رواية الملاك الشرس الفصل الثالث 3 بقلم زينب فراج

رواية الملاك الشرس الفصل الثالث 3 بقلم زينب فراج

رواية الملاك الشرس البارت الثالث

رواية الملاك الشرس الجزء الثالث

رواية الملاك الشرس الحلقة الثالثة

“سبحان الله وبحمده سبحان الله العظيم”
ظل زياد صامت لكن لم يطول صمته كثيرا فقد سحب سيدرا من يداها ونظر إلي عيناها الدامعه قائلا : سيدرا
سيدرا بصوت ضعيف آثر البكاء : نعم
وضع يداه في جيب بنطاله ثم أخرج يداه ممسكا بهاتف فقال وهو يمد يداه لها : انا جبتلك التلفون ده وعليه رقمي ورقم ماما ورقم نور اول لما توصلي تكلميني مفهوم
سيدرا بإبتسامه بسيطه من بين دموعها : حاضر
اتجهت إلي الباب وقبل خروجها سند بيداه على الباب ليقول : استني هوصلك للقطر
سيدرا بإماء : ماشي
إبتسمت بوجع وهي تنظر إلى نور التي تبكي بانهيار ومروه التى تضم نور
سيدرا : جماعه متحسوسنيش ان انا مش رجعه
قبض زياد على يداها بقسوه قليلا : متقوليش كده تاني
تلاشته سيدرا تماما لتقول : هكلمكوا كل يوم يلا باي
ثم ارسلت لهم قبله فى الهواء
ذهبت مع زياد الى محطه القطار…
سيدرا : هتفضل ساكت كتير زهقت على فكره
لا إيجابه حيث ظل يسير على اقدامه فقالت سيدرا بحنق : على فكره انا مش بحب كده
لا رد…
سيدرا : زياد انا عاي…..
لم تكمل حديثها فرأت هذه المرأه التي تدعي اسماء فقالت ببرود : هتمشي من غير ما تقوليلي
ذهبت سيدرا سريعا دون الرد فجري زياد خلفها ثم

مسك يداها منعا إيها من الذهاب : لازم تودعي مامتك
سيدرا بعصبيه : هي عرفت اصلا ان انا مسافره ازاى
زياد بهدوء : انا الى قولتلها
سيدرا بعصبيه : وانت عرفت ازاى
زياد بعمليه : قابلت نور وهي خارجه بتعيط وكانت خابطه في واحد صحبي وشتمته فلحقتها وقالتلى ان انتي ماشيه وبعدين روحت اشتريتلك تليفون وقولت لمامتك
سيدرا بحنق : ومين قالك اني عايزه اشوفها انا مش عايزه اشوفها تاني اصلا
اسماء ببرود : ليه كده علي فكره هو الى جه اترجاني علشان اجيلك وتكوني مبسوطه انا مش هموت من غيرك يعني
هبطت دموع سيدرا من تلك الأم التي لا ترحم ولا تحن : انا بكرهك والله بكرهك
ثم أكملت حديثها لزياد : هي دي الى كنت عايزني اشوفها دي متستهلش أصلا أن أبص عليها
حاول زياد تهدأتها ليجد نفسه يقول : عيب يا سيدرا دي امك
سيدرا بعصبيه : مفيش ام بترمي بنتها بره البيت مفيش ام بتعامل بنتها كده….زياد
زياد : نعم
لم تكمل حديثها حتي أكملت اسماء بشماته : يا حرام هتسفري والله صعبانه عليه
غضبت سيدرا كثيرا من هذه المرأه آي أم هذه، فنظرت لزياد بغضب ثم مسكت يداه ووضعت به الهاتف بقوه قائله : انا معتش عاوزه اعرفكوا كلكم واوعدكم معتوش هتشوفوا وشي علشان معتش اصعب عليكوا
ثم تركتهم سيدرا واتجهت نحو القطار وظل زياد يبكي على حبيبته فقال بعصبيه لنفسه : انت ازاى تعمل كده انت اصلا متستهلهاش مكنش لازم تزعلها انت عارف ان مامتها مش بتحبها تروح تتضيقها وتجبها لحد عندها غبي .. غبي
اسماء ببرود : انتي عارف هي مشت ليه
زياد بعصبيه : ليه
اسماء : علشان بتحبك ومش هتسمح لنفسها انها تبقي ضغيفه قدام حد مهما يكون مين
زياد بغضب منها ومن نفسه أيضا فهو من طلب منها المجئ : ولما انتي عرفها كده بتكرهيها ليه
ظهر على وجه اسماء الحزن ثم تابعت ببرود : انا مش بكرها مفيش ام بتكره بنتها عن اذنك يا
ثم تابعت بقرف وهي تنظر له من أعلى إلى أسفل : زياد
ثم تركته وسط نظرات الغضب منه فضغط بقوه على يده: ربنا ياخدني بعتها عني علشان وحده زي امها دي دي اصلا متستهلش تكون ام…
الملاك الشرس 🍒
زينب فراج zeinab farag 🍒
استقلت سيدرا مقعدها ثم انطلق القطار الى القاهره
في الطريق تتفحصت سيدرا العنوان قائله : أه الحمد لله كنت خايفه اكون نسيته
ثم نظرت للعنوان وتذكرت بعض الاحداث
فلاش باااك…
مدت سيدرا يداها حيث كان يوجد ورقه : زياد ممكن تكتبلي العنوان هنا
أخذ زياد الورقه من يداه وظل يتطلع بها : من عنيا يا روح زياد
سيدرا بخجل وقد احمر وجهها : ابيه زياد انا عايزه العنوان وبسرعه عندي مذاكره
زياد بخبث : في ايه يا حبيبة ابيه واحد وبيدلع
اخته ايه عيب
لم تتحدث سيدرا وقد نظرت إلى الأرض
باااك…
ظهر على وجهها ابتسامه فقالت سيدرا : هتوحشني اوي انت ونور وطنط مروه
_______________

محمود : ايه بردو مش عجبك حاجه
مدت جيلان شفتيها إلى الأمام : مس حلوين يا ابيه
جاءت فتاه تدعي ليلي تعمل بالمحل : اساعد حضرتك في حاجه
تنهد محمود بقوه قائلا : مش عاجبها اي حاجه
جلست ليلي على ركبتيها لتصل لطولها : اذيك يا قمر انا ليلي وانتي
جيلان بإماء : جيلان
ليلي : اسمك حلو اوي يا جيلو
جيلان : مرثي
ليلي : ممكن اخدها على انفراد لو سمحت
محمود بجديه : ليه ان شاء الله
إبتسمت ليلي بهدوء وهي تضع يديها على كتف جيلان قائله : احنا بنات شكل بعض وهنفهم بعض مش كده ولا ايه يا جيلو
جيلان : أه ياريت
نظر لها محمود بحاجب مرفوع قائلا : اولا اسمها جيلان جيلو ده يبقي ابن اختك وانتي يا جيلان شكرا اوي على المعامله دي
ثم تابع بقرف : يا جيلو
ضحكت جيلان واخذت يد ليلي وذهبت
محمود : بقا حتة بنت زي دي تعصبني بس قمر بنت الإيه
ثم تابع في نفسه : محمود اهدي كده يا حبيبي…
ماشي يا جيلان حسابك معايا
عند جيلان وليلي..
قالت ليلي وهي تعطي لها إحدي الفساتين الرقيقه : ايه عاجبك ده
جيلان بإعجاب : الله حلو اوي
ليلي : طيب يلا وانا هساعدك
جاء محمود وقال بهدوء : ايه لقيتي حاجه حلوه
جيلان : ايوه عن اذنك يا ابيه هلوح اغير
ثم اخدتها ليلي وذهبو الى البروفا
بعدما اخذتها ليلي الي البروفا وغيرت لها ملابسها قالت ليلي بإعجاب شديد وهي ترها أشبه بالأميرات بهذا الفستان الأزرق الذي يعكس جمال عيونها : الله حلو عليكي اوي يا جيلو
جيلان : بجد يا ليلو
ليلي بابتسامه : ليلو..عموما حلو اوي بسم الله ماشاء الله لاء دا انا خايفه عليكي من الحسد
ثم اكملت بمرح : تعالى بقا نوري للجبل إللى بره ده
جيلان بإستنكار : ابيه محمود ده طيب اوي يا ليلو بث انتي كلميه كده وهتحبيه خالث
ليلي : طيب يلا يا لدغه
جيلان بحزن مصطنع : انا يا ليلو
ليلي : ايه كل الناس سكر زيك كده يارب اجيب بنت حلوه كده
جيلان: هو انتي متج….
قطع محمود هذا الحديث اللطيف قائلا بغضب : ايه لسه
ليلي : خلاص يا فندم خلاصنا
جيلان بتعجب : فندم
ليلي : ولا يهزك يا بنتي انا مش كده غير في الشغل دا انا فريش خالص
محمود : ايه لسه هترغو كتير

فتحت ليلي البروفا ثم خرجت جيلان بهدوء، فأخذ محمود يد جيلان ولفها : ايه الحلاوه دي
جيلان : حلوه يا ابيه
نظر لها محمود بإعجاب ثم نظر الي ليلي : قمر يا جيلو
ابتسمت ليلي ابتسامه صغيره وقد رائ غمازاتها لأول مره
إبتسم محمود قائلا بداخله…ايه القمر ده
ثم أكمل بصوت مسموع : شكرا جدا يا انسه ليلي
ليلي بعمليه : على ايه يا فندم ده واجبي
محمود : يلا يا جيلو
ذهبت جيلان إلى ليلي لتقول بود : سلام يا ليلو
ضمتها ليلي بحب قائله : باي يا جيلو هتوحشيني
محمود بمرح : ايه جو العشق الممنوع ده
إبتسمت ليلي بتهكم قائله بداخلها…. ايه ده بيهزر عادي لاء وألشه حلو اوي
خرج كلا من جيلان ومحمود من المحل
قالت ليلي بداخلها وهي تكمل عملها : انتي هبله يا به يلا شوفي شغلك عمرك ما هتشوفيه تاني اصلا
ستووووب بقا….
ليلي فتاه تعمل في محل روشيه ذات قلب أبيض جدا ذات عيون زرقاء كالبحر وشعر أسود طويل جدا وهادئه تبلغ من العمر الواحد وعشرون عاما
****************
وصل القطار الى القاهره فهبطت منه سيدرا قائله بتعب : أااه اخيرا وصلت
ثم اكملت : هروح فين انا معرفش اي حاجه بس القاهره حلوه اوي وريحتها حلوه يارب ساعدني انا مليش غيرك
ثم ذهبت لا تعرف الى اين فقابلت فتاتان ثم تذكرت نور
فلاش باااك…
سيدرا بعصبيه من تلك العنديه : بت يا نور إتهدي
لفت نور وجهها بحزن : ماشي يا سيدرا
ضعفت سيدرا أمام نظراتها البرئه لتقول : ايه زعلتي يا نور
نور بحزن حقيقي : أنتي إللى مش راضيه تيجي معايا اسكندريه
سيدرا : هاجي معاكي ازاى يا مجنونه
نور بإصرار : انا قولت لبابا تيجي معانا وقالي ماشي بليز بليز
سيدرا بإستسلام : خلاص يا اخرة صبري
ضمتها نور بحب وهي تقول: يااااي اخيرا يا شيخه
باااك…..
إبتسمت سيدرا بوجع قائله : وحشتيني اوي يا نور
ثم ذهبت إلى الفتاتين وقالت بإبتسامه كبيره : ازيكو
آحدي الفتيات : اهلا وسهلا عايزه حاجه
مدت سيدرا يداها وهي تمسك الورقه قائله : عايزه اعرف العنوان ده فين
…. : انتي شكلك جديده في القاهره اول مره تيجي
سيدرا : ايوه
……. : العنوان ده بعيد اوي ده في الزمالك
سيدرا : طيب لو عاوزه اوصله اوصله ازاى
……. : هتركبي مواصله من الى هناك دول للزمالك وهناك هتسألى وهما هيوصلوكي
سيدرا بإمتنان : شكرا جدا ليكم
…… : محتاجه حاجه
سيدرا بابتسامه : لاء شكرا جدا ربنا يوفقكو
ذهبت سيدرا الى المواصلات لكي تذهب الى الزمالك ولا تعرف ان حياتها سوف تتحول 180 درجه…
الملاك الشرس 🍒
زينب فراج zeinab farag 🍒
في المنصوره تحديدا في بيت مروه…..
نور بصوت أجش آثر البكاء : خلاص يا زياد مشت
زياد : ايوه يا نور
انهارت نور في البكاء فضمتها مروه بحنيه ثم ربتت على ظهرها وهي تقول : خلاص يا بنتي ربنا يوقفلها ولاد الحلال يا رب
زياد بعصبيه : الغبيه مشيت من غير ما تاخد الموبايل
مروه : ازاى يا بني
قص عليهم زياد ما حدث لينهي حديثه قائلا : هو ده الى حصل
نور وقد زاد بكائها : ياربي هنوصلها ازاى دلوقتي
زياد بضيق : مش عارف
نور بعصبيه : انت اصلا متتكلمش كان لازم تعمل دور الشهم وتجيب امها
زياد بعصبيه : بصي انا مش ناقصك اصلا ماشي
مروه : خلاص يا ولاد بقا عيب كده
ثم اكملت : قومي يا نور إغسلي وشك ويلا علشان ناكل وانت يا زياد
لم تكمل حديثها حتي وقف زياد فقال بضيق آثر الضغط : انا داخل أوضتي محدش يزعجني
نور بصوت هادئ كي لا يسمعها : في كسحه يا اخويا
***************

في القاهره…
وصلت سيدرا الى الزمالك وتحديداً محل roshe “روشيه”
دلفت سيدرا إلى المحل بتوتر عندما دخلت المحل قابلت فتاه فقالت بودها المعتاد : أساعد حضرتك في حاجه
سيدرا : عايزه مدام اصاله
…… : هي عارفه ان انتي جايه
سيدرا : هي عارفه أني هاجي بعد 3 أيام بس انا جيت بدري
…… : طب تعالى معايا
ثم اخذتها الفتاه وذهبت إلى غرفه مدام اصاله وفور وصلهم قالت بهدوء : خليكي هنا وانا هدخل اقولها انك جيتي اسمك ايه
سيدرا : سيدرا الى جايه من طرف مدام سميحه
…… : تمام
طرقت الفتاه الباب فأذنت لها أصاله بالدخول
اصاله : في ايه يا ليلي
ليلي بعمليه : مدام اصاله في واحده جايه من طرف مدام سميحه عايزاكي
اصاله : بس دي معدها الاسبوع الجاي
ليلي بود : شكلها جايه من سفر وتعبانه جدا يا مدام
إبتسمت أصاله وهي تقول : احلى حاجه فيكي طيبتك
خليها تدخل يا حنينه
ابتسمت ليلي بعمليه : حاضر يا مدام
ثم خرجت وقالت ليلي لسيدرا التي تقف تنظر للمكان بتفحص : اتفضلي يا سو
فرحت سيدرا من لطفها معها وتذكرت نور عندما قالت لها سو
سيدرا : شكرا يا …..
ليلي : ليلي
أصاله : مش وقته يا ليلي روحي شوفي شغلك
ليلي بعملية : حاضر يا مدام
مالت ليلي وهمست في اذن سيدرا قائله : متخفيش هي طيبه جدا
ابتمست سيدرا ثم دخلت الى غرفه اصاله وقالت بهدوء : أزيك يمدام
أصاله : ايه الى جايبك بدري عن معادك
سيدرا : معنديش مكان اقعد فيه وخلصت امتحانات فقولت ابدا اشتغل
اصاله : طيب روحي غيري هدومك وانا هقول لليلي تعرفك كل حاجه
إبتسمت سيدرا قائله : شكرا جدا على زوقك يا مدام وان شاء الله هعمل كل جهدي علشان مقصرش
اصاله : اطلعي نادي لليلي
سيدرا بإماء : حاضر يا مدام
ذهبت سيدرا إلى ليلي ثم أخبرتها بالمجئ لأصاله فدلفت لها ليلي
ليلي بهدوء : نعم يا مدام اصاله
اصاله : خلى سيدرا تغير هدومها واعطيها هدوم الشغل تعرفيها كل حاجه عن الشغل بس من غير لكلكه فهمه يا ليلي
ابتسمت ليلي وهي تقول : من عنيا يا مدام يلا يا سو
اصاله : لاء سو دي يبقي هيحصل رغي وانا مبحبش
إبتسمت ليلي قائله : مش كتير يا مدام يلا عن اذنك
سيدرا : عن اذنك يا مدام
*اصاله لديها سلسلة محلات روشيه طيبه جدا وحنونه متزوجه ولديها ولد وبنت توأم يدعو ديانا و ادم وابن كبير يدعي عمار وتحب ليلي كثيرا
فاليلي تعمل عندها منذ أكثر من 3 سنوات
أخدت ليلي سيدرا لكي تعطيها ملابس العمل والتي عباره عن جيبه تصل لأسفل الركبه لونها كحلي مع قميص ابيض
اخدت ليلي الملابس من الخزنه قائله : اتفضلي يا ستي
إبتسمت سيدرا بإمتنان قائله : شكرا اوي يا ليلي
ليلي : من دلوقتي تقدري تعتبريني صحبتك ولا ايه
سيدرا بإمتنان : شكرا اوي على لطافتك
ليلي : ايه شكرا شكرا شكرا دي مفيش عندك غير شكرا ايه القموس فيه كلام كتير غير شكرا
ابتسمت سيدرا بهدوء ثم قالت : بس علشان لسه مش عارفه اتعامل ازاي اول مره ابعد عن بلدنا
ليلي بتسأل : انتي كنتي عايشه فين

سيدرا : المنصوره
ليلي : وانا كمان اصلي من المنصوره
سيدرا بدهشه : بجد
ليلي : اه والله من شارع الجامعه بس اتنقالنا هنا لما كان عندي 12 سنه علشان شغل بابا كان هنا وكده
ثم اكملت : انتي معاكي حد هنا
سيدرا : لاء لوحدي مليش حد بابا ومات ومليش غير
ثم صمتت وتتذكر افعال امها لها فظهر على وجهها الكثير من علامات الحزن
ليلي وقد لاحظت : يلا يا بنتي غيري هدومك هنفضل نرغي كده كثير
سيدرا : طيب حاضر
***************
في بيت اسماء…
اسماء ببكاء : حرام عليك انتي بتعمل كده ليه انا حتي معرفتش أودع بنتي بنتي مشت حتي من غير ما احضنها من غير ما تعرف انو انا بحبها قد الدنيا ده كله ليه عايز تبعدها عني ليه انا عملتلك ايه…
………
ماذا يحدث مع اسماء….
هل تحن الى ابنتها….

يتبع…