رواية رؤيا الفصل السادس عشر 16 بقلم دينا محمد

رواية رؤيا الفصل السادس عشر 16 بقلم دينا محمد

رواية رؤيا البارت السادس عشر

رواية رؤيا الجزء السادس عشر

رواية رؤيا الحلقة السادسة عشر

تاني يوم في المعرض عند عاصي كان هيتجنن من الكلام اللي رؤيا قالته مش عارف ايه اللي حصل وايه اللي وصلها للحاله اللي كانت فيها، عايز يروح لها البيت بس محرج من مامتها وهي مش بترد عليه خالص
بينادي على عم سعيد بصوت عالي
عم سعيد عم سعيد فين القهوه بتاعتي
مروان دخل عليه المكتب
مالك بتزعق كده ليه
كان ماسك دماغه من الوجع اللي حاسس بيه
دماغي هتنفجر من الصداع مش قادر استحمل
مروان: طيب اهدى مالك انت فيك حاجه
عم سعيد دخَّل القهوه وخرج
يالا اشرب القهوه واحكيلي
عاصي حكاله اللي حصل مع والده ومكالمه رؤيا الغريبه اللي مش فاهم منها حاجه
مروان كان مستغرب جدًا من اللي حصل
بص يا عاصي موقف والدك انا متفهمه جدًا وهو معاه حق بس برضو انا شايف انه هيوافق مش هيغلط غلطته مرتين
و والدتك هتأثر عليه وان شاء الله هيقتنع قريب، بس موضوع رؤيا ده غريب في حاجه غلط، ايه اللي حصل خلاها تقولك الكلام ده اكيد في حاجه كبيره حصلت، انتَ مش هينفع تروحلها البيت اولًا علشان والدتها ثانيًا انتَ مش عارف هي وصلِّها ايه وممكن لو روحت الموضوع يتطور للأسوأ
عاصي: أنا فاهم ده بس مش قادر أقعد متكتف كده، صوتها كان صعب اوي يامروان كان كله وجع، لازم افهم لازم
مروان: لاقيتها، عارف مين اللي هيقولنا ايه اللي حصل
عاصي بلهفه: مين قول بسرعه
مروان بضحك عليه: ايه اللهفه دي امسك نفسك شويه يا عاصي القلوب
عاصي بعصبيه وصوت عالي: مين يامروان
مروان: خلاص انا بهزر معاك، ندى صاحبتها انتَ كنت قولتلي انها اقرب صاحبه ليها واكيد عارفه كل حاجه
عاصي: فعلًا ازاي مافكرتش فيها، هرن عليها
رن عليها اكتر من مره بس مردتش عليه
مش بترد أعمل ايه دلوقتي
مروان: طيب هات رقمها هرن أنا عليها ممكن زعلانه على صاحبتها ومش عايزه ترد عليك
تمام، اكتب………..
رن على ندى وفعلًا ردت عليه
مروان: السلام عليكم آنسه ندى، مع حضرتك مروان الأحمدي صاحب عاصي
ندى بتوتر هي مكنتش عايزه ترد على عاصي لانها مضايقه منه وزعلانه جدًا على رؤيا بس برضو في حاجه جواها بتقول ان عاصي مظلوم
قاطع تفكيرها صوت مروان
آنسه ندى انتِ معايا
ايوه مع حضرتك اتفضل
مروان: معلش الكلام مش هينفع في الموبايل انا عند عاصى في المعرض ممكن حضرتك تشرفينا الموضوع ضروري جدًا
ندى كانت متوتره جدًا بس لاقيت نفسها بتقوله انها موافقه وهتكون هناك كمان ساعه
مروان: خلاص اهدى علشان لما تيجي تعرف تتكلم معاها براحه
عاصي: حاضر هحاول
في منزل عاصي
والدة عاصي كانت بتحاول تتكلم مع والده في موضوع عاصي و رؤيا
بص يا حج أنا اكتر واحدة عارفه قد ايه فراق اسامه الله يرحمه كان صعب عليك وانت برضو عارف غلاوته عندي كانت ايه ده انا اللي مربياه على ايدي ده كان ابني البكري مش اخو جوزي، بس انا مش هستحمل اتوجع على عاصي ولا انت
كمان يا حج هتقدر تتوجع عليه ولا تعيش بذنبه عمرك كله
ابنك مبقاش صغير هو عارف مصلحته ومدام اختار البنت دي يبقي هو متأكد ان دي هيا اللي هتنفعو، خلينا نثق فيه وفي اختياره وبلاش نقف قدام سعادته علشان خاطري يا حج انا عارفه كل اللي انتَ بتفكر فيه وانك خايف عليه بس هو مبقاش صغير وهيقدر يتحمل نتيجه اختياره علشان خاطري بارك الموضوع علشان يتم برضاك ومباركتك يا حج
والد عاصي: ما عنديش كلام اقوله بعد كل اللي قولتيه يا حاجه ربنا يسعده ويكمله على خير ان شاء الله ويخيب ظني
والدة عاصي بفرحه: ربنا يخليك لينا يارب، اكلمه بقى افرح قلبه
لا سبيه لما يجي بليل أنا هتكلم معاه
خلاص ان شاء الله يا حج ربنا يباركلنا فيك يارب
في المعرض
ندى كانت متوتره جدًا من عاصي بس كان صعبان عليها واضح جدًا انه مش نايم خالص وقلقه على رؤيا واضح في عنيه
مروان: عاصي ممكن تهدى علشان آنسه ندى تقدر تتكلم
عاصي بعصبيه: حاضر انا هادي أهو ممكن تتكلمي
ندى أخذت نفس طويل وبدأت تحكي كل حاجه حصلت من رانيا
عاصي ومروان كانو مصدومين من اللي بيتقال
مروان: معقول في حد بالشر ده
عاصي: انا كنت حاسس انها مش كويسه بس كنت بوقفها عند حدها بس عمري ماتوقعت انها بالشر والحقد ده، دي لازم اوقفها عند حدها، وبعد كده اشوف الاستاذه اللي صدقت كلامها واني ممكن اعمل كده
مروان قطع كلامه
معلش يا عاصي آنسه رؤيا لسه صغيره وطبيعي انها تقع في فخ واحده زي رانيا واضح انها واحده زكيه جدًا وتقدر تقنع اللي قدامها باللي هي عايزاه وخصوصًا لو حد ماعندوش تجارب وخبره
ندى كانت معجبه باسلوب مروان وانه قدر يقنع عاصي باللي حصل فعلًا
أنا كده قولتلك كل اللي حصل بس لازم امشي دلوقتي
عاصي: شكرًا جدًا ليكي بس ياريت ماتقوليش لرؤيا أي حاجه من اللي حصلت دلوقتي لحد بس ما اشوف طريقه علشان اتكلم معاها واشرحلها كل حاجه بنفسي
ندى: تمام مفيش مشكلة
عاصي: مروان ممكن توصل آنسه ندى لبيت رؤيا
ندى بتوتر: لا انا هطلب أوبر
مروان استغرب توترها :لا ماينفعش اتفضلي، هوصلها وهجيلك علطول ياريت تهدى علشان نعرف هنعمل ايه مع رانيا دي الأول
عاصي: تمام
بعدها بشويه عاصي كان قاعد بيفكر في كل اللي حصل، عم سعيد دخل عليه
سعيد: مدام رانيا عايزه حضرتك
عاصي بمكر: تمام دخلها ومفيش حد يدخل علينا خالص
سعيد: حاضر، اتفضلي حضرتك استاذ عاصي في انتظارك
رانيا دخلت على عاصي كانت لابسه فستان أحمر قصير وشعرها مفرود علي ظهرها وعلى وجهها ابتسامه الانتصار
ازيك يا عاصي وحشتني جدًا ايه اخبارك
عاصي: اهلا بحضرتك مدام رانيا
لسه برضو مش عايز تشيل الالقاب
لازم يكون في حدود بيني وبين عملاء المعرض وحضرتك عميله هنا
رانيا بدلع:بس أنا مش أي عميله ولا ايه
عاصي بمكر : طبعًا حضرتك مش اي عميله علشان كده انا كنت هجيلك بنفسي كمان يومين علشان أقدم لحضرتك دعوه فرحي أنا ورؤيا افتكر شوفتيها معايا اكتر من مره
رانيا كانت مصدومه من كلام عاصي واتكلمت بعصبيه
رؤيا ازاي انتَ عايز تسبني أنا علشان العمياء دي
عاصي: اخرسي اياك تتكلمي عليها بالطريقه دي دي أجمل انسانه شوفتها في حياتي جميله من برا ومن جوا، مش زيك متظاهره بجمالك ومبسوطه بيه بس من جوا في شر وغِل وقرف، بس بجد التمثيليه اللي عملتيها دي هابطه جدا
رؤيا أعقل من انها تصدق كلام واحده زيك بس بجد مجهودك واضح خليتي حد يصورنا وبعتي الصور لبابا و وصلتي للبنت اللي شغاله في البيت وخلتيها تسجلنا، بس برضو كل ده طلع على الفاضي،
اسمعي كلامي علشان مش هكرره تاني لو شوفتك تاني حتى لو صدفه او حاولتي توصلي لرؤيا او تمسيها بأي حاجه
هروح لعيلتك وانا عارف حجمهم ومكانتهم في المجتمع وهحكيلهم عن مغامرات بنتهم مع كام خبر للصحافه وده طبعًا هيمس سمعتهم ومكانتهم وانتِ عارفه ممكن يعملو ايه مع اي حد ممكن يأثر عليهم انا مش محتاج اقولك،
رانيا اتوترت جدًا من كلامه عن عيلتها وكانت هتتكلم
بس عاصي قاطعها
انا قولت اللي عندي ومش عايز اسمع حاجه تانيه ولا أشوفك تاني اتفضلي وقبل ماتفكري تعملي حاجه حطي في دماغك كويس الكلام اللي قولته
رانيا اتوترت اكتر ظهر الخوف على وجهها وخرجت بسرعه برا المكتب والمعرض كله
تاني يوم في بيت عاصي
والده و والدته كانو بيفطرو
الام: صباح الخير يا حبيبي يالا تعالى افطر
عاصي: صباح الخير عليكم، معلش يا حاجه متأخر على المعرض
الأب: تعالى افطر علشان عايز اتكلم معاك شويه
حاضر يا حج، اتفضل
الأب حدد ميعاد مع والد رؤيا علشان نتعرف عليهم
عاصي كان مصدوم مكنش مصدق ان والده ممكن يوافق بالسرعه دي
بجد يا حج
اومال بهزر معاك يا ولد
عاصي بيضحك ربنا يخليك لينا يارب
الأم: ربنا يتمملك على خير يا ابني
ربنا يخليكي لينا يا ست الكل
بابا هحدد ميعاد مع والدتها علشان والدها متوفي، أنا بقول انهارده بعد صلاة العشاء ان شاء الله
الام بتضحك : طيب ادي للناس فرصه يستعدو
عاصي: خير البر عاجله ولا ايه يا حج
الاب: ماشي يا بكاش على خير ان شاء الله
انا هروح المعرض وهحدد الميعاد وهكلم حضرتك، السلام عليكم
الأب والأم: وعليكم السلام ورحمة الله وبركاته
عند رؤيا في البيت
مامت رؤيا بتحاول معاها علشان تفطر
يا بنتي حرام عليكي انتي ما أكلتيش حاجه من امبارح
معلش يا ماما مش قادره والله
طيب قوليلي مالك ايه اللي مزعلك
مفيش حاجه يا أمي معدتي وجعاني شويه بس
ماشي يارؤيا، هستناكي تيجي تحكيلي، الباب بيخبط دي اكيد ندى، هروح افتح
ندى : صباح الخير يا ست الكل
صباح الخير يا ندى، ادخلي صاحبتك تعباني ومش عايزه تأكل اي حاجه
ندى: ايه ده رؤيا هانم مزعلاكي لا دي لازم تتعاقب بقى، متقلقيش انا هدخلها وهخدها ونخرج نتمشى شويه
ماشي يا حبيبتي خلي بالكم من نفسكم
ندى بتدخل لرؤيا
رؤيا هانم اللي بتتدلع يالا قومي هنخرج نتمشى شويه
لا مش قادره مش عايزه اخرج
ندى بتضحك حد قالك اني بأخد رأيك انا بقولك اللي هنعمله
يالا قومي إلبسي انا هقعد مع طنط لحد ما تخلصي
رؤيا اتنهدت وقامت تلبس
في مكان جميل وهادي على النيل
ندى: ايه رأيك في نسمه الهواء الجميله دي
رؤيا: فعلًا المكان شكله جميل جدًا وهادي
اكيد مش اجمل منك
رؤيا اتنفضت من على الكرسي، عاصي ايه اللي جابك هنا
ممكن تقعدي وتهدي لازم نتكلم مع بعض
رؤيا: مفيش كلام بيني وبينك تاني
عاصي بمكر: فعلًا احنا لسه كل حاجه حلوه بينا هتبدأ
رؤيا انا لسه مش قادر اصدق انك صدقتي الزفته اللي اسمها رانيا دي، للدرجادي ماتعرفنيش ومش بتثقي فيا، على فكره انا زعلان منك جدًا ولازم تصالحيني بس هنأجلها لحد انهارده بليل علشان والدي و والدتي هيجو انهارده علشان يتعرفو على اللي سرقت قلب ابنهم
رؤيا كانت فرحانه جدًا بس مش عايزه الفرحه تظهر عليها، هي كان في حاجه جواها مصدقه انه معملش كده وان اكيد حبها ليه مكنش غلط
عاصي شاف الفرحه على وجهها وده طمنه جدًا
يالا علشان اروحك، انا كلمت والدتك وحددت معاها الميعاد، نتقابل بليل يا زوجتي المستقبليه، وعلى فكره هأخد حق الليله اللي ماشوفتش فيها النوم بسببك كانت اسوأ ليله في عمري كله
رؤيا اتوترت جدًا
فين ندى كانت متفقه معاك
عاصي كان بيضحك بصوت عالي ضحكه كلها فرحه
ايوه و اكيد وصلت البيت عند والدتك، يالا علشان منتأخرش
في نفس اليوم بالليل
رؤيا في غرفتها وندى معاها كانت متوتره جدًا
ندى: اهدي يارؤيا بلاش توتر
رؤيا: طيب شكلي حلو الفستان حلو عليا
كانت ترتدي فستان باللون الأزرق به ورد صغير باللون الابيض
و صندل مفتوح بنفس لون الورد وشعرها كانت سيباه وعليه طوق من الورد الأبيض
ندى:زي القمر يا حبيبتي والفستان حلو أوي عليكي، مش المفروض تطلعي تسلمي عليهم
َماما هتيجي تأخدني دلوقتي
لسه برضو عايزه تقدملهم الحاجه الساقعه بنفسك
ايوه ياندى متقلقيش انا الحمدلله بعمل كل حاجه في البيت وعايزه اعمل كده علشان والده و والدته يطمنه ويعرفو ان الموضوع مش مأثر عليا وإني متعايشه معاه الحمد لله
والدة رؤيا دخلت عليهم وهي فرحانه
ماشاء الله يا حبيبتي زي القمر ربنا يبارك فيكي ويحفظك
يالا الناس برا عايزين يتعرفو عليكي
هندخل على المطبخ الأول وبعد كده تطلعي انتِ بالحاجه
رؤيا بتوتر: حاضر ياماما، يالا يا ندى
لا يا حبيبتي اطلعي انتِ وأنا هطلع شويه كده
رؤيا ماسكه الصينيه وداخله بيها مشاعر كتير أوي جواها فرحانه ومبسوطه ان ربنا بعتلها واحد زي عاصي بيحبها وبيخاف عليها وراجل يعتمد عليه قدر يقنع اهله بيها والحمد لله هما هنا انهارده علشانها هي، وبرضو كانت قلقانه ومتوتره بس خلاص مبقتش بتخاف عاصي قدر يمحي الخوف من جواها زي ماوعدها
حطيت الصينيه مكانها وكانت متمكنه جدًا
والد و والدة عاصي كانو متابعينها و حاسو بالراحه لما شافوها
عاصي أخد الصينيه و وزع على كل اللي موجودين
عاصي كان لابس قميص أبيض وبليزر و بنطلون اسود
رؤيا حاسيت بالحركه اللي عملها وكانت مبسوطه بيه
والدة عاصي: بسم الله تبارك الله زي القمر يا حبيبتي تعالي اقعدي جنبي
رؤيا حددت مكان الصوت وراحت فعلًا قعدت
والد عاصي كان عنده احساس بالراحه هو نفسه استغربه بس كان فرحان برؤيا
اهلًا بيكي يا بنتي أنا اتشرف بمعرفتك
رؤيا: أهلًا بحضرتك يا عمي الشرف ليا
طيب ياجماعه أنا هدخل في الموضوع علطول أنا هنا انهارده علشان اطلب بنتنا رؤيا لابني عاصي، ايه رأيك يا حاجه
والدة رؤيا: هقول ايه يا حج كفايه انكم نورتونا انهارده، أنا أهم حاجه عندي سعاده رؤيا وأنا شايفه عاصي راجل ما شاء الله يعتمد عليه
والد عاصي: ربنا يخليكي بس نسمع رأي عروستنا الأول
ايه رأيك يا بنتي
رؤيا كانت مكسوفة جدًا ووشها بقى احمر من الكسوف
والد عاصي ضحك على كسوفها
خلاص يبقى السكوت علامه الرضا
بصي يا حاجه أنا لما قولت اني طالب ايد بنتي رؤيا كنت أقصدها، أنا لما شوفتها دخلت قلبي علطول ربنا يباركلك فيها
والحمد لله عاصي شقته جاهزه من كل حاجه ناقصها عروسته بس تنورها وعلشان كده أنا عايز اطلب من حضرتك حاجه
والدة رؤيا قلبها ارتاح اكتر بعد كلامه
اتفضل يا حج
خير البر عاجله وأنا عايز أفرح العرسان
مروان صاحب عاصي بيجيب المأذون وزمانه على وصول خلينا نكتب الكتاب وحددي الفرح في الوقت اللي انتِ عايزاه
صدقيني كده احسن علشان يقدرو يتعاملو مع بعض وميبقاش
في أي حرج
والدة رؤيا كانت محتاره بس لاقيت نفسها بتقول
على خيرة الله ربنا يسعدهم يارب
ندى طلعت واتعرفت عليهم والبيت كله كان فرحان
والد عاصي بصله وغمزله
عاصي بص وابتسم لوالده، وافتكر لما طلب من والده لو ارتاح لرؤيا يطلب من والدتها انهم يكتبو الكتاب في نفس اليوم
رؤيا كانت متوتره جدًا وعاصي حس بيها
ها ايه رأيك في المفجأه دي
رؤيا: مفجآتك انهارده كتير شويه
عاصي بيضحك: لسه مشوفتيش حاجه
المأذون جه وكتب الكتاب
بارك الله لكما وبارك عليكما وجمع بينكما في خير
عاصي قدم لرؤيا بوكيه ورده كبير وخاتم ألماس فيه فراشه صغيره عليها فص بألوان كتير
مبروك عليا انتِ يارؤيا
لابسها الخاتم وباس إيديها
ساب اهله مع بعض وأخد رؤيا للبلكونه
مسك ايديها وباسها تاني مش مصدق انك بقيتي مراتي، رؤيا أنا بحبك من أول مره شوفتك فيها وانتِ دخلتي قلبي وعمرك ما هتطلعي ابدًا منه، أوعدك اني اكون معاكي ديمًا واشاركك في كل حاجه حتى لو كانت صغيره، اوعدك اني احافظ على الهديه الكبيره اللي ربنا هداني بيها، رؤيا اتكلمي عايز اسمعك
رؤيا: أول مره احسها وأول مره هقولها لحد، بحبك يا عاصي بحبك انتَ قدرت تعوضني عن كل حاجة حصلتلي قبل كده، قدرت تحسسني بالأمان وده كان أهم حاجه عندي، انتَ بقيت كل دنيتي ربنا يخليك ليا ونفضل مع بعض طول العمر
عاصي أخدها في حضنه ربنا ما يحرمني منك ابدًا يا أجمل حاجه في حياتي
النهايه

لقراءة باقي حلقات الرواية اضغط على : (رواية رؤيا)