رواية طفلة أرهقت قلبي الفصل الرابع والعشرون 24 بقلم عائشة البشير

رواية طفلة أرهقت قلبي الفصل الرابع والعشرون 24 بقلم عائشة البشير

رواية طفلة أرهقت قلبي البارت الرابع والعشرون

رواية طفلة أرهقت قلبي الجزء الرابع والعشرون

رواية طفلة أرهقت قلبي الحلقة الرابعة والعشرون

‏الحياة تنقلب بلحظة.. بمكُالمة هاتفيّة، نتيجة تحاليل، خُطوة خاطئة في الشارع، مقابلة شخص، كلمة أو حتّى موقف موقف.. حيثُ لا قوّتك، ولا علمك، ولا فهمك، ولا أموالك ستنفعك أمام أيّ لحظة من هذه اللّحظات.. لا أحد يعرف ماذا تحملُ معها اللّحظات القادمة لذلك قُل دائمًا: اللهُم تولّني فيمن توليت.. 🤲🏻
صوت عمي العالي خلا كل الموجودين يتلفتوله بإستغراب، والعيله كلهم قدمو جيهته بهلع وخوف
مصطفي، بخوف: شني فيه يالمبروك شني صاير
المبروك، بصدمه: هذا رمضان ال…… قالي واحد من الحياش اللي في الحوازه والعه فيه النار، وعلى هالكلام الكل طلعو لسياراتهم وماقعدش في المكان إلا الناس اللي جايين يحضرو في الإفتتاح، وأني ماعرفتش كيف نتصرف نطلع أو نقعد معاش فهمت شي، أطريت في أخر الأمر نطلع بعد ماوصيت خالتي والبنات على المكان، ركبت مع عمتي وعمي مصطفي اللي كانو مع حسام اللي قعد يستني فيا وأصر أني نطلع معاهم ومانقعدش بروحي، طول الطريق اللي ماكنتش طويله كان التوتر سيد الموقف لما قربنا من الحوازه كان الدخان متاع الحريق معبي الأجواء
وصلنا وسيارة الإطفاء اللي طلبوها الجيران أول ماشافو النار وصلت معانا، كان المكان زحمه والناس واقفين في البوابه المفتوحه كلها ويتفرجو كانو مضببين الرؤيه نوعا ما، وأول مانزاحو بدت الصوره تبان شويه شويه إنفتحو عيوني بصدمه لما شفت الحوش اللي والعه فيه النار كان حوشنا حوش بوي وأمي الحوش اللي عشت فيه طفولتي الحوش اللي قضيت فيه أغلب أيام وحدتي الحوش اللي كان فاضي عليا حتى لما كانو بوي وأمي حيين، مني اللي مازال حاقد عليا وخذي مني حتى ذكريات الوحده اللي كانت ليا في هالحوش😔💔
درس حسام على طول في بداية البوابه من غير مايقدم لما شاف النار، وكل السيارات كانو برا أصلا وفيهم النساوين ماحد قدر يخش الداخل وسط الزحمه
مصطفي نزل بسرعه: ياساتر ياساتر لاحول ولاقوة إلابالله وخش الداخل وين ماواقفين المبروك وبشير ومفتاح اللي وصلو قبلهم
سعاد شدت إيد دنيا، وبحزن😔: الله غالب يابنيتي ربي يعوضك خير
حسام ماقدرتش ننزل كنت خايف من أنها إدير أي ردة فعل مهما كان هذا حوشهم من ريحة أمها وبوها تشوف فيه ينحرق قدامها أكيد راح تنهار أو إدير أي لقطه، بس شي كانت بارده لأبعد حد وهالشيء مش جديد علاها
دنيا النار اللي كنت نشوف فيها وكأنها والعه في قلبي بس حاولت على قد مانقدر أني نكون هاديه من الخارج، نشوف في الناس كيف تجري ورجال الإطفاء كيف يحاولو يطفو النار اللي واضح أنها ماعقبت شي، تنهدت بحزن😔: إنا لله وإنا إليه راجعون، اللهم أجرني في مصيبتي وأخلف لي خيرا منها

 

 

 

حسام قعدت حوالي ربع ساعه في السياره وماسمعتش منها إلا هالجملتين، سرحت بخيالي لليلة إمبارح
Flashback
حسام، بحب❤: أهلين ياقلبي
دنيا، بإبتسامه😊: أهلا خليك شويه قدام الباب بنجيبلك حاجه، وخشت بسرعه دقايق ورجعت وفي إيدها ساكو كبير نوعا ما واضح أنه رزين مش قادره تقيمه بسهوله
حسام قدمتلها بسرعه، وأبتسمت😊: وأخيرا حنيتي عليا وبترجعي لحوشنا
دنيا، برفعة حاجب🤨: لا مني قالك!!
حسام، مط شواربه بزعل☹: لما شفت الساكو توقعت أنه قلبك حن
دنيا، بضحكه😅: لا غالط للأسف، أسمعني شويه
حسام، بتركيز: كلي ليك مش سمعي بس قولي🤗
دنيا أبتسمت😊: الساكو هذا فيه فلوس بابا وماما وذهبها والأوراق المهمه وشوية حاجات
حسام قعدت نشوفلها بإستغراب 🤔
دنيا نزلت رأسي: بصراحه لما أنت إنحبست خفت حد يخش للحوش ويأخذ شي قلت أحسن شي نطلعهم ويقعدو معاي، بس معاش نقدر نخليهم معاي أكثر مانبيش حد يشك فيهم، نبيك أنت إدبرلهم مكان بمعرفتك
حسام، بإعجاب: تاريتك مش هوينه، كيف فكرتي هكي طلع عندك دماغ حربي ماشاء الله، وبغمزه😉: وكان نأخذهم ونهرب توا شني بديري
دنيا، بنص عين😒: بلا تسهويك مش وقته بكل هيا خوذهم وبرا توا قبل مايطلع حد ويشوفنا
حسام: لهالدرجه واثقه فيا باش تسلميني حاجات ثمينه هكي
دنيا، بإبتسامه😊: واثقه وهلبا لدرجة نسلمك حاجات أثمن من هكي وأني عيوني مغمضات ومن غير مانفكر
حسام، بحب❤: ياعيوني أنتي ربي يقدرني ونكون قد ثقتك، ماقلتيليش كيف المعنويات لغذوه
دنيا تلفتت بخوف لما سمعت صوت وراي، بس ماكان فيه شي واضح، رجعت تلفتله بتوتر: خوذه وبرا توا قبل، وبعدين نحكو على التليفون على المعنويات وكل شي لغذوه
Now
سبحان الله شوف النصيب وكيف هيا نيتها وقلبها أبيض، لو كان كل شي قاعد في الحوش كنت راح تكون خسارتها كبيره سبحانه ربك كيف لطيف بعباده، تنهدت بضيق لما شفت أنه النار شبه إنطفت ونزلت وتوجهت لبوي وخوالي اللي واقفين بعيد شويه مع الجيران وواحد منهم كان الحاج رمضان اللي كان يسكن في العماره اللي مقابله الحوازه وهوا اللي بلغ خالي المبروك بالحريق
المبروك، بأسف😞: لا حول ولاقوة الابالله العلي العظيم، ربي يعوض خير ان شاءالله
مصطفي، بحزن: الحمدلله اللي جت على هكي وبس الحمدلله اللي في المال ولا في الأرواح
حسام، بحيره🤔: أشبح شني اللي صار، الحوش حتى الكهرباء مفصوله عليه شني اللي خلا النار تولع فيه بهالطريقه
بشير، بضيق: ياودي الحوازه فيها حاجه راهو ماتكمل مصيبه لين نخشو في اللي أحرف منها لازم نقطعو التابعه
محمد، بإنزعاج: شني هالكلام ياعمي أستغفر ربك كل شي إبتلاء من عنده سبحانه، قول اللهم أجرنا في مصائبنا وأخلف لنا خيرا منها
مفتاح، بحيره: زعما تكون مفتعله في حد بالتعني ولع النار
……..: مرات يكون الغاز تفجر أو شي
حسام، بنفي: لا مافيش غاز في الحوش أصلا

 

 

 

رمضان، بضيق: بصراحه ياجماعه الحريق مش غاز أو ماس كهربائي لا، كان بفعل فاعل راهو
الكل إنتبهو لرمضان بصدمه وقعدو مركزين معاه من غير مايتكلمو وفي رؤسهم مليون علامة إستفهام
رمضان، بتوتر: أني لما طلعت لبلكونتي شفت حد كان يصب في البنزينه حوالين حوش مصطفي ولما عيطت عليه من فوق لوح البانقا وولع النار وحذفها على حوش سعيد اللي شكله كان مغرقه بالبنزينه من قبل مانطلع، شكله كان ناوي يحرق الحياش الزوز مع بعض بس لما شفته وعيطت عليه ولع النار بسرعه وهرب
الكلام كان زي الصاعقه اللي نزلت على مسامع الكل مني اللي معقوله يكون حاقد للدرجه هذي
حسام، بغضب😠: ماشفتش اللي دار هكي ياعمي رمضان يعني وجهه شكله أنت تعرفه تقدر توصفه
رمضان، بأسف😞: لا ياولدي مش باين كويس من فوق وهوا كان متغطي أصلا
مصطفي تنهد بضيق: إنا لله وإنا اليه راجعون الحمدلله على كل حال، تلفت وشاف الزحمه بدت تخف وعامر وعصام وسامر كانو واقفين في جنب البوابه يسقدو في الناس اللي كانت تحمد بالسلامه، رجع تلفت للحوش اللي كان أسود مع بعضه وبقايا الدخان قاعده تتصاعد منه وواضح أنه النار ماخلفت شي من وراها إلا الحيط اللي قاعد واقف، هز رأسه بأسف: الله غالب هيا تفضلو ياجماعه خشو للمربوعه
الرجاله اللي كانو واقفين معاهم أستأذنو بعد ماحمدو على سلامة الكل وطلعو
المبروك: هيا تفضل ياحاج رمضان نكسبوك على الغذي ولا حتى طويسة قهوه
رمضان: لا واللهي أعذروني مره ثانيه إن شاءالله، الحمد لله على سلامتكم ربي ستر
مصطفي، بإمتنان: الله إيسلمك صحيت ياحاج بارك الله فيك، نوقفو معاك في ساعه طيبه إن شاءالله
رمضان: ولو الواحد مادارش إلا الواجب ياريت كان في إيدي شي درته ولا صار اللي صار
مصطفي، بضيق: الحمدلله لاإعتراض على حكمه سبحانه
رمضان، بإبتسامه😊: الحمدلله هيا أسمحولي نشوفكم على خير، وتلفت لمفتاح: باللهي نبيك شويه يامفتاح بعد إذنك، ومشي هوا وياه طالعين برا
مصطفي: في أمان الله، وأشر لحسام وولاد خاله اللي واقفين جنبه: هيا برو دخلو السيارات والعيله اللي خليتوهم في الشارع وردو البوابه، مشو حسام ومحمد وعامر وسامر كل واحد لسياره، ومصطفي تلفت لبشير ومبروك: هيا تعالو خشو نشربو طاسة قهوه ومشو متوجهين لمربوعة مصطفي اللي كانت أقرب واحده
حسام ركب وتلفت لدنيا اللي منزله رأسها ومتكيه بيه على الكرسي اللي قدامها، تنهد بضيق وولع وخش الداخل درسو السيارات جنب بعض ونزلو الكل وتوجهو لدنيا وسعاد اللي نزلو وقعدو واقفين في مكانهم يتفرجو على حجم الدمار اللي خلفاته النار سبحان الله وكأنه سحر صار في لمح البصر، دقايق بس كانت كفيله بأنها تخلي كل شي رماد
فوزيه قربت وإضبطت دنيا وبحزن😔: الله غالب يابنيتي ربي يعوضك خير
دنيا بعدت مرت عمي، وتلفتت للكل وأشرتلهم بإيدي بضيق: لو سمحتو ماحد يقدم ويواسيني أخر همي الحوش راحو اللي أغلى منه، بس ياريت حد منكم يفهمني أمتي راح تعتقوني وتخلوني في حالي أمتي راح يتم ظلمكم وتعذيبكم ليا ها قولولي أمتي
أيه، بضيق: دنيا حبيبتي هدى شويه مش وقته هالكلام
دنيا عندي حق نفكر أنه حد من بينهم هوا اللي دار هكي لأنه كل اللي ضروني كانو من عيلتي ماحدش غريب ضرني أو تعرضلي من قبل، بغضب😠: باللهي خليني ياأيه شني مازال يبو مني ثاني قولولي إنتحري يادنيا وخلاص حطولي سم في الميه وجيبوها أنا نشربها عادي ونموت ونرتاح ونريحكم أفضل ماتقتلوني كل يوم بالبطي هكي، ورفعت رأسي لفوق وبلوم: ليش ياربي تحطني بين عيله زيهم شني الذنب اللي أني درته باش تعذبني هكي ليش ياربي ليش
الكل كانو يشوفولها بحزن وماحدش قادر يدير أي شي أو يقول شي أو حتى يقدم منها كل واحد واقف في مكانه وكلامها وجعه في وسط قلبه
محمد، بحزن: أستغفري ربك يادنيا شني هالكلام اللي تقولي فيه، أحمدي ربي على كل حال لا إعتراض على حكمه
دنيا هزيت رأسي بأسف وزفرت بقوه وأني نحاول نقوي روحي أكثر قبل كنت نقول خليك قويه ماتخليش حد يتهزأ على ضعفك، ماتسمحيش لحد يكسرك أو يتشمت فيك أو يضحك عليك قبل كنت نتصنع في القوه غصبآ عني باش نبان قويه من برا، بس اني ضعيفه ومكسوره ومشتته من الداخل، بس توا نقول خليك قويه لأنه عندك رب يأخذ حقك يشوف في حالتك وظلمك وهوا أقوي من كل شي وقادر يجبر كسرك، قبل كنت نقوي في روحي بروحي بس توا أني قويه بربي بإيماني بثقتي فيه أنه مستحيل يخذلني، تنهدت من قلبي: حسبي الله ونعم الوكيل في كل واحد ظلمني، خليتهم واقفين وإنسحبت من جنبهم بدون مانعطي مجال لحد يتكلم
حسام كنت نشوفلها ونتنهد بأسف وواجعني قلبي عليها، بس ماحاولتش ندخل خلي تفرغ اللي في قلبها أحسن ماتكتمه الداخل، أول ماشفتها مشت للحوش مشيت وراها، وبخوف😟: أستني يادنيا وين ماشيه؟؟
دنيا، برجاء🥺: باللهي خليني ياحسام نبي نخش نشوفه
حسام مانقدرش نقاوم الرجاء اللي في عيونها، بس خايف عليها يكون فيه شي الداخل، تنهدت بأسف😞: باهي خليني نخش أني قبل وغطي خشمك وفمك

 

 

 

دنيا هزيت رأسي وقعدت واقفه في مكاني ونشوف لحسام اللي خش ثواني وطلع وأشرلي بإيده نخش
الكل قعدو واقفين ويشوفو بأسف لدنيا لحد ماتلفتو على صوت مفتاح العالي
مفتاح خش من برا، وبغضب😠: عامر عصام ألحقوني بسرعه
عصام وعامر مشو وراء بوهم بإستغراب، ومشو وراهم سناء وسميه بصغارهم، بس وقفو ورجعو لما مفتاح تكلم بغيض: سناء خودي سلفتك وخليك في حوش بوك توا، ومشي وأشر لولاده اللي زاد إستغربهم من موقف بوهم مع إمساوينهم، مشو وراه وهما علامات القلق والتوتر غطت على ملامحهم
في ثواني تفرقو الكل وكل واحد توجه لحوشه وساد الهدوء الأرجاء نوعا ما
^^^^^^^^^^^^^^^^^^^^^^^^^^^^^^^
قدام حوش مفتاح اللي وقفه عامر قبل مايفتح الباب ويخش، وبقلق: شني فيه يابوي قوللنا برا قبل ماتخش لأمي مش ناقصها هم راهو ياسرها اللي فيها
مفتاح، بغضب😠: عارفين شني قالي الحاج رمضان لما طلعت أني وياه برا
Flashback
مفتاح: إن شاءالله خير يارمضان تفضل شني فيه
رمضان، بتوتر: واللهي ماني عارف شني بنقولك الحق، بس أني فضلت نحكيلك بروحك وأنت تتصرف مابيتش نتكلم قدامهم الداخل
مفتاح، بقلق: شني فيه يارمضان زدت خوفتني
رمضان نزل رأسه بأسف😞: الحق أني شفت مني اللي ولع النار بس ماحبيتش نقول قدام الكل وقلت مادامه مافيش أرواح راحت في هالكاثره نسكت ونستر عليها، ويقولك من ستر مؤمن ستره الله يوم القيامه، بس قلت أنت لازم تعرف وتتصرف تخاف تتعاود مره ثانيه وتكون العواقب وخيمه أكثر من هكي
مفتاح، بإستغراب🤔: كيف!! أنت شني قصدك!!
رمضان، بتوتر: اللي حرق الحوش بنتك يالمبروك، أني شفتها بعيوني، وزدت تأكدت لما شفتها مشت جهة حوشك وخشت بسرعه وسكرت الباب
مفتاح، بغضب😠: أنت شني تقول!! كيف تتبلي على بنتي وأنت أصلا من وين تعرفها باش تقول أنها هيا، وبعدين كيف شفتها وتأكدت منها وأنت شفتها من بعيد
رمضان، بضيق: شني نتبلي عليها هذي يشهد الله عليا أني نقول في الحق ولو كنت نبي نضركم كنت قلت اللي شفته الداخل قدام خوتك وفضحتها، بس ربي عالم أني كنت ناويلها الستر، بس قلت نعطيك علم باش إدير بالك، وبعدين عرفتها لأني كم مره نشوف فيها معاك في السياره، أني اللي عليا درته تصدق ماتصدقش أنت حر، وتلفت ومشي وخلا مفتاح واقف وهوا في حيره من أمره شني مصلحة رمضان أنه يكذب أو يتبلي على بنته أصلا، معقوله هالكلام يكون صح كيف علا إدير هكي، زاد الشك تمكن منه لما إذكر اللي داراته من قبل وقصة الصور، تلفت وخش الداخل وهوا بركان يغلي من الغضب😠
Now
عامر، بصدمه😲: تي كذب كيف علا إدير هكي، مستحيل أصلا ماتقدرش، العمله هذي عملة راجل
مفتاح، بغيض: ماعنداش مصلحه الراجل يكذب عليا وبعدين ماتنساش اللي داراته من قبل وموضوع الصور، أختك مش طبيعيه راهو، وعلى كلام الشيخ أنه فيه معاها ناس ثانيه إحتمال إدير أي شي
عصام، بغضب😠: تي ناس ثانيه شني يابوي قاعد مصدق هالتختريف، والله لو تطلع هيا موتها على إيديا الكلبه هذي، وقدم فتح الباب وخش وهوا ينادي بصوت عالى: علا علا ياحيوانه وينك خش بسرعه لدارها وهوا عيونه معميات من الغضب لدرجة ماشافش أمه طايحه في الصالة، فتح الباب وطاح قلبه من المنظر اللي شافه، عيط بصوت عالي: عااااااااااااااامر ألحق ياعاممممر
عامر اللي قعد واقف هوا وبوه برا تلفت بصدمه على عياط خوه وخش يجري ووقف بصدمه لما أنتبه لأمه اللي طايحه في الصاله
^^^^^^^^^^^^^^^^^^^^^^^^^^^^^^^
في حوش سعيد اللي أصبح كل شي فيه رماد
دنيا قعدت نتنقل من مكان لمكان من الصاله لدار نوم بابا للمطبخ لغرفة المعيشه وأخيرا لداري اللي كل مكان فيهم كان متفحم وأسوء من الأول، دمعو عيوني أول ماشفت مكتبتي وكتابتي ورواياتي اللي سهرت عليهم ليالي كلهم رماد كل شي في الدار كان متفحم كلها سوده مافيهاش أي شي باين
حسام أكثر مكان تأثرت بمنظره هوا دارها قعدت واقفه دقايق وهيا تتأمل فيها، قربت منها أول ماشفت دموعها، بحزن😔: ماتبكيش ورحمة بوك، وعد نرجعلك كل شي فيه كيف ماكان
دنيا، بدموع😢: قداش بترجع حاجه قداش، ااااه يارب خوذني وريحني زي ماخذيت مني كل شي
حسام، بفزع: لا دنيا أنتي شني تقولي أستغفري ربي حرام عليك هالكلام، مانعرفكش ضعيفه وتستسلمي بسهوله هكي، وبعدين أنتي قولتيها راح اللي أغلي منه مش حاجه كبيره لو راح هوا، بس عهد عليا نرجعهولك أحلى من قبل، وبرجاء🥺: باللهي معاذ تقولي هالكلام معقوله نهون عليك لمني بتخليني والله لو يصير فيك شي نهبل ننجن مش عارف شني ممكن يصير فيا، خليك قويه على خاطري حتى شويه وأني معاك والله مستحيل نخليك لو شني ماصار ديمه راح تلقيني في ظهرك وساندك في أي شي أنتي تبيه

 

 

 

دنيا مسحت دموعي وشهقت بصدمه😱: هييييييي المنور ياحسام لا ياربي لا وطلعت جري ووقفت وأني حاطه إيديا على فمي نمنع شهقاتي تطلع من المنظر اللي شفته ماكانش يفرق على أي مكان غيره في الحوش زيه زي كل الأمكان
حسام طلعت بسرعه وراها وقفت في جنبها وبصراحه هالمنظر هزني حتى أني وكسر قلبي، هالمكان مش غالي عليها هيا بس حتى أني حبيته منها لينا ذكريات حلوه مع بعض فيه، تنهدت بحزن وأني نشوف لدموعها اللي ينزلو بإستمرار، شديت إيدها وجبدتها معاي بالقوه لو خليتها أكثر من هكي راح تنهار لاشك، وقبل لا نوصلو لحوشنا وقفنا على صوت العيطه اللي مش معروف مصدرها من وين
^^^^^^^^^^^^^^^^^^^^^^^^^^^^^^^
في حوش مفتاح اللي قاعد واقف وماعرفش يقدم يشوف مرته اللي طايحه وعامر يبخ عليها في الميه ويحاول يصحيها، ولا يقدم لعصام اللي قاعد يعيط وينادي على عامر وبوه، أول ماشاف سالمه بدت تصحصح وفتحت عيونها تنهد وسند طوله وقدام بسرعه لعصام اللي كان ثابت في فم الدار وعيونه مركزات على مكان واحد، والمنظر اللي شافه جمد الدم في عروقه وخلاه يطيح بهدت حيل وصوت إرتطام جسمه في الأرض خلا عامر وسالمه اللي قاعد دايخه يفزعو بخوف ويتوجهو للدار اللي كانت معلقه فيها جثة علا والروح راقيه للي خالقها، والعيطه اللي طلعت من سالمه وهيا تشوف في بنتها قطعة من كبدها معلقه تتدرجح قدامها كانت كفيله بأنها تلم العيله اللي طلعو يتجارو على صوت العيطه
قدام الحوش ألتمو الكل وعلى وجههم علامات الحزن والبعض منهم تسللت الدموع من عيونهم من غير راده، واقفين ويشوف لعصام وعامر طالعين ووجوهم متجهمه وقايمين بين إيديهم جثة أختهم الملفوفه ببطانيه، حطوها في السياره وطلعو وهما وجوههم في الأرض
مفتاح خش وجبد مرته اللي كانت تنوح على بنتها وسكر الباب من غير مايعطي مجال لحد يقرب أو يقول كلمه
علا من أكثر الناس اللي إنظلمت في هالحياه واللي ظلمها هيا نفسها اللي أستوطنها الحقد والغل وعمي عيون قلبها الكره والسوء وخلاها تفكر في أشياء تخليها هيا والشيطان في مرتبه واحده من الكفر، وفوق هالظلم اللي عرضت ليه نفسها زادو أهلها بجهلهم وتخلفهم وتمسكهم بأشياء ماليهاش أساس من الصحه ظلموها أكثر وخلوها أداة لإشباع رغبات ناس وسخه تسترت تحت إسم الدين، فارقت علا الدنيا اللي جت عليها وهيا أطهر مخلوق على وجه الأرض بطريقه كافره خلت بوها يسكر حوشه ويرفض أنه يدير عزاها وحتى الدفن ماحد حضر إلا خوتها اللي دفنوها
” إِنَّ النَّفسَ لَأَمَّارَةٌ بِالسُّوءِ إِلأَ مَارَحِمَ رَبِّي ”
أتقو شر أنفسكم، وربي يغلبنا على هالنفس🤲
^^^^^^^^^^^^^^^^^^^^^^^^^^^^^^^
بعد مرور 6 شهور
في حوش المبروك بعد صلاة المغرب مقعمزه فوزيه والمبروك يشربو في الشاهي ويتفرجو على التلفزيون، والبنات وأيه اللي ماليهمش ساعه مروحين من المعمل مقعمزين في جنب المطبخ وكانو يخدمو في طلبية حلو للمعمل اللي أنشهر في وقت قياسي وفيه من أسابيع وقفو فيهم حجز الطلبيات لأنه عندهم ضغط هلبا
محمد خش من برا وشاد التليفون قدامه ومبتسم😊: ياأمي شوفي من جبتلك، قعمز جنبها وحط التليفون قدامها
فوزيه فزت بفرحه😍 لما شافت اللي قدامها في التليفون: إحميده وليدي ياكبدي، كيف حالك ياأمي شني إمداير؟ ودمعو عيونها😢
أحمد، بإبتسامه😊: كويس ياأمي والله كويس مش ناقصني غير شوفتكم بس، ماتبكيش ياأمي واللهي أني بخير وأموري ميه ميه ورأس بوي تمسحي دموعك
فوزيه شافت للمبروك وأبتسمت😊 ورجعت شافت للتليفون ومسحت دموعها
المبروك، بغيض: خلي رأسي في مكانه يافرخ أنت ليش تقلقل فيه من مكانه
محمد أبتسم ووجه التليفون لبوه

 

 

 

 

أحمد حط إيده على فمه🤭، وبضحكه😅: أووووو حويج سامحنا ماهو عارف رأسك أغلى رأس عندها هذا باش حلفتها بيه، كيف حالك وشني أخبارك؟
المبروك هز رأسه يمين ويسار وهوا مبتسم: الحمد لله كيف حالك أنت؟
أحمد: تمام الحمدلله، كيف حال البنات؟
محمد: كويسيين شوفهم ها، ووجه التليفون عليهم
أحمد: سرور سنيه ياكلبات كيف حالكم؟
سنيه أبتسمت: بخير كيف حالك أنت شني إمداير؟
سرور، بثقه😌: أحترم نفسك شني كلبه هذي كبرنا راهو وفتحنا حتى معمل يوقف كل شي فيه بإشاره واحده مني
الكل قعدو يضحكو😅 على كلام سرور وحتى أحمد معاهم، وشهق بصدمه😲 لما تحرك التليفون من إيد محمد وجي على أيه ودنيا
أحمد، بشهقه😱: محمد ياشني يسمي فمي مسرع تزوجت الثانيه خزي ماحضرتونيش لا في الأولى ولا في الثانيه
محمد، بإستغراب🤔: ثانية شني!! هيا واحده وإن شاءالله نقدروها ووجهله التليفون على أيه
أيه، بإبتسامه😊: كيف حالك يامشكلجي عاش من شافك وين هالغيبه
أحمد، بضحكه😁: أووووووو بنت الخاله واللهي أهو مش فاضي من شركه لشركه لازم تأخذو موعد قبلها بسنه كان تبو تشوفوني😁
أيه ضحكت😅: لا بلاش منها الشوفه كان هكي ربي يعاونك إن شاءالله
محمد ضحك: هذي مرتي عرفتها!!😁
أحمد، بهزوه😏: الشارع كله يعرفها كانت تلعب معانا في كوره زمان ولانسيت😉
محمد بنص عين😒: باهي تعرف تسكر فمك ضحكتلك هلبا
أحمد😁: أووووو شكلنا وصلنا في الدقات ياحنه، باهي باهي ومني الثانيه اللي في جنب مرتك
محمد شاف لدنيا وهيا أبتسمتله وهزت رأسها باأي، وجه التليفون عليها: حزر فزر ترا😅
أحمد، بصدمه😲: حيييي كذبه دنيا صح!!
دنيا، بإبتسامه😊: أي دنيا كيف حالك ياأحمد؟
أحمد قاعد يشوفلها بصدمه هز رأسه وحك جبهته بتوتر: كويس لا شكله فيه هلبات حاجات فاتوني
محمد: أي هلبا هلبات😏
فوزيه: أمتي بتروح ياأحميده إستاحشناك ياوليدي
أحمد: أسألي الحويج بحداك في إيده العصمه
فوزيه تلفتت للمبروك لقاته مش معاها نزلت رأسها بأسف وسكتت😞
أحمد تنهد بضيق: يابوي الإسبوع هذا مطلعين دفعه لمصر تدريب وأني منهم نبي زواج سفري هذا باش خلوني نكلمكم
المبروك مد إيده وخذي التليفون من محمد وطلع بيه برا، وبقلق: كم مدته التدريب؟
أحمد: على أساس ستة شهور في مصر وبعدين ستة شهور إهنايا، وبعدها بشهرين فيه إمتحان اللي يجتازه يروح وكأن هذا يزيدوه ستة شهور ثانيات إهنايا
المبروك: إن شاءالله خير، وأمتي طالعين أنتم؟
أحمد: على أساس نهاية الإسبوع هذا
المبروك: باهي غذوه بإذن الله نبعتهولك، قولي أنت شن جوكم غاذي كيف حالك شني إمداير؟
أحمد، بإبتسامه😊: كويس يابوي الحمدلله أموري تمام التمام

 

 

 

المبروك تنهد براحه: باهي الحمدلله تبي شي ناقصك شي نبعتهولك مع عمك مسعود
أحمد: لا لا سلامتك بس، أني عطلت بالمكالمة هيا سلملي على العويله إمالا
المبروك: يوصل، رد بالك على روحك
أحمد أبتسم😊 وأشرله بإيده بمعني سلام👋 وسكر
المبروك حط أحمد في الأمان الداخلي عنده صاحبه مسعود اللي يخدم غاذي ساعده وتوسطله في هالشي، وهوا اللي طلب أنه مايروحش لين يكمل بكل ويتخرج، كان حاس بتأنيب الضمير رغم أنه كان شبه يوميا يطمن عليه من مسعود إلا أنه بشوفته إرتاح أكثر وعرف أنه هالشي اللي داره هوا لمصلحته يبيه يكون رجل بمعني الكلمه، قبل مايخش تلفت للباب الخارجي اللي إنفتح وخش منه حسام، أبتسم: أهلين ياحسام هيا تفضل
حسام، بضيق: لا صحيت ياخالي باللهي ناديلي محمد كأنه قاعد
المبروك: أي قاعد هيا توا إناديهولك، فتح الباب اللي كان راده وخش
حسام اللي كان معصب قعد ماشي جاي في جنان خاله لين طلع محمد وشافه بهالحاله قرب منه، وبإستغراب🤔: حسام خيرك!!
حسام، بعصبيه😡: أي خير باللهي خشي ناديهالي بسرعه
محمد، بقلق: شني فيه ياراجل تكلم، وبعدين تشوف في بوي قاعد كيف بناديهالك، شني صار ثاني
حسام، بغضب😠: مليون مره نقوللها معاش توقفي على البترينات وتستقبلي الزبائن هذا مش مكانك، تسكر في رأسها مش عارفه علاش ناويه تجنني هالبنت
محمد، بحيره🤔: باهي شني اللي صار علاش معصب أنت
حسام، بعصبيه😡: تي توا مشيت سكرت المعمل جاني واحد قالي والله شفت صاحبة المعمل اللي أسمها دنيا ال….. وعرفت أنها ماعندهاش خوت وإماليها ميتين وأنت ولد عمتها اللي قاعده تحت وصايتها، والحق أني عجبتني ونبي نجيب العويله ونخطب كان ماعندكمش مانع
محمد، بضحكه: ماشاء الله جايب موجز كامل الراجل شكله ماخاطراش بكل😅
حسام، بعصبيه😡: وشني اللي يضحك في حضرة جنابك أنت
محمد، بنص عين😒: باللهي هدي روحك وماطلعش جنونك عليا أني، بصراحه البنت ماشاءالله عليها وأكيد راح يجوها خطاب هذا وقتها أنت ليش مضايق
حسام، بغضب😠: أنت بعقلك ولا تتسهوك عليا ماتخلينيش نلعبلك في وجهك توا خشي ناديها خير مانخش بروحي، تي حتى تليفونها ديمه مسكر كان نعرف على شني ناويه معاي شني هوا اللي تبيه بالضبط
دنيا لما خش خالي وقال لمحمد أنه حسام يبيه عرفت أنه مش جاي لمحمد ماشفتاش اليوم ولا كلمته وهوا نعرفه مايقدرش يفوت يوم من غير مايشوفني، أستغليت فرصة أنه عمي خش لداره ومرت عمي لاهيه في التلفزيون غمزت لأيه بمعني غطي عليا ومسحت إيديا ووقفت وطلعت من باب المطبخ الخارجي
محمد أبتسم لما شاف دنيا جايه من وراء الحوش، أشر لحسام: أهي جاتك ياحنه القلوب عند بعضها هيا نخليكم تتفاهمو إمالا، ومشي ركب لشقته
حسام تلفت لوين ماأشر محمد شافها وراه زفر وتنهد من قلبه
دنيا أبتسمت😊: كنت عارفه أنك جاي على خاطري
حسام وكأنه حد صب عليا إميه مثلجه إبتسامتها طفت النار اللي كانت راكبه فيا ومع لمعة عيونها نسيت أني علاش جاي أساس، أبتسمت بحب❤: معناها عارفه أني مستاحشك هلبا، وعارفه أنك حارمتيني من شوفتك ومن صوتك قداش يوم
دنيا، بصدمه😯: كيف قداش يوم ماهو أمس شفتني في حوشكم وقعمزنا قريب أكثر من ساعه نهدرزو
حسام، بنص عين😒: مع بوي وأمي تحسبي فيها هدرزه قصدك!! لنا مانقعمزش معاك بروحي ونتأمل في عيونك الحلوه ونملى عيوني منهم كأني ماشفتكش معناها
دنيا نزلت رأسي: حسام أنت مش شايف أنك مزودها هل……..
حسام، بضيق: نفس الكلام كل مره مزودها هلبا تماديت شويه متسرع في كلامك متهور في تصرفاتك معاي في مشاعرك وأنتي أمتي بتحسي إن شاء الله إنه هذا كله مافيش منه أشياء أنتي قاعده تخترعي فيها من دماغك كيف تبيني نتصرف معاك قوليلي باللهي حاسك تبيني زي البودي قارد حمايه وخلاص مش مقدره مشاعري نهائي تجيك حالات تقيميني بكلمه في السمي وإطيحيني بثانيه بقوه على الوطا، تعبتيني يادنيا راهو خلاص قداش مني حتى أني بشر نحس راهو مش أله تتحكمي بيها كيف ماتبي، لوح الكرسي اللي في جنبه بعصبيه وطلع بسرعه
دنيا تنهدت بضيق وقعمزت على الكرسي بأسف هذي يومياتي أني وحسام شبه كل يوم نفس الموال، لازم يخلق موضوع من لا شي وفي النهايه يحط اللوم عليا أني مش فاهماته ولا حاسه بيه ويهرب، بس الحلو أنه مهما يصير بينا لا أني قادره نتخطاه ولا هوا قادر يتخطاني هوا حده يوقف عندي وأني حدي يوقف عنده
” ‏نتشاجر، نبتعد، نقطعُ شوطًا طويلاً من المُحاولات في أن أتخطاك وتتخطاني، لكنّنا في نهايَة الأمر نعود.. أعودُ إليك كأنّك كُلّ الطمأنينة، كأنّك الملجأ الوحيد لشخصٍ أنهكتهُ الحياة، أعودُ وأنا أحبُّك أكثر وأرغبُ بك أكثر، أعودُ لأنّك وحدَك من أعدّه كُلّ شيء، وحدك من أودُّ البقاء معهُ بغض النظر عن ما يحدث…”

 

 

 

” #نصيحه ‏إختر من يتباهى بك أمام العالم بأكمله وكأنّك أعظم انتصاراته، إختر من تكُن مصدرًا لقُوَته في عزّ لحظات ضعفه وصراعاته، إختر من يراك ملجئًا للسكينة والطمأنينة في ضجيجه واحتياراته، إختر من يؤمن أنّك الضلع الثابت الذي تستقيم به الحياة.. ❤ ”
بعد مرور عام وشهرين صارت فيهم هلبا حاجات
********************************************
حاتم من يوم شاف إنتصار في إفتتاح المعمل حس بشي غريب شده ليها وبعدها بفتره كلم أمه تشوفهاله، بس هوا كان خايف أنها ترده بحكم أنه كان متزوج قبل وعنده ولد، بس فرح هلبا لما قالتله أمي أنها لما كلمت ناجيه لقت منها موافقه مبدئيه وماأعترضوش على أنه عنده ولد، من حوالي سته شهور روح حاتم من مصر وخطبها رسمي ودار فضانيه وقري فاتحه وتزوجو وسافرو لمصر مع بعض وهذا كله صار في إسبوعين بس على ماخونا كان مستعجل😅
حاتم، بملل: هيا ياإنتصار وينك مربعتينا من بكري وعندي مفاجأه عندي مفاجأه، كان ماصارش خلينا نخشو نرقدو وراي عمل الصبح، وعليوه عنده مدرسه
إنتصار فتحت باب المطبخ وطلعت، بغضب😠: من يوم خذيتك وأنت بصلتك محروقه ماتعرفش تصبر بكل لازم تفسد كل شي
حاتم🤨: توا أني مانعرفش نصبر ماصبرتش عليك سنه كامله باش عطيتيني الأوكي وجيت وأدبست فيك ياحضرة السندريلا أنتي
إنتصار، بغيض: تسهوك تسهوك هذا فاش يلقوك أنت
حاتم ضحك😅: وبعدين تعالي جاي شني من يوم تزوجتك هذي تقول لينا سنين متزوجين هما كلهم سته شهور أمتي لحقتي تعرفي أنه بصلتي محروقه
إنتصار، برفعة حاجب🤨: مش لازم نعيش معاك دهر باش نعرف أطباعك لقيتك كتاب مفتوح واضح وباين كل شي فيه، تعالا ياعليوه تعالا، شدت عليوه اللي كان يضحك بخفه على قطافهم من إيده وسحباته معاها ومشت متجاهله حاتم
حاتم، بصوت عالي: وأني ياهووووو إيدي ممدوده قاعده
إنتصار وقفت في باب المطبخ، وبنص عين😒: نزلها وتعالا، وتلفتت على صوت عليوه اللي نقز بفرحه أول ماشاف الكيكه
حاتم قرب بسرعه وأبتسم😊 وهوا يشوف في عليوه كيف ينقز وفرحان بالكيكه والشماعات، بإبتسامه: حلو بس شني المناسبه؟
إنتصار اللي كانت تشوف لعليوه كيف فرح هلبا بحاجه بسيطه زي هذي، تلفتت لحاتم بإستغراب🤔: اليوم عيد ميلاد عليوه خيرك نسيته ولا كيف!!
حاتم نزل رأسه بأسف أكيد راح ينساه لأنه مافيش مره أحتفلو بيه من قبل، لا في حياة عبير ولا حتى من غيرها
عليوه، بفرحه😍: حقا اليوم عيد ميلادي، وأخيرا بنهدرز لصحابي اللي يقولولي على أعياد ميلادهم أنه حتى أني درت عيد ميلاد زيهم
إنتصار قعدت تشوف بإستغراب لحاتم اللي سكت مره واحده وهوا يشوف لولده بأسف معقوله كان ناسيه أو مايحتفلش بيه، صح هوا العيد ميلاد مش من عاداتنا ولا من ديننا بس نعتبروه شي رمزي وتفريحة عيل، قربت وقامت عليوه فوق الكرسي باش يطفي الشمعات، وبإبتسامة: هيا يابابا
حاتم أبتسم وقرب ومد إيده ضم بيها إنتصار وعليوه، وأبتسم: حاضر ياماما
إنتصار: أستني ياعليوه أتمني حاجه قبل
عليوه ببراءة غمض عيونه وفتحهم وهز رأسه، وحاتم يضحك على تصرفاته
إنتصار، بإبتسامه: هيا طفي الشمعات توا
بعد ماقصو الكيكه وكلو طلعت إنتصار من المطبخ، وحاتم وقف: هيا ياعليوه تعالا قول لماما إنتصار شكرا وخش لمكانك وراك مدرسه الصبح

 

 

 

عليوه مشي مع بوه ووقف في باب المطبخ، وبتساؤل: ماتبيش تعرف شني تمنيت يابابا؟
حاتم بنص عين: وشني تمنيت ياسيد عليوه
إنتصار طلعت من دار النوم وهيا في إيدها بوكس صغير: خيركم واقفين في الباب؟
حاتم: السيد عليوه بيقول أمنيته قبل لايرقد، ونزل قربز قدامه،.وبإبتسامة: هيا قول
عليوه، أبتسم: تمنيت يكون عندي خو صغير ونلعب معاه زي هيثم ولد عمتي سندس من لما أمه جابتله خو وهوا معاش يلعب معاي حتى أني نبي خو زيه
حاتم تفاجى من تفكير ولده تلفت لإنتصار اللي كانت واقفه تشوفلهم بفرحه وعيونها معبيات دموع
إنتصار أشرت لعليوه بإيدها بمعني تعالا، وهوا مشالها على طول، طبست عليه ومدتله البوكس، وبإبتسامة: وهذي هديتك ياحلو باش تشوف ربي كيف سمع أمنيتك وبإذن الله يحققهالك
عليوه شاف لبوه اللي ملامح الإستغراب واضحه على وجهه، ورجع شاف للبوكس وفتحه وقعد يشوف بإستغراب لكندرة البيبي اللي فيه
إنتصار بفرحه😍: حتى أنت راح يكون عندك خو أو أخت بعد كم شهر
عليوه من الفرحه تعلق في رقبة إنتصار بقوه لين قعمزت قدامه وتلفتت لحاتم اللي كان متلفت للجهه الثانيه ومنزل رأسه وواضح من حركة كتافه أنه يبكي
إنتصار بعدت عليوه من حضنها: عليوه وري لبابا هديتك
عليوه مشي يجري لبوه والبوكس في إيده وإنتصار وراه، وبفرحه😍: شوف بابا ماما إنتصار راح تجيبلي خو
حاتم تلفت لولده وهوا يمسح في دموعه، طبس قامه في غمره وقعد يبوس فيه ومد إيده الثانيه لإنتصار اللي واقفه تشوفلهم بإبتسامه، قربت منه وهوا ضمها مع ولده وباس على رأسها، وبعيون يلمعو بحب❤: لو نعرف الخير اللي درته في عمري باش ربي كافاني بيك معاش نبطل عليه وإنزيد منه أكثر باش ربي مايحرمنيش منك طول عمري، أنتي أحلى هديه ربي أنعم عليا بيها، ربي يباركلي فيكم
” لن ينساك ربُك، سيؤتيك من الغيب أحلاه، ثم يعوضك بما يليق بقلبك، لاتظن بأن دعواتك السابقه ذهبت سدى، ولا أمانيك وأحلامك نسيت، كلا والله، ماكان ربُكَ نسِيَّا ”
***********************************
أيه ومحمد رزقهم ربي بولد وبعد ماجابت أيه بحوالي 3شهور، رفعها محمد عمره زي ماوعدها ومرتاحين في حياتهم وأمورهم عال العال، نصيبك راح يصيبك ومستحيل يأخذه غيرك، سبحانه وحده اللي يقرب البعيد ويبعد القريب ويسخرلك أشياء من عنده تخليك واقف تتفرج مذهول من عظمته وتدبيره
محمد، بصوت عالي: تي هيا ياأيه تعالي رقدي ولدك نفخلي رأسي وراي جامعه غذوه
أيه طلعت من دار النوم ومشت خذت ولدها من جنب محمد، وبضيق: أهو مقعمز جنبك ساكت شني دارلك بس
محمد: شوفيه كيف مشرتع الدنيا كلها من بكري وأني نرد وراه، تعلم المرد ومعاش مخلي شي
أيه حطاته في الجراي، وبضيق: واحد ومش متحمله لو كان تعرف أنه الثاني في الطريق شني بدير
محمد وقف بصدمه😯: تكذبي!!
أيه، بضيق: لا مانكذبش، وقعمزت على الصالون ونزلت رأسها بأسف😞: كنت واخذه إحتياطي والله بس مش عارفه كيف صار هكي
محمد قعمز جنبها وخذاها في حضنه، وبضحكه😅: ياهبله شني كيف صار، هذي نعمه من ربي واللي يجي من ربي يامحلاه
أيه، بضيق: بس حسيتك مافرحتش زي فرحتك بحملي بأدم!!
محمد، بإبتسامه😊: بالعكس ياقلبي والله فرحان في حد مايفرحش بنعمه حلوه زي هذي، غير الفرحه الأولى ليها نكهه خاصه بس، وبعدين نسيتي أني اللي كنت إنق على الصغار ونبيك تحملي بعد ماجبتي أدم وأنتي ماتبيش فخليتك على راحتك، هذا باش توا تفاجأت
أيه، بأسف😞: نيتك غلبت الله غالب

 

 

 

 

محمد بثقه😌: باش تعرفي بس ديري في بالك المره هذي نبي بنت راهو
أيه، برفعة حاجب🤨: ليش من قالك أنه هالشي في إيدي
محمد ضحك😁: عارف ياروحي عارف بس سايريني وقولي إن شاء الله، وتلفت لولده اللي يشح فيه من سرواله يبيه يقيمه، طبس قامه من الجراي وحطه في حجره، وأبتسم: شوف يابابا ماما بتجيبلنا بنيه حلوه
الولد بعفويه ضرب أيه بإيده
محمد ضحك😅 على حركته: احاااا ياشرير شفتيه ولدك من توا مايبيش حد معاه
أيه، بغيض: باهي توا تشوف أمشي معاش ولدي
محمد قرب وباس أيه على جبهتها اللي قعدت تتحسس فيها من ضربة ولدها، وبغمزه: ياحليلي أني على اللي ماتتحملش زعلتي من ضربة أدم
أيه، بضيق: شوف ها خبشني الشرير هذا مش عارفه لمني طالع هكي مكلوب
محمد ضحك😁 وهوا في باله طالع لأمه، قرب وباسها ثاني، وبحب❤: خلاص ياقلبي أنتي ولدي يجرح وأني إنداوي، وضمهم الإثنين في حضنه: ربي مايحرمني منكم يارب
أيه حطت إيدها على بطنها وبصوت طفولي: وأني يابابا!!
محمد أبتسم وحط إيده فوق إيدها، وبفرحه😍: ولايحرمني منك ياروح قلب البابا أنتي
” مش ديمه نأخذو اللي نبوه مرات نأخذو الأحلى اللي ينسينا شني كنا نبو أساسا❤ ما يكتبه الله لك خيراً مما تحبّهُ وتريدُه، وأعظم مما تطلبهُ وترغبه، وألطفُ مما تشاء 🤍 ”
***********************************
عمي مفتاح وسالمه بعد اللي صار ووفاة علا بهالطريقه تعبت نفسيتهم هلبا، معاش قدرو يقعدو في الحوش أكثر حولو وسكنو مع ولادهم وكانو ناويين يبنو جنبهم لما ينباع الحوش اللي فصلوه عن الحوازه بسور وعارضينه للبيع بس كل مايجي حد بيشري ويعرف أنه بنتهم شانقه روحها فيه يخاف ويبطل ومعاش يولي
مفتاح: بعون الله هالسنه نمشو للحج بإذن الله
سالمه، بفرحه: إن شاءالله يارب والله خاطري فيها قداش ليا، بس الله غالب اللي صار لهاني
عصام: إن شاءالله تطلع القرعه لأمي باش تقدر تمشي معاها يابوي
مفتاح: لا السنه هذي ناويها بإذن الله حتى لو ماطلعت القرعه نطلعو على حسابنا عندي قرشين داسهم من قبل بنحج بيهم
سناء طلعت من المطبخ وفي إيدها سفرة الشاهي، حطتها قدامهم، بإبتسامه: تفضلو
سالمه، بإمتنان: صحيتي يابنيتي سامحينا على تعبك ربي يعطيك صحيحتك إن شاءالله
سناء، بإبتسامه: أي تعب يامرت عمي اللي يسامحك على هالكلام، ربي يطول في عمرك أنتي وعمي يارب ويعطيكم الصحه
عصام، أبتسم وناض فتح الباب اللي يطق وكان عامر، أشر لسناء تنوض تلبس وشاحها، وفتح الباب كله بعد ماشافها ناضت وخشت للدار: تفضل هيا
عامر خش وهوا فرحان: السلام عليكم كيف حالك توا؟
مفتاح وسالمه: وعليكم السلام ورحمة الله، الحمد لله
عامر قعمز جنب بوه، وبفرحه: قتلك يابوي توا لاقيت عديلي جمال المحامي في حوش إنساباتي ونهدرزو من إهني من إهني لين وصلنا في موضوع عادل قلت خلي نسأله أني مش خاسر شي، وبصراحه عطاني أمل
مفتاح، بإستغراب🤔: كيف عطاك أمل شني قالك؟؟
عامر، أبتسم: قالي في أشياء تغير نظرة القانون من ناحيته لو هوا يحكي السبب الرئيسي ممكن يغير مجريات القضيه من قتل متعمد للقتل دفاع عن الشرف، ومادامه هوا أعترف بذنبه وسلم نفسه هالشي يعتبر نقطه لصالحه، وممكن نسقطو الحق عليه لو مشيت أنت وتنازلت في رقبة عبير يعني يقعدله الحق العام بس يعني 10 أو 15سنه حبس مع الأعمال الشاقه خير من الحبس مؤبد، ويصيم شهرين كفارة رقبه وربي غفور رحيم
مفتاح، بأمل: زعما يصير منها
عامر، بفرحه: واللهي هوا وعدني وقالي لو تبو أني نتولى القضيه وبإذن الله يصير خير
سالمه، بفرحه😍: أكيد نبو ياوليدي كلمه من توا وقوله موافقين
عامر: شني قلت يابوي ؟
مفتاح: شني عندي مانقول كلمه وعلى بركة الله ربي يفرج عليه إن شاء الله
عصام، بفرحه: الحمد لله ديمه الواحد المفروض يكون عنده أمل في الله قادر يفرجها من بعد الضيق، سبحان ميسر الأمور
لم أرى في حياتي شي مفزع كالموت وفقد شخص غالي على قلبك فما بالك هما فقدو بناتهم الإثنين قطعه من كبدهم، وولدهم اللي مش عارفين هل راح يشوفو قبل مايموتو أو لا، سبحان الله العالي المتعالي اللي أنزل السكينه والصبر على قلوبهم وغلفهم برحمته ورضوانه
” يختبر الله صبر عبده بكثرة البلاء.. فصبر جميل والله المستعان ”
***********************************
عمي بشير وفاطمه هالإثنين ينطبق عليهم سبحان مبدل الأحوال وقالب القلوب بعد وفاة سعد وكأنه ربي رفع ناس وحط بدلهم ناس ثانيين، قعدو على حالهم وديمه في كل جمعه يكونو محضر خير، من فتره بدو يبنو في شقتين فوق حوشهم لسامر وسامح، وناويين الرمضان هذا بيطلعو عمره كلهم
” حين يسكن رضا اللّٰه في قلوبنا يصبح كل شيء جميلا ”
***********************************
سنيه من شهرين إنخطبت لدكتور في الجامعه صاحب محمد، شاف كم مره في الجامعه عجباته وبحكم أنه يعرف خوها وصاحبه ف ماقدرش يدير أي لقطه غير أنه يخش للحوش من بابه
” الطيبون لايلتقون صدفه.. بل تجمعهم نواياهم💙 ”
سرور قاعده بهبالها وإستعباطها وإمدايره حظها من حظ أدم ولد محمد، السنه اللي فاتت رسبت وعادت سنه ثالثه من جديد وبوها مهددها السنه هذي لو مانجحتش راح يقعمزها في الحوش بكل وهيا قاعده على أعصابها تستني في النتيجه اللي بتطلع بعد شهر رمضان
” أجمل لحظه في الحياة هي حينما يبكي والديك فرحآ بك لتخرجك…. لذا ثابر وإجتهد من أجل هذه اللحظه ❤ ”
أما أحمد تكلم الفتره اللي فاتت وقال أنه الإمتحان متاعهم تأجل لبعد رمضان مش راح يقدر يروح لبعد العيد، بس من شكله وكلامه واضح أنه تغير هلبا
” قد تكون إرادة آلله معاكسة لمرادك أحياناً،

 

 

 

ولكنها دائماً لمصلحتك،
إيمانك بهذه النقطه كفيل بأن يرضيك بكل مايحدث لك 🧡”
أما مؤيد ف قاعد مشيط ريق خالتي وكل مره طالعلها بقصه وهيا مسكينه تساير فيه وخلاص
***********************************
دنيا رغم كل الاوجاع و الاحزان التي مريت بيها ماقدرتش تهز ثقتي بربي وبنفسي املي بالله ويقيني بأنه راح ينصرني مادامني على حق خلاني نصعد أكثر وأكثر،
بالنسبه لحوشنا بدينا فيه من الأول يعني إنخرط على البومشي وحسام هوا اللي كان متكفل بيه زي ماوعدني بأنه راح يرجعه أحسن من قبل، حاليا واقفين على الزواق وكل شي كان كيف مانبي أني مش مخلي شي في خاطري، يجري معاي من تركينه لتركينه من المعمل للحوش للقرايه تعبته السنه هذي هلبا معاي في الإمتحانات لأنها شهاده وهوا راضي وساكت ياناري
بالنسبه للمعمل ماشيه أموره تمام التمام إنشهر في فتره بسيطه جدا وقعدنا نوفرو في وجبات حتى لشركات وكم عياده، أصلا شبه أكثر مشروع ينشهر ويلاقي صدي واسع من مجتمعنا هوا الأكل😁
بالنسبه ليا أني وحسام قاعدين على حالنا كل يوم نقار ونقير نتعاركو الصبح وفي الليل نتراضو، نختلفو في الليل في الصبح نتفاهمو، العلاقه اللي كانت تربطني بحسام مش علاقة نحبك وتحبني مش أحلام ورديه بنيتهم معاه وسعيت باش نحققهم مش مكالمات ومسجات غراميه متبادله، لا أبدا اللي بينا أكبر من هكي بهلبا شي خلا كل واحد مننا عالق في الثاني وكأنه طوق نجاة من هالحياه الغداره بالنسبه ليه
اللي كنت نبيه مش أني نسمع كلمة نحبك منه بإستمرار لا كنت نبي نحسها بكل تفاصيلها معاه، كنت نبيه يثبتلي بتصرفاته ومواقفه اللي ممكن تخليني نحس بمعني الكلمه من غير مانسمعه وفعلا هوا كان قاعد كل يوم يثبتلي في هالشي لما نشوف أنه مش متحمل يزعلني مايرضاش أنه يكسر بخاطري مانهونش عليه مايتحملش فيا حتى الكلمه، يحاول على قد مايقدر يخليني فرحانه يسعدني بأبسط شي، يفاجئني باللي في بالي مايرفضليش طلب حتى لو كان مش راضي، والأهم من هذا كله أنه واقف في ظهري وساندني وداعمني على طول، أهتمامه بيا وبتفاصيل حياتي، ووجوده معاي في احزاني قبل أفراحي، تقبله ليا بكل حالتي في حزني وبرودي وعصبيتي وإنفعالاتي بأنانيتي وهبلي ونكدي خلاني نحبه فوق الحب حبين
” والروح تميل لمن يتقبلُها كما هى بحُزنها وقلة حيلتُها وانطفائها ❤️ ”
حسام عادي عندي كل المشاكل والهموم والخلافات أهم شي هيا معاي، راضي بكل شي، اليوم مروح وفي رأسي شي لازم يتنفذ خلاص طفح الكيل بصراحه معاش راح نسكت ونسايرهم أكثر كل يوم نشوف فيها تنخطب قدامي وأني واقف نتفرج لازم إندير حل، وصلت وأني في بالي نتصل بخوالي نجمعهم ونفتح معاهم الموضوع، بس حظي حلو لما لقيتهم عند أمي في الحوش ومقعمزين يشربو في الشاهي
حسام بإبتسامه: السلام عليكم ورحمة الله وبركاته، الملائكه مجتمعه ماشاء الله ربي يحفظكم إن شاءالله، لازم نرطب الأمور شويه 😁
الكل ردو السلام بس كانت ملامحهم مختلفه بين الحيره والإستغراب والهزوه من الإطراء اللي قاله حسام
مصطفي، بإستغراب🤔: إن شاءالله خير على شني ناوي!!
حسام فرك إيديه في بعض بتوتر: واللهي بصراحه فيه موضوع نبي نكلمكم عليه وكنت ناوي نكلم خوالي وإناديهم بس أهو حظي قوي لقيتهم إهناي
المبروك شاف لمصطفي وغمزله وهوا فهم عليه قصده
المبروك، برفعة حاجب🤨: أي واللهي كنا متجمعين على خاطر بنت خوي الحق البنت كبرت وخطابها كثرو وأحني قلنا القريب أولى من الغريب
حسام، بضحكه😁: سبحان الله نفس تفكيري والله

 

 

 

مصطفي: أي عاد هذا اللي فكرنا فيه وهذا باش خالك المبروك جاي هوا وخوالك باش ياخذو رأيك أمك في خطبة دنيا لأحمد
بشير وسعاد اللي ماكانوش عارفين بخطة مصطفي والمبروك توسعو عيونهم بصدمه من اللي سمعوه
حسام وقف بسرعه، وبغضب😠: شني شني!! عاودولي معليشي سمعي ثقيل هالأيام بنت خوكم كبرتني قبل وقتي
المبروك، بإبتسامه😊: عادي نعاودولك مره وإثنين وثلاثه خطبت دنيا لأحمد والكل موافقين على هالخطبه
حسام بعصبيه😡: لا أنتم أكيد هبلتو فيه في دماغاتكم حاجه مش طبيعيه بكل تلعبو معاي هذا وقت لعب هوا
مصطفي، بغضب😠: أحترم نفسك ياحسام شني نلعب معاك هذي، قلنالك اللي عندنا بتصدق صدق ماتبيش تصدق جعلك باش صدقت
حسام خبط رأسه ومسح على وجهه بغضب😠: تي شني تقول يابوي ماطلعنيش من عقلي تي سامع روحك شني تدوي، شني دنيا وأحمد شن جابهم لبعض، وبعدين أني أني وين من هالقصه كلها، تي نفنيها الحوازه كلها لو واحد فكر يأخذها أو يبعدها عني، باللهي خلو العقل الطشه اللي خلاته هيا فيا وماطيروشي مني
المبروك: أنت شني تبي بالضبط فهمنا!!
حسام، بغضب😠: مانبي منكم شي أعطوني بنت خوكم واقطعو عليا حتى المأكله والشراب وحتى النفس معاهم عادي
المبروك شاف لمصطفي وأبتسم، ورجع تلفت لحسام: خليك عند كلمتك لو قطعنا عليك هاذم كلهم كيف بتعيش
حسام، بغيض: نعيش نعيش غير أعطوهالي أنتم وكثر الله خيركم مادخلكمش بالباقي
مصطفي: مرات البنت تطلع مش موافقه ولا ماتبيكش كيف الحل بعدين!!
حسام، بعصبيه😡: شني ماتبينيش هاذي تبي غصبآ عنها، وتلفت لأمه، وبغضب: وينها هيا روحت لحوش خالي؟؟
سعاد، بضيق: لا لا قاعده إهنايا في المطبخ
حسام مشي بسرعه متوجه للمطبخ وهوا معصب
سعاد تلفتت لمصطفي بإستغراب🤔: شني هذا اللي إديرو فيه!!
المبروك أشرلها بمعني🤫: خلي نحرقوله أعصابه شويه
بشير أبتسم😊: ياودي مايطلع منكم أني بروحي أعصابي إنحرقو يابال هوا
دنيا تلفتت لما حسيت بحد وراي، أبتسمت لما شفته العصر تعاركنا في التليفون شكله قاعد معصب: أهلين حسام
حسام، برجاء🥺: أسمعيني ورحمة بوك هما كلمتين ورد غطاهم تبيني أو لا
دنيا، بإستغراب🤔: شني قصدك!!
حسام تنهدت من قلبي: أرهقتي قلبي الزفت، بتطلعي وبيسألوك تبيني أو لا مافيش مجال أنك ترفضي فاهمه، شدها من إيدها وجبدها معاه للصاله اللي كانو فيها مصطفي وسعاد والمبروك وبشير يضحكو وسكتو أول ماشافوهم
حسام، بغضب😠: أهي قدامكم أسألوها هيا، قوليلهم م تبي يادنيا
مصطفي: أسكت أنت ياحسام ماتضغطش على البنت
حسام حط إيده على فمه بعصبيه وسكت وهوا يشوف لدنيا اللي منزله رأسها بنظرات رجاء
المبروك، بإبتسامه😊: اليوم حسام طلب يخطبك مننا شني رأيك أنتي يادنيا؟
دنيا تفاجأت بهالسؤال اللي ماكنتش متوقعاته ومانعرفش أصلا حتى كيف نرد عليه، شفت لعمتي بتوتر لقيتها مبتسمه رفعت عيوني لعمي مصطفي نفس الشي أبتسملي، عمي بشير والمبروك وقابلوني بإبتسامه، وأخيرا رفعت عيوني فيه نظرة الرجاء واضحه في عيونه أبتسمت محاوله أني نطمنه
حسام نقز بفرحه😍: ها شوفوها إبتسمت والسكوت علامة الرضا خلاص على بركة الله نقرو الفاتحه
الكل قعدو يضحكو عليه 😂
مصطفي، ضحك😅: بطل هبال وأعقل، وأنتي يابنتي قولي موافقه ولا لا
دنيا رجعت شفتله من جديد لقيته يهزلي في رأسي فوق ولوطا بمعني وافقي، تلفتت لعمي مصطفي ونزلت رأسي بخجل☺: موافقه ياعمي
حسام فتح عيونه بصدمه😯: شني قالت سمعتوها أنتم!! وتلفت لدنيا، وبرجاء🥺: باللهي عاوديها
المبروك، بضحكه😁: لا ولدك إنطرش حقا عطينا زغروطه ياسعاد بالك يرجعله سمعه شويه
سعاد أبتسمت بفرحه وزغرطت روروروروروروووررررري👏💃
حسام من الفرحه قدم بيحضن دنيا بس إستاقظ على أخر لحظه لما هيا وخرت، قدم وحضن أمه وبعدها بوه وبعده خواله، وبفرحه😍: خلاص الخميس الخطوبه والفضانيه والتلبيسه والفاتحه أني ماعنديش وسعة بال بصراحه ياسر الثلاثه سنين وكم شهر اللي راحو على الفاضي
مصطفي، بهزوه😏: واللهي بالك تبي حتى العرس معاهم

 

 

 

حسام بضحكه😁: ياريت ياحويج والله تربح أجر عمره في رمضان وأنت صايم
المبروك ضحك😅: لا ولدك هبل رسمي ياسعاد، إمالا كان تعرف شني المفاجأه اللي عندنا شني يصير فيك
حسام، بصدمه😲: ماتقولوش جايبين الشيخ اللي بيقرأ الفاتحه توا، ورحمة بوكم ماترعشوني قاعد مش مستوعب
سعاد صفقت إيديها في بعضها: منو العوض لا الولد هبل رسمي
مصطفي وقف وأبتسم😊: خليه خليه مازال ماريتيش الهبال رسمي، قرب ووقف قدام حسام وطلع ورقه من جيبه ومدهاله وأبتسم
حسام خذي الورقه وفتحها وهوا يشوف لبوه بإستغراب، ولما شاف المحتوى وقعد يقرأ فيه بالشويه بالشويه قعد يسكر في عيونه ويفتح بعدم إستيعاب، يشوف لبوه اللي قاعد مبتسم ويرجع يشوف للورقه، يرجع يشوف لبوه ويشوف للورقه بصدمه، كان عقد زواج ليه هوا ودنيا اللي كان وكيلها عمها المبروك وهوا وكيله بوه، واللي زاد صدمه أكثر تاريخ العقد كان من سنتين، قعد يهز في رأسه وهوا مش مستوعب، بغضب: ضحكتو عليا كيف إستغفلتوني كيف!! سنتين وأني زي الدرويش سنتين خليتوها تنشفلي ريقي وطلعني من عقلي، وبتساؤل: حق العقد هذا ولا مزور!!
المبروك: شني مزور هاذي أصلي ميه الميه وموثق عند شيخ المحله
حسام طبق الورقه بهدوء وهوا يهز في رأسه ومطرم شواربه بإمتعاض، حط الورقه في جيبه وقعد يمشي خطوه ويشوفلهم خطوه يمشي خطوه ويوقف ويشوفلهم على هالحال لين وصل لدنيا اللي قاعده واقفه في مكانها من بكري وتشوفله بإستغراب، شد إيدها وجبدها معاه بسرعه للباب فتحه وتلفتلهم، وبغمزه😉: أني تضحكو عليا توا نوريكم كان مازال رديتهالكم، وطلع بسرعه ويجبد في دنيا اللي مش فاهمه شي وراه
دنيا عقلي مش مستوعب شي وين رافعني هذا وصلنا للسياره سحبت إيدي بقوه، وبعياط: أنت شني اللي إدير فيه ها، شني تحساب روحك وين ساحبني معاك
حسام وقفت وقربت منها بفرحه😍: أنتي وليتي ليا ياروحي، طلع الورقه من جيبه وفتحها وجي وقف جنبها، وعيونه دمعو😢: شوفي ياقلبي عقد زواج ها، هذا عقد زواجنا سنتين✌ لينا متزوجين وأحني مانندروش لعبو علينا سنتين كاملات حرموني منك بدم بارد مش راح نسامحهم وبوي أولهم ماكانوش عارفين أنه في بعدي عليك كنت نذبل يوم بعد يوم ماكانوش عارفين لما كنت نقوللهم أخطبوهالي ويقولولي مازال تسكر 18 قبل كانو يقهرو فيا ويطعنو في قلبي، توا أنتي ليا يادنيتي ليا أني وبس وأخيرا، وسحبتها في حضني❤
دنيا قعدت نشوف الورقه بصدمه😯 وماحسيت بشي إلا لما سحبني في حضنه قاعده مش مستوعبه شي
بعد ساعه على البحر ماعرفتش كيف ركبت السياره وكيف طلعنا وكيف وصلنا أهنايا وكيف نزلت وكيف قعمزت وكأني كنت مغيبه تمام عن الوعي بسبب اللي صار، تلفتت لحسام اللي مقعمز جنبي وشاد إيدي ويشوفلي بتركيز: بتساؤل: شني اللي صار ياحسام
حسام، بحب❤: اللي صار أنك وأخيرا وليتي ليا وحلالي
دنيا، بإستغراب🤔: كيف هكي صار!!
حسام، بحب❤: ربي يبي يجمعنا عندك إعتراض على حكمه لاسمح الله
دنيا، أبتسمت😊: أعوذ بالله لا أكيد، بس أنت مستوعب اللي صار!!
حسام، بلهفه: وحياتك يادنيتي معاد نبي نستوعب حاجه خلاص يكفيني أنك ليا معاش نبي شي من الدنيا هذي كلها أنتي ووقف العالم عندك، جبدتها في حضني وبست على رأسها بشوق
دنيا، بإبتسامه☺: معقوله تحبني للدرجه هذي!!
حسام، بهيام: عارفه أنك أرهقتيني كليا بعد كل هذا قاعده تقوليلي تحبني، تي أني فتت الحب غاذي عشقتك متيم بيك❤
أحببتك ياطفلتي ..،♡
وكنت ولا زلت أول حب حقيقي في حياتي
لم أتوقع أن يرتبط بك قلبي كل هذا الإرتباط
وأن تتعلق وتتشبث بك روحي بهذه القوة
حتي وإنني لا أشعر بطعم الحياة إلا معك
ولا تستقيم حياتي ولا أشعر أنني بخير إلا بجانبك ، أنتي قلبي وعمري وروحي، وأمني وأماني، وسكني وسكينتي، ونبضي ووتيني، أنتي شمسي وقمري صباحي ومسائي
لا يغنيني عنك شيئًا ولا أستبدلك بأحد
فأنت الجميع بالنسبة لي ..
دنيا وقفت: خلاص ياحسام نوض خلينا نروحو ليل والدنيا تخوف

 

 

 

حسام: ياقلبي أنتي أني معاك وتخافي، تعالي قعمزي وأسمعي كلام راجلك مازال شويه
دنيا، بضيق: شني راجلي هذي توا بتشدهالي عاد مش كان سكتت معناها راح نتزوجو توا لا ماتعباش راهو
حسام، برفعة حاجب: شني!! مازال تبيني نصبر بعد هذا كله
دنيا: أي أني مانبيش نتزوج توا مازال قدامي 4 سنين لين نكمل قرايتي، لو ماتبيش خلاص نفضوها سيره ولا كأنه صار شي
حسام أي نفضوها غير أعبي لا وقتلك استني 4 سنين، نقولو باهي ونسايروك على قد عقلك ونشوفو مني اللي يمشي كلامه في الجديد😏، بإبتسامه: حاضر ياقلبي أنتي تأمري أمر نستناك حتى عشره ماعندكش مشكله بكل
دنيا قعدت تشوفله بإبتسامه جانبيه، وزفرت بملل: هيا نوض ياسر نشفتلي ريقي
حسام، بغمزه😉: مازال ماشفتي شي كان ماضوقتكش اللي ضقته توا تشوفي تحسابي اللي درتيه فيا شويه تي على أخر الوقت أني طفله زيك أرهقت قلبي❤❤
دنيا، بخوف😟: نهون عليك معقوله!!
حسام وقفت بسرعه وشديت إيديها، وبحب❤: ورأسك ياقلبي عمري كله يهون فداك وماتهون عليا لمعة حزن في عيونك
دنيا، أبتسمت بخجل☺: نقولك شي!!
حسام هز رأسه: قولي يادنيتي أنتي❤
دنيا رفعت عيوني لعيونه، وبإبتسامة: قَلبك الحَنون يجعَلني أغرقْ فِيهَ حُبا أكثَر فَ أكثَر ❤️🦋.
حسام🤤: ياويل قلبي أني شني درتي فيه، الباين أنه نروحو خير، وشد إيدها ومشو للسياره وركبها ومشي ركب وهوا الفرحه مافارقتش وجهه😍
خلاص تعالي جاي أنتي وياها وين ماشيين خلوهم على حالهم ماصدقنا لايمناهم، ياسر عاد من الإرهاق والله أرهقتني حتى أني هالروايه😅
#النهايه❤❤
نتمني تنال إعجابكم 😍😍
وتشاءُ أنت من البشائر قطرة
‏ ويشاء ربُك أن يُغيثك بالمطر
‏وتشاء أنت من الأماني نجمةً
‏ويشاء ربُك أن يناولك القمر
‏
‏وتشاءُ أنت من الحياة غنيمةً
‏ويشاء ربك أن يسوق لك الدُرر
‏وتظل تسعى جاهدا في همةٍ
‏والله يعطي من يشاءُ إذا شكر
‏والله يمنع إن أراد بحكمةٍ
لا بد ان ترضى بما حكم القدر‏‎
#دمتم_في_رعاية_الله💜💜

لقراءة الرواية كاملة اضغط على : (رواية طفلة أرهقت قلبي)