رواية طفلة أرهقت قلبي الفصل الخامس عشر 15 بقلم عائشة البشير

رواية طفلة أرهقت قلبي الفصل الخامس عشر 15 بقلم عائشة البشير

رواية طفلة أرهقت قلبي البارت الخامس عشر

رواية طفلة أرهقت قلبي الجزء الخامس عشر

رواية طفلة أرهقت قلبي الحلقة الخامسة عشر

” أنت الحياة التي أحس فيها أنني رائعه ”
دنيا قدمت وسلمت عليه بالإيد، وبإبتسامة😊: كل عام وأنت بخير، عساك من عواده
حسام ضغطت على أيدها وكان نلقي نأخذها في حضني ونعيد عليها بطريقتي بس الله غالب، أبتسمت😍: وأنتي بألف خير يارب، وإن شاءالله كل عام وأنتي جنبي
دنيا نزلت رأسي بخجل وبعدت أول ماسمعت صوت عمتي طالعه من المطبخ، عيدت عليها وبعدها خش عمي مصطفي من برا وعيدت عليها، وشويه شويه بدي كل مره يخش حد
يوم العيد ممل زي ماتعرفو ولأنه كان أول عيد يمر على وفاة بابا وماما فالحوش مافضاش من الناس بكل فوج خاش وفوج طالع، الكل كانو موجودين خالتي وبناتها وبناويت عمتي وكناين عمي مفتاح وإمساوين عمامي وبناتهم حتي عبير اللي حاطه أشكال ألوان على وجهها لين موليا تخوف وهذاكا الكعب والقفطان تقول عليها في عرس مافهمتش شني قصدها بالحركات اللي إدير شني اللي تحاول تثبته بالضبط!! الله أعلم!!
سلوى مدت سفرة القهوه لسنيه طلعتها للمساوين، وتلفتت لدنيا: باللهي يادنيا مدي سفرة القهوه لحسام أهو كلمته بيجي بيأخذها، غير بنمشي نصلي العصر قاعده ماصليته
دنيا: باهي تمام، غسلت إيديا وخذيت السفره وطلعت
حسام من برا: سلوى هيا وين القهوه
دنيا طلعت ومديتله السفره من غير مانتكلم
حسام بغمزه😉: شني اللي مزعل الحلوه؟
دنيا بإستغراب🤔: أني قصدك!!

 

 

حسام برفعة حاجب🤨: علاش فيه واحده حلوه غيرك واقفه معاي
دنيا، بحزن😔: لا مش زعلانه بس تعبانه شويه مش قادره نفتح عيوني مارقدتش إلا نص ساعه
حسام،بتعب: اللي يسمعك، وأني أحرف منك الناس معاش بيكملو الهم شكلي بنهرب وخلاص، 😉تجي معاي
دنيا، بضيق: بطل براده القهوه صقعت برا فيسع
حسام، أبتسم😊: باهي وريني أبتسامتك الحلوه، وبري إرتاحي ياسر منه مطبخ البلي هذا
دنيا أبتسمت😊: باهي حاضر هي برا
حسام، بإعتراض: باهي معاش تبتسمي باش نمشي
دنيا،بإنزعاج: أنت منين بيشدوك باهي، خشيت وسكرت الباب
حسام، بضيق: باهي نتفاهمو عليها الحركه هذي بعدين
دنيا ضحكت😅 ورجعت كملت غسل الطواسي وطلعت قعمزت جنب بناويت خالتي
خوله، بضحكه😁: خيرها بنت عمك هذي هكي إمدايره في روحها تسخف مسكينه قداش حاطه كيلو على وجهها
إنتصار تلفتت لخوله وفنصت فيها: ضمى فمك فكينا من الضحك عيب قدام الناس، وتلفتت لدنيا، بتساؤل: هذا نفسها اللي كان واخذها ولد عمتك وطلقها ولا لا؟؟
دنيا، أي هيا عبير، والله ماعارفه تعرفي من الوفاه معاش شفتها
خوله: أه وأني نقول خيرها نافخه ريشها زعميتها مش معدله ومش متأثره أنها أطلقت، وهيا تلقاها من داخل نار شايطه😒
دنيا، بنفي: لا لا هذا حالها من يومها هكي متكبره وقايمه خشمها، والنبي فكونا منها مش ناقصني كأبه
خوله، بتعب: إعييت من التقعميز يابنات شكله مؤيد مطول، نكلم صلاح زعما!!
إنتصار، بتأييد: أي كلميه خيرلك أمي قالت لمؤيد يجينا بعد صلاة العشي راهو
دنيا: خيرك ياخوله خليك هدرزي، كأنك تعبانه تعالى خشي للدار إتكي شويه
خوله: لا لا خلي نروح خير وحتى صلاح توا راهو قاعد من غير غذي، أنتي يادنيا تعاليلي كان تبي تهدرزي عليا، ليا قريب سنه ونص متزوجه ماجيتينيش بكل

 

 

دنيا، بإبتسامه: بإذن الله في أول فرصه نجيك
قعدنا نهدرزو وشويه طلعت خوله روحت، ونضت أني وإنتصار خشينا للدار باش بنصلو المغرب
علا بحقد: شفتيها كيف مكبره ببناويت خالتها ولاقالت تعدل حتى شويه، لا والقهره تتحرك في الحوش براحتها تقول حوشها وعاطينها حتى دار
سنيه، بملل: باللهي ريحينا، ماهو من يوم يومها هكي مافيش بينا لادوه ولا كلام، وبعدين طبيعي يعطوها دار بروحها وين تبيها تقعد مع عمتي وراجلها ولا مع حسام
علا، بتفنيصه: وخيرك أنتي أدافعي عليها جديده هذي
سنيه، بملل😪: لا إندافع عليها ولاشي قلت الحق بس، غير أنتي حاطه عليها بعد اللي صار، واللهي إلا تسخف مسكينه اللي صار فيها مش شويه
علا، بشك🤔: لا أنتي مش طبيعيه مني لاحسلك عقلك ومغيرلك رأيك
سنيه، بغضب😠: أني من قبل هكي مش حاقده عليها ومابيني وبينها شي، بس أنتي مش عارفه خيرك إموليه هكي، حتى اللي قلبه حجر يسخف عليها فقدت أمها وبوها في نفس اليوم وقعدت بروحها وعايشه عند ناس ثانيه وأشبح شني صاير فيها مرتاحه ولا لا
علا: لا أنتي متغيره هلبا معاش متحمله مني كلمه كل كلمه نقولها توقفيلي عليها
سنيه، بضيق: لا متغيره ولا شي أنتي اللي موليه حقوده هلبا وقلبك أسود وديما طايحه في البنت مسكينه، مش كان حسام مش عاطيك وجه تقلبي عليها هيا، الحب مش بالسيف راهو، درهتيلي كبدي، وناضت خشت للمطبخ مع سلوي وسميره اللي يديرو في العشي، وخلت علا مستغربه وعلى وجهها ملامح الصدمه من ردة فعل سنيه معاها
دنيا سلمت وشفت لوين تشوف إنتصار، وضحكت😅: مافتحتهمش مالقيتش وقت
إنتصار بإستغراب🙄: تي فيه حد تجيه هديه ومايفتحهاش أنتي مخلوقه غريبه بصراحه
دنيا، بإبتسامه😊: أي أني
ناضت إنتصار سكرت الباب بالمفتاح ورجعت بحماس🤩: تعالي نفتحوهم مع بعض
دنيا قعدت ساكته ونتفرج عليها وهيا تفتح فيهم وفرحانه ومتحسمه تقول ليها
إنتصار، بإعجاب: شوفي محلاهم وهيا شاده شنطه وكندره، الكيسه مكتوب عليها عيلة عمك المبروك
دنيا: أي حلوات

 

 

وكملت إنتصار وفتحت الكل، وبشهقه: شوفي مؤيد خوي الحيوان جايبلك ساعه تجلط ويقول ماعنديش فلوس
دنيا قعدت نضحك😂: مبردك حاسدتيني كان مش هديه راهو عطيتهالك
إنتصار برفعة حاجب: لا صحيتي كأنه خوي مقوم راهو شرالي واحده زيها لكن الله غالب، قامت الهديه متاع عادل: حلو الطاقم بس حسيته مبالغ فيه مش لعمرك، ماعنداش ذوق، وقعدت تشوف للأسم: هالعادل
دنيا: اكيد من محله لأنه عنده محل فضه
وقفت إنتصار وقربت وهيا شاده زوز كيسات وهديه مكتوب عليها من حسام، وبغمزه😉: هاذم شكلهم حكايتهم طويله
دنيا، بإبتسامه😊: الهديه متاعة النجاح، والكيسات هاذم إمبارح عطاهولي حسام حطيتهم وخليتهم مافتحتهمش
إنتصار هزت رأسها بأسف😞: تعرفي هالحسام مسخفني ياناري، طاح فيك ربي يكون في عونه، ملاحظه أنك إموليه بارده هلبا يادنيا
دنيا، بإستغراب: كيف شني قصدك!!
إنتصار، بضيق: شوفي الراجل شني جايبلك ويصرف في فلوسه عليك وأنتي حتى الفتح مافتحتيهم هذا دليل على إهمالك وأنه هوا مش مهم عندك
دنيا، بإستنكار: لا والله ماهكي، بس تعرفيني ماتلفتش نظري هالأشياء، توا نقوله معاش يجيبلي شي
إنتصار وهيا تخبط على رجليها: حي على العبيطه حي، تي أنتي تبي دروس مكثفه وإن شاءالله ينفع فيك
دنيا، بملل: باللهي ياإنتصار فكيني من برادتك، أنتي تعرفيني يمكن أكثر واحده أني هكي شني تبيني إندير
انتصار تنهدت بملل: يادنيا أفتحي عيونك كويس وشغليلي هالمخ شويه، وطلعت لبسة جمبسوت وعليها جاكيت من فوق، ومدتها لدنيا: نوضي قيسي هذي ترا وراهو بتقيسيهم كلهم يهبلو الزفت، ياناري عليا أني اللي ماعندي مني يذكرني
دنيا وقفت: وخيره فايز وين مشي
إنتصار نزلت رأسها بأسف😞: هذاكا القفاص والله مانشوف منه حاجه، ومن هذيكا الليله لا أتصال ولا جي وحتى اليوم قلت عيد معليشي، تنازلت وإتصلت بنعيد عليه ماباش يرد، حاسبلي روحه سي السيد، درهلي كبدي ومعاش عندي ليه خلوق
دنيا هزيت رأسي وأني مش عارفه شني إنقول، قعدت نقيس في اللبسات وإنتصار بتهبل عجبوها
إنتصار وهيا تشوف لدنيا بإعجاب: يهبل يهبل القفطان هذا طالعه فيه تقتلي والله عنده ذوق هالحسام خليك لابستيه
دنيا، بنفي: لا لا شني نلبس حاجه جديده فكيني من دوتهم
إنتصار هزت رأسها وشافت لتليفوني اللي رن وغمزتلي😉: زودي سعدك ناداك ياحنه، خلي إنوض أني إمالا نشوف أمي ووقفت وطلعت

 

 

دنيا أبتسمت وخديت تليفوني ورديت: نعم حسام
حسام: نعمين يادنيا، وينك!!
دنيا، إبتسمت😊: في الدار كنت وسكتت
حسام: أي في الدار وشني كنتي!!
دنيا: لا شي كنت نصلي، وبعدين قعدت نقيس في الحوايج اللي جبتهم إمبارح بجد ليش إتعب روحك ماعندكش حق والله
حسام، بحب😍: تعبك راحه يادنيتي، قوليلي كيف طلعو عليك أكيد يقتلو صح!!
دنيا أبتسمت: أي حلوات
حسام، بحب😍: مش أحلى منك والله، أكيد أنتي اللي محليتيهم
دنيا أبتسمت بخجل وسكتت
حسام: وين راحت الحلوه؟
دنيا: نعم معاك
حسام، بفرحه: على طول معاي يارب، معاش تطلعي إرتاحي باهي، نبي نسهر على صوتك الليله
دنيا، بإستنكار: لا عيب نخلي البنات بروحهم في المطبخ بنمشي إنساعدهم
حسام: دنيا أني وسكتت وأني نشوف في عادل جاي جيهتي: خلاص تمام بعدين نحكو
دنيا لاحظت تغير صوته شكله حد جنبه، سكرت وغيرت حوايجي وظميت الحاجات وطلعت
^^^^^^^^^^^^^^^^^^^^^^^^^^^^^^^
عادل، بهزوه😏: من توا سحباتك مننا ومعاش نشوفو فيك إمالا بعدين كيف معاش تعرفنا بكل
حسام بنص عين😒: واللي عنده القمر شني بيدير بوجوهكم
عادل 🤨: ااااه صار القمر باهي ربي يهني إن شاءالله، وتلفت لمحمد اللي جاي
محمد: خيركم قعمزتو أهناي
عادل بهزوه😏: لقيت الأخ لاهي مع القمر قلت نخرب عليه شويه
حسام شفت لعادل بضيق ومررت نظري لمحمد اللي هزلي رأسه بمعني ماتعدلش عليه
محمد بتساؤل: شني ياعادل قطعت شوط كبير في البنيى ماشاءالله إمالا اللحمه قريبه
عادل بإبتسامه مستفزه: بإذن الله قريبه وهلبا
حسام قعدت نشوفله بإستغراب🤔
محمد أبتسم😊: غير راك تنسانا بس
عادل خبط حسام على رجله: كيف ننساكم عاد أنتم من العيله وقراب من الجيهتين، وأبتسم بهزوه😏 وناض
حسام تنهدت بضيق: شفته كيف إمولي حاسه يلقح عليا الزفت شني قصده من الجيهتين قصدك يبي واحده من العيله
محمد، بإستغراب: والله ماعارف شني قصده، بس مادوراش هو هكي بارد من يوم يومه
حسام هزيت رأسي وأني مش مرتاح من تلقيحه إن شاءالله غير مش اللي في بالي بس
محمد، بتساؤل: شني بدير بتقعد تخدم في المخبز ولا بتفوته
حسام، بنفي: لا لا خلاص ياسر، توا المحل بيفتح في النهار نمشي فيه لين نحصل عمل وخلاص
محمد، بإبتسامه😊: ربي يسهلك إن شاءالله
^^^^^^^^^^^^^^^^^^^^^^^^^^^^^^^

 

 

دنيا فاتو أيام والحياه هاديه قليل مانتلاقي مع عمامي نتحاشي فيهم على قد مانقدر، الحق مرتاحه لأبعد الحدود، عمتي وعمي مصطفي مش مقصرين معاي وإمحسسيني كأني في حوشي وأكثر، وحسام اااااه من حسام شني بنقول وشني بنخلي مش منقص عليا شي وداعمني بجميع الأشكال، وديمه يرفعلي في معنوياتي وواقف جنبي وساندني، حتى الفتره الأخيرة لحظت أنه في تغييرات جذريه في شخصيتي، بديت نهدرز ونأخذ ونعطي ونضحك أكثر من قبل، وحتي نشارك برأيي في أي موضوع ينفتح قدامي، أختفي البرود من ملامحي بديت نعطي في المشاعر اللي في داخلي حقها، فسرت هالشي على أنه ثقتي في نفسي زادت وبقوه بعد مالقيت الدعم اللي كنت نحتاجه
” وجوده جنبي كان شفاء لجميع جروحي
وجوده في حياتي دواء ليس بعده داء ”
كنت إندير في قهوه وسنيه واقفه جنبي في المطبخ، مستغربين صح حتى أني مش أقل منكم إستغراب من بعد يوم العيد جتني حوالي 5مرات وهذي السادسه، تهدرز شويه وتروح
سنيه، بإبتسامه😊: قتلك غذوه جايتنا خالتي وبناويتها ضروري تجي راهو
دنيا طفيت الغاز وأبتسمت😊: إن شاءالله خير، حطيت البكرج في السفره وقمتها: هيا تعالي نطلعو بحدا عمتي
سنيه: هيا، تعرفي واحده من بناويت خالتي عرسها قريب وشرطت عليهم تنزل إدبش من طرابلس
سعاد تلفتت بإبتسامه وهيا تسمع في اللي قالاته سنيه: قصدك خالتك حنان وصلت؟؟
سنيه: أي ياعمتي من ثاني يوم العيد ليها قريب ثلاثه أسابيع في حوش خالي الهادي، ماهو في وسط المدينه وقريب على الأسواق، وغذوه بتجينا باش إتجو راهو
سعاد، بإبتسامه😊: بإذن الله والله إستاحشتها عليها هدرزة ماشاءالله وديمه وهيا تبصر وتضحك
سنيه، ضحكت😁: أي جوها يهبل حتى بناتها جو زيها
دنيا😊: كم عندها بنات هيا؟؟
سنيه: عندها 5 بنات، ماعندهاش ولاد، تعرفي جوهم مش عادي لازم إتجي تتعرفي عليهم
دنيا: ماشاءالله ربي يحفظهم، إن شاءالله بإذن الله
^^^^^^^^^^^^^^^^^^^^^^^^^^^^^^^

 

 

في حوش ناجيه كان النقاش محتد على أخره بين مؤيد وبين فايز ولد عمه وخطيب إنتصار
مؤيد، بغضب😠: مادامها قاعده في حوش بوها ماليكش الحق تتحكم فيها
فايز، بعصبيه😡: هذا بدل ماتكلم أختك وتلومها كيف ماتسمعش كلمتي، تزيد تقوي فيها عليا بهالكلام، كيف ماعنديش حق!!
مؤيد، بعصبيه😡: على شني بنلومها بالضبط على خاطر طلعت مع خوها وأمها!! تي أنت اللي اللوم عليك، وكان تتحشم وإمدايرلنا قدر وقيمه ماتقولش هالكلام أحني أهلها مش أنت باش تتحكم فيها، هذا من توا هكي إمالا لما توصل فيك كيف!! تحرم عليها حتى أمها قيسه😒
فايز وقف وبغضب😠: أنت واضح أنك ماتبيش تتفاهم مع حد ولا تأخذ وتعطي، وشكلكم إدورو في سبله باش تتملصو
مؤيد شفتله بإستهزاء😏: واضح مني اللي يدور في سبله وواقف على تكه
خشت ناجيه وهيا تسمع في أصواتهم عاليه وفايز واقف، بضيق: أستهدو بالله مش هكي تنحل الخلافات راهو، قعمز يافايز سلم ولدي، وأنت يامؤيد نقص شويه
فايز، بعصبيه😡: عاجبك أنتي يامرت عمي عمايل بنتك
مؤيد، بغضب😠: عمايل شني ياحيوان اللي يسمع يقول شادها مع واحد في الشارع
فايز، بهزوه: لا هذا اللي ناقص هوا أصلا لو مش أني مراقبها وموقفها عند حدها راهي ماشيه على حل شعرها في الشارع، أنت المفروض تشكرني بدل هالكلام اللي تقول فيه
مؤيد وقف بعصبيه وجي بيهجم على فايز لولا أمه اللي وقفت حاجز بينهم
ناجيه بعياط: بس أنت وياه وين تحسابو روحكم، أطلع يامؤيد ونادي أختك
مؤيد بغضب😠: مايحلمش يشوفها الواطي هذا معاش عنده شي عندنا يطلع يقلب وجهه
فايز: راهو يامرت عمي ساكت بس إحتراما ليك، ولا هالكلام ماينسكتش عليه
ناجيه، بأسف😞: معليشي ياوليدي أمسحها في وجهي، وتلفتت لمؤيد، وبغضب😠: أطلع نادي أختك أني قتلك
طلع مؤيد وهو معصب 😡
إنتصار رغم أني كنت حاسمه قراري مهما كان موقفه بس كنت متوتره وخايفه، طلعت وأني منزله رأسي😞
مؤيد شديتها من أيدها قبل ماتخش للمربوعه، وبتحذير: ردي بالك تخافي منه ولا إديريله حساب، مادامك قاعده في حوش بوك مايقدر يديرلك شي، خليك قويه وأثبتي شخصيتك من توا، ونبيك تعرفي أني معاك في أي قراري تأخذيه وتهمني مصلحتك بالدرجه الأولى

 

 

إنتصار أبتسمت😊 وحسيت كلام مؤيد قواني وخلا ثقتي في روحي تزيد، فعلا الخو سند، خشيت وأني رأسي مرفوع
ناجيه: تعالي قعمزي يابنتي تفاهمي أنتي وولد عمك، ووقفت ناجيه وطلعت
فايز بإستفزاز😏: عاجبك هاللي درتيه شفتيه لوين وصلتينا بتسكير رأسك، تخلي خوك يهيني ويقلل من قدري وأني في حوشكم، باللهي شني هوا اللي حصلتيه لما كسرتي كلمتي وطلعتي ومشيتي رأيك
إنتصار توقعته يعتذر أو يتأسف، يبرر غيابه وإنقطاعه طول الفتره اللي فاتت حتى في العيد ماكلفش خاطره يجيبلي حتى طرف شكلاطه ويعيد عليا وتوا جاي يحط اللوم عليا، خلاص وصلت حدي منه كل يوم قاعد يصغر في عيني أكثر، معاش طايقه نسمع حتى صوته، شفتله بحده: أنتي اللي قللت قدرك بروحك وعطيت مجال أنك تنهان، تعرف اللي واجعني أني قعدت مع إنسان أناني وإتكالي زيك، رابطني معاك ثلاثه سنين وأنت تحكم وتطلق وأني مخليتلك حرية التصرف في حياتي كل شي أنت تختار فيه حتى قرايتي وتقرر بدلي وتتحكم في أبسط تحركاتي، مش هكي الحياه اللي نبيها أني، نبي راجل يخاف عليا ويحترم قراراتي مايقيدنيش بقوانين تافهه، نبي راجل نحس بالأمان معاه مش نخاف نطلب منك حتى نطلع مشوار، راجل يهتم بيا مش يحطني على الهامش ومايعرفنيش إلا في وقت فراغه، للأسف مش أنت الراجل اللي نبيه ونطمح أني نعيش معاه عمري كله💔، وقفت وحطيتله الدبله قدامه، وبهزوه😏: على ماأعتقد هذا اللي ليك عندي وأهو وصلك، وطلعت بسرعه، وماقدرتش إنسيطر على دموعي ونزلو😭
مؤيد تلقيتها من فم الحوش، وبخوف😟: شني فيه ليش تبكي!!، وتلفت لفايز اللي طلع من المربوعه لبس شبشبه وفتح الباب وطلع من غير ولا كلمه
إنتصار أبتسمت من بين دموعي وتنهدت براحه: هذا اللي كان لازم يصير من زمان، فايز أنتهي من حياتي ومستحيل يرجع، وخشيت لداري
مؤيد تنهد بضيق وتلفت لأمه اللي نزلت رأسها بأسف وكأنها كانت متوقعه وعارفه هالشيء
^^^^^^^^^^^^^^^^^^^^^^^^^^^^^^^

 

 

في حوش المبروك
محمد، بتساؤل: خلاص ياأمي هذا اللي تبوه
فوزيه وهيا تفكر🤔: أي هو هذا، ولانقولك أستني سنيه تجي وتقولك مرات أني ناسيه حاجه
محمد، بإستغراب: وين تلود هيا قريب مغرب معاش نلحق على السوق
فوزيه: عند عمتك شو…. وتلفتو الزوز لما إنفتح الباب وخشت سنيه: أهي جت تعالي بسرعه
سنيه،متفاجئه: خير إن شاءالله تستنو فيا قصدكم مانعرفش روحي مهمه للدرجه هذي
فوزيه، بملل: بلا تسهويك تعالي خوك مستعجل قوليله اللي ناقص، خلى إنخش نكلم أحمد مادامه بوك طلع
سنيه تنهدت بضيق: أحمد هاللي مبهدلك في جرته
مشت فوزيه بسرعه من غير ماترد على سنيه
محمد، بإبتسامه: كاثره مشياتك لعمتك شني فيه؟؟
سنيه: لا شي غير نهدرز شويه أني ودنيا خير من الكساد
محمد بغمزه😉: سبحان مغير الأحوال قبل تمشي يمين شني اللي قلبك يسار
سنيه خدت تليفونه من أيده وقعدت تكتبله شني ناقص، وأبتسمت😊: تعرف والله كنا ظالمينها دنيا ياناري بجد لما تهدرز معاها تغيرلك الفكره اللي واخدينها عليها من قبل، وبعدين علا إموليه داره كبد نمشيلها تغملي نفسي بشفتي هذيكا ريتي هذيكا، هذيكا ماتنفعش هذيكا مش عارفه شني، تحسها حاقده على الكل ومعاش تحب حد
محمد، بإستغراب🙄: أنتي سنيه متأكده!! إمالا وين الصحبه واللي يشوفكم يقول عليكم خوات مش بنات عم، وكنتو ديما معششين مع بعض
سنيه، بأسف😞: كنت مخدوعه بالمظاهر الكذابه، ومدتله التليفون: هيا نوض باش تلحق على السوق
محمد أبتسم😊 وناض طلع
^^^^^^^^^^^^^^^^^^^^^^^^^^^^^^^

 

 

دنيا صليت العشي وخذيت كتاب وقعدت نقرأ شويه ليا فتره على القراءة، شويه وكلمتني إنتصار وحكتلي اللي صار معاها ياناري تسخف بعد ثلاثه سنين أنتهي كل شي، بس على حسب كلامها عليه ماينطاقش، ربي يعوضها خير، وأني نكلم فيها 5 مرات يخش عليا حسام إنتظار، بصراحه كانت تبكي ومتأثره ماقدرتش إنسكر عليها ونكلمه هوا، أني سكرت منها وكيف بنعاودله نسمع في الباب يطق
دنيا مني!!
حسام، بغضب: عفريت، سكري المكالمه اللي عندك وردي عليا خير ما واللهي نخش نفترشه التليفون تفتريش
دنيا وقفت وفتحت الباب، وبتوتر: أنت شني تقول كنت نكلم في إنتصار بنت خالتي ماقدرتش نسكر عليها
حسام كنت معصب وواصل حدي خايف نقول شي نندم عليه، دفيتها بإيدي الداخل وسكرت الباب، وبعصبيه: ردي عليا توا
دنيا وليت قعمزت على السرير وزفرت بضيق وأني نشوف في التليفون يرن، ماكنتش نبي إنرد بس خفت يدير شي وعمتي وعمي مصطفي ينتبهوا أو يحسو بشي، رديت ببرود: نعم تفضل، أي خدمه
حسام بغضب😠: تعرفي تحسني أسلوبك أحسن، ماتزيديش تعصبيني مانضمنلكش روحي شني إندير راهو
دنيا، بملل: باهي قتلك كنت نكلم في إنتصار مش مصدقني تعالا خوذ التليفون وشوف المكالمه بروحك
حسام، بضيق: أكيد مصدقك بس عصبت والشيطان دار فيا البلي، نص ساعه وأنتي تكلمي فيها!!
دنيا،برجاء: حسام واللهي بروحي مضايقه باللهي ماتزيدني، قتلك تعالا شوف المكالمه وريحني
حسام، بضيق: خلاص أسف سامحيني، بس شني اللي مضايقك؟؟
دنيا قعدت نحكيله على اللي صار مع إنتصار وتأثرت ونزلو دموعي
حسام: ليش الدموع باهي يادنيتي، مصره تعذبيني بيهم ديمه، إموليه بكايه بكل أحرف من قبل
دنيا مسحت دموعي، وبضيق: وجعتني ياناري ماتستاهلش والله
حسام: ربي يعوضها خير منه، وبعدين ينفصلو من توا أفضل مادامهم مش متفاهمين
دنيا، بحزن😔: ثلاثه سنين مش شويه، وهيا تحبه هلبا من لما كانت صغيره أني نعرفها، مش ساهله بكل ربي يكون في عونها خايفه عليها
حسام: ماتخافيش عليها مرحله وتعدي وترجع أحسن من قبل وتشوفي
دنيا مش عارفه شني اللي خلاني نسأله هالسؤال بس طلع بعفويه: حسام معقوله تسبيني حتي أنت!!
حسام، بإبتسامه😊: مستحيل يادنيتي، ماتفكريش حتى التفكير في الموضوع، أنتي غير عن الكل جوهره صعب لا مستحيل نلقا غيرها، كيف نفرط فيها قوليلي!!❤
دنيا أبتسمت بفرحه☺
” وجوده معي وكأنه يعيد الحياة لأيامي الميته ”
^^^^^^^^^^^^^^^^^^^^^^^^^^^^^^^

 

 

في حوش مفتاح
عبير: ترا إنشوف الصور اللي صورتيهم
علا مدتلها التليفون
عبير ضحكت بإعجاب: تاريتك مش هوينا، تي وين حصلتي عليهم هاذم
علا، بمكر: الإسبوع اللي فات وأني طالعه للإمتحان شفتهم يشربو في قهوه في المنور، ومن حظي جوني لقطات مش عاديات، باش يعرفو على مني يلعبو
عبير، بهزوه: لعب شني هما ماوصلوش فيك ولاشايفينك أصلا
علا بضيق: عارفه بس حسام ليا ومادامه مش شايفني، مش راح نخليهم يرتاحو وكأنه مافسدتش عليهم أني مانكونش علا، تي حتى سنيه إنقلبت عليا توا طلعتلها دنيا كويسه وإمدايره صحبه معاها
عبير بهزوه: هذا غير تلومي فيا تاريتك حتى أنتي أشر مني😏
علا، بغضب😠: لا أني مش زيك نبيع في شرفي ونكلم في حثاله ويضحكو عليا، بس مانخليش حقي يضيع ويأخذه غيري، وطلعت وقربعت الباب
عبير بهزوه😏 بديري روحك شريفه عليا أني تي أختي ونفهمك مادامك بديتي هكي معناها القدام أسوء، وقمت تليفونها اللي يرن: أيوا حبيبي، وأني أكثر هههههه، قريب إن شاءالله
في نفس الحوش بس في المربوعه اللي فيها عادل ومفتاح
عادل، بضيق: شني صار يابوي أمتي بتخطبهالي!!
مفتاح: تي غير كمل شقتك أنت
عادل، بإنزعاج: شني قتلك بنتزوج الإسبوع الجاي، هيا خطبه بس باش مايسبقني حد وياخذها
مفتاح: مادامه ماحد تكلم لتوا معناها مش حاطين هالموضوع في رأسهم، بإذن الله مايأخذها حد غيرها أنت أولى بيها، أنت رد بالك من اللي قلتلك عليه بس
عادل أبتسم بمكر: ماتخافش منه حاطه في جيبي عندي دليل عليه يخليها تمسحه مسح من دماغها
مفتاح، بإعجاب: تاريتك مش هوين، أعطيني هاليومين بس وأن شاء الله خير
عادل أبتسم وناض طلع
^^^^^^^^^^^^^^^^^^^^^^^^^^^^^^^

 

 

في حوش بشير
سامر: لا يابوي شوف غيري أني عندي واحده في بالي الصراحه، وبعدين كل شي إلا الزواج بالغصب هذي حياة طول العمر، مش إتفاق شهر شهرين ويتم
بشير، بغضب😠: ماك عبيط البنت عندها خير ورزق وأنت أولى بيها، خير مايسبقك واحد من ولاد عمك
سامر، بهزوه: شني هوا سباق ولاشني باش يسبقوني، يسبقو ولايطيرو مايهمونيش
بشير، بتفنيصه: ولو أني قتلك تأخذها غصبآ عنك ماتبيش تسمع حتى كلام بوك
سامر: سامحني يابوي لكن أني مستحيل نوافق ونرضي بهالشي، قتلك عندي واحده وبصراحه مش شايف غيرها، شوف سعد أكيد مايقولك شي
بشير، بغضب😠: بتقعد طول عمرك خايب وفقري خزي على وجهك أني اللي فاضي نحسابك راجل وعابي عليك، نوض أطلع من قدامي وناديلي سعد، وإن شاءالله تطلع منك كلمه لأمك تشوف شني يصير فيك
سامر وقف وطلع وشوي خش سعد
سامر أستلماته أمه إستجواب وهوا ماباش يتكلم مالقاش حل إلا أنه يطلع من بحداها وخلاص
سعد، بفرحه: أي عادي يابوي أني موافق
بشير، إبتسم: عارفك ولدي مش زي الجبان هذاكا زعميته الكبير وعابي عليه نحسابه راجل طلع عيل وضاحكه عليه واحده بنت أمها
سعد: أني بصراحه من قبل في بالي هالموضوع يابوي بس متحشم نفتحه معاك، بس أهو أنت اللي بديت بيه
بشير، بإبتسامه: خلاص بإذن الله هاليومين يصير خير، ردي بالك أمك تسمع فاهم لين يصير شي رسمي وبعدين نقولولها عارفه مش راح ترضي
سعد، أبتسم: لا لا مش راح نقوللها
^^^^^^^^^^^^^^^^^^^^^^^^^^^^^^^

 

 

الصبح في حوش مصطفي
حسام، بإبتسامه😊: صباح الورد لأحلى ورده
دنيا برفعة حاجب🤨: مني ورده هذي!!
حسام بضحكه😅: بدينا نغارو ولا شني، ماتخافيش مافيش ورده غيرك معبيه عيوني
دنيا، بغرور😌: لا أبدا ليش نغار بس إنجرب في روحي بس، وضحكت😂
حسام سرحت في ضحكتها كل يوم قاعده تسحرني أكثر، تسلبني من روحي وتخليني متيم بيها أكثر وأكثر❤
دنيا حطيت فنجان القهوه قدام حسام وجبت فنجاني وجبدت كرسي وقعمزت وأشرتله بإيدي👋: هياااااا وين سارح اللي واخذ عقلك
حسام، بحب: تتهني يارب❤
دنيا أبتسمت ونزلت عيوني وقعدت نشوف لفنجاني
حسام، برجاء: دنيا ممكن تقيمي رأسك وتشوفيلي
دنيا قمت رأسي وأبتسمت ونزلته ثاني
حسام وقفت جبدت الكرسي وقربت منها مديت أيدي وقمتلها رأسها، وبحب: لما نكون جنبك رأسك يقعد فوق ماشي، أني مانصدق إنشوف عيونك ونتأمل فيهم وأنتي تنزلي في رأسك وتحرمي فيا منهم
دنيا بتوتر: ماهو مش…..
حسام، بغمزه😉: تحاولي تخبي خايفتيهم يفضحوك أصلا باين كل شي فيهم
دنيا بتوتر: لا أبدا شني هوا اللي باين، مافيش حاجه باينه فيهم
حسام، بإبتسامه😊: باهي شوفي ترا أني مافيش حاجه باينه في عيوني، شديت أيدها
دنيا شفت لعيونه وحسيت روحي ضعت وزادني أكثر بلمسة أيده، قعدت سارحه
حسام تصدقو حتى رموشي واقفين إستعداد تمنيت العمر يوقف على هاللحظه
دنيا وأخيرا قدرت نرجع عقلي ونعيد توازن قلبي، ضحكت نحاول نخفف أرتباكي😁: باين أنك مش راقد كويس، ومتوتر وخايف من المقابله
حسام أبتسمت😊: أنتي تعرفي أنه في وجودك مافيش شي يشغل بالي ويوترني غيرك!!، واللمعه اللي عيوني تعكس شي واحد وبس في جميع حالاتي وهالشي هوا أنتي
دنيا بإستعباط😇: بس مش باين هالشي أبدا أبدا
حسام، بهيام😍: دنيا بطلي أستعباط ❤أني نحبك❤
دنيا حسيت مشاعري تحركت وبقوه أول مره نسمعها منه بجد الكلمه ليها تأثير غير كل الأفعال، هزيت رأسي وتصنعت الخوف ومديت أيدي نتحسس جبهته: حسام أنت مريض شكله عندك حراره وبديت تهلوس
حسام تقدرو تقولو حفظتها صم عارف كيف تفكر وشني فيه في عقلها، تستهبل عليا تحساب روحها بتقدر تهرب مني، شديت أيدها وحطيتها على قلبي، وبحب😍: مادامكم بتحسسي حرارتي شوفيها من أهنايا وبالمره قيسي دقاته اللي يهبلو وصعب ينتظمو ويقعدو عاقلين في وجودك جنبي
دنيا أني اللي ركبتني حراره من عيونه اللي صعب يرمشو وهما مركزات عليا ولا لمسته اللي كلها حنيه ولا كلامه اللي مهما كنت عاقله ومتوزانه قادر يبعثر توازن عقلي بحرف، شهقت بصدمه😱: هيييييي عمي!!
حسام طلقت أيدها وتلفتت بسرعه وفي هاللحظه ماشفتش إلا خيالها اللي خطف من قدامي، خدعتني وهربت😅، ضحكت ووقفت وأني نهز في رأسي يمين ويسار، شربت فناجين القهوه الأثنين وطلعت
دنيا من المشاعر الحلوه اللي سيطرو عليا في لحظه دموعي نزلو، أبتسمت وأني نشوف في مسج منه
” نحبك نحبك نحبك يامجنونه❤، ماتبيش تقوليلي حاجه حلوه ترفعلي معنوياتي شويه، خاش على إمتحان راهو ”
أبتسمت وكتبت رساله وبعتتها وأتكيت وكلمته تردد في وذني ‘أني نحبك’
حسام مقعمز في السياره نستني فيها تسخن، أبتسمت بفرحه☺ لما وصلني المسج ” ربي يوفقك ويفتحها في وجهك، ويعطيك ماتتمنى يارب ”
كتبت المسج وحركت السياره وطلعت وأني كلي تفائل بأنه الصعب كله راح يهون مادامها معاي
دنيا فزيت بسرعه لما سمعت صوت مسج ” ف لتعلمي أنكِ أولى وأحلى وأغلى أمنياتي، ربي يحفظك ليا ” ضميت التليفون في حضني ورجعت أتكيت والفرحه مش سايعتني
” لا أحبه فقط بل أستمد منه رغبتي في الحياه.. أجد وجوده دافعاً يخبرني بأن أبتسم في وجه الشمس كل صباح ”
^^^^^^^^^^^^^^^^^^^^^^^^^^^^^^^

 

 

الظهر في حوش المبروك، وصلت حنان وثلاثه من بناتها جيبهم خوها الهادي حطهم وطلعو
بعد الإستقبال والتسليم خشو الكل للصاله
فوزيه، بفرحه: أنستونا أنستونا هذا وين نورت طرابلس بوجودكم
حنان، بضحكه😁: ياوخيتي ماريتلها نور طول اليوم وهيا مظلمه رزيهم في أعمارهم متاعين هالكهرباء حرقونا حرق في هالصيف
فوزيه، ضحكت😅: يعطيك سلامة ربي ياحنان
حنان، بإبتسامه😊: والله ليكم وحشه إمالا وين الأولاد وحميده بزايد غالي عليا هالولد من يوم يومه
سنيه: محمد في الجامعه ياخالتي شويه ويروح
حنان: والمنجوه أحمد أكيد يلود زي عوايده، تلفتت لفوزيه: ياوخيتي هالولد مش ليكم بكل صغيويرتك كلهم ماشاء الله إلا هو يطير عليهم في العين😂
فوزيه تحاول ماتبينش شي، وأبتسمت: كيف حال العروس، مشاء الله متغيره هلبا
أيه، بإبتسامه😊: الحمد لله ياخالتي
حنان، بنص عين😏: أش بيها ياحنه فلست بينا في قولت نبي هذي ونبي هذي وخيره فلانه دارولها أهلها هكي، وخيره علانه شرولها اللي تبيه وماخلوش حاجه في خاطرها
فوزيه: معليشي عروسه ومن حقها تدلل ربي يهنيها إن شاءالله
حنان: اي ياوخيتي عروس لكن هذي أيه مختار ال….. مش الملكه ديانا، ماتنتلف من علينا لين تفلس بينا
أيه شافت لأمه برفعة حاجب: أهو بنبدو شني يسكتها توا
حنان بتفنيصه: أسكتي فمك يامنجوهه خليني نطلع مافي خاطري، وتلفتت لفوزيه: والله ياوخيتي دلع بنوت لولا بوها قال خوذيلها اللي تبيه وماتخلي حاجه في خاطرها راهو وريتها هالتشريط الزايد
تعالت أصوات الضحك على حنان وهدرزتها
وشويه وخشت علا وبعدها محمد اللي حاول يخلي روحه طبيعي وكأنه مش شايفها قدامه سلم على خالته وبناتها وماعبرهاش الشي اللي خلا علا بتتفجر من الغضب وسنيه لاحظت هالشي بس ماعطتش للموضوع أي أهمية
حنان، بضحكه: ماشاءالله عليك ياحميدا محجوز راهو تفوت واحده من بناويتي لا عاد خالتك ولانعرفك أيواه أهو قتلك😁
محمد، ضحك: كان تخليلي العروس مانقولش لا حتى أني😅
حنان، بضحكه: لا عاد هذي فات فيها الفوت، وبعدين يحبك ربي تفكيت من هالجالطه لسانها يلفك لفان راهو😂
أيه، برفعة حاجب: لا هوا اللي ماشاء الله عليه رايح زي الصندوق لساني مايسداش
محمد، بنص عين: بالك مش عاجبك يازرافه
أيه،بضحكه: خزي أني زرافه ياسبونج بوب😅
محمد ياودي صادقه خالتي مايقدرك حد، أمالا وين باقي البنات ياخالتي
حنان: أماني وتهاني السودات طلعو يلعبو برا، ماشفتهمش
محمد: لا لاقيتهم وسلمو عليا، مازالو فيه إثنين غيرهم ولا لا؟؟
علا كنت تشوفله بغيض وهيا تشوف فيه كيف يهدرز ويبصر ومتجاهلها كليا ولا كأنها موجوده
حنان، بضحكه😁: شكلك ناوي تحط عينك حق، ياحنه أسيل وأيات قعدو مع عمك مختار
محمد، بإبتسامه: لا غير سألت بس
سكتو الكل وتوجهت أنظارهم للباب لما خشت أماني تجري وتلهث: حييييي ياخالتي جتكم واحده طرف ومعاها حاجه، لكن البنت صاروخ😉
محمد فتحت عيوني بصدمه😮 وشفت لأيه: شكلها تربيتك هذي
أيه، بغرور😌: أيه إمالا كيف نعجبك😉

 

 

علا اللي ماعجبهاش أستقبال الكل لدنيا أنسحبت وروحت لحوشهم وهيا في أقصي مراحل الغيض والغضب
أيه، بإستغراب🤔: سنيه هذي بنت عمك قداش عمرها خيرها قاعده مش متحجبه!!
سنيه: 16 ولا 17 مش عارفه بالضبط، والله مانقولك هيا من يومها هكي
أيه، بإعجاب: ماشاء الله عليها الزفت تقول مش ليبيه
سنيه: أي حتى أمها الله يرحمها كانت زيها بالضبط، عندهم فيه الجمال، حتي خالتها وبناويتها قنينات ماشاء الله
أيه، بضحكه: أحني اللي ماعندنا حظ تقول جايبينا من الصومال نسل أسود😂
سنيه، ضحكت😅:بالعكس والله حتى أنتي ماشاءالله عليك تغيرتي هلبا
أيه: غير ناديها تقعمز بحدانا خلي نهدرزو عليها بالك نحصلو منها خلطات تحافظ على الجمال تعرفي عروس وبنهتم بروحي😌
سنيه، بإبتسامه😊: يعطيهالك جوك قاعد زي ماهوا، وقعدت تنادي في سرور
سرور😒: ها شني تبي خيرك ماتتحركيش بروحك
سنيه، بتفنيصه: دخلي أيه لدارنا خلي إنادي دنيا وإنجي
دنيا روحنا أني وعمتي قريب المغرب، بجد إنسجمت مع البنات وأيه هذي جوها مش عادي تبصر وتضحك وعفويه هلبا وتحسها طيبه وعلى نياتها وقلبها أبيض، خشيت وأني مبتسمه، وقبل مانوصل فم باب الدار إنفتح باب الحوش
مصطفي، بتوتر: دنيا في ضيف في المربوعه يبي يشوفك
دنيا، بإستغراب🤔: مني ياعمي؟؟
مصطفي: غير تعالي يابنتي وتوا تعرفي مني!!
دنيا طلعت وراء عمي مصطفي وأني على وجهي علامات الإستغراب مني الضيف اللي جاي في هالوقت ولا يبيني أني!!

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)