رواية شط الهوى الفصل الثاني 2 بقلم أمل صالح
رواية شط الهوى الفصل الثاني 2 بقلم أمل صالح
رواية شط الهوى البارت الثاني
رواية شط الهوى الجزء الثاني
رواية شط الهوى الحلقة الثانية
– إي دا يا آنسة؟
– دا كارنيه دخول الباص، أهو مكتوب فوق ركز بس.
– أيوة أنا واخد بالي مش أحول أنا، بس أنا عايز الكارنيه الخاص بيكي مش بتاع (أحمد زين العدلي).
قالها وهو بيلف الكارنيه لوشها فبصت لصورة أخوها في الكارنيه ورجعت بصت للأدمن ببسمة متوترة – ممكن طب بعد إذن حضرتك تعديها؟ كأن أنا اللي في الصورة وخلاص، هو الفرق الشنب والطرحة يعني مش حوار.!
قلب عينه وهو بيبص للي وراها – عدِّي بعد إذنك عشان باقي الناس تطلع.
– طب .. طب المرة دي بس! أنت متعرفش أنا عملت إيه عشان أهلي يوافقوا على الرحلة دي، أنا كان ناقص أقطع شراييني لولا بس إنه حرام وميـ…
قاطع كلامها – لو سمحتِ الرحلة هتطلع الساعة ٦ يعني كمان ربع ساعة، وزي ما حضرتك شايفة لسة عدد كتير فلو سمحتِ سيبيني أشوف شغلي!
بصت زينة لفاطمة بنت خالتها اللي اتكلمت برجاء – طب هي ذنبها اي طيب! هي دفعت الفلوس وسجلت، إيه يعني لو معهاش كارنيه.
– يا آنسة فاطمة الكارنيه دا للأمان، دلوقتي الآنسة مش معاها كارنيه يثبت إنها تبعنا يعني لو حصل مصيبة محدش هيعرف يحلها.
اتكلمت زينة بسرعة وهي بترفع كارنيه أخوها – أهو أهو، كأنه أنا.
بصلهم بزهق لثواني قبل ما يبعد عن باب دخول الباص – اتفضلوا، بس خليكوا عارفين أي مشكلة هتحصل إحنا مش مسؤولين عنها.
طلعوا الاتنين بسرعة وبسعادة إنهم عرفوا يقنعوه، قعدوا جنب بعض فاتكلمت زينة – مش قولتلك خليها عليا؟ عيب عليكِ.
بعد فترة كان الباص اكتمل وبدأ يتحرك وقفوا الأدمن في نصه وبدأ واحد فيهم يتكلم – زي ما عرفتوا من الجروب خط السير هيبقى ازاي، هنطلع من هنا على البحر على طول وممنوع نزول البحر لأن أولًا مفيش مكان لتغيير الهدوم وثانيًا عشان مفيش أمان جوة البحر، أنتوا مش مع اهاليكم!
اتكلم التاني – هنطلع بعد كدا على القلعة وممنوع التفرق هناك يا شباب، المَشي يبقى مجموعات هنقسمها لما نوصل،
بعدين هنروح ناكل في أي مطعم وبعدين هنروح المكتبة وهناك في تعليمات المفروض تلتزموا بيها واهمهم الصوت، ممنوع الصوت العالي لأنها بيبقى أكثرها طلاب بيذاكروا.
وفجأة وفي وسط الكلام، الصوت اختفى من المكان والعيون كلها ارتكزت على الأرض تحديدًا على كوتش واحد من الأدمن واللي رفع راسه يبص لزينة اللي جابت اللي في بطنها عليه…..
يتبع…
لقراءة الفصل التالي : اضغط هنا
لقراءة باقي حلقات الرواية اضغط على : (رواية شط الهوى)