الليل مادامه بوك معزوم عند صاحبه وأكيد يعطل باش يروح، وبإستغراب: وأنت خيرك مروح من توا مازال المغرب ماأذن
حسام بضيق وليش ماقالتش الصبح أنها بتمشي لحوش خالتها !! ، تي خيرك ياحسام الزفت شني تبيها تشاورك على المشيه والجيه هلبا عاد زودتها🙄، لا مش هكي بس ماذكرتش الموضوع بكل قدامي، بطل وهني روحك أنت شني وعدتها🤨، بإنزعاج: وأنتي ماتبينيش نروح ياأمي ولا كيف، جي صاحب المحل وقلت مادامه قاعد هو نروح أني
سعاد، بإبتسامه: لا على سلامتك ياوليدي مادابيا تونسني خير من قاعده بروحي
حسام أبتسم لأمه: إمالا ديريلنا فنجانين قهوه من إيدك وتعالي نقعمزو في الجنان
دنيا حطنا مؤيد في السوق وطلع والبنات يهدرزو ويضحكو ويسألو فيا على رأيي في حاجات وأني نهز في رأسي وخلاص وعقلي مش معاي ونفكر مني الراجل اللي مع أمي في السياره
خوله بإستغراب🤔: خيرك يادنيا وين سارحه، قوليلي شني رأيك في القفطان هذا
دنيا، فركت جبهتي بإيدي: حاسه رأسي يوجع فيا شويه مش واخده على اللودان هلبا، وأبتسمت😊 لخوله اللي كانت شاده قفطان حوامل خالي من أي تفاصيل: كويس خشي جربيه يبان على اللبس أكثر إذا كان هوا يناسبك أو لا
خوله: باهي خلي نجربه إمالا، وشويه ونكلمو مؤيد يجينا
إنتصار: معاش مازالو محلات هلبا نكلمه توا باش مايوصل لين أحني نكونو مكملين
كلمت إنتصار مؤيد وقاللها ربع ساعه ونكون عندكم، واقفين نستنو في خوله اللي تقيس في القفطان، وتلفتت بإنتباه للشباب اللي واقفين لما سمعت واحد منهم يقول
الشاب1: أيه وهذا اللي صار مدايره حجتها توصل في الصغار للمدرسه وتجيب فيهم باش دارلها سياره
الشاب2: وكيف ورقلها بعدين
الشاب1: في يوم عطلت على الصغار ومدير المدرسه كلم بوهم، جي وخذاهم وقعد واقف قدام المدرسه يستني فيها، وهيا وصلت لشارع المدرسه شبحها وقفت ونزل واحد كان راكب معاها وهيا كملت طريقها لين درست قدام البوابه متاع المدرسه وهوا واقف في الجهه الثانيه ويصور فيها بالتليفون كيف نزل الراجل من سيارتها
الشاب2: سبحان الله كيف ربك فاضحها وشني دارلها بعدين؟؟
الشاب1 كيف بيتكلم وانتبه أني مركزه معاهم أبتسم وسكت
دنيا طلعت تليفوني وأني في بالي فكره وإتصلت بماما: أهلين ماما، وين أنتي؟؟ أها قاعده في العياده !! باهي غير قبل نبي نروح قلت نشوفك كان مطوله نكلم بابا وخلاص، أها باهي توا نكلمه، سلام
إنتصار تشوف لخوله بإشمئزاز: لا لا حولي حولي مش حلو بكل، شوفي يادنيا شني رأيك؟؟
دنيا شفت لخوله بعدم أهتمام وأني نفكر زعما ماما صح في العياده ولا تكذب: لا لا ماطلعش عليك فوتيه
خوله تنهدت بضيق وهيا مافيش حاجه قاستها وطلعت عليها من بطنها اللي قدامها مترين ماتقولش عليها قاعده في الخامس
دنيا: مؤيد باللهي تخطمني على ماما في العياده نأخذ منها مفتاح الحوش باش تحطوني على طريقكم
إنتصار: خيرك يادنيا روحي معانا بعدين تجيك خالتي ولا عمي سعيد ليش تقعدي بروحك في الحوش
دنيا: ماهو غذوه عندي إختبار وأني ماقريتش حتى حرف، وكان بنقعد نستني ماما وبابا أمتي يروحو نقعد لعقابات الليل ومايصيرش من القرايه

خوله: ياريتك جبتي كتاباتك معاك راهو قريتي وكسدنا وتعشينا مع بعض
مؤيد شاف لخوله وهو قارن حواجبه: ومازال تبي حتى تتعشي شورك !! ماسدكش القنطار اللي كليتيه في الغذي، والله ماتعبي نحطك في حوشك طول، هذا ماناقص نقعد غير نعلف فيك صبح وليل
خوله قلبت وجهها للروشن ومن غير نفس: ماعنديش خلوق نرد على تفاهاتك لكن كلامك يوصل لأمي بإذن الله
إنتصار بضحكه: خليها ياناري متكنطيه السوق كله ماحصلتش حاجه تجي علاها😅
مؤيد: تي باللهي وين بتحصل مع الكره الأرضيه اللي قدامها هذي، خلى تقول للسي صلاح متاعها يفصلها على حسابها😂
وأستمرت مناوشات مؤيد وإنتصار لخوله وهما يتسهوكو عليها وعلى بطنها، وهيا مضايقه وتتحلف تقول لأمها على كلامهم ومتأكده أنهم راح يحصلو تهزيبات مقومات من ناجيه على خاطر خوله الغاليه على قلبها والمميزه بينهم عندها
سعاد طلعت وهيا شاده سفرة القهوه، ومستغربه🤔: خيرك ياحسام قعمزت أهنايا مقابل البوابه
حسام مخصوص مقعمزلها إهنايا باش نشوفها أمتي تروح😒: تي عادي ياأمي كله زي بعضه قعمزي قعمزي
سعاد بضيق😔: إمبكري نشوف في عليوه ولد حاتم يلعب مع ولد سناء قدام حوش خالك المبروك على قد ماناديته مابي يجيني، عنده حق مش واخد عليا ياحنه ديمه وهوا في حوش جده مفتاح مانشوفه كان مره في الشهر
حسام، بإنزعاج🤨: ماهو ياأمي كله من ولدك اللي يهز في رأسه المفروض يجيب ولده ومرته أهني على الأقل يونسوك عارفك بروحك، لكن هاتي من يفهم لا هوا فيه تُمره وحتى المرأه اللي طاح فيها مافيهاش خير
سعاد، بأسف😞: هذي غير بنت خوي كأنها حتى برانيه نقولو، الله غالب ربي يسعدهم ويهديهم ان شاءالله
حسام، بهزوه😏: كأنها برانيه راهو مش هكي وين تلقيه الهم غير في الأقارب وين دمك وين سمك، وسكتت بخوف لما خطرت دنيا على بالي،🤦‍♂️ تي شني قاعد نخرط أني الزفت ماهو حتى هيا بنت خالى😪😓
دنيا نزلت لما درس مؤيد قدام العياده وأني متوتره: شويه بس مانعطلش عليكم، وخشيت بسرعه
موظفه الإستقبال، بإبتسامه: أهلين تفضلي باش نقدر نساعدك؟؟
دنيا أبتسمت: ممكن نشوف الدكتوره ناديه ال…… لو سمحتي؟
موظفه الإستقبال، بأسف: بس الدكتور ناديه ماجتش اليوم بكل
دنيا، بصدمه: كيف !! باللهي غير تأكدي بالك جت وأنتي ماشفتيهاش
موظفه الإستقبال، بنفي: ماأعتقدش بس خليني نتأكد، وقامت سماعة الهاتف وكلمت الممرضه المسؤوله، وبأسف: زي ماقتلك ماجتش، وطلعت يوم السبت ماعندهاش مواعيد بكل
دنيا بصدمه😲 كيف ماعندهاش !! وين تمشي يوم السبت إمالا !! شني اللي قاعد يصير !! وبعدين كيف ماجتش هيا من نص ساعه قتلي أنها في العياده !! بس أهي الموظفه أكدتلي أنها ماجتش بكل كيف هكي !! إستاقظت لروحي وأبتسمت للموظفه اللي تشوفلي بإستغراب: شكرا
طلعت وأني حاسه الدنيا تلف بيا شني اللي قاعد يصير !! مش قادره نستوعب شي، حاولت ننفي كل شي وطلعت تليفوني وأتصلت بماما مرات أني متلخبطه في العياده أو شي: نعم ماما، وين قاعده في العياده أنتي؟؟ أها عيادة ال….. صح؟؟ وتلفتت للعياده وقعدت نقرأ في الأسم مره وإثنين وثلاثه على أمل أني نطلع غالطه بس لا هوا نفس الإسم😔 سكرت الخط وأني نشوف في سيارة ماما مدرسه في البركيدجو اللي قدام العياده وإذكرت أني لما شفتها إمبكري ماكنتش في سيارتها، اللي صار كله ماليشي إلا تفسير واحد بس وهو نفسه اللي في بالي😰😔
نزلت من الدروج وأني مش قادره نوازن خطواتي وصلت للسياره وركبت وأني متجاهله تساؤلات البنات ومؤيد، متحشمه نحط عيني في عينهم كيف بنواجهم كيف بنواجه نظرة الكل ليا لو يعرفو باللي قاعده إدير فيه أمي، بحزن😔: حطني في حوشنا باللهي
في مصر
خالد قعمز في جنب سندس اللي مركزه في التلفزيون وماكلفتش روحها حتي تشوفله، بضيق: ممكن تقوليلي أمتي بتبطلي عناد ويطيح اللي في رأسك هذا

سندس، برفعة حاجب: وشني اللي في رأسي ياأستاذ خالد وتبيه يطيح
خالد، بغضب😠: وين نندري عليك أني معقوله شهر وأنتي لاويه وجهك ومش معدله عليا ولا معبرتيني، مني الراجل اللي يرضي ويسكت على شي زي هذا، مش عيشه هذي راهو
سندس حاسه بروحي زودتها صح بس هكي تعودت وزاد هوا عودني لما نزعل مانرضاش لين يديرلي اللي نبيه، بس هالمره طولت زعلتي عارفه هالشيء مش بإيده، معليشي ياسندس تنازلي شويه باش ماتخسريش راجلك وولدك راهو النساوين أكثر من الهم على القلب، تزعليه أنتي يرضوه ميه غيرك، خفت وركبني الرعب لمجرد التفكير بس أنه ممكن خالد يسيبني ويفكر في غيري، تلفتت لخالد بإبتسامه😊: يطيح اللي في رأسي بس بشرط نطلعو وتعشيني برا
خالد، بفرحه☺: غالي والطلب رخيص أنتي تأمري ياعمري، وبغمزه😉 شني رأيك تعطيني تصبيره بس معاش نقدر نتحمل لبعد العشي، ورأس حبي🤤
سندس بمكر: لا بعد العشي ولا معاش في بكل😏
خالد، بضيق: مكاره😒، وأبتسم برجاء: باهي غير شويه بس حتى حضن الزفت😘
خلينا نخلوهم يتفاهمو ويتراضو على راحتهم😉 ونرجعو لليبيا😊
أحمد: تي قتلك غذوه طالع قالي الكونغرس متاعهم يبي يشوفني
سعد: تي لوح عليك وفكك ياراجل وين تعرفهم أنت يديرولك شي مصيبه ويلوحوك في الجبل تقعد ستين خريف مايندري عليك واحد
أحمد: باللهي فكني من وجه أمك الشؤم هذا ونوض أقلب وجهك من قدامي، قتلك بنمشي يعني بنمشي
سعد: والنبي أقعد فيها أنت وأفكارك السوده اللي واللهي لما تجيب أخرتك، وناض وقف
أحمد، بهزوه: أهرب أهرب ياجبان خززززي على الرجاله اللي زيك، هذا بدل ماتقولي معاك على الموت ياصاحبي وتسايرني، برا إمالا دور مني يجيبلك اللي تزرط فيهم
سعد: من خاف سلم وبعدين مليون واحد غيره يجيبلك اللي تبيه، ليش تخاطر بروحك وتمشيله وأنت حتى العرف ماتعرفه، أني نصحتك وأنت عقلك في رأسك هيا تشاوو😒
أحمد تفوووو( حاشاكم) على ولاد العم والصحاب اللي زيك، الناس تزيد القدام وهوا يؤخر التالي وقاتله الخوف، ولع سبسي وأبتسم لما تفكر أنه الرجل وعده يأمنله المكان اللي يدور عليه باش ينفذ اللي مخططله من زمان، والله لما نمشي واللي يصير يصير، بس لازم إندير الحاجه اللي في رأسي قبل مانمشي، وأبتسم بحقد 😏
دنيا درس مؤيد قدام البوابه ونزلت وخليتهم مستغربين من حالتي اللي حتى السلام ماسلمت عليهم، وخشيت وأني منهاره على الأخر ومش عارفه لأمتي راح نقدر نقاوم ونكبر ونمسك روحي، بدون مانبكي ونعيط وننهار😔😥
حسام خشت أمي دخلت السفره وقالت بتحط العشي على النار، وأني تلفتت للبوابه لما سمعت صوت سياره بس ماتوقعتش أنها هيا، لأنه لو كان عمي أو مرته راهم خشو الداخل بسياراتهم، بس تفاجأت😯 وأني نشوف فيها خاشه وباين أنها مش طبيعيه، وقفت بسرعه ومشيتلها، بإنزعاج: مني روح بيك؟؟

دنيا من غير إهتمام😔: مؤيد
حسام، بغضب😠: مني !! مؤيد !! وليش تروحي معاه !! كيف أصلا تركبي معاه بروحك؟؟ خير أمك مش معدله على حد الزفت ودايره مافي رأسك
دنيا زيد ماهو ناقصني أصلا، رفعت عيوني فيه ونزلت دمعه 😢حزن وقهر وتبعها سيل من الدموع😭
حسام إنصدمت بدموعها😲 معقوله كلامي ليها خلاها تبكي بالشكل هذا لا أكيد في شي ثاني أصلا من لما خشت وهيا مش طبيعيه، بالك الحيوان اللي جابها دارلها حاجه والله نطلع بروحه ولد ال🤬، ومسكتها من كتافها وقعدت نهز فيها، وبعصبيه😡: تكلمي خيرك !! شني فيه !! شن دارلك الحيوان هذا !! أنطقي، ماحسيتش إلا وهيا طايحه بين إيديا😔
قمتها بين إيديا وخشيت نجري بيها لأمي وأني ميت من الخوف عليها ومش عارف كيف رجليا وصلوني، من برا وأني نعيط: أمي ياأمي تعالي بسرعه
سعاد طلعت من المطبخ وتفاجأت في حسام وهوا شايل دنيا المغمي عليها بين أيديه، وبخوف: هيييي خيرها ياوليدي شني صارلها، ياربي لطفك
حسام حطيت دنيا على الصالون، وبخوف: مش عارف ياأمي شوفيها باللهي عليك طاحت فجأه🥺
سعاد وهيا تخبط على وجه دنيا، وبخوف😟: بسم الله بسم الله عليك يابنيتي، دنيا دنيا، هاتلي طاسة إميه بسرعه ياحسام
حسام مشيت بسرعه وعبيت طاسة ميه اللي نصها تبزع مني في الطريق من خوفي عليها😔
سعاد ترش في الميه على دنيا ومافيش فايده😓
حسام، بعياط😤: نوضي ياأمي خليني نرفعها للمستشفى مايمشيش الحال هكي نخليها لين تموت، وقرب بيقيمها، بس منعاته أيد أمه اللي قالت: خليها وجيب صنه بسرعه خلي نشوفوها بالك تفيق عليها
حسام جاب الصنه ومدها لأمه اللي قعدت تشمم في دنيا، وهوا قعمز على ركابه قدامها ومسك أيدها ونزلو دموعه من خوفه عليها من غير مايحس😢
حسام وقفت بفرحه☺ ومسحت دموعي وأني نشوف فيها بدت تصحي وتفتح في عيونها
سعاد، بفرحه☺: بسم الله عليك يابنيتي، الحمدلله الحمدلله، وسندتها ومدتلها طاسة الميه تشرب فيه، قرب حسام وخذي من أمه الطاسه لأنها مش مساعدتها وقعد يشرب فيها هوا😊
دنيا ثواني وبدت الرؤيه توضح عندي، وإستوعبت اللي صار واللي كنت نفكر فيه من قبل مانطيح، رجعت دموعي تنزل من جديد 😢وقعدت نبكي بصوت😭
حسام تلفتت لأمي وأني خايف عليه🥺: شوفيها خيرها ياأمي شني فيها ليش تبكي هكي ؟؟
دنيا وعلى قد مادارت عمتي وحسام شي مافتحتش فمي ولا نطقت حتى كلمه مش قادره نشوف لعيونهم متحشمه منهم شني بنقول كيف بنفسر، معقوله أمي تطلع هكي، فاتو دقايق هديت شويه بس قاعده ساكته وأني نشوف في حسام كيف خايف ومتوتر وماشي جاي في الصاله ويشوفلي بحزن، أول ماشاف عمتي ناضت للمطبخ قرب مني وقعمز جنبي
حسام قعمزت جنبها وشديت إيدها وبخوف🥺: باللهي ورأس أمك ريحيني شني فيه؟؟ تكلمي راك قاعده تقتلي فيا !! حد دارلك حاجه !! وتنفست براحه لما هزت برأسها بي لا، وقربت وحضنتها لما رجعو دموعها نزلو من جديد مش قادر نشوفها هكي😔 مش متحمل نشوف دموعها😔، ليش ياربي تكسرني بيها💔
دنيا تمسكت في حسام لما حضني وكأني محتاجه لهالحضن من سنوات من حد يكون حاس بيا فعلا وخايف عليا، وزدت في البكي😭
حسام بخوف😟: خلاص هدي روحك باللهي، مافيش شي يستاهل إديري في روحك هكي، أني جنبك والله مهما صار مستحيل نسيبك ماتخافيش😞
“” أنا هنا بجانبك سأصبح سندا لكِ.. سأكون الحضن الذي يتسع لكِ ولهمومك وسأصبح ضماد لجروحك… وسأجبر قلبك حتى ولو على حساب كسر قلبي أنا “”

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)