رواية تربية حواري الفصل الخامس 5 بقلم ولاء حامد

رواية تربية حواري الفصل الخامس 5 بقلم ولاء حامد

رواية تربية حواري البارت الخامس

رواية تربية حواري الجزء الخامس

رواية تربية حواري الحلقة الخامسة

افتكرت حور صاحبتها من أيام الجامعه ومسكت تليفونها
حور: ايوه يا هندسه
شذا: حور عامر فينك يا بنتي مختفيه فين بقالي فتره بحاول اوصلك ومش عارفه
حور: في الدنيا يا هندسه عماله تلطش فيا والطش فيها
شذا بإستغراب: مالك يا حور صوتك مهموم فيكي ايه
حور بتعب: ابويا الله يرحمه ومن وقتها الدنيا عكت على دماغي من كل نحيه
شذا بصدمه: البقاء لله يا حبيبتي أمته داه حصل وازي متقوليش ايه يا بنتي احنا اغراب ولا ايه وازاي انا معنديش خبر بكل داه
حور: والله يا بنتي الدنيا عكت مره واحده ابويا تعب ومكملش شهرين وكان ربك استرد أمانته وملحقتش حتى أحزن عليه والدنيا نازله طاخ طيخ على دماغي
شذا بمواساه: معلش يا حور انتي قدها وقدود يا بت داه انتي بنت ابوكي واللي خلف مماتش
حور بوجع: الحمد لله على كل حال كنت عايزه منك خدمه
شذا: عنيا انتي تؤمري أمر
حور: الأمر لله تسلمي يا غاليه عايزه اعرف كل دبه نمله في الورشه والتوكيل في حد سايق العوج معايا وعايزه اعدله
شذا بإنصات: تمام سهله اوي
حور باهتمام: ازي
شذا بتوضيح : ركبي كاميرات مراقبه
حور: مش عايزه حد ياخد خبر بيها عايزه انا وبس هاينفع يعني
شذا: اه يا حور ينفع وسهل كمان جدا في كاميرات حديثه وصغيره في الحجم وبتتحط في أماكن مخفيه الميجا بيكسل بتاعتها عاليه أوي بتجيب مسافات كبيره وكمان بتسجل صوت وصوره مش صوره بس
حور: تمام حلو اوي بس عندك حد ثقه يعني
شذا بضحك: عيب عليكي والله يعني صاحبتك مهندسه كمبيوتر وبتسألي على حد ثقه انا هاجي اركبها بنفسي بس محتاجه صور للمكان ومساحته علشان اشوف هنحتاج كام كاميرا
حور: بصي مش هاعرف علشان محدش يشك لما يلاقني بصور بس على العموم هاتي بزياده أوي الورشه مساحتها حوالي 150 متر والتوكيل دورين مساحته 80 متر والمخزن مساحته 350 متر
شذا بتفكير: اممم تمام انا هاجيب اللي يكفي المساحه وزياده كمان علشان منتعطلش بكره هاكون عندك
حور: لالالا بكره لا خليها الجمعه اجازه الورشه وندخل في الخباثه ونخلص كل حاجه
شذا بتفهم: تمام يا حور يوم الجمعه ان شاء الله وقولي لطنط تعملي محشي معتبر وملوخية من ايديها وياسلام لو كان معاهم فرخه بلدي متحمره ولا دكر بط متزغط يبقى عملتي احلى واجب
حور بضحك: طفسه من يومك هاقول لهدي وهي هاتعملك احلى محشي تذوقيه في حياتك
شذا بضحك: لاء منا عارفه وزايقه فاكره لما جبتيه الجامعه كان يوم منيل كلنا من هنا ونمنا في الجنينه
حور بضحك: طيب كان اهون من السمك اللي جابته نهال كلنا ودخلنا في غيبوبه
شذا بضحك: ذكريات قذره الله يخربيت كده
حور بضحك: لا دي فضايح الذكرى الهباب لأيام العذاب
شذا بضحك: اه والله الذكر الهباب
حور :خلاص هستناكي يوم الجمعه
شذا : تمام يا حوريه قلبي
حور : وجع في قلبك هستناك سلام
قفلت حور وهي جواها وجع الدنيا وهموم اتقل من الجبال ولنفسها: ماااشي يا وائل عاملي قرد بس على مين لو انتا قرد فأنا القرداتي اللي هايرقصك اصبر الصبر حلو
عدوا يومين وحور ولا كأنها سمعت حاجه بس مركزه في الدفاتر اللي قدامها واكتشفت مصيبه
حور: يا نهار اسود ايه داه حرامي أهبل يا وائل ناسي يا ابن الموكوسه اني خريجه تجاره يعني الحسابات لعبتي وياريت لاعب في الدفاتر عدل لا دي مكشوفه لأي عيل اهبل بس اصبر على رزقك دورك جاي مهو شكل الفيران طلعت من جحورها وانا بعون الله هارجعكم ليها من تاني
فاقت من شرودها على صوت امها
حور : ها بتقولي ايه يا أما
هدي بإستغراب: مالك ممققه عينك في الورق اللي قدامك وسرحانه في ايه
حور: لا يا أما سلامتك دانا براجع حسابات الشغل الشهرين اللي فاتوا
هدي: ربنا معاكي يا ضنايا ويحميكي ويكفيكي شر أولاد الحرام قادر يا كريم
حور بابتسامه: اللهم امين ربنا يخليكي ليا يا أما بالحق اعملي حساب البت شذا بكره على الغدا معانا واعمليلها محشي وملوخية وبط وفراخ طفسه وانا عارفاها
هدي بتردد: بس يا بنتي مينفعش
حور بإستغراب: مينفعش ايه يا هدي
هدي بتوضيح: مينفعش المحشي وابوكي الله يرحمه ليه اسبوعين ميت مينفعش قبل الأربعين الناس هتاكل وشنا يا ضنايا
حور بإندهاش: ايه علاقه الأكل بالميت يا هدي مش فاهمه
هدي بصبر: عيب مينفعش المحشي والسمك يا حور الا بعد الأربعين عادات يا بنتي والناس خدت عليها
حور بتفهم: طيب يا أما أنا هانزل دلوقتي اجيبلك الحاجات في العربيه من السوق الكبير واحطها في كيس اسود علشان محدش يشوفها واظن الريحه الناس محدش هايعرف مين اللي طابخ تمام يا هدهد
هدي بقله حيله: لله الأمر من قبل ومن بعد حاضر يا ضنايا هاتي الحاجه في الدرا كده وانا هاعملك اللي يشرفك
حور ضمت امها في حضنها: تسلميلي يا ست الكل اللحق انا اروح اجيب الحاجات
ونزلت حور ساعه وكانت جابت كل الطلبات ودخلتها المدخل وقفلت الباب
حور :يا هدي تعالي شيلي معايا
هدي :ايه كل الأكياس دي
حور: فاكهه وطلبات للبيت يا أما اخلص بقى وحولي الحاجات معايا
هدي : طيب يا حور
يوم الجمعه صحيت حور بنشاط وقامت غسلت وشها واتوضت وصلت الضحى
حور بذهول: بتعملي ايه يا أما
هدي بخضه وتفت في عبها: بسم الله الرحمن الرحيم حرام عليك يا بت وقفتي قلبي في ايه حد يدخل كده زي القضا المستعجل
حور بعنين مبحلقه: لا والله طيب حقك عليا يا غاليه المره الجايه هاتنحنح بتعملي ايه بقى من النجمه
هدى: بجهز المحشي عملت التقليه وأهي على النار بتتسبك وسلقت الكرنب ووضبت ورق العنب وبقور الكوسه والبنتجان
تعالي بقى ارطفي الملوخيه على ما اخلص
حور : لا والله بتدبسيني يعني
هدى بشخطه: اخلص يا بت بقى وجع في مصارينك انا لسه هالف واحشي يا اختي داه بدل ما تقولي خليكي يا أما وانا اللف عنك
حور بذهول: الله صلاه النبي بتجبيها في اربيزي يعني اه وماله يا اختي هارطف الملوخيه مأرطفشي ليه هو انا صغيره بدل ما القيكي دبستيني منا عارفاكي يا هدي
هدى بإبتسامه: ربنا يرضى عليكي يلا بقى علشان اللحق اخلص
خلصت هدى لف كان وقت صلا الجمعه
يلا يا حور نصلي وانا هاجي ازود يكون البط استوى
حور :طيب ما تزودي من مرقه الفراخ مهي استوت أهي وخلصت
هدى بشرح وتوضيح : لا هازود من مرقه البط مرقه البط دسمه ووشها سمن تخلي المحشي مفحفح ووشه بيلمع يلا بقى وبلاش عطله
حور بإندهاش: يلا
اتوضوا وصلوا وقامت هدى تكمل الأكل ورن تليفون حور
حور: ايوه يا هندسه وصلتي فين
شذا : انا على اول الحاره أهو
حور: طيب هافتحلك الباب
دقيقه وكانت حور في حضن شذا ومتبته فيها
شذا: البقاء لله
حور ونعم بالله وهي لسه في حضنها
شذا بضحك علشان تخرج حور من جو الحزن اللي فيه : تعالى في حضن اخوك يا فواز
حور بإبتسامه: لسه زي ما انتي مش هاتتغيري
دخلوا الاثنين وسلمت شذا على هدى
شذا: البقاء لله يا طنط
هدى بوجع: ونعم بالله يا بنتي
شذا بشمشمه: اممم الله أكبر محشي يا جدعان انا شامه الريحه من على اول الحاره وصقفت بيديها يا هدي يا جامده
هدى من المطبخ بإبتسامه: مجايب حور هاتكون ايه اكيد مهبوشه زيها
شذا من الصاله: مقبوله منك علشان ريحه المحشي بس
نص ساعه وكانت هدي رصه الأكل
شذا قعدت قبل ما حد يقولها حتى تقعد
حور بذهول لا بجحه بجحه يعني مفيش كلام
شذا كانت بتاكل في آخر زادها
حور بصدمه بالراحه يا أما الأكل مش هايطير
شذا وبوقها مليان أكل : يا بنتي بطني نشفت من أكل امي اللي هريتنا كل يوم بطاطس تقولي ابوها كان بياع بطاطس
هدي بضحك: الله يخيبك يابت قولي الحمد لله
شذا وهي مستمره في الأكل: الحمد لله بس في أنواع تاني من الاكل غير البطاطس
حور : حشي حشي يا اختي مهو مال سايب
شذا وهي لسه مستمره في الأكل: منا باكل والله ما تعزمي
حور بلويه بق: اعزم هو انا لحقت يا حبيبتي انتي قومتي بالواجب وزياده انتي واكله نص دكر بط ونص فرخه لوحدك غير 3 اطباق ملوخية وغير المحشي اللي اتنسف انتي لو جايه من مجاعه الصومال وكتاب الله ماهاتكلي كل داه
شذا وهي مستمره في الأكل: طب والله دانا حتى اكلتي قلت اليومين دول
حور بذهول وصدمه: لا على يدي يا بت كنت انتي قاعده كده والأكل الضعيف قاعد النحيه التانيه بتحشي حش الحمير في النجيل لا الحمير بتشبع ولا النجيل بتخلص وبرغم داه كله عامله زي خله السنان
شذا بضحك: داه قر بقى ولا ايه
حور بتلويه بقوها يمين وشمال: هاقر على ايه يا حسره انا عملت المحشي وشوفته واعدم عمي لو كنت ذوقته
شذا بضحك وهي بردوا لسه بتاكل: هاتطمعي مش كفايه عملتي وشميتي سبيني بقى اكمل أكل
حور وهي ناقصه العياط: كلي يا اختي ادخلي يا أما هاتيلها قعر الحله تاكل اللي فيه
هدى بضحك: يابت هاتعدي على البت اللقمه
شذا بتأييد: ايوه والنبي يا هدي قوليلها
حور بصدمه: لقمه دي واكله الخبزه كلها ال لقمه قال
شذا : والله منا واكله سديتي نفسي
حور بصدمه وهي بتبص على الأطباق الفاضيه: لا اخص عليا ازي اقعدي يا حبيبتي اقرشي الأطباق مهي اللي باقيه
هدى بضحك: خلاص يا حور بقى وحدي الله
حور وهي ناقصه العياط: لا إله إلا الله يا أما انكتمت اهو وحطت ايدها على بوقها
هدي بضحك: طيب يلا خلينا نشيل الأكل
حور بحسره: اكل هو فين الله يرحمه كان ابن حلال بصي بقى انا جبت وعملت انا وانتي هي بقى اللي تشيل
هدي: عيب يا حور دي ضيفتك
شذا طلعت بعد ما غسلت ايدها: تسلمي يا هدي كوبايه شاي بقى بنعاع وتبقى عملتي معايا احلى واجب علشان نهضم
حور بتزوج بوقها يمين وشمال: دي عايزه صندوق حاجه سقعه علشان يهضم اللي كلته داه كله
هدى شاورت على عنيها: من عنيا يا ضنايا احلى كوبايه شاي بنعناع أخضر كمان وسابتهم وبدئت تشيل الأكل
قعدت حور وشذا في الصاله
شذا : ايه بقى هنتحرك أمته العصر قرب يأذن
حور : نشرب الشاي وعلى أقامه الصلاه على نتحرك بس فين الكاميرات انا شيفاكي جايه بطولك
شذا بتبرقه عنين: في العربيه ليه فاكره جايبه تاجر شنطه من بورسعيد هاجيبلك الكاميرات في هاند باج ولا ايه
حور بهزه رأس: تمام نشرب الشاي وعلى العصر نتحرك بإذن الله
قطع كلامهم هدى وهي بتحط صنيه على كوبايتين شاي بالنعناع
شربوا الشاي وفعلا بعدها بدقايق اتحركوا
شذا بإستغراب: احنا رايحين فين
حور: داه مكان مختصر وكمان علشان محدش يبقى قاطرنا انا عايزه الموضوع في الدرا فهماني
شذا: تمام طيب والعربيه
حور هانركنها في حاره قبل الورشه ونكمل الباقي مشي علشان لو وقفنا قدام الورشه اي حد ممكن ياخد باله
شذا: طيب والكراتين اللي فيها الحاجات
حور بنفاذ صبر: اكيد هانشيلها انا وانتي اخلص بقى
دقايق ووصلوا المكان وفعلا حور نزلت كرتونين كبار جدا جدا واتحركوا وخلال دقايق كانوا وصلوا حور طلعت المفاتيح وفتحت ودخلت هي وشذا وقفلت المكان تاني
شذا بإستغراب: قفلتي ليه يا بنتي
حور بعصبيه: شذا بلاش الغباء يطفح الله يسترك الورشه على الطريق والرجل راحه جايه يعني اي حد ممكن ياخد باله خلينا نخلص بقى يلا ابدأي
شذا :عايزه سلم
حور : عندك اهو جابتلها السلم وفعلا خلال 3 ساعات كانت شذا خلصت كل حاجه
حور: ها هانعمل ايه بقى
شذا: انا كده ركبت الكاميرات ووصلت دوائر الكهرباء فاضل بقى نسطب البرنامج على التليفون وكل دبه نمله هاتشوفيها صوت وصوره
حور بقلق واستفسار: طيب هو ممكن حد ياخد باله من السلوك اللي ركبتيها دي
هزت شذا رأسها بنفي: لا يا حبيبتي انا عملتها على البوات العمومي علشان ميبقاش ليها دخله ظاهره في الورشه خالص اطمني وطمني قلبك
حور: تمام التليفون أهو
شذا: بصي هو أفضل يكون تابلت علشان تشوفي أوضح وكمان تقدري تشوفي اكتر من مكان
حور ثواني ودخلت من باب جانبي هي وشذا وطلعت مكتبها وفتحت الدرج وطلعت تابلت
حور: اتفضلي ياست
شذا: تمام هاتي وبدئت تسطب البرنامج وشغلت كل الكاميرات وبدئت تعرف حور كل كبيره وصغيره عليه وازاي تحتفظ بكل حاجه
حور: حلو اوي كده
شذا : اي خدمه
حور: طب يلا بقى نقفل المكان ونلم الكراتين والورق داه كله
شذا : يلا يا اختي يلا
وفعلا لموا كل حاجه وخرجوا وقفلت حور المكان تاني زي ما كان ورجعوا العربيه وهما ماشيين حور عدت على مقلب زباله كبير كانت العربيه بتشيل الزباله نزلت وعطت الرجل الكرتونه واللي فيه النصيب وكملو طريقهم
شذا: ناويه على ايه
حور: الله اعلم المستخبي كده هيبان
شذا : ان شاء الله خير
حور : ونعم بالله
نزلت حور على اول الحاره وكملت شذا طريقها
رجعت حور البيت والتابلت بقى ملازم ايدها
وعدا اسبوع على نفس الحال وحور بدئت تقلل من مرواحها الورشه على قد ما تقدر
وداه خلى هدى تستغرب
ووائل اطمن وافتكر ان حور خلاص تعبت من شغل الورشه والدنيا هاتخلاله من تاني
وتاني أسبوع وائل كان اتفق مع المعلم جمعه انهم يرجعوا للشغل تاني وان حور بقت سايبه الورشه طول الوقت
وتاني يوم بعد الشغل ما خلص جاب جمعه 4 عربيات مسروقه ومبلغ بيها ومعاه عمال وصنيعيه من اللي شغالين معاه وفكوا العربيات وقطع الغيار السليمه خدها وائل وحطها في كراتين قطع الغيار اللي طلعت من الورشه ودخلها المخزن وهو مطمن
جمعه بضحكه: ايوه كده أيام العز رجعت تاني الا الواحد نشف بسبب بنت عامر الكام يوم اللي فاتوا دول يا ساتر من دي بت
وائل: على قولك يا ساتر البت طالعه لابوها كان دوغري الله يرحمه بقى متجوزش عليه إلا الرحمه بس بردوا اكل العيش عايز فهلوه
جمعه: اومال داه نهر فلوس يا أبا كده انا هاخد الخرده واحملها ونصيبك منها هايوصلك
وائل: تمام ولما القطع دي تطلع: نصيبك في الحفظ والصون
جمعه: تمام يا معلَمه
وائل: تمام يا معلم
واتحرك كل منهم في طريقه غافلين عن التي تسمع وترى كل شيئ وداخلها نار تحرق الأخضر واليابس
وفضل الموضوع يتكرر كل يوم ولمده أسبوع وحور متبعاهم كده تمام اوووي كده جبتوا اخركم
وتاني يوم حور وصلت الورشه وهي ناويه على نيه
يا ترى حور ناويه على ايه تااااني يا بنت عامر ويا ترى هاتلحقي ولا القدر له رأي تاني…..؟

يتبع…

لقراءة الفصل التالي : اضغط هنا

لقراءة باقي حلقات الرواية اضغط على : (رواية تربية حواري)