رواية احببتها في وقت خاطئ الفصل الثالث 3 بقلم ندى سامي

و فجأه لقاها نازله بفستان بيبى بلو و طرحه بيضه و كانت حاطه ميكب خفيف و كانت جميله جدا لدرجه انو سرح معاها شويه

رنيم : خلللصت !!

بدر بفوقان : اه اه يلا

خدها و راحو ركبو العربيه و راحو مكان الحفله و بعد نص ساعه كانو وصلو

_______________________

فى الحفله

كان مكان كبير جدا و شكلو حلو و فى ناس كتير اوى و رجال أعمال و و بنات حلوين كتير و ده خلى رنيم تضايق

بدر : تعالى هروح اسلم على صحابى

راحت وراه و لقتو رايح لشله فيها بنات و ولاد و كل البنات لابسين لبس ضيق اوى و قصير و سلم عليهم

_ ايه ده يا بدر أنت جايب بنت اختك معاك

كلو ضحك و واحده تانيه قالت : مش صغيره عليك دى يا بدر ما كنت تاخد وحده منا كان هيبقى احسن

رنيم اضايقت و بصت لبدر على أساس هيرد عليهم و ياخد حقها بس حصل العكس و سكت متكلمش

– مين دى يا بدر

بدر : مراتى

الكل بصدمه : نعمممم

_ انت متجوز طفله !!

بدر كان لسه هيرد رنيم قالت : طفله فى عينك انا مش طفله

بدر : رنيييم بس

_ انتى بتردى عليا

رنيم : اه هتعملى ايه يعنى

_ بجد بيئه اوى مكنش المفروض تاخدها يا بدر دى واضح جايه تعمل خناقه

رنيم كانت لسه هترد لقت بدر مسكها من أيدها جامد و قال : انا ماشى يا جماعه استمتعوا بوقتكو

خدها و راح وقف بعدين و هو بيبصلها بعصبيه و بيحاول يهدى نفسو

بدر : احنا مش جايين نعمل مشاكل و خناقات سامعه اى مشكله هتحصل هنا هيحصل وراها خساير كتير

رنيم : هى إلى قليله الادب و عماله تتكلم و انت مش بترد فقولت ارد انا

بدر : مش برد عشان مش عايز مشاكل و ياريت طول ما احنا هنا متتكلميش تمام

رنيم بغيظ : طيب

بدر : اقعدى هنا متتحركيش هروح للناس إلى هناك و جاى

رنيم : ماشى

راح و بعد شويه جه جارسون و نزل مشروب و هى افتكرته عصير و خدته شربته و اول ما خدت بوق قلبت وشها

رنيم : ايه ده طعمه عامل كده ليه .. يمكن نوع جديد !

جربت تانى و بقت تشرب عادى عشان كانت عطشانه بس الى مكانتش تعرفه أن دى خمره لحد ما بدر جه و لقاها بتاخد اخر بوق فبرق بصدمه

بدر : يخربيتك انتى بتشربى ايه

رنيم كانت الخمره بدأت تعمل مفعول فقالت بدون وعى : العصير ده طعمو غريب بس حلو

بدر : عصير ايه انتى عبيطه دى خمره

رنيم بسكر : و مالو يعنى .. بقولك ايه قولو يجيب كُبايه تانيه

بدر : رنيم قومى يلا هنمشى

رنيم : لا لا خلينا شويه الجو حلو

بدر : رنيم يلا مش هينفع تفضلى كده كتير

حاول يقومها بس هى كانت بتقاوم فشالها مره واحده و الناس كلها كانت بصالهم بس هو مهتمش و راح ركبها العربيه و مشى

رنيم : انت رخم انا مكنتش عايزه امشى انا بقالى كتير مروحتش حفلات

بدر : انتى مستوعبه انتى شربتى ايه يا رنيم

رنيم : عصير

بدر عرف انها مش فى وعيها فسكت و كمل سواقه و هى نامت فى الطريق و لما وصلو شالها تانى و طلعها الاوضه و نيمها على السرير وخرج

_______________________

تانى يوم

صحيت رنيم و لقت رأسها تقيله و مصدعه جامد و كانت بتقوم بصعوبه و قامت دخلت الحمام خدت دش و خرجت و كانت فاقت من إلى شربته و نزلت تحت لقت بدر قاعد قدام التليفزيون فراحت قعدت جمبو

رنيم : هو ايه الى حصل امبارح

بدر : روحنا بدرى عشان حضرتك شربتى بالغلط

رنيم : طب و ايه المشكله لما اشرب انا شربت ايه يعنى

بدر : خمره

رنيم بصدمه : نعمممم بتهزر

بدر : لا والله و كمان مكنتيش عايزه تمشى فخدتك بالعافيه نروح و نمتى فى الطريق و مصحيتيش غير دلوقتى

رنيم : لحظه بس هو مدام انا نمت امال غيرت ازاى !؟

بدر سكت فصوتت فيه : يا حيوان بقى بتستغل الفرصه يا زبا*له

قالت كده وهى بتضربه فمسك أيدها و قال : ما تهدى هو انا رديت .. انا قولت لمرات الحارس هى إلى تيجى تغيرلك عشان مينفعش تنامى بالفستان

رنيم سكتت و حست براحه لما قال كده بس لما استوعبت إلى قالته غمضت عينها بإحراج و قامت من جمبو و دخلت المطبخ

_______________________

فى مكان تانى

_ مالك يا نونو

نيلى : شوفتى الزفته إلى اتجوزها

_ لا مشوفتهاش انتى شوفتيها فين

نيلى : امبارح فى الحفله جت معاه و الهانم شربت و خلتو يشيلها عشان يروحو مش عارفه اتجوزها على ايه اصلا وهى طفله كده

_ طب وانتى مضايقه من ايه هو مش قالك بيحبك انتى

نيلى : مش حاسه كده و كمان هو بقالو حبه مش بيكلمنى و مش بنتقابل

_ خلاص قابليه و قوليلو انو يتقدملك كده كده الشرع محلل اربعه

نيلى : انتى عبيطه ما انتى عارفه انى معاه عشان الفلوس إلى معاه مش اكتر اروح متدبسه فى جوازه

_ ما انا مش فهماكى يا نيلى الصراحه نرضيكى ازاى

نيلى : يطلقها

_ انتى عارفه أن باباه مش هيوافق

نيلى : مش مهم بس لازم يطلقو

_______________________

بليل فى كافيه

نيلى : حبيبى هو انت مش ناوى تطلق البت إلى معاك دى

بدر : للاسف مش هينفع يا نيلى

نيلى : ليه

بدر : عشان بابا انتى عارفه

نيلى : وانت هتفضل ماشى ورا كلام باباك

بدر بعصبيه : قصدك ايه يعنى

نيلى : قصدى إلى فهمتو يا بدر انت ماشى ورا كلام باباك و مش عارف تقولو لا و …

قبل ما تكمل كان ضربها بالقلم و قال : انا كل ده ساكتلك و عارف انك مش بتحبينى و بتعملى كده عشان الفلوس و مش راضى اتكلم بس هتقللى منى هزعلك انتى فاهمه

قال كده و سابها ومشى و الكافيه كلو كان بيبص عليهم وهى اتعصبت و خدت حاجتها و مشيت

_______________________

فى الفيلا

رجع بدر و هو متعصب من إلى حصل لقى رنيم واقفه قدامو و كان شكلها حلو و مجهزه اكل على السفره

رنيم : قولت اعتذر عن سوء الفهم إلى حصل الصبح و اهو ابقى عملت حاجه حلوه

بدر : مش قادر اكل ولا اتكلم خليها مره تانيه

قال كده و طلع الاوضه و رنيم اضايقت من إلى حصل وحست انو كسفها و مش عايز يقعد معاها فقدت على السفره وهى حابسه دموعها و كلت كام معلقه و مجالهاش نفس تكمل اكل و طلعت نامت بس فى اوضه تانيه و مكانتش متنضفه بس نضفت السرير و نامت

_______________________

بعد يومين

رنيم : بقولك يا بت يا نور بفكر اعمل بيدج و ابيع فيها اكسيسوريز و ميكب

نور : حلوه الفكره دى اوى

رنيم : بس هجيب الحاجات منين

نور : انا اعرف مكان بيبيع حاجات بالجمله حلو اوى هبعتلك عنوانو بس هو انتى هتجيبى فلوس الحاجات منين

رنيم : انا كنت محوشه فلوس و كمان الفلوس إلى المدرسين كانو بيدهوالنا و ممكن استلف من بابا

نور : اشطا و لو عايزه اى حاجه قوليلى

رنيم : حبيبى تسلمى

نور : هقفل اشوفلك عنوان المحل و الرقم

رنيم : تمام سلام

قفلت معاها و هى متحمسه للمشروع بتاعها و لقت بدر بيدخل الاوضه فكشرت و متدوش اهتمام

رنيم قبل ما تروح على السرير و تنام : انا هنزل بكره هجيب شويه حاجات

بدر : حاجات ايه

رنيم : ميكب و اكسسوارات

بدر باستغراب : بس انتى مش بتحطى ميكب اصلا

رنيم : مش عشانى

بدر : امال

رنيم : هعمل بيدج ابيع فيها الحاجات دى

بدر كان لسه هيتكلم فقالت وهى بتشد الغطا : تصبح على خير

_______________________

عند نيلى

نيلى بغيظ : شوفتى عمل فيا ايه يا فرح

فرح : عمل ايه

نيلى : اتخانق معايا و ضربنى بالقلم عشان بقولو ماشى ورا كلام باباك

فرح : ما هو انتى برضو مكنش المفروض تقولى كده يا نيلى

نيلى : لو مكنتش قولت كده مكناش هنخلص

فرح : ما انتو خلصتو فعلا يا فالحه ما هو كده سابك

نيلى : لا طبعا انا متسابش و هيرجعلى

فرح : ازاى بقى يا ناصحه

نيلى : هتشوفى هخليه يرجعلى ازاى

_______________________

عدى اسبوعين و رنيم بدأت فى البيدج بتاعتها و كانت بتكسب حلو رغم أنها لسه باديه و بدر صالح رنيم على طريقتو معاها لما رجع من تحت قبل كده و هى قبلت اعتذارو و قربو من بعض شويه بس بدر كل شويه يتغير و يتعامل بطريقه رخمه و هى بتضايق من كده و انو على أقل حاجه يتعصب عليها و رنيم التنسيق بتاعها طلع و قدمت فى كليه الالسن الى كان نفسها فيها

______________________

رنيم : بدر

بدر : نعم

رنيم : عايزه أخرج

بدر : طب و بعدين

رنيم : تيجى نروح الزمالك نتمشى على النيل و ناكل ايس كريم و نتصور كتييير عشان بحب اتصور

بدر : ماشى بقالى كتير مروحتش بس امتى

رنيم : دلوقتى

بدر باستغراب : دلوقتى !! الساعه 8

رنيم : يا سلام ما انت كنت بتنزل مع صحابك و بتقعد لبعد الفجر ولا هو عشان معاك الطفله مراتك زى ما كلو بيقول مينفعش

بدر باستفزار : يعنى هما كدبو ما انتى طفله فعلا

رنيم بصتلو بحزن و قامت و هى مطايقه و كانت هتطلع فوق بس بدر قام رواها بسرعه و مسكها و هو بيضحك

بدر : استنى بس بهزر انتى قموصه ليه

رنيم : شيل ايدك عايزه اطلع

بدر : خلاص اطلعى بس البسى عشان هننزل

رنيم بفرحه طفوليه : بجد !!

بدر بضحك : ايوه يلا بسرعه قبل ما ارجع فى رأيى

رنيم : صاروخ ثانيه بس

طلعت بسرعه و هى بتجرى و بدر وقف يضحك عليها و طلع وراها

رنيم : انت بتعمل ايه هنا أخرج برا عايزه البس

بدر : هاخد لبس وأخرج الله انزل بلبس البيت يعنى

رنيم بضحك : طب بسرعه

بدر خد اللبس و هو بيضحك و خرج و رنيم راحت خرجت لبس و لبست وهى مبسوطه

_______________________

فى الزمالك

كانو بيتمشو فى الممشى و هما بيتكلمو و فجأه رنيم وقفت و فتحت فونها و ادتو لبدر

رنيم : خد صورنى

بدر : يا بنتى احنا ملحقناش نمشى

رنيم : هننسى و مش هتصور صورنى دلوقتى

بدر بضحك : ماشى يا ستى اقفى

وقفت و هو صورها اكتر من صوره عشان كل ما تتصور تقول لا مش حلوه و تتصور تانى لحد ما اخيرا صوره عجبتها و رجعو يتمشو و وهما بيتمشو لقو محل بتاع ايس كريم

رنيم : يلا نجيب ايس كريم

بدر : ماشى تعالى

كانو بيعدو الشارع بس رنيم الموبايل بتاعها كان هيقع فوقفت تلحقه و قبل ما تتحرك كانت عربيه قربت منها بس لحسن حظها بدر خد بالو و راح شدها بسرعه

بدر بزعيق و خوف : انتى ايه إلى وقفك فى نص الشارع

رنيم بخوف : الموبايل كان هيقع فكنت بلحقه مخدتش بالى أن فى عربيه

بدر : احنا فى شارع يعنى ايه مخديش بالك

رنيم مرتدش عليه عشان كانت لسه خايفه من إلى حصل عشان كان ممكن تموت و هو خد بالو فهدى و حضنها محاوله أنو يهديها و بالفعل هديدت و خدها و راحو يجيبو ايس كريم

بدر : عايزه طعم ايه

رنيم : اوريو

بدر طلب و خد الطب و راحو يقعدو على النيل و قعدو يتكلمو و وهما بيتكلمو لقو …..

_ بدرررر حبيبى انت بتعمل ايه هنا

بدر : …..

_______________________

يتبع..

لقراءة الفصل التالي : اضغط هنا

لقراءة باقي حلقات الرواية اضغط على : (رواية احببتها في وقت خاطئ)